Tuarascáil Deiridh an Oifigigh Éisteachta (1)

Cás AT.40522 — Metal Packaging

(2023/C 57/05)

Baineann an dréachtchinneadh seo, a dhírítear ar “Crown” (2) agus “Siligan” (3) (“na Páirtithe” i dteannta a chéile) le sárú aonair leanúnach ar Airteagal 101 CFAE i margadh na Gearmáine le haghaidh pacáistíocht mhiotail, sárú a mhair ón 11 Márta 2011 go dtí an 18 Meán Fómhair 2014. Is éard a bhí sa sárú atá i gceist (i) malartuithe faisnéise déthaobhacha tráthrialta faoi na figiúirí díolacháin bliantúla is déanaí maidir le custaiméirí na bPáirtithe sa Ghearmáin ar an margadh le haghaidh dúntóirí miotail (4); agus (ii) malartuithe faisnéise agus comhordaithe maidir le formhuirir agus giorrú na ndátaí is fearr roimh ré le haghaidh cannaí miotail (5) agus dúntóirí miotail atá brataithe le laicir nua saor ó Bhisfeanól A, rud a sholáthraíonn na Páirtithe do chustaiméirí sa Ghearmáin.

An 19 Aibreán 2018, chuir an Coimisiún tús le himeachtaí de bhun Airteagal 2(1) de Rialachán (CE) Uimh. 773/2004 (6) in aghaidh Crown Holdings Inc., Crown Cork & Seal Deutschland Holdings GmbH, agus Silgan Holdings Inc (7).

Tar éis caibidlíocht socraíochta (8) agus aighneachtaí socraíochta (9) i gcomhréir le hAirteagal 10a(2) de Rialachán (CE) Uimh. 773/2004 ón gCoimisiún, ghlac an Coimisiún ráiteas agóidí (an “Ráiteas Agóidí”) a díríodh chuig na Páirtithe an 19 Bealtaine 2022.

Sna freagraí faoi seach a thug siad ar an Ráiteas Agóidí, dheimhnigh na Páirtithe Socraíochta de bhun Airteagal 10a(3) de Rialachán (CE) Uimh. 773/2004 gur léirigh an Ráiteas Agóidí ábhar a n-aighneachtaí socraíochta agus dá bhrí sin go raibh siad tiomanta fós cloí leis an nós imeachta socraíochta.

De bhun Airteagal 16 de Chinneadh 2011/695/AE, tá scrúdú déanta agam an mbaineann an dréachtchinneadh le hagóidí amháin a bhfuil an deis tugtha do na Páirtithe a gcuid tuairimí a chur in iúl ina leith. Is é mo chonclúid gurb amhlaidh atá sé.

I bhfianaise an mhéid thuas, agus é á chur san áireamh nár chuir na Páirtithe iarraidh ná aon ghearán os mo chomhair de bhun Airteagal 15(2) de Chinneadh 2011/695/AE (10), measaim gur urramaíodh feidhmiú éifeachtach chearta nós imeachta na bPáirtithe sna himeachtaí sa chás seo.

(1)  De bhun Airteagail 16 agus 17 de Chinneadh 2011/695/AE ó Uachtarán an Choimisiúin Eorpaigh an 13 Deireadh Fómhair 2011 maidir le feidhm agus téarmaí tagartha an oifigigh éisteachta in imeachtaí iomaíochta áirithe (IO L 275, 20.10.2011, lch. 29).

(2)  Is iad Crown Holdings Inc. agus Crown Cork & Seal Deutschland Holdings GmbH na heintitis dhlíthiúla ábhartha.

(3)  Is iad Silgan White Cap Manufacturing GmbH, Silgan Metal Packaging Distribution GmbH, Silgan Holdings Austria GmbH, Silgan International Holdings B.V. agus Silgan Holdings Inc. na heintitis dhlíthiúla ábhartha (agus is é an ceann deiridh máthairchuideachta deiridh na n-eintiteas dlítheanach thuas uile).

(4)  Mar atá, scriúchlaibíní a úsáidtear chun prócaí agus buidéil ghloine a dhúnadh nó a shéalú, prócaí agus buidéil atá le líonadh le bia-ábhair (sholadacha nó leachtacha) lena n-ithe ag an duine nó ag peataí, trí bhíthin meicníocht casghlasála.

(5)  Go háirithe, cannaí miotail atá brataithe le laicir atá saor ó Bhisfeanól A atá á n-úsáid ag monaróirí bia, cannaí a líonfar le bia-ábhair (sholadacha nó leachtacha) lena n-ithe ag an duine nó ag peataí.

(6)  Rialachán (CE) Uimh. 773/2004 ón gCoimisiún an 7 Aibreán 2004 maidir le himeachtaí a bheith á seoladh ag an gCoimisiún de bhun Airteagail 81 agus 82 de Chonradh CE (IO L 123, 27.4.2004, lch. 18).

(7)  Le cinneadh a glacadh an 1 Deireadh Fómhair 2021, cuireadh deireadh leis na himeachtaí in aghaidh na n-eintiteas dlítheanach maidir le críocha uile LEE, cé is moite den Ghearmáin. Thairis sin, an 18 Márta 2022, thionscain an Coimisiún imeachtaí i gcoinne na gceithre fhochuideachta de chuid Silgan Holdings Inc. dá dtagraítear thuas (féach fonóta 3), a mhéid a bhaineann leis an nGearmáin.

(8)  Bhí na cruinnithe socraíochta ar siúl idir mí na Bealtaine 2021 agus mí an Mhárta 2022.

(9)  Chuir na páirtithe a n-iarratais fhoirmiúla ar shocraíocht isteach idir […].

(10)  Faoi Airteagal 15(2) de Chinneadh 2011/695/AE, féadfaidh na páirtithe sna himeachtaí i gcásanna cairtéil a ghabhann do phlé socraíochta de bhun Airteagal 10a de Rialachán (CE) Uimh. 773/2004, féadfaidh siad iarraidh ar an oifigeach éisteachta ag céim ar bith le linn an nós imeachta socraíochta chun feidhmiú éifeachtach a gceart nós imeachta a áirithiú. Féach freisin mír 18 d’Fhógra ón gCoimisiún maidir le nósanna imeachta socraíochta a reáchtáil d’fhonn Cinntí a ghlacadh de bhun Airteagal 7 agus Airteagal 23 de Rialachán (CE) Uimh. 1/2003 ón gComhairle i gcásanna cairtéil (IO C 167, 2.7.2008, lch. 1).