(1)

I gcomhréir le hAirteagal 12(2), an chéad fhomhír, pointe (d), de Rialachán (AE, Euratom) 2018/1046 ó Pharlaimint na hEorpa agus ón gComhairle (2), féadfar leithreasuithe nár gealladh a bhaineann leis na gníomhaíochtaí arna maoiniú ón gCiste Eorpach um Ráthaíocht Talmhaíochta (CERT) dá dtagraítear in Airteagal 4(1) de Rialachán (AE) Uimh. 1306/2013 ó Pharlaimint na hEorpa agus ón gComhairle (3) a thabhairt anonn go dtí an chéad bhliain airgeadais eile. Tá an tabhairt anonn sin teoranta do 2 % de na leithreasuithe tosaigh arna vótáil ag Parlaimint na hEorpa agus ag an gComhairle agus do mhéid an choigeartaithe ar íocaíochtaí díreacha dá dtagraítear in Airteagal 8 de Rialachán (AE) Uimh. 1307/2013 ó Pharlaimint na hEorpa agus ón gComhairle (4), Rialachán a cuireadh i bhfeidhm le linn na bliana airgeadais roimh ré.

(2)

I gcomhréir leis an dara fomhír d’Airteagal 17(3) de Rialachán (AE) 2021/2116, don bhliain airgeadais 2022, beidh leithreasuithe a thugtar anonn i gcomhréir le hAirteagal 12(2), an chéad fhomhír, pointe (d) de Rialachán (AE, Euratom) 2018/1046 fós ar fáil agus is mó ná 0,2 % den uasteorainn bhliantúil do chaiteachas CERT méid iomlán na leithreasuithe nár gealladh atá ar fáil le haghaidh aisíocaíochta.

(3)

I gcomhréir le hAirteagal 17(4) de Rialachán (AE) 2021/2116, níl feidhm ag an aisíocaíocht ach amháin maidir le tairbhithe deiridh sna Ballstáit sin ina raibh feidhm ag smacht airgeadais (5) sa bhliain airgeadais roimh ré.

(4)

I gcomhréir le hAirteagal 1(1) de Rialachán Cur Chun Feidhme (AE) 2021/951 (6) ón gCoimisiún, cuirtear smacht airgeadais i bhfeidhm ar íocaíochtaí díreacha i ndáil leis an mbliain féilire 2021 chun an cúlchiste géarchéime a bhunú. Iarradh cuid den chúlchiste géarchéime sa bhliain airgeadais 2022 le haghaidh EUR 350 milliún le Rialachán Tarmligthe (AE) 2022/467 (7) ón gCoimisiún, rud a d’fhág EUR 147,3 milliún ar fáil. Thairis sin, ar bhonn fhorghníomhú leithreasuithe CERT 2022 faoi bhainistíocht chomhroinnte le linn na tréimhse ón 16 Deireadh Fómhair 2021 go dtí an 15 Deireadh Fómhair 2022 agus forghníomhú measta faoi bhainistíocht dhíreach ón 1 Eanáir 2022 go dtí an 31 Nollaig 2022, leanfaidh leithreasuithe breise nár gealladh de bheith i mbuiséad CERT 2022.

(5)

Ar bhonn dhearbhuithe caiteachais na mBallstát le haghaidh na tréimhse ón 16 Deireadh Fómhair 2021 go dtí an 15 Deireadh Fómhair 2022, is é EUR 495,6 milliún méid an laghdaithe ar smacht airgeadais arna chur i bhfeidhm sa bhliain airgeadais 2022 go héifeachtach ag na Ballstáit.

(6)

Ón méid sin den smacht airgeadais a cuireadh i bhfeidhm le linn na bliana airgeadais 2022, féadfar luach EUR 485,2 milliún leithreasuithe nár úsáideadh, atá fós laistigh den teorainn 2 % de na leithreasuithe tosaigh a bhaineann leis na gníomhaíochtaí dá dtagraítear in Airteagal 4(1) de Rialachán (AE) Uimh. 1306/2013, a thabhairt anonn go dtí an bhliain airgeadais 2023 tar éis cinneadh ón gCoimisiún i gcomhréir le hAirteagal 12(3) de Rialachán (AE, Euratom) 2018/1046.

(7)

Aisíoc na leithreasuithe nár úsáideadh le faighteoirí deiridh mar thoradh ar smacht airgeadais a chur i bhfeidhm, chun a áirithiú go leanfaidh sé de bheith comhréireach le méid an choigeartaithe ar an smacht airgeadais is iomchuí go gcinnfidh an Coimisiún na méideanna a chuirfear ar fáil do na Ballstáit le haghaidh an aisíoctha.

(8)

Is méideanna cinntitheacha iad na méideanna a bhunaítear leis an Rialachán seo agus tá feidhm acu, gan dochar do chur i bhfeidhm na laghduithe i gcomhréir le hAirteagal 41 de Rialachán (AE) Uimh. 1306/2013, maidir le haon cheartúchán eile arna chur san áireamh sa chinneadh míosúil íocaíochta a bhaineann leis an gcaiteachas arna dhéanamh ag gníomhaireachtaí íocaíochta na mBallstát le haghaidh mhí Dheireadh Fómhair 2022, i gcomhréir le hAirteagal 18(3) de Rialachán (AE) Uimh. 1306/2013, agus maidir le haon asbhaint agus íocaíocht fhorlíontach a bheidh le déanamh i gcomhréir le hAirteagal 18(4) den Rialachán sin nó maidir le haon chinneadh a dhéanfar faoi chuimsiú an nós imeachta um imréiteach cuntas.

(9)

I gcomhréir leis an abairt tosaigh d’Airteagal 12(2) de Rialachán (AE, Euratom) 2018/1046, ní fhéadfar na leithreasuithe nár gealladh a thabhairt anonn ach go dtí an chéad bhliain airgeadais eile. Dá bhrí sin, is iomchuí don Choimisiún dátaí incháilitheachta a chinneadh maidir le caiteachas na mBallstát i ndáil leis an aisíocaíocht i gcomhréir le hAirteagal 17(3) de Rialachán (AE) 2021/2116, agus an bhliain airgeadais talmhaíochta mar a shainmhínítear í in Airteagal 35 den Rialachán sin á cur san áireamh.

(10)

Beidh feidhm ag Rialachán (AE) 2021/2116 ón 1 Eanáir 2023 mar a leagtar amach in Airteagal 106 den Rialachán sin. Dá bhrí sin, ba cheart feidhm a bheith ag an Rialachán seo ón dáta céanna sin,