AN COIMISIÚN EORPACH

An Bhruiséil,3.5.2024

COM(2024) 186 final

ATHBHREITHNIÚ BLIANTÚIL ARNA DHÉANAMH AG AN gCOIMISIÚN

maidir le Tuarascálacha Bliantúla na mBallstát ar Ghníomhaíochtaí Creidmheasa Onnmhairiúcháin de réir bhrí Rialachán (AE) Uimh. 1233/2011

1. Réamhrá:

An t‑athbhreithniú bliantúil don bhliain 2021 maidir le gníomhaíochtaí creidmheasa onnmhairiúcháin arna dtacú go hoifigiúil, déantar é de bhun Rialachán (AE) Uimh. 1233/2011 ó Pharlaimint na hEorpa agus ón gComhairle an 16 Samhain 2011 maidir le treoirlínte áirithe a chur i bhfeidhm i réimse na gcreidmheasanna onnmhairiúcháin arna dtacú go hoifigiúil. Cumhdaíonn sé gníomhaíochtaí creidmheasa onnmhairiúcháin arna dtacú go hoifigiúil a rinne gníomhaireachtaí creidmheasa onnmhairiúcháin na mBallstát agus tá sé bunaithe ar an bhfaisnéis a sholáthair na Ballstáit sna tuarascálacha bliantúla ar ghníomhaíochtaí a chuireann siad ar fáil don Choimisiún, de bhun an Rialacháin freisin. Leanann na tuarascálacha teimpléad caighdeánaithe (ar a dtugtar ‘teimpléad seicliosta’ freisin) a ndearnadh athbhreithniú air agus a saibhríodh le himeacht ama. Sa leagan is déanaí den teimpléad, atá infheidhme ón mbliain tuairiscithe 2020 i leith, tá níos mó mionsonraí maidir le cearta an duine, an t‑athrú aeráide agus cosaint an chomhshaoil.

2. Tuarascálacha Bliantúla ar Ghníomhaíochtaí a fuarthas le haghaidh na bliana féilire 2021:

Sholáthair fiche Ballstát creidmheasanna onnmhairiúchán arna dtacú go hoifigiúil in 2021 laistigh de raon feidhme chur i bhfeidhm an tSocraithe maidir leis na Creidmheasanna Onnmhairiúcháin arna dTacú go hOifigiúil agus chuir siad isteach Tuarascáil Bhliantúil ar Ghníomhaíochtaí don bhliain 2021: An Bheilg, an Chróit, an Danmhairg, an Eastóin, an Fhionlainn, an Fhrainc, an Ghearmáin, an Iodáil, an Ísiltír, Lucsamburg, an Ostair, an Pholainn, an Phortaingéil, an Rómáin, an tSeicia, an tSlóivéin, an tSlóvaic, an Spáinn, an tSualainn agus an Ungáir.

Na sé Bhallstát atá fágtha, arb iad an Bhulgáir, an Chipir, Éire, an Ghréig, an Laitvia, an Liotuáin agus Málta iad, dhearbhaigh siad nár chuir siad creidmheasanna onnmhairiúchán arna dtacú go hoifigiúil ar fáil le linn na bliana tuairiscithe.

3. Anailís ar na Tuarascálacha Bliantúla ar Ghníomhaíochtaí:

(a)Faisnéis ghinearálta:

In 2021, ba sholáthraithe cumhdaigh fhoirfe iad an fiche Ballstát a sholáthair creidmheasanna onnmhairiúcháin arna dtacú go hoifigiúil, is é sin creidmheasanna onnmhairiúcháin i bhfoirm ráthaíochtaí agus/nó tháirgí árachais. Chuir trí Bhallstát déag (an Bheilg, an Chróit, an Danmhairg, an Fhionlainn, an Fhrainc, an Ghearmáin, an Iodáil, an Pholainn, an tSeicia, an tSlóvaic, an Spáinn, an tSualainn, agus an Ungáir) tacaíocht mhaoiniúcháin oifigiúil ar fáil, is é sin maoiniú díreach, athmhaoiniú iasachtaí tráchtála le haghaidh idirbhearta onnmhairiúcháin nó tacaíocht ráta úis. Thuairiscigh líon beag Ballstát (an Ostair, an Pholainn, an Phortaingéil, an Spáinn, an Ungáir) gur soláthraithe cabhrach ceangailte iad, ar foirm creidmheasanna onnmhairiúcháin í a bhfuil gné lamháltais léi agus a rialaítear i gcomhthéacs Shocrú ECFE.

An socrú maidir leis na Creidmheasanna Onnmhairiúcháin arna dTacú go hOifigiúil agus Moltaí ECFE maidir le conas dul i ngleic le rioscaí a bhaineann le creidmheasanna onnmhairiúcháin arna dtacú go hoifigiúil, áirithíonn siad comhchuibhiú cleachtas ar fud an Aontais. Laistigh den chreat sin, déanann na rialtais a mbeartais féin a dhearadh. Tá rialacha de bhreis orthu sin sna treoirlínte ECFE ag formhór na ngníomhaireachtaí creidmheasa onnmhairiúcháin, mar shampla a mhéid a bhaineann le hábhar náisiúnta agus áitiúil, agus caighdeáin níos láidre, lena n‑áirítear caighdeáin a léiríonn a gcuid beartas náisiúnta agus gealltanas idirnáisiúnta féin, go háirithe maidir le cosaint na haeráide. Cinneann roinnt gníomhaireachtaí creidmheasa onnmhairiúcháin cláir atá saincheaptha d’earnálacha áirithe nó do chuspóirí áirithe a thairiscint. D’fhéadfadh gur léiriú iad sin ar shainiúlachtaí na dtuiscintí earnála ar leith sa Socrú, struchtúir comhárachais, nó tosaíochtaí straitéiseacha.

Tá struchtúr eagrúcháin na ngníomhaireachtaí creidmheasa onnmhairiúcháin agus an rialachas maidir le cumhdach a thairiscint éagsúil ar fud an Aontais. Tá creidmheasanna onnmhairiúcháin arna dtacú go hoifigiúil faoi stiúir breis agus 26 chomhlacht san Aontas ar gníomhaireachtaí poiblí iad nó cuideachtaí príobháideacha a oibríonn faoi shainordú poiblí agus maoirseacht rialtais. Liostaítear iad in Iarscríbhinn 1. Na Ballstáit a sholáthraíonn cumhdach agus maoiniú araon, de ghnáth bíonn institiúid thiomnaithe ar leith acu a phléann leis an maoiniú, institiúid ar a dtugtar banc EXIM (le haghaidh allmhairí - onnmhairí) uaireanta.

(b)Méid na tacaíochta oifigiúla:

Sna Tuarascálacha Bliantúla ar Ghníomhaíochtaí, tugtar faisnéis airgeadais ábhartha maidir le tacaíocht oifigiúil arna soláthar ag ECAnna, i gcomhréir le creataí reachtacha agus leagan amach eagraíochtúil na mBallstát faoi seach. Níl aon bharúil le cur in iúl ag an gCoimisiún maidir leis na gnéithe airgeadais de Thuarascálacha Bliantúla ar Ghníomhaíochtaí 2021. Tá an méid sin gan dochar do shainchumais institiúidí na mBallstát agus maoirseacht á feidhmiú acu ar chláir náisiúnta um chreidmheasanna onnmhairiúcháin.

Maidir le tacaíocht oifigiúil i bhfoirm cumhdaigh fhoirfe, sa tábla thíos liostaítear neamhchosaint ainmniúil chomhiomlán ar riosca ón 31 Nollaig 2021 i leith le haghaidh na soláthraithe is mó san Aontas Eorpach:

I gcás tacaíocht oifigiúil mhaoiniúcháin, liostaítear sa tábla thíos luach ainmniúil tuairiscithe na punainne iasachtaí arna tacú go hoifigiúil ón 31 Nollaig 2021 i leith le haghaidh soláthraithe móra san Aontas:

Tabhair faoi deara: Níor cheart na figiúirí i dTáblaí 1 agus 2 a charnadh le chéile. Ní hamháin go bhfuil cineál na hionstraime difriúil, ach féadfaidh an Ballstát céanna tacú leis an idirbheart onnmhairiúcháin céanna le maoiniú díreach agus cumhdach foirfe araon.

(c)Rioscaí comhshaoil a láimhseáil:

Sa Mholadh ó ECFE maidir le Cur Chuige Coiteann i ndáil le Creidmheasanna Onnmhairiúcháin arna dTacú go hOifigiúil agus le Dícheall Cuí Comhshaoil agus Sóisialta, leagtar síos comhphrionsabail chun tabhairt faoi dhícheall cuí comhshaoil agus sóisialta. Cloíonn Ballstáit uile an Aontais leis an Moladh, faoina shainaithníonn siad na tionchair agus rioscaí a d’fhéadfadh a bheith ann a bhaineann le hiarratais ar thacaíocht oifigiúil agus faoina dtéann siad i ngleic leo. Braitheann an moladh sin ar chaighdeáin dea-bhunaithe ar nós Chaighdeáin Feidhmíochta Comhshaoil agus Shóisialta na Corparáide Airgeadais Idirnáisiúnta, ar Threoirlínte Comhshaoil, Sláinte agus Sábháilteachta Ghrúpa an Bhainc Dhomhanda, ar Bheartais Chosanta an Bhainc Dhomhanda agus ar Chaighdeáin Chomhshaoil agus Shóisialta an Bhainc Dhomhanda. Cumhdaítear sa Mholadh príomhcheisteanna comhshaoil, ar nós astaíochtaí aeir, lena n‑áirítear astaíochtaí gás ceaptha teasa, éifeachtúlacht acmhainní, bainistiú dramhaíola, torann agus creathanna, bainistiú ábhar guaiseach, tionchair ar éiceachórais, cosaint bithéagsúlachta, agus úsáid shuntasach acmhainní nádúrtha. Áirítear leis freisin riachtanais maidir le hullmhacht agus freagairt i gcás éigeandála, ionas go bhfuil úinéirí na dtionscadal in ann freagairt do chásanna tionóisceacha agus éigeandálaí ar bhealach a bheadh iomchuí chun tionchair chomhshaoil agus shóisialta a chosc agus a mhaolú.

Tá beartais díchill chuí agus nósanna imeachta um measúnú riosca bunaithe, den chuid is mó, ar an Moladh, fiú má tá ról neamheisiach aige agus má tá beartais bunaithe ar chaighdeáin eile agus ar acquis an Aontais. Na Ballstát uile a chuireann creidmheasanna onnmhairiúcháin arna dtacú go hoifigiúil ar fáil, tuairiscíonn siad go gcomhlíontar an ghné chomhshaoil a bhaineann leis an Mholadh agus gur cuid lárnach é dá gcórais díchill chuí agus dá gcórais bainistithe riosca agus dá bpróiseas cinnteoireachta. Braitheann na nósanna imeachta um measúnú ex ante ar chineál, ar mhéid agus ar chatagóir an iarratais ar leith ar chreidmheas onnmhairiúcháin arna dtacú go hoifigiúil. Déantar rioscaí a shainaithint, a aicmiú agus a mheas, agus d’fhéadfadh iarmhairtí a bheith acu ar incháilitheacht maidir le tacaíocht a fháil. Dhearbhaigh gach gníomhaireacht creidmheasa onnmhairiúcháin de chuid an Aontais go ndearna sé scagadh ar gach iarratas ar chreidmheasanna onnmhairiúcháin a dtacaítear leo go hoifigiúil agus é mar aidhm aige a shainaithint ar cheart athbhreithniú comhshaoil a dhéanamh.

De bhun an Mholta, tá sé de cheangal ar ECAnna na hiarratais sin a aicmiú, ag brath ar an tionchar diúltach a d’fhéadfadh a bheith ann ar an gcomhshaol, de réir trí chatagóir riosca: ard (Catagóir A), meánach (Catagóir B) nó íseal (Catagóir C). Tuairiscíonn a lán Ballstát go gcuireann siad an Moladh i bhfeidhm ar bhealach níos leithne ná a raon feidhme. Áirítear leis sin aicmiú na n‑idirbheart go léir, lena n‑áirítear na hidirbhearta sin ina dtacaíonn siad le sciar faoi bhun SDR 10 milliún, rud nach ndéanfaí, i bprionsabal, a chuimsiú sa chéim scagtha. Tuairiscíonn na Ballstáit go ndearnadh Measúnú ar an Tionchar ar an gComhshaol agus ar an Tionchar Sóisialta (ESIA) i gcomhréir le hAirteagal 18 den Mholadh i leith gach iarratas de Chatagóir A dá ndearna ECA gealltanas deiridh. I gcás iarratais de Chatagóir B, tuairiscíonn na Ballstáit gur chuir iarratasóirí faisnéis leordhóthanach ar fáil i gcónaí maidir le tionchair ábhartha an tionscadail ar an gcomhshaol i gcomhréir le hAirteagal 19 den Mholadh. Sula ndéanfaidh siad cinneadh tacaíocht a chur ar fáil do thionscadail de Chatagóir A nó de Chatagóir B, thuairiscigh ECAnna go ndearna siad meastóireacht i gcónaí ar an bhfaisnéis a thagann as scagadh agus athbhreithniú na n‑idirbheart. Fuarthas faisnéis ábhartha trí thuarascálacha ESIA, ach bailíodh freisin, a bhuí le foirmeacha iarratais agus ceistneoirí na ngníomhaireachtaí creidmheasa onnmhairiúcháin, taighde deisce, cuairteanna ar an láthair, taighde a rinne comhairleoirí seachtracha agus teagmháil dhíreach leis na hiarratasóirí.

Níor thuairiscigh na Ballstáit cásanna buana neamh‑chomhlíontachta, cé go mbíonn mionchásanna neamh‑chomhlíontachta ann , ar nós sprioc-amanna caillte chun faisnéis nó tuarascálacha a chur isteach. Déantar cásanna neamh‑chomhlíontachta a réiteach i gcomhar le hurraitheoirí an tionscadail, trí ghníomhaíochtaí ceartaitheacha agus bearta maolúcháin a dhearadh a ndéantar faireachán orthu le himeacht ama, nó trí thacaíocht a tharraingt siar nó trí shlánú a dhiúltú.

(d)Cuspóirí maidir leis an athrú aeráide a mheas:

Is díol sásaimh don Choimisiún go bhfuil cuspóirí athraithe aeráide ionchorpraithe níos mó sna treoirlínte ECFE agus sna beartais lena rialaítear an chaoi a bhfeidhmíonn ECAnna.

Níor sholáthair aon Bhallstát de chuid an Aontais tacaíocht oifigiúil do ghléasra cumhachta gualbhreoslaithe ó glacadh an Tuiscint Earnála Gualbhreoslaithe in 2016. Scriosadh an Tuiscint Earnála in 2021, nuair a tháinig na Rannpháirtithe ar chomhaontú cosc a chur ar thacaíocht do chumhacht ghualbhreoslaithe neamh‑mhaolaithe . Tá tuilleadh leasuithe molta ag an gCoimisiún ar Shocrú ECFE ó shin i gcomhréir le gealltanais an Aontais faoi Chomhaontú Pháras agus faoin gComhaontú Glas, agus leas á bhaint as an Athbhreithniú ar an mBeartas Trádála ón gCoimisiún i mí Feabhra 2021 (‘Beartas Trádála atá Oscailte, Inbhuanaithe agus Téagartha) agus conclúidí na Comhairle Eorpaí maidir le creidmheasanna onnmhairiúcháin ón 15 Márta 2022 (‘Comhshocrú Aeráide an Aontais maidir le maoiniú onnmhairiúcháin’).

Chomh maith leis na rialacha earnála a bhaineann leis an aeráid ó Shocrú ECFE a chur i bhfeidhm, tá beartais shonracha don athrú aeráide i bhfeidhm ag 16 Bhallstát. Luaigh dhá Bhallstát go n‑úsáideann siad Tacsanomaíocht an Aontais le haghaidh Gníomhaíochtaí Inbhuanaithe mar thagarmharc chun measúnú a dhéanamh ar na hiarratais ar thacaíocht. Tá iarracht leanúnach ann chun beartais céimnithe amach a chur ar bhonn foirmiúil le haghaidh idirbhearta onnmhairiúcháin san earnáil fuinnimh breoslaí iontaise; is díol sásaimh don Choimisiún an rún a cuireadh in iúl i gConclúidí na Comhairle maidir le chreidmheasanna onnmhairiúcháin ón 15 Márta 2022, is é sin go gcinnfidh na Ballstáit na sprioc-amanna eolaíochtbhunaithe chuige sin faoi dheireadh 2023.

(e)Dícheall cuí sóisialta agus dícheall cuí chearta an duine:

Sa bhreis ar an ngné chomhshaoil atá aige, leagtar síos prionsabail i Moladh ECFE maidir le Cur Chuige Coiteann ó 2012 chun dícheall cuí sóisialta a chur i bhfeidhm. Cumhdaíonn sé na príomhthionchair shóisialta a d’fhéadfadh a bheith ag baint le tionscadail, lena n‑áirítear ar dhálaí saothair agus oibre (e.g. cóir chothrom, idirdhealú, saoirse comhlachais, cómhargáil, cóiríocht d’oibrithe), sláinte, sábháilteacht agus slándáil an phobail, (e.g. nochtadh pobail do ghalair, úsáid pearsanra slándála), sealbhú talún agus athlonnú neamhdheonach (e.g. díláithriú fisiceach, díláithriú eacnamaíoch), rannpháirtíocht leordhóthanach le pobail a ndéantar difear dóibh (e.g. comhairliúchán feasach agus próiseas rannpháirtíochta, sásra casaoide), pobail dhúchasacha (e.g. próiseas réamhthoilithe feasach saor), oidhreacht chultúrtha. Cumhdaíonn sé freisin na príomhthionchair ar chearta an duine a bhaineann le tionscadail, lena n‑áirítear saothar éigeantais, saothar leanaí, saincheisteanna inscne agus staid sláinte agus sábháilteachta ceirde a d’fhéadfadh a bheith bagrach don bheatha. Tugtar aird ar leith ar ghrúpaí leochaileacha.

Tá cleachtais díchill chuí atá tuairiscithe ag ECAnna an Aontais cosúil leis na cleachtais le haghaidh rioscaí comhshaoil. Léiríonn an fiche Ballstát tuairiscithe uile a chuireann tacaíocht oifigiúil ar fáil go bhfuil gné shóisialta agus gné chearta an duine de Mholadh ECFE maidir le Cur Chuige Comhchoiteann á comhlíonadh acu, agus gur dlúthchuid dá gcórais chinnteoireachta, córais díchill chuí agus córais bainistithe riosca é. Dhearbhaigh siad ar fad go ndearna siad scagadh ar gach iarratas agus é mar aidhm acu a shainaithint ar cheart athbhreithniú sóisialta agus athbhreithniú um chearta an duine a dhéanamh. Thuairiscigh siad go ndearnadh Measúnú ar an Tionchar ar an gComhshaol agus ar an Tionchar Sóisialta (ESIA) i gcás gach iarratais de Chatagóir A. I gcás iarratais de Chatagóir B, thuairiscigh siad gur chuir iarratasóirí faisnéis leordhóthanach ar fáil i gcónaí chun dul i ngleic le tionchair ábhartha an tionscadail. Sula ndéanfaidh siad cinneadh tacaíocht oifigiúil a chur ar fáil do thionscadail de Chatagóir A nó de Chatagóir B a d’fhéadfadh drochthionchar sóisialta nó drochthionchar ar chearta an duine a bheith acu, tuairiscíonn Ballstáit go ndearna a gcuid ECAnna meastóireacht i gcónaí ar an bhfaisnéis a thagann as an scagadh agus an athbhreithniú, mar a rinne le haghaidh rioscaí comhshaoil.

Níor thuairiscigh Ballstáit cásanna buana neamh‑chomhlíontachta ina gcuid próiseas díchill chuí sóisialta agus dícheall cuí chearta an duine. Cé gur fhorbair ECA amháin de chuid an Aontais sásra casaoide ar a shuíomh gréasáin in 2021, ní raibh próiseas comhairliúcháin rannpháirtíoch agus sásra casaoide ar bun ag gach ECA in 2021 do na pobail a ndearnadh difear dóibh. Ní chiallaíonn sin nach ann d’aon chomhairliúchán, mar is féidir iarraidh ar urraitheoirí na dtionscadal sásraí a chur ar bun gan beann ar rannpháirtíocht ECAnna, ach réimse is ea í a bhfuil feabhas le cur uirthi.

(f)Bearta frithbhreabaireachta:

Na Ballstát uile a sholáthraíonn creidmheasanna onnmhairiúcháin arna dtacú go hoifigiúil, tuairiscíonn siad comhlíontacht i gcomhréir le Moladh ECFE maidir le Breabaireacht agus Creidmheasanna Onnmhairiúcháin arna dTacú go hOifigiúil. Sa mholadh sin tá bearta maidir le scagadh, le dícheall cuí a chur i gcrích, le meastóireacht agus cinneadh a dhéanamh maidir le tacaíocht d’fhonn breabaireacht a dhíspreagadh i gcás creidmheasanna onnmhairiúcháin arna dtacú go hoifigiúil. Go háirithe, ní mór a fhíorú nach bhfuil na páirtithe a bhfuil baint acu le hidirbhearta liostaithe i liostaí toirmeasc na nInstitiúidí Airgeadais Iltaobhacha.

(g)Cleachtais iasachtaithe inbhuanaithe:

Na Ballstát uile a sholáthraíonn creidmheasanna onnmhairiúcháin arna dtacú go hoifigiúil, tuairiscíonn siad comhlíontacht le Moladh ECFE maidir le Cleachtais Iasachtaithe Inbhuanaithe agus Creidmheasanna Onnmhairiúcháin arna dTacú go hOifigiúil. Is é is aidhm don Mholadh a áirithiú go mbainfear leas as maoiniú na riachtanas forbartha atá ag tíortha ísealioncaim gan fiacha iomarcacha a mhéadú amach anseo sna tíortha sin. Comhlíonadh an Mholta sin, is rud é sin a théann go dlúth le beartais an Bhainc Dhomhanda agus an Chiste Airgeadaíochta Idirnáisiúnta (CAI) maidir le coinníollacha fiachais le haghaidh iasachtaí neamh‑lamháltais, agus a mhéid a bhaineann le hiasachtú inbhuanaithe. Faoin Moladh, chomhaontaigh na daoine a thacaíonn leis bearta trédhearcachta tábhachtacha lena n‑áirítear faisnéis a chur ar fáil don Bhanc Domhanda agus do CAI. I bhformhór na gcásanna, tá measúnuithe ar inbhuanaitheacht fiachais mar chuid de mheasúnuithe foriomlána ar riosca tíre a mbíonn tionchar acu ar bheartais faoi chumhdach tíortha ECAnna.

(h)Faisnéis eile atá sna Tuarascálacha Bliantúla ar Ghníomhaíochtaí:

Tuairiscíonn na Ballstáit go n‑áirithíonn siad go bhfeidhmeoidh ECAnna ar bhealach chomh trédhearcach agus is féidir agus rúndacht na faisnéise íogaire gnó á hurramú ag an am céanna. De bhun Mholadh ECFE maidir le Cur Chuige Coiteann, is éard atá sa nós imeachta comhchuibhithe ar fud an Aontais faisnéis mhionsonraithe a nochtadh go poiblí le haghaidh tionscadail a d’fhéadfadh drochthionchar a bheith acu ar an gcomhshaol nó ar an tsochaí. Nochtann ECAnna i gcónaí an fhaisnéis go léir a éilítear de bhun Airteagal 39 agus Airteagal 41 den Mholadh, is é sin le rá faisnéis ábhartha ex ante maidir le tionscadail Chatagóir A, lena n‑áirítear ESIAnna, agus faisnéis ex post do gach tionscadal de Chatagóir A agus de Chatagóir B a dtacaítear leis, trí leathanaigh thiomnaithe ar a suíomh gréasáin, dá dtagraítear in Iarscríbhinn 2.

Tá beartas freagrachta sóisialta corparáidí ag roinnt mhaith ECAnna de chuid an Aontais arb é atá i gceist leis ní hamháin iarrachtaí inmheánacha ach dlúth‑idirphlé le cliaint ECA freisin. Sa chomhthéacs sin, tá meastóireacht mhéadaitheach á déanamh ag ECAnna ar a gcleachtais féin agus tá pleananna á bhforbairt acu chun a dtionchar féin ar an gcomhshaol a laghdú lena n‑áirítear meastacháin ar lorg carbóin.

4. Comhlíonadh cuspóirí agus oibleagáidí an Aontais ag na ECAnna:

In Airteagal 3 de Chonradh ar an Aontas Eorpach (CAE), liostaítear cuspóirí ginearálta an Aontais Eorpaigh; leagann Airteagal 21 amach prionsabail agus cuspóirí ghníomhaíocht sheachtrach an Aontais. De réir Airteagal 3 mír 5 CAE, ina chaidreamh leis an domhan mór go ‘rannchuideoidh [an tAontas] le [...] forbairt inbhuanaithe na Cruinne, leis an dlúthpháirtíocht agus leis an meas frithpháirteach idir na pobail, leis an tsaorthrádáil chóir, le deireadh a chur leis an mbochtaineacht, agus cearta an duine agus cearta an linbh go háirithe a chosaint, leis an dlí idirnáisiúnta a urramú go docht agus a fhorbairt, lena n‑áirítear prionsabail Chairt na Náisiún Aontaithe a urramú’. A mhéid a bhaineann le comhbheartas tráchtála an Aontais, déantar tagairt do phrionsabail agus do chuspóirí ghníomhaíochtaí seachtracha an Aontais in Airteagal 206 agus sa chéad mhír d’Airteagal 207 den Chonradh ar Fheidhmiú an Aontais Eorpaigh.

Measann an Coimisiún go soláthraíonn an fhaisnéis atá ar fáil fianaise gur i gcomhréir le Airteagal 3 agus Airteagal 21 CAE atá gníomhaíochtaí creidmheasa onnmhairiúcháin arna dtacú go hoifigiúil san Aontas. Soláthraíonn moltaí ECFE creat maidir le cláir creidmheasa onnmhairiúcháin na mBallstát a bhainistiú. Bunaíonn na Ballstáit a gcuid beartas féin bunaithe ar na moltaí sin agus i gcomhréir le cuspóirí an Aontais. A mhéid a bhaineann le comhlíonadh oibleagáidí idirnáisiúnta agus oibleagáidí faoi dhlí iomaíochta Aontais, ní raibh aon díospóid ann ag an Eagraíocht Dhomhanda Trádála maidir le gníomhaíochtaí chreidmheasa onnmhairiúcháin Ballstát de chuid an Aontais le haghaidh 2021, agus níl aon ghearán faighte ag an gCoimisiún faoi sháruithe a d’fhéadfadh a bheith ann ar rialachán an Aontais a bhfuil baint acu le ECAnna.

D’iarr Parlaimint na hEorpa ar an gCoimisiún ráiteas a dhéanamh maidir le cé acu a chomhlíonann nó nach gcomhlíonann na Ballstáit cuspóirí agus oibleagáidí an Aontais agus na creidmheasanna onnmhairiúcháin arna dtacú go hoifigiúil á gcur ar fáil acu. Rinne an Coimisiún a athbhreithniú bliantúil i gcomhréir le Rialachán (AE) Uimh. 1233/2011. Dá bhrí sin, tá an t‑athbhreithniú ón gCoimisiún bunaithe ar na Tuarascálacha Bliantúla ar Ghníomhaíochtaí a chuir na Ballstáit isteach, agus ní féidir a mheas go bhfuil sé uileghabhálach.