(1)

Le Rialachán (AE, Euratom) 2022/2434 ó Pharlaimint na hEorpa agus ón gComhairle (2), tugadh isteach an straitéis cistiúcháin éagsúlaithe mar mhodh cistiúcháin aonair chun oibríochtaí iasachtaíochta agus bainistithe fiachais arna ndéanamh ag an gCoimisiún a chur chun feidhme i Rialachán (AE, Euratom) 2018/1046. Tá feidhm ag an straitéis cistiúcháin éagsúlaithe, ach amháin i gcásanna a bhfuil údar cuí leo, maidir le cláir cúnaimh airgeadais ar tháinig na bunghníomhartha ina leith i bhfeidhm an 9 Samhain 2022 nó ina dhiaidh sin.

(2)

Ba cheart don Choimisiún na socruithe is gá a bhunú chun an straitéis cistiúcháin éagsúlaithe a chur chun feidhme. Chun an straitéis cistiúcháin éagsúlaithe a chur i bhfeidhm, is gá sraith rialacha a ghlacadh chun leithdháileadh na gcostas faoi seach ar na cláir cúnaimh airgeadais ábhartha a chinneadh, agus ba cheart a áirithiú leis sin go ndéanfar na costais uile arna dtabhú ag an Aontas a bhaineann le cúnamh airgeadais a ghearradh ar thairbhí na bhfáltas ó iasachtaíocht.

(3)

Le Cinneadh Cur Chun Feidhme (AE) 2021/1095 (3) ón gCoimisiún, bunaíodh an mhodheolaíocht [den chéad uair] chun na costais a bhaineann le cur chun feidhme na straitéise cistiúcháin éagsúlaithe faoi NextGenerationEU (NGEU) a leithdháileadh. Le Cinneadh Cur Chun Feidhme (AE, Euratom) 2022/2545 (4) ón gCoimisiún, leathnaíodh na socruithe sin chuig gach oibríocht iasachtaíochta agus bainistithe fiachais a dhéantar faoin straitéis cistiúcháin éagsúlaithe de bhun Airteagal 220a de Rialachán (AE, Euratom) 2018/1046 trí choigeartuithe spriocdhírithe ar an modheolaíocht leithdháilte costas.

(4)

An oibleagáid chun costais a bhaineann le cúnamh airgeadais a chumhdach, ba cheart an oibleagáid sin a fhágáil faoi thairbhithe an chúnaimh airgeadais, i gcomhréir le hAirteagal 220(5), pointe (e) de Rialachán (EU, Euratom) 2018/1046 agus i gcomhréir le prionsabail bhuiséadacha na bainistíochta fónta airgeadais agus na cothromaíochta. Ba cheart na costais uile a ghearradh ar na tairbhithe bunaithe ar mhodheolaíocht aonair maidir le leithdháileadh costas lena n-áirithítear go leithdháiltear na costais ar bhealach trédhearcach comhréireach.

(5)

Leis an modheolaíocht maidir le leithdháileadh costas, ba cheart a áirithiú nach mbeidh aon tras-fhóirdheonú costas á dhéanamh ag catagóir tairbhí amháin thar ceann catagóir tairbhí eile. Ba cheart costais na n-iasachtaí a chur i leith thairbhithe na n-iasachtaí sin go hiomlán, ar thaobh amháin, agus, i gcás inarb infheidhme, costais neamh-inaisíoctha a chur i leith bhuiséad ginearálta an Aontais, ar an taobh eile, bunaithe ar na costais iarbhír a thabhaítear agus sciar na bhfáltas faoi seach á chruinniú agus á eisíoc leis na tairbhithe éagsúla. Ba cheart na costais uile a thabhaíonn an tAontas i leith oibríochtaí iasachtaíochta agus bainistíochta fiachais a bheith cumhdaithe sa mhodheolaíocht, lena n-áirítear na costais riaracháin uile, agus ba cheart a áirithiú léi go ndéanfaí catagóirí éagsúla costas a ríomh le haghaidh gach eisíocaíochta.

(6)

Chun cóir chothrom agus chomhionann a áirithiú idir tairbhithe, ba cheart modheolaíocht choiteann aontaithe le haghaidh costas a chur chun feidhme, modheolaíocht a bheadh infheidhme maidir le gach cineál eisíocaíochta, is é sin le rá iad sin a aisíoctar le buiséad ginearálta an Aontais agus iad sin a aisíocann tairbhithe. Ba cheart costais a iontráil go barúlach do na tairbhithe ar bhonn sciar na bhfáltas a fhaightear.

(7)

An mhodheolaíocht maidir le leithdháileadh costas, ba cheart di idirdhealú a dhéanamh idir trí chatagóir costais: costas an chistithe, costas na bainistíocha leachtachta agus costais riaracháin. Eascraíonn costas an chistithe as an ráta úis agus as muirir eile atá le híoc ag an gCoimisiún ar na hionstraimí éagsúla a eisítear chun na heisíocaíochtaí atá i gceist a mhaoiniú. Is iad costais na bainistíocha leachtachta na costais a thabhaítear mar thoradh ar shuimeanna a eisítear agus a shealbhaítear go sealadach i gcuntais leachtachta mar chúlchistí chun íocaíochtaí atá ag teacht chun cinn a íoc. Is gné fhíor-riachtanach den straitéis cistiúcháin éagsúlaithe é an forchostas oibríochtúil leanúnach sin agus ba cheart é a roinnt go cothrom ar na dtairbhithe go léir. Is éard atá sa tríú catagóir costais na costais riaracháin a bhaineann leis an acmhainneacht theicniúil agus oibríochtúil a choinneáil ar bun chun straitéis cistiúcháin éagsúlaithe a chur chun feidhme, a thagann chun cinn go díreach mar thoradh ar chur chun feidhme na straitéise cistiúcháin éagsúlaithe.

(8)

Má tá fad agus struchtúr difriúil ag cláir chúnaimh airgeadais, arna gcistiú tríd an straitéis cistiúcháin éagsúlaithe, le NGEU agus leis na hiasachtaí faoi Rialachán (AE) 2022/2463 ó Pharlaimint na hEorpa agus ón gComhairle (5), is iomchuí foráil a dhéanamh le haghaidh solúbthacht bhreise tríd an modheolaíocht maidir le leithdháileadh costas a leasú. Foráiltear le Cinneadh Cur Chun Feidhme (AE, Euratom) 2022/2545 go ndéanfar athbhreithniú ar oiriúnacht mhodheolaíocht chostála NGEU i gcás cláir nua cúnaimh airgeadais a ghlacadh a bhfuil fad agus struchtúr difriúil acu.

(9)

Chun an tsolúbthacht inmhianaithe a sholáthar, ba cheart a áireamh sa mhodheolaíocht leithdháilte costas an coincheap maidir le hurranna cláir chun leithdháileadh eisíocaíochtaí agus ionstraimí cistiúcháin gaolmhara in aghaidh an chláir a eagrú agus faireachán a dhéanamh orthu. D’fhágfadh sé sin go bhféadfaí ionstraimí cistiúcháin a shannadh do shaintréithe airgeadais clárshonracha, agus foráil a dhéanamh maidir le bainistiú saincheaptha dliteanais trí rogha chalabraithe aibíochtaí. Le tabhairt isteach na n-urrann cláir, sheachnófaí tras-fhóirdheonú costas ó chlár amháin go clár eile.

(10)

Ba cheart é sin a bheith i gcomhréir freisin le creat an chórais rialachais arna bhunú le Cinneadh Cur Chun Feidhme (AE, Euratom) 2023/2825 ón gCoimisiún (6), lena bhforáiltear go bhfuil sannadh ionstraimí cistiúcháin ar fud na gclár le cinneadh ag féachaint do na spriocanna aibíochta faoi seach agus do shrianta sonracha na gclár éagsúil.

(11)

Ba cheart meánsprioc aibíochta agus méideanna sealadacha na n-oibríochtaí cistiúcháin a léiriú in aghaidh an chláir trí chinntí maidir le plean cistiúcháin arna nglacadh faoi Airteagal 4 de Chinneadh Cur Chun Feidhme (AE, Euratom) 2023/2825. Leis na spriocanna a leagtar síos in aghaidh an chláir, laistigh de na teorainneacha foriomlána a leagtar síos leis an gcinneadh bliantúil iasachtaíochta, soláthraítear treoshuíomh neamhcheangailteach maidir leis na leibhéil atá le baint amach ag deireadh na tréimhse cistiúcháin, ag glacadh leis go bhfanfaidh riachtanais chistiúcháin gan athrú. Le linn na tréimhse ina mbunaítear urrann cláir nó urrann ama, d’fhéadfadh difríocht a bheith idir meánaibíocht ualaithe na n-ionstraimí cistiúcháin in aghaidh an chláir agus an cuspóir ag deireadh na tréimhse. Ba cheart don Choimisiún ionstraimí cistiúcháin a leithdháileadh ar na hurranna éagsúla thar na seimeastair ábhartha, agus na hidirbhearta iasachtaíochta atá fágtha agus atá beartaithe a dhéanamh sa chuid eile den tréimhse chistiúcháin á gcur san áireamh. Agus an méid sin á dhéanamh aige, ba cheart don Choimisiún a áirithiú, a mhéid is féidir leis, go mbainfear amach go cothromasach na meánspriocanna aibíochta éagsúla do gach clár cúnaimh airgeadais faoi raon feidhme Airteagal 220a de Rialachán (AE, Euratom) 2018/1046, agus tacaíocht neamh-inaisíoctha faoi Airteagal 5(1) de Chinneadh (AE, Euratom) 2020/2053 ón gComhairle (7), thar thréimhse iomlán an chistithe. Agus oibríochtaí iasachtaíochta á gcur i gcrích aige, ba cheart don Choimisiún tús áite a thabhairt do bhaint amach na dtéarmaí is buntáistí, agus breithniú a dhéanamh ar na meánspriocanna aibíochta faoi seach a bhaint amach go cothrom ar fud na n-urrann cláir ar leibhéal an leithdháilte mar chuspóir tánaisteach. Ba cheart don Choimisiún baint amach na spriocanna sin a nuashonrú agus faireachán a dhéanamh orthu ar bhonn rialta.

(12)

Ba cheart urrann chláir a chruthú ar theacht i bhfeidhm aon chláir nua cúnaimh airgeadais atá le maoiniú le hidirbhearta arna gcur chun feidhme faoin straitéis cistiúcháin éagsúlaithe. Ba cheart urranna cláir a thiomnú do thairbhí aonair amháin nó do roinnt tairbhithe, ag brath ar cibé acu a cheadaítear nó nach gceadaítear ach tairbhí amháin nó roinnt tairbhithe den chúnamh airgeadais le bunghníomh cláir.

(13)

I gcás cláir lenar féidir cúnamh airgeadais a dhámhachtain do níos mó ná tairbhí amháin, ba cheart eisíocaíochtaí agus ionstraimí cistiúcháin gaolmhara laistigh d’urrann chláir thiomnaithe a roinnt a thuilleadh ina n-urranna ama chun a áirithiú go mbeidh dlúthnasc idir costas an chistithe a ghearrtar ar eisíocaíocht an tairbhí sin agus na rátaí margaidh atá i réim tráth na heisíocaíochta. Cobhsaítear costas an chistithe tráth a dhúntar an urrann ama.

(14)

Maidir le hurrann chláir a bhaineann le clár cúnaimh airgeadais atá ceaptha chun freastal ar thairbhí aonair, ní gá í a fhoroinnt ina n-urranna ama ós rud é go bhfabhraíonn na costais uile chuig an tairbhí céanna.

(15)

Maidir le hurranna cláir a chur isteach faoin gCinneadh seo, níor cheart tionchar a bheith aige sin ar an leithdháileadh costas atá ann cheana i gcás aon cheann de na cláir a bhfuil feidhm ag modheolaíocht an leithdháilte costas maidir leo cheana. Chun an méid sin a bhaint amach, ba cheart eisíocaíochtaí a dhéantar roimh theacht i bhfeidhm an Chinnidh seo, faoi NGEU, Rialachán (AE) 2022/2463, agus aon chlár CAM eile a bhí i bhfeidhm roimh a theacht i bhfeidhm, chomh maith le hionstraimí cistiúcháin atá leithdháilte cheana féin ar urranna ama atá ann cheana faoi Chinneadh Cur Chun Feidhme (AE, Euratom) 2022/2545, a chuachadh faoi urrann chláir leagáide thiomnaithe ina bhfuil urranna ama. Ba cheart go n-áireofaí san urrann chláir leagáide sin na hurranna ama go léir atá bunaithe cheana chun na cláir sin a chistiú chomh maith le haon eisíocaíochtaí amach anseo agus aon ionstraim cistiúcháin gaolmhara a bhaineann leis na cláir sin. Áiritheofar leis sin nach ndéanfaidh an cur chuige nua aon difear do shannadh an chostais arna thabhú ag an gCoimisiún bunaithe ar an modheolaíocht leithdháilte atá ann cheana.

(16)

Ba cheart ríomh chostas an chistithe a eascraíonn as idirbhearta iasachtaíochta a bheith bunaithe ar na costais a eascraíonn as gach oibríocht iasachtaíochta laistigh d’urrann chláir agus, i gcás clár iltairbhí, laistigh d’aon urrann ama chomhfhreagrach. Ba cheart tairbhithe iasachta nó, i gcás an ioncaim shannta sheachtraigh faoi Airteagal 3(1) de Rialachán (AE) 2020/2094 ón gComhairle (8), buiséad ginearálta an Aontais a ghearradh ar chomhchéim nuair a leithdháiltear na costais ar thairbhithe in aon urrann chéanna amháin. An modh ina gcinntear costais thar fhad urrainne cláir nó urrainne ama, seachnaíonn sé sin an treallachas maidir le ‘pointe ar leith san am’ is dual don mhodh traidisiúnta droim-le-droim, modh inarbh iad na costais a bhí ar aon tairbhí ar leith na téarmaí ab fhéidir a fháil an lá áirithe ar tugadh an iasacht.

(17)

Ba cheart an urrann chláir a bheith gníomhach le linn na tréimhse iomláine ina ndéantar eisíocaíochtaí cláir thiomnaithe. Laistigh d’urrann chláir iltairbhí, níor cheart ach urrann ama ghníomhach amháin a bheith ann tráth ar bith. De ghnáth, ba cheart go rithfeadh urranna ama, nuair a bhunaítear iad, ar feadh seimeastair ag tosú an 1 Eanáir nó an 1 Iúil. I gcás urrann chláir leagáide, ba cheart don urrann ama chéaduaire an tréimhse ón 1 Meitheamh 2021 go dtí an 31 Nollaig 2021 a chumhdach, lena léirítear an t-am le haghaidh sheoladh oibríochtaí cistiúcháin NGEU. Mar riail ghinearálta, an chéad urrann ama de chlár ar leith, ba cheart í a chruthú sa tréimhse ina ndéantar an chéad eisíocaíocht. Ba cheart d’aon urrann ama nó d’aon urrann chláir leanúint de bheith gníomhach go dtí go mbeidh méid an chistithe fhadtéarmaigh a leithdháiltear air ag teacht le méid na n-eisíocaíochtaí. Mar sin féin, i gcás neamhréire ag deireadh an tseimeastair, ba cheart urrann ama a bheith gníomhach go dtí go mbeidh méid na heisíocaíochta agus méid na meaitseála cistiúcháin fadtéarmaí ann. Sa chás sin, ba cheart é a bheith indéanta leanúint d’eisíocaíochtaí a leithdháileadh go sealadach ar an urrann ama ghníomhach, agus ionstraimí cistiúcháin a shannadh go comhuaineach don urrann ama ina dhiaidh sin.

(18)

Cé go bhféadfadh costas an chistithe a bheith éagsúil le linn na tréimhse ina bhfuil urrann chláir nó, i gcás inarb infheidhme, urrann ama, gníomhach mar gheall ar dhifríochtaí i gcoinníollacha cistiúcháin nach bhfuil neart ag an gCoimisiún orthu, ba cheart don Choimisiún oibríochtaí iasachtaíochta agus bainistíochta fiachais a bhainistiú chun a áirithiú go mbainfidh gach urrann chláir agus, i gcás inarb infheidhme, urrann ama, a sprioc aibíochta faoi seach amach ar leibhéal inchomparáide agus tús áite á tabhairt i gcónaí do bhaint amach na dtéarmaí is buntáistí ar fud na gclár.

(19)

Le straitéis chistiúcháin an Choimisiúin is féidir riosca ráta úis agus rioscaí airgeadais eile a bhainistiú ar bhealach níos fearr. Cé go bhfuil coinne leis go mbeidh na rátaí úis a ghearrfar ar thairbhithe iasachta cobhsaí, b’fhéidir go mbeadh gá leis na rátaí a athríomh go tréimhsiúil agus go himeallach nuair is gá ionstraimí cistiúcháin fadtéarmacha atá ag dul in aibíocht a ionadú. Más gá, forbróidh an Coimisiún an cumas atá aige chun díorthaigh amhail babhtálacha a úsáid chun aon riosca ráta úis atá fágtha a bhainistiú agus chun an rogha iasachtaí ar rátaí seasta úis a thairiscint do thairbhí. Ba cheart don tairbhí a fheidhmíonn an rogha seo costais an ráta sheasta úis sin a íoc go hiomlán agus go heisiach.

(20)

Méideanna na n-eisíocaíochtaí in urrann chláir nó, i gcás inarb infheidhme, in urrann ama, ba cheart iad a bheith cothrom le méid na n-ionstraimí cistiúcháin fadtéarmacha a shanntar don urrann chláir nó don urrann ama áirithe sin. I bhformhór na gcásanna maidir le hurainn na gclár iltairbhithe, ba cheart go dtarlódh eisíocaíocht na bhfáltas san urrann ama chéanna le heisiúint na n-ionstraimí cistiúcháin fadtéarmacha a úsáidtear chun na fáltais a thiomsú, agus sannfar eisíocaíocht na bhfáltas sin don urrann ama chéanna sin. Mar sin féin, de dheasca moilleanna gan choinne maidir leis na heisíocaíochtaí a dhéanamh, d’fhéadfadh cásanna a bheith ann inar tiomsaíodh fáltais an chistithe fhadtéarmaigh ach nach féidir iad a eisíoc mar a bhí sceidealaithe ar dtús. Ba cheart an fhéidearthacht sin a chur san áireamh agus eisíocaíocht á leithdháileadh ar na hurranna ama éagsúla.

(21)

Is iomchuí foráil a dhéanamh freisin maidir le bheith in ann teacht roimh na riachtanais eisíocaíochta a thiocfaidh chun cinn go luath i saolré na chéad hurrainne ama eile, le linn na hurrainne ama roimhe sin. Chun freastal ar chásanna den sórt sin agus chun cistiú ar théarmaí buntáisteacha a áirithiú, ba cheart an deis a bheith ann ionstraimí cistiúcháin fadtéarmacha a shannadh don urrann ama seo a leanas.

(22)

Is gné lárnach den straitéis cistiúcháin éagsúlaithe é an cumas chun leachtacht na n-oibríochtaí cistiúcháin a bhainistiú trí rochtain a fháil ar iasachtaíocht ghearrthéarmach agus trí airgead tirim a shealbhú chun críocha stuamachta, agus is í an ghné is mó a shainíonn an straitéis sin í. Ba cheart go gcuirfeadh an bainistiú leachtachta sin ar chumas an Choimisiúin na riachtanais íocaíochta uile a chomhlíonadh agus eisiúint a chur in oiriúint do dhálaí an mhargaidh. Is iomchuí modhanna a leagan síos chun costais a ríomh a bhaineann le bainistiú leachtachta dá dtagraítear in Airteagail 6 agus 8 de Chinneadh Cur Chun Feidhme (AE, Euratom) 2023/2825. Orthu sin, ba cheart costais a chur san áireamh a eascraíonn as ionstraimí cistiúcháin gearrthéarmacha a eisiúint, agus roinnt fáltas á sealbhú ar bhonn sealadach ar chuntas leachtachta chun an cumas gach íocaíocht a dhéanamh ar éileamh agus bainistiú ráta úis agus riosca airgeadais eile a ráthú. Na costais a thabhaítear i ndáil le haischeannach agus/nó sealbhú bannaí dílse chun críocha bainistíochta leachtachta, ba cheart iad a mheas mar chostais bainistíochta leachtachta freisin. Ba cheart a bhunú leis an gCinneadh seo bonn chun na costais leachtachta sin a ríomh agus na costais leachtachta sin a mhuirearú ar bhonn cóir cothromasach ar gach tairbhí ábhartha fáltas in imeacht na bliana atá i gceist.

(23)

Na hoibríochtaí bainistithe leachtachta, ba cheart dóibh cuidiú le híoslaghdú a dhéanamh ar chostais bainistithe leachtachta a d’fhéadfaí a thabhú agus airgead tirim á shealbhú chun críoch stuamachta. Ba cheart an t-ús laethúil i ndáil le gach idirbheart agus táille trádála ionchasach nó agio/disagio a chuimsiú sa toradh ar infheistíocht sealúchas leachtachta atá mar thoradh ar idirbhearta urraithe nó neamhurraithe margaidh airgid. Ba cheart an toradh ar infheistíocht na n-oibríochtaí sin a bheith cothrom le suim na gcostas a bhaineann le leachtacht den sórt sin a eisiúint agus a shealbhú agus ba cheart aon toradh ar infheistíocht na sealúchas sin a chur i leith eisíocaíochtaí gan íoc ar bhonn pro rata gach ráithe.

(24)

Maidir le heisíocaíochtaí atá níos airde ná méid na n-ionstraimí cistiúcháin fadtéarmacha a leithdháiltear ar an urrann chláir nó, i gcás inarb infheidhme, ar an urrann ama, nó ar na híocaíochtaí úis faoi seach, d’fhéadfadh easnamh leachtachta urrainne ama a bheith ann mar thoradh orthu. Maidir le heisíocaíochtaí atá níos ísle ná méid na n-ionstraimí cistiúcháin fadtéarmacha a leithdháiltear ar an urrann chláir nó, i gcás inarb infheidhme, ar an urrann ama, nó ar na híocaíochtaí fuascailte faoi seach, d’féadfadh barrachas leachtachta a bheith ann mar thoradh orthu. Is ceanglais dhosheachanta maidir le cur chun feidhme na straitéise cistiúcháin éagsúlaithe iad na barrachais nó na heasnaimh leachtachta sin a chúiteamh. Níor cheart na costais sin a bheith ar na hurranna faoi seach, ach ba cheart iad a leithlisiú agus a bhainistiú mar chuid d’fhorchostas bainistíochta leachtachta ar leith. Ba cheart sásra a bhunú leis an gCinneadh seo chun costais a eascraíonn as easnaimh leachtachta nó barrachais leachtachta a dhínascadh ionas gur féidir iad a ionsú leis an gclár cistiúcháin níos leithne i bhfoirm costais bainistíochta leachtachta. Ba cheart don Choimisiún urrann na bainistíochta leachtachta a úsáid chun aon chomhardú airgid deimhneach nó diúltach sna hurranna cláir tairbhí aonair nó sna hurranna ama iltairbhí a chothromú le méid iomlán na n-eisíocaíochtaí.

(25)

Chun an straitéis cistiúcháin éagsúlaithe a chur chun feidhme, ní mór na cumais nua is gá a fháil chun an rochtain is buntáistí a fháil ar mhargaí caipitil agus chun a áirithiú go gcoinneofar an bonneagar sin ar bun ar bhealach leanúnach agus éifeachtach. Áirítear leis sin na costais is gá chun cuntais leachtachta a choinneáil ar bun, chun cumas a fháil ceantanna a reáchtáil do bhillí an Aontais agus do bhannaí an Aontais agus chun cumais próiseála sonraí inmheánacha nua a chur chun feidhme. Ba cheart costais den sórt sin a eascraíonn go díreach as cur chun feidhme oibríochtaí iasachtaíochta agus eisíocaíochta a láimhseáil mar fhorchostais lena ndéantar idirdhealú idir costais a bhaineann le bunú agus costais a bhaineann le cothabháil bhonneagar iasachtaíochta agus íocaíochta. Ba cheart na costais sin a chuimsiú le costas na seirbhíse le haghaidh forchostais riaracháin.

(26)

Cuimsíonn costas seirbhíse na bhforchostas riaracháin na costais riaracháin uile a thabhaítear go díreach i gcur chun feidhme na straitéise cistiúcháin éagsúlaithe. Tiocfaidh na costais sin chun cinn mar chostais bhunaithe, a bhaineann le costais aonuaire chun acmhainneachtaí oibríochtúla a thógáil nó mar chostais athfhillteacha, ar costais dhosheachanta iad atá insannta go díreach d’oibríochtaí iasachtaíochta agus bainistíochta fiachais faoin straitéis cistiúcháin éagsúlaithe agus a tharlaíonn le himeacht ama. Cé gur costais bhliantúla rialta a ghearrtar ar na heisíocaíochta in aon bhliain ar leith na costais athfhillteacha, ba cheart na costais bhunaithe a iontráil go barúlach mar mhuirir aonuaire.

(27)

Ó bhí 2021 ann, tabhaíodh costais a bhaineann le bunú agus fothú acmhainneachta na n-oibríochtaí sin agus tá siad sannta cheana féin do thairbhithe chláir tacaíochta airgeadais NGEU, trí fhorchostas shonrach costais bhunaithe. Dá bhrí sin, tairbhithe clár cúnaimh airgeadais eile faoi raon feidhme Airteagal 220a de Rialachán (AE, Euratom) 2018/1046, níor cheart go n-íocfaidís costais a bhaineann leis an bhfothú acmhainneachta roimhe sin seachas caiteachas amach anseo a bhaineann leis an mbonneagar sin a choinneáil ar bun nó é a fhorbairt a thuilleadh. Ba cheart sciar chostais riaracháin na gclár cúnaimh airgeadais faoi raon feidhme Airteagal 220a de Rialachán (AE, Euratom) 2018/1046, seachas NGEU, a chinneadh de réir sciar an chláir d’fháltais a cruinníodh tríd an straitéis cistiúcháin éagsúlaithe le linn na bliana inar tabhaíodh na costais riaracháin ábhartha.

(28)

Ba cheart na costais riaracháin a áirítear sa chostas seirbhíse le haghaidh forchostais riaracháin a theorannú do liosta dúnta de chostais incháilithe, a bhaineann go díreach leis an straitéis cistiúcháin éagsúlaithe. Na táillí conarthacha le haghaidh earcú sainchomhairleoirí seachtracha, is cuid de liosta na gcaiteachas riaracháin incháilithe iad tar éis comhaontuithe a baineadh amach i gcomhthéacs an Bhuiséid Bhliantúil do 2023. An leathnú a rinneadh ar liosta na gcaiteachas riaracháin incháilithe, cuireadh in iúl é d’údaráis na mBallstát sular glacadh an Cinneadh seo. Sciar an-teoranta de na costais chomhiomlána ó oibríochtaí na straitéise cistiúcháin éagsúlaithe atá i gcostas comhiomlán na seirbhíse le haghaidh forchostais riaracháin.

(29)

Tá an próiseas sonrascaithe ex post ceaptha chun a áirithiú go ndéanfar costais a aisghabháil an bhliain dár gcionn agus go dtí an tráth nach nginfear costais a thuilleadh trí oibríochtaí iasachtaíochta, bainistíochta fiachais agus íocaíochta faoin straitéis cistiúcháin éagsúlaithe.

(30)

Go heisceachtúil, féadfaidh an tAontas costas an úis agus na gcostas riaracháin a bhaineann le hiasachtaí a fháil agus a thabhairt, faoi mar ata i gcás na n-iasachtaí cúnaimh airgeadais don Úcráin arna ndeonú faoi Rialachán (AE) 2022/2463, agus Rialachán (AE) 2024/792 ó Pharlaimint na hEorpa agus ón gComhairle (9). Faoi Rialachán (AE) 2022/2463, soláthrófar na hacmhainní is gá le ranníocaíochtaí ó na Ballstáit i gcomhréir le hAirteagal 5(1) den Rialachán sin, a mhéid nach gcumhdaítear na costais sin trí mhodhanna eile. I gcás den sórt sin, ba cheart sonrascadh na gcostas a ailíniú le sonrascadh na gcostas i ndáil le heisíocaíochtaí mar ioncam sannta seachtrach faoi Airteagal 3(1) de Rialachán 2020/2094 agus ba cheart é a ghrúpáil in aghaidh na ráithe.

(31)

Ba cheart don Choimisiún fógra deimhniúcháin a eisiúint maidir le gach eisíocaíocht, lena n-áirítear tacaíocht neamh-inaisíoctha de réir bhrí Airteagal 2(2), pointí(a) agus (c) de Rialachán 2020/2094, tacaíocht inaisíoctha do Bhallstáit de réir bhrí Airteagal 2(2), pointe (b) de Rialachán 2020/2094, agus iasachtaí do Bhallstát nó do thríú tír faoi chláir cúnaimh airgeadais faoi raon feidhme Airteagal 220a de Rialachán (AE, Euratom) 2018/1046.

(32)

Ba cheart iasachtaí faoin straitéis cistiúcháin éagsúlaithe a chur chun feidhme ar théarmaí airgeadais comhchuibhithe (próifíl aibíochta agus aisíocaíochta) le haghaidh gach eisíocaíochta a bhaineann leis an gclár cúnaimh céanna, faoi réir a gcomhoiriúnachta leis an straitéis cistiúcháin éagsúlaithe. Maidir le tacaíocht neamh-inaisíoctha, ba cheart an fógra deimhniúcháin a bheith ina phríomhghné tacaíochta lena gcinntear na téarmaí airgeadais sin do bhuiséad ginearálta an Aontais. Is ann don fhógra deimhniúcháin chun an t-éileamh ar chostas a chinneadh bunaithe ar a théarmaí airgeadais. Ba cheart dáta na heisíocaíochta, méid na tacaíochta airgeadais, dáta chostas na n-íocaíochtaí cistiúcháin agus an dáta aibíochta a bheith san áireamh sna téarmaí sin. Is é an fógra deimhniúcháin an bonn bunriachtanach atá ina bhonn taca le pleanáil bhuiséadach an Aontais, le scagchuairdeanna airgeadais agus le tacaíocht neamh-inaisíoctha.

(33)

Ba cheart tagairt a dhéanamh sna comhaontuithe iasachta don Chinneadh seo mar an modh chun costais na n-iasachtaí a ríomh agus a ghearradh.

(34)

Ba cheart feidhm a bheith ag an gCinneadh seo maidir le gach idirbheart iasachtaíochta agus gach eisíocaíocht faoi chlár NGEU, lena n-áirítear na hidirbhearta agus na heisíocaíochtaí sin a rinneadh sular tháinig sé i bhfeidhm.

(35)

I bhfianaise a phráinní atá sé cúnamh airgeadais a chur ar fáil, i measc tosaíochtaí beartais eile, don Úcráin i mí Iúil 2024 faoin tSaoráid don Úcráin ar an mbealach is fearr agus is buntáistí, ba cheart an cinneadh sin a theacht i bhfeidhm mar ábhar práinne.