AN COIMISIÚN EORPACH

An Bhruiséil,17.4.2023

COM(2023) 195 final

2023/0094(NLE)

Togra le haghaidh

CINNEADH ÓN gCOMHAIRLE

maidir leis an seasamh atá le glacadh thar ceann an Aontais Eorpaigh sa Chomhchoiste faoin gComhaontú maidir le sábháilteacht na heitlíochta sibhialta idir an tAontas Eorpach agus an tSeapáin, maidir le rialacha nós imeachta an Chomhchoiste a ghlacadh

MEABHRÁN MÍNIÚCHÁIN

1.Comhthéacs an mholta

1.1.Forais agus cuspóirí an togra

Chun go nglacfaidh an tAontas na rialacha nós imeachta ag an gComhchoiste, is gá Cinneadh ón gComhairle chun an Coimisiún (arb é a dhéanann ionadaíocht thar ceann an Aontais ag cruinnithe an Chomhchoiste) a údarú chun na rialacha nós imeachta a ghlacadh thar ceann an Aontais laistigh den Chomhchoiste.

1.2.Comhsheasmhacht le forálacha beartais atá sa réimse beartais cheana

Is cuid den Straitéis Eitlíochta don Eoraip é an comhar idir an tAontas agus an tSeapáin maidir le sábháilteacht eitlíochta. Tá na dréacht-rialacha nós imeachta atá beartaithe cosúil leis na dréacht-rialacha nós imeachta a glacadh le haghaidh Comhchoistí comhaontuithe sábháilteachta eitlíochta déthaobhacha eile idir an tAontas agus tríú tíortha.

1.3.Comhsheasmhacht le beartais eile de chuid an Aontais

Tá an Comhaontú ina chuspóir bunúsach de bheartas seachtrach eitlíochta an Aontais tríd an tsábháilteacht na heitlíochta sibhialta a fheabhsú agus trí thrádáil agus infheistíocht i dtáirgí aerloingseoireachta a éascú.

2.Bunús dlí, Coimhdeacht agus comhréireacht

2.1.Bunús dlí

An Conradh ar Fheidhmiú an Aontais Eorpaigh, go háirithe Airteagal 100(2) de, i gcomhar le hAirteagal 218(9) de,

2.2.Coimhdeacht (i gcás inniúlacht neamheisiach)

Neamhbhainteach.

2.3.Comhréireacht

Neamhbhainteach.

2.4.An rogha ionstraime

Neamhbhainteach.

3.Torthaí na meastóireachtaí ex-post, an comhairliúcháin leis na geallsealbhóirí agus na measúnuithe tionchair.

3.1.Meastóireachtaí ex post/seiceálacha oiriúnachta ar an reachtaíocht atá ann cheana

Neamhbhainteach.

3.2.Comhairliúcháin leis na páirtithe leasmhara

3.3.Bailiú agus úsáid saineolais

3.4.Measúnú tionchair

3.5.Oiriúnacht rialála agus simpliú

3.6.Cearta bunúsacha

4.IMPLEACHTAÍ BUISÉADACHA

5.EILIMINTÍ EILE

5.1.Pleananna cur chun feidhme, agus socruithe faireacháin, meastóireachta agus tuairiscithe

5.2.Doiciméid mhíniúcháin (i gcás treoracha)

Neamhbhainteach.

5.3.Míniúchán mionsonraithe ar fhorálacha sonracha an togra

2023/0094 (NLE)

Togra le haghaidh

CINNEADH ÓN gCOMHAIRLE

maidir leis an seasamh atá le glacadh thar ceann an Aontais Eorpaigh sa Chomhchoiste faoin gComhaontú maidir le sábháilteacht na heitlíochta sibhialta idir an tAontas Eorpach agus an tSeapáin, maidir le rialacha nós imeachta an Chomhchoiste a ghlacadh

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 100(2) de i gcomhar le hAirteagal 218(9) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)Formheasadh an Comhaontú maidir le sábháilteacht na heitlíochta sibhialta idir an tAontas Eorpach agus an tSeapáin 1 (‘an Comhaontú’) thar ceann an Aontais trí CHINNEADH (AE) 2021/112 ÓN gCOMHAIRLE an 25 Eanáir 2021 2 agus tháinig sé i bhfeidhm an 1 Meán Fómhair 2021 3 .

(2)In Airteagal 11 (1) den Chomhaontú, déantar foráil maidir le Comhchoiste na bPáirtithe a bhunú le haghaidh fheidhmiú éifeachtach an Chomhaontuithe.

(3)Ina theannta sin, foráiltear in Airteagal 11 (3) den Chomhaontú go ndéanfaidh an Comhchoiste a rialacha nós imeachta a tharraingt suas agus a ghlacadh.

(4)Chomhoibrigh an Coimisiún agus Aireacht Gnóthaí Eachtracha na Seapáine le chéile chun dréacht-rialacha nós imeachta a tharraingt suas.

(5)Is iomchuí an seasamh a bhunú atá le glacadh thar ceann an Aontais sa Chomhchoiste a mhéid a bhaineann le glacadh rialacha nós imeachta an Chomhchoiste, ós rud é go mbeidh siad ina gceangal ar an Aontas. Ba cheart seasamh an Aontais laistigh den Chomhchoiste a bheith bunaithe ar an dréacht-Chinneadh ón gComhchoiste,

TAR ÉIS AN CINNEADH SEO A GHLACADH:

Airteagal 1

(1)An seasamh atá le glacadh thar ceann an Aontais sa chéad chruinniú den Chomhchoiste arna bhunú ag an gComhaontú maidir le sábháilteacht don eitlíochta shibhialta idir an tAontas Eorpach agus an tSeapáin a mhéid a bhaineann le rialacha nós imeachta an Chomhchoiste a ghlacadh, déanfar iad a bhunú ar dhréacht-Chinneadh an Chomhchoiste 4 .

(2)Féadfaidh ionadaí an Aontais laistigh den Chomhchoiste mionathruithe ar an dréachtchinneadh ón gComhchoiste a aontú gan cinneadh eile ón gComhairle.

Airteagal 2

Tiocfaidh an Cinneadh seo i bhfeidhm ar dháta a ghlactha.

Arna dhéanamh sa Bhruiséil,

(1)    IO L 229, 16.7.2020, lgh. 4-25

(2)    IO L 36, 2.2.2021, lgh. 1-2

(3)    IO L 230, 30.6.2021, lch. 4.

(4)    Féach doiciméad ST……../23 ar http://register.consilium.europa.eu.

AN COIMISIÚN EORPACH

An Bhruiséil,17.4.2023

COM(2023) 195 final

IARSCRÍBHINN

a ghabhann leis an

Togra le haghaidh Cinneadh ón gComhairle

maidir leis an seasamh atá le glacadh thar ceann an Aontais Eorpaigh sa Chomhchoiste faoin gComhaontú maidir le sábháilteacht na heitlíochta sibhialta idir an tAontas Eorpach agus an tSeapáin, maidir le rialacha nós imeachta an Chomhchoiste a ghlacadh

CINNEADH Uimh. 1/ … ÓN  
gCOMHCHOISTE IDIR AN tAONTAS AGUS AN tSEAPÁIN 
ARNA BHUNÚ  
AG AN gCOMHAONTÚ I nDÁIL LE SÁBHÁILTEACHT DON EITLÍOCHT SHIBHIALTA IDIR  
AN tAONTAS AGUS AN tSEAPÁIN

an ...

lena ndéantar a rialacha nós imeachta a ghlacadh

TÁ AN COMHCHOISTE IDIR AN tAONTAS AGUS AN tSEAPÁIN,

Ag féachaint don Chomhaontú maidir le Sábháilteacht na hEitlíochta Sibhialta idir an tAontas Eorpach agus an tSeapáin, agus go háirithe Airteagal 11(3) de,

TAR ÉIS AN CINNEADH SEO A GHLACADH:

Mír 1

Glactar leis seo rialacha nós imeachta an Chomhchoiste i gceangal leis an gCinneadh seo.

Mír 2

Tiocfaidh an Cinneadh seo i bhfeidhm lá a ghlactha.

Arna shíniú i/sa ...,

COMHCHOISTE NA bPÁIRTITHE 
SA CHOMHAONTÚ I nDÁIL LE SÁBHÁILTEACHT DON EITLÍOCHT SHIBHIALTA IDIR  
AN tAONTAS EORPACH AGUS AN tSEAPÁIN

Rialacha Nós Imeachta

Mír 1

Sainmhínithe

Chun críocha na rialacha nós imeachta seo faoi Airteagal 11(3) den Chomhaontú maidir le Sábháilteacht na hEitlíochta Sibhialta idir an tAontas Eorpach agus an tSeapáin, maidir leis na téarmaí seo a leanas:

-ciallaíonn ‘Páirtí’ an tAontas Eorpach nó an tSeapáin;

-ciallaíonn ‘an dá Pháirtí’ An tAontas Eorpach agus an tSeapáin.

Mír 2

Cathaoirleach agus Comhdhéanamh

1.Beidh ionadaí ón Aontas Eorpach agusionadaí ón tSeapáin ina gcomhchathaoirligh ar an gComhchoiste.

2.Is é an Coimisiún Eorpach a dhéanfaidh ionadaíocht thar ceann an Aontais sa Chomhchoiste. Tabharfaidh Gníomhaireacht Sábháilteachta Eitlíochta an Aontais Eorpaigh cabhair dó agus beidh údaráis eitlíochta Bhallstáit an Aontais Eorpaigh in éineacht leis.

3.Is é Aireacht Gnóthaí Eachtracha na Seapáine agus/nó Misean na Seapáine chuig an Aontas Eorpach a dhéanfaidh ionadaíocht thar ceann na Seapáine sa Chomhchoiste, agus beidh an Aireacht Talún, Bonneagair, Iompair agus Turasóireachta in éineacht leo.

Mír 3

Cruinnithe

1.Buailfidh an Comhchoiste le chéile go tráthrialta, ar iarraidh ó cheachtar den dá pháirtí.

2.Maidir le suíomh na gcruinnithe, déanfar sealaíocht idir an Bhruiséil agus Tóiceo, a mhéid is féidir. De mhalairt air sin, d’fhéadfaí plé trí fhíschomhdháil a eagrú. Beidh an stádas céanna ag cinntí agus moltaí a ghlactar le linn físchomhdhálacha agus a bheidh acu sin a ghlactar i gcruinnithe fisiceacha. Nuair a bheidh dáta agus áit cruinnithe cinnte ag na Páirtithe, is é an Coimisiún Eorpach a thionólfaidh an cruinniú thar ceann an Aontais Eorpaigh agus is í Aireacht Gnóthaí Eachtracha a thionólfaidh an cruinniú thar ceann na Seapáine.

3.Mura gcinnfidh na cathaoirligh a mhalairt, ní bheidh cead ag an bpobal páirt a ghlacadh i gcruinnithe an Chomhchoiste. Féadfar preaseisiúint a chur amach i ndiaidh na gcruinnithe de chomhthoil na gcathaoirleach.

4.Is i mBéarla a reáchtálfar na cruinnithe agus a scríobhfar na doiciméid. Is é an Páirtí a iarrann ateangaireacht nó aistriúchán go teanga eile a sheasfaidh na costais lena mbaineann.

Mír 4

Toscaireachtaí

1.Roimh gach cruinniú, cuirfidh na Páirtithe a chéile ar an eolas faoi chomhdhéanamh beartaithe a dtoscaireachtaí faoi seach, agus ainmneoidh siad a gcathaoirleach féin faoi seach.

2.Féadfaidh na cathaoirligh, ar bhonn ad hoc, a chinneadh a iarraidh ar rannpháirtithe seachtracha freastal ar chruinnithe den Chomhchoiste chun faisnéis ar ábhair ar leith a sholáthar, nó mar bhreathnóirí.

Mír 5

Rúnaíocht

Oifigeach ón gCoimisiún Eorpach agus oifigeach ón Aireacht Gnóthaí Eachtracha, gníomhóidh siad go comhpháirteach mar rúnaithe an Chomhchoiste.

Mír 6

Clár Oibre na gCruinnithe

1.Leagfaidh na cathaoirligh síos clár oibre sealadach gach cruinnithe de chomhthoil. Tarchuirfidh na rúnaithe an clár oibre sealadach sin agus aon doiciméad atá ábhartha maidir leis an gcruinniú chuig na rannpháirtithe ar a laghad cúig lá oibre dhéag roimh dháta an chruinnithe.

2.Glacfaidh an Comhchoiste an clár oibre ag tús gach cruinnithe. Féadfar míreanna eile seachas iad siúd atá ar an gclár oibre sealadach a chur ar an gclár oibre, má chomhaontaíonn na Páirtithe leis sin.

3.Féadfaidh na cathaoirligh an teorainn ama maidir le doiciméid a tharchur, dá dtagraítear i mír 1, lena n‑áirítear an clár oibre sealadach, a mhodhnú de chomhthoil, chun ceanglais nósanna imeachta inmheánacha Páirtí nó práinn ábhar áirithe a chur san áireamh.

Mír 7

Miontuairiscí

1.Déanfar dréachtmhiontuairiscí gach cruinnithe den Chomhchoiste a tharraingt suas tar éis an chruinnithe. Léireofar iontu na cinntí agus na moltaí a glacadh agus na conclúidí a rinneadh.

2.Nuair a bheidh na miontuairiscí formheasta, síneoidh na cathaoirligh iad agus comhdóidh gach Páirtí cóip bhunaidh nó cóip scanta amháin. Tá síniú agus cartlannú leictreonach indéanta.

Mír 8

Nós imeachta i scríbhinn

I gcás inar gá agus inar cuí‑réasúnaithe, féadfar moltaí agus cinntí an Chomhchoiste a ghlacadh trí nós imeachta i scríbhinn. Chun na críche sin, malartóidh na cathaoirligh na dréachtbhearta a lorgaítear tuairim an Chomhchoiste ina leith, agus féadfar an tuairim sin a dheimhniú trí mhalartú comhfhreagrais ina dhiaidh sin. Mar sin féin, féadfaidh aon Pháirtí a iarraidh go dtionólfar an Comhchoiste chun an t‑ábhar a phlé.

Mír 9

Pléití

1.Is de chomhthoil na bPáirtithe a ghlacfaidh an Comhchoiste a chuid cinntí agus moltaí.

2.‘Cinneadh’ agus ‘Moladh’ an teideal a bheidh ar chinntí agus ar mholtaí an Chomhchoiste faoi seach, agus ina dhiaidh sin beidh sraithuimhir, dáta a nglactha agus tuairisc ar a n‑ábhar.

3.Síneoidh na cathaoirligh cinntí agus moltaí an Chomhchoiste.

4.Déanfaidh na Páirtithe na cinntí a ghlacfaidh an Comhchoiste a chur chun feidhme i gcomhréir lena nósanna imeachta inmheánacha féin.

5.Féadfaidh na Páirtithe na cinntí a ghlacfaidh an Comhchoiste a fhoilsiú ina bhfoilseacháin oifigiúla féin. Féadfar moltaí nó aon ghníomh eile a ghlacfaidh an Comhchoiste a fhoilsiú má chinneann na Páirtithe sin. Coinneoidh gach Páirtí cóip bhunaidh nó cóip scanta amháin de na cinntí agus de na moltaí.

Mír 10

Costais

Beidh na Páirtithe freagrach as a gcostais féin a íoc, costais a thabhaítear mar gheall ar a rannpháirtíocht i gcruinnithe an Chomhchoiste agus cruinnithe i gcomhréir le cinntí agus moltaí an Chomhchoiste, lena n‑áirítear caiteachas foirne, taistil agus cothaithe agus costais phoist agus teileachumarsáide.

Is é an Páirtí a óstálfaidh an cruinniú a sheasfaidh caiteachas a bhaineann le heagrú ábharach na gcruinnithe.

_______________________