—

ag féachaint d’Airteagal 218 den Chonradh ar Fheidhmiú an Aontais Eorpaigh (CFAE),

—

ag féachaint d’Airteagail 24 agus 29 den Choinbhinsiún an 2 Iúil 2019 maidir le hAithint agus Forfheidhmiú Breithiúnas Coigríche in Ábhair Shibhialta agus Thráchtála (‘an Coinbhinsiún maidir le Breithiúnais’),

—

ag féachaint don cheist ar an gCoimisiún agus ar an gComhairle maidir le haontachas na hÚcráine le Coinbhinsiún an 2 Iúil 2019 maidir le hAithint agus Forfheidhmiú Breithiúnas Coigríche in Ábhair Shibhialta agus Thráchtála,

—

ag féachaint do rún uaithi an 16 Feabhra 2023 maidir le bliain amháin a bheith caite ó chuir an Rúis tús lena hionradh agus cogadh foghach i gcoinne na hÚcráine (1) agus do rún uaithi an 1 Márta 2022 maidir le fogha na Rúise faoin Úcráin (2),

—

ag féachaint don cheist ar an gCoimisiún maidir le tacaíocht a thabhairt d’aontachas na hÚcráine le Coinbhinsiún an 2 Iúil 2019 maidir le hAithint agus Forfheidhmiú Breithiúnas Coigríche in Ábhair Shibhialta agus Thráchtála (O-00000024/2023 – B9-0025/2023),

—

ag féachaint do Rialacha 136(5) agus 132(2) dá Rialacha Nós Imeachta,

—

ag féachaint don tairiscint i gcomhair rún ón gCoiste um Ghnóthaí Dlíthiúla,

A.

de bhrí gurb é cuspóir reachtúil Chomhdháil na Háige um an Dlí Idirnáisiúnta Príobháideach (‘Comhdháil na Háige’) oibriú i dtreo rialacha an dlí idirnáisiúnta phríobháidigh a aontú de réir a chéile;

B.

de bhrí go bhfuil an tAontas Eorpach ina pháirtí i gComhdháil na Háige ón 3 Aibreán 2007 i leith;

C.

de bhrí go n-éascaítear leis an gCoinbhinsiún maidir le Breithiúnais cúrsaíocht idirnáisiúnta éifeachtach breithiúnas in ábhair shibhialta nó thráchtála trí dheimhneacht dhlíthiúil agus intuarthacht a sholáthar do pháirtithe a bhfuil baint acu le hidirbhearta trasteorann agus soiléireacht i dtaobh an ndéanfar breithiúnas a aithint agus a fhorfheidhmiú i ndlínse eile agus a mhéid a dhéanfar é a aithint agus a fhorfheidhmiú; de bhrí, trí aithint agus forfheidhmiú breithiúnas coigríche a áirithiú, gur cheart go bhfeabhsófaí leis an gCoinbhinsiún maidir le Breithiúnais rochtain ar cheartas trí thréimhsí ama, costais agus rioscaí dlíthiúla in imthosca trasteorann a laghdú;

D.

de bhrí, de bhun Airteagal 24 den Choinbhinsiún maidir le Breithiúnais, go bhféadfaidh aon tríú stát aontú don Choinbhinsiún; de bhrí nach gcruthóidh an t-aontachas sin caidreamh conarthach idir dhá pháirtí chonarthacha ach amháin i gcás nach mbeidh fógra tugtha ag ceachtar acu don taiscí nár cheart go mbeadh sé d’éifeacht ag an aontachas caidreamh conarthach a bhunú leis an bpáirtí eile; de bhrí go gcaithfear an fógra sin a thíolacadh laistigh de thréimhse 12 mhí tar éis an dáta ar tugadh fógra faoin aontachas;

E.

de bhrí, faoin gcleachtas atá ann faoi láthair, nach ndéanann an Coimisiún nós imeachta foirmiúil a thionscnamh i gcomhréir le hAirteagal 218(6) CFAE le haghaidh na gcoinbhinsiún ina bhfuil sásra neamhagóide, ach nach gcuireann sé ach an Chomhairle agus an Pharlaimint ar an eolas faoi aon iarraidh ó thríú tír aontú d’ionstraim áirithe de chuid na Háige;

F.

de bhrí, de réir cásdlí seanbhunaithe, nach féidir le comhaontú idirnáisiúnta difear a dhéanamh do leithdháileadh na gcumhachtaí a shocraítear leis na Conarthaí, agus, dá bhrí sin, nuair a ghlactar nós imeachta an tosta ar an leibhéal idirnáisiúnta chun aontachas tríú stáit a éascú, nár cheart go mbeadh aon iarmhairt aige ar phróiseas cinnteoireachta inmheánach AE;

G.

de bhrí gur aontaigh an tAontas Eorpach don Choinbhinsiún maidir le Breithiúnais an 29 Lúnasa 2022;

H.

de bhrí go bhfuil an Coinbhinsiún maidir le Breithiúnais sínithe agus daingnithe ag an Úcráin;

I.

de bhrí gur chomhaontaigh an Chomhairle, an 24 Aibreán 2023, caidreamh conarthach a bhunú leis an Úcráin faoi chuimsiú an Choinbhinsiúin maidir le Breithiúnais;

J.

de bhrí, má ghlacann an tAontas le haontachas na hÚcráine leis an gCoinbhinsiún maidir le Breithiúnais, go dtiocfaidh sé i bhfeidhm an 1 Meán Fómhair 2023 agus go mbeidh sé infheidhme idir an dá pháirtí;