This document is an excerpt from the EUR-Lex website
Document 52023PC0487
Proposal for a COUNCIL DECISION on the position to be taken on behalf of the European Union in the Joint Committee established by the Agreement between the European Union and Iceland on the protection of geographical indications for agricultural products and foodstuffs as regards the adoption of its rules of procedure
Togra le haghaidh CINNEADH ÓN gCOMHAIRLE maidir leis an seasamh atá le glacadh thar ceann an Aontais Eorpaigh sa Chomhchoiste a bunaíodh leis an gComhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint a mhéid a bhaineann le glacadh a rialacha nós imeachta
Togra le haghaidh CINNEADH ÓN gCOMHAIRLE maidir leis an seasamh atá le glacadh thar ceann an Aontais Eorpaigh sa Chomhchoiste a bunaíodh leis an gComhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint a mhéid a bhaineann le glacadh a rialacha nós imeachta
COM/2023/487 final
AN COIMISIÚN EORPACH
An Bhruiséil,14.8.2023
COM(2023) 487 final
2023/0299(NLE)
Togra le haghaidh
CINNEADH ÓN gCOMHAIRLE
maidir leis an seasamh atá le glacadh thar ceann an Aontais Eorpaigh sa Chomhchoiste a bunaíodh leis an gComhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint a mhéid a bhaineann le glacadh a rialacha nós imeachta
MEABHRÁN MÍNIÚCHÁIN
1.Ábhar an togra
Baineann an togra seo leis an gcinneadh lena mbunaítear an seasamh atá le glacadh thar ceann an Aontais sa Chomhchoiste a bunaíodh leis an gComhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint i ndáil le glacadh rialacha nós imeachta an Chomhchoiste atá beartaithe.
2.Comhthéacs an togra
2.1.An Comhaontú AE-an Íoslainn maidir le tásca geografacha a chosaint
Tá feidhm ag an gComhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint (‘an Comhaontú’) maidir le tásca geografacha le haghaidh táirgí talmhaíochta agus táirgí bia seachas fíonta, táirgí fíona cumhraithe agus deochanna biotáilleacha de thionscnamh chríocha na bPáirtithe a aithint agus a chosaint. Is é cúram foriomlán an Chomhchoiste faireachán a dhéanamh ar fhorbairtí a bhaineann leis an gComhaontú agus an comhar agus an t‑idirphlé maidir le tásca geografacha a threisiú. De bhun Airteagal 10(3) den Chomhaontú, áiritheoidh an Comhchoiste feidhmiú cuí an Chomhaontaithe agus féadfaidh sé aon ábhar a bhaineann lena chur chun feidhme agus lena oibriú a bhreithniú. Beidh sé freagrach, go háirithe, as Iarscríbhinní I agus II a ghabhann leis an gComhaontú a leasú agus as faisnéis a mhalartú faoi fhorbairtí reachtacha agus beartais, chomh maith le haon ábhar leasa choitinn eile i réimse na dtásc geografach, agus as faisnéis a mhalartú faoi thásca geografacha chun a gcosaint a bhreithniú i gcomhréir leis an gComhaontú.
Síníodh an Comhaontú an 23 Márta 2017 agus tháinig sé i bhfeidhm an 1 Bealtaine 2018 1 .
2.2.Comhchoiste
Le hAirteagal 10(1) den Chomhaontú bunaítear Comhchoiste arb éard a bheidh air ionadaithe ón Aontas Eorpach agus ón Íoslainn.
Le hAirteagal 10(2) agus (3) den Chomhaontú cinntear feidhmiú agus freagrachtaí an Chomhchoiste.
Is é cúram foriomlán an Chomhchoiste faireachán a dhéanamh ar fhorbairtí a bhaineann leis an gComhaontú agus an comhar agus an t‑idirphlé maidir le tásca geografacha a threisiú. De bhun Airteagal 10(3) den Chomhaontú, áiritheoidh an Comhchoiste feidhmiú cuí an Chomhaontaithe agus féadfaidh sé aon ábhar a bhaineann lena chur chun feidhme agus lena oibriú a bhreithniú. Beidh sé freagrach, go háirithe, as Iarscríbhinní I agus II a ghabhann leis an gComhaontú a leasú agus as faisnéis a mhalartú faoi fhorbairtí reachtacha agus beartais, chomh maith le haon ábhar leasa choitinn eile i réimse na dtásc geografach, agus as faisnéis a mhalartú faoi thásca geografacha chun a gcosaint a bhreithniú i gcomhréir leis an gComhaontú.
De bhun Airteagal 10(2) den Chomhaontú, is de chomhthoil a ghlacfaidh an Comhchoiste a chuid cinntí.
2.3.Gníomh beartaithe an Chomhchoiste
De réir an Chomhaontaithe, cinnfidh an Comhchoiste a rialacha nós imeachta féin.
Is é is cuspóir don ghníomh atá beartaithe, i gcomhréir le hAirteagal 10(2) den Chomhaontú, na rialacha nós imeachta lena rialaítear feidhmiú an Chomhchoiste a ghlacadh agus, go háirithe, a phróiseas cinnteoireachta a shainiú go mion.
3.An seasamh atá le glacadh thar ceann an Aontais
Leis an seasamh atá le glacadh thar ceann an Aontais, ba cheart a fhágáil gur féidir rialacha nós imeachta an Chomhchoiste um Thásca Geografacha a ghlacadh.
4.Bunús dlí
4.1.Bunús dlí nós imeachta
4.1.1.Prionsabail
In Airteagal 218(9) den Chonradh ar Fheidhmiú an Aontais Eorpaigh (CFAE) déantar foráil maidir le cinntí lena mbunófar ‘na seasaimh a ghlacfar thar ceann an Aontais i gcomhlacht arna chur ar bun le comhaontú nuair a iarrtar ar an gcomhlacht sin gníomhartha a ghlacadh a bhfuil éifeachtaí dlíthiúla leo, seachas gníomhartha lena bhforlíonfar nó lena leasófar creat institiúideach an chomhaontaithe.’
Áirítear ar na ‘gníomhartha a bhfuil éifeachtaí dlíthiúla leo’ gníomhartha a bhfuil éifeachtaí dlíthiúla leo de bhua rialacha an dlí idirnáisiúnta lena rialaítear an comhlacht i gceist. Áirítear freisin ionstraimí nach bhfuil éifeacht cheangailteach leo faoin dlí idirnáisiúnta, ach a fhéadfaidh ‘tionchar cinntitheach a imirt ar ábhar na reachtaíochta a ghlacfaidh reachtas an Aontais Eorpaigh’ 2 .
4.1.2.Cur i bhfeidhm maidir leis an gcás seo
Comhlacht is ea an Comhchoiste a cuireadh ar bun le comhaontú, is é sin an Comhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint.
Is é atá sa ghníomh atáthar ag iarraidh ar an gComhchoiste a ghlacadh gníomh a bhfuil éifeachtaí dlíthiúla leis. Beidh an gníomh atá beartaithe ceangailteach faoin dlí idirnáisiúnta i gcomhréir le hAirteagal 10 den Chomhaontú.
Leis an ngníomh atá beartaithe ní fhorlíontar ná ní leasaítear creat institiúideach an Chomhaontaithe.
Dá bhrí sin, is é Airteagal 218(9) CFAE bunús dlí nós imeachta an chinnidh atá beartaithe.
4.2.Bunús dlí substainteach
4.2.1.Prionsabail
Braitheann an bunús dlí substainteach atá le cinneadh faoi Airteagal 218(9) CFAE go príomha ar chuspóir agus ar ábhar an ghnímh atá beartaithe a nglacfar seasamh thar ceann an Aontais ina leith. Má tá dhá aidhm ag an ngníomh atá beartaithe nó má tá dhá chuid de ann agus más féidir ceann de na haidhmeanna nó de na codanna sin a shainaithint mar phríomhaidhm nó príomhchuid agus an ceann eile mar aidhm nó cuid theagmhasach, ní mór an cinneadh faoi Airteagal 218(9) CFAE a bhunú ar bhunús dlí substainteach aonair, is é sin an bunús dlí a éilítear faoin bpríomhaidhm nó faoin bpríomhchuid.
4.2.2.Cur i bhfeidhm maidir leis an gcás seo
Baineann príomhchuspóir agus ábhar an ghnímh atá beartaithe leis an gcomhbheartas tráchtála.
Dá bhrí sin, is é Airteagal 207 CFAE bunús dlí substainteach an chinnidh atá beartaithe.
4.3.Conclúid
Is é Airteagal 207 CFAE ba cheart a bheith i mbunús dlí an chinnidh atá beartaithe, i gcomhar le hAirteagal 218(9) CFAE.
5.FOILSIÚ AN GHNÍMH ATÁ BEARTAITHE
Neamhbhainteach.
2023/0299 (NLE)
Togra le haghaidh
CINNEADH ÓN gCOMHAIRLE
maidir leis an seasamh atá le glacadh thar ceann an Aontais Eorpaigh sa Chomhchoiste a bunaíodh leis an gComhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint a mhéid a bhaineann le glacadh a rialacha nós imeachta
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 207(4), an chéad fhomhír de, i gcomhar le hAirteagal 218(9) de,
Ag féachaint don togra ón gCoimisiún Eorpach,
De bharr an mhéid seo a leanas:
(1)Thug an tAontas an Comhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint 3 (‘an Comhaontú’) i gcrích le Cinneadh (AE) 2017/1912 ón gComhairle 4 agus tháinig sé i bhfeidhm an 1 Bealtaine 2018.
(2)Is le hAirteagal 10(1) den Chomhaontú a bhunaítear an Comhchoiste.
(3)De bhun Airteagal 10(2) den Chomhaontú, tá an Comhchoiste lena rialacha nós imeachta féin a bhunú.
(4)Is iomchuí an seasamh atá le glacadh thar ceann an Aontais sa Chomhchoiste a bhunú a mhéid a bhaineann lena rialacha nós imeachta, ós rud é go mbeidh na rialacha sin ina gceangal ar an Aontas.
(5)Tá seasamh an Aontais laistigh den Chomhchoiste le bunú ar na dréachtrialacha nós imeachta a ghabhann leis an gCinneadh seo,
TAR ÉIS AN CINNEADH SEO A GHLACADH:
Airteagal 1
An seasamh atá le glacadh, thar ceann an Aontais, sa Chomhchoiste a mhéid a bhaineann le glacadh a rialacha nós imeachta, beidh sé bunaithe ar an dréachtchinneadh ón gComhchoiste sin a ghabhann leis an gCinneadh seo.
Airteagal 2
Is chuig an gCoimisiún a dhírítear an Cinneadh seo.
Arna dhéanamh sa Bhruiséil,
Thar ceann na Comhairle
An tUachtarán
AN COIMISIÚN EORPACH
An Bhruiséil,14.8.2023
COM(2023) 487 final
IARSCRÍBHINN
a ghabhann le
Togra le haghaidh
CINNEADH ÓN gCOMHAIRLE
maidir leis an seasamh atá le glacadh thar ceann an Aontais Eorpaigh sa Chomhchoiste a bunaíodh leis an gComhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint a mhéid a bhaineann le glacadh a rialacha nós imeachta
IARSCRÍBHINN
CINNEADH UIMH. 1. ÓN gCOMHCHOISTE
an LL MM 2023
maidir le glacadh a rialacha nós imeachta
TÁ AN COMHCHOISTE,
Ag féachaint don Chomhaontú idir an tAontas Eorpach agus an Íoslainn maidir le tásca geografacha le haghaidh táirgí talmhaíochta agus táirgí bia a chosaint 1 (dá ngairtear ‘an Comhaontú’ anseo feasta), agus go háirithe Airteagal 10 de,
De bharr an mhéid seo a leanas:
(1) De bhun Airteagal 10(2) den Chomhaontú, cinnfidh an Comhchoiste a rialacha nós imeachta.
(2) Ba cheart rialacha nós imeachta Chomhchoiste an Chomhaontaithe a bhunú,
TAR ÉIS AN CINNEADH SEO A GHLACADH:
Airteagal 1
Leis seo, glactar rialacha nós imeachta an Chomhchoiste, a leagtar amach san Iarscríbhinn.
Airteagal 2
Tiocfaidh an Cinneadh seo i bhfeidhm dáta a ghlactha.
Arna dhéanamh …,
Thar ceann an Chomhchoiste
|
[TEIDEAL] Aireacht Tionscal agus Nuálaíochta na hÍoslainne Comhchathaoirleach an Chomhchoiste |
Ceann Aonaid Ard-Stiúrthóireacht Talmhaíochta agus Forbartha Tuaithe an Choimisiúin Eorpaigh Comhchathaoirleach an Chomhchoiste |
IARSCRÍBHINN
RIALACHA NÓS IMEACHTA AN CHOMHCHOISTE
Airteagal 1
Cinn Toscaireachta
(1)Ceapfaidh an tAontas Eorpach agus an Íoslainn (‘na Páirtithe’) faoi seach Ceann Toscaireachta a bheidh ina dhuine teagmhála maidir le gach ábhar a bhaineann leis an gCoiste.
(2)Féadfaidh gach Ceann Toscaireachta feidhmeanna uile an Chinn Toscaireachta nó aon cheann díobh a tharmligean d’ionadaí ainmnithe, agus sa chás sin beidh feidhm chomhionann ag gach tagairt a dhéantar anseo feasta don Cheann Toscaireachta maidir leis an ionadaí ainmnithe.
Airteagal 2
Cathaoirleach
Beidh oifig Chathaoirleach an Choiste ag Ceann Toscaireachta gach Páirtí gach re seach, ar feadh tréimhse bliana féilire amháin.
Airteagal 3
Cruinnithe
(1)Mura gcomhaontóidh na Páirtithe a mhalairt, tiocfaidh an Coiste le chéile gach re seal san Aontas agus san Íoslainn arna iarraidh sin do cheachtar Páirtí, tráth nach déanaí ná 90 lá ón iarraidh.
(2)Déanfaidh an Cathaoirleach gach cruinniú den Choiste a chomóradh ar dháta agus in áit a chomhaontóidh na Páirtithe. Is é an Cathaoirleach a eiseoidh an fógra maidir le comóradh an chruinnithe tráth nach déanaí ná 28 lá féilire roimh thús an chruinnithe, mura gcomhaontóidh na Páirtithe a mhalairt.
(3)I gcás ina gcomhaontóidh an dá Pháirtí amhlaidh, maidir le faisnéis shonrach a iarrfar, féadfaidh saineolaithe a bheidh in ann í a sholáthar freastal ar chruinnithe den Choiste.
(4)Mura gcomhaontófar a mhalairt go comhpháirteach, ní bheidh cruinnithe an Choiste ar oscailt don phobal.
(5)Mar eisceacht air sin, féadfar cruinnithe an Choiste a thionól trí aon mhodh teicneolaíochta a chomhaontóidh na Páirtithe, lena n‑áirítear físchomhdháil.
Airteagal 4
Toscaireachtaí
Roimh gach cruinniú, cuirfidh gach Páirtí an Páirtí eile ar an eolas, trí Rúnaíocht an Choiste, dá bhforáiltear in Airteagal 5, faoi chomhdhéanamh beartaithe a thoscaireachta.
Airteagal 5
Rúnaíocht
Is é an Ceann Toscaireachta lena mbaineann a cheapfaidh ionadaí ón gCoimisiún Eorpach agus ionadaí ón Íoslainn chun gníomhú go comhpháirteach mar Rúnaithe an Choiste, Rúnaithe a fheidhmeoidh cúraimí rúnaíochta ar bhealach comhpháirteach agus de mheon muiníne frithpháirtí agus comhair.
Airteagal 6
Comhfhreagras
(1)Comhfhreagras a sheolfar chuig an gCoiste, díreofar é chuig Rúnaí ceachtar den dá Pháirtí agus cuirfidh seisean an Rúnaí eile ar an eolas faoi ansin.
(2)Áiritheoidh an Rúnaíocht go ndéanfar comhfhreagras a sheolfar chuig an gCoiste a chur ar aghaidh chuig an gCathaoirleach agus a scaipeadh, i gcás inarb iomchuí.
(3)Féadfar comhfhreagras idir na Páirtithe a dhéanamh in aon fhoirm scríofa, lena n‑áirítear i bhfoirm ríomhphoist.
Airteagal 7
Clár oibre na gcruinnithe
(1)Déanfaidh Rúnaíocht an Choiste clár oibre sealadach a tharraingt suas le haghaidh gach cruinnithe ar bhonn tograí a dhéanfaidh na páirtithe. Beidh sa chlár sealadach míreanna a bhfuil iarraidh faighte ag Rúnaíocht an Choiste ó Pháirtí iad a chur ar an gclár, míreanna arna dtacú le doiciméid ábhartha, tráth nach déanaí ná 21 lá féilire roimh dháta an chruinnithe.
(2)Scaipfear an clár oibre sealadach, mar aon leis na doiciméid ábhartha, tráth nach déanaí ná 15 lá féilire roimh thús an chruinnithe.
(3)Glacfaidh an Cathaoirleach agus an Ceann Toscaireachta eile an clár ag tús gach cruinnithe. Féadfar míreanna seachas iad atá ar an gclár sealadach a chur ar an gclár i gcás ina gcomhaontóidh na Páirtithe amhlaidh.
(4)Féadfaidh an Cathaoirleach, i gcomhairle leis na Páirtithe, na tréimhsí ama a shonraítear i míreanna 1 agus 2 a laghdú chun imthosca speisialta a chur san áireamh.
Airteagal 8
Ionstraimí a ghlacadh
(1)Déanfar cinntí an Choiste de réir bhrí mhíreanna (2) agus (3) d’Airteagal 10 den Chomhaontú a ghlacadh de chomhthoil agus díreofar chuig na Páirtithe iad. Beidh sínithe an Chathaoirligh agus an Chinn Toscaireachta eile ar na cinntí.
(2)Tiocfaidh gach cinneadh i bhfeidhm dáta a ghlactha mura ndéanfar foráil maidir lena mhalairt sa chinneadh.
(3)Féadfaidh ceachtar Páirtí a chinneadh aon chinneadh a ghlacfaidh an Coiste a fhoilsiú.
Airteagal 9
Nós imeachta i scríbhinn
I gcás ina gcomhaontóidh na Páirtithe amhlaidh, féadfaidh an Coiste cinntí a ghlacadh trí nós imeachta i scríbhinn, tar éis na nósanna imeachta inmheánacha faoi seach a chur i gcrích. Is éard a bheidh sa nós imeachta i scríbhinn malartú nótaí idir an bheirt Rúnaithe, ag gníomhú dóibh i gcomhaontú leis na Páirtithe. Déanfaidh an Páirtí a bhfuil úsáid an nós imeachta i scríbhinn á moladh aige an dréachtchinneadh a chur faoi bhráid an Pháirtí eile, Páirtí a thabharfaidh freagra air sin ina gcuirfear in iúl cé acu a ghlacann sé nó nach nglacann sé leis an gcinneadh, an bhfuil aon leasú á mholadh aige, nó an bhfuil am breise á iarraidh aige chun machnamh a dhéanamh air. I gcás ina nglacfar an dréacht, tabharfar i gcrích é i gcomhréir le hAirteagal 8(1).
Airteagal 10
Miontuairiscí
(1)Déanfaidh an Cathaoirleach dréachtmhiontuairiscí ar gach cruinniú a tharraingt suas agus cuirfidh sé faoi bhráid an Chinn Toscaireachta eile iad laistigh de 20 lá oibre ón gcruinniú. Luafar sna dréachtmhiontuairiscí na moltaí a ghlacfar, agus féadfar nóta a dhéanamh freisin d’aon chonclúid eile ar thángthas uirthi. Glacfaidh an Ceann Toscaireachta eile leis an dréacht, nó cuirfidh sé na leasuithe beartaithe isteach. A luaithe a bheidh comhaontú ann maidir leis na dréachtmhiontuairiscí, síneoidh an Cathaoirleach agus an Ceann Toscaireachta eile dhá chóip bhunaidh. Coimeádfaidh an Cathaoirleach cóip bhunaidh de na miontuairiscí agus coimeádfaidh an Ceann Toscaireachta eile cóip bhunaidh eile díobh.
(2)I gcás nach mbeidh aon chomhaontú ann maidir leis na miontuairiscí sula ndéanfar an cruinniú ina dhiaidh sin a chomóradh, déanfar taifead sna miontuairiscí den dréacht a tharraingeoidh an Cathaoirleach suas a gcuirfear i gceangal leis na leasuithe molta a chuirfidh an Ceann Toscaireachta eile isteach.
Airteagal 11
Costais
(1)Íocfaidh gach Páirtí aon chostas a thabhóidh sé de thoradh é a bheith rannpháirteach i gcruinnithe an Chomhchoiste.
(2)Is é an Páirtí a óstálfaidh an cruinniú a iompróidh caiteachas i ndáil le heagrú cruinnithe agus atáirgeadh doiciméad.
Airteagal 12
Rúndacht
Beidh plé an Choiste faoi rún.