—

ag féachaint do chinneadh uaithi an 10 Márta 2022 maidir le coiste speisialta a chur ar bun maidir le cur isteach eachtrach ar gach próiseas daonlathach san Aontas Eorpach, lena n-áirítear bréagaisnéis (INGE 2), agus lena sainítear a fhreagrachtaí, a neart uimhriúil agus a théarma oifige (1), agus a cinBYneadh an 14 Feabhra 2023 lena leasaítear cinneadh an 10 Márta thuasluaite agus a theideal agus a fhreagrachtaí a choigeartú (2),

—

ag féachaint do rún uaithi an 9 Márta 2022 maidir le trasnaíocht eachtrach ar na próisis dhaonlathacha uile san Aontas Eorpach, lena n-áirítear bréagaisnéis (3) (dá ngairtear ‘tuarascáil INGE 1’ anseo feasta),

—

ag féachaint d’obair leantach an Choimisiúin ar mholtaí na Parlaiminte ina rún an 9 Márta 2022,

—

ag féachaint don ‘Strategic Compass for Security and Defence – For a European Union that protects its citizens, values and interests and contributes to international peace and security’ [Compás Straitéiseach um Shlándáil agus Cosaint – I gcás Aontas Eorpach a chosnaíonn a shaoránaigh, a luachanna agus a leasanna agus a rannchuidíonn leis an tsíocháin agus leis an tslándáil idirnáisiúnta] a d’fhormheas an Chomhairle an 21 Márta 2022 agus a d’fhormhuinigh an Chomhairle Eorpach an 24 Márta 2022,

—

ag féachaint do mholadh uaithi an 23 Samhain 2022 chuig an gComhairle, chuig an gCoimisiún agus chuig Leas-Uachtarán an Choimisiúin/Ardionadaí an Aontais do Ghnóthaí Eachtracha agus don Bheartas Slándála maidir le straitéis nua AE don mhéadú (4),

—

ag féachaint do theachtaireacht ón gCoimisiún an 13 Iúil 2022 dar teideal ‘2022 Rule of Law Report – The rule of law situation in the European Union’ [Tuarascáil 2022 maidir leis an Smacht Reachta – Staid an smachta reachta san Aontas Eorpach] (COM(2022)0500),

—

ag féachaint do rún uaithi an 8 Márta 2022 maidir leis an laghdú atá ag teacht ar an spás don tsochaí shibhialta san Eoraip (5),

—

ag féachaint do rún uaithi an 15 Nollaig 2022 maidir le hamhras faoi éilliú ó Chatar agus an gá níos leithne atá le trédhearcacht agus cuntasacht sna hinstitiúidí Eorpacha (6),

—

ag féachaint do rún uaithi an 23 Samhain 2016 maidir le cumarsáid straitéiseach AE chun gníomhú in aghaidh bolscaireacht a dhéanann tríú tíortha ina choinne (7),

—

ag féachaint do mholadh uaithi an 13 Márta 2019 chuig an gComhairle agus chuig Leas-Uachtarán an Choimisiúin/Ardionadaí an Aontais do Ghnóthaí Eachtracha agus don Bheartas Slándála maidir le breithniú a dhéanamh ar an obair leantach a rinne SEGS dhá bhliain tar éis thuarascáil PE maidir le cumarsáid straitéiseach AE chun gníomhú in aghaidh bolscaireacht tríú tíortha ina coinne (8),

—

ag féachaint do rún uaithi an 20 Deireadh Fómhair 2021 dar teideal ‘Meáin na hEorpa sa Deacáid Dhigiteach: Plean Gníomhaíochta chun Tacú leis an Téarnamh agus leis an gClaochlú’  (9),

—

ag féachaint do na hAirteagail ar Fhreagracht Stáit do ghníomhartha atá Mícheart go hIdirnáisiúnta,

—

ag féachaint do Chairt um Chearta Bunúsacha an Aontais Eorpaigh,

—

ag féachaint don Chúnant Idirnáisiúnta ar Chearta Sibhialta agus Polaitiúla, agus go háirithe Airteagal 20 de,

—

ag féachaint do Rialachán (AE) 2021/692 ó Pharlaimint na hEorpa agus ón gComhairle an 28 Aibreán 2021 lena mbunaítear an Clár um Shaoránaigh, Comhionannas, Cearta agus Luachanna agus lena n-aisghairtear Rialachán (AE) Uimh. 1381/2013 ó Pharlaimint na hEorpa agus ón gComhairle agus Rialachán (AE) Uimh. 390/2014 (10),

—

ag féachaint do thogra ón gCoimisiún an 27 Aibreán 2022 le haghaidh treoir ó Pharlaimint na hEorpa agus ón gComhairle maidir le daoine a bhíonn ag gabháil don rannpháirtíocht phoiblí a chosaint ar imeachtaí cúirte atá go follasach gan bhunús nó mí-úsáideach (‘Imeachtaí sibhialta straitéiseacha in aghaidh rannpháirtíocht an phobail’) (COM(2022)0177),

—

ag féachaint do theachtaireacht ón gCoimisiúin an 3 Nollaig 2020 maidir leis an bplean gníomhaíochta um an daonlathas Eorpach (COM(2020)0790),

—

ag féachaint do thogra le haghaidh rialachán ó Pharlaimint na hEorpa agus ón gComhairle an 16 Meán Fómhair 2022 lena mbunaítear creat comhchoiteann le haghaidh seirbhísí meán sa mhargadh inmheánach (An Gníomh Eorpach um Shaoirse na Meán) agus lena leasaítear Treoir 2010/13/AE (COM(2022)0457),

—

ag féachaint do thuarascáil chríochnaitheach na Comhdhála ar Thodhchaí na hEorpa, go háirithe, tograí 27 agus 37 de,

—

ag féachaint do Chód Iompair neartaithe i gcoinne na Bréagaisnéise 2022,

—

ag féachaint do Rialachán (AE) 2022/2065 ó Pharlaimint na hEorpa agus ón gComhairle an 19 Deireadh Fómhair 2022 maidir le Margadh Aonair do Sheirbhísí Digiteacha agus lena leasaítear Treoir 2000/31/CE (an Gníomh um Sheirbhísí Digiteacha) (11),

—

ag féachaint do Threoir (AE) 2022/2557 ó Pharlaimint na hEorpa agus ón gComhairle an 14 Nollaig 2022 maidir le hathléimneacht eintiteas criticiúil agus lena n-aisghairtear Treoir 2008/114/CE ón gComhairle (12) (Treoir CER);

—

ag féachaint don togra ón gCoimisiún an 18 Deireadh Fómhair 2022 le haghaidh moladh ón gComhairle maidir le cur chuige comhordaithe ón Aontas chun athléimneacht an bhonneagair chriticiúil a neartú (COM(2022)0551),

—

ag féachaint don togra ón gCoimisiún an 25 Samhain 2021 le haghaidh rialachán ó Pharlaimint na hEorpa agus ón gComhairle maidir le trédhearcacht agus spriocdhíriú na fógraíochta polaitiúla (COM(2021)0731) agus do na leasuithe a rinneadh air, a ghlac an Pharlaimint an 2 Feabhra 2023  (13),

—

ag féachaint do thogra ón gCoimisiún an 25 Samhain 2021 le haghaidh Rialachán ó Pharlaimint na hEorpa agus ón gComhairle maidir le reacht agus cistiú páirtithe polaitiúla Eorpacha agus fondúireachtaí polaitiúla Eorpacha (COM(2021)0734),

—

ag féachaint do thogra ón gCoimisiún an 16 Nollaig 2020 le haghaidh treoir ó Pharlaimint na hEorpa agus ón gComhairle maidir le bearta le haghaidh ardleibhéal cibearshlándála coiteann ar fud an Aontais, lena n-aisghairtear Treoir (AE) 2016/1148 (COM(2020)0823), (Treoir NIS2),

—

ag féachaint do thuarascáil speisialta 05/2022 an 29 Márta 2022 ó Chúirt Iniúchóirí na hEorpa (CIE) dar teideal Cibearshlándáil institiúidí, chomhlachtaí agus ghníomhaireachtaí an Aontais Eorpaigh – Níl an leibhéal ullmhachta go ginearálta i gcomhréir leis na bagairtí,

—

ag féachaint do thogra ón gCoimisiún an 22 Márta 2022 le haghaidh Rialachán ó Pharlaimint na hEorpa agus ón gComhairle lena leagtar síos bearta le haghaidh ardleibhéal cibearshlándála coiteann in institiúidí, comhlachtaí, oifigí agus gníomhaireachtaí an Aontais (COM(2022)0122),

—

ag féachaint do chomhaontú idirinstitiúideach an 20 Bealtaine 2021 idir Parlaimint na hEorpa, an Chomhairle agus an Coimisiún maidir le clár trédhearcachta sainordaitheach (14),

—

ag féachaint do ráiteas comhpháirteach SAM-AE ón gComhairle Trádála agus Teicneolaíochta an 5 Nollaig 2022,

—

ag féachaint do Thuarascáil Bhliantúil CIE maidir le gníomhaireachtaí AE don bhliain airgeadais 2021,

—

ag féachaint don Chód Caighdeán Eorpach d’Eagraíochtaí Neamhspleácha um Sheiceáil Fíricí, arna fhoilsiú ag an Líonra Eorpach um Chaighdeáin um Sheiceáil Fíricí i mí Lúnasa 2022,

—

ag féachaint do Rialacha 54 agus 207 dá Rialacha Nós Imeachta,

—

ag féachaint don tuarascáil (meántéarma) ón gCoiste Speisialta um an trasnaíocht eachtrach ar na próisis dhaonlathacha uile san Aontas Eorpach, lena n-áirítear an bhréagaisnéis, agus um neartú an ionracais, na trédhearcachta agus na cuntasachta i bParlaimint na hEorpa (ING2) (A9-0187/2023),

A.

de bhrí gur ghlac Parlaimint na hEorpa rún an 9 Márta 2022 lena leagtar síos a moltaí bunaithe ar an tuarascáil ón gcéad choiste speisialta um an trasnaíocht eachtrach ar gach próiseas daonlathach san Aontas Eorpach, lena n-áirítear bréagaisnéis; de bhrí, i measc a moltaí, gur iarradh sa tuarascáil sin go nglacfaí straitéis chomhordaithe i gcoinne trasnaíocht eachtrach; de bhrí go ndearna an Coimisiún doiciméad ina ndearnadh obair leantach ar na moltaí sin, ina moltar, i measc nithe eile, go bhfuil straitéis den sórt sin de facto ann cheana i bhfoirm cineálacha éagsúla comhordaithe idirinstitiúidigh;

B.

de bhrí gurb í Parlaimint na hEorpa an t-aon chomhlacht a thoghtar go díreach i measc institiúidí AE agus go bhfuil sí ar thús cadhnaíochta i bpléití polaitiúla AE maidir le trasnaíocht eachtrach, cúbláil faisnéise agus bagairtí hibrideacha inár ndaonlathais a chomhrac, lena n-áirítear in institiúidí AE; de bhrí gur léirigh imeachtaí le déanaí go bhfuil an Pharlaimint á ionsaí ag feachtais trasnaíochta eachtracha éagsúla agus ionsaitheacha;

C.

de bhrí gur fhógair Uachtarán an Choimisiúin ina haitheasc ar Staid an Aontais i mí Mheán Fómhair 2022 go gcuirfeadh an Coimisiún pacáiste um Chosaint an Daonlathais i láthair, atá sceidealaithe lena ghlacadh sa dara ráithe de 2023; de bhrí go n-áireofaí sa phacáiste sin togra reachtach chun daonlathais a chosaint ó eintitis tríú tír a fheidhmíonn gníomhaíochtaí in AE a d’fhéadfadh difear a dhéanamh don tuairim phoiblí agus don réimse daonlathach, athbhreithniú ar ghníomhaíochtaí faoin bplean gníomhaíochta um an daonlathas Eorpach (EDAP) agus bearta chun toghcháin shlána athléimneacha a áirithiú, lena n-áirítear, i measc nithe eile, bearta cibearshlándála i bpróisis toghcháin;

D.

de bhrí gur stiúir Comhairle an Aontais Eorpaigh, an Coimisiún agus an tSeirbhís Eorpach Gníomhaíochta Seachtraí freachnamh comhpháirteach ar a dtugtar ‘Rúndaingne Comhtháite an Aontais, 2022,’ arb é is aidhm dó tástáil a dhéanamh ar fhreagairt an Aontais ar fheachtais hibrideacha;

E.

de bhrí gur cuireadh tús le cogadh foghach na Rúise i gcoinne na hÚcráine mar chogadh faisnéise a bhí pleanáilte go cúramach agus a ndearnadh ionradh míleata iomlán ina dhiaidh sin an 24 Feabhra 2022; de bhrí go n-úsáideann an Rúis raon modhanna éagsúla trasnaíochta, atá leabaithe i straitéis níos mó chun dochar, mearbhall, eagla, lagú agus deighilt a dhéanamh ar Bhallstáit AE agus ar a chomharsanacht; de bhrí go raibh na Stáit Aontaithe agus an Ríocht Aontaithe i gceannas ar fheachtais chumarsáide éifeachtacha ‘réamhbhréagnaithe’ roimh ionradh iomlán na Rúise ar an Úcráin, lena n-áirítear úsáid phoiblí gan fasach a bhaint as faisnéis iontaofa a bhí ar fáil chun cur i gcoinne insint na Creimile, agus léargas a thabhairt ar bhréaga Rialtas na Rúise agus na ngníomhaithe gaolmhara; de bhrí go raibh feachtais bhréagaisnéise, cibirionsaithe, gabháil scothaicme agus ionsaithe a bhí dírithe ar an stair a athscríobh á dhéanamh ag an Rúis le blianta fada anuas agus í ag iarraidh an bhunobair a ullmhú dá hionradh ar an Úcráin chun tacú léi;

F.

de bhrí go meastar go ndéanfaidh seirbhísí na Parlaiminte iarrachtaí suntasacha chun obair leantach a dhéanamh ar na moltaí a glacadh an 9 Márta 2022, go háirithe agus toghcháin Eorpacha 2024 á n-ullmhú; de bhrí gur cuireadh de chúram ar thascfhórsa na Parlaiminte maidir leis an mbréagaisnéis obair Ard-Stiúrthóireachtaí éagsúla Pharlaimint na hEorpa a chomhordú agus comhoibriú le hinstitiúidí eile AE maidir le roinnt gníomhaíochtaí a rinneadh go háirithe sna réimsí seo a leanas: feasacht staide, forbairt athléimneachta, réamhbhréagnú agus rannchuidiú le spás faisnéise sláintiúil, agus maolú;

G.

de bhrí go bhfuil an Pharlaimint ag tacú go réamhghníomhach leis an daonlathas parlaiminteach i roinnt tíortha nach bhfuil san Aontas Eorpach, lena n-áirítear trí ghníomhaíochtaí an Ghrúpa Tacaíochta um Dhaonlathas agus Toghcháin (DEG); de bhrí go bhfuil garchomharsanacht AE thar a bheith tábhachtach i ndáil leis sin;

H.

de bhrí go bhfuil dúshláin ann do thíortha aontachais AE, ar dúshláin iad a eascraíonn as trasnaíocht eachtrach mailíseach agus as feachtais bhréagaisnéise; de bhrí gur léirigh forbairtí san am atá thart go bhfuil costas straitéiseach tromchúiseach ag baint le neamh-mhéadú; de bhrí gur limistéar d’iomaíocht straitéiseach agus gheopholaitiúil iad na Balcáin Thiar agus go bhfuil baol ann go ndíchobhsófar cuid dá dtíortha, rud a chuireann slándáil agus cobhsaíocht ár mór-roinne i mbaol; de bhrí go bhfuil tríú tíortha ag saothrú na leochaileachtaí sin, lena n-áirítear trí infheistíochtaí straitéiseacha agus feachtais bhréagaisnéise; de bhrí go bhfuil dlúthbhaint idir cobhsaíocht, slándáil agus athléimneacht dhaonlathach na dtíortha aontachais agus slándáil, cobhsaíocht agus athléimneacht dhaonlathach an Aontais féin;

I.

de bhrí gurb é is aidhm do na feachtais trasnaíochta sin sna Balcáin Thiar tionchar diúltach a imirt ar threoshuíomh agus cobhsaíocht mhéadaitheach Eora-Atlantach na dtíortha aonair, agus ar an gcaoi sin treoshuíomh an réigiúin ina iomláine a athrú; de bhrí go bhfuil an Rúis ag baint úsáid as a tionchar sa tSeirbia chun iarracht a dhéanamh na stáit cheannasacha chomharsanachta a dhíchobhsú agus cur isteach orthu: sa Bhoisnia tríd an Republika Srpska; i Montainéagró trí mheonta na tíre ar son na Seirbí agus trí Eaglais Cheartchreidmheach na Seirbia; agus sa Chosaiv trí dhíospóidí atá ann cheana i dTuaisceart na Cosaive a shaothrú agus a ghríosú; de bhrí, dá bhrí sin, go bhfuil tionchar suntasach fós ag an Rúis sna Balcáin Thiar, agus an chumhacht aici cur isteach ar iarrachtaí réigiúnacha ar athmhuintearas, ar lánpháirtiú agus ar athchóiriú i dtreo an daonlathaithe;

J.

de bhrí go bhfuil sé mar aidhm le tionscnaimh amhail tionscadal RADAR arna chistiú ag an Aontas, ón gCumann Tras-Eorpach do Staidéar Beartais (TEPSA, cuibhreannas uile-Eorpach d’institiúidí taighde agus ollscoileanna ceannródaíocha), feasacht na saoránach ar an mbréagaisnéis a ardú agus ardán poiblí le haghaidh díospóireachta a chur ar fáil, agus go bhfuil béim ar leith ag an tionscadal ar an óige chun a nguthanna a chumhachtú, a rannpháirtíocht sa tsochaí shibhialta a neartú agus a n-oideachas maidir le smaointeoireacht chriticiúil agus litearthacht sna meáin a fheabhsú;

K.

de bhrí go bhfuil gá le cur chuige iomlánaíoch, lena gcuimsítear ár sochaithe ina n-iomláine, nuair a bhíonn oideachas agus oiliúint á cur ar shaoránaigh Eorpacha de gach aois, lena n-áirítear oiliúint shonrach do dhaoine atá in aois oibre agus i scoileanna chun oibríochtaí féideartha bréagaisnéise agus ionramháil faisnéise a bhrath agus a bheith athléimneach ina gcoinne; de bhrí gur cheart straitéis a bhunú chun físeáin agus inneachar d’úsáideoirí idirlín a thaispeáint roimh ré maidir leis na teaicticí atá taobh thiar den bhréagaisnéis, lena bhféadfaí iad a dhéanamh níos feasaí agus níos athléimní i gcoinne mífhaisnéise agus bréagaisnéise agus athléimneacht grúpaí leochaileacha daonra a mhéadú; de bhrí go bhfuil feasacht an phobail agus idirphlé leanúnach leis na meáin ríthábhachtach i ndáil leis sin; de bhrí go bhfuil muinín sna hinstitiúidí cumarsáide mar ghné lárnach de rath na cumarsáide i gcoinne na bréagaisnéise;

L.

de bhrí gur iomaí cineál frithsheimíteachais chomhaimseartha atá ann, lena n-áirítear fuathchaint ar líne agus teoiricí comhcheilge nua ag teacht chun cinn an athuair, agus de bhrí gur bhunaigh AE, faoi chuimsiú straitéis AE maidir leis an bhfrithsheimíteachas a chomhrac agus saol na nGiúdach a chothú (2021-2030), a thiomantas do thodhchaí saor ón bhfrithsheimíteachas in AE agus níos faide i gcéin;

M.

de bhrí go bhfuil ról bunriachtanach ag eagraíochtaí na sochaí sibhialta (ESSanna) mar fhorais faire, go bhfuil siad ríthábhachtach chun athléimneacht dhaonlathach a fhorbairt ón taobh istigh agus chun an daonlathas a chosaint, agus tacú leis an gcomhrac i gcoinne sáruithe ar an smacht reachta agus rannchuidiú go gníomhach leis an smacht reachta, an daonlathas agus cearta bunúsacha a chothú ar an láthair ag an am céanna; de bhrí, go háirithe, go bhfuil ról tábhachtach ag ESSanna maidir le trasnaíocht eachtrach ar phróisis dhaonlathacha a bhrath agus a chomhrac; de bhrí go bhfuil ról ríthábhachtach ag ESSanna maidir le féinrialáil a fhorbairt, lena gcumasaítear caighdeáin tionscail a chruthú chun bréagaisnéis a chomhrac, go háirithe i réimsí ina bhféadfadh aon ghníomhaíocht stáit mímhuinín a chruthú; de bhrí, nuair a dhéantar rannpháirtíocht na saoránach agus na sochaí sibhialta i bpróisis dhaonlathacha a neartú tuilleadh, go bhfuil an daonlathas ina iomláine níos daingne i gcoinne riosca na trasnaíochta eachtraí;

N.

de bhrí nach bhfuil ESSanna, meithleacha machnaimh, gníomhaireachtaí comhairliúcháin, fondúireachtaí agus cuideachtaí iad féin slán ó chur isteach den sórt sin a fhulaingt agus, i gcásanna áirithe, go bhféadfadh siad a bheith mar fheithicil, mar uirlis nó mar veicteoir tionchair ó ghníomhaithe mailíseacha, lena n-áirítear gníomhaithe tríú tír, a dhéanann urraíocht dhíreach ar chur isteach eachtrach nó a spreagann é agus a imríonn tionchar ar lucht déanta beartas; de bhrí go bhfuil trédhearcacht ríthábhachtach chun a áirithiú nach dtiocfaidh na gníomhaithe sin chun bheith, agus nach n-úsáidfear iad, mar shoithí le haghaidh trasnaíocht eachtrach, agus dá bhrí sin nach mór breathnú ar rialacha soiléire maidir lena dtionchar agus grinnscrúdú a dhéanamh orthu; de bhrí go bhfuil iarracht déanta ag roinnt Ballstát de chuid AE sásraí a chur chun feidhme chun scagadh a dhéanamh ar chistiú rialtais eachtraigh do ESSanna, go háirithe ón Rúis agus ón tSín;

O.

de bhrí gur chuir tacaíocht AE do ESSanna tríd an gClár um Shaoránaigh, Comhionannas, Cearta agus Luachanna (CERV) dlús leis na hiarrachtaí chun tacú le heagraíochtaí na sochaí sibhialta, go háirithe na heagraíochtaí beaga áitiúla a bhfuil srianta ar leith ag bagairt orthu; de bhrí go bhfuil cistiú curtha ar fáil ag Ballstáit áirithe, trí na cláir náisiúnta téarnaimh agus athléimneachta, d’fhothú acmhainneachta chun fíricí a sheiceáil agus chun dul i ngleic leis an mbréagaisnéis;

P.

de bhrí, in ainneoin acmhainní airgeadais áirithe atá ar fáil, lena n-áirítear tionscadail rathúla ó chistí agus ó chláir AE, ar an iomlán, go bhfuil cistiú ESSanna agus na meán ilroinnte, bunaithe ar thionscadail agus gur minic a thagann siad ó thíortha nach bhfuil in AE; de bhrí gur cheart go mbeadh nósanna imeachta iarratais le haghaidh maoiniú trédhearcach agus inrochtana; de bhrí gur tháinig an Chúirt Iniúchóirí ar an gconclúid go ndéanann an easpa straitéise comhleanúnaí de chuid AE maidir le litearthacht sna meáin, lena n-áirítear dul i ngleic leis an mbréagaisnéis agus ilroinnt ghníomhaíochtaí AE, tionchar na dtionscadal litearthachta sna meáin a chaolú, agus nár léirigh go leor tionscadal den sórt sin scála agus raon leordhóthanach;

Q.

de bhrí go bhfuil ról lárnach ag an iriseoireacht fhíricí i sochaí dhaonlathach, ag seasamh le prionsabail na fírinne, an chruinnis, na neamhchlaontachta, na macántachta agus an neamhspleáchais; de bhrí gur cearta bunúsacha iad an tsaoirse chun tuairimí a nochtadh agus faisnéis a fháil a ráthaítear leis an gCoinbhinsiún Eorpach um Chearta an Duine agus a aithnítear i gCairt um Chearta Bunúsacha AE, chomh maith leis an gCúnant Idirnáisiúnta ar Chearta Sibhialta agus Polaitiúla; de bhrí go bhfuil éifeacht dhochrach ag táblóidiú (tabloidisation) na meán ar iontaofacht na faisnéise atá inrochtana don phobal agus ar thírdhreach na meán;

R.

de bhrí go bhfuil méadú ag teacht ar imeaglú, faireachas ionsáite agus haiceáil, ciapadh agus bagairtí, lena n-áirítear bagairtí dlíthiúla agus dlíthíocht mhí-úsáideach, ar sceithirí, iriseoirí, ESSanna, gníomhaithe agus cosantóirí chearta an duine; de bhrí gur cheart do AE agus dá institiúidí tacú leo; de bhrí gur bagairt thromchúiseach ar an daonlathas agus ar chearta bunúsacha iad cásanna dlí straitéiseacha i gcoinne rannpháirtíocht phoiblí (SLAPPanna), lena n-áirítear iad siúd arna dtionscnamh ag údaráis tríú tíortha i gcoinne náisiúnaigh AE nó eintitis atá bunaithe in AE, amhail an tsaoirse chun tuairimí a nochtadh agus faisnéis a fháil, ós rud é gur bealach iad chun iriseoirí agus gníomhaithe chomh maith le gníomhaithe na sochaí sibhialta i gcoitinne a chosc ó labhairt amach ar shaincheisteanna a bhaineann le leas an phobail agus chun pionós a ghearradh orthu as déanamh amhlaidh, agus ar an gcaoi sin go bhfuil tionchar tromchúiseach acu ar gach guth criticiúil iarbhír nó féideartha;

S.

de bhrí, in AE, go bhfuil ann d’iriseoirí a bhfuil a mbeatha agus a saol faoi bhagairt mar thoradh ar a dtaighde ar ábhair a bhaineann le leas an phobail; de bhrí go bhfuil amhras ann go bhfuil cumhachtaí eachtracha ag cur isteach ar an Aontas, agus gur leathnaigh siad bearta diansmachta chuig críocha laistigh den Aontas chun iriseoirí ar mian leo gníomhartha coiriúla a thuairisciú agus a shéanadh a chur ina dtost; de bhrí gur sampla de sin straitéis an chiaptha bhreithiúnaigh atá á feidhmiú ag Ríocht Mharacó i gcoinne an iriseora Spáinnigh Ignacio Cembrero; de bhrí gur sampla de sin straitéis an chiaptha bhreithiúnaigh atá á feidhmiú ag Ríocht Mharacó i gcoinne an iriseora Spáinnigh Ignacio Cembrero; de bhrí go bhfuil roinnt iriseoirí agus cosantóirí chearta an duine ar deonaíodh tearmann dóibh in AE fós á n-ionsaí ag géarleanúint, ciapadh, foréigean agus iarrachtaí feallmharaithe; de bhrí gur cheart do na Ballstáit a slándáil a áirithiú agus go bhfuil siad in ann leanúint dá gcuid oibre;

T.

de bhrí gur chun leas an phobail é éifeachtacht cúblála faisnéise mailíseacha a laghdú, agus go háirithe a héifeachtaí ar fheidhmiú na bpróiseas daonlathach; de bhrí go laghdaíonn bréagaisnéis cumas na saoránach cinntí eolasacha a dhéanamh agus páirt a ghlacadh gan bhac i bpróisis dhaonlathacha; de bhrí go dtreisítear an staid sin mar gheall ar fhorbairt tapa cineálacha nua meán; de bhrí, de réir an Mhonatóir ar Iolrachas na Meán 2022, nach bhfuil riosca íseal ag aon tír maidir leis an táscaire ‘inmharthanacht na meán’, lena léirítear na bagairtí eacnamaíocha atá ann cheana ar iolrachas na meán; de bhrí go bhfuil dúshláin bhreise os comhair na meán nuachta atá ag feidhmiú i margaí beaga, lena n-áirítear meáin áitiúla, réigiúnacha agus nideoige, toisc go bhfuil ioncam teoranta acu, agus nach bhfuil siad chomh inmharthana céanna agus samhlacha gnó tráchtála reatha á n-úsáid acu agus nach féidir leo glacadh le cinn nua ar an gcaoi chéanna is féidir leis na meáin atá ag feidhmiú i margaí móra; de bhrí, ina theannta sin, go bhfuil roinnt Ballstát, a mheasann an Rúis mar réimse tionchair aici, níos neamhchosanta ar rioscaí geopholaitiúla a eascraíonn as cur isteach ón gCreimil ina spás faisnéise;

U.

de bhrí go bhfuil cur chun cinn neamhspleáchas agus iolrachas na meán agus litearthacht sna meáin chun dul i ngleic leis an mbréagaisnéis ar cheann de na tograí ó na saoránaigh atá sa tuarascáil deiridh ón gComhdháil ar Thodhchaí na hEorpa, a foilsíodh an 9 Bealtaine 2022, inar iarr saoránaigh go sonrach ar AE aghaidh a thabhairt ar bhagairtí ar neamhspleáchas na meán trí íoschaighdeáin uile-Aontais a bhunú chomh maith le meáin shaora, iolraíocha agus neamhspleácha a chosaint agus tacú leo, dlús a chur leis an gcomhrac i gcoinne na bréagaisnéise agus cur isteach eachtrach, agus cosaint iriseoirí a áirithiú; de bhrí go n-iarrtar freisin sa tuarascáil chríochnaitheach ó Chomhdháil Thodhchaí na hEorpa go mbunófaí comhlacht de chuid an Aontais a bheidh i gceannas ar aghaidh a thabhairt ar bhréagaisnéis agus ar chur isteach spriocdhírithe agus dul i ngleic leo, agus feabhas a chur ar chomhar na n-údarás náisiúnta cibearshlándála agus ar reachtaíocht agus treoirlínte d’ardáin ar líne agus do chuideachtaí meán sóisialta chun aghaidh a thabhairt ar leochaileachtaí bréagaisnéise;

V.

de bhrí go bhféadfaí sláine an mhargaidh inmheánaigh do sheirbhísí meán a chur i mbaol, agus deighilt na sochaí á ghríosú ag soláthraithe meán a bhíonn rannpháirteach go córasach i mbréagaisnéis, lena n-áirítear cúbláil faisnéise agus cur isteach ar sholáthraithe seirbhíse meán atá faoi rialú an stáit, arna maoiniú ag tíortha áirithe nach bhfuil san Aontas, amhail an tSín, an Rúis agus an Tuirc; de bhrí gur féidir le timpeallacht meán atá thar a bheith comhchruinnithe agus faoi rialú an rialtais a bheith ina cúis le huathlathas faisnéise, inar féidir leis an stát nó le gníomhaithe eachtracha mailíseacha tionchar a imirt go héasca trí ionramháil faisnéise;

W.

de bhrí go bhfuil beagnach EUR 3 bhilliún infheistithe ag an tSín i ngnólachtaí meán Eorpacha le 10 mbliana anuas, gan freagra leormhaith ón AE agus a Bhallstáit; de bhrí go bhféadfadh stáit eile a bhfuil idé-eolaíochtaí polaitiúla forlámhacha comhchosúla acu sampla na Síne a leanúint, lena mbaineann rioscaí suntasacha do shláine daonlathais Eorpacha agus cur isteach ó thíortha eile ar ghnóthaí intíre AE; de bhrí go bhfuil roinnt Institiúidí Confucius de chuid na Síne atá á reáchtáil ag an Stát, a scaipeann bolscaireacht agus a chuireann isteach ar institiúidí acadúla, fós ag feidhmiú in AE; de bhrí go ndéanann meáin chraolta na Síne ionadaíocht ar idé-eolaíocht Pháirtí Cumannach na Síne (CCP) agus í a scaipeadh; de bhrí go bhfuil cuntais bota na Síne ag éirí níos gníomhaí ar na meáin shóisialta agus i líonrú sóisialta, ag freastal ar riachtanais údaráis na Síne;

X.

de bhrí go ndearna EU DisinfoLab oibríocht ollmhór a bhí dírithe ar institiúidí idirnáisiúnta, go háirithe sa Bhruiséil agus sa Ghinéiv agus a fhreastalaíonn ar leasanna na hIndia, a nochtadh le déanaí, ina raibh na céadta eagraíochtaí meán bréige agus na iliomad eagraíochtaí neamhrialtasacha arna n-eagrú ag an rialtas;

Y.

de bhrí nach bhfuil sásraí scagtha i bhfeidhm ach ag roinnt Ballstát de chuid an Aontais le haghaidh infheistíochtaí sna meáin eachtracha; de bhrí gurb é leas an phobail é a bheith ar an eolas faoi struchtúir úinéireachta tairbhiúla eagraíochtaí meán;

Z.

de bhrí go bhfuil easnaimh struchtúracha thábhachtacha fós ann lena n-éascaítear ionramháil faisnéise trí ardáin ar líne; de bhrí go bhfuil samhlacha gnó na n-ardán ar líne bunaithe ar shonraí pearsanta, ar algartaim a bhrúnn inneachar agus fógraíocht atá foircneach agus deighilteach, trína gciallaíonn níos mó rannpháirtíochta go mbeidh níos mó ioncaim fógraíochta ann, agus go dtugann an feachtas i leith rannpháirtíochta luach saothair deighilteach agus tuairimí míchuibheasacha a théann chun aimhleasa an fhaisnéis bunaithe ar fhíricí; de bhrí go bhfuil ardáin ar líne, dá bhrí sin, deartha ar bhealach a chabhraíonn le teoiricí comhcheilge agus bréagaisnéis a mhéadú; de bhrí go raibh tionchar suaiteach ollmhór freisin ag na hardáin dhomhanda ar líne sin ar inmharthanacht eacnamaíoch earnáil meán na hEorpa, ós rud é go bhfuil siad i gceannas ar mhargadh na fógraíochta, rud a imríonn tionchar ar shamhlacha gnó na meán;

AA.

de bhrí, cé gur neartaíodh an Cód Cleachtais maidir leis an mBréagaisnéis, go bhfuil go leor fadhbanna struchtúracha fós ann, amhail easpa rialacha ceangailteacha agus an fhoráil lenar féidir le cuideachtaí a ngealltanais féin a roghnú, rud a chuireann bac ar rath an Chóid Chleachtais mar uirlis sa deireadh;

AB.

de bhrí go bhféadfadh iarmhairtí tromchúiseacha a bheith ag teicneolaíochtaí intleachta saorga (IS) giniúna atá ag athrú go tapa, rud a d’fhéadfadh a chur ar chumas gníomhaithe mailíseacha níos mó inneachair bréagaisnéise a tháirgeadh agus a scaipeadh, níos saoire agus níos tapúla; de bhrí go bhféadfadh tionchar tubaisteach ar leith a bheith ag tíortha ar fud an domhain nach bhfuil acmhainní acu chun aghaidh a thabhairt ar an dúshlán sin;

AC.

de bhrí go bhfuil sé mar aidhm ag an togra ón gCoimisiún maidir le trédhearcacht agus díriú ar fhógraíocht pholaitiúil aghaidh a thabhairt ar na fadhbanna struchtúracha sin i gcomhthéacs na fógraíochta polaitiúla;

AD.

de bhrí go bhfuil roinnt tionscnamh forbartha ag ardáin chun cur i gcoinne na bréagaisnéise ar líne, lena ndeartar feachtais ‘réamhbhréagnaithe’ chun úsáideoirí a chur ar an eolas faoi chontúirtí na bréagaisnéise trí rabhadh a thabhairt roimh ré faoi mhaímh bhréagacha a dhéantar trí fheachtais bréagaisnéise agus mífhaisnéise arna ndéanamh ag gníomhaithe mailíseacha agus trí na héilimh bhréagacha sin a bhréagnú roimh ré; de bhrí nach féidir éifeacht na dtionscnamh sin a mheas go hiomlán toisc nach bhfuil anailísí neamhspleácha nó institiúidithe á ndéanamh ag taighdeoirí a bhfuil rochtain iomlán acu ar na sonraí;

AE.

de bhrí nach ndéantar faireachán suntasach ar inneachar i dteanga nach Béarla é fós toisc nach n-úsáideann ardáin líon leordhóthanach athbhreithneoirí agus seiceálaithe fíricí atá in ann a gcúraimí faoi seach a dhéanamh i dteangacha eile, go háirithe i dteangacha beaga i dtíortha atá thíos go mór leis an mbréagaisnéis; de bhrí gur cheart d’ardáin ar líne cearta bunúsacha a ráthú do shaoránaigh, amhail an tsaoirse chun tuairimí a nochtadh agus faisnéis a fháil;

AF.

de bhrí, ó ghlac Elon Musk Twitter ar láimh, go bhfuil beartas mífhaisnéise géarchéime tugtha isteach ag an gcuideachta, ar dá réir a ghníomhódh an chuideachta mar fhreagairt ar tvuíteanna ina bhfuil líomhaintí bréagacha nó míthreoracha maidir le forneart agus airm a úsáid, agus go bhfreagródh sí trí thús áite a thabhairt do tvuíteanna ó chuntais meán atá cleamhnaithe leis an stát agus fógra rabhaidh a chur isteach gur sháraigh tvít beartas mífhaisnéise géarchéime na cuideachta, ach cuireadh an cur chuige sin ar ceal go páirteach an 23 Samhain 2022; de bhrí gur scaoil an chuideachta foireann na ranna uile atá freagrach as bréagaisnéis a bhrath, a aicmiú nó as freagairt di, lena n-áirítear formhór na modhnóirí inneachair agus na bhfoirne tírshonracha, agus gur athbhunaigh sí os cionn 60 000 cuntas ar briseadh rialacha an ardáin ina leith roimhe sin trí bhréagaisnéis a chomhroinnt, trí chiapadh nó mí-úsáid a dhéanamh, nó trí chamscéimeanna a reáchtáil; de bhrí, ó rinneadh an táthcheangal, gur tháinig méadú thart ar 40 % ar an ábhar maslach; de bhrí gur cuireadh cuntais iriseoirí agus eagraíochtaí meán ar fionraí arís agus arís eile agus do-ghlactha gan údar nithiúil;

AG.

de bhrí gur ardaíodh ceisteanna i dtuarascálacha na meán maidir le doiciméid inmheánacha maidir le neodracht pholaitiúil iarrachtaí na cuideachta a beartais i gcoinne cur isteach eachtrach agus bréagaisnéis a chur chun feidhme i dtoghchán uachtaránachta na Stát Aontaithe in 2020, agus an ionann na hiarrachtaí sin freisin agus cineál cur isteach ar an díospóireacht pholaitiúil agus shóisialta níos leithne maidir leis an toghchán, mar gur léirigh an iliomad ríomhphoist inmheánacha go raibh modhanna a bhí beartaithe chun cur i gcoinne na bréagaisnéise agus na fuathchainte á n-úsáid ag na príomhpháirtithe sna Stáit Aontaithe chun na toghthóirí a rialú; de bhrí go bhfuil sé fós doiléir conas a fhorbróidh Twitter go luath sa todhchaí, mar gheall ar ráitis agus cinntí arna ndéanamh ag a bhainistíocht shinsearach nua;

AH.

de bhrí gur bagairt thromchúiseach í an bhréagfhaisnéis agus an mhífhaisnéis sláinte don tsláinte phoiblí ós rud é go gcuireann sí isteach ar mhuinín an phobail san eolaíocht, in institiúidí poiblí, sna húdaráis agus san fhoireann leighis, chomh maith le naimhdeas a ghiniúint ina leith, agus teoiricí comhcheilge a chur chun cinn; de bhrí gur féidir leis an mbréagaisnéis sin a bheith bagrach don bheatha nuair a dhíspreagann sí daoine ó chóireálacha leighis a mholtar a lorg, lena n-áirítear vacsaíní, nó cóireálacha bréagacha a chur chun cinn; de bhrí, le linn phaindéim COVID-19, gurbh é 20 % sa Ghearmáinis agus sa Spáinnis, 47 % sa Fhraincis, agus 84 % san Iodáilis, méid an ábhair a bhain le COVID-19 nár déileáladh leis tar éis seiceáil fíricí a dhéanamh agus a fuarthas amach gurb é atá ann mífhaisnéis nó bréagaisnéis; de bhrí go raibh tionchar níos mó fós ar theangacha beaga;

AI.

de bhrí go mbaineann gníomhaithe mailíseacha úsáid as líonraí botaí agus cuntais bhréige ar ardáin na meán sóisialta chun an bonn a bhaint de phróisis dhaonlathacha; de bhrí gur bhain Meta dhá líonra de thionscnamh na Síne agus na Rúise as a bheartas a shárú i gcoinne iompraíocht neamhdhlisteanach chomhordaithe; de bhrí go ndearna an líonra de thionscnamh na Rúise atá comhdhéanta de níos mó ná 60 suíomh gréasáin pearsanú ar shuíomhanna gréasáin dlisteanacha d’eagraíochtaí nuachta san Eoraip agus gur phostáil sé ailt bhunaidh ina ndearnadh cáineadh ar an Úcráin, inar tacaíodh leis an Rúis agus inar áitíodh go rachadh smachtbhannaí an Iarthair ar an Rúis in abar; de bhrí go bhfuair EU DisinfoLab torthaí comhchosúla ina imscrúdú Doppelgänger; de bhrí nach bhfuil i gceist leis sin ach an chuid is lú den scéal agus ní mór d’ardáin ar líne a bheith ar an airdeall i gcónaí agus feabhas a chur ar a mbeartais modhnóireachta inneachair;

AJ.

de bhrí go bhfuil easpa maoirseachta ar ardáin amhail Reddit agus Telegram, áit a scaiptear bréagaisnéis gan seiceáil den chuid is mó; de bhrí go ndéanann Spotify podchraoltaí ina bhfuil inneachar mífhaisnéise agus bréagaisnéise a óstáil, go háirithe maidir le bréagaisnéis vacsaíní; de bhrí go bhfuil suas le 11 mhilliún éisteoir ag cuid acu in aghaidh na heipeasóide; de bhrí gur dhiúltaigh an chuideachta aon ghníomhartha a dhéanamh i gcoinne na gcuntas a chraol na podchraoltaí toisc nach bhfuil aon bheartas bréagaisnéise aici; de bhrí go bhfuil tús curtha ag AE le himscrúduithe iomadúla ar TikTok, maidir le sonraí shaoránaigh AE a aistriú go dtí an tSín agus fógraíocht spriocdhírithe atá dírithe ar mhionaoisigh;

AK.

de bhrí gur tháinig an Gníomh um Sheirbhísí Digiteacha (DSA) (15) i bhfeidhm an 16 Samhain 2022 agus go mbeidh feidhm aige ón 17 Feabhra 2024; de bhrí go ndéantar na rialacha is infheidhme maidir le seirbhísí idirghabhálacha sa mhargadh inmheánach a chomhchuibhiú go hiomlán agus go bhfuil forálacha sonracha ann is infheidhme maidir le hardáin an-mhór ar líne (VLOPanna) agus innill chuardaigh an-mhór ar líne (VLOSEanna) a mhéid a bhaineann le rioscaí sistéamacha amhail bréagaisnéis agus cúbláil;

AL.

de bhrí go gcuireann DSA oibleagáidí ar VLOPanna agus VLOSEnna measúnuithe riosca bliantúla a dhéanamh agus bearta a dhéanamh chun na rioscaí a eascraíonn as dearadh agus úsáid a seirbhíse a mhaolú; de bhrí gur cheart roinnt forálacha de DSA a leathnú chuig ardáin níos lú, a bhfuil bréagaisnéis fós ag scaipeadh gan bhac orthu;

AM.

de bhrí go n-aicmíonn DSA bréagaisnéis agus cúbláil toghcháin mar rioscaí sistéamacha;

AN.

de bhrí go bhfuil ról ríthábhachtach ag algartaim atá deartha chun tairbhe shamhlacha gnó na n-ardán maidir le insintí bréagacha agus míthreoracha a mhéadú, lena gcruthaítear boilgeoga scagtha lena gcuirtear teorainn nó saobhadh ar an bhfaisnéis atá ar fáil d’úsáideoirí aonair; de bhrí nach bhfuil dóthain déanta ag ardáin fós chun dul i ngleic leis sin; de bhrí go bhfuil easpa trédhearcachta fós ann maidir le forbairt, tástáil agus feidhmiú algartam;

AO.

de bhrí go n-úsáidtear ardáin na meán sóisialta mar uirlisí, mar shampla, chun bolscaireacht na Rúise a scaipeadh chun údar a thabhairt le hionradh Vladimir Putin ar an Úcráin, agus chun gluaiseachtaí polaitiúla frithdhaonlathacha sna Balcáin a chothú; de bhrí go bhfuil IS, trí úsáid mhailíseach a bhaint as samhlacha móra teanga (LLM), amhail ChatGPT, ag éirí níos tábhachtaí mar uirlis a úsáidtear chun bolscaireacht agus bréagaisnéis a scaipeadh, ach go mbeidh sé ríthábhachtach freisin chun insintí ionramháilte a aimsiú agus a chomhrac ar bhealach níos éifeachtaí; de bhrí gur gá teicneolaíochtaí digiteacha a fhorbairt agus urraim á tabhairt do chearta an duine agus don smacht reachta;

AP.

de bhrí gur bhunaigh an Coimisiún Lárionad Eorpach um Thrédhearcacht Algartamach, atá mar chuid d’Airmheán Comhpháirteach Taighde an Choimisiúin, agus atá comhdhéanta den chuid is mó d’innealtóirí agus d’eolaithe sonraí atá tiomanta do staidéar a dhéanamh ar algartaim;

AQ.

de bhrí go bhfuil ról agus feidhm thábhachtach ag comhordaitheoirí seirbhísí digiteacha, ar údaráis neamhspleácha iad arna gceapadh ag gach Ballstát, agus go bhfuil siad freagrach as maoirseacht agus forfheidhmiú a dhéanamh ar DSA sna Ballstáit;

AR.

de bhrí go bhfuil baol ann go mbeidh spleáchas eacnamaíoch ann, agus spiaireacht agus sabaitéireacht ann freisin, agus go bhfuil cuideachtaí eachtracha ag cur lena gcumas tionchar a imirt ar bhonneagar criticiúil AE; de bhrí go bhfuil leasanna tromlaigh nó suntasacha faighte ag cuideachtaí loingseoireachta Síneacha i mbreis agus 20 calafort Eorpach, mar shampla China Merchants Group [Grúpa Ceannaithe na Síne] sa Fhrainc agus COSCO i gcalafoirt Piraeus, Antuairp, Bilbao, Genoa, Hamburg, Rotterdam, Valencia agus Zeebrugge; de bhrí gur iarradh i dtuarascáil INGE 1 go mbeadh creat rialála agus forfheidhmithe níos láidre ann chun a áirithiú go ndéantar infheistíocht dhíreach choigríche (IDC), a mbeadh tionchar díobhálach aici ar shlándáil AE, a chosc;

AS.

de bhrí go bhfuil gníomhaithe eachtracha, go príomha an tSín agus an Rúis, ach an Iaráin freisin, ag iarraidh bonneagar criticiúil agus slabhraí soláthair Eorpacha a insíothlú chun faisnéis agus/nó fios gnó a ghoid trí spiaireacht, chun buntáiste iomaíoch a fháil nó chun sabaitéireacht a dhéanamh ar chodanna de na bonneagair sin chun dochar a dhéanamh dá bhfeidhmiú; de bhrí go bhfuil an iompar mailíseach céanna chomh maith le tionscadail eacnamaíocha agus bonneagair i dtíortha is iarrthóirí agus i dtíortha is iarrthóirí ionchasacha AE; de bhrí gur bagairt mhéadaitheach do shaoránaigh na hEorpa é an fhéidearthacht spiaireacht agus bailiú faisnéise a bheith ann trí ghnáthfhearais tí;

AT.

de bhrí gur chruthaigh spleáchas fuinnimh AE ar an Rúis deacrachtaí ollmhóra dá slándáil fuinnimh tar éis don Rúis tús a chur lena cogadh foghach i gcoinne na hÚcráine; de bhrí go bhfuil baol ann go mbeidh tionchar ag tionscadail ‘caipiteal creimneach’ ó ghníomhaithe eachtracha sna Ballstáit, amhail Stáisiún Cumhachta Núicléiche Paks san Ungáir, ar chinntí polaitiúla; de bhrí, in ainneoin fhorghabháil neamhdhleathach agus ionghabháil na Rúise ar chodanna den Úcráin in 2014, gur mhéadaigh go leor tíortha AE a spleáchas gáis ar an Rúis; de bhrí gur laghdaigh cuid de na tíortha sin a spleáchas le déanaí go beagnach 0 %;

AU.

de bhrí go bhféadfadh na cláir infheistíochta le haghaidh imlonnú 5G amhail SCE2 Digiteach, chomh maith le Clár 6G an Chomhghnóthais um Líonraí agus Seirbhísí Cliste, tacú le ceannasacht theicneolaíoch agus spleáchais ar sholáthróirí eachtracha sa réimse sin a laghdú trí bhonneagar slán 5G chomh maith le hacmhainneachtaí teicneolaíochta 6G a thógáil; de bhrí gur cheart forbairt bonneagair theicneolaíoch chriticiúil do gheilleagar na hEorpa a fhorchoimeád do mhonaróirí agus d’fhorbróirí Eorpacha nó dóibh siúd ó thíortha atá ar aon intinn leo;

AV.

de bhrí gur neartaigh údaráis náisiúnta roinnt Ballstát a gcur chuige maidir le cur i gcoinne bagairtí eachtracha ar bhonneagar criticiúil, amhail spiaireacht agus sabaitéireacht;

AW.

de bhrí go gcuireann bréagaisnéis agus cúbláil faisnéise eile an díospóireacht phoiblí ar thoghcháin agus ar phróisis dhaonlathacha eile ó bhail agus gur féidir léi cosc a chur ar shaoránaigh roghanna eolasacha a dhéanamh nó iad a dhíspreagadh ó rannpháirtíocht pholaitiúil ar fad; de bhrí gur bagairt dhíreach ar iomaíocht pholaitiúil chothrom dhaonlathach í an bhréagaisnéis i bhfeachtais pholaitiúla; de bhrí gur dúshlán iad na saincheisteanna sin do thoghcháin Eorpacha 2024;

AX.

de bhrí go bhfuiltear ag súil go dtiocfaidh méadú ar thrasnaíocht agus ar ghníomhaíocht cúblála faisnéise an oíche roimh thoghcháin Eorpacha 2024; de bhrí go bhfuil na toghcháin Eorpacha bunriachtanach d’fheidhmiú phróisis dhaonlathacha an Aontais Eorpaigh, lena gcuirtear a chobhsaíocht agus a dhlisteanacht chun cinn; de bhrí nach mór, dá bhrí sin, sláine dhaonlathach an Aontais a chosaint, lena n-áirítear trí chosc a chur ar scaipeadh bréagaisnéise agus ar thionchar míchuí eachtrach ar thoghcháin Eorpacha; de bhrí go bhféadfadh an togra maidir le trédhearcacht agus díriú ar fhógraíocht pholaitiúil rannchuidiú trí thoirmeasc a bhunú ar urraitheoirí fógraíochta polaitiúla a thagann ó thíortha neamh-AE;

AY.

de bhrí gur bunchloch na dtíortha daonlathacha iad toghcháin shaora agus chóra, agus go bhfuil gá le próisis toghcháin neamhspleácha agus thrédhearcacha chun timpeallacht iomaíoch toghcháin agus muinín na saoránach as sláine toghcháin a chothú; de bhrí go bhfuil sláine shistéamach na bpróiseas toghchánach daingnithe freisin sna creataí dlíthiúla agus institiúideacha lena rialaítear an chaoi a seoltar toghcháin, lena n-áirítear comhlachtaí bainistíochta toghcháin; de bhrí go bhfuil cáilíocht agus láidreacht na gcreataí agus na n-institiúidí daonlathacha sin bunriachtanach d’iomláine toghcháin aon tíre; de bhrí gur ionstraimí tábhachtacha sa chinnteoireacht toghcháin iad ardáin shóisialta ar líne atá ag éirí níos tábhachtaí;

AZ.

de bhrí gur féidir cur isteach ar phróisis toghcháin ar bhealaí éagsúla, go díreach nó go hindíreach, amhail oibríochtaí calaoiseacha le ballóidí, bac a chur ar bhealaí isteach chuig stáisiúin vótaíochta nó comhéigean fisiciúil chun vótála, faisnéis shaofa a dháileadh ar iarrthóirí, ionramháil dátaí toghcháin nó athruithe orthu, agus feachtais bhréagaisnéise ar na meáin shóisialta, i measc nithe eile;

BA.

de bhrí go bhfuil réimis fhorlámhacha tar éis éirí níos éifeachtaí maidir le noirm agus institiúidí a chomhthoghadh nó a imchéimniú a thacaíonn le saoirsí bunúsacha, agus maidir le cabhair a sholáthar do dhaoine eile ar mian leo déanamh amhlaidh; de bhrí go bhfuil na córais sin tar éis deighilt a spreagadh agus a shaothrú, trí ionadaithe i dtríú tíortha agus in AE, agus go ndearna siad iarracht an pholaitíocht náisiúnta a shaobhadh chun fuath, foréigean agus cumhacht gan srian a chur chun cinn; de bhrí gur minic nach bhfuil cur isteach eachtrach ar phróisis toghcháin dírithe go heisiach ar thionchar a imirt ar thorthaí sonracha toghcháin ach ar an mbonn a bhaint de mhuinín fhadtéarmach na saoránach i ndlisteanacht a n-institiúidí daonlathacha chomh maith lena bpróisis dhaonlathacha nó í a dhíothú;

BB.

de bhrí go rannchuidíonn an tÚdarás um Páirtithe Polaitiúla Eorpacha agus um Fhondúireachtaí Polaitiúla Eorpacha le sláine na dtoghchán Eorpach a chosaint;

BC.

de bhrí go bhfuil ról ríthábhachtach ag an líonra Eorpach um chomhar maidir le toghcháin chun sláine na dtoghchán laistigh den Aontas Eorpach a áirithiú; de bhrí gur bhunaigh seirbhísí an Choimisiúin an líonra sin le seirbhísí ábhartha na mBallstát;

BD.

de bhrí go bhfuil iriseoirí agus saineolaithe fós ag nochtadh cistiú seach-AE do ghníomhaíochtaí polaitiúla agus do pholaiteoirí laistigh den Aontas Eorpach roimh an 24 Feabhra 2022 agus ina dhiaidh sin, go háirithe ón Rúis, go gcuireann siad sláine fheidhmiú daonlathach Bhallstáit AE i mbaol agus gur gá imscrúdú críochnúil a dhéanamh chun iad sin atá comhpháirteach a choinneáil cuntasach; de bhrí gur léirigh El País rannpháirtíocht Chomhairle Náisiúnta Frithbheartaíochta na hIaráine i maoiniú gluaiseachtaí polaitiúla atá go mór ar an eite dheis in AE; de bhrí go bhfuil sprioc choiteann ag an Rúis agus ag an Iaráin, in éineacht le tíortha eile amhail Veiniséala, maidir le stáit dhaonlathacha a lagú;

BE.

de bhrí go bhfuil na reachtóirí i mbun caibidlíochta faoi láthair maidir leis an togra maidir le fógraíocht pholaitiúil arb é is aidhm dó DSA a chomhlánú, dul i ngleic leis an ilroinnt dhíobhálach atá ann faoi láthair sa réimse sin agus cabhrú lenár ndaonlathais san Eoraip agus ár bpróisis dhaonlathacha a neartú, ligean do shaoránaigh cinneadh oilte a dhéanamh le linn toghcháin nó reifrinn trí phróiseas oscailte agus cosaint a thabhairt do shaoránaigh AE ón mbréagaisnéis, ón mbréagnuacht, ó theicnící fógraíochta polaitiúla teimhneacha agus ó chur isteach eachtrach i gcoitinne; de bhrí gur cheart do na reachtóirí teacht ar chomhaontú maidir leis an togra a luaithe is féidir chun a áirithiú go mbeidh na rialacha nua i bhfeidhm roimh na toghcháin Eorpacha in 2024;

BF.

de bhrí, sa chéad leath de 2021 amháin, go ndearnadh an oiread céanna cibirionsaithe ar institiúidí AE agus a rinneadh in 2020 (16); de bhrí go bhfuil méadú tagtha ar líon na n-ionsaithe ar institiúidí an AE agus ar institiúidí náisiúnta tar éis ionsaí na Rúise san Úcráin, mar a léiríodh le cibearionsaí a bhuail Parlaimint na hEorpa le linn sheisiún iomlánach mhí na Samhna 2022, inar dúnadh an suíomh gréasáin tar éis vóta ar rún chun an Rúis a dhearbhú mar urraitheoir stáit na sceimhlitheoireachta;

BG.

de bhrí go bhfuil méadú suntasach tagtha ar iarrachtaí agus ar infheistíochtaí an Aontais chun acmhainneachtaí cibearshlándála a fhorbairt, lena n-áirítear trí chláir an Aontais Fís Eorpach agus an Eoraip Dhigiteach; de bhrí go bhfuil gá fós le cibearshlándáil níos éifeachtúla a fhaigheann tacaíocht ón gcistiú ábhartha; de bhrí go bhféadfadh bonneagar cibearshlándála láidir costais cibeartheagmhais a laghdú; de bhrí go meastar sa mheasúnú tionchair ar an ngníomh cibear-athléimneachta atá beartaithe go bhféadfadh laghdú costais de thart ar EUR 180 billiún go 290 billiún a bheith mar thoradh ar an tionscnamh ó theagmhais a dhéanann difear do ghnólachtaí (17); de bhrí go raibh moill ar an gCoimisiún bearta a dhéanamh mar fhreagairt ar haiceáil a rinneadh ar shaoránaigh AE in AE le hearraí spiaireachta ó thríú tíortha, lena n-áirítear daoine suntasacha amhail cinn stáit nó coimisinéirí; de bhrí nach bhfuil aon phlean gníomhaíochta i bhfeidhm faoi láthair chun haiceáil ar shaoránaigh AE laistigh de AE ag daoine atá ag feidhmiú lasmuigh de AE a chosc;

BH.

de bhrí gur ghlac an Chomhairle le déanaí Treoir NIS2 chun ardleibhéal cibearshlándála coiteann a áirithiú ar fud an Aontais; de bhrí gur bunaíodh an Líonra Eorpach um Eagrú an Idirchaidrimh maidir le Cibirghéarchéimeanna (EU CyCLONe) le Treoir NIS2, rud a neartóidh athléimneacht na gcóras faisnéise; de bhrí nach féidir leibhéal cuí cibearshlándála a bhaint amach ach amháin trí chomhar le gníomhaithe éagsúla ó na hearnálacha poiblí agus príobháideacha; de bhrí go bhfuil AE fós ag tabhairt aghaidh ar spleáchais mhóra i réimse na cibearshlándála;

BI.

de bhrí go n-éilíonn cibearchosaint na hÚcráine gníomhaíocht agus comhar na gcomhpháirtithe uile; de bhrí gur chuir corparáidí TF an iarthair cúnamh ar fáil don Úcráin chun leochaileachtaí ina bonneagar a shainaithint; de bhrí go bhfuil easpa acmhainneachtaí teicniúla laistigh de AE chun leochaileachtaí ina bhonneagar criticiúil a shainaithint; de bhrí go bhfuil comhar agus malartú faisnéise le comhpháirtithe spriocdhírithe, amhail SAM, an Ríocht Aontaithe, an Úcráin agus an Téaváin, ríthábhachtach chun feabhas a chur ar acmhainneacht AE ionsaithe a shannadh;

BJ.

de bhrí gur bunaíodh an Comhghnóthas um Líonraí agus Seirbhísí Cliste in 2021 chun cur ar chumas gníomhaithe Eorpacha caighdeáin dhomhanda 6G a mhúnlú; de bhrí go bhfuil comhar idir an Coimisiún agus údaráis na mBallstát maidir le cur chun feidhme bhosca uirlisí cibearshlándála 5G ar siúl faoi chuimsiú ghrúpa comhair na gCóras Gréasáin agus Faisnéise (NIS); de bhrí gur chinn Cúirt Iniúchóirí na hEorpa, ó glacadh bosca uirlisí 5G, go bhfuil dul chun cinn déanta maidir le slándáil líonraí 5G a threisiú, agus go bhfuil srianta ar dhíoltóirí ardriosca á gcur i bhfeidhm nó á gcur i bhfeidhm faoi láthair ag tromlach na mBallstát, ach nach bhfuil aon cheann de na bearta a chuirtear chun cinn ceangailteach ó thaobh dlí, rud a chiallaíonn nach bhfuil aon chumhacht ag an gCoimisiún iad a fhorfheidhmiú;

BK.

de bhrí gur tharla cásanna ina raibh tríú tíortha ag iompar imircigh agus iarrthóirí tearmainn chuig teorainn sheachtrach AE mar chuid dá straitéisí hibrideacha trasnaíochta eachtrach chun dúshlán a thabhairt don Aontas agus dá Bhallstáit, amhail i bhfómhar na bliana 2021 ag an mBealarúis i gcoinne na Polainne, na Liotuáine agus an Laitvia; de bhrí gurb é atá sna hiarrachtaí trasnaíochta hibrideacha sin freisin ná bréagaisnéis a scaipeadh trí shochaithe AE a dheighilt agus an bonn a bhaint de luachanna agus cearta bunúsacha na hEorpa;

BL.

de bhrí gur minic a úsáideann gníomhaithe eachtracha imircigh, mionlaigh agus diaspóraí, a eagraíonn feachtais bhréagaisnéise chun teacht i dtír agus méadú ar réamhthuairimí diúltacha maidir leis an imirce chun teannas a chothú laistigh de shochaithe na hEorpa, amhail an diaspóra Úcránach a bheith thíos le feachtais bhréagaisnéise spriocdhírithe de chuid na Rúise; de bhrí go bhfuil ról lárnach ag ardáin i scaipeadh na faisnéise sin;

BM.

de bhrí go bhfuil méadú ag teacht ar líon na ngluaiseachtaí frith-inscne san Eoraip, ag díriú go sonrach ar shláinte ghnéis agus atáirgthe, ar chearta na mban agus ar dhaoine LGBTIQ+; de bhrí go spreagann gluaiseachtaí den sórt sin bréagaisnéis chun dul chun cinn maidir le cearta na mban agus comhionannas inscne a aisiompú; de bhrí gur tuairiscíodh go bhfuair na gluaiseachtaí sin na milliúin euro i gcistiú eachtrach, bíodh sé poiblí nó príobháideach, lena n-áirítear ón Rúis agus ó na Stáit Aontaithe;

BN.

de bhrí go léiríonn ionstraimiú sin imirceach agus mionlach ag teorainneacha seachtracha AE a thábhachtaí atá sé córas bainistithe teorainneacha atá éifeachtach agus comhtháite a bheith ann agus a thábhachtaí atá sé bearta oibríochtúla, airgeadais agus taidhleoireachta a chur i bhfeidhm chun go bhfanfaidh siad athléimneach;

BO.

de bhrí go dtacaíonn an Pharlaimint leis an togra ón gCoimisiún forálacha maidir le hionstraimíú imirceach a chur san áireamh i gCód Teorainneacha Schengen, rud a chuirfidh ar chumas na mBallstát gníomhú ar bhealach níos éifeachtaí agus níos comhordaithe;

BP.

de bhrí go mbíonn tionchar ag feachtais bhréagaisnéise agus bholscaireachta na Rúise ar thuairimí indíreacha san Eoraip trí dhíriú ar dhiaspóra a labhraíonn an Rúisis san Eoraip agus i dtíortha comharsanachta; de bhrí gur cheart ról lárnach a bheith ag na Ballstáit maidir le foinsí nuachta bunaithe ar fhíricí a chur ar fáil do ghrúpaí daonra ina labhraítear an Rúisis, chun cur i gcoinne na hinsinte atá ar son na Creimile; de bhrí go bhfuil bréagaisnéis agus feachtais bholscaireachta na Rúise forleathan freisin i roinnt tíortha iar-Shóivéadacha, lena n-áirítear san Áise Láir;

BQ.

de bhrí gur chuir oifig ionchúisitheora cónaidhme na Beilge tús le himscrúdú maidir le hamhras faoi sciúradh airgid, éilliú agus rannpháirtíocht in eagraíocht choiriúil de thionscnamh tríú tíortha; de bhrí gur tharla roinnt gabhálacha agus cuardaigh ón 9 Nollaig 2022 ar aghaidh, a raibh tionchar acu ar Fheisirí reatha agus ar iar-Fheisirí de Pharlaimint na hEorpa, agus ar an bhfoireann; de bhrí gur gá don Pharlaimint, agus d’institiúidí eile AE na líomhaintí sin a leanúint le bearta éifeachtacha, chun na bealaí éalaithe le haghaidh trasnaíocht eachtrach a dhúnadh, chomh maith le trédhearcacht agus cuntasacht a mhéadú, chun sláine na n-institiúidí a chosaint;

BR.

de bhrí go bhfuil muinín as sláine agus as smacht reachta na Parlaiminte ríthábhachtach d’fheidhmiú an daonlathais Eorpaigh; de bhrí go bhfuil sé ríthábhachtach a áirithiú nach ngabhfar próisis dhaonlathacha le leasanna príobháideacha agus seachtracha agus go ndéanfar cearta na saoránach a urramú go hiomlán; de bhrí gur cuid ríthábhachtach de dhaonlathas na hEorpa é cumas na n-ionadaithe leasmhara agus ionadaithe grúpa tionchar a imirt ar chinnteoireacht sa Pharlaimint trí bhíthin argóintí;

BS.

de bhrí gur aibhsíodh i dtuarascáil INGE I cheana féin go bhfuil easpa tromchúiseach rialacha ann atá ceangailteach ó thaobh dlí maidir le brústocaireacht agus forfheidhmiú chlár brústocaireachta AE, agus gur minic a dhéanann cuideachtaí náisiúnta nó príobháideacha faoi rialú stáit forlámhach eachtrach iarpholaiteoirí agus státseirbhísigh ardleibhéil Eorpacha a fhostú nó a chomhthoghadh; de bhrí go bhfágann sé sin go bhfuil sé beagnach dodhéanta súil a choinneáil ar an mbrústocaireacht a thagann ó lasmuigh de AE;

BT.

de bhrí, maidir le gabháil scothaicme ag leasanna eachtracha, arna n-éascú ag neamhshrian ar ‘dhoirse imrothlacha’ idir institiúidí AE agus tíortha uathlathacha a bhfuil baol ard ann go ndéanfar trasnaíocht dhíobhálach ar leasanna daonlathacha an Aontais, gur cineál suntasach trasnaíocht eachtrach ar fheidhmiú daonlathach an Aontais Eorpaigh é, agus gur féidir a mheas gur saincheist é a bhaineann le héilliú;

BU.

de bhrí gur fhorchuir an tSín agus an Rúis smachtbhannaí ar thaighdeoirí agus institiúidí taighde Eorpacha mar gheall ar a gcuid scríbhneoireachta nó tuairimí;

BV.

de bhrí go bhfuil gá le tuilleadh soiléireachta maidir le tionchar eachtrach trí ionadaithe leasa ar leibhéal AE, go háirithe i gcomhar le heagraíochtaí neamhrialtasacha (ENRanna), comhairleachtaí, fondúireachtaí, meithleacha machnaimh agus cuideachtaí príobháideacha; de bhrí nár cheart go gcuirfeadh sé sin cosc ar ghnáthghníomhaíochtaí for-rochtana na n-ambasáidí; de bhrí go bhfuil laghdú ag teacht ar líon fhoireann Ambasáid na Rúise ar fud na hEorpa, agus go bhfuil sí fós ag ardú i mBúdaipeist, rud a léiríonn go bhfuil an Ungáir soghabhálach i leith gníomhaíochtaí faisnéise Rúiseacha;

BW.

de bhrí go bhféadfadh brústocaireacht thar ceann leasanna eachtracha, go háirithe nuair a bhaineann sé le cuideachtaí in earnálacha straitéiseacha agus a rialtais, an bealach a réiteach do chur isteach eachtrach inár n-institiúidí; de bhrí gur neartaíodh go mór an Clár Trédhearcachta tar éis comhaontú idirinstitiúideach; de bhrí go bhféadfadh neartú na gceanglas trédhearcachta le haghaidh ESSanna, comhairleachtaí, fondúireachtaí, meithleacha machnaimh agus cuideachtaí príobháideacha feidhmiú chun cur isteach eachtrach a bhrath;

BX.

de bhrí go raibh roinnt cásanna ann d’imeaglú naimhdeach agus d’fheachtais chiaptha i gcoinne Feisirí de Pharlaimint na hEorpa arna n-eagrú agus arna gcomhordú ag tíortha eachtracha; de bhrí gur chuir tíortha amhail an Rúis, an tSín agus an Iaráin toirmisc ar theacht isteach agus smachtbhannaí ar Fheisirí agus comhlachtaí aonair de chuid Pharlaimint na hEorpa agus parlaimintí na mBallstát, mar gheall ar a gcáineadh ar bheartais na rialtas faoi seach maidir le cearta an duine;

BY.

de bhrí go bhfuil roinnt stát forlámhach ag cur ina leith go bréagach go ndearna saoránaigh Eorpacha coireanna nó cionta agus go bhfuil siad á gcoinneáil i bpríosún chun tionchar a imirt ar chinntí Bhallstáit AE; de bhrí go bhfuil saoránaigh á gcoinneáil agus á gciontú san Iaráin faoi láthair gan aon údar maith a bheith leo, lena n-áirítear náisiúnach na Sualainne Ahmadreza Djalali agus seachtar náisiúnach Francach;

BZ.

de bhrí gur fhorchuir AE smachtbhannaí i mí an Mhárta 2022 ar asraonta bolscaireachta na Rúise, Russia Today (RT) agus Sputnik, lena ngníomhaíocht chraolacháin a chur ar fionraí go sealadach, chomh maith le hordú a thabhairt do sholáthraithe rochtana idirlín agus d’innill chuardaigh rochtain agus innill chuardaigh a bhlocáil chun a n-inneachar a dhí-innéacsú; de bhrí, ó glacadh an naoú pacáiste smachtbhannaí, gur scoir oibreoirí satailíte amhail Eutelsat na Fraince agus SES Lucsamburg de sheirbhísí craolacháin a sholáthar do RT agus Sputnik in AE; de bhrí go leanann Eutelsat 36B de chláir a chraoladh ó Trikolor na Rúise agus NTV agus i gcríocha na hÚcráine atá faoi fhorghabháil ag an Rúis; de bhrí go leanann SES de RT News a chraoladh san India, i Meicsiceo agus san Afraic Theas; de bhrí go leanann oibreoirí satailíte náisiúnta eile amhail Hellas Sat agus Hispasat, chomh maith le cainéil náisiúnta Ungáracha, de chainéil teilifíse atá faoi réir smachtbhannaí a chraoladh; de bhrí go bhfuil RT France agus RT News fós ar fáil ar líne; de bhrí gur minic a mhéadaíonn eagraíochtaí idirnáisiúnta éagsúla de chuid na meán bolscaireacht na Rúise agus go mbíonn tionchar an-leathan acu i réigiúin áirithe ar fud an domhain;

CA.

de bhrí, i gcontrárthacht shoiléir leis na smachtbhannaí arna bhforchur ag AE, go bhfuil an tSeirbia, tír is iarrthóir ar bhallraíocht AE, tagtha chun bheith ina thearmann sábháilte do roinnt cuideachtaí Rúiseacha atá ag iarraidh éalú ó smachtbhannaí a d’fhorchuir AE nó na smachtbhannaí sin a mhaolú, amhail ó mhí Iúil 2022, tá Béalgrád ag óstáil roinnt oifigí de chuid RT (Russia Today roimhe seo), a sheol a seirbhís nuachta ar líne sa tSeirbia;

CB.

de bhrí go ndíreodh coiriúlú ar chur isteach eachtrach ar an iompar mailíseach sin agus go ndéanfaí í a stiogmatú; de bhrí nach bhfuil aon toirmeasc ginearálta ar chur isteach eachtrach in AE faoi láthair, rud a chiallaíonn go bhféadfaidh déantóirí coire gabháil dó gan eagla roimh phionós, murab ionann a n-iompar agus cion atá ann cheana; de bhrí, de bhun an tríú fomhír d’Airteagal 83(1) den Chonradh ar Fheidhmiú an Aontais Eorpaigh (CFAE), ar bhonn forbairtí sa choireacht, go bhféadfaidh an Chomhairle cinneadh a ghlacadh lena sainaithneofar réimsí eile coireachta fíorthromchúisí a bhfuil gné thrasteorann ag baint leo; de bhrí gur gá smachtbhannaí a fhorchur agus srianta a chur ar dhéantóirí cur isteach ón gcoigríoch chun cosc a chur orthu gníomhaíochtaí a dhéanamh amach anseo;

CC.

de bhrí gur mhol an Coimisiún cionta coiriúla agus pionóis a chomhchuibhiú mar gheall ar shárú smachtbhannaí AE; de bhrí go ndearna roinnt Ballstát breithniú ar inniúlachtaí Oifig an Ionchúisitheora Phoiblí Eorpaigh a leathnú chun na sáruithe sin a chumhdach;

CD.

de bhrí go bhfuil roinnt píosaí tábhachtacha reachtaíochta forbartha cheana féin ag AE chun cur i gcoinne ionramháil agus trasnaíocht urchóideach faisnéise eachtraí (FIMI); de bhrí go bhfuil baol ann go bhféadfaí creataí rialála AE chun an bhréagaisnéis a chomhrac a chóipeáil agus go bhféadfadh tíortha (forlámhacha) eile iad a úsáid go roghnaitheach chun srian a chur le saoirse na meán agus saoirse tuairimí a nochtadh; de bhrí nach ndearnadh go cuí ar leibhéal AE meastóireacht ar éifeachtacht agus ar thionchar na n-ionstraimí atá ann cheana maidir le hathléimneacht na sochaí a neartú; de bhrí go gcuirfeadh meastóireacht den sórt sin tuilleadh feabhais ar threoshuíomh na mbeartas agus na n-uirlisí a bheidh ann amach anseo chun aghaidh a thabhairt ar chur isteach eachtrach agus ar bhagairtí hibrideacha;

CE.

de bhrí, tar éis a fáis eacnamaíoch agus a leathnaithe pholaitiúil ar an leibhéal domhanda, go bhfuil an tSín ag iarraidh scaipeadh a bolscaireachta thar lear a uasmhéadú, ag scaipeadh scéalta dearfacha maidir leis an tír agus ag an am céanna ag iarraidh guthanna criticiúla a chur faoi chois; de bhrí go bhfuil smacht ag an tSín ar na bealaí traidisiúnta faisnéise uile san Afraic, arb iad na huirlisí is mó úsáid fós ar an mór-roinn chun rochtain a fháil ar fhaisnéis; de bhrí go bhfuil an Rúis ag leathnú a cuid oibríochtaí bréagaisnéise san Afraic freisin; de bhrí go bhfuil baint dhíreach ag Grúpa Wagner leis na hoibríochtaí sin; de bhrí go bhféadfadh na hoibríochtaí sin sábháilteacht shaoránaigh na hEorpa agus forbairt an chomhair le stáit chomhpháirtíochta na hAfraice a chur i mbaol;

CF.

de bhrí go bhfuil ról ceannasach á ghlacadh ag AE in obair Choiste Ad Hoc na Náisiún Aontaithe maidir le Cibearchoireacht, faoi Thríú Coiste na Náisiún Aontaithe, agus é mar aidhm leis sin cearta bunúsacha agus nós imeachta na ndaoine atá faoi dhrochamhras a chosaint;

CG.

de bhrí go bhfuil méadú tagtha ar an bhfeasacht fhoriomlán ar na contúirtí a bhaineann le hionramháil agus cur isteach ar fhaisnéis i dtíortha eile ar fud an domhain ó thosaigh paindéim COVID-19; de bhrí go bhfuil roinnt tionscnamh molta ag na Náisiúin Aontaithe chun rialachas a fheabhsú sa réimse digiteach agus chun níos mó comhleanúnachais a chruthú i measc Bhallstáit na Náisiún Aontaithe, amhail an Cód Iompair Domhanda chun sláine na faisnéise poiblí agus an Comhshocrú Digiteach Domhanda a chur chun cinn;

CH.

de bhrí, i bpléití le Coiste Speisialta ING2, gur thug ionadaí ó roinnt ardán agus geallsealbhóirí eile freagra dearfach ar bhunú caighdeán domhanda, agus go háirithe caighdeáin Eorpacha agus, nuair ab fhéidir, caighdeáin thrasatlantacha, i gcoinne FIMI;

CI.

de bhrí go bhfuil misin agus oibríochtaí an chomhbheartais eachtraigh agus slándála (CBES)/an chomhbheartais slándála agus cosanta (CBSC) agus toscaireachtaí AE thar lear i measc na bhfeachtas cumarsáide straitéisí is fearr ag AE i dtíortha nach bhfuil san Aontas;

CJ.

de bhrí gur fhormheas an Chomhairle an Compás Straitéiseach i mí an Mhárta 2022; de bhrí go leagtar amach sa Chompás Straitéiseach gur cheart uirlisí agus acmhainní cumarsáide straitéiseacha leordhóthanacha a bheith ag gach misean agus oibríocht CBSC/CBES faoi 2024 chun cur i gcoinne FIMI; de bhrí go bhfuil gá le próiseas nuachóirithe agus gairmiúlachta i gcumarsáid misean, lena n-áirítear tacú le tionscnaimh chun leochaileachtaí bréagaisnéise a chomhrac; de bhrí gur chuir Tascfhórsa um Chumarsáid Straitéiseach (StratCom) na Seirbhíse Eorpaí Gníomhaíochta Seachtraí (SEGS) dlús lena chomhar le misin agus oibríochtaí CBSC chun cabhrú leo feachtais FIMI a bhrath, a anailísiú agus a thuiscint;