—

ag féachaint don Chonradh ar Fheidhmiú an Aontais Eorpaigh, agus go háirithe Teideal XVIII de, chomh maith leis an gConradh ar an Aontas Eorpach, go háirithe Airteagal 5(3) de,

—

ag féachaint do theachtaireacht ón gCoimisiún an 14 Nollaig 2021 dar teideal The New EU Urban Mobility Framework [Creat Nua Soghluaisteachta Uirbí AE] (COM(2021)0811),

—

ag féachaint don togra ón gCoimisiún an 14 Nollaig 2021 maidir le treoirlínte an Aontais chun an gréasán tras-Eorpach a fhorbairt (COM(2021)0812), agus go háirithe d’Aithris 52 agus Airteagal 40 a bhaineann le ceanglais maidir le nóid uirbeacha,

—

ag féachaint don phacáiste ‘Oiriúnach do 55’ ón gCoimisiún an 14 Iúil 2021 maidir leis an gComhaontú Glas don Eoraip a bhaint amach,

—

ag féachaint do phacáiste soghluaisteachta uirbí 2013 agus don mheastóireacht air (SWD(2021)0048),

—

ag féachaint do Rialachán (AE) 2021/1153 ó Pharlaimint na hEorpa agus ón gComhairle an 7 Iúil 2021 lena mbunaítear an tSaoráid um Chónascadh na hEorpa (1),

—

ag féachaint do Rialachán (AE) 2021/1060 ó Pharlaimint na hEorpa agus ón gComhairle an 24 Meitheamh 2021 lena leagtar síos forálacha coiteanna maidir le Ciste Forbraíochta Réigiúnaí na hEorpa, Ciste Sóisialta na hEorpa Plus, an Ciste Comhtháthaithe, an Ciste um Aistriú Cóir agus an Ciste Eorpach Muirí, Iascaigh agus Dobharshaothraithe agus rialacha airgeadais maidir leis na cistí sin agus maidir leis an gCiste um Thearmann, Imirce agus Lánpháirtíocht, an Ciste Slándála Inmheánaí agus an Ionstraim um Bainistiú Teorainneacha agus um Víosaí (2) (Rialachán na bhForálacha Coiteanna),

—

ag féachaint do Rialachán (AE) 2021/1058 ó Pharlaimint na hEorpa agus ón gComhairle an 24 Meitheamh 2021 maidir le Ciste Forbraíochta Réigiúnaí na hEorpa agus maidir leis an gCiste Comhtháthaithe (3),

—

ag féachaint do Rialachán (AE) 2021/1059 ó Pharlaimint na hEorpa agus ón gComhairle an 24 Meitheamh 2021 maidir le forálacha sonracha le haghaidh sprioc an chomhair chríochaigh Eorpaigh (Interreg) arna dtacú ag Ciste Forbraíochta Réigiúnaí na hEorpa agus ionstraimí maoinithe sheachtraigh (4),

—

ag féachaint do Threoir (AE) 2021/241 ó Pharlaimint na hEorpa agus ón gComhairle an 12 Feabhra 2021 lena mbunaítear an tSaoráid Téarnaimh agus Athléimneachta (5),

—

ag féachaint do Threoir (AE) 2019/1161 ó Pharlaimint na hEorpa agus ón gComhairle an 20 Meitheamh 2019 lena leasaítear Treoir 2009/33/CE a mhéid a bhaineann le feithiclí iompair de bhóthar atá glan agus éifeachtúil ó thaobh fuinnimh de a chur chun cinn (6),

—

ag féachaint do Rialachán (AE) 2016/2338 ó Pharlaimint na hEorpa agus ón gComhairle an 14 Nollaig 2016 lena leasaítear Rialachán (CE) Uimh. 1370/2007 a mhéid a bhaineann leis an margadh do sheirbhísí intíre iompair do phaisinéirí d’iarnród a oscailt (7);

—

ag féachaint don Chlár don Eoraip Dhigiteach,

—

ag féachaint don teachtaireacht ón gCoimisiún an 30 Meitheamh 2021 dar teideal A long-term Vision for the EU’s Rural Areas – Towards stronger, connected, resilient and prosperous rural areas by 2040 [Fís fhadtéarmach le haghaidh cheantair thuaithe an Aontais Eorpaigh – i dtreo ceantair thuaithe níos láidre, nasctha, athléimneacha agus rathúla faoi 2040] (COM(2021)0345),

—

ag féachaint do theachtaireacht ón gCoimisiún an 3 Márta 2021 dar teideal ‘Aontas an Chomhionannais: Straitéis maidir le Cearta Daoine faoi Mhíchumas 2021-2030’ (COM(2021)0101),

—

ag féachaint do theachtaireacht ón gCoimisiún an 3 Bealtaine 2022 dar teideal Putting people first, securing sustainable and inclusive growth, unlocking the potential of the EU’s outermost regions [Tús áite a thabhairt do dhaoine, fás inbhuanaithe cuimsitheach a áirithiú, leas a bhaint as acmhainneacht na réigiún is forimeallaí san Aontas] (COM(2022)0198),

—

ag féachaint do Chairt Nua Leipzig maidir le cumhacht chlaochlaitheach na gcathracha ar mhaithe leis an leas coiteann, a glacadh ag na Cruinnithe Aireachta Neamhfhoirmiúla an 30 Samhain 2020,

—

ag féachaint do Chomhshocrú Amstardam lena mbunaítear an Clár Oibre Uirbeach do AE a comhaontaíodh ag airí AE atá freagrach as cúrsaí uirbeacha an 30 Bealtaine 2016,

—

ag féachaint do Chlár Oibre 2030 na Náisiún Aontaithe don Fhorbairt Inbhuanaithe, go háirithe Sprioc Forbartha Inbhuanaithe 11 maidir le cathracha agus pobail inbhuanaithe,

—

ag féachaint do rún uaithi an 15 Feabhra 2022 ar na dúshláin do limistéir uirbeacha i ré iar-COVID-19 (8),

—

ag féachaint dá rún an 6 Deireadh Fómhair 2021 maidir le Creat Beartais an Aontais um Shábháilteacht ar Bhóithre 2021-2030 – Moltaí maidir leis na chéad chéimeanna eile i dtreo ‘Fís Nialais’  (9),

—

ag féachaint do rún uaithi an 3 Iúil 2018 maidir le ról cathracha i gcreat institiúideach an Aontais (10),

—

ag féachaint do rún uaithi an 13 Márta 2018 maidir le ról réigiúin agus chathracha AE i gcur chun feidhme Chomhaontú Pháras COP 21 maidir leis an athrú aeráide (11),

—

ag féachaint do rún uaithi an 9 Meán Fómhair 2015 maidir leis an ngné uirbeach de bheartais AE (12),

—

ag féachaint do Riail 54 dá Rialacha Nós Imeachta,

—

ag féachaint don tuairim ó Choiste na Réigiún ar ‘Creat nua don tSoghluaisteacht Uirbeach’  (13),

—

ag féachaint don tuairim ón gCoiste um Fhorbairt Réigiúnach,

—

ag féachaint don tuarascáil ón gCoiste um Iompar agus um Thurasóireacht (A9-0108/2023),

A.

de bhrí go n-áirítear le grúpaí a bhfuil riachtanais speisialta acu daoine faoi mhíchumas, daoine a bhfuil a soghluaisteacht laghdaithe, daoine scothaosta, mná, leanaí nó daoine a bhfuil leanaí in éineacht leo a dhéanann a gceart chun soghluaisteachta, chun staidéir, chun spraoi agus chun obair a dhéanamh a fheidhmiú go hiomlán;

B.

de bhrí go gciallaíonn iompar poiblí seirbhísí traidisiúnta amhail gréasáin iarnróid, meitreo, tram nó bus;

C.

de bhrí go gciallaíonn iompar comhchoiteann iompar poiblí agus seirbhísí nua atá bunaithe ar chomhroinnt, ar éileamh, ar shamhlacha gnó nua solúbtha agus ar shoghluaisteacht eile ina n-iompraítear níos mó paisinéirí i dteannta a chéile;

D.

de bhrí go gcuimsíonn micrea-shoghluaisteacht feistí soghluaisteachta pearsanta a chumhachtaítear go leictreach agus go neamhleictreach amhail rothair, rothair leictreacha, scútair leictreacha, gluaischothromáin, aonrothaigh agus gléasanna soghluaisteachta pearsanta eile

E.

de bhrí go n-áirítear le soghluaisteacht ghníomhach iompar daoine nó earraí araon ar féidir í a chumhachtú trí ghníomhaíocht choirp an duine nó trí mheascán de mhótar leictreach agus de chumhacht an duine, amhail i gcás r-rothar;

F.

de bhrí go bhfuil sé d’aidhm ag an togra ón gCoimisiún maidir leis an ngréasán tras-Eorpach iompair (TEN-T) gréasán iompair inbhuanaithe, éifeachtach, inrochtana agus ilmhódach ar fud AE a thógáil, lena n-áirítear pleananna soghluaisteachta uirbí inbhuanaithe (SUMP) a fhorbairt do chathracha;

G.

de bhrí go ndearbhaítear i gCreat Soghluaisteachta Uirbí AE arna mholadh ag an gCoimisiún gur cheart tosaíocht a thabhairt ar an leibhéal náisiúnta agus ar an leibhéal áitiúil maidir le hiompar comhchoiteann a fhorbairt, go háirithe iompar poiblí, agus soghluaisteacht ghníomhach agus iad a chur i gcroílár na n-iarrachtaí chun soghluaisteacht uirbeach inbhuanaithe a bhaint amach;

H.

de bhrí nach mór d’aon chreat soghluaisteachta uirbí díriú ar leasanna poiblí, freastal ar riachtanais daoine agus tacú le forbairt eacnamaíoch agus shóisialta na mBallstát ionas go ndéanfar soghluaisteacht uirbeach a phleanáil agus a chomhtháthú le brainsí éagsúla an gheilleagair agus go mbeidh sé dírithe ar iompraíocht chomhchoiteann a athrú chun cathracha níos inbhuanaithe a thógáil le cáilíocht saoil níos fearr trí réitigh iompair éagsúla atá inacmhainne, inrochtana, éifeachtúil, cliste agus inbhuanaithe;

I.

de bhrí gur thug an Ghníomhaireacht Eorpach Comhshaoil rabhadh gur tháinig méadú ar astaíochtaí iompair idir 2013 agus 2019 agus cé is moite de laghdú in 2020 mar gheall ar dhianghlasáil a tugadh isteach mar fhreagairt ar phaindéim COVID-19, meastar go dtiocfaidh fás ar astaíochtaí iompair fós;

J.

de bhrí go gcuireann ganntanais foirne agus neamhshláine post inbhuanaitheacht eacnamaíoch na hearnála iompair agus, dá bhrí sin, inbhuanaitheacht eacnamaíoch na gcreataí soghluaisteachta uirbí i mbaol;

K.

de bhrí go mbraitheann eagrúchán an iompair sa chathair ar an idirghníomhaíocht leis an timpeallacht;

L.

de bhrí go gcuirfidh an Clár Réime Fís Eorpach EUR 359,3 milliún ar fáil le linn na tréimhse 2021-2023 dá mhisean maidir le cathracha atá aeráidneodrach agus cliste, arb é is aidhm dóibh 100 cathair aeráidneodrach a bhaint amach in AE faoi 2030 (14); de bhrí go dtabharfar aghaidh, inter alia, ar phleanáil uirbeach ghlas leis na gníomhaíochtaí taighde agus nuálaíochta arna moladh ag an gCoimisiún chun an cuspóir sin a bhaint amach;

M.

de bhrí gurb ionann costas iomlán an iompair don tsochaí agus EUR 987 mbilliún in aghaidh na bliana; de bhrí gur féidir an figiúr sin a mhiondealú i gcostais chomhshaoil (44 %), timpistí (29 %) agus costais brú tráchta (27 %); de bhrí gurb ionann carranna príobháideacha agus EUR 565 billiún de na costais sin ach go gcumhdaíonn muirir ó chánacha i dtéarmaí breosla agus úinéireachta, agus dolaí, díreach faoi bhun leath de na costais sin (EUR 267 billiún) a léiríonn go bhfuil costais sheachtracha an iompair fós le hinmheánú go hiomlán; de bhrí go ndéanann na seachtrachtaí diúltacha sin difear díréireach dóibh siúd ar ioncam níos ísle (15);

N.

de bhrí go dtarlaíonn 75 % d’astaíochtaí iomlána CO2 i gcathracha (16), go dtagann thart ar 23 % d’astaíochtaí iompair AE ó cheantair uirbeacha, go bhfuil cónaí ar 70 % de shaoránaigh AE i gcathracha sa lá atá inniu ann, agus go meastar go sroichfidh an sciar beagnach 84 % in 2050, ionas go mbeidh ról tábhachtach ag cathracha maidir le rannchuidiú le cuspóirí an Chomhaontaithe Ghlais;

O.

de bhrí go gcosnaíonn brú tráchta thart ar EUR 270 billiún in aghaidh na bliana ar AE agus, dá bhrí sin, go bhfuil sé ar cheann de na dúshláin is mó atá roimh an tsoghluaisteacht uirbeach, le truailliú aeir, truailliú torainn agus teas uirbeach a dhéanann difear d’fhormhór mhuintir na hEorpa;

P.

de bhrí gur cheart go n-éascódh an t-athbhreithniú ar an Treoir maidir le Feidhmíocht Fuinnimh Foirgneamh (16) dul chun cinn na mBallstát i dtreo an aistrithe ghlais trí fhorálacha maidir le feidhmiú céimneach bonneagair leictrea-shoghluaisteachta, lena n-áirítear pointí athluchtaithe a imscaradh níos tapúla, agus forálacha maidir le spásanna páirceála do rothair;

Q.

de bhrí go bhfuil an leictrea-shoghluaisteacht ag céimeanna éagsúla forbartha faoi láthair sna Ballstáit agus sna réigiúin ar fud AE, gur cheart díolúintí agus solúbthacht shonrach a chur i bhfeidhm chun go bhféadfaidh na Ballstáit agus na réigiúin a bhfuil margadh leictrea-shoghluaisteachta beagfhorbartha acu dul chun cinn a dhéanamh i dtreo an aistrithe ghlais; de bhrí gur cheart aird ar leith a thabhairt chun a áirithiú go sásóidh acmhainneacht na heangaí fuinnimh na héilimh fuinnimh atá ann faoi láthair agus a bheidh ann amach anseo a bhaineann le feithiclí leictreacha agus go gcuirfear san áireamh cúlchistí pleanála do chumhacht nasctha eangaí;

R.

de bhrí go bhfuil ardú gan fasach tagtha ar phraghsanna ola le roinnt míonna anuas agus nach léir an treocht a bheidh ann amach anseo; de bhrí go bhfuil sé ríthábhachtach tomhaltas breoslaí iontaise a laghdú; de bhrí, de réir na Gníomhaireachta Idirnáisiúnta Fuinnimh, gur beart éifeachtach é an luas a laghdú chun é sin a bhaint amach;

S.

de bhrí go bhfostaíonn an t-iompar poiblí dhá mhilliún duine i bpoist áitiúla shlána i bpobail ar fud AE agus go gcuireann sé raon conairí gairme agus deiseanna fostaíochta ar fáil le baill foirne a thagann ó go leor cúlraí éagsúla; de bhrí, le linn na paindéime, gur ghá sciar suntasach den fhoireann sin dul ar scor sealadach agus gur chinn go leor acu an earnáil a fhágáil, go háirithe sna Ballstáit a bhfuil sochair slándála sóisialta ísle agus cumhdach cómhargála lag acu;

T.

de bhrí gur tháinig laghdú ar sheirbhísí iompair le déanaí mar thoradh ar ghanntanas lucht saothair san iompar poiblí, lena n-áirítear cealú seirbhísí oíche agus deireadh seachtaine, agus laghdú ar bhealaí; de bhrí go raibh tionchar diúltach aige sin ar shoghluaisteacht chuimsitheach, ag bagairt ar chomhtháthú sóisialta agus rochtain ar phoist, ar oideachas agus ar chúram sláinte do na húsáideoirí is leochailí a bhíonn ag brath go hiomlán ar iompar poiblí le haghaidh a soghluaisteachta; de bhrí go bhfuil bochtaineacht soghluaisteachta ag dul i méid ar fud AE;

U.

de bhrí go bhfuil gluaiseacht éifeachtúil daoine, seirbhísí agus earraí, lena n-áirítear iompar agus lóistíocht lastais cathrach, bunriachtanach d’fheidhmiú na ngeilleagar uirbeach agus do réitigh nuálacha agus dea-chleachtais ar fud chathracha AE, de bhrí gur féidir ról tábhachtach a bheith ag pleananna lóistíochta uirbeacha inbhuanaithe, i bhfianaise an mhéadaithe ar mhéideanna iompair lastais agus lóistíochta;

V.

de bhrí gur tháinig méadú 25 % ar sheachadtaí ríomhthráchtála tomhaltóirí in 2020 mar thoradh ar an bpaindéim, agus gur dócha go leanfaidh an méadú ar sheachadtaí an mhíle deiridh, agus a thionchar ar cheantair uirbeacha de bheith ann;

W.

de bhrí gurb ionann taisteal de chóiste agus 40 % de ghníomhaíocht chomhchoiteann iompair de bhóthar AE;

X.

de bhrí go bhfuil an tsoghluaisteacht ríthábhachtach agus fíor-riachtanach le haghaidh cuimsiú socheacnamaíoch agus toisc chinntitheach struchtúrach i bhforbairt sochaithe agus an cumas daoine aonair, pobail, earnálacha táirgiúla agus seirbhísí, agus réigiúin agus cultúir éagsúla a nascadh, agus i gcur chun cinn an chomhtháthaithe chríochaigh agus shóisialta, an dinimicis eacnamaíoch, agus na cáilíochta agus na cothromaíochta comhshaoil;

Y.

de bhrí gur cheart do bheartais iompair uirbeacha aistriú ó shoghluaisteacht a sholáthar go rochtain ar an tseirbhís a áirithiú, agus tosaíocht níos mó a thabhairt do chách ar rochtain inacmhainne, beag beann ar ioncam, aois, sláinte nó suíomh (e.g. uirbeach, peirea-uirbeach nó tuaithe);

Z.

de bhrí gur gá iompar comhchoiteann agus iompar poiblí go háirithe, lena n-áirítear sna bruachbhailte, a fhorfheidhmiú i dtéarmaí méadú acmhainneachta, cumhdach geografach, minicíochtaí agus inacmhainneacht;

AA.

de bhrí nach mór rochtain a bheith ag gach saoránach ar chórais iompair phoiblí, go háirithe d’úsáideoirí ó ghrúpaí a bhfuil riachtanais speisialta acu;

AB.

de bhrí go bhfuil bearta déanta ag cathracha agus Ballstáit éagsúla AE mar fhreagairt ar an ngéarchéim fuinnimh atá ann faoi láthair amhail praghas na dticéad le haghaidh iompar poiblí a ísliú;

AC.

de bhrí go ndéantar na seirbhísí traidisiúnta iompair phoiblí a chomhlánú trí sheirbhísí nua atá bunaithe ar sheirbhísí soghluaisteachta samhlacha nua comhroinnte, ar éileamh agus solúbtha; de bhrí go rannchuidíonn na seirbhísí sin le hastaíochtaí carbóin a laghdú, cáilíocht an aeir a fheabhsú agus torann agus plódú a laghdú, ganntanais áiteanna páirceála i limistéir uirbeacha a mhaolú agus nascacht le ceantair fho-uirbeacha, pheirea-uirbeacha agus thuaithe a fheabhsú;

AD.

de bhrí gur féidir le réitigh ilmhódacha éifeachtacha lena gcomhcheanglaítear réitigh iompair éagsúla amhail iompar comhchoiteann, soghluaisteacht aonair agus soghluaisteacht ghníomhach, in éineacht leis an mbonneagar is gá, lena n-áirítear moil shoghluaisteachta, cabhrú le feabhas a chur ar cháilíocht agus ar éifeachtacht infheistíochtaí i dtimpeallacht uirbeach, agus tairbhí foriomlána do cháilíocht saoil daoine á n-áirithiú ag an am céanna; de bhrí gur cheart don Choimisiún pacáiste ilmhódach a mholadh ina leith sin;

AE.

de bhrí go bhfuil COVID-19 tar éis cur leis na dúshláin atá roimh chórais soghluaisteachta uirbí, ach go bhfuil sé ina chatalaíoch freisin chun iad a dhéanamh níos athléimní, níos cliste, níos sábháilte, níos inbhuanaithe agus níos inrochtana, agus go bhfuil go leor cathracha ar fud na hEorpa ag cur dlús le cur chun feidhme a bpleananna soghluaisteachta le linn na paindéime agus bearta a thabhairt isteach chun scaradh sóisialta a éascú a bhí i bhfabhar soghluaisteacht ghníomhach, as a n-eascróidh méadú mór ar shiúl agus rothaíochta agus cur chun feidhme bonneagair rothaíochta;

AF.

de bhrí go bhfuil na rialacha agus na ceanglais maidir le soghluaisteacht ghníomhach, micrea-shoghluaisteacht, agus cineálacha nua soghluaisteachta astaíochtaí nialasacha agus ísle fós ag na céimeanna luatha nó go bhfuil siad éagsúil ó Bhallstát amháin go Ballstát eile, rud a bhfuil tionchar suntasach aige ar shábháilteacht na saoránach agus a bhfuil deiseanna caillte d’úsáideoirí i mBallstáit éagsúla agus éiginnteacht d’oibreoirí mar thoradh air freisin;

AG.

de bhrí go bhfuil acmhainneacht shuntasach ag an tsoghluaisteacht ghníomhach rannchuidiú leis na fadhbanna a bhaineann le ceantair uirbeacha a shárú, cáilíocht an aeir a fheabhsú, brú tráchta a laghdú agus sláinte an duine aonair a fheabhsú;

AH.

de bhrí go bhféadfadh tairbhí suntasacha a bheith ag baint le soghluaisteacht ilmhódach fheabhsaithe agus saoráidí bonneagair chliste, lena n-áirítear iarnróid, réitigh roinnte carranna, agus bonneagar soghluaisteachta cliste don turasóireacht agus don fháilteachas agus don bhonneagar cóiríochta sa timpeallacht uirbeach;

AI.

de bhrí go measann an Ghníomhaireacht Eorpach Chomhshaoil (EEA) go raibh neamhchosaint fhadtéarmach ar ábhar cáithníneach le trastomhas 2,5 miocrón nó níos lú (PM 2,5) san Eoraip ina chúis le tuairim is 417 000 bás anabaí in 2018, a raibh thart ar 379 000 díobh in AE-28; de bhrí go bhfuil tairseacha AE i bhfad os cionn threoirlínte EDS maidir le formhór na dtruailleán, agus gur cúis imní ar leith í an easpa teorann laethúil do PM2,5; de bhrí, cosúil le COVID-19, gur éigeandáil sláinte poiblí é sin a éilíonn gníomhaíocht láithreach;

AJ.

de bhrí gur fhoilsigh an Coimisiún Treoir Topaicí maidir le SUMPanna lena ndírítear go sonrach ar shábháilteacht ar bhóithre agus ar mhicrea-shoghluaisteacht i bpróiseas pleanála agus cur chun feidhme SUMP;

AK.

de bhrí nach bhfuil ach feabhsuithe teoranta ann ó thaobh cuspóirí sábháilteachta ar bhóithre a bhaint amach in AE le blianta beaga anuas agus go gcailleann thart ar 22 600 duine a mbeatha ar bhóithre AE gach bliain agus go ngortaítear thart ar 120 000 duine go dona; de bhrí go dtarlaíonn 39 % de na básanna ar bhóithre in AE i gceantair uirbeacha agus nár baineadh amach sprioc AE líon na mbásanna ar bhóithre a laghdú faoina leath idir 2010 agus 2020;

AL.

de bhrí gurb iad úsáideoirí soghonta bóithre amhail coisithe, rothaí agus úsáideoirí dé-rothaigh chumhachtaithe na daoine is mó atá i mbaol agus gurb ionann iad agus thart ar 70 % de líon iomlán na mbásanna i gceantair uirbeacha;

AM.

de bhrí go bhféadfadh dea-chleachtais agus dreasachtaí amhail teorainneacha luais agus oiliúint speisialta do thiománaithe cabhrú le líon na dtionóiscí tromchúiseacha agus na mbásanna a laghdú;

AN.

de bhrí gur cúis mhór imní é líon na dtionóiscí a bhaineann le rothaíocht agus cineálacha eile soghluaisteachta gníomhaí agus micreaghníomhaí; de bhrí go bhfuil gá le hiarrachtaí breise ar leibhéal AE agus ar an leibhéal náisiúnta chun sprioc AE a chumhdaítear i gcuspóirí ‘Fís Nialais’ a bhaint amach chun cosaint na n-úsáideoirí uile a fheabhsú;

AO.

de bhrí go bhfuil ról ríthábhachtach ag inrochtaineacht uirbeach maidir le grúpaí a bhfuil riachtanais speisialta acu, amhail daoine faoi mhíchumas, daoine a bhfuil a soghluaisteacht laghdaithe, daoine scothaosta nó daoine a bhfuil leanaí in éineacht leo a chumasú chun a gceart chun soghluaisteachta agus chun staidéar agus obair a dhéanamh a fheidhmiú go hiomlán;

AP.

de bhrí go bhféadfadh úsáid na hintleachta saorga (IS) sa tsoghluaisteacht uirbeach feabhas suntasach a chur ar shábháilteacht, slándáil agus éifeachtúlacht, cuimsiú grúpaí leochaileacha a fheabhsú, brú tráchta a laghdú, truailliú aeir agus torainn a laghdú, costais a laghdú agus an earnáil iompair a dhícharbónú;

AQ.

de bhrí gur príomhphrionsabail iad coimhdeacht agus comhréireacht lena rialaítear feidhmiú inniúlachtaí AE agus gur cheart, dá bhrí sin, iad a urramú i gcónaí agus i réimsí beartais uile AE;

AR.

de bhrí gur cheart don tsoghluaisteacht agus don iompar daoine a tharraingt isteach i limistéir agus amach astu, chun úsáid agus forbairt, lena n-áirítear don turasóireacht, a chumasú do thurasóirí nó do limistéar eacnamaíoch atá suite timpeall ar mhórchathrach amháin nó níos mó;