This document is an excerpt from the EUR-Lex website
Document 52023PC0774
Proposal for a COUNCIL DECISION on the conclusion, on behalf of the European Union, of the Protocol amending the Agreement between the European Union and Japan for an Economic Partnership regarding free flow of data
Togra le haghaidh CINNEADH ÓN gCOMHAIRLE maidir le tabhairt i gcrích, thar ceann an Aontais Eorpaigh, an Phrótacail lena leasaítear an Comhaontú Comhpháirtíochta Eacnamaíche idir an tAontas Eorpach agus an tSeapáin a mhéid a bhaineann le saorshreabhadh sonraí
Togra le haghaidh CINNEADH ÓN gCOMHAIRLE maidir le tabhairt i gcrích, thar ceann an Aontais Eorpaigh, an Phrótacail lena leasaítear an Comhaontú Comhpháirtíochta Eacnamaíche idir an tAontas Eorpach agus an tSeapáin a mhéid a bhaineann le saorshreabhadh sonraí
COM/2023/774 final
AN COIMISIÚN EORPACH
An Bhruiséil,1.12.2023
COM(2023) 774 final
2023/0450(NLE)
Togra le haghaidh
CINNEADH ÓN gCOMHAIRLE
maidir le tabhairt i gcrích, thar ceann an Aontais Eorpaigh, an Phrótacail lena leasaítear an Comhaontú Comhpháirtíochta Eacnamaíche idir an tAontas Eorpach agus an tSeapáin a mhéid a bhaineann le saorshreabhadh sonraí
MEABHRÁN MÍNIÚCHÁIN
1.COMHTHÉACS AN TOGRA
•Forais agus cuspóirí an togra
Le cinneadh uaithi an 12 Iúil 2023, d’fhormheas an Chomhairle treoracha caibidlíochta don Choimisiún chun a chaibidliú go ndéanfaí forálacha maidir le sreafaí trasteorann sonraí a chur leis an gComhaontú Comhpháirtíochta Eacnamaíche idir an tAontas Eorpach agus an tSeapáin 1 .
An 24 Deireadh Fómhair 2022, chuir an tAontas agus an tSeapáin tús leis an gcaibidlíocht maidir le sreafaí trasteorann sonraí. Tugadh an chaibidlíocht i gcrích i bprionsabal an 28 Deireadh Fómhair 2023.
Tá an tAontas agus an tSeapáin ar na geilleagair dhigiteacha is mó ar domhain. Tá an tAontas ag iarraidh dlús a chur leis na tairbhí a bhaineann le tuilleadh digiteála ar an ngeilleagar agus ar an tsochaí dhomhanda agus chun leas a bhaint astu. Tá rialachas sonraí agus sreafaí trasteorann sonraí ríthábhachtach don fhorbairt sin.
Is ar shonraí atá cuid mhór gnólachtaí ag brath agus is comhchuid ríthábhachtach de shamhlacha gnó agus de shlabhraí soláthair iad ar fud roinnt earnálacha eacnamaíocha. Leis an gcomhaontú sin, tugtar deimhneacht dhlíthiúil a bhfuil géarghá léi nach gcuirfear isteach ar shreabha sonraí idir an tAontas agus an tSeapáin mar gheall ar bhearta logánaithe sonraí nach bhfuil údar leo, agus áirithítear leis go mbainfear tairbhe as saorshreabhadh sonraí agus go mbeidh muinín as, i gcomhréir iomlán lenár rialacha faoi seach maidir le cosaint sonraí agus an geilleagar digiteach.
Le torthaí na caibidlíochta, deimhnítear tiomantas leanúnach an Aontais agus na Seapáine don chóras trádála idirnáisiúnta atá bunaithe ar rialacha agus a dhiongbháilte atá siad rialacha maidir le sreabhadh domhanda sonraí a mhúnlú lena n‑urramaítear luachanna comhroinnte agus a gcur chuige rialála faoi leith.
•Comhsheasmhacht le forálacha beartais atá sa réimse beartais cheana
Trí rialacha a chomhaontú lena dtéitear i ngleic le baic gan údar roimh shreafaí sonraí agus neamhspleáchas rialála á choinneáil san am céanna i réimse na cosanta sonraí agus an phríobháideachais, cuireann an togra leis na cuspóirí a leagtar síos i dTeachtaireacht an 18 Feabhra 2021 ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa, agus chuig Coiste na Réigiún 2 .
•Comhsheasmhacht le beartais eile de chuid an Aontais
Leis na rialacha a caibidlíodh maidir le sreabha sonraí trasteorann leis an tSeapáin, comhlánaítear an comhshocrú leordhóthanachta frithpháirtí atá ann cheana idir an tAontas agus an tSeapáin maidir le sonraí pearsanta 3 , agus tá siad i gcomhréir leis an togra comhdhlúite le haghaidh forálacha maidir le sreafaí trasteorann sonraí agus cosaint na sonraí pearsanta agus an phríobháideachais i gcomhaontuithe trádála. 4 Saothraíonn an togra straitéis an Choimisiúin a leagtar síos san Athbhreithniú ar an mBeartas Trádála, sa Straitéis Eorpach maidir le Sonraí, sa Teachtaireacht Chomhpháirteach i dtaca le Straitéis an Aontais maidir le comhar sa réigiún Ind‑Chiúin‑Aigéanach 5 agus sa Dearbhú Comhpháirteach maidir le príobháideachas agus cosaint na sonraí pearsanta arna gcomhshíniú ag an Aontas agus ag an tSeapáin. 6
San athbhreithniú ar an mBeartas Trádála, thug an Coimisiún gealltanas‘go leanfaidh sé d’aghaidh a thabhairt ar bhaic gan údar le sreafaí sonraí ach caomhnóidh sé a neamhspleáchas rialála i réimsí chosaint na sonraí agus an phríobháideachais’. Luaitear sa Straitéis Eorpach maidir le Sonraí 7 : ‘Leanfaidh an tAontas d’aghaidh a thabhairt ar na baic gan údar le sreafaí sonraí le linn pléití déthaobhacha agus i bhfóraim idirnáisiúnta, lena n‑áirítear an Eagraíocht Dhomhanda Trádála, ach cosnóidh sé na rialacha [agus caighdeáin] Eorpacha maidir le próiseáil sonraí agus cuirfidh sé chun cinn iad, i gcomhréir iomlán le reachtaíocht an Aontais’. Sainaithnítear gur eilimint thábhachtach iad sreafaí sonraí sa Teachtaireacht Chomhpháirteach i ndáil le Straitéis an Aontais maidir le comhar sa réigiún Ind‑Chiúin‑Aigéanach 8 .
2.BUNÚS DLÍ, COIMHDEACHT AGUS COMHRÉIREACHT
•Bunús dlí
Is é Airteagal 207 CFAE an bunús dlí substainteach.
Tá an Prótacal maidir le Leasú le síniú ag an Aontas de bhun cinneadh ón gComhairle bunaithe ar Airteagal 218(5) CFAE agus le tabhairt i gcrích ag an Aontas de bhun cinneadh ón gComhairle atá bunaithe ar Airteagal 218(6) CFAE, tar éis toiliú a fháil ó Pharlaimint na hEorpa.
•Coimhdeacht (i gcás inniúlacht neamheisiach)
An Prótacal maidir le Leasú mar a cuireadh i láthair na Comhairle, ní chumhdaítear leis aon ábhar nach dtagann faoi inniúlacht eisiach an Aontais.
•Comhréireacht
Is iomchuí an modh iad na comhaontuithe trádála chun rialú a dhéanamh ar rochtain ar an margadh agus réimsí gaolmhara an chaidrimh eacnamaíoch chuimsithigh le tríú tír lasmuigh den Aontas. Níl aon rogha eile ann chun gealltanais agus iarrachtaí léirscaoilte den sórt sin a dhéanamh ceangailteach ó thaobh an dlí.
Leis an tionscnamh seo saothraítear go díreach cuspóir an Aontais maidir le gníomhaíocht sheachtrach agus rannchuidítear leis an tosaíocht pholaitiúil ‘an tAontas Eorpach a bheith ina ghníomhaí domhanda níos láidre’. Tá sé i gcomhréir le treoshuíomhanna Straitéis Dhomhanda an Aontais Eorpaigh chun dul i gcaidreamh le páirtithe eile agus a chomhpháirtíochtaí seachtracha a athchóiriú ar bhealach freagrach, ionas go mbainfear amach tosaíochtaí seachtracha an Aontais. Rannchuidíonn sé le cuspóirí trádála agus forbartha an Aontais.
•An rogha ionstraime
Tá an togra seo i gcomhréir le hAirteagal 218(6) CFAE, lena mbeartaítear go nglacfaidh an Chomhairle cinntí maidir le comhaontuithe idirnáisiúnta a thabhairt i gcrích. Níl aon ionstraim dlí eile ann a d’fhéadfaí a úsáid chun an cuspóir a chuirtear in iúl sa togra seo a bhaint amach.
3.TORTHAÍ AR MHEASTÓIREACHTAÍ EX POST, AR CHOMHAIRLIÚCHÁIN LEIS NA PÁIRTITHE LEASMHARA AGUS AR MHEASÚNUITHE TIONCHAIR
•Meastóireachtaí ex post/seiceálacha oiriúnachta ar an reachtaíocht atá ann cheana
Ní bhaineann le hábhar
•Comhairliúcháin leis na páirtithe leasmhara
Ní bhaineann le hábhar
•Bailiú agus úsáid saineolais
Ní bhaineann le hábhar
•Measúnú tionchair
Ní bhaineann le hábhar
•Oiriúnacht rialála agus simpliú
Ní bhaineann le hábhar
•Cearta bunúsacha
Tá an moladh comhsheasmhach le Conarthaí an Aontais agus le Cairt um Chearta Bunúsacha an Aontais. Go háirithe, tríd an togra comhdhlúite a chur síos le haghaidh forálacha maidir le sreafaí trasteorann sonraí agus cosaint na sonraí pearsanta agus an phríobháideachais i gcomhaontuithe trádála, féachann an Coimisiún le neamhspleáchas rialála an Aontais i réimse na cosanta sonraí agus an phríobháideachais a choinneáil.
4.IMPLEACHTAÍ BUISÉADACHA
Ní bhaineann le hábhar
5.EILIMINTÍ EILE
•Pleananna cur chun feidhme, agus socruithe faireacháin, meastóireachta agus tuairiscithe
Ní bhaineann le hábhar
•Doiciméid mhíniúcháin (i gcás treoracha)
Ní bhaineann le hábhar
•Míniúchán mionsonraithe ar fhorálacha sonracha an togra
Tá 7 n‑airteagal sa togra.
Baineann Airteagal 1 leis an leasú ar an gclár ábhar.
Baineann Airteagal 2 go príomha le sainmhíniú a chur isteach ar ‘duine cumhdaithe’ lena sainítear raon feidhme na bhforálacha lena mbaineann.
Baineann Airteagal 3 leis na rialacha maidir le haistriú trasteorann faisnéise trí mheán leictreonach ar bhonn liosta iata de bhearta toirmiscthe lena gcuirtear srian le sreabhadh trasteorann faisnéise agus eisceachtaí ábhartha.
Baineann Airteagal 4 le cosaint sonraí pearsanta. I gcomhréir le cleachtas an Aontais agus leis an togra comhdhlúite le haghaidh forálacha maidir le sreafaí trasteorann sonraí agus cosaint na sonraí pearsanta agus an phríobháideachais i gcomhaontuithe trádála, aithnítear an ceart atá ag gach Páirtí an leibhéal iomchuí príobháideachais agus cosanta sonraí pearsanta a chinneadh.
Le hAirteagal 5, foráiltear maidir leis an bhforáil a bhaineann le sonraí airgeadais a scriosadh.
Baineann Airteagal 6 leis an teacht i bhfeidhm.
Baineann Airteagal 7 leis na teangacha barántúla ina dtarraingítear suas an Prótacal.
2023/0450 (NLE)
Togra le haghaidh
CINNEADH ÓN gCOMHAIRLE
maidir le tabhairt i gcrích, thar ceann an Aontais Eorpaigh, an Phrótacail lena leasaítear an Comhaontú Comhpháirtíochta Eacnamaíche idir an tAontas Eorpach agus an tSeapáin a mhéid a bhaineann le saorshreabhadh sonraí
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 207(4), an chéad fhomhír, i gcomhar le hAirteagal 218(6), pointe (a)(v) agus Airteagal 218(7) de,
Ag féachaint don togra ón gCoimisiún Eorpach,
Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé tuairim uaidh [dáta na tuairime],
Ag féachaint don toiliú ó Pharlaimint na hEorpa 9 ,
De bharr an mhéid seo a leanas:
(1)I gcomhréir le Cinneadh Uimh. [XX] ón gComhairle 10 , síníodh an Prótacal lena leasaítear an Comhaontú Comhpháirtíochta Eacnamaíche idir an tAontas Eorpach agus an tSeapáin maidir le saorshreabhadh sonraí an [XX XXX 2023], faoi réir a thabhairt i gcrích tráth is faide anonn.
(2)Ba cheart an Prótacal lena leasaítear an Comhaontú a fhormheas thar ceann an Aontais,
TAR ÉIS AN CINNEADH SEO A GHLACADH:
Airteagal 1
Leis seo, déantar tabhairt i gcrích an Phrótacail lena leasaítear an Comhaontú Comhpháirtíochta Eacnamaíche idir an tAontas Eorpach agus an tSeapáin maidir le saorshreabhadh sonraí (‘an Prótacal’) a fhormheas thar ceann an Aontais.
Tá téacs an Phrótacail i gceangal leis an gCinneadh seo.
Airteagal 2
Ainmneoidh Ardrúnaíocht na Comhairle an duine a chumhachtófar, thar ceann an Aontais Eorpaigh, chun an fógra dá bhforáiltear in Airteagal 23.3 den Chomhaontú Comhpháirtíochta Eacnamaíche idir an tAontas agus an tSeapáin a thabhairt, chun toiliú an Aontais Eorpaigh a bheith faoi cheangal ag an bPrótacal seo a chur in iúl.
Airteagal 3
Tiocfaidh an Cinneadh seo i bhfeidhm lá a ghlactha 11 .
Arna dhéanamh sa Bhruiséil,
Thar ceann na Comhairle
An tUachtarán
AN COIMISIÚN EORPACH
An Bhruiséil,1.12.2023
COM(2023) 774 final
IARSCRÍBHINN
a ghabhann leis an
Togra le haghaidh Cinneadh ón gComhairle
maidir le tabhairt i gcrích, thar ceann an Aontais Eorpaigh, an Phrótacail lena leasaítear an Comhaontú Comhpháirtíochta Eacnamaíche idir an tAontas Eorpach agus an tSeapáin a mhéid a bhaineann le saorshreabhadh sonraí
IARSCRÍBHINN
PRÓTACAL
LENA LEASAÍTEAR AN COMHAONTÚ
COMHPHÁIRTÍOCHTA EACNAMAÍCHE
IDIR AN tAONTAS EORPACH
AGUS AN tSEAPÁIN
TÁ AN tAONTAS EORPACH agus AN tSEAPÁIN (dá ngairtear ‘na Páirtithe’ anseo feasta),
TAR ÉIS ATHMHEASÚNÚ a dhéanamh ar an ngá atá le forálacha maidir le saorshreabhadh sonraí a chur leis an gComhaontú Comhpháirtíochta Eacnamaíche idir an tAontas Eorpach agus an tSeapáin arna shíniú i dTóiceo an 17 Iúil 2018 (dá ngairtear ‘an Comhaontú’ anseo feasta), i gcomhréir le hAirteagal 8.81 den Chomhaontú,
TAR ÉIS COMHAONTÚ MAR A LEANAS:
AIRTEAGAL 1
Déanfar clár ábhar an Chomhaontaithe a leasú trí na focail ‘Airteagail 8.70 go 8.81’ a scriosadh agus na focail ‘Airteagail 8.70 go 8.72’ a chur ina n‑ionad.
AIRTEAGAL 2
Déanfar Airteagal 8.71 den Chomhaontú a leasú tríd an bhfocal ‘agus’ i bhfomhír (a) a scriosadh, trí lánstad fhomhír (b)(ii) a scriosadh agus leathstad a chur ina ionad, agus trí na fomhíreanna seo a leanas a chur isteach díreach i ndiaidh fhomhír (b)(ii):
‘(c) ciallaíonn ‘duine cumhdaithe’:
(i) fiontar faoi chumhdach;
(ii) fiontraí de chuid Páirtí; agus
(iii) soláthróir seirbhíse de chuid Páirtí; agus
(d) ciallaíonn ‘sonraí pearsanta’ aon fhaisnéis a bhaineann le duine nádúrtha sainaitheanta nó in‑sainaitheanta.’
AIRTEAGAL 3
Cuirfear an méid seo a leanas in ionad Airteagal 8.81 den Chomhaontú:
‘AIRTEAGAL 8.81
Sreabhadh trasteorann sonraí trí mhodh leictreonach
1. Tá na Páirtithe tiomanta an t‑aistriú faisnéise trasteorann trí mheán leictreonach a áirithiú i gcás ina mbaineann an ghníomhaíocht sin le gnó duine chumhdaithe.
2. Chuige sin, ní dhéanfaidh Páirtí bearta a ghlacadh nó a choinneáil ar bun ar bearta iad lena gcuirtear toirmeasc nó srian ar aistriú trasteorann faisnéise a leagtar amach i mír 1 tríd an méid seo a leanas a dhéanamh:
(a) a cheangal go n‑úsáidfear saoráidí ríomhaireachta nó eilimintí líonra i gcríoch an Pháirtí le haghaidh próiseáil faisnéise, lena n‑áirítear trí úsáid saoráidí ríomhaireachta nó eilimintí líonra atá deimhnithe nó ceadaithe i gcríoch an Pháirtí a cheangal;
(b) a cheangal go ndéanfar faisnéis a logánú ar chríoch an Pháirtí lena stóráil nó lena próiseáil;
(c) stóráil nó próiseáil faisnéise i gcríoch an Pháirtí eile a thoirmeasc;
(d) a cheangal go mbeidh aistriú trasteorann faisnéise ag brath ar úsáid saoráidí ríomhaireachta nó eilimintí líonra i gcríoch an Pháirtí nó ar cheanglais logánaithe i gcríoch an Pháirtí;
(e) aistriú faisnéise isteach i gcríoch an Pháirtí a thoirmeasc; nó
(f) a cheangal go bhfaighfear formheas an Pháirtí sula ndéanfar an fhaisnéis a aistriú chuig críoch an Pháirtí eile.1
3. Ní chuirfidh aon ní san Airteagal seo cosc ar Pháirtí bearta a ghlacadh nó a choinneáil ar bun ar bearta iad atá ar neamhréir le míreanna 1 agus 2 chun cuspóir dlisteanach beartais phoiblí2 a bhaint amach, ar choinníoll gur fíor an méid seo a leanas i leith an bhirt:
(a) ní chuirtear i bhfeidhm é ar bhealach arb é a bheadh ann modh idirdhealaithe threallaigh nó gan údar idir tíortha i gcás ina mbeidh dálaí comhchosúla ann, sin nó srianadh faoi cheilt ar thrádáil; agus
(b) Ní fhorchuireann sé srianta ar aistrithe faisnéise ná mar is gá chun an cuspóir a bhaint amach.3
4. Ní chuirfidh aon ní san Airteagal seo cosc ar Pháirtí bearta a ghlacadh nó a choinneáil ar bun maidir le cosaint na sonraí pearsanta agus an phríobháideachais, lena n‑áirítear maidir le haistrithe trasteorann faisnéise, ar choinníoll go bhforáiltear le dlí an Pháirtí maidir le hionstraimí lena gcumasaítear aistrithe faoi choinníollacha a mbeidh feidhm ghinearálta leo4 chun an fhaisnéis a aistrítear a chosaint.
5. Níl feidhm ag an Airteagal seo maidir le haistriú trasteorann faisnéise a choinníonn nó a phróiseálann Páirtí nó a choinnítear nó a phróiseáiltear thar ceann Páirtí.
6. Féadfaidh Páirtí a mholadh tráth ar bith don Pháirtí eile athbhreithniú a dhéanamh ar na bearta a liostaítear i mír 2.
_________________
1Ar mhaithe le cinnteacht níos fearr, le mír 2(f) ní chuirtear cosc ar Pháirtí an méid seo a leanas a dhéanamh:
(a)úsáid ionstraime aistrithe nó aistrithe faisnéise trasteorann ar leith a chur faoi réir formheasa ar fhoras a bhaineann le cosaint sonraí pearsanta agus príobháideachais i gcomhréir le mír 4;
(b)a cheangal go ndéanfar deimhniú nó measúnú comhréireachta ar tháirgí, ar sheirbhísí agus ar phróisis TFC, lena n‑áirítear an Intleacht Shaorga, roimh a dtráchtálú nó a n‑úsáid ina chríoch, chun a áirithiú go gcomhlíonfar dlíthe agus rialacháin atá comhsheasmhach leis an gComhaontú seo nó chun críoch cibearshlándála, i gcomhréir le míreanna 3 agus 4 agus Airteagail 1.5, 8.3 agus 8.65; nó
(c)a cheangal ar athúsáideoirí faisnéise a chosnaítear le cearta maoine intleachtúla nó oibleagáidí rúndachta a eascraíonn as dlíthe agus rialacháin intíre atá comhsheasmhach leis an gComhaontú seo, na cearta nó na hoibleagáidí sin a urramú agus an fhaisnéis á haistriú thar theorainneacha, lena n‑áirítear maidir le hiarrataí ar rochtain ó chúirteanna agus ó údaráis tríú tíortha, i gcomhréir le hAirteagal 8.3.
2Chun críoch an Airteagail seo, déanfar ‘cuspóir dlisteanach beartais phoiblí’ a léiriú ar bhealach oibiachtúil agus cumasófar leis cuspóirí a shaothrú amhail an tslándáil phoiblí, an mhoráltacht phoiblí, nó beatha nó sláinte daoine, ainmhithe nó plandaí a chosaint nó an t‑ord poiblí a chaomhnú, nó cuspóirí comhchosúla eile a bhaineann le leas an phobail agus é a chur san áireamh go bhfuil na teicneolaíochtaí digiteacha ag athrú an t‑am ar fad.
3Ar mhaithe le cinnteacht níos fearr, ní dhéanann an fhoráil seo difear do léiriú eisceachtaí eile sa Chomhaontú seo ná dá gcur i bhfeidhm maidir leis an Airteagal seo ná do cheart Páirtí aon cheann díobh a agairt.
4Ar mhaithe le cinnteacht níos fearr, i gcomhréir le cineál cothrománach na cosanta ar shonraí pearsanta agus ar phríobháideachas, tagraíonn ‘coinníollacha a bhfuil feidhm ghinearálta leo’ do choinníollacha a ceapadh i dtéarmaí oibiachtúla a bhfuil feidhm acu go cothrománach maidir le líon neamhaitheanta oibreoirí eacnamaíocha agus a chumhdaíonn, dá bhrí sin, raon cásanna agus cásanna.’
AIRTEAGAL 4
Cuirfear an tAirteagal seo a leanas isteach i ndiaidh Airteagal 8.81 den Chomhaontú:
‘AIRTEAGAL 8.82
Cosaint Sonraí Pearsanta
1. Aithníonn na Páirtithe go bhfuil an ceart ag daoine aonair go ndéanfar a sonraí pearsanta agus a bpríobháideachas a chosaint mar a fhoráiltear le dlíthe agus rialacháin gach Páirtí agus, mar gheall ar na hardchaighdeáin i ndáil leis sin, cuirtear leis an muinín as an ngeilleagar digiteach agus le forbairt na trádála. Aithníonn gach Páirtí ceart an Pháirtí eile an leibhéal iomchuí cosanta sonraí pearsanta agus príobháideachais a chinneadh, dá bhforálfar lena mbearta féin.
2. Féachfaidh gach Páirtí le bearta a ghlacadh lena gcosnófar daoine aonair ar sháruithe ar chosaint sonraí pearsanta a tharlaíonn laistigh dá dhlínse, gan idirdhealú a dhéanamh ar fhoras amhail náisiúntacht nó áit chónaithe.
3. Déanfaidh gach Páirtí creat dlíthiúil a ghlacadh nó a choinneáil ar bun lena ndéanfar foráil maidir le cosaint sonraí pearsanta a bhaineann le ríomhthráchtáil. Agus a chreat dlíthiúil á fhorbairt aige chun sonraí pearsanta agus príobháideachas a chosaint, ba cheart do gach Páirtí prionsabail agus treoirlínte na gcomhlachtaí idirnáisiúnta ábhartha a chur san áireamh. Ardchaighdeáin cosanta an phríobháideachais agus sonraí a mhéid a bhaineann le rochtain rialtais ar shonraí atá i seilbh phríobháideach, amhail iad siúd a leagtar amach i bPrionsabail ECFE maidir le Rochtain Rialtais ar Shonraí Pearsanta atá i seilbh Eintiteas san Earnáil Phríobháideach, aithníonn na Páirtithe freisin go rannchuidíonn siad le muinín as an ngeilleagar digiteach.
4. Foilseoidh gach Páirtí faisnéis maidir le cosaint na sonraí pearsanta agus an phríobháideachais a sholáthraíonn sé d’úsáideoirí na ríomhthráchtála, lena n‑áirítear an méid seo a leanas:
(a) an chaoi ar féidir le daoine aonair leighis a lorg maidir le sárú ar chosaint na sonraí pearsanta nó an phríobháideachas a eascraíonn as trádáil dhigiteach; agus
(b) treoraíocht agus faisnéis eile le haghaidh gnólachtaí maidir leis na ceanglais dlí is infheidhme i dtaca le cosaint na sonraí pearsanta agus an phríobháideachais a chomhlíonadh.’
AIRTEAGAL 5
Déanfar Airteagal 8.63 den Chomhaontú a scriosadh.
AIRTEAGAL 6
Tiocfaidh an Prótacal i bhfeidhm i gcomhréir le míreanna 1 agus 2 d’Airteagal 23.2 den Chomhaontú.
AIRTEAGAL 7
1. Déantar an Prótacal seo, i gcomhréir le hAirteagal 23.8 den Chomhaontú, a tharraingt suas i ndúblach sa Bhéarla, sa Bhulgáiris, sa Chróitis, sa Danmhairgis, san Eastóinis, san Fhionlainnis, sa Fhraincis, sa Ghearmáinis, sa Ghréigis, san Iodáilis, sa Laitvis, sa Liotuáinis, sa Mháltais, san Ollainnis, sa Pholainnis, sa Phortaingéilis, sa Rómáinis, sa tSeicis, sa tSlóivéinis, sa tSlóvaicis, sa Spáinnis, sa tSualainnis, san Ungáiris agus san Indinéisis, agus comhúdarás ag gach ceann de na téacsanna sin.
2. I gcás ina mbeidh aon éagsúlacht sa léiriú, beidh forlámhas ag téacs na teanga inar caibidlíodh an Prótacal seo.
DÁ FHIANÚ SIN, tá na daoine thíos‑sínithe, atá údaraithe go cuí chuige sin, tar éis an Prótacal seo a shíniú.
ARNA DHÉANAMH I/IN/SA XXX, an XX lá de mhí [MÍ] sa bhliain XXXX.
Thar ceann an Aontais Eorpaigh
Thar ceann na Seapáine