52022IP0037

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
EUR-Lex - 52022IP0037 - EN

Help

Search tips

Need more search options? Use the Advanced search

Document 52022IP0037

Rún ó Pharlaimint na hEorpa an 16 Feabhra 2022 maidir le cur chun feidhme Threoir 2009/48/CE ó Pharlaimint na hEorpa agus ón gComhairle maidir le sábháilteacht bréagán (Treoir maidir le Sábháilteacht Bréagán) (2021/2040(INI))

IO C 342, 6.9.2022, p. 99–108 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
IO C 342, 6.9.2022, p. 88–97 (GA)

HTML

PDF

Official Journal

6.9.2022

Iris Oifigiúil an Aontais Eorpaigh

C 342/88

P9_TA(2022)0037

Cur chun feidhme na Treorach maidir le Sábháilteacht Bréagán

(2022/C 342/11)

Tá Parlaimint na hEorpa,

—	ag féachaint do Threoir 2009/48/CE ó Pharlaimint na hEorpa agus ón gComhairle an 18 Meitheamh 2009 maidir le sábháilteacht bréagán (1) (an Treoir maidir le Sábháilteacht Bréagán),

—	ag féachaint do mheasúnú an Choimisiúin an 19 Samhain 2020 ar Threoir 2009/48/CE ó Pharlaimint na hEorpa agus ón gComhairle maidir le sábháilteacht bréagán (SWD(2020)0287),

—	ag féachaint do Threoir 2001/95/CE ó Pharlaimint na hEorpa agus ón gComhairle an 3 Nollaig 2001 maidir le sábháilteacht táirgí go ginearálta (2) (GPSD),

—	ag féachaint do Rialachán (CE) Uimh. 765/2008 ó Pharlaimint na hEorpa agus ón gComhairle an 9 Iúil 2008 lena leagtar amach na ceanglais maidir le creidiúnú agus maidir le faireachas margaidh a bhaineann le táirgí a mhargú, agus lena n-aisghairtear Rialachán (CEE) Uimh. 339/93 (3),

—	ag féachaint do Chinneadh Uimh. 768/2008/CE ó Pharlaimint na hEorpa agus ón gComhairle an 9 Iúil 2008 maidir le creat comhchoiteann chun táirgí a mhargú, agus lena n-aisghairtear Cinneadh 93/465/CEE ón gComhairle (4),

—

ag féachaint do Rialachán (AE) Uimh. 1025/2012 ó Pharlaimint na hEorpa agus ón gComhairle an 25 Deireadh Fómhair 2012 maidir le caighdeánú Eorpach, lena leasaítear Treoir 89/686/CEE agus Treoir 93/15/CEE ón gComhairle agus Treoracha 94/9/CE, 94/25/CE, 95/16/CE, 97/23/CE, 98/34/CE, 2004/22/CE, 2007/23/CE, 2009/23/CE agus 2009/105/CE ó Pharlaimint na hEorpa agus ón gComhairle agus lena n-aisghairtear Cinneadh 87/95/CEE ón gComhairle agus Cinneadh Uimh. 1673/2006/CE ó Pharlaimint na hEorpa agus ón gComhairle (5),

—	ag féachaint do Rialachán (AE) 2019/1020 ó Pharlaimint na hEorpa agus ón gComhairle an 20 Meitheamh 2019 maidir le faireachas margaidh ar tháirgí agus comhlíonadh táirgí agus lena leasaítear Treoir 2004/42/CE agus Rialacháin (CE) Uimh. 765/2008 agus (AE) Uimh. 305/2011 (6),

—

ag féachaint do Rialachán (AE) 2019/881 ó Pharlaimint na hEorpa agus ón gComhairle an 17 Aibreán 2019 maidir le ENISA (Gníomhaireacht an Aontais Eorpaigh um Chibearshlándáil) agus maidir le deimhniú i ndáil le cibearshlándáil theicneolaíocht na faisnéise agus na cumarsáide agus lena n-aisghairtear Rialachán (AE) Uimh. 526/2013 (an Gníomh um Chibearshlándáil) (7),

—

ag féachaint do Rialachán (AE) 2021/690 ó Pharlaimint na hEorpa agus ón gComhairle an 28 Aibreán 2021 mbunaítear an Clár don mhargadh inmheánach, d’iomaíochas fiontar, lena n-áirítear fiontair bheaga agus mheánmhéide, do réimse na bplandaí, na n-ainmhithe, an bhia agus na beatha, agus don staidreamh Eorpach (Clár an Mhargaidh Aonair) agus lena n-aisghairtear Rialacháin (AE) Uimh. 99/2013, (AE) Uimh. 1287/2013, (AE) Uimh. 254/2014, (AE) Uimh. 652/2014 (8),

—

ag féachaint do Rialachán (CE) Uimh. 1907/2006 ó Pharlaimint na hEorpa agus ón gComhairle an 18 Nollaig 2006 maidir le Clárú, Meastóireacht, Údarú agus Srianadh Ceimiceán (REACH) agus lena gcruthaítear Gníomhaireacht Eorpach Ceimiceán, lena leasaítear Treoir 1999/45/CE agus lena n-aisghairtear Rialachán (CEE) Uimh. 793/93 ón gComhairle agus Rialachán (CE) Uimh. 1488/94 ón gCoimisiún chomh maith le Treoir 76/769/CEE ón gComhairle agus Treoracha 91/155/CEE, 93/67/CEE, 93/105/CE agus 2000/21/CE ón gCoimisiún (9),

—	ag féachaint do Rialachán (CE) Uimh. 1223/2009 ó Pharlaimint na hEorpa agus ón gComhairle an 30 Samhain 2009 maidir le táirgí cosmaideacha (10),

—

ag féachaint do Rialachán (CE) Uimh. 1272/2008 ó Pharlaimint na hEorpa agus ón gComhairle an 16 Nollaig 2008 maidir le haicmiú, lipéadú agus pacáistiú substaintí agus meascán, agus lena leasaítear agus lena n-aisghairtear Treoir 67/548/CEE agus Treoir 1999/45/CE, agus lena leasaítear Rialachán (CE) Uimh. 1907/2006 (11),

—	ag féachaint do Threoir 2014/53/AE ó Pharlaimint na hEorpa agus ón gComhairle an 16 Aibreán 2014 maidir le comhfhogasú dhlíthe na mBallstát a bhaineann le trealamh raidió a chur ar fáil ar an margadh agus lena n-aisghairtear Treoir 1999/5/CE (12),

—

ag féachaint do Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (an Rialachán Ginearálta maidir le Cosaint Sonraí) (13),

—	ag féachaint do Threoir 85/374/CEE ón gComhairle an 25 Iúil 1985 maidir le comhfhogasú fhorálacha reachtaíochta, rialúcháin agus riaracháin na mBallstát a bhaineann le dliteanas i leith táirgí lochtacha (14) (an Treoir um Dhliteanas Táirgí),

—	ag féachaint do Threoir 2011/65/AE ó Pharlaimint na hEorpa agus ón gComhairle an 8 Meitheamh 2011 maidir le srian ar shubstaintí guaiseacha áirithe a úsáid i dtrealamh leictreach agus leictreonach (15) (Treoir RoHS),

—	ag féachaint do Rialachán (CE) Uimh. 1223/2009 ó Pharlaimint na hEorpa agus ón gComhairle an 30 Samhain 2009 maidir le táirgí cosmaideacha (16) (an Rialachán maidir le Cosmaidí),

—

ag féachaint do Rialachán (CE) Uimh. 1935/2004 ó Pharlaimint na hEorpa agus ón gComhairle an 27 Deireadh Fómhair 2004 maidir le hábhair agus nithe a bheartaítear a bheith i dtadhall le bia agus lena n-aisghairtear Treoracha 80/590/CEE agus 89/109/CEE (17) (an Rialacháin maidir le hÁbhair a Bhíonn i dTadhall le Bia),

—	ag féachaint do Threoir 2006/66/CE ó Pharlaimint na hEorpa agus ón gComhairle an 6 Meán Fómhair 2006 maidir le ceallraí agus taisc-cheallraí agus ceallraí dramhaíola agus taisc-cheallraí dramhaíola agus lena n-aisghairtear Treoir 91/157/CEE (18) (an Treoir maidir le Ceallraí),

—

ag féachaint do Rialachán (CE) Uimh. 1272/2008 ó Pharlaimint na hEorpa agus ón gComhairle an 16 Nollaig 2008 maidir le haicmiú, lipéadú agus pacáistiú substaintí agus meascán lena leasaítear agus lena n-aisghairtear Treoracha 67/548/CEE agus 1999/45/CE, agus lena leasaítear Rialachán (CE) Uimh. 1907/2006 (19) (“Rialachán CLP”),

—	ag féachaint do Rialachán (AE) 2019/1021 ó Pharlaimint na hEorpa agus ón gComhairle an 20 Meitheamh 2019 maidir le truailleáin orgánacha mharthanacha (20) (an Rialachán maidir le POPanna),

—	ag féachaint do rún uaithi an 25 Samhain 2020 maidir le sábháilteacht táirgí sa mhargadh aonair (21),

—	ag féachaint do rún uaithi an 25 Samhain 2020“I dtreo margadh aonair níos inbhuanaithe do ghnólachtaí agus do thomhaltóirí” (22),

—	ag féachaint do rún uaithi an 12 Feabhra 2020 maidir le próisis chinnteoireachta uathoibrithe: cosaint tomhaltóirí agus saorghluaiseacht earraí agus seirbhísí a áirithiú (23),

—	ag féachaint do rún uaithi an 12 Nollaig 2018 i ndáil leis an bPacáiste maidir leis an Margadh Aonair Digiteach (24),

—	ag féachaint do rún uaithi an 4 Iúil 2017 maidir le “Caighdeáin Eorpacha don 21ú aois” (25),

—	ag féachaint do rún uaithi an 4 Iúil 2017 maidir le saolré níos faide do tháirgí: buntáistí do thomhaltóirí agus do ghnólachtaí (26),

—	ag féachaint do rún uaithi an 26 Bealtaine 2016 i ndáil leis an bPacáiste maidir leis an Margadh Aonair Digiteach (27),

—	ag féachaint do rún uaithi an 20 Deireadh Fómhair 2020 ina bhfuil moltaí don Choimisiún maidir leis an nGníomh um Sheirbhísí Digiteacha: Feidhmiú an Mhargaidh Aonair a fheabhsú (28),

—	ag féachaint do rún uaithi an 20 Deireadh Fómhair 2020 ina bhfuil moltaí don Choimisiún faoi chuimsiú gnéithe eitice den intleacht shaorga, den róbataic agus de theicneolaíochtaí gaolmhara (29),

—	ag féachaint do rún uaithi an 18 Aibreán 2019 maidir le creat cuimsitheach de chuid an Aontais Eorpaigh maidir le suaiteoirí inchríneacha (30),

—	ag féachaint don rún uaithi an 10 Iúil 2020 maidir leis an Straitéis Ceimiceán don Inbhuanaitheacht (31),

—	ag féachaint d’fhaisnéisiú Sheirbhís Taighde Pharlaimint na hEorpa (EPRS) in Aibreán 2021 dar teideal “The EU Toy Safety Directive” (Treoir AE maidir le Sábháilteacht Bréagán’),

—	ag féachaint do thogra ón gCoimisiún le haghaidh rialachán ó Pharlaimint na hEorpa agus ón gComhairle maidir le Margadh Aonair do Sheirbhísí Digiteacha (an Ionstraim um Sheirbhísí Digiteacha) agus lena leasaítear Treoir 2000/31/CE (COM(2020)0825),

—

ag féachaint do thogra ón gCoimisiún le haghaidh Rialachán ó Pharlaimint na hEorpa agus ón gComhairle maidir le rialacha comhchuibhithe a leagan síos maidir leis an intleacht shaorga (an Gníomh maidir leis an Intleacht Shaorga) agus gníomhartha reachtacha áirithe de chuid an Aontais a leasú (COM(2021)0206),

—	ag féachaint do theachtaireacht ón gCoimisiún an 10 Márta 2020 maidir le plean gníomhaíochta fadtéarmach chun rialacha an mhargaidh aonair a chur chun feidhme agus a fhorfheidhmiú ar bhealach níos fearr (COM(2020)0094),

—	ag féachaint do theachtaireacht ón gCoimisiún an 14 Deireadh Fómhair 2020 dar teideal “Chemicals Strategy for Sustainability. Towards a Toxic-Free Environment” [Straitéis Ceimiceán don Inbhuanaitheacht – i dTreo Timpeallacht Saor ó Thocsainí] (COM(2020)0667),

—	ag féachaint do theachtaireacht ón gCoimisiún an 21 Aibreán 2021 dar teideal “Fostering a European approach to Artificial Intelligence” [Cur chuige Eorpach a chothú maidir leis an Intleacht Shaorga](COM(2021)0205),

—	ag féachaint do theachtaireacht ón gCoimisiún an 13 Samhain 2020 dar teideal “New Consumer Agenda – Strengthening consumer resilience for sustainable recovery” [“Straitéis Thionsclaíoch Nua don Eoraip – Athléimneacht thomhaltóirí a neartú ar mhaithe le téarnamh inbhuanaithe”] (COM(2020)0696),

—	ag féachaint do theachtaireacht ón gCoimisiún an 24 Márta 2021 maidir le straitéis de chuid an Aontais maidir le cearta an linbh (COM(2021)0142),

—	ag féachaint do chonclúidí ón gComhairle an 15 Márta 2021 dar teideal “Straitéis Ceimiceán Inbhuanaithe an Aontais: Déanaimis beart de réir briathair”,

—	ag féachaint do Riail 54 dá Rialacha Nós Imeachta, mar aon le hAirteagal 1(1)(e) de chinneadh ó Chomhdháil na nUachtarán an 12 Nollaig 2002 maidir leis an nós imeachta i gcomhair údarú a dheonú chun tuarascálacha féintionscnaimh a tharraingt suas, agus Iarscríbhinn 3 a ghabhann leis,

—	ag féachaint don tuarascáil ón gCoiste um an Margadh Inmheánach agus um Chosaint an Tomhaltóra (A9-0349/2021),

A.	de bhrí gur glacadh an Treoir maidir le Sábháilteacht Bréagán in 2009 chun ardleibhéal sláinte agus sábháilteachta a áirithiú do leanaí agus chun feidhmiú an mhargaidh inmheánaigh do bhréagáin a fheabhsú trí bhacainní ar thrádáil bréagán idir na Ballstáit a bhaint;

B.	de bhrí go bhfuil creat daingean sábháilteachta bréagán AE ceaptha chun a áirithiú go mbainfidh leanaí taitneamh as an eispéireas is sábháilte is féidir agus go nglactar leis go forleathan mar thagarmharc domhanda;

de bhrí go n-aithníonn Coinbhinsiún na Náisiún Aontaithe um Chearta an Linbh súgradh mar cheart ag gach leanbh, a bhfuil gach Ballstát den AE ina shínitheoirí air; de bhrí go gcuirtear le forbairt, le sláinte agus le folláine leanaí trí shúgradh agus gur dlúthchuid den fhás aníos é; De bhrí go léiríonn staidéir gur féidir le bréagáin an súgradh a shaibhriú agus leanaí a choinneáil ag súgradh ar feadh tréimhse níos faide;

de bhrí gur treoir chomhchuibhithe uasta é an TSD, rud a chiallaíonn nach gceadaítear do Bhallstáit aon cheanglais éagsúla a ghlacadh seachas na ceanglais a fhoráiltear ann; de bhrí go bhfuil na rialacha agus na ceanglais do bhréagáin, in a lán cásanna, níos déine ná na rialacha agus na ceanglais le haghaidh táirgí eile mar gheall ar leochaileacht na dtomhaltóirí a bhfuil siad ceaptha dóibh;

E.	de bhrí go mbaineann gníomhaíochtaí trádálaithe bradacha agus díolacháin táirgí neamhchomhlíontacha ar líne an bonn rómhinic ó éifeachtacht TSD an Aontais;

de bhrí, in ainneoin easpa sonraí cuimsitheacha maidir lena thionchar iomlán, go bhfuil TSD fós éifeachtach den chuid is mó maidir le saorghluaiseacht bréagán a ráthú sa mhargadh aonair agus de bhrí gur tháinig méadú 10 % ar líon na gcuideachtaí atá ag feidhmiú sa mhargadh ó cuireadh i bhfeidhm go hiomlán TSD ó 2013 go 2017, agus gur tháinig méadú leanúnach ar láimhdeachas thionscal bréagán AE ó tháinig an treoir i bhfeidhm; de bhrí gur FBManna iad 99 % de na cuideachtaí san earnáil agus gur micrifhiontair iad formhór na gcuideachtaí sin;

de bhrí go n-éilítear le TSD go bhfuil bréagáin a chuirtear ar fáil ar mhargadh AE sábháilte agus go n-áirithítear ardleibhéal cosanta do leanaí in aghaidh guaiseacha de dheasca substaintí ceimiceacha i mbréagáin; de bhrí go bhféadfadh gá a bheith le hoiriúnú tapa ar cheanglais shonracha agus ar chaighdeáin shonracha má léiríonn na forbairtí eolaíocha agus teicneolaíocha go bhfuil rioscaí agus dúshláin a bhaineann le bréagáin ag teacht chun cinn nach rabhthas ar an eolas fúthu roimhe sin;

de bhrí, sa straitéis inbhuanaitheacht ceimiceán, gur leag an Coimisiún béim ar an ngá atá le forálacha a thabhairt isteach nó a threisiú chun comhéifeachtaí ceimiceán a chur san áireamh, lena n-áirítear bréagáin, agus chun cur chuige cineálach na mbréagáin a leathnú chun a áirithiú nach mbeidh ceimiceáin i dtáirgí tomhaltais, bréagáin san áireamh, arb iad is cúis le hailse nó sóchán géinte, a mbíonn tionchar acu ar an gcóras atáirgthe nó ar an gcóras inchríneach, nó atá marthanach agus bithcharnach; de bhrí go gcuireann straitéis na gceimiceán i leith na hinbhuanaitheachta de cheangal ar an gCoimisiún measúnú a dhéanamh ar na rialacha mionsonraithe agus ar an amchlár chun an cur chuige cineálach céanna a leathnú, maidir le táirgí tomhaltais, chun ceimiceáin dhíobhálacha bhreise a chur san áireamh, lena n-áirítear na ceimiceáin sin a dhéanann difear do na córais imdhíonachta, néareolaíocha nó riospráide agus ceimiceáin atá tocsaineach d’orgán sonrach;

I.	de bhrí go bhfuil tábhacht le hinbhuanaitheacht fheabhsaithe ach gur cheart tús áite a thabhairt do shábháilteacht bréagán i gcónaí; de bhrí nár cheart do cheanglais chun inbhuanaitheacht a fheabhsú dochar a dhéanamh don tsábháilteacht;

á chur in iúl gur geal léi tuarascáil mheastóireachta an Choimisiúin maidir le TSD, arb é is aidhm léi a fheidhmiú a mheas ó tháinig sí i bhfeidhm;

ag aithint breisluach TSD maidir le feabhas a chur ar shábháilteacht leanaí agus leibhéal comhionann cosanta a áirithiú ar fud an mhargaidh aonair, i gcomparáid leis an treoir roimhe seo, agus an ról atá aici maidir le deimhneacht dhlíthiúil agus cothrom iomaíochta a sholáthar do ghnólachtaí; ag cur in iúl gur oth léi nach gcomhlíonann roinnt de na monaróirí neamh-AE atá ag díol a dtáirgí sa mhargadh aonair, go háirithe trí mhargaí ar líne, reachtaíocht AE, agus go bhfuil go leor bréagán a dhíoltar in AE fós ina mbagairt shuntasach ar leanaí;

ag aithint ról lárnach atá ag caighdeáin chun gur féidir le monaróirí an Treoir a chur i bhfeidhm go héifeachtach agus go sofhreagrúil, chomh maith le ról na gcomhlachtaí dá dtugtar fógra maidir le comhlíonadh a áirithiú i gcás nach bhfuil fáil ar chaighdeáin nó nach gcuirtear i bhfeidhm iad; ag cur béim ar an ngá atá ann líon na gcomhlachtaí dá dtugtar fógra a mhéadú i roinnt réigiún; á thabhairt chun suntais gur cheart go mbeadh caighdeáin oscailte, chuimsitheacha, inbhuanaithe, thrédhearcacha agus ardcháilíochta ag na Ballstáit; á chur i bhfios go láidir gur cheart do chaighdeáin a bheith neodrach ó thaobh na teicneolaíochta de agus bunaithe ar fheidhmíocht, lena n-áirithítear dálaí cothroma iomaíochta i measc oibreoirí eacnamaíocha, go háirithe FBManna;

ag cur béim ar an ngá atá ann caighdeáin uaillmhianacha a fhorbairt le haghaidh bréagáin oiriúnaitheacha, lena gcuirfear ar chumas leanaí faoi mhíchumas taitneamh a bhaint as bréagáin agus idirghníomhú leo;

ag tabhairt dá haire go bhfuil fadhbanna ag roinnt údaráis faireachais margaidh maidir leis na forálacha atá in Airteagal 11 den TSD a fhorfheidhmiú, lena gcuirtear d’oibleagáid ar mhonaróirí rabhaidh ar bhréagáin a mharcáil ar bhealach atá infheicthe go soiléir, soléite, intuigthe agus cruinn; á chur i bhfios go láidir gurb é easpa ceanglas sonraithe agus caighdeán gaolmhar is cúis leis na fadhbanna sin; á iarraidh ar an gCoimisiún, dá bhrí sin, ceanglais shonracha a thabhairt isteach maidir le hinfheictheacht agus inléiteacht rabhadh i leith bréagán, chun a chur ar chumas na mBallstát na ceanglais sin a fhorfheidhmiú ar bhealach aonfhoirmeach;

ag aithint gur próiseas duaisiúil é cur chun feidhme agus ullmhúchán do chur i bhfeidhm cuí TSD a théann thar na blianta agus a éilíonn infheistíocht shuntasach airgeadais ó mhonaróirí bréagán na hEorpa; ag cur béim ar a thábhachtaí atá an chobhsaíocht dhlíthiúil chun forbairt chobhsaí a dhéanamh ar ghnólachtaí intíre, go háirithe fiontair teaghlaigh bheaga agus mheánmhéide;

ag tabhairt dá haire, áfach, go bhfuil neamhréireachtaí fós ann ar gá athbhreithniú a dhéanamh ar TSD ina leith; á iarraidh ar an gCoimisiún, dá bhrí sin, leanúint dá phróiseas meastóireachta agus measúnú tionchair uileghabhálach a dhéanamh chun a sheiceáil ar cheart aghaidh a thabhairt orthu agus conas aghaidh a thabhairt orthu; á chur i bhfáth go bhfuil gá le tuilleadh iarrachtaí, go háirithe ó na húdaráis forfheidhmithe dlí, chun a áirithiú go gcuirfidh na hoibreoirí eacnamaíocha ar fad a chuireann bréagáin ar mhargadh an AE diancheanglais sábháilteachta i bhfeidhm; ag cur béim ar an ngá atá ann na dúshláin, na rioscaí sonracha agus an tionchar diúltach ar chuideachtaí a tháirgeann bréagáin chomhlíontacha a chur san áireamh, ar dúshláin iad a eascraíonn as bréagáin neamhchomhlíontacha, neamhshábháilte agus ghóchumtha a dhíol, a thagann ó thíortha nach bhfuil san Aontas den chuid is mó, agus chun aghaidh a thabhairt ar na rioscaí a bhaineann le húsáid teicneolaíochtaí nua;

Ceimiceáin

ag aithint sholúbhtacht an TSD reatha agus gur de chineál é a sheasfaidh an aimsir a bheag nó a mhór ós rud gur leasaíodh an Treoir 14 uair sa tréimhse 2012-2019 chun oiriúnú don fhianaise eolaíoch nua a léiríonn rioscaí nach rabhthas ar an eolas fúthu roimhe sin do leanaí, go háirithe i réimse na gceimiceán; ag cur in iúl gur cúis imní di, áfach, go bhfuil fadhbanna ann fós a d’fhéadfadh sábháilteacht leanaí a chur i mbaol agus nach féidir iad a réiteach ach go páirteach trí ghníomhartha cur chun feidhme;

á thabhairt chun suntais go bhfuil gá le bréagáin a chuirtear ar mhargadh an Aontais chun cloí le TSD, chomh maith le reachtaíocht ábhartha an Aontais maidir le ceimiceáin, go háirithe Rialachán REACH agus an Treoir RoHS, chomh maith leis an Rialachán maidir le Cosmaidí, an Rialachán maidir le Ábhair Theagmhála Bia, an Treoir maidir le Cadhnraí, an Rialachán maidir le CLP agus an Rialachán maidir le POPanna, gan beann ar an áit a monaraítear iad;

10.

á chur i bhfáth go bhféadfadh sé go mbeadh ualach mór ag baint le scaipeadh amach na gceanglas thar roinnt píosaí reachtaíochta agus le foráil a dhéanamh do theorainnluachanna éagsúla, go háirithe le haghaidh FBManna, agus go bhféadfadh sé i gcásanna áirithe gur gá substaintí a thomhas faoi dhó, mar a tharlaíonn i gcás teorainnluachanna ascnaimh agus inneachair; á iarraidh ar an gCoimisiún, dá bhrí sin, breithniú a dhéanamh ar na teorainneacha uile is infheidhme maidir le bréagáin a chomhdhlúthú ar luachanna aonfhoirmeacha, a bhfuil bonn cirt leo trí mheasúnú breise, in aon phíosa reachtaíochta amháin, chun measúnú comhréireachta a shruthlíniú agus chun é a dhéanamh níos éasca agus níos saoráidí na ceanglais a chomhlíonadh; á iarraidh ar an gCoimisiún, ina theannta sin, breithniú a dhéanamh ar rochtain ar fhaisnéis a chuíchóiriú, lena n-áirítear trí thairseach ar líne, chun a bhfuil ag teastáil a shoiléiriú agus d’fhonn nascleanúint na bpíosaí éagsúla reachtaíochta sin a éascú maidir le faireachas margaidh, oibreoirí eacnamaíocha agus tomhaltóirí;

11.

á chur in iúl gur cúis bhuartha di go bhfágann an maolú ón toirmeasc ar cheimiceáin atá carcanaigineach, só-ghineach nó tocsaineach don atáirgeadh (CMRanna) a leagtar amach in TSD, gur féidir na ceimiceáin sin i gcásanna ar leith a bheith ann i dtiúchain a dhealraíonn a bheith ró-ard chun cosaint leanaí a áirithiú; á iarraidh ar an gCoimisiún measúnú tionchair a dhéanamh d’fhonn anailís a dhéanamh ar ar cheart teorainneacha cineálacha maidir le maolú ar CMRanna sa TSD a laghdú, tar éis na moltaí a rinne an coiste eolaíoch ábhartha, agus a fhiosrú an ceart, i gcomhréir leis an straitéis ceimiceán don inbhuanaitheacht, maolú ó na rialacha maidir le CMRanna a bheith ann nach bhfuil rochtain ag leanaí orthu i mbréagáin a scriosadh agus ar cheart forálacha leordhóthanacha a dhéanamh chun nochtadh leanaí do shubstaintí contúirteacha, tocsaineacha, creimneacha agus greannacha a sheachaint; á iarraidh ar an gCoimisiún nochtadh comhcheangailte leanaí do cheimiceáin chomh maith le héifeachtaí féideartha ísealdáileoige a chur san áireamh;

12.

á chur i bhfáth go gcruthaítear neamhréireachtaí nuair a leagtar síos teorainnluachanna níos ísle i mbréagáin do leanaí faoi bhun 36 mí nó a bheartaítear a chur sa bhéal do cheimiceáin amhail nítreasaimíní agus substaintí nítreasáithithe ar an leibhéal náisiúnta i gcomparáid leo siúd atá bunaithe in TSD, fiú nuair a thugann an Coimisiún údar cuí leis; ag tabhairt dá haire, áfach, gur cheart go mbeadh an t-ardleibhéal cosanta céanna ag leanaí uile AE; ag aithint nach féidir an teorainnluach sin a leasú le gníomh cur chun feidhme ach go mbeadh gá le nós imeachta reachtach ina leith; á iarraidh ar an gCoimisiún, dá bhrí sin, measúnú a dhéanamh ar an ngá atá leis an teorainnluach a oiriúnú don luach is déine atá i bhfeidhm ar an leibhéal náisiúnta maidir le hathbhreithniú ar TSD, tar éis measúnú tionchair uileghabhálach a dhéanamh, agus foráil a dhéanamh maidir le sásra solúbtha lena mbeifear in ann na teorainnluachanna do shubstaintí ceimiceacha contúirteacha a oiriúnú go tapa agus staid ina socraítear luachanna éagsúla ar an leibhéal náisiúnta a sheachaint, lena n-áiritheofar cothroime iomaíochta sa mhargadh inmheánach a rachaidh chun tairbhe do thomhaltóirí agus d’oibreoirí eacnamaíocha; á chur i bhfios go láidir go bhfuil gá don Pharlaimint le grinnscrúdú domhain a choinneáil ar na gníomhartha cur chun feidhme atá le glacadh chun na críche sin;

13.

á chur in iúl gur geal léi tiomantas an Choimisiúin an cur chuige cineálach riosca maidir le CMRanna a leathnú chuig suaiteoirí inchríneacha, ar bhonn shainmhíniú na hEagraíochta Domhanda Sláinte (EDS), agus anailís a dhéanamh sa mheasúnú tionchair ar cheart é a chur i bhfeidhm in athbhreithniú amach anseo ar TSD chun a áirithiú go gcuirfear cosc ar shuaiteoirí inchríneacha i mbréagáin chomh luath agus a shainaithnítear iad, chomh maith le breithniú a dhéanamh ar reachtaíocht chothrománach a thabhairt isteach leis an aidhm sin, mar atá iarrtha ag an bParlaimint agus ag an gComhairle arís is arís eile agus an prionsabal “substaint amháin, measúnú amháin” atá sa straitéis ceimiceán don inbhuanaitheacht á urramú; á chur in iúl gur geal léi, i ndáil leis an méid sin, an tiomantas measúnú a dhéanamh ar an gcur chuige sin a leathnú chuig ceimiceáin a dhéanann difear do na córais imdhíonachta, néareolaíocha nó riospráide agus chuig ceimiceáin atá tocsaineach d’orgán sonrach, d’fhonn ardleibhéal cosanta i gcoinne na gceimiceán sin a ráthú chomh maith le freagairt rialála a bheidh oiriúnaithe don todhchaí ar a n-úsáid i mbréagáin a áirithiú, i gcomhréir leis an rún atá ag an gCoimisiún tosaíocht a thabhairt d’úsáidí uile na gceimiceán sin le haghaidh srianta REACH;

14.

á chur in iúl gur ábhar imní di nach gcuirtear san áireamh sna forálacha níos déine maidir le ceimiceáin i mbréagáin atá beartaithe do leanaí faoi bhun 36 mhí go bhfuil leanaí aosta fós leochaileach i leith substaintí contúirteacha; ag tabhairt dá haire go bhféadfadh monaróirí dul timpeall ar na forálacha mar thoradh ar an idirdhealú sin trína léiriú go bhfuil an bréagán ceaptha do leanaí os cionn 36 mhí fiú nuair is léir nach amhlaidh atá; á chur i bhfáth gur léirigh roinnt geallsealbhóirí, an Coimisiún agus na Ballstáit nach leor an t-idirdhealú sin, ós rud é go bhféadfadh sé go gcruthófaí bealaí éalaithe leis agus go bhféadfaí éifeachtacht TSD a theorannú leis, agus gur iarr siad go gcuirfí as an áireamh é; á iarraidh ar an gCoimisiún, dá bhrí sin, anailís a dhéanamh ar an tsaincheist sin laistigh den mheasúnú tionchair don athbhreithniú ar TSD agus i gcomhréir iomlán leis an bhfianaise eolaíoch is déanaí, cinneadh a dhéanamh an gá an t-idirdhealú sin a dhíothú agus teorainnluachanna sonracha a shocrú do cheimiceáin i mbréagáin; á chur in iúl go bhfuil sí den tuairim, nuair a thagann fianaise eolaíoch chun solais go bhfuil ceimiceán contúirteach do leanaí, gur cheart a úsáid a shrianadh i mbréagáin agus i ngach táirge a bhaineann le leanaí;

Faireachas margaidh agus teicneolaíochtaí nua

15.

ag tabhairt dá haire go bhfuil oibleagáid d’údarás inniúil na mBallstát de réir TSD faireachas margaidh a dhéanamh agus aird chuí á thabhairt ar an bprionsabal réamhchúraim, bréagáin ar an margadh a thástáil agus cáipéisíocht na monaróirí a fhíorú d’fhonn bréagáin neamhshábháilte a aistarraingt agus beart a ghlacadh ina gcoinne siúd atá freagrach as iad a chur ar an margadh; á chur in iúl gur ábhar imní di go bhfuil éifeachtacht an fhaireachais margaidh faoi TSD teoranta, cé go leanann sé de bheith ríthábhachtach chun sláinte agus sábháilteacht leanaí atá i mbaol a chosaint, agus go mbaineann sé an bonn ón gcothroime iomaíochta d’oibreoirí eacnamaíocha a chomhlíonann an reachtaíocht, chun leasa trádálaithe bradacha nach gcuireann rialacha AE i bhfeidhm; ag tabhairt dá haire go bhfuil deacrachtaí fós ann maidir le faisnéis agus doiciméadacht a fháil ó roinnt oibreoirí eacnamaíocha;

16.

á chur in iúl gur geal léi gur glacadh Rialachán (AE) 2019/1020, a bhfuil sé d’aidhm aige faireachas margaidh a fheabhsú trí rialuithe na n-údarás náisiúnta a neartú agus a chomhchuibhiú chun a áirithiú go mbeidh táirgí a thagann isteach sa mhargadh aonair, lena n-áirítear bréagáin, sábháilte agus i gcomhréir leis na rialacha, agus á iarraidh ar na Ballstáit é a chur chun feidhme go pras agus acmhainní leordhóthanacha daonna, airgeadais agus teicniúla a sholáthar do na húdaráis chustaim agus ar na húdaráis faireachais margaidh chun líon agus éifeachtacht na rialuithe a mhéadú, ionas gur féidir forfheidhmiú éifeachtach TSD a áirithiú agus cosc a chur ar leathadh bréagán neamhshábháilte agus neamhchomhlíontacha in AE;

17.

á iarraidh ar an gCoimisiún measúnú a dhéanamh ar chur chun feidhme agus ar chur i bhfeidhm Rialachán (AE) 2019/1020 ag na Ballstáit agus tacaíocht ghníomhach a thabhairt do na Ballstáit i bhforfheidhmiú na straitéisí náisiúnta faireachais margaidh; ag tathant ar an gCoimisiún gníomhartha cur chun feidhme a ghlacadh lena leagfar síos tagarmharcanna agus teicnící le haghaidh seiceálacha ar bhonn anailís chomhchoiteann riosca ar leibhéal AE, chun a áirithiú go ndéanfar dlí AE a fhorfheidhmiú go comhsheasmhach, chun na rialuithe ar tháirgí atá ag teacht isteach i margadh AE a neartú agus éagsúlachtaí a sheachaint agus leibhéal éifeachtach agus aonfhoirmeach na rialuithe sin a bhaint amach. á iarraidh ar an gCoimisiún gníomhartha cur chun feidhme a ghlacadh lena sonraítear na nósanna imeachta chun saoráidí tástála AE a ainmniú, i gcomhréir le hAirteagal 21 de Rialachán (AE) 2019/1020;

18.

á iarraidh ar an gCoimisiún féidearthachtaí a fhiosrú go leanúnach chun teicneolaíochtaí nua amhail ríomhlipéadú, blocshlabhra agus an intleacht shaorga a úsáid d’fhonn táirgí neamhshábháilte a bhrath, rioscaí a mhaolú agus comhlíonadh TSD a fheabhsú, chomh maith le hobair na n-údarás faireachais margaidh a éascú trí fhaisnéis atá inrochtana, cothrom le dáta, struchtúraithe agus dhigiteach, más féidir, a sholáthar faoi tháirgí agus a n-inrianaitheacht i slabhra an tsoláthair;

19.

á athdhearbhú go bhfuil teorainn leis an maoiniú agus leis na hacmhainní daonna, lenar laghdaíodh éifeachtacht agus raon feidhme a lán údarás faireachais margaidh le blianta beaga anuas; á chur in iúl gur díol sásaimh di, ina leith sin, gur glacadh clár an mhargaidh aonair agus gur tugadh isteach cuspóir sonrach, agus líne bhuiséid ar leith agus acmhainní tiomnaithe don fhaireachas margaidh, rud a chuideoidh le tacú le gníomhaíochtaí na mBallstát chun a áirithiú nach dtiocfaidh ach bréagáin shábháilte agus chomhlíontacha isteach i margadh AE;

20.

á chur i bhfios go láidir go bhfuil faireachas éifeachtach margaidh riachtanach chun bréagáin nach bhfuil sábháilte a bhrath agus chun cur i bhfeidhm cuí TSD a áirithiú; á iarraidh ar na Ballstáit, dá bhrí sin, dlús a chur le comhordú a gcuid gníomhaíochtaí faireachais margaidh, lena n-áirítear trí dhea-chleachtais a mhalartú agus a gcórais a dhigitiú, agus comhar idir údaráis faireachais margaidh agus údaráis eile amhail údaráis chustaim, teileachumarsáide agus cosanta sonraí a neartú; á iarraidh ar na húdaráis um fhaireachas margaidh agus ar na húdaráis chustaim, dá bhrí sin, taithí a roinnt go gníomhach agus dlús a chur leis an gcomhordú agus leis an gcomhar eatarthu féin, lena n-áirítear ar an leibhéal trasteorann, ionas gur féidir faisnéis faoi bhréagáin neamhshábháilte a aistriú go tapa agus go bhféadfar deireadh a chur go héifeachtach le hallmhairí bréagán neamhshábháilte; á chur i bhfáth go bhfuil sé ríthábhachtach i gcónaí rialuithe leanúnacha agus éifeachtacha a choinneáil ar fud AE ar bhréagáin a thagann isteach sa mhargadh inmheánach chun a áirithiú go gcomhlíonann siad ceanglais AE; á iarraidh ar an gCoimisiún gníomhaíochtaí comhpháirteacha faireachais margaidh a eagrú agus a mhaoiniú, lena n-áirítear gníomhaíochtaí oiliúna, chun dlús a chur le forfheidhmiú reachtaíocht an Aontais maidir le bréagáin, agus chun comhoibriú le húdaráis inniúla na dtíortha nach bhfuil in AE chun faisnéis a mhalartú faoi bhréagáin nach bhfuil sábháilte; á iarraidh ar na Ballstáit, thairis sin, rátaí íosta samplála nó seiceálacha íosta a shocrú chun feabhas a chur ar fhorfheidhmiú;

21.

á thabhairt chun suntais gur cheart do na húdaráis faireachais margaidh rúnsiopadóireacht a dhéanamh ar bhonn rialta agus uair sa bhliain ar a laghad, lena n-áirítear ar mhargaí ar líne, chun bréagáin a bhrath ar bhealach níos éifeachtúla, go háirithe toisc gurb iad na bréagáin na táirgí is minice a chuirtear in iúl ar chóras mear-rabhaidh AE maidir le táirgí neamhbhia contúirteacha (Safety Gate);

22.

á chur in iúl gur cúis imní di na leochaileachtaí nua agus na rioscaí a bhaineann le bréagáin nasctha, maidir le sábháilteacht leanaí, slándáil leanaí, príobháideacht agus sláinte intinne; ag cur béim ar a thábhachtaí atá sé príobháideacht leanaí a chosaint agus bréagáin nasctha á n-úsáid; á chur in iúl gur ábhar imní di gur léirigh cuid de na bréagáin sin atá curtha ar mhargadh AE cheana nach bhfuil an tslándáil leordhóthanach, chomh maith le coimircí teoranta nó gan aon chosaint ar chibearbhagairtí; ag spreagadh táirgeoirí bréagán nasctha sásraí sábháilteachta agus slándála a chomhtháthú ina mbréagáin trí dhearadh; á iarraidh ar an gCoimisiún roghanna éagsúla le haghaidh gníomhaíochta a fhiosrú i ndáil le leibhéal an riosca agus prionsabal na comhréireachta, amhail raon feidhme TSD a leathnú chun forálacha maidir le príobháideachas agus slándáil faisnéise a chur san áireamh, reachtaíocht chothrománach a ghlacadh maidir le ceanglais chibearshlándála le haghaidh táirgí bainteacha agus seirbhísí gaolmhara, amhail an gníomh Eorpach maidir le hathléimneacht i ndáil le cibearshlándáil, nó reachtaíocht chothrománach ábhartha a threisiú, amhail an Treoir maidir le Trealamh Raidió, chomh maith leis an RGCS, agus páirt a thabhairt don Pharlaimint ag ina chuid roghanna;

23.

á chur in iúl gur ábhar imní di nach bhfreagraíonn tomhaltóirí go dona do na haistarraingtí, agus go bhfuil bréagáin neamhshábháilte fós á n-úsáid ag leanaí cé gur aistarraingíodh iad; á iarraidh ar an gCoimisiún, dá bhrí sin, treoirlínte a fhoilsiú maidir le nósanna imeachta aistarraingte, lena n-áirítear seicliosta ina bhfuil ceanglais nithiúla, agus á iarraidh ar na margaí ar líne sásraí éifeachtacha a bhunú chun a áirithiú gur féidir leo teacht ar a gcuid úsáideoirí, ceannaitheoirí agus díoltóirí chun iad a chur ar an eolas chomh tapa agus is féidir nuair a bheidh gá le haistarraingtí agus chun líon na dtomhaltóirí a shroicheann na hais a mhéadú;

Ríomhthráchtáil

24.

ag aithint an róil dearfaigh atá ag ríomhthráchtáil, lena n-áirítear ról na margaí ar líne, lenar cumasaíodh monaróirí bréagán AE a fhorbairt; ag cur béim, sa chomhthéacs sin, ar an bhfás i ngníomhaíochtaí na ngnólachtaí sin laistigh de AE agus lasmuigh de araon; á thabhairt chun suntais go gcruthaíonn forbairt na ríomhthráchtála dúshláin d’údaráis faireachais margaidh ó thaobh comhlíonadh táirgí a dhíoltar ar líne a áirithiú; ag tabhairt dá haire nach gcomhlíonann a lán táirgí a cheannaítear ar líne ceanglais sábháilteachta an Aontais agus gur ábhar imní di an líon ard bréagán contúirteach a dhíolann díoltóirí bradacha ar líne; á mheas go bhfuil sé riachtanach fáil réidh le bréagáin neamhchomhlíontacha agus contúirteacha a dhíol ar líne;

25.

á chur in iúl gur díol sásaimh di treoir an Choimisiúin maidir le hAirteagal 4 de Rialachán (AE) 2019/1020, lena soiléirítear cúraimí oibreoirí eacnamaíocha go háirithe i dtaca le táirgí a dhíoltar ar líne agus a chuirtear ar mhargadh an Aontais ó thíortha neamh-AE. ag cur béim ar an ngá atá ann dul i ngleic le táirgí neamhchomhlíontacha a dhíoltar go díreach le tomhaltóirí ó thíortha nach bhfuil san Aontas trí mhargaí ar líne; á mheabhrú nach féidir le hoibreoirí eacnamaíocha ach táirgí sábháilte a chur ar mhargadh an Aontais; á thabhairt chun suntais go bhfuil sé ríthábhachtach go gcomhlíonfadh gach oibreoir eacnamaíoch rialacha AE chun sábháilteacht leanaí a áirithiú agus chun cothrom iomaíochta a chur ar fáil do chuideachtaí; á iarraidh ar na húdaráis faireachais margaidh agus ar na húdaráis chustaim dlús a chur lena gcomhar, lena n-áirítear faisnéis a mhalartú maidir le torthaí neamhchomhlíonta, agus gníomhaíochtaí forfheidhmiúcháin láidre a dhéanamh chun stop a chur le trádálaithe bradacha leas a bhaint as margadh AE;

26.

ag cur béim ar bhreisluach an phrionsabail “bíodh aithne agat ar do chustaiméir gnó” chun comhlíonadh agus inrianaitheacht bréagán a dhíoltar ar líne a mhéadú; á chur i bhfios go bhfuil an gealltanas maidir le sábháilteacht táirgí deonach agus go bhfuil rannpháirtíocht theoranta na n-oibreoirí margaidh ann; á chur in iúl gurb oth léi go bhfuil éifeachtaí teoranta léirithe ag an ngealltanas sábháilteachta táirgí go dtí seo;

27.

á chur i bhfáth go bhféadfadh ról ollmhór a bheith ag margaí ar líne maidir le cúrsaíocht bréagán neamhshábháilte a theorannú; á chreidiúint, dá bhrí sin, gur cheart oibleagáid a bheith orthu níos mó freagrachta a ghlacadh maidir le sábháilteacht agus comhlíonadh bréagán a dhíoltar ar a n-ardáin a áirithiú, go háirithe maidir le bréagáin neamhchomhlíontacha a shainaithint agus a bhaint, agus trí dhul i gcomhairle leis an gcóras Safety Gate freisin, agus comhoibriú go héifeachtach leis na húdaráis faireachais margaidh maidir leis na bréagáin neamhchomhlíontacha a bhaint agus cosc a chur ar athléiriú bréagán neamhshábháilte; á áitiú, sna téarmaí is láidre, sa chiall sin, gur den bhunriachtanas é forfheidhmiú éifeachtach agus intuartha a áirithiú chomh maith le comhsheasmhacht iomlán idir TSD agus ionstraimí éagsúla amhail an Gníomh um Sheirbhísí Digiteacha, an Gníomh maidir leis an Intleacht Shaorga, an Rialachán maidir le Sábháilteacht Ghinearálta Táirgí agus an gníomh reachtach a bheidh ann amach anseo lena ndéanfar athbhreithniú ar an Treoir maidir le Dliteanas i leith Táirgí, chun na caighdeáin is airde maidir le sábháilteacht agus cearta bunúsacha a ráthú; á iarraidh go mbeadh réitigh in ann fógra a thabhairt faoi bhréagáin neamhchomhlíontacha ag eagraíochtaí tomhaltóirí agus ag comharthóirí iontaofa;

28.

ag cur béim ar an ngá atá ann dlús a chur leis an gcomhar le tíortha nach bhfuil san Aontas d’fhonn cosc a chur ar bhréagáin neamhshábháilte neamhchomhlíontacha a theacht isteach i margadh AE, agus cothrom iomaíochta do ghnólachtaí á áirithiú; á iarraidh ar an gCoimisiún faisnéis a fhoilsiú maidir lena ghníomhaíochtaí faireacháin;

Ionstraim dlí agus an bealach chun cinn

29.

á iarraidh ar an gCoimisiún, ós rud é go ngníomhaíonn TSD mar rialachán de facto, a mheas an bhféadfadh a athbhreithniú deis a bheith ann é a thiontú ina rialachán chun a éifeachtacht agus a éifeachtúlacht a fheabhsú agus neamhréireachtaí cur chun feidhme a sheachaint i measc na mBallstát agus ilroinnt an mhargaidh a sheachaint;

30.

á iarraidh ar an gCoimisiún measúnú a dhéanamh ar an ngá atá le raon feidhme níos leithne le haghaidh leasuithe san athbhreithniú a dhéanfar amach anseo, agus measúnú tionchair domhain mar thaca leis chun anailís a dhéanamh ar an gcaoi a bhféadfaí ceanglais mheicniúla agus fhisiceacha, CMRanna, teorainnluachanna i gcomhair nítreasaimíní agus substaintí nítreasáithithe, chomh maith le forálacha lipéadaithe do chumhráin ailléirgineacha agus do cheimiceáin chontúirteacha, a chur isteach san athbhreithniú a dhéanfar amach anseo ar TSD, chun gur féidir modhnuithe éasca solúbtha a dhéanamh;

31.

á chur in iúl gur cúis bhuartha di go seachnaíonn táirgeoirí áirithe TSD a chomhlíonadh trí mhaímh nach bréagáin iad a dtáirgí, agus go bhfuil siad in úsáid go soiléir amhlaidh; á thabhairt chun suntais go bhfuil na doiciméid treorach ón gCoimisiún ina gcuidiú chun a shoiléiriú an bhfuil an táirge ina bhréagán nó nach bhfuil agus chun cur chun feidhme comhchuibhithe TSD a áirithiú chun leasa na n-údarás faireachais margaidh agus na n-oibreoirí eacnamaíocha araon; á chur i bhfáth, mar sin féin, go bhfuil táirgí fós laistigh den “limistéar liath” agus á iarraidh ar an gCoimisiún, dá bhrí sin, an fhadhb sin a réiteach laistigh de shainmhíniú bréagán san athbhreithniú a dhéanfar amach anseo ar TSD; ag cur béim ar an ngá atá le hidirphlé oscailte, cuiditheach leis na geallsealbhóirí ábhartha chun na críche sin;

32.

ag cur béim ar a thábhachtaí atá ról na mbréagáin i bhforbairt agus i bhfoirmiú scileanna leanaí, agus ar an tacaíocht oideolaíoch a thugann siad chun cúraimí nua a chur i gcrích agus chun scileanna ó aois an-óg a fheabhsú agus a fhoghlaim; á iarraidh ar an gCoimisiún an treoir bréagán a athbhreithniú d’fhonn feabhas a chur ar an tsábháilteacht bréagán agus, ag an am céanna, an t-ualach agus na costais riaracháin agus dhlíthiúla ar mhonaróirí a laghdú chun bealach soiléir chuig bréagáin shábháilte inacmhainne a áirithiú do gach leanbh san Aontas Eorpach;

33.

á mheas go bhfuil faisnéis de dhíth ar thomhaltóirí agus ar na gníomhaithe i slabhraí luacha chun iompar níos inbhuanaithe a thiomáint; á iarraidh ar an gCoimisiún, dá bhrí sin, anailís a dhéanamh sa mheasúnú tionchair an bhféadfadh marthanacht agus inleasaitheacht bréagán tionchar a imirt ar a sábháilteacht agus má chruthaítear go bhfuil tionchar den sórt sin ann, anailís a dhéanamh ansin an bhféadfaí faisnéis níos fearr maidir le marthanacht bréagán agus maidir le hindeisitheacht bréagán a chur leis na forálacha lipéadaithe ar bhealach comhréireach neamhshriantach; á chreidiúint i ndáil leis sin go bhféadfaí réitigh nuálacha agus dhigiteacha a úsáid chun an fhaisnéis sin a chur ar fáil do thomhaltóirí, chun a áirithiú go bhfuil an fhaisnéis sábháilteachta so-aitheanta, agus ualaí iomarcacha ar chuideachtaí á seachaint agus íoslaghdú á dhéanamh ar ábhair phacáistíochta;

34.

á mheas go bhfuil rabhaidh agus faisnéis sábháilteachta tábhachtach do thomhaltóirí; ag tabhairt dá haire gur cheart ceanglais bhreise lipéadaithe a choinneáil chomh híseal agus is féidir ionas nach ndéanfaí aird a tharraingt uaidh sin; á iarraidh ar an gCoimisiún measúnú a dhéanamh ar an bhféidearthacht faisnéis chomhréireachta a léiriú nach bhfuil beartaithe don tomhaltóir deiridh go leictreonach;

Sonraí

35.

á thabhairt chun suntais go bhfuil sé deacair an leibhéal cosanta a TSD a mheas go cainníochtúil agus cur leis an obair chun bréagáin a chaighdeánú de bharr easpa staitisticí comhleanúnacha ar leibhéal an AE ar thionóiscí de dheasca bréagán; á chreidiúint go bhfuil comhordú agus maoiniú neamhleor ar leibhéal AE mar bhunchúis le heaspa sonraí comhsheasmhacha agus á iarraidh ar an gCoimisiún aghaidh a thabhairt air sin in athbhreithniú amach anseo ar an treoir; á iarraidh ar an gCoimisiún measúnú a dhéanamh ar an bhféidearthacht bunachar sonraí uile-Eorpach maidir le tionóiscí agus gortú a bhunú ina mbeadh roinn ar leith le haghaidh bréagán, atá poiblí, soláimhsithe don úsáideoir agus inrochtana d’údaráis phoiblí, do thomhaltóirí agus do mhonaróirí, agus lena bhféadfar faisnéis a thabhairt isteach agus a bhailiú maidir le tionóiscí agus gortuithe a tharlaíonn mar gheall ar bhréagáin chontúirteacha, lena n-áirítear iad sin a dhíoltar ar líne; á mheas, thairis sin, go mbeadh rogha bhreise ann trí úsáid a bhaint as táscairí agus sonraí amhail iad siúd a bailíodh ón gCóras Faisnéise agus Cumarsáide maidir le Faireachas Margaidh, Safety Gate agus gníomhaíochtaí comhpháirteacha chun éifeachtúlacht TSD a mheas, agus á iarraidh ar an gCoimisiún measúnú a dhéanamh ar an bhféidearthacht réitigh dhigiteacha a bhunú lena bhféadfaí feabhas a chur ar inrianaitheacht feadh an tslabhra soláthair agus cur le leibhéal níos airde sábháilteachta do bhréagáin;

36.

á iarraidh ar na Ballstáit dlús a chur lena mbailiú sonraí maidir leis an TSD, atá míchothrom anois, nach bhfuil ionadaíoch agus neamhiomlán, agus chun faisnéis a mhalartú faoi rioscaí agus leochaileachtaí maidir le sábháilteacht bréagán; á iarraidh ar ghnólachtaí dlús a chur leis an gcomhar leis na Ballstáit, agus níos mó sonraí a roinnt maidir le tionóiscí bréagán chun sábháilteacht leanaí a fheabhsú agus muinín i mbréagáin a chuirtear ar an margadh inmheánach a fheabhsú;

37.

á iarraidh ar an gCoimisiún úsáid a bhaint as an deis a thugtar le hathbhreithniú TSD táscairí fhorbairt chun faireachán a dhéanamh ar a chur chun feidhme ceart ag na Ballstáit agus ar a éifeachtacht fhoriomlán; á iarraidh ar an gCoimisiún feabhas a chur ar bhailiú sonraí atá le soláthar go rialta ag na Ballstáit, ag údaráis faireachais margaidh agus ag comhlachtaí dá dtugtar fógra; á mholadh don Choimisiún tuarascáil ghinearálta a ullmhú ar leibhéal AE bunaithe ar na tuarascálacha náisiúnta, agus iad a chur ar fáil don phobal agus a bheith inrochtana go héasca ag na páirtithe leasmhara uile orthu;

o o

38.

á threorú dá hUachtarán an rún seo a chur ar aghaidh chuig an gComhairle agus chuig an gCoimisiún;

(1) IO L 170, 30.6.2009, lch. 1.

(2) IO L 11, 15.1.2002, lch. 4.

(3) IO L 218, 13.8.2008, lch. 30.

(4) IO L 218, 13.8.2008, lch. 82.

(5) IO L 316, 14.11.2012, lch. 12.

(6) IO L 169, 25.6.2019, lch. 1.

(7) IO L 151, 7.6.2019, lch. 15.

(8) IO L 153, 3.5.2021, lch. 1.

(9) IO L 396, 30.12.2006, lch. 1.