Bileog Achoimre Feidhmiúcháin

Measúnú tionchair ar nuachóiriú rialacha cóipchirt AE

A. An gá le beart

Cad é an fhadhb agus cén fáth ar fadhb ar leibhéal an Aontais Eorpaigh é?

Sa mheasúnú tionchair seo, féachtar ar roinnt saincheisteanna a bhaineann le feidhmiú rialacha cóipchirt AE sa Mhargadh Aonair Digiteach. Féachtar ann ar rialacha reatha a oiriúnú nó ar rialacha nua a thabhairt isteach i dtrí réimse ar leith: (i) rochtain ar ábhar ar líne; (ii) feidhmiú príomheisceachtaí sa timpeallacht dhigiteach agus thrasteorann; agus (iii) feidhmiú an mhargaidh cóipchirt.

Sa chéad réimse, baineann na fadhbanna a dtugtar aghaidh orthu sa mheasúnú tionchair go díreach le deacrachtaí a thagann chun cinn maidir le cearta ar líne a imréiteach, ag craoltóirí, seirbhísí atarchuir, ardáin um fhíseán ar éileamh (VoD) nó institiúidí oidhreachta cultúrtha (IOCanna). Bíonn deacrachtaí ag craoltóirí go háirithe agus cearta á nimréiteach chun cláir theilifíse agus raidió a chur ar fáil ar líne thar theorainneacha; ar an gcaoi chéanna, féadfaidh imréiteach ceart a bheith casta i gcás seirbhísí atarchuir seachas oibreoirí cábla nuair a thairgeann siad cainéil ó Bhallstáit eile. Tugadh aird ar phríomhthorthaí na meastóireachta ar fheidhmiú na Treorach maidir le craoltóireacht satailíte agus atarchur cábla (Treoir 93/83/CEE) agus méid na bhfadhbanna sin agus na réitigh fhéideartha á measúnú. Ina theannta sin, tá deacrachtaí maidir le cearta ar líne a fháil ina gcúis le hinfhaighteacht theoranta saothar closamhairc Eorpach ar ardáin um fhíseán ar éileamh (VoD). Ar deireadh, bíonn deacrachtaí móra ag IOCanna agus cearta á nimréiteach acu chun digitiú a dhéanamh ar shaothair nach bhfuil ar fáil a thuilleadh lena gceannach (saothair OOC) agus chun iad a scaipeadh i measc an phobail.

Sa dara réimse, sainaithníodh an éiginnteacht dhlíthiúil maidir leis na gníomhartha atá ceadaithe faoi na díolúintí cóipchirt reatha, go háirithe an timpeallacht dhigiteach, mar fhadhb mhór le haghaidh fheidhmiú an Mhargaidh Aonair Dhigitigh. Téann an éiginnteacht dhlíthiúil i bhfeidhm ar mhúinteoirí agus ar mhic léinn agus ábhar á úsáid acu i ngníomhaíochtaí teagaisc trasteorann agus i ngníomhaíochtaí teagaisc a bhfuil tacaíocht dhigiteach ag gabháil leo. Bíonn éiginnteacht dhlíthiúil roimh thaighdeoirí maidir leis an bhféidearthacht mianadóireacht téacsanna agus sonraí (TDM) a dhéanamh ar ábhar a bhfuil rochtain dhleathach acu air. D’fhéadfaí cur isteach freisin ar chaomhnú saothar arna dhéanamh ag IOCanna, go háirithe i bhfoirmeacha digiteacha, de bharr éiginnteacht dhlíthiúil agus costais idirbhirt dhíréireacha.

Sa tríú réimse, dírítear sa mheasúnú tionchair ar shaincheisteanna a bhaineann le dáileadh luacha sa timpeallacht ar líne, agus déantar idirdhealú idir na fadhbanna ‘réamhtheachtacha’ a bhíonn ag sealbhóirí cirt agus iarracht á déanamh acu a nábhar a cheadúnú le haghaidh cineálacha áirithe seirbhísí ar líne agus na fadhbanna ‘iartheachtacha’ a bhíonn ag cruthaitheoirí agus conarthaí á gcaibidliú acu maidir le saothrú a gcuid saothar. Bíonn deacrachtaí le sárú ag sealbhóirí cirt agus iarracht á déanamh acu úsáid a nábhair a rialú agus luach airgid a chur air i measc seirbhísí ar líne lena stóráiltear ábhar arna uaslódáil ag úsáideoirí deiridh agus lena soláthraítear rochtain ar an ábhar sin. Tá sé tar éis éirí deacair freisin d’fhoilsitheoirí nuachtán a bhfoilseacháin a cheadúnú agus cosc a chur ar úsáid neamhúdaraithe ag seirbhísí ar líne. Ina theannta sin, bíonn éiginnteacht dhlíthiúil roimh gach foilsitheoir maidir leis an bhféidearthacht go bhfaighidís sciar den chúiteamh as úsáid saothar atá faoi eisceacht. Ar deireadh, d’fhéadfadh sé tarlú nach mbeadh faisnéis leordhóthanach ag údair agus ag taibheoirí (cruthaitheoirí) i gcónaí maidir le saothrú a saothar trína gcuirfí ar a gcumas luach saothair iomchuí a chaibidliú le haghaidh shaothrú a gceart.

Cad is ceart a bhaint amach?

Sainaithníodh trí chuspóir ghinearálta:

(i) foráil a dhéanamh do rochtain níos fairsinge ar ábhar cosanta ar fud AE, ina ndírítear ar chláir theilifíse agus raidió, saothair chlosamhairc Eorpacha agus an oidhreacht chultúrtha;

(ii) úsáidí digiteacha d’ábhar cosanta a éascú le haghaidh oideachais, taighde agus caomhnú sa mhargadh aonair; agus (iii) a áirithiú go bhfeidhmíonn an margadh cóipchirt ar líne go héifeachtach le haghaidh gach gníomhaí agus go soláthraítear ann na dreasachtaí cearta chun infheistíocht a dhéanamh in ábhar cruthaitheach agus chun é a scaipeadh.

Cén luach breise a bhaineann le gníomhaíocht ar leibhéal an Aontais (coimhdeacht)?

Trí dhíriú ar fheidhmiú rialacha an Aontais maidir le cóipcheart sa timpeallacht dhigiteach agus ar líne, féachtar sa mheasúnú tionchair seo ar fhadhbanna a bhfuil gné thábhachtach thrasteorann ag baint leo.

Maidir leis an gcéad réimse, d’fhéadfaí ilroinnt bhreise a ghiniúint sa Mhargadh Aonair Digiteach mar thoradh ar réitigh náisiúnta ar na fadhbanna thuasluaite a bhaineann le rochtain ar líne ar ábhar, lena náirítear rochtain trasteorann. Dá bhrí sin, ba cheart cur chuige comhchoiteann agus gníomhaíocht chomhchoiteann a sholáthar ar leibhéal an Aontais chun tairbhí soiléire a chur ar fáil.

Maidir leis an dara réimse, tá teorainn ar chumas na mBallstát gníomhú i réimse an chóipchirt faoi leibhéal reatha an chomhchuibhithe, toisc nach bhféadfaidh siad raon feidhme na gceart agus na neisceachtaí comhchuibhithe a athrú go haontaobhach. Ina theannta sin, tá idirghabháil ón Aontas fíor-riachtanach chun deimhneacht dhlíthiúil a áirithiú i gcásanna trasteorann. Maidir leis an tríú réimse, eascraíonn an réasúnaíocht is bun le gníomhaíocht an Aontais ón gcomhchuibhiú atá i bhfeidhm cheana féin (go háirithe i dtéarmaí na gceart) agus ó chineál trasteorann an dáileacháin ábhair ar líne araon. Ní bheadh idirghabháil ar an leibhéal náisiúnta éifeachtúil go leor chun dul i ngleic leis na fadhbanna a sainaithníodh (go háirithe mar bheadh easpa scála uirthi) agus d’fhéadfaí bacainní nua agus ilroinnt margaí a chruthú léi. Tá gníomh ar leibhéal an Aontais riachtanach d’fhonn deimhneacht dhlíthiúil a áirithiú do chruthaitheoirí agus dóibh siúd a dhéanann infheistíocht in ábhar, do dháileoirí agus d’úsáideoirí. Chuirfí leis freisin ar chumas úsáideoirí a gcearta a fheidhmiú sa timpeallacht ar líne agus cothroime iomaíochta sa Mhargadh Aonair Digiteach a áirithiú.

B. Réitigh

Cad iad na roghanna éagsúla chun na cuspóirí a bhaint amach? An bhfuil rogha tosaíochta ann? Mura bhfuil, cén fáth?

I measc na roghanna ar féachadh orthu le haghaidh gach topaice, áirítear an rogha bonnlíne, rogha neamhreachtach (i bhfoirm treoraíocht nó moladh ón gCoimisiún agus idirphlé le páirtithe leasmhara) i bhformhór na gcásanna agus aon rogha reachtach amháin nó níos mó. Sainaithníodh rogha tosaíochta le haghaidh gach topaice.

I réimse na rochtana ar ábhar ar líne, déantar iniúchadh sna roghanna reachtacha ar chórais cheadúnúcháin éagsúla, a meastar iad mar shásraí cumasúcháin chun imréiteach ceart a éascú.

•Is é an rogha tosaíochta maidir le tarchur ar líne de chuid eagraíochtaí craoltóireachta cur i bhfeidhm phrionsabal na tíre tionscnaimh ar imréiteach ceart le haghaidh a seirbhísí ar líne atá coimhdeach lena gcraoladh tosaigh.

•Maidir le hatarchur dhigiteacha clár teilifíse/raidió, is é an rogha tosaíochta cur i bhfeidhm na comhbhainistíochta éigeantaí ceart ar sheirbhísí atarchuir arna soláthar thar líonraí cumarsáide leictreonaí “iata”.

•Maidir le ceadúnú ar chearta um fhíseán ar éileamh (cearta VoD), áirítear leis an rogha tosaíochta idirphlé do pháirtithe leasmhara Eorpacha agus sásra caibidlíochta lena néascófaí ceadúnais a thabhairt i gcrích le haghaidh saothrú saothar closamhairc ar líne trí bhaic chonarthacha a bhaint.

•Ar deireadh, i gcás saothar nach bhfuil ar fáil a thuilleadh lena gceannach (saothar OOC), is é idirghabháil reachtach ar leibhéal an Aontais an rogha tosaíochta lena gcuirfí ar chumas na mBallstát sásraí dlíthiúla sonracha a chur i bhfeidhm chun comhaontuithe comhcheadúnúcháin a thabhairt i gcrích le haghaidh úsáid na saothar sin ag institiúidí oidhreachta cultúrtha (IOCanna) agus ar bhonn éifeacht trasteorann a thabhairt isteach le haghaidh comhaontuithe den sórt sin.

Maidir le heisceachtaí, tá na roghanna beartais ceaptha ar shlí chun na heisceachtaí reatha a chomhlánú (i gcás caomhnú agus teagaisc) nó chun eisceacht nua a thabhairt isteach le haghaidh úsáidí sonracha (e.g. mianadóireacht téacsanna agus sonraí). Tá roghanna éagsúla beartaithe, le héagsúlachtaí maidir le raon feidhme na heisceachta, leis na tairbhithe agus leis an gcaidreamh leis an margadh ceadúnúcháin.

•Is é an rogha tosaíochta le haghaidh gníomhaíochtaí teagaisc eisceacht éigeantach lena gcuimseofaí úsáidí digiteacha arna ndéanamh i gcomhthéacs an léirithe don teagasc mar aon le rogha do na Ballstáit é a chur faoi réir ceadúnais leordhóthanacha a bheith ar fáil lena gcuimseofaí na húsáidí céanna (úsáidí digiteacha agus trasteorann).

•I gcás mianadóireacht téacsanna, is é an rogha tosaíochta eisceacht éigeantach infheidhme ar eagraíochtaí taighde ag gníomhú ar mhaithe le leas an phobail amhail ollscoileanna nó institiúidí taighde. Chuirfí ar a gcumas leis an eisceacht mianadóireacht téacsanna a dhéanamh ar ábhar a bhfuil rochtain dhleathach acu air, chun críocha taighde eolaíoch.

•I gcás caomhnú na hoidhreachta cultúrtha, is é an rogha tosaíochta eisceacht éigeantach chun críocha caomhnaithe arna dhéanamh ag institiúidí oidhreachta cultúrtha (IOCanna).

Maidir le feidhmiú an mhargaidh cóipchirt, tá mar aidhm leis na roghanna reachtacha a breithníodh comhroinnt chothrom an luacha a áirithiú sa timpeallacht ar líne, go háirithe trí oibleagáidí sonracha a thabhairt isteach maidir le cineálacha áirithe seirbhísí ar líne nó maidir leo sin a dhéanann conradh le húdair agus le taibheoirí.

•Maidir le húsáid ábhair ag seirbhísí ábhair arna uaslódáil ag úsáideoirí, is é an réiteach tosaíochta oibleagáid a chur ar sheirbhísí ar líne lena stóráiltear méid mór ábhair arna uaslódáil ag a núsáideoirí agus lena dtugtar rochtain air sin chun teicneolaíochtaí iomchuí agus comhréireacha a chur i bhfeidhm, agus chun an trédhearcacht a mhéadú i leith sealbhóirí cirt.

•Maidir leis na cearta i bhfoilseacháin, is é an réiteach tosaíochta go dtabharfaí isteach i ndlí an Aontais ceart gaolmhar le haghaidh foilsitheoirí lena gcuimseofaí úsáidí digiteacha a bhfoilseachán nuachtán agus foráil lena gcumasófaí na Ballstáit le cur ar chumas gach foilsitheora (nuachta, leabhar, eolaíoch, etc.) sciar den chúiteamh a fháil le haghaidh úsáidí faoi eisceacht.

•Maidir leis an easpa trédhearcachta i leith luach saothair a íoc le cruthaitheoirí, is é atá sa rogha tosaíochta oibleagáidí trédhearcachta ar chontrapháirtithe conarthacha na gcruthaitheoirí (go háirithe léiritheoirí agus foilsitheoirí) a thabhairt isteach i reachtaíocht AE, agus sásra coigeartaithe conarthaí agus réitigh díospóidí mar thacaíocht leo.

Cad iad dearcadh na bpáirtithe leasmhara éagsúla? Cé a thacaíonn leis na roghanna faoi seach?

Bheadh tionchar ag na roghanna ar ar féachadh sa mheasúnú tionchair seo ar raon leathan páirtithe leasmhara, go háirithe: údair agus taibheoirí, eagraíochtaí comhbhainistíochta, léiritheoirí, foilsitheoirí, craoltóirí, soláthraithe seirbhísí atarchuir, dáileoirí, seirbhísí ar líne, úsáideoirí institiúideacha, taighdeoirí, tomhaltóirí. Baineann dearcthaí na bpáirtithe leasmhara go sonrach le gach aon topaic agus, dá bhrí sin, tá siad curtha i láthair i leith gach rogha sa mheasúnú tionchair. Na torthaí ar na comhairliúcháin phoiblí a reáchtáladh in 2013-2016 lena dtacaítear leis an anailís sa mheasúnú tionchair seo, tá siad curtha i láthair in Iarscríbhinn 2.

C. Tionchair na rogha tosaíochta

Cé na tairbhí a bhaineann leis an rogha tosaíochta (nó, murab ann do rogha tosaíochta, cé na tairbhí a bhaineann leis na príomhroghanna)?

Leis na roghanna tosaíochta a sainaithníodh i ndáil le tarchur ar líne agus le hatarchur clár teilifíse agus raidió, laghdófaí na costais idirbhirt a bhaineann leis an imréiteach ceart atá ar chraoltóirí le haghaidh tarchur trasteorann ar líne agus ar sheirbhísí atarchuir arna soláthar thar líonraí cumarsáide leictreonaí “iata” (e.g. IPTV). Meastar freisin go gcuirfí feabhas leo ar dháileadh trasteorann clár teilifíse agus raidió leis na craoltóirí agus ar an rochtain orthu.

Maidir le ceadúnú ar chearta um fhíseán ar éileamh (cearta VoD), chabhródh an rogha tosaíochta le baic chonarthacha a bhaint agus, dá bhrí sin, d’fhéadfaí feabhas a chur leo ar infhaighteacht saothar closamhairc Eorpach ar ardáin VoD.

I gcás saothair nach bhfuil ar fáil a thuilleadh lena gceannach (saothair OOC), d’éascófaí laghdú ar chostais idirbhirt leis an rogha tosaíochta agus chuirfí i gcrích na ceadúnais shonracha atá riachtanach le haghaidh dhigitiú agus scaipeadh saothar den sórt sin ag institiúidí oidhreachta cultúrtha, le haghaidh gach cineáil saothair agus i ngach Ballstáit, lena náirítear thar theorainneacha.

Leis an eisceacht nua le haghaidh úsáidí digiteacha d’ábhar cosanta i gcomhthéacs an léirithe don teagasc, thabharfaí deimhneacht dhlíthiúil iomlán d’fhorais oideachais agus do mhúinteoirí, agus táthar ag súil go méadófar leis sin cáilíocht na dteicneolaíochtaí digiteacha agus modhanna nuálacha san oideachas, gur fearr a ghlacfar leo, go gcuirfear timpeallacht foghlama shaibhrithe ar fáil do lucht foghlama agus gur fearr na torthaí a bheidh ann dóibh. Leis an bhféidearthacht do Bhallstáit an eisceacht a chur faoi réir ceadúnais a bheith ar fáil lena gcuimseofaí na húsáidí céanna, sholáthrófaí an tsolúbthacht riachtanach gan an deimhneacht dhlíthiúil a laghdú le haghaidh úsáideoirí ná gan cur isteach ar úsáidí trasteorann.

Mhéadófaí an deimhneacht dhlíthiúil leis an eisceacht nua i leith mianadóireacht téacsanna agus laghdófaí na costais ar imréiteach ceart le haghaidh eagraíochtaí taighde, lena náirítear tionscadail taighde a bhféadfadh toradh tráchtála a bheith leo, e.g. i gcomhthéacsanna comhpháirtíochtaí príobháideacha poiblí.

Leis an rogha tosaíochta don chaomhnú, sholáthrófaí deimhneacht dhlíthiúil iomlán d’IOC a dhéanfadh atáirgeadh ar shaothair ina mbailiúcháin bhuana chun críche caomhnaithe, lena náirítear le teicneolaíochtaí digiteacha.

Sa tríú réimse atá cuimsithe faoin measúnú tionchair seo, meastar go gcuirfí ar chumas na sealbhóirí cirt leis na roghanna tosaíochta dáileadh a nábhair ar líne a shaothrú agus a rialú níos fearr. Leis an oibleagáid ar sheirbhísí ábhair arna uaslódáil ag úsáideoirí meáin theicniúla a úsáid, chuirfí ar chumas sealbhóirí cirt cinneadh níos fearr a dhéanamh ar infhaighteacht a nábhair ar na seirbhísí sin. Is dócha go spreagfaí leis tabhairt i gcrích comhaontuithe maidir le húsáid ábhair agus go nginfí ioncam breise le haghaidh sealbhóirí cirt.

Maidir le foilsitheoirí nuachtán, mhéadófaí leis an rogha tosaíochta a ndeimhneacht dhlíthiúil, neartófaí a suíomh margála, agus bheadh tionchar dearfach ag an rogha ar a gcumas ábhar a cheadúnú agus na cearta a fhorfheidhmiú i leith a bhfoilseachán nuachtán. Ina theannta sin, mhéadófaí an deimhneacht dhlíthiúil le haghaidh gach foilsitheora maidir leis an bhféidearthacht go bhfaigheadh sé sciar den chúiteamh as úsáid saothar atá faoi eisceacht.

Leis na hoibleagáidí trédhearcachta arna bhforchur ar a gcontrapháirtithe conarthacha, sholáthrófaí an fhaisnéis riachtanach do chruthaitheoirí le measúnú an bhfuil a luach saothair iomchuí agus sholáthrófaí an cumas dlíthiúil dóibh, dá mba gá leis, coigeartú ar an luach saothair a iarraidh (sásra coigeartaithe chonarthaigh).

Cé na costais a bhaineann leis an rogha tosaíochta (nó, murab ann do rogha tosaíochta, cé na costais a bhaineann leis na príomhroghanna)? 

Staid nua a bheadh i gcur i bhfeidhm phrionsabal na tíre tionscnaimh i leith imréiteach cirt i gcás seirbhísí coimhdeacha ar líne de chuid craoltóirí le haghaidh sealbhóirí cirt agus a nábhar á cheadúnú acu do chraoltóirí i gcomhair tarchur ar líne. Mar sin féin, is idirghabháil spriocdhírithe atá ann (atá teoranta do sheirbhísí coimhdeacha ar líne de chuid craoltóirí agus gan tionchar aici ar shaoirse chonarthach craoltóirí agus sealbhóirí cirt) agus meastar go néascófaí léi forbairt an mhargaidh gan cur isteach ar na samhlacha gnó ná ar na straitéisí dáileacháin atá ann cheana féin.

Bheadh tionchar ar bhealach teoranta ar roghanna ceadúnúcháin na sealbhóirí cirt ag baint le cur i bhfeidhm na comhbhainistíochta éigeantaí le haghaidh cineálacha áirithe seirbhísí atarchuir digiteacha. Ba imeallach na costais comhlíonta mar d’fhéadfaí an líonra eagraíochtaí comhbhainistíochta a úsáidtear chun cearta a cheadúnú i leith atarchur cábla a úsáid freisin chun cearta a cheadúnú i leith atarchur ar mheáin eile seachas ar chábla.

I dtaca leis an sásra caibidlíochta a bhfuil sé mar aidhm leis ceadúnú ar chearta um fhíseán ar éileamh (cearta VoD) a éascú, ba theoranta na costais cur chun feidhme mar d’fhéadfadh Ballstáit dul i muinín struchtúir reatha ag a bhfuil an saineolas riachtanach. D’fhéadfadh páirtithe leasmhara (sealbhóirí cirt, dáileoirí, ardáin VoD) roinnt costas a thabhú as páirt a ghlacadh sa sásra caibidlíochta. Dhéanfaí cúiteamh ar na costais sin leis na gnóthachain san éifeachtúlacht a d’eascródh as caibidlíocht rathúil.

Ní bheadh aon chostais dhíreacha mar sin i gceist leis an rogha tosaíochta le haghaidh saothair nach bhfuil ar fáil a thuilleadh lena gceannach (saothair OOC). I gcás ina núsáidfí na sásraí dlíthiúla, thabhódh eagraíochtaí comhbhainistíochta roinnt costas a bhainfeadh le riachtanais trédhearcachta, láimhseáil diúltuithe, agus riar an cheadúnais.

I réimse na neisceachtaí, ní mheastar go mbeidh tionchar ag na roghanna tosaíochta ar ioncam ceadúnúcháin na sealbhóirí cirt ar bhonn suntasach. D’fhéadfaí go dtiocfadh costais comhlíonta anteoranta chun cinn ón ngá a bhaineann le raon feidhme na gceadúnas reatha a oiriúnú chun na heisceachtaí nua a chur san áireamh.

Don teagasc, ní mheastar go mbeidh tionchar ag an eisceacht nua ar phríomh-mhargadh na sealbhóirí cirt, go háirithe mar gheall ar chuspóir na heisceachta agus na coinníollacha a bhaineann léi (léiriú le haghaidh an teagaisc, úsáidí digiteacha faoi líonraí leictreonacha sábháilte). D’fhéadfaí go mbeadh costais comhlíonta ag baint léi i gcás Ballstáit a chinneann cur i bhfeidhm na heisceachta a chur faoi réir ceadúnais a bheith ar fáil lena gcuimseofaí na húsáidí céanna, mar gheall ar an riachtanas infhaighteacht agus infheictheacht na gceadúnas sin a áirithiú. Mar sin féin, leis na costais sin, d’fhéadfaí ualach riaracháin na bhforas oideachais a laghdú go suntasach.

I gcás mianadóireacht téacsanna, d’áiritheofaí leis an gcoinníoll um rochtain dhleathach a fhoráiltear le haghaidh úsáid na heisceachta nach mbeadh tionchar ag an rogha tosaíochta ar mhargadh síntiúis na sealbhóirí cirt.

Ní ghinfear costais comhlíonta ar leith leis an rogha tosaíochta le haghaidh chaomhnú na hoidhreachta cultúrtha; ní bheadh i gceist ach tionchar anbheag nó diomaibhseach ar ioncam do shealbhóirí cirt, mar ní bheadh feidhm ag an eisceacht seo maidir le saothair atá ina mbailiúcháin bhuana cheana féin ag IOCanna agus ní bheadh aon bhaint aici le sealbhú cóipeanna buana i mbailiúchán. 

I gcás seirbhísí ar líne lena ndáiltear ábhar arna uaslódáil ag úsáideoirí deiridh, bheadh costais comhlíonta ann ag eascairt as na teicneolaíochtaí atá le cur i bhfeidhm. Bheadh na costais sin ag brath ar mhéid agus ar chineál an ábhair atá le sainaithint. Meastar go mbeidh siad teoranta toisc nach mór do na teicneolaíochtaí atá le cur i bhfeidhm a bheith comhréireach, agus toisc go núsáidtear roinnt teicneolaíochtaí sainaitheanta ábhair cheana féin i bhformhór na seirbhísí arna gcuimsiú.

Ní mheastar go nginfear táillí ceadúnais níos airde do sholáthraithe seirbhíse ar líne a dhéanann ceadúnais a thabhairt i gcrích cheana féin lena gcuimsítear go sonrach úsáid ábhair nuachta dhigitigh de bharr tabhairt isteach cirt ghaolmhair lena gcuimsítear úsáidí ar líne d’fhoilseacháin nuachta. Ní bheadh intuigthe leis ach costais le haghaidh na soláthraithe seirbhíse ar líne sin nach ndéanann ceadúnais a thabhairt i gcrích faoi láthair maidir le hathúsáid ábhair ó fhoilsitheoirí nuair is ceart dóibh, i bprionsabal, a leithéid a dhéanamh, de bhun dhlí an chóipchirt. Ní mheastar go nginfear costais mar thoradh ar an bhféidearthacht do Bhallstáit cur ar chumas gach foilsitheora sciar den chúiteamh a fháil as úsáidí faoi eisceacht ós rud é go bhfuil cumainn bailithe dleachtanna, atá i gceannas ar chúiteamh a bhailiú le haghaidh foilsitheoirí, i bhfeidhm cheana féin i bhformhór na mBallstát. Maidir le luach saothair a íoc le cruthaitheoirí, ghinfeadh na hoibleagáidí trédhearcachta costais comhlíonta do chontrapháirtithe conarthacha, ach meastar go mbeidh na costais sin réasúnta áfach. Níorbh fhéidir cainníochtú foriomlán a dhéanamh ar na costais sin mar gheall nach raibh ach líon anteoranta sonraí ar fáil; mar sin féin, tá meastacháin san áireamh leis an measúnú tionchair bunaithe ar an líon beag samplaí atá tuairiscithe ag páirtithe leasmhara. Meastar go nginfear costais theoranta leis an sásra coigeartaithe conarthaí (e.g. costais athchaibidlíochta) toisc gur dócha go núsáidfear é go príomha chun tionchar a imirt ar chaibidlíocht. D’fhéadfadh na Ballstáit úsáid a bhaint as struchtúir reatha chun laghdú a dhéanamh ar na costais fhéideartha a bhaineann leis an sásra réitigh díospóidí a chur ar bun.

Cén tionchar a bheidh ar fhiontair bheaga agus mheánmhéide agus ar an iomaíochas?

Tugadh aird sa mheasúnú ar na roghanna beartais ar an gcion ard FBManna sna tionscail chruthaitheacha. Meastar go rachaidh na roghanna tosaíochta i réimse na rochtana ar ábhar chun tairbhe FBManna (mar chraoltóirí teilifíse/raidió, soláthraithe seirbhísí nó sealbhóirí cirt), trí laghdú a dhéanamh ar an ualach riaracháin a bhaineann le himréiteach nó le ceadúnú ceart. I gcás eisceachtaí, is réitigh atá sna roghanna tosaíochta agus ní mheastar go mbeidh tionchar mór acu ar mhargadh ceadúnúcháin nó ar ioncam FBManna (sealbhóirí cirt). Meastar nach iomchuí micreachuideachtaí a eisiamh mar chruthófaí leis sin éiginnteacht mhór dhlíthiúil d’úsáideoirí.

Sa tríú réimse den mheasúnú tionchair seo, thacódh na roghanna tosaíochta le FBManna (sealbhóirí cirt) comhaontuithe a thabhairt i gcrích le seirbhísí ábhair ar líne. I gcás ina nginfí oibleagáidí do FBManna leo, meastar nach iomchuí díolúintí ná bearta maolaithe mar d’fhéadfaí féidearthachtaí a chruthú leo go mbeadh ar chumas gnólachtaí dul timpeall ar na hoibleagáidí agus nach bhféadfaí na cuspóirí inmhianaithe a bhaint amach dá bharr sin.

An mbeidh tionchar suntasach ar bhuiséid náisiúnta agus ar údaráis riaracháin náisiúnta?

Ní ghinfear aon tionchar mór ar bhuiséid ná ar rialtais náisiúnta de bharr na roghanna tosaíochta. Mar sin féin, áirítear oibleagáidí sonracha do Bhallstáit le roghanna áirithe, e.g. fóram neamhchlaonta a shainaithint nó a chruthú chun an chaibidlíocht idir na páirtithe ábhartha maidir le ceadúnú ar chearta um fhíseán ar éileamh (cearta VoD) a éascú; bearta chun infheictheacht ceadúnas le haghaidh úsáidí oideachais a áirithiú; eagrú idirphlé na bpáirtithe leasmhara maidir le tuairisciú d’údair agus do ghníomhaithe agus sásra réitigh díospóidí a chur ar bun idir údair/taibheoirí agus a gcontrapháirtithe conarthacha. Tá léirithe ar chostais, i gcás ina bhfuil siad ar fáil, luaite sna ranna ábhartha den mheasúnú tionchair.

An mbeidh aon tionchair shuntasacha eile ann? 

Neamhbhainteach.

Comhréireacht?

Tá na roghanna tosaíochta leagtha amach d’fhonn dul i ngleic leis na fadhbanna bunaidh gan dul thar a bhfuil riachtanach chun na cuspóirí a bhaint amach. Eisiadh roghanna eile, agus raon feidhme níos fairsinge ag baint leo uaireanta, mar ní fhéadfaí freagairt chothrom chomhréireach a thabhairt leo ar na fadhbanna atá curtha i láthair sa mheasúnú tionchair seo.

D. Gníomhaíocht leantach

Cén uair a dhéanfar athbhreithniú ar an mbeartas?

Sainíodh táscairí sonracha chun faireachán a dhéanamh ar an dul chun cinn maidir le baint amach na gcuspóirí, agus foráiltear go ndéanfar sonraí a bhailiú gach 2 bhliain nó gach 3 bliana. D’fhéadfaí meastóireacht chuimsitheach a dhéanamh 10 mbliana ar a dhéanaí tar éis ghlacadh na mbeart reachtach d’fhonn a dtionchar agus a mbreisluach a thomhas.