Tuairisc ar na hearraí

Aicmiú

(Cód AC)

Cúiseanna

(1)

(2)

(3)

Scagaire malartaithe teasa agus taise (HMEF), ina bhfuil feireadh plaisteach atá feistithe le dhá nascóir 22 mm agus le nascóir ghlas Luer amháin. Tá ábhar scagtha déanta as snáithíní gloine san HMEF freisin. Tá toirt in-chomhbhrúite 65 ml agus 43 ghram meáchain ann.

Tá na feidhmeanna seo a leanas ag an earra:

Dearadh an t-earra lena ghléasadh ar nascóir aerbhealaigh othair (e.g. masc aghaidhe) ar thaobh amháin agus lena nascadh trí fheadáin leis an ngaireas ainéistéiseach nó leis an ngaireas riospráide saorga ar an taobh eile. Dearadh é lena úsáid i ndianchúram nó le linn ainéistéise, chun bac a chur ar ghluaiseacht víreas agus chun an t-aer a ionanálaíonn othar a théamh agus a thaisriú.

(Féach an íomhá) (*1)

9033 00 90

Cinntear an t-aicmiú le Rialacha Ginearálta 1 agus 6 maidir le léirmhíniú na hAinmníochta Comhcheangailte, le Nóta 2 (c) a ghabhann le Caibidil 90 agus le foclaíocht na gcód AC 9033 00 agus 9033 00 90 .

Cé go dtagann an táirge in ionad na bhfeidhmeanna sróine, toisc go bhfónann sé chun an t-aer ionanálaithe a thaisliú, a théamh agus a scagadh, eisiatar an t-aicmiú faoi cheannteideal 9021 toisc nach meastar gur gaireas é a chaitear nó a iompraítear, ná a ionchlannaítear sa chorp mar chúiteamh ar fhabht nó ar mhíchumas.

Ní gaireas scagtha faoi cheannteideal 8421 é an táirge, toisc go sáraíonn a fheidhm téimh agus taisrithe raon feidhme an cheannteidil, ná gaireas ainéistéiseach faoi cheannteideal 9018 ná gaireas riospráide saorga faoi cheannteideal 9019 , toisc nach féidir é a úsáid go neamhspleách, mar ghaireas aonair.

Is páirt inmhalartaithe é an táirge a dearadh chun an gaireas ainéistéiseach nó riospráide saorga lena bhfuil sé nasctha a oiriúnú, le haghaidh oibríocht ar leith, nó chun cur lena raon oibríochtaí, nó chun seirbhís ar leith a dhéanamh i gcoibhneas le príomhfheidhm an ghairis. Dá bhrí sin, meastar gur gabhálas é de ghaireas ainéistéiseach faoi cheannteideal 9018 , nó de ghaireas riospráide saorga faoi cheannteideal 9019 . (Féach freisin CBAE, Cás C-276/00, Turbon International GmbH, míreanna 12 agus 32 agus Cás C-152/10, Unomedical, míreanna 29-34)

Dá bhrí sin, tá an táirge le haicmiú i gcomhréir le Nóta 2 a ghabhann le Caibidil 90. Ós rud é nach earra é a áirítear faoi cheannteideal sonrach agus, thairis sin, nach bhfuil sé oiriúnach lena úsáid le cineál áirithe gairis nó le roinnt gaireas faoin gceannteideal céanna amháin nó go príomha, tá sé le haicmiú faoi cheannteideal 9033 , trí Nóta 2 (c) a ghabhann le Caibidil 90 a chur i bhfeidhm.

Dá bhrí sin, tá an táirge le haicmiú faoin gcód AC 9033 00 90 , mar ghabhálais eile (nach sonraítear ná áirítear in aon áit eile sa chaibidil sin) le haghaidh meaisíní, fearais, uirlisí, nó gairis atá faoi Chaibidil 90.