(1)

Le Rialachán (CE) Uimh. 1333/2008 ó Pharlaimint na hEorpa agus ón gComhairle (1) leagtar amach na forálacha maidir le faireachán a dhéanamh ar iontógáil breiseán bia. I gcomhréir le hAirteagal 27 den Rialachán sin, déanfaidh na Ballstáit faireachán ar thomhaltas agus úsáid breiseán bia a liostaítear in Iarscríbhinn II, Cuid B a ghabhann le Rialachán (CE) Uimh. 1333/2008 de réir cur chuige rioscabhunaithe agus tuairisceoidh siad a gcuid torthaí, a mhinice is iomchuí, don Choimisiún agus don Údarás Eorpach um Shábháilteacht Bia (‘an tÚdarás’). Chuige sin, bhí an Coimisiún le modheolaíocht chomhchoiteann a ghlacadh chun go bhféadfadh na Ballstáit faisnéis a bhailiú maidir le hiontógáil chothaithe breiseán bia san Aontas.

(2)

Le Rialachán (CE) Uimh. 1334/2008 ó Pharlaimint na hEorpa agus ón gComhairle (2) leagtar amach na forálacha maidir le faireachán a dhéanamh ar iontógáil blastán bia. I gcomhréir le hAirteagal 20 den Rialachán sin, bunóidh na Ballstáit córais chun faireachán a dhéanamh, trí chur chuige rioscabhunaithe a úsáid, ar thomhaltas agus ar úsáid blastán a leagtar amach i liosta an Aontais agus ar thomhaltas na substaintí a liostaítear in Iarscríbhinn III a ghabhann le Rialachán (CE) Uimh. 1334/2008 agus cuirfidh siad a gcuid torthaí in iúl don Choimisiún agus don Údarás a mhinice is iomchuí. Chuige sin, bhí an Coimisiún le modheolaíocht chomhchoiteann a ghlacadh chun go bhféadfadh na Ballstáit faisnéis a bhailiú maidir le hiontógáil chothaithe blastán bia san Aontas.

(3)

Cé go bhfuil gá le modh comhchoiteann chun a áirithiú go bhféadfadh an iontógáil breiseán agus blastán bia arna ríomh ag Ballstáit éagsúla a chur i gcomparáid le chéile agus go bhféadfaí na sonraí a bailíodh a úsáid chun an iontógáil ar leibhéal an Aontais a ríomh, cuireadh isteach ar ullmhú na modheolaíochta comhchoitinne sin de bharr infhaighteacht theoranta na modhanna anailíse, na gcaighdeán anailíseacha agus an easpa faisnéise maidir le húsáid blastán bia.

(4)

Mar sin féin, sholáthair an tÚdarás treoraíocht chun meastachán a dhéanamh ar iontógáil chothaithe na mblastán bia an 23 Meitheamh 2010 (3) agus an 23 Nollaig 2022 (4). I gcás breiseáin bhia, sholáthair an tÚdarás treoraíocht maidir le meastachán a dhéanamh ar an iontógáil chothaithe (5) an 18 Iúil 2012 agus, an tráth céanna, sheol sé uirlis um measúnú nochta le haghaidh breiseáin bhia, is é sin le rá an Sásra um Iontógáil Breiseáin Bia. An 17 Deireadh Fómhair 2017, d’fhoilsigh an tÚdarás ráiteas maidir leis an gcur chuige a leantar le haghaidh an mheasúnaithe nochta scagtha mar chuid den mheasúnú sábháilteachta ar bhreiseáin bhia a bhfuil athmheastóireacht á déanamh orthu (6). Ar bhonn na treoraíochta sin agus chun taithí a fháil, chun dul i ngleic le cuid de na deacrachtaí a bhí rompu agus chun glacadh modheolaíochta comhchoitinne a éascú amach anseo, molann an Coimisiún do na Ballstáit an mhodheolaíocht dá bhforáiltear sa Mholadh seo a chur i bhfeidhm.

(5)

I bhfianaise an lín aird breiseán bia agus blastán bia a d’fhéadfadh a bheith i mbia-earraí éagsúla atá ar an margadh agus, dá bhrí sin, i bhfianaise an lín aird comhcheangal breiseán bia agus blastán bia a d’fhéadfadh a bheith i gceist le catagóirí bia, is iomchuí go ndéanfaidh na Ballstáit breiseáin bhia agus blastáin bhia a chatagóiriú agus tosaíocht a thabhairt dóibh ar bhonn an riosca a bhaineann leo. Chun tosaíochtaí oibiachtúla a áirithiú, ba cheart measúnú a dhéanamh ar an riosca ar bhonn thoradh an mheasúnaithe riosca is déanaí a rinne an tÚdarás nó an Coiste Eolaíoch um Bia, go príomha, measúnú a dhéanfar ar thásca eile nach mór breiseán bia nó blastán bia a choinneáil faoi fhaireachas níos géire, amhail eisíontais a bheith ann i gcás breiseáin bhia, nó ar thásca go bhfuil an iontógáil chothaithe a úsáidtear le haghaidh an mheasúnaithe sábháilteachta as dáta nó go ndearnadh gannmheas uirthi. Mar sin féin, ba cheart do na Ballstáit gan blastáin bhia a chatagóiriú agus gan tosaíocht a thabhairt do bhlastáin bhia a bhfuil sé i gceist ag an gCoimisiún faisnéis a iarradh ó tháirgeoirí agus ó úsáideoirí ina leith agus ar cosúil nach gá faireachán a dhéanamh orthu ar bhonn thoradh an mheasúnaithe deiridh a rinne an tÚdarás. Thairis sin, chun solúbthacht a áirithiú, féadfaidh na Ballstáit na tosaíochtaí a choigeartú trí chúinsí eile a chur san áireamh.

(6)

Chun a áirithiú go mbeidh an fhaisnéis ar fáil i measc na mBallstát, an Choimisiúin agus an Údaráis, ba cheart do na Ballstáit machnamh a dhéanamh ar thoradh na dtosaíochtaí a tugadh i bplean faireacháin ilbhliantúil agus an plean faireacháin ilbhliantúil a choinneáil cothrom le dáta.

(7)

Ós rud é gur cheart ríomh na hiontógála breiseán bia agus blastán bia a bheith san áireamh sna sonraí a bailíodh, níl sé leordhóthanach sonraí láithreachta amháin a bhailiú agus ba cheart do na Ballstáit ar a laghad cineál amháin sonraí tarluithe a bhailiú. Mar sin féin, féadfar sonraí láithreachta a bhailiú freisin ós rud é gur féidir a shainaithint cé acu a úsáidtear breiseán bia nó blastán bia i mbia-earra áirithe nó nach n-úsáidtear ann iad.

(8)

Chun a áirithiú go bhfuil na sonraí a bhaileofar ionadaíoch ó thaobh úsáid an bhreiseáin bia nó an bhlastáin bia i mbianna atá ar an margadh laistigh den Bhallstát agus chun meastachán a dhéanamh ar iontógáil na mbreiseán bia agus na mblastán bia sin, ba cheart do na Ballstáit cinneadh a dhéanamh maidir leis na bia-earraí i gcás inar gá faireachán a dhéanamh ar láithreacht nó tarlú breiseán bia agus blastán bia i gcomhréir le critéir lena gcuirtear rannchuidiú coibhneasta na mbianna nó na mbrandaí san áireamh leis an iontógáil chothaithe. Thairis sin, ós rud é gur féidir substaintí áirithe, amhail aigéad ascorbach, a bheith i mbia de bharr iad a bheith i láthair go nádúrtha, de bharr iad a chur leis mar fhoinse chothaitheach, nó de bharr iad a chur leis mar bhreiseán bia nó mar bhlastán bia, ba cheart do na Ballstáit bianna a chur san áireamh freisin lena gcuirtear le hiontógáil chothaithe substainte a thagann ó fhoinsí eile cé is moite dá húsáid mar bhreiseán bia nó mar bhlastán bia, chun gur féidir an iontógáil chothaithe a ríomh ó fhoinsí cé is moite d’úsáid an bhreiseáin bia nó an bhlastáin bia agus chun an teagmháil fhoriomlán leis an tsubstaint lena mbaineann a ríomh.

(9)

Chun léargas iomlán a fháil ar an gcás, féadfaidh na Ballstáit sonraí faireacháin a chomhlánú le sonraí ó chúraimí rialaithe oifigiúla i gcomhréir le Rialachán (AE) 2017/625 ó Pharlaimint na hEorpa agus ón gComhairle (7) atá ionadaíoch ó thaobh úsáid na mbreiseán bia nó na mblastán bia i mbia atá le fáil ar an margadh.

(10)

Chun torthaí iontaofa a fháil, ba cheart do na Ballstáit modhanna anailíse a úsáid dá dtagraítear in Airteagal 34 de Rialachán (AE) 2017/625 ina bhfuil liosta de mhodhanna a úsáidtear le haghaidh anailísí saotharlainne.

(11)

I bhfianaise éagsúlacht na mbreiseán bia agus na mblastán bia, éagsúlacht na mbianna ina n-úsáidtear iad agus éagsúlacht a gcoinníollacha úsáide, ní fhéadfar an taithí agus an t-eolas a fhaigheann na Ballstáit a chur i gcomparáid le chéile agus a mheas ach amháin i gcás ina bhfuarthas iad maidir leis na breiseáin bhia chéanna agus na blastáin bhia chéanna. Dá bhrí sin, ní hamháin gur cheart do na Ballstáit tosú le tosaíocht a thabhairt do bhreiseáin bhia agus do bhlastáin bhia agus na Ballstáit eile, an Coimisiún agus an tÚdarás a chur ar an eolas fúthu, ach ba cheart dóibh, mar chéim thosaigh, aontú le faireachán a dhéanamh ar liosta comhchoiteann, teoranta de bhreiseáin agus blastáin bhia,