1.

á athdhearbhú go gcáineann sí, go neamhbhalbh, cogadh foghach neamhdhleathach na Rúise gan chúis agus gan údar i gcoinne na hÚcráine agus rannpháirtíocht réimeas Lukashenka sa Bhealarúis; ag athdhearbhú a hiarrata ar an Rúis deireadh a chur láithreach leis na gníomhaíochtaí míleata uile san Úcráin agus gach fórsa agus trealamh míleata a tharraingt siar gan choinníoll ó chríoch iomlán na hÚcráine a aithnítear go hidirnáisiúnta, deireadh a chur le díbirt éigeantach shibhialtaigh na hÚcráine agus gach Úcránach atá faoi choinneáil agus a díbríodh a scaoileadh saor, go háirithe leanaí;

2.

á chur i bhfios go láidir gurb é cuspóir smachtbhannaí AE mar fhreagairt ar chogadh foghach na Rúise i gcoinne na hÚcráine bonn eacnamaíoch agus tionsclaíoch na Rúise a lagú go straitéiseach, go háirithe an coimpléasc tionsclaíoch míleata, chun an bonn a bhaint ó chumas Chónaidhm na Rúise leanúint den chogadh, d’ionsaí a dhéanamh ar an bpobal sibhialtach agus d’iomláine chríochach na hÚcráine a shárú, agus chun bac a chur ar rochtain na Rúise ar theicneolaíochtaí agus comhpháirteanna míleata agus chun díriú ar scothaicmí polaitiúla agus eacnamaíocha na Rúise chun an bonn a bhaint óna dtacaíocht don réimeas;

3.

á mheabhrú go mbraitheann éifeachtacht smachtbhannaí idirnáisiúnta ar dhaingne, comhtháthú, comhar, macántacht agus urraim do ghealltanais na stát a ghlac iad; á iarraidh ar na Ballstáit sócmhainní eachtracha Rúiseacha atá á gcoinneáil ina ndlínsí a shainaithint go soiléir agus a áirithiú go ndéanfar iad a bhaint go héifeachtach chun nach mbeidh rochtain ag eintitis Rúiseacha orthu; á thabhairt chun suntais go bhfuil gá le cur chuige níos comhchuibhithe agus le trédhearcacht níos fearr maidir le suíomh agus méideanna na sócmhainní reoite a thuairisciú;

4.

á chur i bhfios go láidir, ós rud é gur ionstraim beartais eachtraigh iad smachtbhannaí AE ar an Rúis, a bhfuil sé mar aidhm léi deireadh a chur le cogadh neamhdhleathach, go bhféadfaí imchéimniú na srianta onnmhairiúcháin sin ar earraí atá criticiúil ó thaobh an chogaidh de, i gcásanna tromchúiseacha áirithe, a mheas agus a ionchúiseamh mar chomhpháirteachas i gcoireanna cogaidh na Rúise;

5.

á iarraidh ar AE agus ar a Bhallstáit maoirseacht ar chur chun feidhme smachtbhannaí a threisiú agus a lárú, ar leibhéal AE, agus sásra um chosc ar imchéimniú smachtbhannaí agus um fhaireachán smachtbhannaí a fhorbairt chun teorainn a chur le cumas na Rúise smachtbhannaí a imchéimniú; á iarraidh ar údaráis na mBallstát comhoibriú níos dlúithe le chéile maidir le himscrúduithe ar sháruithe ar smachtbhannaí agus ar imchéimniú smachtbhannaí agus iarmhairtí na sáruithe sin a léiriú trí sháruithe ar smachtbhannaí AE a chosc agus/nó a ionchúiseamh go dinimiciúil agus go tréan; á iarraidh, i ndáil leis sin, go dtiocfadh institiúidí AE ar chomhaontú tapa maidir le treoir uaillmhianach i ndáil leis an sainmhíniú ar chionta coiriúla agus ar phionóis choiriúla i leith sárú ar bhearta sriantacha an Aontais; á chur i bhfios go láidir gur cheart go leanfadh pionóis de bheith comhréireach ach go mbeidís ard go leor freisin chun éifeacht dhíspreagthach a bheith acu; á iarraidh ar an gComhairle Eorpach cinneadh a ghlacadh lena leathnaítear cumhachtaí Oifig an Ionchúisitheora Phoiblí Eorpaigh chun coir an tsáraithe ar bhearta sriantacha an Aontais a chur san áireamh, lena gceadófaí comhchuibhiú níos fearr agus ionchúiseamh comhsheasmhach agus aonfhoirmeach na gcoireanna sin ar fud an Aontais;

6.

á chur in iúl gur cúis mhór bhuartha di an trádáil leanúnach earraí atá criticiúil ó thaobh an chogaidh de idir Ballstáit agus an Rúis; á chur in iúl gur saoth léi go bhfuil cultúr comhlíonta maidir leis an rialacha a bhaineann le smachtbhannaí AE ar an Rúis go mór in easnamh; ag cáineadh an chleachtais lena ndíoltar earraí ón Aontas atá faoi smachtbhannaí le cuideachtaí nó le daoine aonair ó thíortha nach tíortha den Aontas Eorpach iad agus lena seoltar go díreach ó AE chuig an Rúis iad ina dhiaidh sin; á iarraidh ar AE agus ar a Bhallstáit córais a chur ar bun trínar féidir faisnéis maidir le hidirbhearta a roinnt ar bhealach níos éifeachtaí chun feabhas a chur ar fhorfheidhmiú na smachtbhannaí a bhaineann le hearraí míleata agus earraí dé-úsáide; á iarraidh ar údaráis na mBallstát an fhaisnéis agus an cúnamh is gá a chur ar fáil do chuideachtaí chun feabhas a chur ar chomhlíonadh smachtbhannaí AE agus chun dul i dteagmháil leis na cuideachtaí a bhfuil a dtáirgí á n-onnmhairiú chuig an Rúis chun an baol go sárófaí rialuithe onnmhairiúcháin i ngan fhios dóibh féin a íoslaghdú; á iarraidh ar na Ballstáit imscrúdú críochnúil a dhéanamh ar chomhlíonadh srianta onnmhairiúcháin ag cuideachtaí ar earraí liostaithe agus pionóis athchomhairleacha a fhorchur;

7.

á iarraidh ar na Ballstáit rialuithe onnmhairiúcháin a leathnú chun níos mó catagóirí earraí a chumhdach, chun rialuithe onnmhairiúcháin a ailíniú ar fud dlínsí agus chun bearta a fhorfheidhmiú go comhsheasmhach chun bealaí éalaithe a dhúnadh; á iarraidh ar AE agus ar a Bhallstáit bearta ar leith a dhéanamh chun cosc a chur ar tháirgí ardteicneolaíochta atá á n-onnmhairiú chuig tíortha nach tíortha den Aontas Eorpach iad críochnú sa Rúis, agus faireachán leanúnach a dhéanamh ar fhorbairtí chun an chaoi a n-oibríonn scéimeanna imchéimnithe smachtbhannaí a shainaithint agus chun na córais smachtbhannaí a oiriúnú dá réir;

8.

ag tathant ar chuideachtaí ón Aontas, ó thíortha is iarrthóirí AE agus ó thíortha is iarrthóirí ionchasacha a gcuid oibríochtaí a tharraingt siar ón Rúis agus dícheall ar leith a dhéanamh nuair atá earraí á n-onnmhairiú acu a bhfuil toirmeasc orthu a onnmhairiú chuig an Rúis; ag cur béim ar an bhfíoras nach mór go mbeadh cuideachtaí AE agus a bhfochuideachtaí a mheastar a bheith ag sárú bhearta sriantacha AE neamh-incháilithe do chistiú, lena n-áirítear le haghaidh tairiscintí agus cineálacha eile cistiúcháin mar chuid den tSaoráid don Úcráin agus de chláir atógála eile san Úcráin; á mheas nár cheart go mbainfeadh na cuideachtaí a úsáideann maoluithe ar chur i bhfeidhm smachtbhannaí AE i gcoinne na Rúise, agus, dá réir sin, a choinníonn gníomhaíochtaí gnó leis an Rúis, tairbhe as aon chistí AE, as cúnamh teicniúil ná as rannpháirtíocht i dtionscadail arna gcistiú ag AE; á mheas gur cheart na cuideachtaí sin a chur go huathoibríoch ar an gCóras Luathbhraite agus Eisiaimh agus gur cheart a stádas ar uirlis scórála riosca Arachne a thabhairt cothrom le dáta dá réir sin; á chreidiúint gur cheart feidhm a bheith ag an bprionsabal céanna, mutatis mutandis, maidir le soláthar poiblí, nár cheart, faoina réir, cead a thabhairt do ranna rialtais ná d’údaráis áitiúla obair, earraí nó seirbhísí a cheannach ó chuideachtaí de mhaolú ar smachtbhannaí AE faoi Rialachán (AE) Uimh. 269/2014 ón gComhairle;

9.

á iarraidh ar AE agus ar na Ballstáit feabhas a chur ar chumarsáid straitéiseach AE maidir le smachtbhannaí AE i gcoinne na Rúise, agus bréagaisnéis faoi na smachtbhannaí sin a chomhrac; á iarraidh ar an gCoimisiún agus ar na Ballstáit cur leis na hiarrachtaí chun an pobal i gcoitinne a chur ar an eolas faoi bhearta sriantacha AE i gcoinne na Rúise, go háirithe a gcuspóir, agus leas a bhaint, ina leith sin, as taithí Toscaire Smachtbhannaí an Aontais maidir le cur ina luí ar chomhpháirtithe idirnáisiúnta, ar eagraíochtaí agus ar phríomhthionscail an gá atá le cosc a chur ar imchéimniú iarrachtaí arb é is aidhm dóibh laghdú a dhéanamh ar an ioncam atá ar fáil chun leanúint de chogadh foghach na Rúise i gcoinne na hÚcráine;

10.

ag tathant ar gach tír is iarrthóir agus ar gach tír is iarrthóir ionchasach ar aontachas AE ailíniú docht a dhéanamh le smachtbhannaí AE i gcoinne chogadh foghach na Rúise i gcoinne na hÚcráine mar chomhartha ar a n-ullmhacht chun oibleagáidí bhallraíocht AE a ghlacadh;

11.

ag cáineadh iompar na stát, na soláthraithe seirbhísí dlí, na n-eintiteas eile agus na ndaoine aonair a chuidíonn leis an Rúis chun éifeachtaí smachtbhannaí AE a sheachaint; á mheabhrú gurb ionann sárú na smachtbhannaí agus coir ar leibhéal AE é, agus go bhfuil tionchar tromchúiseach aige ar leasanna airgeadais AE; á iarraidh ar na Ballstáit agus ar institiúidí AE, lena n-áirítear Toscaire Smachtbhannaí an Aontais , dlús a chur lena gcuid oibre chun seachaint agus teacht timpeall smachtbhannaí AE ar an Rúis a theorannú, lena mbaintear an bonn go mór ó éifeachtacht smachtbhannaí AE agus lena gcuirtear bac ar iarrachtaí idirnáisiúnta chun deireadh a chur leis an gcogadh; á chur i bhfáth nach mór na sócmhainní a coigistíodh mar thoradh ar shárú ar smachtbhanna a úsáid chun íospartaigh ionsaí na Rúise a chúiteamh, agus chun an bonneagar a atógáil agus a athchóiriú faoi Shaoráid na hÚcráine; á iarraidh ar AE agus ar na Ballstáit athmheasúnú a dhéanamh ar a gcaidreamh le tíortha nach ndéanann iarrachtaí leordhóthanacha chun imghabháil agus imchéimniú smachtbhannaí AE ar an Rúis a theorannú, lena n-áirítear a mhéid a bhaineann le cúnamh airgeadais a thugtar do na tíortha sin agus aon rochtain fhabhrach ar mhargaí AE; á chur in iúl gur cúis bhuartha di na tuairiscí go bhfuil ceilteanas á dhéanamh ag an Asarbaiseáin agus tíortha eile maidir le gás ón Rúis; ag tathant ar AE agus a Bhallstáit úsáid a bhaint as na huirlisí uile atá ar fáil chun a chur ina luí ar rialtas na hAsarbaiseáine scor de bheith i gclaonpháirt le réimeas na Rúise;

12.

á iarraidh ar institiúidí AE agus na Ballstáit uile rannchuidiú go gníomhach le haontacht maidir le smachtbhannaí a choinneáil agus á iarraidh, dá bhrí sin, go ndéanfaí foráil chórasach do thréimhsí athnuachana do gach córas smachtbhannaí a bhaineann le gníomhaíochtaí na Rúise i gcoinne na hÚcráine ar feadh tréimhse nach lú ná dhá mhí dhéag agus tuilleadh pacáistí smachtbhannaí a ghlacadh a mbeidh sé mar aidhm leo teorainn a chur go straitéiseach ar chumas na Rúise a feachtas cogaidh a mhaoiniú; ag tacú leis an Ardionadaí leanúint de bheith ag rannchuidiú le haontacht fhadtéarmach agus le héifeachtacht mhéadaithe trí leas cuí a bhaint as a cheart chun tograí a thíolacadh;

13.

á iarraidh ar an gCoimisiún athbhreithniú a dhéanamh ar a léirmhíniú ar smachtbhannaí as a n-eascraíonn urghabháil agus coigistiú earraí agus feithiclí le haghaidh úsáid phearsanta amháin; á chur i bhfáth go mbaintear an bonn ó sprioc agus ionstraim na smachtbhannaí leis an ró-chomhlíonadh sin;

14.

á iarraidh ar AE agus ar a Bhallstáit comhordú a neartú agus a mhéadú maidir le forfheidhmiú na smachtbhannaí atá ann cheana ar onnmhairí ola na Rúise; á iarraidh ar AE agus ar a Bhallstáit margadh AE do bhreoslaí iontaise de thionscnamh na Rúise a dhúnadh go hiomlán; á iarraidh go ndéanfaí tástáil chomhchuibhithe ar thionscnamh allmhairí breoslaí iontaise, GNL agus breosla iontaise scagtha chun cosc a chur ar athonnmhairiú fhuinneamh na Rúise chuig AE;

15.

á iarraidh ar AE agus ar a Bhallstáit oibriú le G7 chun an chaidhp phraghais ar ola na Rúise agus ar tháirgí peitriliam a ísliú go substaintiúil, toirmeasc iomlán a fhorchur ar allmhairí GNL agus GPL na Rúise isteach san Aontas agus ar allmhairiú breosla agus táirgí peitriliam eile ó thíortha nach bhfuil san Aontas más rud é gur táirgeadh na táirgí sin trí úsáid a bhaint as ola na Rúise agus toirmeasc a chur ar loingsiú onnmhairí ola na Rúise agus GNL trí chríoch AE; á iarraidh ar AE uasteorainneacha praghais agus méide a thabhairt isteach ar allmhairí leasacháin ón Rúis agus ón mBealarúis isteach san Aontas;

16.

á iarraidh ar AE agus ar a Bhallstáit smachtbhannaí a fhorchur ar phríomhchuideachtaí ola uile na Rúise, ar Gazprombank, ar a bhfochuideachtaí agus ar a mboird agus a mbainistíocht; á iarraidh ar AE agus ar a Bhallstáit na smachtbhannaí i gcoinne na Rúise ar allmhairí alúmanaim a leathnú agus smachtbhannaí a thabhairt isteach i gcoinne thionscadal Arctic-2 GNL; á iarraidh ar AE agus ar na Ballstáit srian ar sheirbhísí tancaer agus trádbhac ar dhíol tancaer leis an Rúis a mholadh, chomh maith le srian ar sheirbhísí árachais Eorpacha do thancaeir má úsáidtear iad sin chun ola na Rúise a onnmhairiú; á iarraidh ar thíortha Chomhghuaillíocht na Caidhpe Praghais toirmeasc a chur ar thrasloingsiú ola agus GNL na Rúise trína n-uiscí críochacha agus trína limistéir eacnamaíocha eisiacha; á iarraidh ar AE agus ar na Ballstáit forfheidhmiú na caidhpe praghais ar ola agus comhlíonadh caidhpe praghais a neartú, go háirithe trína cheangal nach féidir fianuithe praghais le haghaidh lastaí ola Rúiseacha a eisiúint ach amháin ag liosta bán de thrádálaithe formheasta agus trína cheangal ar gach tancaer atá ar idirthuras ar uiscí teorann na hEorpa a fhíorú go bhfuil árachas leordhóthanach doirte ola (‘P&I’) acu;

17.

á iarraidh ar an gCoimisiún agus ar na Ballstáit go ndéanfaí na smachtbhannaí a leathnú chun toirmeasc iomlán ar mhargú agus gearradh diamant de thionscnamh na Rúise nó arna n-athonnmhairiú ag an Rúis in AE a áireamh; á iarraidh ar AE agus ar a Bhallstáit smachtbhannaí a fhorchur ar an gcuideachta Alrosa atá faoi úinéireacht stáit agus córais a thabhairt isteach ar an iomlán chun tionscnamh na ndiamant a rianú bunaithe ar theicneolaíochtaí nua;

18.

á iarraidh ar AE agus ar a Bhallstáit deireadh a chur a luaithe is féidir leis an gcomhar le Rosatom, a cheannairí agus a fhochuideachtaí, agus an comhar sin a laghdú go dtí an méid a bhfuil fíorghá leis ar mhaithe le slándáil fuinnimh an Aontais; á iarraidh ar an gCoimisiún Eorpach agus ar Ghníomhaireacht Soláthair Euratom scrúdú a dhéanamh ar an gcomhar reatha le Rosatom agus tacaíocht a chur ar fáil chun roghanna malartacha féideartha a chur in ionad bhreosla, páirteanna spártha agus seirbhísí na Rúise, agus taithí rathúil na hÚcráine á cur san áireamh; á iarraidh ar AE agus ar a Bhallstáit cosc a chur ar shoithí de chuid fhochuideachta Rosatom Atomflot dul isteach i gcalafoirt AE agus an brú idirnáisiúnta a threisiú chun deireadh a chur le forghabháil Ghléasra Cumhachta Núicléiche (NPP) Zaporizhya agus sábháilteacht gléasraí cumhachta núicléiche atá buailte ag coinbhleacht a áirithiú ar bhonn níos leithne; á iarraidh ar AE agus ar a Bhallstáit toirmeasc a chur ar tháirgí núicléacha na Rúise a allmhairiú;

19.

á chur in iúl gur cúis bhuartha di go bhfuil an Rúis in ann líon suntasach de na comhpháirteanna ríomhaireachta is gá a fháil chun diúracáin bhalaistíocha agus chúrsála a tháirgeadh trína clár spáis (Roscosmos) a úsáid mar mhodh chun teicneolaíochtaí a fháil ar teicnolaíochtaí iad a bhfuil feidhmeanna sibhialta agus míleata araon leo; á iarraidh ar AE agus ar a Bhallstáit scor láithreach de na comhpháirteanna sin a sheachadadh chuig an Rúis agus bearta breise a ghlacadh a chuirfeadh isteach tuilleadh ar shlabhra soláthair míleata na Rúise agus a dhíreodh ar ghníomhaithe seachtracha atá ag iarraidh tacú le hiarracht chogaidh na Rúise, lena n-áirítear trí ladrainn agus diúracáin a tháirgeadh;

20.

á iarraidh ar AE agus ar a Bhallstáit bealaí dlíthiúla a aimsiú lena gceadaítear sócmhainní Rúiseacha calctha a choigistiú agus lena n-úsáid maidir le hatógáil na hÚcráine agus cúiteamh d’íospartaigh ionsaí na Rúise; á chur in iúl gur geal léi an fógra ó Rialtas na Beilge maidir le cáin a ghearradh ar na fáltais a fhaightear ó na sócmhainní doghluaiste atá faoi úinéireacht na Rúise atá i seilbh Euroclear;

21.

á iarraidh go ndéanfar na bearta sriantacha i gcoinne na Bealarúise a ailíniú go hiomlán leo siúd atá i bhfeidhm i gcoinne na Rúise faoi láthair toisc go bhfuil réimeas Lukashenka comhpháirteach go mór i gcogadh foghach na Rúise i gcoinne na hÚcráine;

22.

á iarraidh ar SEGS, i gcomhar leis an gCoimisiún, athbhreithniú cuimsitheach a dhéanamh ar smachtbhannaí AE i gcoinne chogadh foghach na Rúise i gcoinne na hÚcráine agus tograí a thíolacadh maidir le conas tuilleadh feabhais a chur ar ullmhú, cothabháil, forfheidhmiú agus cur chun feidhme smachtbhannaí AE, agus ar chomhordú smachtbhannaí AE le comhghuaillithe trasatlantacha, comhpháirtithe G7 agus G20, comhpháirtithe eile atá ar aon intinn leo, agus comhaltaí na Náisiún Aontaithe i gcoitinne; ag athdhearbhú a seasaimh maidir le comhar láidir trasatlantach a chothabháil idir AE agus na Stáit Aontaithe maidir le smachtbhannaí, lena gcuirtear deireadh le haon lúb ar lár a d’fhéadfadh a chur ar chumas na Rúise smachtbhannaí a sheachaint agus rialuithe onnmhairiúcháin a chuíchóiriú;

23.

á iarraidh ar an gComhairle dlús a chur lena cuid oibre chun teacht ar chomhaontú maidir leis an rialachán atá beartaithe maidir le bearta sriantacha i gcoinne gníomhartha tromchúiseacha éillithe a ghlacadh go pras; á iarraidh ar an gComhairle smachtbhannaí a fhorchur go mear faoin gcóras nua sin ar dhaoine nádúrtha agus dlítheanacha atá freagrach as gníomhartha éillithe i gcomhthéacs chogadh foghach na Rúise i gcoinne na hÚcráine agus arb é is aidhm dóibh tacú le réimeas na Rúise;

24.

á iarraidh ar an gComhairle agus ar an gCoimisiún trédhearcacht agus gairmiúlacht a mhéadú maidir leis an mbealach ina ndéantar daoine a shainaithint ar cheart díriú orthu nó iad a scaoileadh ó smachtbhannaí pearsanta; á athdhearbhú go ndéantar dochar leis an modus operandi reatha do chlú an chórais smachtbhannaí atá ann faoi láthair;

25.

á thabhairt chun suntais, leis na teorainneacha ar éifeachtacht na smachtbhannaí, go leagtar béim ar an ngá atá le cur chuige níos cuimsithí i leith na Rúise; á iarraidh, dá bhrí sin, go ndéanfaí smachtbhannaí AE i gcoinne chogadh foghach na Rúise i gcoinne na hÚcráine a leabú i straitéis chuimsitheach pholaitiúil agus taidhleoireachta i leith na Rúise lena n-áirítear freisin tacaíocht d’fhreasúra na Rúise atá ar deoraíocht, don tsochaí shibhialta agus do na meáin neamhspleácha agus d’iriseoirí neamhspleácha atá i gcoinne an chogaidh, do chomhordú le comhpháirtithe idirnáisiúnta maidir le cur isteach na Rúise ar phróisis dhaonlathacha agus ar choinbhleachtaí idirnáisiúnta a chomhrac, agus do chomhar iltaobhach éifeachtach chun bac nó mí-úsáid na Rúise ar institiúidí nó sásraí iltaobhacha a fhritháireamh; á iarraidh ar an gCoimisiún agus ar na Ballstáit maolú a dhéanamh ar na hiarmhairtí diúltacha d’ionadaithe de chuid shochaí shibhialta na Rúise agus na Bealarúise agus d’ionadaithe de lucht freasúra na Rúise agus na Bealarúise atá ar deoraíocht, ós rud é nach rannchuidíonn na hiarmhairtí sin le cuspóir sonraithe na smachtbhannaí a bhaint amach, eadhon teorainn a chur le cumas na Rúise a cogadh foghach a fhearadh ar an Úcráin;

26.

á threorú dá hUachtarán an rún seo a chur ar aghaidh chuig an gComhairle, chuig an gCoimisiún, chuig Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála, chuig an Uachtarán, chuig rialtas agus Verkhovna Rada na hÚcráine, chuig Comhairle na hEorpa, chuig an Eagraíocht um Shlándáil agus Comhar san Eoraip agus chuig údaráis na Rúise agus na Bealarúise.