(1)

Le Rialachán (AE) 2016/679 leagtar amach na rialacha maidir le haistriú sonraí pearsanta ó rialaitheoirí nó ó phróiseálaithe san Aontas chuig tríú tíortha agus chuig eagraíochtaí idirnáisiúnta a mhéid a thagann na haistrithe sin faoina raon feidhme. Na rialacha maidir le haistrithe sonraí idirnáisiúnta, leagtar síos i gCaibidil V (Airteagail 44 go 50) den Rialachán sin iad. Cé go bhfuil sreabhadh na sonraí pearsanta chuig tíortha lasmuigh den Aontas Eorpach agus uathu fíor-riachtanach le haghaidh leathnú na trádála trasteorann agus an chomhair idirnáisiúnta, níor cheart dochar a dhéanamh don leibhéal cosanta a thugtar do shonraí pearsanta san Aontas de dheasca aistrithe chuig tríú tíortha (2).

(2)

De bhun Airteagal 45(3) de Rialachán (AE) 2016/679, féadfaidh an Coimisiún a chinneadh, trí bhíthin gníomh cur chun feidhme, go ndéanfaidh tríú tír, críoch nó earnáil shonraithe amháin nó níos mó laistigh de thríú tír, nó eagraíocht idirnáisiúnta leibhéal leordhóthanach cosanta a áirithiú. Faoin gcoinníoll sin, aistrithe sonraí pearsanta chuig tríú tír, féadfar iad a dhéanamh gan gá a bheith le haon údarú breise a fháil, dá bhforáiltear in Airteagal 45(1) agus aithris 103 de Rialachán (AE) 2016/679.

(3)

Mar a shonraítear in Airteagal 45(2) de Rialachán (AE) 2016/679, glacadh cinnidh leordhóthanachta, ní mór é a bheith bunaithe ar anailís chuimsitheach ar dhlíchóras an tríú tír, lena gcumhdaítear idir na rialacha is infheidhme maidir le hallmhaireoirí sonraí agus na teorannuithe agus na coimircí a mhéid a bhaineann le rochtain údarás poiblí ar shonraí pearsanta. Ina mheasúnú, ní mór don Choimisiún a chinneadh cibé acu a ráthaíonn nó nach ráthaíonn an tríú tír atá i gceist leibhéal cosanta “arb ionann é go bunúsach” agus an leibhéal a áirithítear laistigh den Aontas (aithris 104 de Rialachán (AE) 2016/679). Maidir le cibé acu is amhlaidh nó nach amhlaidh an cás sin, tá measúnú le déanamh air sin in aghaidh reachtaíocht an Aontais, go háirithe Rialachán (AE) 2016/679, agus in aghaidh chásdlí Chúirt Bhreithiúnais an Aontais Eorpaigh (3) freisin.

(4)

Mar a shoiléirigh Cúirt Bhreithiúnais an Aontais Eorpaigh, ní fhágann sin gur gá leibhéal comhionann cosanta a fháil (4). Go háirithe, na modhanna a mbaineann an tríú tír i gceist leas astu chun sonraí pearsanta a chosaint, is féidir go mbeidh siad éagsúil leis na modhanna a úsáidtear san Aontas, fad a bheidh siad, sa chleachtas, éifeachtach chun leibhéal leordhóthanach cosanta a áirithiú (5). Dá bhrí sin, ní cheanglaítear leis an gcaighdeán leordhóthanachta macasamhlú pointe go pointe ar rialacha an Aontais. Ina ionad sin, is éard atá á thástáil, trí shubstaint na gceart príobháideachais agus cur chun feidhme, maoirseacht agus forfheidhmiú éifeachtach na gceart sin, cibé acu a sholáthraítear nó nach soláthraítear an leibhéal cosanta is gá leis an gcóras eachtrach ina iomláine (6). Le leordhóthanacht thagrach an Bhoird Eorpaigh um Chosaint Sonraí, a fhéachann leis an gcaighdeán sin a shoiléiriú a thuilleadh, soláthraítear treoraíocht maidir leis sin freisin (7).

(5)

Tá anailís chúramach déanta ag an gCoimisiún ar dhlí agus ar chleachtas na Cóiré. Ar bhonn na dtorthaí a leagtar amach in aithrisí (8) - (208), tagann an Coimisiún ar an gconclúid go n-áirithíonn Poblacht na Cóiré leibhéal leordhóthanach cosanta ar shonraí pearsanta arna n-aistriú ó rialaitheoir nó ó phróiseálaí san Aontas (8) chuig eintitis (e.g. daoine nádúrtha nó dlítheanacha, eagraíochtaí, institiúidí poiblí) sa Chóiré a thagann faoi raon feidhme chur i bhfeidhm an Achta um Chosaint Faisnéise Pearsanta (Acht Uimh. 10465 an 29 Márta 2011, arna leasú go deireanach le hAcht Uimh. 16930 an 4 Feabhra 2020). Áirítear leis sin idir rialaitheoirí agus phróiseálaithe (dá ngairtear “seachfhoinsithe” (9)) de réir bhrí Rialachán (AE) 2016/679. Leis an toradh leordhóthanachta ní chumhdaítear próiseáil na sonraí pearsanta arna déanamh ag eagraíochtaí reiligiúnacha le haghaidh gníomhaíochtaí misinéireachta ná le haghaidh ainmniú iarrthóirí arna dhéanamh ag páirtithe polaitiúla, ná ní chumhdaítear próiseáil na faisnéise creidmheasa pearsanta de bhun an Achta um Fhaisnéis Creidmheasa arna déanamh ag rialaitheoirí atá faoi réir fhormhaoirseacht an Choimisiúin um Sheirbhísí Airgeadais.

(6)

Leis an gconclúid sin cuirtear san áireamh na coimircí breise a leagtar amach i bhFógra Uimh. 2021-5 (Iarscríbhinn I) agus na huiríll, na dearbhuithe agus na gealltanais oifigiúla arna dtabhairt ag rialtas na Cóiré don Choimisiún (Iarscríbhinn II).

(7)

Tá d’éifeacht leis an gCinneadh seo go bhféadfar aistrithe a dhéanamh chuig rialaitheoirí agus chuig próiseálaithe i bPoblacht na Cóiré gan gá a bheith le haon údarú breise a fháil. Ní dhéantar difear leis do chur i bhfeidhm díreach Rialachán (AE) 2016/679 maidir leis na heintitis sin i gcás ina gcomhlíonfar na coinníollacha maidir le raon feidhme críochach an Rialacháin sin, a leagtar síos san Airteagal 3 de.

(8)

An córas dlí lena rialaítear cosaint an phríobháideachais agus sonraí, tá a fhréamhacha i mBunreacht na Cóiré, arna fhógairt an 17 Iúil 1948. An ceart chun sonraí pearsanta a chosaint, cé gurb amhlaidh nach leagtar amach go sainráite sa Bhunreacht é, aithnítear mar cheart bunúsach é mar sin féin, rud a dhíorthaítear ó na cearta bunreachtúla chun dínit an duine agus chun dul ar thóir an tsonais (Airteagal 10), chun saoil phríobháidigh (Airteagal 17) agus chun príobháideachais cumarsáide (Airteagal 18). Dheimhnigh an Chúirt Uachtarach (10) agus an Chúirt Bhunreachtúil (11) araon an méid sin. Srianta ar chearta agus ar shaoirsí bunúsacha (lena n-áirítear an ceart chun príobháideachais), ní fhéadfar iad a fhorchur ach leis an dlí, nuair is gá sin le haghaidh na slándála náisiúnta nó chun an t-ord poiblí a chaomhnú le haghaidh leas an phobail, agus ní fhéadfar difear a dhéanamh leo d’éirim an chirt ná na saoirse atá i gceist (Airteagal 37(2)).

(9)

Cé go dtagraítear sa Bhunreacht in áiteanna éagsúla do chearta shaoránaigh na Cóiré, thug an Chúirt Bhunreachtúil breithiúnas gurb amhlaidh atá daoine nach náisiúnaigh iad faoi réir cearta bunúsacha freisin (12). Go háirithe, chinn an Chúirt, maidir le cosaint dhínit agus luach an duine mar dhuine den chine daonna, mar aon leis an gceart chun dul ar thóir an tsonais, chinn an Chúirt nach ag na saoránaigh amháin atá na cearta sin ach ag gach aon duine eile (13). Thairis sin, de réir na n-uiríoll oifigiúil ó rialtas na Cóiré (14), aithnítear go ginearálta go ndéantar foráil le hAirteagail 12 go 22 den Bhunreacht (lena n-áirítear cearta príobháideachais) maidir le cearta bunúsacha an duine (15). Cé gur fíor nach ann d’aon chásdlí sonrach go dtí seo maidir le ceart daoine nach náisiúnaigh iad chun príobháideachais, ós rud é go bhfuil sé fothaithe i ndínit an duine a chosaint agus sa dul ar thóir an tsonais, tacaítear leis an gconclúid sin (16).

(10)

Thairis sin, d’achtaigh an Chóiré sraith dlíthe i réimse na cosanta sonraí lena soláthraítear coimircí do gach duine aonair, gan beann ar a náisiúntacht (17). Chun críoch an Chinnidh seo, seo a leanas na dlíthe ábhartha:

(11)

Le PIPA soláthraítear an creat dlíthiúil ginearálta um chosaint sonraí i bPoblacht na Cóiré. Déantar é a fhorlíonadh le Foraithne um Fhorfheidhmiú (Foraithne Uimh. 23169 ón Uachtarán an 29 Meán Fómhair 2011, arna leasú go deireanach le Foraithne Uimh. 30892 ón Uachtarán an 4 Lúnasa 2020 (Foraithne um Fhorfheidhmiú PIPA), rud atá ceangailteach ó thaobh dlí de agus in-fhorfheidhmithe, cosúil le PIPA.

(12)

Thairis sin, le “Fógraí” rialála arna nglacadh ag an gCoimisiún um Chosaint Faisnéise Pearsanta (PIPC) soláthraítear tuilleadh rialacha maidir le léirmhíniú agus le cur i bhfeidhm PIPA. Ar bhonn Airteagal 5 (Oibleagáidí Stáit) agus Airteagal 14 PIPA (an Comhar Idirnáisiúnta), ghlac PIPC Fógra Uimh. 2021-5 an 1 Meán Fómhair 2020 (arna leasú le hUimh. 2021-1 an 21 Eanáir 2021 agus Fógra Uimh. 2021-5 an 16 Samhain 2021, Fógra Uimh. 2021-5) maidir le léirmhíniú, cur i bhfeidhm agus forfheidhmiú forálacha áirithe de PIPA. Leis an bhFógra sin soláthraítear soiléirithe ag a bhfuil feidhm maidir le haon phróiseáil ar shonraí pearsanta faoi PIPA agus soláthraítear coimircí breise leis freisin le haghaidh sonraí pearsanta a aistrítear chuig an gCóiré bunaithe ar an gCinneadh sin. Tá an Fógra ceangailteach ó thaobh dlí de ar rialaitheoirí faisnéise pearsanta agus tá sé in-fhorfheidhmithe ag PIPC agus na cúirteanna araon (19). Baineann sárú ar na rialacha a leagtar amach san Fhógra le sárú ar na forálacha ábhartha de PIPA, arb i gcomhlánú ar na forálacha iad na rialacha sin. Dá bhrí sin, déantar anailís ar inneachar na gcoimircí breise mar chuid den mheasúnú ar na hAirteagail ábhartha de PIPA. Ar deireadh, treoraíocht bhreise maidir le PIPA agus lena Fhoraithne um Fhorfheidhmiú, lena dtugtar eolas maidir le cur i bhfeidhm agus le forfheidhmiú na rialacha cosanta sonraí ag PIPC, soláthraítear an treoraíocht sin i Lámhleabhar agus Treoirlínte PIPA arna nglacadh ag PIPC (20).

(13)

Ina theannta sin, leis an Acht um Úsáid agus Cosaint Faisnéise Creidmheasa (CIA) leagtar síos rialacha sonracha a bhfuil feidhm acu maidir le hoibreoirí tráchtála ar “gnáthoibreoirí” iad agus le heintitis speisialaithe laistigh den earnáil airgeadais freisin nuair a phróiseálann siad faisnéis chreidmheasa phearsanta, i.e. faisnéis is gá chun acmhainneacht creidmheasa páirtithe in idirbhearta airgeadais nó tráchtála a chinneadh. Áirítear leis sin, go háirithe, an t-ainm, na mionsonraí teagmhála, na hidirbhearta airgeadais, an rátáil creidmheasa, an stádas árachais, nó an t-iarmhéid iasachta nuair a úsáidtear an fhaisnéis sin chun acmhainneacht creidmheasa duine aonair a chinneadh (21). Os a choinne sin, i gcás ina n-úsáidfear an fhaisnéis sin chun críoch eile (amhail acmhainní daonna), tá feidhm ag PIPA ina iomláine. Maidir le forálacha cosanta sonraí sonracha CIA, déanann PIPC maoirseacht pháirteach ar an gcomhlíontacht (le haghaidh eagraíochtaí tráchtála, féach Airteagal 45-3 CIA) agus déanann an Coimisiún um Sheirbhísí Airgeadais go páirteach í freisin (22) (le haghaidh na hearnála airgeadais, lena n-áirítear gníomhaireachtaí rátála creidmheasa, bainc, cuideachtaí árachais, bainc choigiltis fhrithpháirteacha, cuideachtaí airgeadais creidmheasa speisialaithe, cuideachtaí seirbhísí infheistíochta airgeadais, cuideachtaí airgeadais urrús, comhair chreidmheasa, etc., féach Airteagal 45(1) CIA i gcomhar le hAirteagal 36-2 d’Fhoraithne um Fhorfheidhmiú CIA agus Airteagal 38 den Acht fán gCoimisiún um Sheirbhísí Airgeadais). Maidir leis sin, tá raon feidhme an Chinnidh seo teoranta d’oibríochtaí tráchtála atá faoi réir fhormhaoirseacht PIPC (23). Rialacha sonracha CIA ag a bhfuil feidhm sa chomhthéacs seo (tá feidhm ag rialacha ginearálta PIPA i gcás nach ann d’aon riail shonrach), tugtar tuairisc orthu i roinn 2.3.11.

(14)

Ach amháin mar a fhoráiltear a mhalairt go sonrach in Achtanna eile, rialaítear cosaint sonraí pearsanta le PIPA (Airteagal 6). Cinntear raon feidhme ábhartha agus pearsanta a chur i bhfeidhm leis na coincheapa sainmhínithe “faisnéis phearsanta”, “próiseáil” agus “rialaitheoir faisnéise pearsanta”.

(15)

Le hAirteagal 2(1) PIPA sainmhínítear faisnéis phearsanta mar fhaisnéis a bhaineann le duine aonair beo lena sainaithnítear an duine aonair go díreach, mar shampla trí ainm, cláruimhir chónaitheach nó íomhá an duine, nó go hindíreach, eadhon i gcás nach indéanta duine aonair ar leith a shainaithint le faisnéis léi féin ach inar féidir an fhaisnéis sin a chomhcheangail go héasca le faisnéis eile. Maidir le cibé acu is féidir nó nach féidir faisnéis a chomhcheangal “go héasca”, tá an méid sin ag brath ar cibé acu is dócha nó nach dócha go réasúnta go dtarlóidh an comhcheangal sin, agus an fhéidearthacht a bhaineann le faisnéis eile a fháil á cur san áireamh mar aon leis an am, leis an gcostas agus leis an teicneolaíocht is gá chun duine aonair a shainaithint.

(16)

Ina theannta sin, faisnéis faoi ainm bréige – i.e. faisnéis nach indéanta duine aonair sonrach a shainaithint léi gan í a úsáid nó í a chomhcheangal le faisnéis bhreise chun í a thabhairt ar ais chuig a staid bhunaidh – meastar gur sonraí pearsanta í faoi PIPA (Airteagal 2(1) lit. c) de PIPA). Os a choinne sin, déantar faisnéis atá “anaithnidithe” go hiomlán a eisiamh ó raon feidhme chur i bhfeidhm PIPA (Airteagal 58-2 de PIPA). Is amhlaidh an cás le haghaidh faisnéis nach indéanta duine aonair sonrach a shainaithint léi, fiú má tá sí comhcheangailte le faisnéis eile, agus an t-am, an costas agus an teicneolaíocht is gá go réasúnta le haghaidh na sainaitheanta á gcur san áireamh.

(17)

Comhfhreagraíonn an méid sin do raon feidhme ábhartha chur i bhfeidhm Rialachán (AE) 2016/679 agus dá choincheapa maidir le “sonraí pearsanta”, “ainm bréige a chur i bhfeidhm” (24) agus “faisnéis anaithnidithe” (25).

(18)

Sainmhínítear an coincheap “próiseáil” go leathan in PIPA mar ní lena gcumhdaítear “bailiú, giniúint, nascadh, cónascadh, taifeadadh, stóráil, coinneáil, próiseáil breisluacha, eagarthóireacht, aisghabháil, aischur, ceartú, gnóthú, úsáid, soláthar, agus nochtadh, scriosadh faisnéise pearsanta agus gníomhaíochtaí comhchosúla eile” (26). Cé nach dtagraítear ach do chineálacha sonracha próiseála le forálacha áirithe in PIPA amhail “úsáid”, “soláthar” nó “bailiú” (27), léirmhínítear an coincheap maidir le “úsáid” mar ní lena n-áirítear aon chineál próiseála seachas “bailiú” nó “soláthar” (tríú páirtí). Leis an léirmhíniú leathan sin ar “úsáid” áirithítear nach ann d’aon bhearna sa chosaint i leith gníomhaíochtaí próiseála sonracha. Comhfhreagraíonn coincheap na próiseála dá bhrí sin don choincheap céanna faoi Rialachán (AE) 2016/679.

(19)

Tá feidhm ag PIPA maidir le “rialaitheoirí faisnéise pearsanta” (rialaitheoir). Cosúil le Rialachán (AE) 2016/679, áirítear leis sin aon institiúid phoiblí, duine dlítheanach, eagraíocht nó duine aonair a phróiseálann sonraí pearsanta go díreach nó go hindíreach chun comhaid sonraí pearsanta a oibriú mar chuid dá gníomhaíochtaí nó dá ghníomhaíochtaí (28). Sa chomhthéacs sin, ciallaíonn “comhad faisnéise pearsanta” aon “sraith faisnéise pearsanta atá socraithe nó eagraithe ar bhealach córasach bunaithe ar riail ar leith le haghaidh rochtain éasca ar an bhfaisnéis phearsanta” (Airteagal 2(4) PIPA) (29). Go hinmheánach, tá an rialaitheoir faoi oibleagáid oiliúint a chur ar na daoine ag a bhfuil baint leis an bpróiseáil atá faoina stiúir, amhail oifigigh nó fostaithe den chuideachta, agus rialú agus maoirseacht iomchuí a fheidhmiú (Airteagal 28(1) PIPA).

(20)

Tá feidhm ag oibleagáidí sonracha nuair a sheachfhoinsíonn rialaitheoir (an “seachfhoinseoir”) próiseáil sonraí pearsanta chuig tríú páirtí (an “seachfhoinsí”). Go háirithe, ní mór an seachfhoinsiú a rialú le socrú atá ceangailteach ó thaobh dlí de (conradh de ghnáth) (30) lena leagtar amach raon feidhme na hoibre seachfhoinsithe, críoch na próiseála, na coimircí teicniúla agus bainistíochta atá le cur i bhfeidhm, maoirseacht ag an rialaitheoir, dliteanas (amhail cúiteamh as damáistí a rinneadh de dheasca sárú ar oibleagáidí conarthacha) mar aon leis na teorannuithe ar aon fhophróiseáil (31) (Airteagal 26(1), (2) de PIPA i gcomhar le hAirteagal 28(1) den Fhoraithne um Fhorfheidhmiú) (32).

(21)

Ina theannta sin, ní mór don rialaitheoir mionsonraí a fhoilsiú, agus a thabhairt cothrom le dáta go leanúnach, maidir leis an obair sheachfhoinsithe agus céannacht an tseachfhoinsí, nó, a mhéid a bhaineann an phróiseáil sheachfhoinsithe le gníomhaíochtaí margaíochta dírí, agus ní mór don rialaitheoir fógra a thabhairt go díreach do dhaoine aonair faoin bhfaisnéis ábhartha (Airteagal 26(2), (3) PIPA i gcomhar le hAirteagal 28(2)-(5) den Fhoraithne um Fhorfheidhmiú) (33).

(22)

Thairis sin, de bhun Airteagal 26(4) PIPA i gcomhar le hAirteagal 28(6) den Fhoraithne um Fhorfheidhmiú, tá an rialaitheoir faoi oibleagáid “oideachas a chur” ar an seachfhoinsí maidir leis na bearta slándála is gá agus maoirseacht a dhéanamh, lena n-áirítear trí chigireachtaí, ar cibé acu a chomhlíonann nó nach gcomhlíonann sé oibleagáidí uile an rialaitheora faoi PIPA (34) agus faoin gconradh seachfhoinsiúcháin freisin. I gcás ina ndéanfaidh an seachfhoinsí damáiste de dheasca sárú ar PIPA, cuirfear a ghníomhaíochtaí nó a neamhghníomh i leith an rialaitheora le haghaidh críoch dliteanais amhail i gcás fostaí (Airteagal 26(6) PIPA).

(23)

Dá bhrí sin, cé nach n-úsáidtear coincheapa éagsúla le PIPA le haghaidh “rialaitheoirí” agus “próiseálaithe”, leis na rialacha maidir le seachfhoinsiú soláthraítear oibleagáidí agus coimircí arb ionann iad go bunúsach agus na cinn lena rialaítear an caidreamh idir rialaitheoirí agus próiseálaithe faoi Rialachán (AE) 2016/679.

(24)

Cé go bhfuil feidhm ag PIPA maidir le próiseáil sonraí pearsanta arna déanamh ag aon rialaitheoir, tá rialacha sonracha i bhforálacha áirithe (mar lex specialis) maidir le próiseáil sonraí pearsanta “úsáideoirí” arna déanamh ag “soláthraithe seirbhísí faisnéise agus cumarsáide” (35). Leis an gcoincheap “úsáideoirí” cumhdaítear daoine aonair a úsáideann seirbhísí faisnéise agus cumarsáide (Airteagal 2(1) lit. 4 den Acht um Chur chun Cinn Úsáid an Líonra Faisnéise agus Cumarsáide agus Cosaint Sonraí, an tAcht Líonra). Ceanglaítear leis sin go mbaineann an duine aonair úsáid dhíreach as seirbhísí teileachumarsáide arna soláthar ag oibreoir teileachumarsáide de chuid an Cóiré nó go mbaineann an duine sin úsáid as seirbhísí faisnéise (36) arna soláthar ar bhonn tráchtála (i.e. le haghaidh brabúis) ag eintiteas atá ag brath dá réir sin ar sheirbhísí oibreora teileachumarsáide atá ceadúnaithe/cláraithe sa Chóiré (37). Sa dá chás sin, an t-eintiteas atá faoi cheangal ag forálacha sonracha PIPA, is eintiteas é a thairgeann seirbhís ar líne go díreach do dhuine aonair (i.e. úsáideoir).

(25)

Os a choinne sin, baineann toradh leordhóthanachta go heisiach leis an leibhéal cosanta a thugtar do shonraí pearsanta a aistrítear ó rialaitheoir/próiseálaí san Aontas chuig eintiteas i dtríú tír (anseo: Poblacht na Cóiré). Sa chás deireanach, is iondúil nach mbíonn caidreamh díreach ag daoine aonair san Aontas ach leis an “onnmhaireoir sonraí” san Aontas agus leis sin amháin, seachas le haon soláthraí seirbhíse faisnéise agus cumarsáide de chuid na Cóiré (38). Dá bhrí sin, forálacha sonracha PIPA i leith sonraí pearsanta úsáideoirí seirbhísí faisnéise agus cumarsáide, ní bheidh feidhm acu, ar a mhéad, ach i staideanna teoranta maidir le sonraí pearsanta a aistrítear faoin gCinneadh seo.

(26)

Le hAirteagal 58(1) de PIPA eisiatar cur i bhfeidhm cuid de PIPA (i.e. Airteagail 15 go 57) i leith ceithre chatagóir de phróiseáil sonraí (39). Go háirithe, na codanna de PIPA lena ndéileáiltear leis na forais shonracha le haghaidh próiseála, oibleagáidí áirithe maidir le cosaint sonraí, na rialacha mionsonraithe maidir le feidhmiú na gceart aonair mar aon leis na rialacha lena rialaítear réiteach díospóidí arna dhéanamh ag an gCoiste um Idirghabháil Díospóide maidir le Faisnéis Phearsanta, níl feidhm acu. Tá bunfhorálacha eile de PIPA fós infheidhme, go háirithe na forálacha ginearálta maidir le prionsabail na cosanta sonraí (Airteagal 3 PIPA) – lena n-áirítear mar shampla na prionsabail maidir le dlíthiúlacht, sonrú cuspóra agus teorannú de réir cuspóra, íoslaghdú sonraí, cruinneas agus slándáil sonraí – agus cearta duine aonair (maidir le rochtain, ceartú, scriosadh agus fionraí, féach Airteagal 4 PIPA). Ina theannta sin, le hAirteagal 58(4) PIPA forchuirtear oibleagáidí sonracha ar na gníomhaíochtaí próiseála sin, eadhon maidir le híoslaghdú sonraí, coinneáil sonraí theoranta, bearta slándála agus láimhseáil gearán (40). Dá thoradh sin, d’fhéadfadh daoine aonair gearán a chomhdú fós féin le PIPC mura n-urramófaí na prionsabail ná na hoibleagáidí sin agus cumhachtaítear do PIPC gníomhaíocht forfheidhmiúcháin a dhéanamh i gcás neamhchomhlíonadh.

(27)

Ar an gcéad dul síos, leis an díolúine pháirteach cumhdaítear sonraí pearsanta arna mbailiú de bhun an Achta Staidrimh lena bpróiseáil ag institiúidí poiblí. De réir soiléirithe a fuarthas ó rialtas na Cóiré, is iondúil go mbaineann sonraí pearsanta a phróiseáiltear sa chomhthéacs sin le náisiúnaigh na Cóiré agus d’fhéadfadh sé nach mbeadh faisnéis ar eachtrannaigh san áireamh iontu ach go heisceachtúil, eadhon i gcás staidreamh maidir le dul isteach sa chríoch nó imeacht uaithi, nó maidir le hinfheistíochtaí coigríche. Mar sin féin, fiú sna staideanna sin, ní hiondúil go ndéantar na sonraí sin a aistriú ó rialaitheoirí/próiseálaithe san Aontas, ach bhaileodh na húdaráis phoiblí sa Chóiré go díreach iad (41). Thairis sin, cosúil leis an méid a fhoráiltear in aithris 162 de Rialachán (AE) 2016/679, tá próiseáil sonraí faoin Acht Staidrimh faoi réir coinníollacha agus coimircí éagsúla. Go háirithe, leis an Acht Staidrimh forchuirtear oibleagáidí sonracha, amhail an cruinneas, an chomhsheasmhacht agus an neamhchlaontacht a áirithiú; rúndacht daoine aonair a ráthú; faisnéis freagróirí a chosaint ar fhiosruithe staidrimh lena n-áirítear d’fhonn cosc a chur le húsáid na faisnéise sin chun aon chríche eile seachas staidreamh a thiomsú agus comhaltaí foirne a chur faoi réir ceanglais rúndachta (42). Ní mór d’údaráis phoiblí a phróiseálann staidreamh na prionsabail maidir le híoslaghdú sonraí, teorannú de réir cuspóra agus slándáil (Airteagal 3 agus 58(4) PIPA), inter alia, a chomhlíonadh freisin agus a cheadú do dhaoine aonair a gcearta a fheidhmiú (maidir le rochtain, ceartú, scriosadh agus fionraí, féach Airteagal 4 PIPA). Ar deireadh, ní mór an fhaisnéis a phróiseáil i bhfoirm anaithnidithe nó faoi ainm bréige más féidir críoch na próiseála a chomhlíonadh leis sin (Airteagal 3(7) de PIPA).

(28)

Ar an dara dul síos, le hAirteagal 58(1) de PIPA tagraítear do shonraí pearsanta arna mbailiú nó arna n-iarraidh chun anailís a dhéanamh ar fhaisnéis a bhaineann leis an tslándáil náisiúnta. Maidir le raon feidhme agus iarmhairtí na díolúine páirtí sin, tugtar tuairisc níos mionsonraithe orthu in aithris (149).

(29)

Ar an tríú dul síos, tá feidhm ag an díolúine pháirteach maidir le próiseáil shealadach sonraí pearsanta i gcás ina mbeidh gá práinneach leis sin ar chúiseanna sábháilteachta nó slándála poiblí, lena n-áirítear an tsláinte phoiblí. Déanann PIPC an chatagóir sin a léirmhíniú go docht agus, de réir na faisnéise a fuarthas, níor úsáideadh riamh í. Níl feidhm aici ach amháin in éigeandálaí a éilíonn gníomhaíocht phráinneach, mar shampla chun gníomhaithe ionfhabhtaíocha a rianú, nó chun íospartaigh tubaistí nádúrtha a tharrtháil agus chun cabhrú leo (43). Fiú amháin sna staideanna sin, leis an díolúine pháirteach ní chumhdaítear ach próiseáil sonraí pearsanta ar feadh tréimhse theoranta chun an ghníomhaíocht sin a dhéanamh. Staideanna ina bhféadfadh feidhm a bheith aige sin maidir le haistrithe sonraí a chumhdaítear leis an gCinneadh seo, tá siad níos teoranta fós, ós rud é nach bhfuil mórán dóchúlachta ann go mbeadh sonraí pearsanta a aistrítear ón Aontas chuig oibreoirí na Cóiré den chineál a d’fhágfadh go mbeadh “gá práinneach” lena bpróiseáil ina dhiaidh sin le haghaidh na n-éigeandálaí sin.

(30)

Ar deireadh, tá feidhm ag an díolúine pháirteach maidir le sonraí pearsanta arna mbailiú nó arna n-úsáid ag an bpreas, le haghaidh gníomhaíochtaí misinéireachta ag eagraíochtaí reiligiúnacha, nó le haghaidh ainmniú iarrthóirí arna dhéanamh ag páirtithe polaitiúla. Níl feidhm ag an díolúine ach nuair a phróiseálann an preas, eagraíochtaí reiligiúnacha nó páirtithe polaitiúla sonraí pearsanta chun na gcríoch sonrach sin (i.e. gníomhaíochtaí iriseoireachta, obair mhisinéireachta agus ainmniú iarrthóirí polaitiúla). I gcás ina bpróiseálfaidh na heintitis sin sonraí pearsanta chun críoch eile, amhail bainistíocht a dhéanamh ar acmhainní daonna nó riarachán inmheánach, tá feidhm iomlán ag PIPA.

(31)

Maidir le próiseáil sonraí pearsanta arna déanamh ag an bpreas le haghaidh gníomhaíochtaí iriseoireachta, an comhardú idir an tsaoirse chun tuairimí a nochtadh agus cearta eile (lena n-áirítear an ceart chun príobháideachais), déantar foráil maidir leis sin leis an Acht Eadrána agus Leigheasanna, etc. mar gheall ar Dhamáiste arna Dhéanamh le Tuarascálacha Preasa (an tAcht Preasa) (44). Go háirithe, le hAirteagal 5 den Acht Preasa déantar foráil nach bhféadfaidh an preas (i.e. aon eagraíocht chraolacháin, nuachtán, tréimhseachán nó nuachtán ar líne), aon seirbhís nuachta idirlín, ná eagraíocht chraolacháin ilmheán idirlín, nach bhféadfaidh sé príobháideachas daoine aonair a shárú. Má tharlaíonn sárú príobháideachais mar sin féin, ní mór é a leigheas go pras i gcomhréir leis na nósanna imeachta sonracha a leagtar amach san Acht. Maidir leis sin, leis an Acht deonaítear roinnt ceart do dhaoine aonair a fhulaingíonn damáiste de dheasca tuarascáil phreasa, amhail foilseachán ceartúcháin ar ráiteas bréige a fháil, ceartúchán trí bhíthin ráiteas bréagnaitheach nó tuarascáil bhreise (i gcás ina mbainfidh tuarascáil phreasa le líomhaintí coireanna ina bhfuil an duine aonair éigiontaithe ina dhiaidh sin) (45). Éilimh ó dhaoine aonair, féadfaidh asraonta preasa iad a réiteach go díreach (trí ombudsman) (46), trí idir-réiteach nó eadráin (os comhair Coimisiún Eadrána Preasa speisialaithe) (47) nó os comhair na gcúirteanna. Féadfaidh daoine aonair cúiteamh a fháil freisin nuair a fhulaingíonn siad damáiste airgeadaíochta, sárú ar cheart pearsantachta, nó aon anacair mhothúchánach eile de dheasca gníomhaíocht neamhdhleathach de chuid an phreasa (arna dhéanamh d’aon ghnó nó le faillí) (48). Tá an preas díolmhaithe ó dhliteanas faoin Acht a mhéid nach bhfuil tuarascáil phreasa lena gcuirtear isteach ar chearta duine aonair contrártha do luachanna sóisialta agus atá sí foilsithe le toiliú an duine aonair lena mbaineann, nó chun leas an phobail (agus atá forais leordhóthanacha ann lena mheas go gcomhfhreagraíonn an tuarascáil don fhírinne) (49).

(32)

Cé go bhfuil próiseáil sonraí pearsanta arna déanamh ag an bpreas le haghaidh gníomhaíochtaí iriseoireachta faoi réir coimircí sonracha dá bhrí sin a leanann ón Acht Preasa, ní hann d’aon choimirce bhreise den sórt sin lena leagtar amach úsáid na n-eisceachtaí le haghaidh na ngníomhaíochtaí próiseála de chuid eagraíochtaí reiligiúnacha agus páirtithe polaitiúla ar bhealach atá inchomparáide le hAirteagail 85, 89 agus 91 de Rialachán (AE) 2016/679. Dá bhrí sin, measann an Coimisiún gurb iomchuí eagraíochtaí reiligiúnacha a eisiamh a mhéid a phróiseálann siad sonraí pearsanta le haghaidh a ngníomhaíochtaí misinéireachta agus páirtithe polaitiúla a eisiamh a mhéid a phróiseálann siad sonraí pearsanta i gcomhthéacs iarrthóirí a ainmniú, agus sin ó raon feidhme chur i bhfeidhm an Chinnidh seo.

(33)

Ba cheart sonraí pearsanta a phróiseáil go dleathach agus go cothrom.

(34)

Leagtar an prionsabal sin síos le hAirteagal 3(1), (2) de PIPA agus treisítear é le hAirteagal 59 de PIPA, lena dtoirmeasctar próiseáil sonraí pearsanta “ar mhodhanna calaoiseacha, míchuí nó éagóracha”, “gan údarás dlíthiúil” nó “taobh amuigh den údarás cuí” (50). Forbraítear na prionsabail ghinearálta sin maidir le próiseáil dhleathach in Airteagail 15 go 19 de PIPA lena leagtar amach na bunúis dlí éagsúla le haghaidh na próiseála (bailiú, úsáid agus soláthar do thríú páirtithe), lena n-áirítear na himthosca faoina bhféadfaidh baint a bheith aige sin le hathrú críche (Airteagal 18 de PIPA).

(35)

De réir Airteagal 15(1) PIPA, ní fhéadfaidh rialaitheoir sonraí pearsanta a bhailiú (laistigh de raon feidhme chríoch an bhailithe) ach ar líon teoranta d’fhorais dhlíthiúla. Is iad seo a leanas na forais (1) toiliú an ábhair sonraí (51) (lit. 1); (2) an gá le conradh a fhorghníomhú agus a dhéanamh leis an ábhar sonraí (lit. 4); (3) údarú dlí speisialta sa dlí nó gá le comhlíontacht le hoibleagáid dhlíthiúil (lit. 2); an gá (52) atá ann go ndéanfadh institiúid phoiblí na cúraimí laistigh dá dlínse mar a fhorordaítear leis an dlí; (4) an gá follasach saol, corp nó leasanna maoine an ábhair sonraí nó tríú páirtí a chosaint ar gharchontúirt (ach amháin mura bhfuil an t-ábhar sonraí in ann a rún a chur in iúl, nó mura féidir toiliú a fháil roimh ré) (lit. 5); (5) an gá an “leas a bhfuil bonn cirt leis” a fháil ón rialaitheoir más “follasach gur mó” é ná leasanna an ábhair sonraí (agus i gcás ina mbeidh “gaol substaintiúil” ag an bpróiseáil leis an leas dlisteanach agus nach dtéann sí thar a bhfuil réasúnach, agus sa chás sin amháin (lit. 6) (53). Na forais sin le haghaidh próiseála, is ionann iad go bunúsach agus na cinn a leagtar síos in Airteagal 6 de Rialachán (AE) 2016/679, lena n-áirítear an foras maidir leis an “leas a bhfuil bonn cirt leis” atá comhionann leis an bhforas maidir le “leas dlisteanach” in Airteagal 6(1) pointe (f) de Rialachán (AE) 2016/679.

(36)

Nuair a bhailítear iad, féadfar sonraí pearsanta a úsáid laistigh de raon feidhme chríoch an bhailithe (Airteagal 15(1) PIPA), nó “laistigh den raon feidhme atá bainteach go réasúnta” le cuspóir an bhailithe, agus na míbhuntáistí féideartha a rinneadh don ábhar sonraí á gcur san áireamh agus ar choinneáil gur glacadh na bearta slándála is gá (e.g. criptiú) (Airteagal 15(3) PIPA). Chun a chinneadh cibé acu atá nó nach bhfuil críoch na húsáide “bainteach go réasúnta” le críoch bhunaidh an bhailithe, leagtar amach leis an bhForaithne um Fhorfheidhmiú critéir shonracha, atá comhchosúil leo sin in Airteagal 6(4) de Rialachán (AE) 2016/679. Go háirithe, ní mór ábharthacht shuntasach a bheith ann maidir leis an gcríoch bhunaidh; ní mór an úsáid bhreise a bheith intuartha (mar shampla i bhfianaise na n-imthosca inar bailíodh an fhaisnéis); agus, i gcás inar féidir, ní mór na sonraí a bheith faoi ainm bréige (54). Ní mór na critéir shonracha a úsáideann rialaitheoir sa mheasúnú sin a nochtadh roimh ré sa bheartas príobháideachais (55). Thairis sin, ceanglaítear go sonrach ar an oifigeach príobháideachais (féach aithris (94)) athbhreithniú a dhéanamh ar cibé acu a tharlaíonn nó nach dtarlaíonn úsáid bhreise laistigh de na paraiméadair sin.

(37)

Tá feidhm ag rialacha atá comhchosúil (ach beagáinín níos doichte) maidir le soláthar sonraí do thríú páirtí. De réir Airteagal 17(1) de PIPA, ceadaítear soláthar sonraí pearsanta do thríú tír ar bhonn toiliú (56) nó, laistigh de chríoch an bhailithe, i gcás inar bailíodh an fhaisnéis ar cheann de na forais dhlíthiúla in Airteagal 15(1) lit. 2, 3 agus 5 de PIPA. Eisiatar leis sin go háirithe aon nochtadh atá bunaithe ar “an leas a bhfuil bonn cirt leis” de chuid an rialaitheora. Thairis sin, le hAirteagal 17(4) PIPA ceadaítear soláthar tríú páirtí “laistigh den raon feidhme atá bainteach go réasúnta” le críoch an bhailithe, agus míbhuntáistí féideartha a rinneadh don ábhar sonraí á gcur san áireamh arís agus ar choinníoll gur glacadh na bearta slándála is gá (amhail criptiú). Ní mór na tosca céanna leo sin ar a dtugtar tuairisc in aithris (36) a chur san áireamh chun measúnú a dhéanamh ar cibé acu atá nó nach bhfuil an fhoráil laistigh den raon feidhme atá bainteach go réasúnta le críoch an bhailithe agus atá nó nach bhfuil feidhm ag na coimircí céanna (i.e. maidir le trédhearcacht tríd an mbeartas príobháideachais agus rannpháirtíocht an oifigigh phríobháideachais).

(38)

Má fhaigheann rialaitheoir sonraí de chuid na Cóiré sonraí pearsanta ón Aontas meastar gur “bailiú” de réir bhrí Airteagal 15 PIPA é sin. Le Fógra Uimh. 2021-5 (Roinn I d’Iarscríbhinn I a ghabhann leis an gCinneadh seo) soiléirítear gurb é atá sa chríoch ar lena haghaidh a d’aistrigh an t-eintiteas lena mbaineann den Aontas na sonraí, críoch an bhailithe le haghaidh an rialaitheora sonraí den Chóiré. Dá thoradh sin, rialaitheoirí sonraí den Chóiré a fhaigheann sonraí pearsanta ón Aontas, ceanglaítear orthu i bprionsabal an fhaisnéis sin a phróiseáil laistigh de raon feidhme chríoch an aistrithe, i gcomhréir le hAirteagal 17 PIPA.

(39)

Tá feidhm ag teorannuithe speisialta i gcás ina bhféachfaidh an rialaitheoir leis na sonraí pearsanta a úsáid nó lena soláthar do thríú páirtí chun críche atá éagsúil le críoch an bhailithe (57). De réir Airteagal 18(2) PIPA, féadfaidh rialaitheoir príobháideach (58) sonraí pearsanta a úsáid go heisceachtúil nó iad a sholáthar do thríú páirtí chun críche éagsúla: (1) bunaithe ar thoiliú breise (is é sin ar leithligh) an ábhair sonraí; (2) i gcás ina ndéanfar foráil maidir leis sin le forálacha reachtúla speisialta; nó (3) i gcás ina mbeidh gá follasach leis sin chun saol, corp nó leasanna maoine an ábhair sonraí nó tríú páirtí a chosaint ar gharchontúirt (ach amháin mura bhfuil an t-ábhar sonraí in ann a rún a chur in iúl, agus mura féidir toiliú a fháil roimh ré) (59).

(40)

Féadfaidh institiúidí poiblí sonraí pearsanta a úsáid freisin nó iad a sholáthar do thríú páirtí chun críche éagsúla i staideanna áirithe. Áirítear leis sin cásanna ina mbeadh sé dodhéanta murach sin d’institiúidí poiblí a ndualgais reachtúla a dhéanamh mar a fhorordaítear leis an dlí, faoi réir údarú ó PIPC. Ina theannta sin, féadfaidh institiúidí poiblí sonraí pearsanta a sholáthar d’údarás nó do chúirt eile, i gcás inar gá sin chun coireanna nó díotáil a imscrúdú agus a ionchúiseamh; chun go ndéanfadh cúirt a feidhmeanna a bhaineann le himeachtaí breithiúnacha leanúnacha; nó chun pionós coiriúil, nó ordú cúraim nó coimeádta a fhorfheidhmiú (60). Féadfaidh siad sonraí pearsanta a sholáthar freisin do rialtas eachtrach nó eagraíocht idirnáisiúnta chun oibleagáid dhlíthiúil a chomhlíonadh tar éis conradh nó coinbhinsiún idirnáisiúnta, inar gá dóibh na ceanglais maidir le haistrithe sonraí trasteorann a chomhlíonadh freisin (féach aithris (90)).

(41)

Dá bhrí sin, déantar na prionsabail maidir le dlíthiúlacht agus cothroime na próiseála a chur chun feidhme i gcreat dlíthiúil na Cóiré ar bhealach arb ionann é go bunúsach agus an bealach lena mbaineann i Rialachán (AE) 2016/679, tríd an bpróiseáil a cheadú ar bhonn forais atá dlisteanach agus sainmhínithe go soiléir, agus ar bhonn na bhforas sin amháin. Thairis sin, sna cásanna uile atá luaite, ní cheadaítear an phróiseáil ach mura dócha go “sárófar go héagórach” léi leasanna an ábhair sonraí nó tríú páirtí, a gceanglaítear comhardú leasanna ina leith. Ina theannta sin, le hAirteagal 18(5) PIPA forordaítear coimircí breise nuair a sholáthraíonn an rialaitheoir na sonraí pearsanta do thríú páirtí, lena bhféadfar iarraidh a áireamh chun críoch agus modh na húsáide a shrianadh, nó chun bearta slándála sonracha a chur i bhfeidhm. Ceanglaítear ar an tríú páirtí dá réir sin na bearta arna n-iarraidh a chur chun feidhme.

(42)

Ar deireadh, le hAirteagal 28-2 PIPA ceadaítear próiseáil (bhreise) na faisnéise faoi ainm bréige gan toiliú an duine lena mbaineann chun críche staidrimh, taighde eolaíoch (61) agus cartlannú a dhéanamh ar mhaithe le leas an phobail, faoi réir coimircí sonracha. Cosúil le Rialachán (AE) 2016/679 (62), le PIPA éascaítear, dá bhrí sin, próiseáil (bhreise) ar shonraí pearsanta chun na gcríoch sin laistigh de chreat lena ndéantar foráil maidir le coimircí iomchuí chun cearta daoine aonair a chosaint. Seachas a bheith ag brath ar ainm bréige a chur i bhfeidhm mar choimirce fhéideartha, le PIPA forchuirtear mar réamhchoinníoll é chun gníomhaíochtaí próiseála áirithe a dhéanamh chun críoch staidrimh, taighde eolaíoch agus cartlannú a dhéanamh ar mhaithe le leas an phobail (amhail a bheith in ann na sonraí a phróiseáil gan toiliú nó tacair sonraí éagsúla a chomhcheangal).

(43)

Thairis sin, le PIPA forchuirtear roinnt coimircí sonracha, go háirithe ó thaobh bearta teicniúla agus eagraíochtúla a cheanglaítear, coimeád taifead, teorannuithe ar chomhroinnt sonraí agus aghaidh a thabhairt ar rioscaí féideartha maidir le hath-shainaithint. Leis an gcomhcheangal de na coimircí éagsúla ar a dtugtar tuairisc in aithrisí (44) - (48) áirithítear go bhfuil próiseáil sonraí pearsanta sa chomhthéacs sin faoi réir cosaintí arb ionann iad go bunúsach i gcomparáid leis na cinn a cheanglófaí i gcomhréir le Rialachán (AE) 2016/679.

(44)

Ar an gcéad dul síos, agus rud a bhfuil tábhacht ar leith leis, le hAirteagal 28-5(1) PIPA toirmeasctar próiseáil faisnéise faoi ainm bréige chun duine aonair ar leith a shainaithint. Maidir le faisnéis lena bhféadfaí duine aonair a shainaithint, dá nginfí í mar sin féin le linn faisnéis faoi ainm bréige a phróiseáil, ní mór don rialaitheoir an phróiseáil a chur ar fionraí láithreach agus an fhaisnéis sin a scriosadh (Airteagal 28-5(2) PIPA). Tá mainneachtain na forálacha sin a chomhlíonadh faoi réir fíneálacha riaracháin agus is cion coiriúil é sin (63). Fágann sin, fiú sna staideanna sin ina mbeadh sé beagnach dodhéanta an duine aonair a ath-shainaithint, go bhfuil toirmeasc ar an ath-shainaithint sin ó thaobh an dlí de.

(45)

Ar an dara dul síos, le linn próiseáil (bhreise) a dhéanamh ar fhaisnéis faoi ainm bréige chun na gcríoch sin, ceanglaítear ar an rialaitheoir bearta sonracha teicneolaíocha, bainistiúla agus fisiceacha a chur i bhfeidhm chun slándáil na faisnéise a áirithiú (lena n-áirítear faisnéis a stóráil agus a bhainistiú ar leithligh, ar faisnéis í is gá chun an fhaisnéis faoi ainm bréige a thabhairt ar ais chuig a staid bhunaidh) (64). Ina theannta sin, ní mór taifid a choimeád ar an bhfaisnéis faoi ainm bréige arna próiseáil, mar aon le críoch na próiseála, stair na húsáide agus aon fhaighteoir tríú páirtí (Airteagal 29-5(2) d’Fhoraithne um Fhorfheidhmiú PIPA).

(46)

Ar an tríú dul síos agus ar deireadh, déantar foráil le PIPA maidir le coimircí sonracha chun sainaithint daoine aonair arna déanamh ag tríú páirtithe a chosc i gcás ina gcomhroinnfear an fhaisnéis. Go háirithe, le linn faisnéis faoi ainm bréige a sholáthar do thríú páirtí chun críche staidrimh, taighde eolaíoch nó cartlannú a dhéanamh ar mhaithe le leas an phobail, ní fhéadfaidh rialaitheoirí faisnéis a áireamh dá bhféadfaí í a úsáid chun duine aonair sonrach a shainaithint (Airteagal 28-2(2) PIPA (65).

(47)

Níos sonraí ná sin, cé go gceadaítear le PIPA comhcheangal faisnéise faoi ainm bréige (arna próiseáil ag rialaitheoirí éagsúla) chun críche staidrimh, taighde eolaíoch nó cartlannú a dhéanamh ar mhaithe le leas an phobail, forchoimeádann sé an chumhacht sin d’institiúidí speisialaithe ag a bhfuil saoráidí slándála sonracha (Airteagal 28-3(1) PIPA (66). Agus iarratas á dhéanamh ar chomhcheangal de shonraí faoi ainm bréige, ní mór do rialaitheoir doiciméadacht a chur isteach ar, i measc nithe eile, na sonraí atá le comhcheangal, críoch an chomhcheangail agus, mar aon leis sin, na bearta slándála atá beartaithe chun na sonraí comhcheangailte a phróiseáil (67). Chun go bhféadfar an comhcheangal a dhéanamh, ní mór don rialaitheoir na sonraí atá le comhcheangal a sheoladh chuig an institiúid speisialaithe agus “eochair chomhcheangail” (i.e. an fhaisnéis a úsáideadh chun ainm bréige a chur i bhfeidhm) a sholáthar do Ghníomhaireacht Idirlín agus Slándála na Cóiré (68). Gineann an Ghníomhaireacht sin “sonraí naisc eochrach comhcheangail” (lenar féidir eochracha comhcheangail iarratasóirí éagsúla a nascadh chun comhcheangal na dtacar sonraí a bhaint amach) agus soláthraíonn sí don institiúid speisialaithe iad (69).

(48)

Féadfaidh an rialaitheoir a iarrann comhcheangal anailís a dhéanamh ar an bhfaisnéis chomhcheangailte ag áitreabh na hinstitiúide speisialaithe, i spás ina gcuirtear bearta slándála teicniúla, fisiceacha agus riaracháin sonracha i bhfeidhm (Airteagal 29-3 d’Fhoraithne um Fhorfheidhmiú PIPA). Rialaitheoirí a rannchuidíonn tacar sonraí le haghaidh an chomhcheangail sin, ní fhéadfaidh siad na sonraí comhcheangailte a thógáil lasmuigh den institiúid speisialaithe ach tar éis ainm bréige a chur i bhfeidhm ar na sonraí comhcheangailte nó iad a anaithnidiú a thuilleadh agus le formheas na hinstitiúide sin (Airteagal 28-3(2) PIPA) (70). Agus breithniú á dhéanamh ar cibé acu is ceart nó nach ceart an formheas sin a dheonú, déanfaidh an institiúid measúnú ar an nasc idir na sonraí comhcheangailte agus críoch na próiseála agus ar cibé acu a tarraingíodh nó nár tarraingíodh plean slándála sonrach suas le haghaidh úsáid na sonraí sin (71). Ní cheadófar an fhaisnéis chomhcheangailte a easpórtáil lasmuigh den institiúid má bhíonn sonraí san fhaisnéis lena bhféadfaí duine a shainaithint (72). Ar deireadh, comhcheangal agus scaoileadh sonraí faoi ainm bréige arna ndéanamh ag an institiúid speisialaithe, déanann PIPC maoirseacht air sin (Airteagal 29-4(3) d’Fhoraithne um Fhorfheidhmiú PIPA).

(49)

Ba cheart coimircí sonracha a bheith ann i gcás ina bhfuil “catagóirí speisialta” sonraí á bpróiseáil.

(50)

Tá rialacha sonracha in PIPA a mhéid a bhaineann le próiseáil sonraí íogaire (73), rud a shainmhínítear mar shonraí pearsanta lena nochtar faisnéis maidir le hidé-eolaíocht, creideamh, ligean isteach chuig ceardchumann nó páirtí polaitiúil nó aistarraingt uaidh, tuairimí polaitiúla, sláinte, agus cleachtadh gnéis duine aonair, mar aon le faisnéis phearsanta eile ar dócha go mbagrófaí “go suntasach” ar phríobháideachas an ábhair sonraí léi agus a forordaíodh mar fhaisnéis íogair le Foraithne ón Uachtarán (74). De réir soiléirithe a fuarthas ó PIPC, léirmhínítear cleachtadh gnéis mar ní lena gcumhdaítear gnéaschlaonadh nó roghanna gnéasacha an duine aonair freisin (75). Thairis sin, le hAirteagal 18 den Fhoraithne um Fhorfheidhmiú cuirtear catagóirí breise le raon feidhme na sonraí íogaire, go háirithe faisnéis DNA a fuarthas ó thástáil ghéiniteach agus sonraí arb é atá iontu taifead staire coiriúla. Leis an leasú a rinneadh le déanaí ar Fhoraithne um Fhorfheidhmiú PIPA leathnaíodh coincheap na sonraí íogaire a thuilleadh, trí shonraí pearsanta lena nochtar tionscnamh ciníoch nó eitneach agus faisnéis bhithmhéadrach a áireamh freisin (76). Tar éis an leasaithe sin, coincheap na sonraí íogaire faoi PIPA, is ionann é go bunúsach agus an ceann in Airteagal 9 de Rialachán (AE) 2016/679.

(51)

De réir Airteagal 23(1) PIPA agus cosúil leis an méid a fhoráiltear faoi Airteagal 9(1) de Rialachán (AE) 2016/679, tá toirmeasc ar phróiseáil sonraí íogaire de ghnáth, mura bhfuil feidhm ag ceann de na heisceachtaí atá liostaithe (77). Leo sin, teorannaítear próiseáil do chásanna ina gcuireann an rialaitheoir an t-ábhar sonraí ar an eolas i gcomhréir le hAirteagail 15 agus 17 PIPA agus ina bhfaigheann sé toiliú ar leithligh (i.e. ar leithligh ón toiliú chun sonraí pearsanta eile a phróiseáil), nó i gcás ina gceanglófar nó ina gceadófar an phróiseáil le reacht. Féadfaidh údaráis phoiblí próiseáil a dhéanamh freisin ar fhaisnéis bhithmhéadrach, faisnéis DNA arna fáil ó thástáil ghéiniteach, faisnéis phearsanta lena nochtar an tionscnamh ciníoch nó eitneach agus sonraí arb é atá iontu taifead staire coiriúla ar na forais sin atá ar fáil dóibh go heisiach (mar shampla i gcás inar gá an fhaisnéis nó na sonraí chun coireanna a imscrúdú nó i gcás inar gá iad chun go rachadh cúirt ar aghaidh le cás) (78). Dá réir sin, tá na bunúis dlí atá ar fáil chun sonraí íogaire a phróiseáil níos teoranta ná mar atá i gcás cineálacha eile sonraí pearsanta, agus tá siad níos sriantaí fós i ndlí na Cóiré ná mar atá faoi Airteagal 9(2) de Rialachán (AE) 2016/679.

(52)

Thairis sin, le hAirteagal 23(2) de PIPA – ar féidir smachtbhannaí teacht as neamhchomhlíonadh an mhéid sin (79) – cuirtear i dtábhacht an tábhacht ar leith a bhaineann le slándáil iomchuí a áirithiú agus sonraí íogaire á láimhseáil ionas “nach ndéanfar na sonraí íogaire a chailleadh, a ghoid, a nochtadh, a bhrionnú, a athrú ná a dhamáistiú.” Cé gur ceanglas ginearálta é sin faoi Airteagal 29 de PIPA, soiléirítear le hAirteagal 3(4) nach mór an leibhéal slándála a oiriúnú do chineál na sonraí pearsanta atá á phróiseáil, rud a fhágann nach mór na rioscaí ar leith a bhaineann le próiseáil sonraí íogaire a chur san áireamh. Thairis sin, déanfar próiseáil sonraí i gcónaí “ar bhealach lena n-íoslaghdaítear an fhéidearthacht sárú a dhéanamh” ar phríobháideachas an ábhair sonraí, agus más féidir “go hanaithnid” (Airteagal 3(6) agus (7) PIPA). Tá na ceanglais sin ábhartha go háirithe i gcás ina mbaineann an phróiseáil le sonraí íogaire.

(53)

Ba cheart sonraí pearsanta a bhailiú chun críche áirithe agus ar bhealach nach bhfuil ar neamhréir le críoch na próiseála.

(54)

Áirithítear an prionsabal sin le hAirteagal 3(1) agus (2) de PIPA ar dá réir a dhéanfaidh an rialaitheoir críoch na próiseála “a shonrú go sainráite”, a phróiseálfaidh sé sonraí pearsanta ar bhealach iomchuí is gá chun na críche sin agus nach n-úsáidfidh sé iad lasmuigh den chríoch sin. Deimhnítear an prionsabal ginearálta maidir le teorannú de réir cuspóra freisin in Airteagail 15(1), 18(1), 19 agus – le haghaidh próiseálaithe (“seachfhoinsithe” mar a thugtar orthu) – in Airteagal 26(1) lit. 1, (5) agus (7) de PIPA. Go háirithe, ní fhéadfar sonraí pearsanta a úsáid ná a sholáthar do thríú páirtithe i bprionsabal ach laistigh de raon feidhme na críche ar bailíodh iad lena haghaidh (Airteagal 15(1) agus 17(1) lit. 2). Próiseáil chun críche comhoiriúnaí, i.e. “laistigh den raon feidhme a bhaineann go réasúnta le críoch thosaigh an bhailithe”, ní fhéadfar sin a dhéanamh ach mura ndéantar dochar do na hábhair sonraí lena mbaineann leis sin agus má ghlactar na bearta slándála is gá (amhail criptiú) (Airteagail 15(3) agus 17(4) PIPA). Chun a chinneadh cibé acu is chun críche comhoiriúnaí nó nach ea atá próiseáil bhreise, liostaítear i bhForaithne um Fhorfheidhmiú PIPA critéir shonracha atá cosúil leis na cinn dá bhforáiltear le hAirteagal 6(4) de Rialachán (AE) 2016/679, féach aithris (36).

(55)

Mar a mhínítear in aithris (38), is é atá i gcríoch an bhailithe i gcás rialaitheoirí na Cóiré a fhaigheann sonraí pearsanta ón Aontas, an chríoch ar lena haghaidh a aistrítear na sonraí. Ní cheadaítear athrú críche ón rialaitheoir ach go heisceachtúil, i gcásanna (liostaithe) sonracha (Airteagal 18(2) lit. 1-3 PIPA, féach freisin aithris (39)). A mhéid a údaraítear athrú críche leis an dlí, leis na dlíthe sin ní mór an ceart bunúsach chun príobháideachais agus cosanta sonraí a urramú, mar aon le prionsabail an riachtanais agus na comhréireachta a leagtar síos i mBunreacht na Cóiré. Thairis sin, le hAirteagal 18(2) agus (5) PIPA déantar foráil maidir le coimircí breise, go háirithe an ceanglas nár cheart “leas ábhair sonraí a shárú go héagórach” le hathrú críche den sórt sin, agus ar gá comhardú leasanna ina leith i gcónaí dá bhrí sin. Leis sin déantar foráil maidir le leibhéal cosanta arb ionann é go bunúsach agus an leibhéal faoi Airteagal 5(1) lit. b) agus Airteagal 6, i gcomhar le haithris 50, de Rialachán (AE) 2016/679.

(56)

Ba cheart sonraí pearsanta a bheith cruinn agus, i gcás inar gá, ba cheart iad a choimeád cothrom le dáta. Ba cheart iad a bheith leordhóthanach, ábhartha agus teoranta freisin don mhéid is gá i ndáil leis na críocha a bpróiseáiltear iad lena n-aghaidh.

(57)

Aithnítear prionsabal an chruinnis in Airteagal 3(3) PIPA ar an mbealach céanna, lena gceanglaítear go bhfuil sonraí pearsanta “cruinn, iomlán agus cothrom le dáta a mhéid is gá i ndáil leis na críocha” a bpróiseáiltear na sonraí lena n-aghaidh. Ceanglaítear íoslaghdú sonraí faoi Airteagail 3(1), (6) agus 16(1) PIPA, lena leagtar síos go ndéanfaidh an rialaitheoir sonraí pearsanta a bhailiú (ach) “an t-íosmhéid is gá” chun na críche beartaithe, agus go bhfuil an dualgas cruthúnais air maidir leis sin. Más féidir críoch an bhailithe a chomhlíonadh trí fhaisnéis a phróiseáil i bhfoirm anaithnidithe, ba cheart do rialaitheoirí féachaint le déanamh amhlaidh (Airteagal 3(7) PIPA).

(58)

Níor cheart sonraí pearsanta a choimeád ar feadh tréimhse is faide ná mar is gá chun na gcríoch a bpróiseáiltear na sonraí pearsanta lena n-aghaidh

(59)

Déantar foráil maidir le prionsabal an teorannaithe stórála ar an mbealach céanna le hAirteagal 21(1) PIPA (80), lena gceanglaítear ar an rialaitheoir sonraí pearsanta “a scriosadh” (81) gan mhoill tar éis críoch na próiseála a bhaint amach nó ar dhul in éag na tréimhse coinneála (cibé acu is túisce), mura gceanglaítear coinneáil bhreise le reacht (82). Sa chás deireanach, maidir leis na sonraí pearsanta ábhartha “déanfar iad a stóráil agus a bhainistiú ar leithligh ó fhaisnéis phearsanta eile” (Airteagal 21(3) PIPA).

(60)

Níl feidhm ag Airteagal 21(1) PIPA nuair a phróiseáiltear sonraí faoi ainm bréige chun críoch staidrimh, taighde eolaíoch nó cartlanna chun leas an phobail (83). Chun prionsabal na coinneála teoranta sonraí a áirithiú sa chás sin freisin, ceanglaítear le Fógra 2021-5 ar rialaitheoirí an fhaisnéis a anaithnidiú i gcomhréir le hAirteagal 58-2 PIPA más rud é nár scriosadh na sonraí ar dóibh críoch shonrach na próiseála a chomhlíonadh (84).

(61)

Ba chóir sonraí pearsanta a phróiseáil ar bhealach lena n-áirithítear slándáil na sonraí, lena n-áirítear cosaint ar phróiseáil neamhúdaraithe nó neamhdhleathach agus ar chailleadh, scrios nó damáiste de thaisme. Chun na críche sin, ba cheart d’oibreoirí gnó bearta teicniúla nó eagraíochtúla iomchuí a dhéanamh chun sonraí pearsanta a chosaint ar bhagairtí féideartha. Ba cheart measúnú a dhéanamh ar na bearta sin agus úrscothacht na próiseála, na costais ghaolmhara agus cineál, raon feidhme, comhthéacs agus críocha na próiseála á gcur san áireamh, mar aon leis na rioscaí do chearta an duine aonair.

(62)

Leagtar prionsabal slándála comhchosúil síos in Airteagal 3(4) PIPA, lena gceanglaítear ar rialaitheoirí “faisnéis phearsanta a bhainistiú go sábháilte de réir na modhanna, na gcineálacha, etc. próiseála faisnéise pearsanta, agus an fhéidearthacht go sárófar cearta an ábhair sonraí á cur san áireamh mar aon le déine na rioscaí ábhartha”. Thairis sin, déanfaidh an rialaitheoir “faisnéis phearsanta a phróiseáil ar bhealach lena n-íoslaghdaítear an fhéidearthacht go sárófar príobháideachas ábhair sonraí”, agus sa chomhthéacs sin, féachfaidh an rialaitheoir le sonraí pearsanta a phróiseáil go hanaithnid nó i bhfoirm faoi ainm bréige, más féidir (Airteagal 3(6) agus (7) PIPA).

(63)

Tugtar tuairisc níos mionsonraithe ar na ceanglais ghinearálta sin in Airteagal 29 PIPA, ar dá réir a ndéanfaidh gach rialaitheoir “na bearta teicniúla, eagraíochtúla agus fisiciúla sin amhail plean bainistíochta inmheánach a bhunú agus taifid logála isteach a chaomhnú, etc., is gá chun an tsábháilteacht a áirithiú mar a fhorordaítear le Foraithne ón Uachtarán chun nach ndéanfar an fhaisnéis phearsanta a chailleadh, a ghoid, a nochtadh, a bhrionnú, a athrú ná a dhamáistiú”. Sonraítear na bearta sin le hAirteagal 30(1) d’Fhoraithne um Fhorfheidhmiú PIPA trí thagairt a dhéanamh (1) do cheapadh agus do chur chun feidhme plean bainistíochta inmheánaigh chun sonraí pearsanta a phróiseáil go sábháilte, (2) rialuithe agus srianta rochtana, (3) teicneolaíocht chriptiúcháin a ghlacadh chun sonraí pearsanta a stóráil agus a tharchur go sábháilte, (4) taifid logála isteach, (5) cláir shlándála, agus (6) bearta fisiciúla amhail córas stórála nó glasála sábháilte (85).

(64)

Ina theannta sin, tá feidhm ag oibleagáidí sonracha más rud é go dtarlaíonn sárú sonraí (Airteagal 34 PIPA i gcomhar le hAirteagail 39 agus 40 d’Fhoraithne um Fhorfheidhmiú PIPA) (86). Go háirithe, ceanglaítear ar an rialaitheoir fógra a thabhairt do na hábhair sonraí éagóirithe faoi mhionsonraí an tsáraithe gan mhoill (87), lena n-áirítear faisnéis maidir le frithbhearta (sainordaitheacha) a dhéanann an rialaitheoir agus faoin méid is féidir le hábhair sonraí a dhéanamh chun riosca an damáiste a mhaolú (Airteagal 34(1), (2) PIPA) (88). I gcás ina mbainfidh an sárú sonraí le 1 000 ábhar sonraí ar a laghad, déanfaidh an rialaitheoir, gan mhoill, an sárú sonraí agus na frithbhearta a rinneadh a thuairisciú do PIPC agus do Ghníomhaireacht Idirlín agus Slándála na Cóiré freisin, a fhéadfaidh cúnamh teicniúil a sholáthar (Airteagal 34(3) PIPA i gcomhar le hAirteagal 39 d’Fhoraithne um Fhorfheidhmiú PIPA). Bíonn rialaitheoirí faoi dhliteanas as aon damáiste de thoradh sáruithe sonraí, i gcomhréir le forálacha an Achta Shibhialta maidir le dliteanas torta (féach freisin roinn 2.5 maidir le sásamh) (89).

(65)

Agus a chuid oibleagáidí slándála á gcomhlíonadh aige, ní mór don rialaitheoir cúnamh a fháil ó oifigeach príobháideachais, a n-áirítear lena chúraimí, i measc cúraimí eile, córas rialaithe inmheánaigh a thógáil “chun nochtadh, drochúsáid agus mí-úsáid faisnéise pearsanta a chosc” (Airteagal 31(2) Lit. 4 PIPA). Thairis sin, tá sé de dhualgas ar an rialaitheoir “rialú agus maoirseacht iomchuí” a dhéanamh ar na baill foirne sin dá chuid a phróiseálann sonraí pearsanta, lena n-áirítear a mhéid a bhaineann le bainistiú sábháilte na sonraí sin; áirítear leis sin an oiliúint (“oideachas”) is gá a chur ar fhostaithe (Airteagal 28(1), (2) PIPA). Ar deireadh, i gcás na fophróiseála, ní mór don rialaitheoir ceanglais a fhorchur ar “an seachfhoinsí” i measc láimhseálaithe eile a mhéid a bhaineann le sonraí pearsanta a bhainistiú go sábháilte (“coimircí teicniúla agus bainistíochta”), agus ní mór don rialaitheoir an bealach a chuirtear na coimircí sin chun feidhme a mhaoirsiú trí chigireachtaí (Airteagal 26(1) agus (4) PIPA i gcomhar le hAirteagal 28(1) lit. 3, 4 agus (6) d’Fhoraithne um Fhorfheidhmiú PIPA).

(66)

Ba cheart ábhair sonraí a chur ar an eolas faoi na príomhghnéithe a bhaineann le próiseáil a gcuid sonraí pearsanta.

(67)

Áirithítear go ndéantar amhlaidh ar bhealaí difriúla i gcóras na Cóiré. Seachas an ceart ar fhaisnéis de bhun Airteagal 4 lit. 1 (i gcoitinne) agus Airteagal 20(1) PIPA (le haghaidh sonraí pearsanta a bhailítear ó thríú páirtithe), mar aon leis an gceart rochtana de bhun Airteagal 35 PIPA, áirítear le PIPA ceanglas ginearálta maidir leis an trédhearcacht a mhéid a bhaineann le críoch na próiseála (Airteagal 3(1) PIPA) agus ceanglais shonracha maidir leis an trédhearcacht i gcás ina mbeidh an phróiseáil bunaithe ar an toiliú (Airteagal 15(2), 17(2) agus 18(3) PIPA) (90). Thairis sin, ceanglaítear le hAirteagal 20(2) PIPA ar rialaitheoirí áirithe – na rialaitheoirí sin dá dtéann an phróiseáil os cionn tairseacha áirithe (91) – fógra a thabhairt don ábhar sonraí, a bhfuair na rialaitheoirí sin a gcuid sonraí pearsanta ó thríú páirtí de chuid fhoinse na faisnéise, faoi chríoch na próiseála, agus faoi cheart an ábhair sonraí éileamh go gcuirfear an phróiseáil ar fionraí, ach amháin i gcás ina mbeidh fógra den sórt sin dodhéanta i ngeall ar easpa aon fhaisnéise teagmhála. Tá feidhm ag eisceachtaí le haghaidh comhaid sonraí pearsanta áirithe arna sealbhú ag údaráis phoiblí, go háirithe comhaid ina bhfuil sonraí a phróiseáiltear le haghaidh na slándála náisiúnta, ar mhaithe le leasanna náisiúnta eile lena mbaineann tábhacht ar leith (tábhacht “thromchúiseach”), nó chun críoch an dlí coiriúil a fhorfheidhmiú, nó i gcás inar dócha go mbeidh fógra ina chúis le díobháil do bheatha nó do chorp duine eile, nó go ndéanfar le fógra damáiste go héagórach ar mhaoin agus ar leasanna eile duine eile, ach i gcás, agus sa chás seo amháin áfach, inar “follasach gur mó” na leasanna poiblí nó príobháideacha atá i gceist ná cearta na n-ábhar sonraí lena mbaineann (Airteagal 20(4) PIPA). Ceanglaítear leasanna a chomhardú lena aghaidh sin.

(68)

Ina theannta sin, forordaítear le hAirteagal 3(5) PIPA go bpoibleoidh rialaitheoirí a bheartas príobháideachais (agus ábhair eile a bhaineann le próiseáil sonraí pearsanta). Sonraítear an ceanglas sin a thuilleadh in Airteagal 30 PIPA i gcomhar le hAirteagal 31 d’Fhoraithne um Fhorfheidhmiú PIPA. De réir na bhforálacha sin, ní mór don bheartas príobháideachais poiblí na nithe seo a leanas a áireamh, i measc nithe eile (1) na cineálacha sonraí pearsanta a phróiseáiltear, (2) críoch na próiseála, (3) an tréimhse choinneála, (4) cibé acu a sholáthraítear sonraí pearsanta do thríú páirtí nó nach soláthraítear (92), (5) aon fhophróiseáil, (6) faisnéis ar chearta an ábhair sonraí agus ar an mbealach na cearta sin a fheidhmiú agus (7) faisnéis teagmhála (lena n-áirítear ainm an oifigigh príobháideachais nó na rannóige inmheánaí atá freagrach as comhlíonadh na rialacha um chosaint sonraí a áirithiú agus as gearáin a láimhseáil). Ní mór an beartas príobháideachais a chur ar fáil go poiblí ar bhealach “ina bhféadfaidh ábhair sonraí é a aithint go héasca” (Airteagal 30(2) de PIPA) (93) agus ní mór é a thabhairt cothrom le dáta go leanúnach (Airteagal 31(2) d’Fhoraithne um Fhorfheidhmiú PIPA).

(69)

Bíonn institiúidí poiblí faoi réir oibleagáid bhreise an fhaisnéis seo a leanas a chlárú, go háirithe, le PIPC: (1) ainm na hinstitiúide poiblí, (2) na forais agus na críocha maidir leis na comhaid faisnéise pearsanta a phróiseáil, (3) sonraí na sonraí pearsanta a dhéantar a thaifeadadh, (4) modh na próiseála, (5) an tréimhse choinneála, (6) líon na n-ábhar sonraí a gcoinnítear a sonraí pearsanta, (7) an rannóg a láimhseálann iarrataí maidir le hábhair sonraí agus (8) faighteoirí na sonraí pearsanta nuair a sholáthraítear sonraí go gnáthúil nó go hathfhillteach (Airteagal 32(1) PIPA) (94). Cuireann PIPC comhaid sonraí pearsanta chláraithe ar fáil go poiblí agus ní mór d’institiúidí poiblí tagairt a dhéanamh dóibh ina mbeartas príobháideachais freisin (Airteagail 30(1) agus 32(4) de PIPA).

(70)

Chun an trédhearcacht a fheabhsú le haghaidh ábhair sonraí san Aontas a n-aistrítear a gcuid sonraí pearsanta chuig an gCóiré ar bhonn an Chinnidh sin, forchuirtear ceanglais bhreise maidir leis an trédhearcacht le Roinn 3(i) agus (ii) d’Fhógra 2021-5 (Iarscríbhinn I). Ar dtús, nuair a fhaightear sonraí pearsanta ón Aontas ar bhonn an Chinnidh sin, ní mór do rialaitheoirí de chuid na Cóiré fógra a thabhairt do na hábhair sonraí lena mbaineann gan moill mhíchuí (agus in aon chás tráth nach déanaí ná 1 mhí ó thráth an aistrithe) faoi ainm agus sonraí teagmhála na n-eintiteas atá ag aistriú agus ag fáil na faisnéise, na sonraí pearsanta (nó catagóirí na sonraí pearsanta) atá á n-aistriú, cuspóir a mbailithe ag an rialaitheoir de chuid na Cóiré, an tréimhse choinneála agus na cearta atá ar fáil faoi PIPA. Ar an dara dul síos, nuair atá sonraí pearsanta, a fhaightear ón Aontas ar bhonn an Chinnidh sin, á soláthar do thríú páirtithe, ní mór ábhair sonraí a chur ar an eolas faoin bhfaighteoir inter alia, na sonraí pearsanta nó na catagóirí sonraí pearsanta atá le soláthar, an tír dá soláthraítear na sonraí (i gcás inarb infheidhme), mar aon leis na cearta atá ar fáil faoi PIPA (95). Ar an mbealach sin, áirithítear leis an bhFógra go leanfaidh daoine aonair de chuid an Aontais de bheith á gcur ar an eolas faoi na rialaitheoirí sonracha atá ag bpróiseáil a bhfaisnéise agus go mbeidh siad in ann a gcearta a fheidhmiú vis-à-vis na heintitis ábhartha.

(71)

Le Roinn 3 (iii) den Fhógra (Iarscríbhinn I) ceadaítear eisceachtaí teoranta agus cáilithe áirithe maidir leis na hoibleagáidí breise trédhearcachta sin arb oibleagáidí iad atá coibhéiseach go bunúsach leis na hoibleagáidí dá bhforáiltear faoi Rialachán (AE) 2016/679. Go háirithe, ní cheanglaítear fógra a thabhairt d’ábhair sonraí san Aontais (1) i gcás agus ar choinníoll gur gá srian a chur le fógra a thabhairt ar chúiseanna áirithe leasa phoiblí (mar shampla i gcás ina ndéanfar an fhaisnéis a phróiseáil chun críoch na slándála náisiúnta nó imscrúduithe coiriúla leanúnacha), a mhéid gur follasach gur mó cuspóirí sin an leasa poiblí ná cearta an ábhair sonraí; (2) i gcás ina mbeidh an fhaisnéis ag an ábhar sonraí cheana féin; (3) I gcás agus ar choinníoll gur dócha go ndéanfaidh fógra díobháil do bheatha nó do chorp duine eile, nó gur dócha go sárófar leasanna maoine duine eile go héagórach, i gcás inar follasach gur mó na cearta nó na leasanna sin ná cearta an ábhair sonraí; nó (4) i gcás nach mbeidh aon mhionsonra teagmhála ann le haghaidh na ndaoine aonair lena mbaineann, nó i gcás ina gceanglófaí iarracht dhíréireach chun fógra a thabhairt dóibh. Agus cinneadh á dhéanamh cibé acu an féidir nó nach féidir dul i dteagmháil leis an ábhar sonraí, nó cibé acu atá an iomarca iarrachtaí i gceist leis sin a dhéanamh nó nach bhfuil, ba cheart an fhéidearthacht dul i gcomhar leis an onnmhaireoir sonraí san Aontas a chur san áireamh.

(72)

Leis na rialacha in aithrisí (67) - (71) dá bhrí sin, áirithítear leibhéal cosanta atá coibhéiseach go bunúsach i leith na trédhearcachta lena bhforáiltear faoi Rialachán (AE) 2016/679.

(73)

Ba cheart cearta áirithe a bheith ag ábhair sonraí ar féidir iad a fhorfheidhmiú in aghaidh an rialaitheora nó an phróiseálaí, go háirithe chun rochtain a fháil ar shonraí, an ceart ar cheartúchán, an ceart agóid a dhéanamh in aghaidh na próiseála agus an ceart go léirscriosfar sonraí. An tráth céanna, féadfaidh cearta den sórt sin a bheith faoi réir srianta, sa mhéid gur gá na srianta sin agus gur comhréireach iad chun cuspóirí tábhachtacha leas ginearálta an phobail a choimirciú.

(74)

De réir Airteagal 3(5) PIPA, ráthóidh an rialaitheoir cearta an ábhair sonraí a liostaítear in Airteagal 4 PIPA agus a shonraítear a thuilleadh in Airteagail 35 go 37, 39 agus 39-2 PIPA.

(75)

Ar dtús, tá cearta ag daoine aonair ar fhaisnéis agus ar rochtain. Nuair a bheidh sonraí pearsanta bailithe ag an rialaitheoir ó thríú páirtí – rud a bheidh amhlaidh i gcónaí i gcás ina n-aistreofar na sonraí ón Aontas – bíonn an ceart ag ábhair sonraí i gcoitinne ar fhaisnéis a fháil (1) “ar fhoinse” na sonraí pearsanta a bailíodh (i.e. an t-aistreoir), (2) ar chríoch na próiseála agus (3) ar an bhfíoras go bhfuil an t-ábhar sonraí i dteideal éileamh go gcuirfear an phróiseáil ar fionraí (Airteagal 20(1) PIPA). Tá feidhm ag eisceachtaí teoranta, eadhon, i gcás inar dócha go ndéanfaidh an fógra sin díobháil do bheatha nó do chorp aon duine eile, nó ina ndéanfaidh sé “damáiste go héagórach do mhaoin agus do leasanna eile” duine eile, ach ní bheidh feidhm ag na heisceachtaí sin ach amháin i gcás inar “mó go sainráite” leasanna sin an tríú páirtí ná cearta an ábhair sonraí (Airteagal 20(4) lit. 2 PIPA).

(76)

Ina theannta sin, foráiltear le hAirteagal 35(1) agus (3) PIPA i gcomhar le hAirteagal 41(4) d’Fhoraithne um Fhorfheidhmiú PIPA an ceart rochtana ar a bhfaisnéis phearsanta d’ábhair sonraí (96). Cumhdaítear le ceart na rochtana deimhniú maidir leis an bpróiseáil, faisnéis ar an gcineál sonraí a phróiseáiltear, críoch na próiseála, an tréimhse choinneála, mar aon le haon nochtadh do thríú páirtí, agus cóip a sholáthar den fhaisnéis phearsanta a phróiseáiltear (Airteagal 4 lit. 3 PIPA i gcomhar le hAirteagal 41(1) d’Fhoraithne um Fhorfheidhmiú PIPA) (97). Ní fhéadfar rochtain a theorannú (rochtain pháirteach) (98) nó a dhiúltú ach amháin i gcás dá bhforáiltear maidir leis sin leis an dlí (99), i gcás inar dhócha go ndéanfadh sé damáiste do bheatha nó do chorp tríú páirtí, nó sárú nach bhfuil bonn cirt leis ar mhaoin agus ar leasanna eile duine eile (Airteagal 35(4) PIPA) (100). Tuigtear leis an gceann deiridh sin gur cheart cearta agus saoirsí an duine aonair a bhfuil cosaint faoin mbunreacht acu a chomhardú, ar thaobh amháin, leis na cearta agus leis na saoirsí sin atá ag daoine eile, ar an taobh eile. I gcás ina gcuirfear teorainn le rochtain nó ina ndiúltófar rochtain, ní mór don rialaitheoir fógra a thabhairt don ábhar sonraí faoi na forais leis sin agus faoin mbealach chun achomharc a dhéanamh in aghaidh an chinnidh (Airteagal 41(5), 42(2) d’Fhoraithne um Fhorfheidhmiú PIPA).

(77)

Ar an dara dul síos, tá an ceart ag ábhair sonraí go ndéanfar ceartú nó léirscriosadh (101) ar a gcuid sonraí pearsanta, “mura bhforáiltear dá mhalairt go sonrach le reachtanna eile” (Airteagal 36(1) agus (2) de PIPA) (102). Ar don rialaitheoir iarraidh a fháil, ní mór dó nó di an t-ábhar a imscrúdú gan mhoill, na bearta is gá a dhéanamh (103) agus fógra a thabhairt don ábhar sonraí faoi laistigh de 10 lá; i gcás nach féidir an iarraidh a dheonú, cumhdaítear leis an gceanglas sin maidir le fógra na cúiseanna leis an diúltú agus an bealach chun achomharc a dhéanamh (féach Airteagal 36(4) PIPA i gcomhar le hAirteagal 43(3) d’Fhoraithne um Fhorfheidhmiú PIPA) (104).

(78)

Ar deireadh, tá an ceart ag ábhair sonraí próiseáil a gcuid sonraí pearsanta a chur ar fionraí, gan mhoill (105), ach amháin i gcás ina mbeidh feidhm ag ceann de na heisceachtaí atá liostaithe (Airteagal 37(1), (2) PIPA) (106). Féadfaidh an rialaitheoir an iarraidh a dhiúltú (1) i gcás ina mbeidh sin údaraithe go sonrach le dlí nó inar gá é go sonrach (ina mbeidh sin “dosheachanta”) chun oibleagáidí dlíthiúla a chomhlíonadh, (2) i gcás inar dhócha go ndéanfadh fionraí damáiste do bheatha nó do chorp tríú páirtí, nó sárú nach bhfuil bonn cirt leis ar mhaoin agus ar leasanna eile duine eile, (3) i gcás inar dhodhéanta d’institiúid phoiblí a feidhm a dhéanamh mar a fhorordaítear le dlí gan an fhaisnéis a phróiseáil, nó (4) i gcás ina mainneoidh an t-ábhar sonraí an conradh foluiteach a fhoirceannadh go sainráite leis an rialaitheoir fiú dá mbeadh sé neamhphraiticiúil an conradh a fheidhmiú gan próiseáil sonraí den sórt sin. Sá chás sin, ní mór don rialaitheoir, gan mhoill, fógra a thabhairt don ábhar sonraí faoi na cúiseanna leis an diúltú agus faoin mbealach chun achomharc a dhéanamh (Airteagal 37(2) PIPA i gcomhar le hAirteagal 44(2) d’Fhoraithne um Fhorfheidhmiú PIPA). De réir Airteagal 37(4) PIPA, ní mór don rialaitheoir, gan mhoill, “bearta is gá a dhéanamh lena n-áirítear an fhaisnéis phearsanta ábhartha a scriosadh” agus an iarraidh á comhlíonadh chun an phróiseáil a chur ar fionraí (107).

(79)

Tá feidhm ag an gceart chun fionraí freisin i gcás ina n-úsáidfear sonraí pearsanta chun críoch na margaíochta dírí, i.e. chun earraí nó seirbhísí a chur chun cinn, nó chun ceannach na n-earraí nó na seirbhísí sin a lorg. Thairis sin, ceanglaítear toiliú sonrach (breise) an ábhair sonraí le haghaidh próiseáil bhreise den sórt sin i gcoitinne (féach Airteagal 15(1) lit. 1, Airteagal 17(2) lit. 1 PIPA) (108). Nuair a bheidh an toiliú sin á iarraidh, ní mór don rialaitheoir an t-ábhar sonraí a chur ar an eolas go háirithe faoin úsáid a bheartaítear a bhaint as na sonraí chun críoch na margaíochta dírí – i.e. an fíoras go bhféadfar teagmháil a dhéanamh leis nó léi chun go ndéanfar earraí nó seirbhísí a chur chun cinn nó chun ceannach na n-earraí nó na seirbhísí sin a lorg – ar bhealach a bheidh “inaitheanta go sainráite” (Airteagal 22(2), (4) de PIPA i gcomhar le hAirteagal 17(2) lit. 1 d’Fhoraithne um Fhorfheidhmiú PIPA).

(80)

Chun feidhmiú na gceart aonair a éascú ní mór don rialaitheoir nósanna imeachta tiomnaithe a bhunú agus iad a fhógairt go poiblí (Airteagal 38(4) PIPA) (109). Áirítear leis sin nósanna imeachta chun agóid a dhéanamh in aghaidh diúltú d’iarraidh (Airteagal 38(5) PIPA). Ní mór don rialaitheoir a áirithiú go mbeidh an nós imeachta chun cearta a fheidhmiú “éasca a úsáid le haghaidh an ábhair sonraí” agus nach mbeidh sé níos deacra ná an nós imeachta chun na sonraí pearsanta a bhailiú; áirítear leis sin an oibleagáid faisnéis a sholáthar faoin nós imeachta ar a shuíomh gréasáin (Airteagal 41(2), 43(1) agus 44(1) d’Fhoraithne um Fhorfheidhmiú PIPA) (110). Feadfaidh daoine aonair ionadaí a údarú chun iarraidh den sórt sin a chomhdú (Airteagal 38(1) PIPA i gcomhar le hAirteagal 45 d’Fhoraithne um Fhorfheidhmiú PIPA). Cé go bhfuil an rialaitheoir i dteideal táille a fhorchur (agus, i gcás iarraidh chun cóipeanna de shonraí pearsanta a sheoladh, postas), ní mór an tsuim a chinneadh “laistigh de na speansais iarbhír is gá chun [an iarraidh] a phróiseáil]”; ní fhéadfar aon táille (ná postas) a fhorchur i gcás inarb é an rialaitheoir ab údar leis an iarraidh (Airteagal 38(3) PIPA i gcomhar le hAirteagal 47 d’Fhoraithne um Fhorfheidhmiú PIPA).

(81)

Níl forálacha ginearálta in PIPA ná ina Fhoraithne um Fhorfheidhmiú lena dtugtar aghaidh ar an tsaincheist a bhaineann le cinntí lena ndéantar difear don ábhar sonraí agus a bhíonn bunaithe ar phróiseáil uathoibrithe sonraí pearsanta agus ar an gcineál próiseála sin amháin. Mar sin féin, a mhéid a bhaineann le sonraí pearsanta atá bailithe san Aontas, is ag an rialaitheoir san Aontas (ag a bhfuil caidreamh díreach leis an ábhar sonraí lena mbaineann) a dhéanfar aon chinneadh de ghnáth a bheidh bunaithe ar phróiseáil uathoibrithe agus bíonn an cinneadh sin faoi réir Rialachán (AE) 2016/679 dá réir (111). Áirítear leis sin cásanna maidir le haistriú inarb oibreoir gnó eachtrach (de chuid na Cóiré mar shampla) a dhéanann an phróiseáil agus é nó í ag gníomhú mar ghníomhaire (próiseálaí) thar ceann an rialaitheora san Aontas (nó mar fhophróiseálaí a ghníomhaíonn thar ceann an phróiseálaí de chuid an Aontais a fuair na sonraí ó rialaitheoir de chuid an Aontais a bhailigh na sonraí) arb é a dhéanann an cinneadh ar an mbonn sin ansin. Dá bhrí sin, toisc nach ann do rialacha sonracha maidir le cinnteoireacht uathoibrithe in PIPA, ní dócha go ndéanfar difear leis sin do leibhéal cosanta na sonraí pearsanta a aistrítear faoin gCinneadh sin.

(82)

Mar eisceacht, maidir leis na forálacha a bhaineann leis an trédhearcacht ach sin a iarraidh (Airteagal 20) agus le cearta an duine aonair (Airteagail 35 go 37), mar aon leis an gceanglas maidir le fógra do dhuine aonair le haghaidh soláthraithe seirbhíse faisnéise agus cumarsáide (Airteagal 39-8 de PIPA), níl feidhm ag na forálacha sin maidir le faisnéis faoi ainm bréige nuair a phróiseáiltear an fhaisnéis sin chun críche staitisticí, taighde eolaíoch nó chun cartlannú a dhéanamh ar mhaithe le leas an phobail (Airteagal 28-7 de PIPA) (112). I gcomhréir le cur chuige Airteagal 11(2) (i gcomhar le haithris 57) de Rialachán (AE) 2016/679, tá bonn cirt leis sin i bhfianaise an fhíorais, chun an trédhearcacht a áirithiú nó cearta duine aonair a dheonú, go mbeadh ar an rialaitheoir a shainaithint cibé acu a bhaineann aon sonra leis an duine aonair a bhfuil an iarraidh á déanamh aige nó aici nó nach mbaineann (agus cé acu má bhaineann), rud atá toirmiscthe go sainráite faoi PIPA (Airteagal 28-5(1) PIPA). Thairis sin, i gcás inarb é a bheidh i gceist le hath-shainaithint den sórt sin deireadh a chur leis an mbréagainmniú le haghaidh an tacair sonraí (bréagainmnithe) ar fad, ba mhó an baol d’fhaisnéis phearsanta gach duine aonair eile dá dheasca sin. Cé go dtagraítear le Rialachán (AE) 2016/679 do chásanna inarb ionann is dodhéanta an ath-shainaithint, le PIPA glactar cur chuige níos déine trí thoirmeasc a chur go sainráite ar an ath-shainaithint i ngach cás ina bpróiseáiltear faisnéis faoi ainm bréige.

(83)

Tá i gcóras na Cóiré, ar a dtugtar tuairisc in aithrisí (74) - (82), rialacha dá bhrí sin maidir le cearta ag ábhair sonraí lena soláthraítear leibhéal cosanta atá coibhéiseach go bunúsach le leibhéal na cosanta faoi Rialachán (AE) 2016/679.

(84)

Maidir leis an leibhéal cosanta a thugtar do shonraí pearsanta a aistrítear ón Aontas chuig rialaitheoirí i bPoblacht na Cóiré, ní mór d’aistriú breise na sonraí sin chuig faighteoirí i dtríú tír baint den leibhéal cosanta sin.

(85)

Maidir le “haistrithe ar aghaidh” den sórt sin, is aistrithe idirnáisiúnta ó Phoblacht na Cóiré atá iontu ó thaobh an rialaitheora de chuid na Cóiré de. Ina leith sin, déantar idirdhealú le PIPA idir seachfhoinsiú na próiseála chuig seachfhoinsí (i.e. próiseálaí) agus soláthar sonraí pearsanta do thríú páirtithe (113).

(86)

Ar dtús, nuair a sheachfhoinsítear próiseáil sonraí pearsanta chuig eintiteas atá lonnaithe i dtríú tír, ní mór don rialaitheoir de chuid na Cóiré a áirithiú go gcomhlíonfar forálacha PIPA maidir le seachfhoinsiú (Airteagal 26 PIPA). Áirítear leis sin ionstraim a bheidh ceangailteach ó thaobh dlí de a chur i bhfeidhm lena ndéanfar, i measc nithe eile, an phróiseáil ag an seachfhoinsí a theorannú chuig críoch na hoibre seachfhoinsithe, coimircí teicniúla agus bainistíochta a fhorchur agus an fhophróiseáil a theorannú (féach Airteagal 26(1) PIPA); agus faisnéis faoin obair sheachfhoinsithe a fhoilsiú. Ina theannta sin, tá an rialaitheoir faoi oibleagáid “oideachas a chur” ar an seachfhoinsí maidir leis na bearta slándála is gá agus maoirseacht a dhéanamh, lena n-áirítear trí chigireachtaí, ar chomhlíonadh oibleagáidí uile an rialaitheora faoi PIPA (114) agus faoin gconradh seachfhoinsiúcháin mar aon leis sin.

(87)

Más rud é go ndéanann an seachfhoinsí damáiste de dheasca na sonraí pearsanta a phróiseáil de shárú ar PIPA, cuirfear an damáiste sin i leith an rialaitheora chun críoch dliteanais, mar ab amhlaidh i gcás fhostaithe an rialaitheora (Airteagal 26(6) PIPA). Tá an rialaitheoir de chuid na Cóiré fós freagrach dá bhrí sin as na sonraí pearsanta atá seachfhoinsithe agus ní mór dó nó dí a áirithiú go bpróiseálann an próiseálaí ar an gcoigríoch an fhaisnéis i gcomhréir le PIPA. Má phróiseálann an seachfhoinsí an fhaisnéis de shárú ar PIPA, is féidir an fhreagracht a chur ar an rialaitheoir de chuid na Cóiré as mainneachtain a oibleagáid a chomhlíonadh chun comhlíonadh PIPA a áirithiú, amhail trína mhaoirseacht ar an seachfhoinsí. Maidir leis na coimircí a áirítear sa chonradh seachfhoinsiúcháin agus le freagracht an rialaitheora de chuid na Cóiré as gníomhaíochtaí an tseachfhoinsí, áirithítear leanúnachas na cosanta leo nuair a sheachfhoinsítear próiseáil sonraí chuig eintiteas lasmuigh den Chóiré.

(88)

Ar an dara dul síos, féadfaidh rialaitheoirí de chuid na Cóiré sonraí pearsanta a sholáthar do thríú páirtí atá lonnaithe lasmuigh den Chóiré. Cé go n-áirítear roinnt foras dlíthiúil le PIPA lena gceadaítear na sonraí a sholáthar do thríú páirtithe i gcoitinne, más rud é go bhfuil an tríú páirtí lonnaithe lasmuigh den Chóiré, ní mór don rialaitheoir i bprionsabal (115) toiliú an ábhair sonraí a fháil (116) tar éis dó faisnéis a sholáthar don ábhar sonraí maidir (1) leis an gcineál sonraí pearsanta, (2) faighteoir na sonraí pearsanta, (3) cuspóir an aistrithe de réir bhrí chuspóir na próiseála atá á saothrú ag an bhfaighteoir, (4) an tréimhse choinneála chun go mbeidh na sonraí á bpróiseáil ag an bhfaighteoir mar aon (5) leis an bhfíoras go bhféadfaidh an t-ábhar sonraí toiliú a dhiúltú (Airteagal 17(2), (3) de PIPA). Le Fógra 2021-5, sa roinn maidir leis an trédhearcacht (féach aithris (70)) ceanglaítear leis go gcuirfear daoine aonair ar an eolas faoin tríú tír dá soláthrófar a gcuid sonraí. Áirithítear leis sin gur féidir le hábhair sonraí san Aontas cinneadh a dhéanamh agus iad go hiomlán ar an eolas maidir le cibé acu a thoileoidh nó nach dtoileoidh siad le soláthar sonraí ar an gcoigríoch. Thairis sin, ní mór don rialaitheoir gan conradh a dhéanamh leis an bhfaighteoir is tríú páirtí de shárú ar PIPA, rud a chiallaíonn nach mór gan oibleagáidí a bheith sa chonradh a thiocfadh salach ar na ceanglais a fhorchuirtear le PIPA ar an rialaitheoir (117).

(89)

Gan toiliú an duine aonair, féadfar sonraí pearsanta a sholáthar do thríú páirtí (ar an gcoigríoch) i gcás ina mbeidh críoch nochtadh na sonraí “fós laistigh den raon feidhme atá gaolmhar go réasúnach” le críoch thosaigh an bhailithe (Airteagal 17(4) PIPA, féach aithris (36)). Mar sin féin, agus cinneadh á dhéanamh cibé acu a nochtfar sonraí pearsanta (nó nach nochtfar) chun críche “gaolmhaire”, ní mór don rialaitheoir a chur san áireamh cibé acu atá an nochtadh ina chúis le míbhuntáistí don duine aonair nó nach bhfuil agus cibé acu atá bearta slándála is gá (amhail criptiú) déanta nó nach bhfuil. Mar gheall go bhféadfaidh sé nach soláthróidh an tríú tír a n-aistrítear sonraí pearsanta chuici cosaintí comhchosúla leo siúd dá bhforáiltear faoi PIPA, aithnítear le Roinn 2 d’Fhógra 2021-5 go bhféadfaidh míbhuntáistí den sórt sin teacht chun cinn agus nach féidir iad a sheachaint ach amháin más rud é go n-áiritheoidh an rialaitheoir de chuid na Cóiré agus an faighteoir ar an gcoigríoch, trí ionstraim atá ceangailteach ó thaobh dlí de (amhail conradh), leibhéal cosanta atá coibhéiseach le PIPA, lena n-áirítear i leith chearta an ábhair sonraí.

(90)

Tá feidhm ag rialacha speisialta maidir le nochtadh “lasmuigh den chuspóir”, i.e. soláthar sonraí do thríú páirtí chun críche nua (neamhghaolmhaire) nach bhféadfaidh tarlú ach amháin ar cheann d’fhorais Airteagal 18(2) PIPA, ar a dtugtar tuairisc in aithris (39). Mar sin féin, fiú de réir na gcoinníollacha sin, eisiatar soláthar do thríú páirtí más rud é gur dócha go “sárófar go héagórach” leis leasanna an ábhair sonraí nó tríú páirtí, rud a cheanglaítear leasanna a chomhardú ina leith. Ina theannta sin, faoi Airteagal 18(5) PIPA, ní mór don rialaitheoir coimircí breise a chur i bhfeidhm, lena n-áireofar iarraidh ar an tríú páirtí críoch agus modh na próiseála a shrianadh, nó bearta slándála sonracha a chur i bhfeidhm. Arís, mar gheall go bhféadfaidh sé nach soláthróidh an tríú tír a n-aistrítear sonraí pearsanta chuici cosaintí comhchosúla leo siúd dá bhforáiltear faoi PIPA, aithnítear le Roinn 2 d’Fhógra 2021-5 go bhféadfaidh “sárú éagórach” den sórt sin ar leasanna an duine aonair nó de chuid tríú páirtí teacht chun cinn agus nach féidir é a sheachaint ach amháin más rud é go n-áiritheoidh an rialaitheoir de chuid na Cóiré agus an faighteoir ar an gcoigríoch, trí ionstraim atá ceangailteach ó thaobh dlí de (amhail conradh), leibhéal cosanta a áirithiú a bheidh coibhéiseach le PIPA, lena n-áirítear i leith cearta an ábhair sonraí.

(91)

Áirithítear leis na rialacha in aithrisí (86) - (90) leanúnachas cosanta dá bhrí sin nuair a aistrítear sonraí pearsanta ar aghaidh (chuig “seachfhoinsí” nó chuig tríú páirtí) ó Phoblacht na Cóiré ar bhealach atá coibhéiseach go bunúsach leis an gcosaint dá bhforáiltear faoi Rialachán (AE) 2016/679.

(92)

Faoi phrionsabal na cuntasachta, ceanglaítear ar eintitis a phróiseálann sonraí bearta teicniúla agus eagraíochtúla iomchuí a chur i bhfeidhm chun a n-oibleagáidí maidir le cosaint sonraí a chomhlíonadh go héifeachtach agus chun bheith in ann comhlíonadh den sórt sin a léiriú, go háirithe don údarás maoirseachta inniúil.

(93)

De réir Airteagal 3(6), (8) PIPA, ní mór don rialaitheoir sonraí pearsanta a phróiseáil “ar bhealach lena n-íoslaghdófar an fhéidearthacht go sárófar” príobháideachas an ábhair sonraí, agus féachfaidh an rialaitheoir le hiontaoibh an ábhair sonraí a fháil trí na dualgais agus na freagrachtaí sin a urramú agus a fheidhmiú dá bhforáiltear in PIPA agus i reachtanna gaolmhara eile. Áirítear leis sin plean bainistíochta inmheánach a bhunú (Airteagal 29 PIPA) mar aon le hoiliúint iomchuí a chur ar an bhfoireann agus maoirseacht iomchuí a dhéanamh orthu (Airteagal 28 PIPA).

(94)

Mar bhealach chun an chuntasacht a áirithiú, cruthaítear le hAirteagal 31 PIPA i gcomhar le hAirteagal 32 d’Fhoraithne um Fhorfheidhmiú PIPA oibleagáid le haghaidh rialaitheoirí oifigeach príobháideachais a ainmniú “a théann i gceannas go cuimsitheach ar phróiseáil na faisnéise pearsanta”. Go háirithe, cuirtear de chúram ar an oifigeach príobháideachais sin na feidhmeanna seo a leanas a fheidhmiú: (1) plean um chosaint sonraí pearsanta a bhunú agus a chur chun feidhme agus beartas príobháideachais a tharraingt suas, (2) suirbhéanna a dhéanamh go tráthrialta ar stádas agus ar chleachtais na próiseála sonraí pearsanta, d’fhonn feabhas a chur ar aon easnamh, (3) gearáin a láimhseáil mar aon le cúiteamh leasúcháin, (4) córas rialaithe inmheánaigh a bhunú chun nochtadh, drochúsáid nó mí-úsáid sonraí pearsanta a chosc, (5) clár oideachais a ullmhú agus a chur chun feidhme, (6) comhaid sonraí pearsanta a chosaint, a rialú agus a bhainistiú, agus (7) sonraí pearsanta a scriosadh nuair a bheidh críoch na próiseála bainte amach nó an tréimhse choinneála dulta in éag. Agus na dualgais sin á gcur i gcrích, féadfaidh an t-oifigeach príobháideachais cigireacht a dhéanamh ar stádas na gcóras próiseála sonraí pearsanta agus na gcóras gaolmhar agus féadfaidh faisnéis orthu a iarraidh (Airteagal 31(3) PIPA). Más rud é go tugann an t-oifigeach príobháideachais aon sárú faoi deara ar PIPA nó ar reachtanna ábhartha eile um chosaint sonraí, déanfaidh sé nó sí bearta ceartaitheacha láithreach agus tuairisceoidh bearta den sórt sin do bhainistíocht (“ceannasaí”) an rialaitheora, más gá (Airteagal 31(4) PIPA). De réir Airteagal 31(5) PIPA, ní mór don oifigeach príobháideachais gan míbhuntáistí nach bhfuil bonn cirt leo a fhulaingt mar thoradh ar na feidhmeanna sin a fheidhmiú.

(95)

Ina theannta sin, ní mór do rialaitheoirí féachaint chuige go honnghníomhach le measúnú tionchair ó thaobh an phríobháideachais de a dhéanamh i gcás ina mbeidh riosca ó thaobh an phríobháideachais de i gceist le hoibriú na gcomhad sonraí pearsanta (Airteagal 33(8) PIPA). Bunaithe ar Airteagal 33(1), (2) PIPA i gcomhar le hAirteagail 35, 36 agus 38 d’Fhoraithne um Fhorfheidhmiú PIPA, beidh tosca amhail cineál agus tréithe na sonraí a phróiseáiltear (go háirithe cibé acu an faisnéis íogair atá sna sonraí nó nach amhlaidh), líon na sonraí, an tréimhse choinneála, agus dóchúlacht na sáruithe sonraí, ábhartha maidir le measúnú a dhéanamh ar mhéid an riosca do chearta na n-ábhar sonraí. Is é cuspóir an mheasúnaithe tionchair ó thaobh an phríobháideachais de a áirithiú go ndéantar anailís ar thosca na rioscaí don phríobháideachas mar aon le haon fhrithbheart sábháilteachta nó aon fhrithbheart eile, agus go léirítear ábhair ar gá feabhas a chur orthu (féach Airteagal 33(1) PIPA i gcomhar le hAirteagal 38 d’Fhoraithne um Fhorfheidhmiú PIPA).

(96)

Bíonn sé d’oibleagáid ar institiúidí poiblí measúnú tionchair a dhéanamh nuair a phróiseáiltear comhaid sonraí pearsanta áirithe lena mbaineann riosca níos airde maidir le sáruithe féideartha ó thaobh an phríobháideachais de (Airteagal 33(1) PIPA). I gcomhréir le hAirteagal 35 d’Fhoraithne um Fhorfheidhmiú PIPA, is amhlaidh an cás, i measc cásanna eile, le haghaidh na gcomhad ina bhfuil faisnéis íogair ar 50 000 ábhar sonraí ar a laghad, comhaid a mheaitseálfar le comhaid eile agus dá thoradh sin ina mbeidh faisnéis ar 500 000 ábhar sonraí ar a laghad, nó comhaid ina bhfuil faisnéis ar 1 mhilliún ábhar sonraí ar a laghad. Ní mór toradh measúnaithe tionchair a dhéanfaidh institiúid phoiblí a chur in iúl do PIPC (Airteagal 33(1) de PIPA), a fhéadfaidh a thuairim a thabhairt (Airteagal 33(3) de PIPA).

(97)

Ar deireadh, foráiltear le hAirteagal 13 PIPA go mbunóidh PIPC beartais is gá chun “gníomhaíochtaí féinrialaithe um chosaint sonraí” ag rialaitheoirí a chur chun cinn agus chun tacú leis na gníomhaíochtaí sin, i measc gníomhaíochtaí eile trí oideachas maidir le cosaint sonraí, eagraíochtaí atá i mbun na cosanta sonraí a chur chun cinn agus tacú leo, agus trí cúnamh a thabhairt do rialaitheoirí maidir le rialacha féinrialaithe a bhunú agus a chur chun feidhme. Thairis sin, tabharfaidh sé córas ePRIVACY Mark isteach agus éascóidh an córas sin. Ina leith sin, foráiltear le hAirteagal 32-2 PIPA i gcomhar le hAirteagail 34-2 go 34-8 d’Fhoraithne um Fhorfheidhmiú PIPA maidir leis an bhféidearthacht le deimhniú cibé acu a chomhlíonann an córas (na córais) um próiseáil agus um chosaint sonraí ag rialaitheoir ceanglais PIPA nó nach gcomhlíonann. De réir na rialacha sin, féadfar deimhniú (118) a dheonú (ar feadh tréimhse 3 bliana) más rud é go gcomhlíonann an rialaitheoir na critéir dheimhniúcháin arna gcinneadh ag PIPC, lena n-áirítear coimircí bainistíochta, teicniúla agus fisiciúla a bhunú chun sonraí pearsanta a chosaint (119). Ní mór do PIPC na córais ag an rialaitheoir arb ábhartha le haghaidh an deimhnithe iad a scrúdú uair amháin sa bhliain ar a laghad chun éifeachtacht an deimhnithe sin a choinneáil ar bun, scrúdú as ar féidir cúlghairm an deimhnithe a eascairt (Airteagal 32(4) PIPA i gcomhar le hAirteagal 34-5 d’Fhoraithne um Fhorfheidhmiú PIPA; rud ar a dtugtar “bearta bainistíochta leantacha”).

(98)

Leis an gcreat de chuid na Cóiré dá bhrí sin, cuirtear prionsabal na cuntasachta chun feidhme ar bhealach lena n-áirithítear leibhéal cosanta atá coibhéiseach go bunúsach leis an gcosaint faoi Rialachán (AE) 2016/679, lena n-áirítear trí fhoráil a dhéanamh maidir le sásraí difriúla chun comhlíonadh PIPA a áirithiú agus a léiriú.

(99)

Mar a thugtar tuairisc air in aithris (13), leagtar rialacha sonracha síos le CIA maidir le próiseáil faisnéise creidmheasa pearsanta ag oibreoirí tráchtála. Agus faisnéis chreidmheasa phearsanta á próiseáil, dá bhrí sin ní mór d’oibreoirí tráchtála ceanglais ghinearálta PIPA a chomhlíonadh, mura rud é go bhfuil rialacha níos sonraí in CIA. Is amhlaidh an cás mar shampla nuair a phróiseálann siad faisnéis a bhaineann le cárta creidmheasa nó le cuntas bainc i gcomhthéacs idirbhirt tráchtála le duine aonair. Mar reachtaíocht earnála maidir le faisnéis chreidmheasa a phróiseáil (idir phearsanta agus neamhphearsanta), ní hamháin go bhforchuireann CIA coimircí sonracha um chosaint sonraí (mar shampla i dtéarmaí na trédhearcachta agus na slándála), ach ar bhonn níos ginearálta, rialaítear leis an reachtaíocht na himthosca sonracha ina bhféadfar faisnéis chreidmheasa phearsanta a phróiseáil. Léirítear é sin, go háirithe, sna ceanglais mhionsonraithe maidir le húsáid agus le soláthar sonraí do thríú páirtí, agus maidir le sonraí den sórt sin a choinneáil.

(100)

Amhail PIPA, léirítear le CIA prionsabal na dlíthiúlachta agus na comhréireachta. Ar dtús, mar cheanglas ginearálta, ní cheadaítear le hAirteagal 15(1) CIA ach faisnéis chreidmheasa phearsanta a bhailiú le modhanna réasúnacha agus córa agus dá laghad is gá chun críoch shonraithe a chomhlíonadh, i gcomhréir le hAirteagal 3(1)-(2) PIPA. Ar an dara dul síos, rialaítear go sonrach le CIA dlíthiúlacht na próiseála faisnéise creidmheasa pearsanta, trí bhailiú, úsáid agus soláthar na faisnéise sin do thríú páirtí a shrianadh agus trí na gníomhaíochtaí próiseála sin a cheangal i gcoitinne leis an gceanglas maidir le toiliú an duine lena mbaineann.

(101)

Féadfar faisnéis chreidmheasa phearsanta a bhailiú bunaithe ar cheann de na forais dá bhforáiltear le PIPA nó ar fhorais shonracha a leagtar amach in CIA. I bhfianaise go nglactar leis le hAirteagal 45 de Rialachán (AE) 2016/679 go n-aistríonn rialaitheoir nó próiseálaí san Aontas sonraí pearsanta, ach nach gcumhdaítear bailiú díreach (amhail ón duine aonair nó ó shuíomh gréasáin) ag rialaitheoir sa Chóiré leis, níl ábhartha le haghaidh an Chinnidh sin ach na forais atá ar fáil faoi PIPA. Áirítear leis na forais sin, go háirithe, cásanna inar gá an t-aistriú chun conradh a fheidhmiú leis an duine aonair nó le haghaidh leasanna dlisteanacha an rialaitheora de chuid na Cóiré (Airteagal 15(1) lit. 4, 6 PIPA) (120).

(102)

Nuair a bheidh faisnéis chreidmheasa phearsanta bailithe, féadfar í a úsáid (1) chun na críche bunaidh ar sholáthair an duine aonair an fhaisnéis (go díreach) lena haghaidh (121); (2) chun críche a bheidh comhoiriúnach le críoch bhunaidh an bhailithe (122); (3) chun a chinneadh cibé acu a bhunófar nó a choinneofar caidreamh tráchtála, a d’iarr an duine aonair, nó nach mbunófar nó nach gcoinneofar amhlaidh (123); (4) chun críche staidrimh, taighde agus cartlannú a dhéanamh ar mhaithe le leas an phobail (124) más faoi ainm bréige atá an fhaisnéis (125); (5) más rud é go bhfaightear toiliú breise nó (6) i gcomhréir leis an dlí.

(103)

Más rud é go mbeartaíonn oibreoir tráchtála faisnéis chreidmheasa phearsanta a nochtadh do thríú páirtí, ní mór dó toiliú an duine aonair a fháil (126) tar éis dó an duine aonair a chur ar an eolas faoi fhaighteoir na sonraí, mar aon le mionsonraí na sonraí a bheidh le soláthar, tréimhse stórála na sonraí ag an bhfaighteoir agus faoin gceart toiliú a dhiúltú (Airteagal 32(1) CIA agus Airteagal 28(2) d’Fhoraithne um Fhorfheidhmiú CIA) (127). Níl feidhm ag an gceanglas sin maidir le toiliú i gcásanna sonracha, eadhon i gcás ina nochtfar faisnéis chreidmheasa phearsanta (128): (1) do sheachfhoinsí chun críoch seachfhoinsiúcháin (129); (2) do thríú páirtí i gcás aistrithe, deighilte nó cumaisc ghnó; (3) chun críche staidrimh, taighde agus cartlannú a dhéanamh ar mhaithe le leas an phobail, i gcás ina mbeidh an fhaisnéis faoi ainm bréige; (4) chun críche a bheidh comhoiriúnach le críoch bhunaidh an bhailithe; (5) do thríú páirtí a úsáideann an fhaisnéis chun fiach atá dlite den duine aonair a bhailiú (130); (6) chun ordú cúirte a chomhlíonadh; (7) d’ionchúisitheoir/d’oifigeach póilíneachta breithiúnaí in éigeandáil ina mbeidh beatha an duine aonair i mbaol nó i gcás ina mbeidh coinne leis go bhfulaingeoidh sé nó sí gortú dá c(h)orp agus nach mbeidh aon am ar fáil chun barántas breithiúnach a eisiúint (131); (8) d’údaráis chánach inniúla chun dlíthe cánachais a chomhlíonadh; nó (9) i gcomhréir le dlíthe eile. I gcás nochtadh ar cheann amháin de na forais sin, ní mór fógra a thabhairt don ábhar sonraí faoi roimh ré (Airteagal 32(7) CIA).

(104)

Le CIA rialaítear fad próiseála na faisnéise creidmheasa pearsanta go sonrach freisin ar bhonn ceann amháin de na forais sin lena húsáid nó lena soláthar do thríú páirtí tar éis dheireadh an chaidrimh tráchtála leis an duine aonair (132). Ní fhéadfar faisnéis a choinneáil ach an fhaisnéis sin ar gá í chun an caidreamh sin a bhunú nó a choinneáil ar bun, faoi réir coimircí breise (ní mór an fhaisnéis a choinneáil ar leithligh ó fhaisnéis chreidmheasa a bhaineann le daoine lena bhfuil caidreamh tráchtála fós ann, faoi chosaint le bearta slándála sonracha agus gan rochtain uirthi ach ag daoine údaraithe agus acu siúd amháin) (133). Ní mór na sonraí uile eile a scriosadh (Airteagal 17-2(1) lit. 2 d’Fhoraithne um Fhorfheidhmiú CIA Chun a chinneadh na sonraí is gá le haghaidh an chaidrimh tráchtála, ní mór imthosca difriúla a chur san áireamh, lena n-áirítear cibé acu arbh fhéidir an caidreamh a bhunú gan na sonraí nó nárbh fhéidir agus cibé acu a bhaineann na sonraí leis na hearraí nó leis na seirbhísí a soláthraíodh don duine aonair go díreach nó nach mbaineann (Airteagal 17-2(2) d’Fhoraithne um Fhorfheidhmiú CIA).

(105)

Fiú i gcásanna ina bhféadfar faisnéis chreidmheasa phearsanta a choinneáil i bprionsabal thar dheireadh an chaidrimh tráchtála, ní mór an fhaisnéis a scriosadh laistigh de 3 mhí tar éis chríoch bhreise na próiseála a bhaint amach (134) nó, in aon chás, tar éis 5 bliana (Airteagal 20-2 CIA). I líon teoranta imthosca, féadfar faisnéis chreidmheasa phearsanta a choinneáil ar feadh thréimhse níos faide ná 5 bliana, go háirithe i gcás inar gá chun oibleagáid dhlíthiúil a chomhlíonadh; i gcás inar gá ar mhaithe le leasanna ríthábhachtacha beatha, coirp nó maoine an duine; chun faisnéis faoi ainm bréige a chartlannú (a úsáideadh chun críoch taighde eolaíoch, staitisticí nó chun cartlannú a dhéanamh ar mhaithe le leas an phobail); nó chun críoch árachais (go háirithe le haghaidh íocaíochtaí árachais nó chun calaois árachais a chosc) (135). Sna cásanna eisceachtúla sin, tá feidhm ag coimircí sonracha (amhail fógra a thabhairt don duine aonair faoin úsáid bhreise, an fhaisnéis a choinnítear a dheighilt ón bhfaisnéis a bhaineann le daoine aonair lena bhfuil caidreamh tráchtála fós, cearta rochtana a theorannú, féach Airteagal 17-2(1)-(2) d’Fhoraithne um Fhorfheidhmiú CIA).

(106)

Sonraítear thairis sin le CIA na prionsabail maidir le cruinneas agus cáilíocht na sonraí, trí cheangal maidir le faisnéis chreidmheasa phearsanta go ndéanfar í “a chlárú, a mhodhnú agus a bhainistiú” chun í a choimeád cruinn agus cothrom le dáta (Airteagal 18(1) CIA agus Airteagal 15(3) d’Fhoraithne um Fhorfheidhmiú CIA) (136). Nuair atá faisnéis chreidmheasa á soláthar d’eintitis áirithe eile (amhail gníomhaireachtaí rátála creidmheasa), ceanglaítear go sonrach ar oibreoirí tráchtála cruinneas na faisnéise a fhíorú chun a áirithiú nach gcláróidh agus nach mbainisteoidh an faighteoir ach faisnéis a bheidh cruinn agus í sin amháin (Airteagal 15(1) CIA i gcomhar le hAirteagal 18(1) d’Fhoraithne um Fhorfheidhmiú CIA) Ar bhonn níos ginearálta, ceanglaítear le CIA go gcoimeádfar taifid ar bhailiú, úsáid, nochtadh do thríú páirtithe agus scriosadh faisnéise creidmheasa pearsanta (Airteagal 20(2) CIA) (137).

(107)

Thairis sin, tá próiseáil faisnéise creidmheasa pearsanta faoi réir ceanglas sonrach i leith na slándála sonraí. Go háirithe, le CIA ceanglaítear bearta teicneolaíochta, fisiciúla agus eagraíochtúla a chur chun feidhme chun rochtain mhídhleathach ar chórais ríomhaire a chosc mar aon le hathrú, scriosadh nó aon riosca eile do na sonraí próiseáilte (mar shampla trí bhíthin rialuithe rochtana, féach Airteagal 19 CIA agus Airteagal 16 d’Fhoraithne um Fhorfheidhmiú CIA). Ina theannta sin, nuair atá faisnéis chreidmheasa phearsanta á malartú le tríú páirtí, ní mór comhaontú a thabhairt i gcrích lena leagtar bearta slándála sonracha síos (Airteagal 19(2) CIA). Má tharlaíonn sárú ar fhaisnéis chreidmheasa pearsanta, ní mór bearta a dhéanamh chun aon damáiste a íoslaghdú agus fógra a thabhairt do na daoine lena mbaineann gan mhoill (Airteagal 39-4(1)-(2) CIA). Ina theannta sin, ní mór PIPC a chur ar an eolas faoin bhfógra a soláthraíodh do dhaoine aonair agus faoi na bearta a cuireadh chun feidhme (Airteagal 39-4(4) CIA).

(108)

Forchuirtear le CIA oibleagáidí sonracha maidir leis an trédhearcacht freisin agus toiliú á fháil chun faisnéis chreidmheasa phearsanta a úsáid nó a sholáthar (Airteagal 32(4) agus Airteagal 34-2 de CIA agus Airteagal 30-3 d’Fhoraithne um Fhorfheidhmiú CIA) agus, ar bhonn níos ginearálta, sula soláthrófar faisnéis do thríú páirtí (Airteagal 32(7) CIA) (138). Ina theannta sin, tá ceart ag daoine aonair faisnéis a fháil ach í a iarraidh faoi úsáid agus faoi sholáthar a fhaisnéise creidmheasa do thríú páirtithe sna 3 bliana roimh an iarraidh (lena n-áirítear cuspóir agus dátaí na húsáide/an tsoláthair sin) (139).

(109)

Faoi CIA, tá ceart rochtana ag daoine aonair ar a bhfaisnéis chreidmheasa pearsanta freisin (Airteagal 38(1) CIA) agus chun ceartú a fháil ar shonraí neamhchruinne (Airteagal 38(2)-(3) CIA) (140). Thairis sin, i dteannta an chirt ghinearálta ar léirscriosadh faoi PIPA (féach aithris (77)), foráiltear le CIA maidir le ceart sonrach ar léirscriosadh faisnéise creidmheasa pearsanta a coinníodh thar na tréimhsí coinneála a luaitear in aithris (104), i.e. 5 bliana (le haghaidh faisnéis chreidmheasa phearsanta ar ghá chun caidreamh tráchtála a bhunú nó a choinneáil ar bun) nó 3 mhí (le haghaidh cineálacha faisnéise creidmheasa pearsanta eile) (141). Féadfar iarraidh ar léirscriosadh a dhiúltú go heisceachtúil i gcás inar gá coinneáil bhreise sna himthosca ar a dtugtar tuairisc in aithris (105). Más rud é go n-iarrann duine aonair go léirscriosfar faisnéis, ach go bhfuil feidhm ag ceann de na heisceachtaí, ní mór coimircí sonracha a chur i bhfeidhm maidir leis an bhfaisnéis chreidmheasa lena mbaineann (Airteagal 38-3(3) CIA agus Airteagal 33-3 d’Fhoraithne um Fhorfheidhmiú CIA). Mar shampla, ní mór an fhaisnéis a choimeád ar leithligh ó fhaisnéis eile, ní fhéadfaidh ach duine údaraithe í a rochtain agus ní mór an fhaisnéis a bheith faoi réir bearta slándála sonracha.

(110)

I dteannta na gceart a luaitear in aithris (109), ráthaítear le CIA do dhaoine aonair ceart chun iarraidh ar rialaitheoir scor de theagmháil a dhéanamh leo chun críoch na margaíochta dírí (Airteagal 37(2) den Acht) agus ceart ar iniomparthacht sonraí. A mhéid a bhaineann leis an gceart deiridh, ceadaítear le CIA do dhaoine aonair iarraidh go dtarchuirfear a gcuid faisnéise creidmheasa pearsanta chucu féin nó chuig tríú páirtithe áirithe (amhail institiúidí airgeadais agus cuideachtaí rátála creidmheasa). Ní mór an fhaisnéis chreidmheasa phearsanta a phróiseáil agus a tharchur chuig an tríú páirtí i bhformáid is féidir a phróiseáil le gaireas próiseála faisnéise (amhail ríomhaire).

(111)

A mhéid atá rialacha sonracha in CIA i gcomparáid le PIPA, measann an Coimisiún dá bhrí sin go n-áirithítear leibhéal cosanta leis na rialacha sin ar comhionann go bunúsach é leis an leibhéal atá ar fáil faoi Rialachán (AE) 2016/679.

(112)

Chun a áirithiú go ráthaítear leibhéal oiriúnach cosanta sonraí sa chleachtas, ba cheart údarás maoirseachta neamhspleách a bheith i bhfeidhm a mbeidh cumhachtaí curtha de chúram air chun faireachán a dhéanamh ar chomhlíonadh na rialacha um chosaint sonraí agus an comhlíonadh sin a fhorfheidhmiú. Ba cheart don údarás sin gníomhú ar bhealach a bheidh go hiomlán neamhspleách agus neamhchlaonta agus a dhualgais á bhfeidhmiú aige agus a chumhachtaí á gcomhlíonadh aige.

(113)

I bPoblacht na Cóiré, is é PIPC an t-údarás neamhspleách atá i gceannas ar fhaireachán agus ar fhorfheidhmiú PIPA. Tá PIPC comhdhéanta de Chathaoirleach, de Leas-Chathaoirleach agus de sheachtar Coimisinéirí. Is é an tUachtarán a cheapann an Cathaoirleach agus an Leas-Chathaoirleach ar mholadh an Phríomh-Aire. As measc na gCoimisinéirí, ceapann an tUachtarán beirt ar mholadh an Chathaoirligh agus ceapann cúigear ar mholadh an Tionóil Náisiúnta (as a dtagann beirt ar mholadh an pháirtí pholaitiúil lena mbaineann an tUachtarán agus triúr ar mholadh páirtithe polaitiúla eile) Airteagal 7-2(2) PIPA), rud lena gcuidítear le cur in aghaidh an chlaonpháirteachais sa phróiseas ceapacháin) (142). Tá an nós imeachta sin i gcomhréir leis na ceanglais is infheidhme maidir le ceapadh chomhaltaí na n-údarás um chosaint sonraí san Aontas (Airteagal 53(1) de Rialachán (AE) 2016/679). Thairis sin, ní mór do gach Coimisinéir staonadh ó aon ghnó a bhaineann le brabús, ó ghníomhaíochtaí polaitiúla agus ó phoist a bheith acu sa riarachán poiblí nó sa Tionól Náisiúnta (Airteagail 7-6 agus 7-7(1) lit. 3 PIPA) (143). Bíonn gach Coimisinéir faoi réir rialacha sonracha lena gcoisctear orthu páirt a ghlacadh i bpléití i gcás coinbhleacht leasa féideartha (Airteagal 7-11 PIPA). Cuidíonn Rúnaíocht le PIPC (Airteagal 7-13) agus féadfaidh fochoimisiúin a bhunú (ina mbeidh triúr Coimisinéirí) chun mionsáruithe agus ábhair a thagann anuas arís is arís eile a láimhseáil (Airteagal 7-12 PIPA).

(114)

Ceaptar gach comhalta de PIPC go ceann 3 bliana agus féadfar iad a athcheapadh uair amháin (Airteagal 7-4(1) PIPA). Ní fhéadfar Coimisinéirí a dhífhostú ach amháin in imthosca sonracha, eadhon más rud é nach bhfuil siad in ann a ndualgais a fheidhmiú a thuilleadh i ngeall ar mhíchumas meabhrach nó fisiciúil fadtéarmach, gníomhaíocht de shárú ar an dlí, nó má chomhlíonann siad ceann de na forais maidir le dícháiliú as post (144) (Airteagal 7-5 PIPA). Tugtar cosaint institiúideach dóibh leis sin i bhfeidhmiú a bhfeidhmeanna.

(115)

Ar bhonn níos ginearálta, ráthaítear neamhspleáchas PIPC go sainráite le hAirteagal 7(1) PIPA, agus ceanglaítear le hAirteagal 7-5(2) PIPA ar Choimisinéirí a ndualgais a fheidhmiú go neamhspleách, de réir an dlí agus a gcoinsiasa (145). Leis na coimircí institiúideacha agus nós imeachta ar a dtugtar tuairisc, lena n-áirítear i leith cheapadh agus dhífhostú na gcomhaltaí dá chuid, áirithítear go ngníomhaíonn PIPC go hiomlán neamhspleách, saor ar thionchar seachtrach agus ar threoracha seachtracha. Thairis sin, mar ghníomhaireacht riaracháin láir, beartaíonn PIPC a bhuiséad féin go bliantúil (a ndéanann an Aireacht Airgeadais athbhreithniú air mar chuid den bhuiséad náisiúnta foriomlán sula nglacann an Tionól Náisiúnta é) agus tá an ghníomhaireacht i gceannas ar bhainistiú a pearsanra féin. Tá buiséad reatha de thart faoi EUR 35 milliún ag PIPC agus 154 bhall foirne (lena n-áirítear 40 fostaí ag a bhfuil saineolas sa teicneolaíocht faisnéise agus cumarsáide, 32 fostaí a dhíríonn ar imscrúduithe agus 40 saineolaí dlí).

(116)

Foráiltear maidir le cúraimí agus le cumhachtaí PIPC in Airteagail 7-8 agus 7-9 go príomha, agus in Airteagail 61-66 PIPA freisin (146). Go háirithe, áirítear le cúraimí PIPC comhairle a thabhairt faoi dhlíthe agus faoi rialacháin a bhaineann le cosaint sonraí, beartais agus treoirlínte a fhorbairt maidir le cosaint sonraí, sáruithe ar chearta daoine aonair a imscrúdú, gearáin a láimhseáil agus idirghabháil a dhéanamh i gcás díospóidí, comhlíonadh PIPA a fhorfheidhmiú, oideachas agus cur chun cinn a áirithiú i réimse na cosanta sonraí, agus malartú agus dul i gcomhar le húdaráis um chosaint sonraí i dtríú tíortha (147).

(117)

Bunaithe ar Airteagal 68 PIPA i gcomhar le hAirteagal 62 d’Fhoraithne um Fhorfheidhmiú PIPA, tarmligeadh cúraimí áirithe de chuid PIPC do Ghníomhaireacht Idirlín agus Slándála na Cóiré, eadhon: (1) oideachas agus caidreamh poiblí, (2) oiliúint a chur ar speisialtóirí agus critéir a fhorbairt le haghaidh measúnuithe tionchair ó thaobh an phríobháideachais de, (3) iarrataí a láimhseáil chun institiúid a ainmniú ar a dtugtar institiúid um measúnú tionchair ó thaobh an phríobháideachais de, (4) iarrataí a láimhseáil le haghaidh rochtain indíreach ar shonraí pearsanta arna sealbhú ag údaráis phoiblí (Airteagal 35(2) PIPA), agus (5) an cúram maidir le hábhair a iarraidh agus cigireachtaí a dhéanamh i leith gearán a fhaightear tríd an Lárionad Glaonna um Príobháideachas mar a thugtar air. I gcomhthéacs na ngearán a láimhseáil tríd an Lárionad Glaonna um Príobháideachas, tarchuireann Gníomhaireacht Idirlín agus Slándála na Cóiré an cás chuig PIPC nó chuig an ionchúiseamh má chinneann sé gur tharla sárú ar an dlí. Leis an bhféidearthacht gearán a chur faoi bhráid an Lárionaid Ghlaonna um Príobháideachas, ní choisctear ar dhaoine aonair gearán a thaisceadh le PIPC go díreach nó dul i muinín PIPC má mheasann siad nár láimhseáil Gníomhaireacht Idirlín agus Slándála na Cóiré a ngéarán go sásúil

(118)

D’fhonn a áirithiú go gcomhlíonfar PIPA, tá cumhachtaí imscrúdúcháin agus forfheidhmiúcháin araon deonaithe ag an reachtóir do PIPC, idir mholtaí agus fhíneálacha riaracháin. Comhlánaítear na cumhachtaí sin a thuilleadh le réimeas smachtbhannaí coiriúla.

(119)

A mhéid a bhaineann le cumhachtaí imscrúdúcháin, más rud é go bhfuil amhras ann gur sáraíodh PIPA nó má tuairiscíodh sárú amhlaidh, nó i gcás inar gá chun cearta ábhair sonraí a chosaint ar sháruithe, féadfaidh PIPC cigireachtaí a dhéanamh ar an láthair agus gach ábhar ábhartha a iarraidh (amhail nithe agus doiciméid) ó rialaitheoirí sonraí pearsanta (Airteagal 63 PIPA i gcomhar le hAirteagal 60 d’Fhoraithne um Fhorfheidhmiú PIPA) (148).

(120)

I dtéarmaí forfheidhmithe, faoi Airteagal 61(2) de PIPA, féadfaidh PIPC comhairle a sholáthar do rialaitheoirí sonraí faoin gcaoi ar féidir an leibhéal cosanta sonraí pearsanta do ghníomhaíochtaí próiseála sonracha a fheabhsú. Ní mór do rialaitheoirí sonraí iarrachtaí ionraice a dhéanamh chun comhairle den sórt sin a chur chun feidhme agus éilítear orthu PIPC a chur ar an eolas faoin toradh. Thairis sin, i gcás ina bhfuil forais réasúnta le creidiúint gur sáraíodh PIPA agus gur dócha go ndéanfar dochar atá deacair a leigheas mura ndéanfar beart, féadfaidh PIPC bearta ceartaitheacha a fhorchur (Airteagal 64(1) PIPA) (149). Sonraítear i Roinn 5 d’Fhógra 2021-5 (Iarscríbhinn I), le héifeacht cheangailteach, go gcomhlíontar na coinníollacha sin maidir le sárú aon fhoráil PIPA lena gcosnaítear cearta príobháideachais daoine aonair maidir le faisnéis phearsanta (150). Áirítear i measc na mbeart a bhfuil sé de chumhacht ag PIPC a dhéanamh a ordú chun an t-iompar atá ina chúis leis an sárú a stopadh, an phróiseáil sonraí a chur ar fionraí go sealadach nó aon bheart eile is gá a dhéanamh. D’fhéadfadh smachtbhanna trí bhíthin fíneáil suas le huasmhéid de 50 milliún won teacht as mainneachtain beart ceartaitheach a chomhlíonadh (Airteagal 75(2) lit. 13 PIPA).

(121)

Maidir le húdaráis phoiblí áirithe (amhail an Tionóil Náisiúnta, gníomhaireachtaí riaracháin láir, comhlachtaí rialtais áitiúla agus na cúirteanna), foráiltear in Airteagal 64(4) PIPA go bhféadfaidh PIPC aon cheann de na bearta ceartaitheacha a luaitear in aithris (120) a “mholadh” agus go n-éilítear ar na húdaráis sin moladh den sórt sin a chomhlíonadh ach amháin i gcás a bhfuil imthosca urghnácha ann. De réir Roinn 5 d’Fhógra 2021-5, tagraíonn sé sin do thosca urghnácha fíorasacha nó dlíthiúla nach raibh PIPC ar an eolas fúthu nuair a rinne sé an moladh. Ní fhéadfaidh an t-údarás poiblí lena mbaineann tosca urghnácha den sórt sin a agairt ach amháin má thaispeánann sé go soiléir nach raibh aon sárú ann agus má mheasann PIPC nach raibh aon sárú ann. I ngach cás eile, ní mór don údarás poiblí moladh PIPC a leanúint agus “beart ceartaitheach a dhéanamh, lena n-áirítear an ghníomhaíocht a stopadh láithreach, agus cúiteamh ar son damáistí sa chás urghnách ina ndearnadh gníomhaíocht neamhdhleathach mar sin féin.”

(122)

Féadfaidh PIPC a iarraidh ar ghníomhaireachtaí riaracháin eile a bhfuil inniúlacht shonrach acu faoi reachtaíocht earnála (e.g. sláinte, oideachas) imscrúdú a dhéanamh – leo féin nó i gcomhar le PIPC – ar sháruithe príobháideachais (amhrasta) na rialaitheoirí a oibríonn sna hearnálacha sin atá faoina ndlínse, agus chun bearta ceartaitheacha a fhorchur (Airteagal 63(4)-(5) de PIPA). Sa chás sin, cinneann PIPC forais, ábhar agus raon feidhme an imscrúdaithe (151). Dá réir sin, ní mór don ghníomhaireacht riaracháin ábhartha plean iniúchta a chur faoi bhráid PIPC agus fógra a thabhairt do PIPC faoi thoradh an iniúchta. Féadfaidh PIPC beart ceartaitheach sonrach atá le déanamh a mholadh, agus ní mór don ghníomhaireacht ábhartha féachaint leis an mbeart sin a chur chun feidhme. In aon chás, ní theorannaítear le hiarraidh den sórt sin inniúlacht PIPC a imscrúdú féin a dhéanamh ná smachtbhannaí a fhorchur.

(123)

Anuas ar a chumhachtaí ceartaitheacha, féadfaidh PIPC fíneálacha riaracháin idir 10 milliún agus 50 milliún won a ghearradh ar son sáruithe ceanglas éagsúil PIPA (Airteagal 75 de PIPA) (152). I measc sáruithe eile, áirítear leis sin neamhchomhlíontacht na gceanglas le haghaidh dhlíthiúlacht na próiseála, mainneachtain na bearta slándála is gá a dhéanamh, mainneachtain maidir le fógra a thabhairt d’ábhair shonraí i gcás sáraithe maidir le sonraí, neamhchomhlíontacht na gceanglas le haghaidh fo-próiseála, mainneachtain oifigeach príobháideachais a ainmniú, nó mainneachtain gníomhú ar iarraidh ón ábhar sonraí chun a chearta nó a chearta aonair a fheidhmiú, chomh maith le roinnt sáruithe a bhaineann le nósanna imeachta (neamh-chomhoibriú le linn imscrúdú). I gcás sáruithe ar roinnt forálacha de PIPA ag an rialaitheoir céanna, féadfar fíneáil a ghearradh ar son gach sáraithe, agus cuirfear an líon daoine aonair a rinne an sárú difear dóibh san áireamh nuair a bheidh leibhéal na fíneála sin á shocrú.

(124)

Thairis sin, i gcás ina bhfuil forais réasúnta ann le bheith mar chúis amhrais gur sáraíodh PIPA nó aon “reacht a bhaineann le cosaint sonraí”, féadfaidh PIPA gearán coiriúil a chur faoi bhráid na gníomhaireachta imscrúdaithí inniúla (amhail ionchúisitheoir, féach Airteagal 65(1) de PIPA). Anuas air sin, féadfaidh PIPC a mholadh don rialaitheoir gníomhaíocht araíonachta a dhéanamh in aghaidh an duine atá freagrach (lena n-áirítear an bainisteoir atá i gceannas, féach Airteagal 65(2) de PIPA). Nuair a fhaigheann an rialaitheoir an chomhairle sin, ní mór don rialaitheoir é a chomhlíonadh (153) agus fógra i scríbhinn faoin toradh a thabhairt do PIPC (Airteagal 65 de PIPA i dteannta le hAirteagal 58 d’Fhoraithne um Fhorfheidhmiú PIPA).

(125)

A mhéid a bhaineann le comhairle de bhun Airteagal 61, bearta ceartaitheacha de bhun Airteagal 64, cúiseamh nó comhairle maidir le gníomhaíocht araíonachta de bhun Airteagal 65 agus fíneálacha riaracháin a ghearradh de bhun Airteagal 75 de PIPA, féadfaidh PIPA na fíorais – i.e. an sárú, an t-eintiteas a sháraigh an dlí agus an beart (na bearta) a forchuireadh – a phoibliú trína bpostáil ar a shuíomh gréasáin nó i nuachtáin laethúil náisiúnta (Airteagal 66 de PIPA i dteannta le hAirteagal 61(1) d’Fhoraithne um Fhorfheidhmiú PIPA) (154).

(126)

Ar deireadh, tacaíonn córas de smachtbhannaí cóireála leis na ceanglais cosanta sonraí in PIPA (chomh maith le “reachtanna eile a bhaineann le cosaint sonraí”) a chomhlíonadh. Chuige sin, tá forálacha in Airteagail 70 73 de PIPA a d’fhéadfadh gearradh fíneála (idir 20 milliún agus 100 milliún won) nó príosúnacht (le pianbhreith uasta idir 2 bhliain agus 10 mbliana) teacht astu. Áirítear le sáruithe ábhartha, i measc sáruithe eile, úsáid sonraí pearsanta nó sonraí den sórt sin a sholáthar do thríú páirtí gan an toiliú is gá a fháil, faisnéis íogair a phróiseáil contrártha don toirmeasc in Airteagal 23(1) de PIPA, neamhchomhlíonadh na gceanglas sábháilteachta is infheidhme agus dá thoradh sin sonraí pearsanta a bheith caillte, goidte, nochta, brionnaithe, leasaithe nó damáistithe, mainneachtain na bearta is gá a dhéanamh chun sonraí pearsanta a cheartú, a léirscriosadh nó a chur ar fionraí, nó aistriú neamhdhleathach sonraí pearsanta chuig tríú tír (155). De réir Airteagal 74 de PIPA, i ngach ceann de na cásanna sin, beidh an fostaí, an gníomhaí nó ionadaí an rialaitheora chomh maith leis an rialaitheoir féin faoi dhliteanas (156).

(127)

Anuas ar na smachtbhannaí coiriúla dá bhforáiltear in PIPA, féadfaidh mí-úsáid sonraí pearsanta a bheith ina chion faoin Acht Cóiriúil. Is é sin an cás go háirithe maidir le sárú rúndachtae litreacha, doiciméad nó taifead leictreonach (Airteagal 316), nochtadh faisnéis atá faoi réir rúndachta gairmiúla (Airteagal 317), caolais trí ríomhairí a úsáid (Airteagal 347-2) chomh maith le cúbláil agus sárú iontaoibhe (Airteagal 355).

(128)

Dá bhrí sin, meascann córas na Cóiré cineálacha smachtbhannaí, idir bhearta ceartaitheacha, fhíneálacha riaracháin agus smachtbhannaí coiriúla, ar dócha go mbeidh éifeacht dhíspreagtha sách láidir acu ar rialaitheoirí agus ar na daoine aonair a mbíonn na sonraí á láimhseáil acu. Thosaigh PIPC ag baint úsáid as a chumhachtaí láithreach bonn tar éis a bhunaithe in 2020. Léirítear i dtuarascáil bhliantúil PIPC 2021 gur eisigh PIPC roinnt moltaí, fíneálacha riaracháin agus beart ceartaitheach cheana féin, in aghaidh na hearnála poiblí (thart ar 34 údarás phoiblí) agus oibritheoirí príobháideacha (thart ar 140 cuideachta) araon (157). Áirítear i measc na gcásanna is suntasaí, mar shampla, fíneáil 6,7 billiún won a gearradh i mí na Nollag 2020 ar chuideachta as forálacha éagsúla de PIPA a shárú (lena n-áirítear ceanglais slándála, ceanglais chun toiliú a fháil le haghaidh soláthar tríú páirtí agus trédhearcacht) (158) agus fíneáil 103,3 milliún won i mí Aibreáin 2021 ar chuideachta teicneolaíochta SI (as na rialacha ar dhlíthiúlacht na próiseála, go háirithe toiliú, agus próiseáil faisnéise faoi ainm bréige a shárú i measc forálacha eile freisin) (159). I mí Lúnasa 2021, thug PIPC imscrúdú eile ar ghníomhaíochtaí thrí chuideachta eile i gcrích, rud ar eascair bearta ceartaitheacha as agus gearradh fíneálacha suas le 6,47-billiún won (inter alia, mar mainníodh daoine aonair a chur ar an eolas faoi nochtadh sonraí pearsanta do thríú páirtithe, lena n-áirítear aistrithe chuig tríú tíortha) mar thoradh air (160). Anuas air sin, bhí cuntas teiste láidir ag an gCóiré Theas ar fhorfheidhmiú cheana roimh an athchóiriú a rinneadh le déanaí, agus bhain na húdaráis fhreagracha úsáid as raon iomlán na mbeart forfheidhmithe, lena n-áirítear fíneálacha riaracháin, bearta ceartaitheacha, agus “ainmniú agus roinnt” maidir le raon leathan rialaitheoirí, lena n-áirítear soláthróirí seirbhísí cumarsáide (Coimisiún Cumarsáid na Cóiré), chomh maith le hoibritheoirí tráchtála, institiúidí airgeadais, údaráis phoiblí, ollscoileanna agus ospidéil (an Aireacht Ghnóthaí Baile agus Sábháilteachta) (161). Ar an mbonn sin, measann an Coimisiún go n-áirithíonn córas na Cóiré forfheidhmiú éifeachtach na rialacha cosanta sonraí sa chleachtas, dá bhrí sin ag rathú leibhéal cosanta arb ionann é go bunúsach leis an leibhéal a rathaítear faoi Rialachán (AE) 2016/679.

(129)

Chun cosaint leordhóthanach a áirithiú agus go háirithe forfheidhmiú ceart aonair, ba cheart sásamh éifeachtach riaracháin agus sásamh éifeachtach breithiúnach a sholáthar don ábhar sonraí, lena n-áirítear cúiteamh ar son damáistí.

(130)

Cuirtear sásraí éagsúla ar fáil do dhaoine aonair i gcóras na Cóiré chun a gcearta a fhorfheidhmiú go héifeachtach agus sásamh (breithiúnach) a fháil.

(131)

Mar an gcéad chéim leis sin, féadfaidh daoine aonair a mheasann gur sáraíodh a gcearta nó leasanna cosanta sonraí dul i gcomhairle leis an rialaitheoir ábhartha. De réir Airteagal 30(1) lit. 5 de PIPA, beidh faisnéis ar chearta ábhar sonraí agus an chaoi leis na cearta sin a fheidhmiú le fáil, i measc faisnéis eile, i mbeartas príobháideachais an rialaitheora. Thairis sin, soláthróidh sé faisnéis teagmhála – amhail ainm agus uimhir theileafóin an oifigigh príobháideachais nó na roinne atá freagrach as cosaint sonraí – ionas gur féidir gearáin (“casaoidí”) a chur isteach. Laistigh d’eagrú na rialaitheora, is é an t-oifigeach príobháideachais atá freagrach as gearáin a láimhseáil, bearta ceartaitheacha a ghlacadh i gcás sáraithe príobháideachais agus cúiteamh leigheasta (Airteagal 31(2) lit. 3, (4) de PIPA). Tá an pointe deiridh sin ábhartha, mar shampla, i gcás sáraithe sonraí mar tá ar an rialaitheoir an t-ábhar sonraí a chur ar an eolas faoin bpointe (faoi na pointí) teagmhála chun aon damáiste a thuairisciú, i measc nithe eile (Airteagal 34(1) lit. 5 de PIPA).

(132)

Anuas air sin, soláthraítear le PIPA roinnt bealaí sásaimh éagsúla le haghaidh daoine aonair in aghaidh rialaitheoirí. Ar an gcéad dul síos, féadfaidh aon duine aonair a mheasann gur sháraigh an rialaitheoir a chearta, nó a cearta, cosanta sonraí, an sárú den sórt sin a thuairisciú go díreach le PIPC agus/nó ceann de na hinstitiúidí speisialta a d’ainmnigh PIPC chun gearáin a fháil agus a láimhseáil; áirítear leis sin Gníomhaireacht Idirlín agus Slándála na Cóiré, a fheidhmíonn lárionad do ghlaonna chun na críche sin (“an Lárionad do Ghlaonna Príobháideachais” mar a thugtar air) (Airteagal 62(1), (2) de PIPA i dteannta le hAirteagal 59 d’Fhoraithne um Fhorfheidhmiú PIPA). Déanann an Lárionad do Ghlaonna Príobháideachais sáruithe a imscrúdú agus a shuí, soláthraíonn sé comhairle maidir le próiseáil sonraí pearsanta (Airteagal 62(3) de PIPA) agus féadfaidh sé aon sárú a thuairisciú do PIPA (ach ní féidir leis féin bearta forfheidhmithe a dhéanamh). Faigheann an Lárionad do Ghlaonna Príobháideachais líon ard gearán/iarratas (e.g. 177 457 in 2020, 159 255 in 2019 agus 164 497 in 2018) (162). De réir faisnéis a fuarthas ó PIPC, fuair PIPC féin thart ar 1 000 gearán idir mí Lúnasa 2020 agus mí Lúnasa 2021. Mar fhreagairt ar ghearán, féadfaidh PIPC comhairle le haghaidh feabhais, bearta ceartaitheacha, “cúiseamh” a eisiúint don ghníomhaireacht imscrúdaithe inniúil (lena n-áirítear ionchúisitheoir) nó comhairle a eisiúint le haghaidh gníomhaíocht araíonachta (féach Airteagail 61, 64 agus 65 de PIPA). Féadfar agóid a dhéanamh in aghaidh Chinntí PIPC (amhail diúltú gearán a láimhseáil nó diúltú ar ábhar gearáin) faoin Acht um Dhlíthíocht Riaracháin (163).

(133)

Ar an dara dul síos, de réir Airteagail 40 go 50 de PIPA i dteannta le hAirteagail 48-14 go 57 d’Fhoraithne um Fhorfheidhmiú PIPA, féadfaidh ábhair shonraí éilimh a chur faoi bhráid “Coiste um Idirghabháil i nDíospóidí”, mar a thugtar air, coiste ar a bhfuil ionadaithe atá ainmnithe ag Cathaoirleach PIPC ó bhaill de Sheirbhís Feidhmeannach Sinsearach PICP agus ceaptar daoine aonair bunaithe ar a dtaithí sa réimse cosanta sonraí ó ghrúpaí incháilithe áirithe (féach Airteagal 40(2), (3) agus (7) de PIPA, Airteagal 48-14 d’Fhoraithne um Fhorfheidhmiú PIPA) (164). Soláthraítear bealach malartach chun sásamh a fháil leis an bhféidearthacht úsáid a bhaint as idirghabháil roimh an gCoiste um Idirghabháil Díospóide, ach ní threoraíonn sé ceart an duine aonair dul i gcomhairle PIPC ná na cúirteanna. Chun scrúdú a dhéanamh ar an gcás, féadfaidh an Coiste iarraidh ar na páirtithe díospóideacha ábhair riachtanacha a sholáthar agus/nó glao ar fhinnéithe ábhartha láithriú os a chomhair (Airteagal 45 de PIPA). A luaithe agus a shoiléirítear an t-ábhar, ullmhaíonn an Coiste dréacht den dámhachtain idirghabhála (165) agus ní mór do thromlach na gcomhaltaí comhaontú faoi. Féadfaidh fionraí an tsáraithe, na leigheasanna is gá (lena n-áirítear aisíoc nó cúiteamh) chomh maith le haon bheart is gá chun atarlú an tsáraithe chéanna nó sáraithe chomhchosúil (sáruithe comhchosúla) a chosc a bheith san áireamh sa dréacht idirghabhála sin (Airteagal 47(1) de PIPA). I gcás ina gcomhaontaíonn an dá pháirtí ar an dámhachtain idirghabhála, bheidh an éifeacht chéanna aige atá ag comhréiteach sa chúirt (Airteagal 47(5) de PIPA). Níl cosc ar aon cheann de na páirtithe caingean chúirte a thionscain a fhad agus atá an idirghabháil ar bun, agus sa chás sin chuirfí an idirghabháil ar fionraí (féach Airteagal 48(2) de PIPA) (166). Léirítear i bhfigiúirí bliantúla a d’eisigh PIPC go mbaineann daoine aonair úsáid tráthrialta as an nós imeachta roimh an gCoiste um Idirghabháil Díospóide, agus go mbíonn toradh rathúil mar thoradh air go minic. Mar shampla, in 2020, láimhseáil an Coiste 126 chás, réitíodh 89 díobh os comhair an Choiste (agus tháinig 77 gcás ar chomhaontú sular tugadh an próiseas idirghabhála i gcrích agus bhí 12 chás ann inar glacadh leis an moladh idirghabhála), agus tagann ráta idirghabhála 70,6 % as sin (167). Ar an gcaoi chéanna, in 2019 láimhseáil an Coiste 139 gcás, réitíodh 92 díobh, as a dtagann ráta idirghabhála 62,2 %.

(134)

Thairis sin, i gcás ina ndearnadh damáiste do 50 duine aonair ar a laghad, nó inar sáraíodh a gcearta cosanta sonraí sa bhealach céanna nó ar bhealach comhchosúil i ndiaidh an teagmhais (den chineál) chéanna (168), féadfaidh ábhar sonraí nó eagraíocht cosanta sonraí iarratas a dhéanamh ar idirghabháil díospóide chomhchoiteann thar ceann comhchoitiantachta den sórt sin; féadfaidh ábhair shonraí eile iarratas a dhéanamh le bheith páirteach in idirghabháil den sórt sin, a fhógróidh an Coiste um Idirghabháil Díospóide go poiblí (Airteagal 49(1) go (3) de PIPA i dteannta le hAirteagail 52 go 54 d’Fhoraithne um Fhorfheidhmiú PIPA) (169). Féadfaidh an Coiste um Idirghabháil Díospóidí duine amháin ar a laghad a roghnú a dhéanann an ionadaíocht is iomchuí ar an leas coiteann mar pháirtí ionadaíoch (Airteagal 49(4) de PIPA). I gcás ina ndiúltaíonn an rialaitheoir d’idirghabháil díospóidí chomhchoiteann nó nach nglacann sé an dámhachtain idirghabhála, féadfaidh eagraíochtaí áirithe (170) cás dlí caingne aicmí a chomhdú chun aghaidh a thabhairt ar an sárú (Airteagail 51 go 57 de PIPA).

(135)

Ar an tríú dul síos, i gcás sáraithe príobháideachais a bhfuil “damáiste” don duine aonair mar thoradh air, tá an ceart ag an ábhar sonraí chun sásaimh iomchuí a fháil i “nós imeachta pras agus cothrom” (Airteagal 4 lit. 5 i dteannta le hAirteagal 39 de PIPA) (171). Féadfaidh an rialaitheoir é féin a shaoradh ó mhilleán ag cruthú nach bhfuil aon mhilleán ann (“intinn éagórach” nó faillí). I gcás ina ndéantar damáiste don ábhar sonraí mar thoradh ar chaillteanas, gadaíocht, nochtadh, brionnú, leasú nó damáiste i leith a c(h)uid sonraí pearsanta, féadfaidh an Chúirt cúiteamh suas le trí huaire an damáiste iarbhír a chinneadh, ag cur roinnt fachtóirí san áireamh (Airteagal 39(3), (4) de PIPA). De rogha air sin, féadfaidh an t-ábhar sonraí éileamh a dhéanamh ar “mhéid réasúnta” cúitimh a fháil nach sáraíonn 3 mhilliún won (Airteagal 39-2(1), (2) de PIPA). Thairis sin, i gcomhréir leis an Acht Sibhialta, féadfar cúiteamh a éileamh ó aon duine “atá ina gcúis le caillteanais nó a dhéanann dochar do dhuine eile trí ghníomh neamhdhleathach, d’aon ghnó nó go faillíoch” (172) nó ó dhuine “a rinne dochar don duine, do shaoirse nó do cháil duine eile nó atá ina gcúis le haon chrá intinne duine eile” (173). Dheimhnigh an Chúirt Uachtarach dliteanas torta den chineál sin ag leanúint ó shárú ar na rialacha cosanta sonraí (174). Má rinne údarás poiblí an gníomh neamhdhleathach, féadfar éileamh ar chúiteamh a chomhdú ina theannta sin faoin Acht um Chúiteamh Stáit (175). Féadfar éileamh faoin Acht um Chúiteamh Stáit a dhéanamh le “Comhairle Cúitimh” speisialaithe nó go díreach le cúirteanna na Cóiré (176). Cumhdaítear díobháil neamh-ábhartha freisin le dliteanas stáit (amhail fulaingt intinne) (177). Más náisiúnach coigríche é nó í an t-íospartach, beidh feidhm ag an Acht um Chúiteamh Stáit fad a áirithíonn a thír thionscnaimh nó a tír thionscnaimh cúiteamh stáit do náisiúnaigh na Cóiré mar an gcéanna (178).

(136)

Ar an gceathrú dul síos, d’aithin an Chúirt Uachtarach go bhfuil an ceart ag daoine aonair faoiseamh urghaire a éileamh ar son sáruithe ar a gcearta faoin mBunreacht, lena n-áirítear an ceart chun sonraí pearsanta a chosaint (179). Sa chomhthéacs sin, féadfaidh cúirt ordú ar rialaitheoirí aon ghníomhaíocht neamhdhleathach a chur ar fionraí nó a stopadh. Ina theannta sin, is féidir cearta cosanta sonraí, lena n-áirítear cearta a chosnaítear le PIPA, a fhorfheidhmiú trí chaingne sibhialta. D’aithin an Chúirt Uachtarach cur i bhfeidhm cothrománach na cosanta bunreachta sin i leith caidreamh idir páirtithe príobháideacha (180).

(137)

Ar deireadh, féadfaidh daoine aonair géarán coiriúil a dhéanamh de bhun an Achta um Nós Imeachta Cóiriúil (Airteagal 223) le hionchúisitheoir poiblí nó oifigeach de chuid na bpóilíní breithiúnacha (181).

(138)

Dá bhrí sin, tairgtear le córas na Cóiré bealaí éagsúla chun cúiteamh a fháil, idir bealaí atá inrochtana go héasca, roghanna ar chostas íseal (cuir i gcás, teagmháil a dhéanamh leis an Lárionad Glaonna um Príobháideachas nó trí idirghabháil (chomhchoiteann)) agus bealaí riaracháin (os comhair PIPC) agus bealaí breithiúnacha, lena n-áirítear an fhéidearthacht chun cúiteamh a fháil ar son damáistí.

(139)

Rinne an Coimisiún measúnú ar na teorainneacha agus na coimircí, lena n-áirítear na sásraí cúitimh formhaoirseachta agus aonair atá ar fáil i ndlí na Cóiré a mhéid a bhaineann le bailiú agus an úsáid a bhainfidh údaráis phoiblí na Cóiré dá éis as sonraí pearsanta a aistrítear chuig rialaitheoirí sa Chóiré ar mhaithe le leas an phobail, go háirithe maidir le forfheidhmiú an dlí choiriúil agus chun críocha slándála náisiúnta (rochtain ag an rialtas). Chuige sin, chuir rialtas na Cóiré uiríll, dearbhuithe agus gealltanais oifigiúla a síníodh ag an leibhéal aireachta agus gníomhaireachta is airde, atá le fáil in Iarscríbhinn II a ghabhann leis an gCinneadh seo, ar fáil don Choimisiún.

(140)

Agus measúnú á dhéanamh cibé a chomhlíonann, nó nach gcomhlíonann, na coinníollacha faoina bhfaigheann an rialtas rochtain ar shonraí a aistríodh chuig an gCóiré faoin gCinneadh seo an tástáil “comhionannas bunriachtanach” de bhun Airteagal 45(1) de Rialachán (AE) 2016/679, arna léirmhíniú ag Cúirt Bhreithiúnais an Aontais Eorpaigh i bhfianaise na Cairte um Chearta Bunúsacha, chuir an Coimisiún na critéir seo a leanas go háirithe san áireamh.

(141)

Ar an gcéad dul síos, ní mór foráil maidir le haon teorainn leis an gceart chun sonraí pearsanta a chosaint a bheith i ndlí agus ní mór don bhunús dlí lena gceadaítear cur isteach ar cheart den sórt sin sainmhíniú a thabhairt ar raon feidhme na teorann ar fheidhmiú an chirt lena mbaineann (182).

(142)

Ar an dara dul síos, chun ceanglas na comhréireachta a chomhlíonadh, ar dá réir nach mór maoluithe uaidh agus teorainneacha le sonraí pearsanta a chosaint a bheith infheidhme, a mhéid a bhfuil fíorghá leis amháin i sochaí dhaonlathach chun cuspóirí sonracha leasa ghinearálta atá comhionann leo siúd a aithníonn an tAontas, ní mór do reachtaíocht an tríú tír atá i gceist, a cheadaíonn an cur isteach sin, rialacha soiléire agus beachta a leagan síos chun raon feidhme agus cur i bhfeidhm na mbeart i gceist a rialú agus coimircí íosta a fhorchur ionas go mbeidh ráthaíochtaí leormhaithe ag na daoine ar aistríodh a sonraí chun a sonraí pearsanta a chosaint in aghaidh an riosca mí-úsáide (183). Ní mór don reachtaíocht, go háirithe, a shonrú cé na tosca agus na coinníollacha faoinar féidir beart lena ndéantar foráil maidir le próiseáil sonraí den chineál sin a ghlacadh (184) chomh maith le hábhar comhlíonta ceanglas den sórt sin i leith formhaoirseacht neamhspleách (185).

(143)

Ar an tríú dul síos, ní mór don reachtaíocht sin agus do na ceanglais atá inti a bheith ceangailteach ó thaobh dlí de faoin dlí náisiúnta. Baineann sé seo i dtosach le gach údarás de chuid an tríú tír atá i gceist, ach ní mór do na ceanglais dhlíthiúla sin a bheith in-fhorfheidhmithe os comhair na gcúirteanna in aghaidh na n-údarás sin (186). Go háirithe, ní mór go mbeadh an fhéidearthacht ag ábhair shonraí caingean dlí a ghlacadh os comhair binse neamhspleách neamhchlaonta chun rochtain a fháil ar a sonraí pearsanta, nó chun sonraí den sórt sin a cheartú nó a scriosadh (187).

(144)

Leanann na teorainneacha agus na coimircí is infheidhme maidir le bailiú sonraí pearsanta agus an úsáid a bhainfidh údaráis phoiblí na Cóiré as na sonraí ina dhiaidh sin as creat bunreachtúil uileghabhálach, dlíthe sonracha a rialaíonn a ngníomhaíochtaí i réimse an fhorfheidhmithe dlí chóiriúil agus slándála náisiúnta, chomh maith leis na rialacha atá i bhfeidhm maidir le próiseáil sonraí pearsanta go sonrach.

(145)

Ar an gcéad dul síos, tá rochtain ag údaráis phoiblí na Cóiré ar shonraí pearsanta á rialú ag prionsabail ghinearálta dlíthiúlachta, riachtanais agus comhréireachta a eascraíonn as Bunreacht na Cóiré (188). Go háirithe, ní féidir cearta agus saoirsí bunúsacha (lena n-áirítear an ceart chun príobháideachais agus an ceart chun príobháideachas comhfhreagrais) (189) a shrianadh ach amháin leis an dlí agus nuair is gá sin le haghaidh na slándála náisiúnta, nó chun an dlí agus an t-ord poiblí a chaomhnú ar mhaithe le leas an phobail. Ní fhéadfaidh srianta den sórt sin difear a dhéanamh d’éirim an chirt ná na saoirse atá i gceist. Maidir le cuardaigh agus urghabhálacha go sonrach, foráiltear sa Bhunreacht nach bhféadfaidh siad tarlú ach faoi mar a ndéantar foráil ina leith sa dlí, ar bhonn barántais atá eisithe ag breitheamh agus ag urramú na próise cuí (190). Ar deireadh, féadfaidh daoine aonair a gcearta agus a saoirsí a agairt os comhair na Cúirte Bunreachtúla má chreideann siad gur sháraigh údaráis phoiblí iad i bhfeidhmiú a gcumhachtaí (191). Ar an gcaoi chéanna, tá an ceart ag daoine ar baineadh damáistí dóibh mar thoradh ar ghníomh neamhdhleathach a rinne oifigeach poiblí agus cúraimí oifigiúla á ndéanamh aige cúiteamh cóir a éileamh (192).

(146)

Ar an dara dul síos, mar a thugtar tuairisc níos mionsonraithe air i ranna 3.2.1 agus 3.3.1, na prionsabail ghinearálta a luaitear in aithris (145) léirítear iad sna dlíthe sonracha a rialaíonn cumhachtaí údaráis um fhorfheidhmiú an dlí agus slándála náisiúnta. Mar shampla, maidir le himscrúduithe coiriúla, foráiltear san Acht um Nós Imeachta Coiriúil (CPA) maidir le bearta éigeantacha nach féidir a dhéanamh ach i gcás ina ndéantar foráil go sainráite ina leis in CPA agus a mhéid is íosta is gá chun cuspóir an imscrúdaithe sin a bhaint amach (193). Ar an dóigh chéanna, le hAirteagal 3 den Acht um Phríobháideacht Cumarsáide a Chosaint (CPPA) toirmisctear rochtain ar chumarsáid ach amháin ar bhonn an dlí agus faoi réir teorainneacha agus coimircí a leagtar amach san Airteagal sin. I réimse na slándála náisiúnta, foráiltear leis an Acht um an tSeirbhís Náisiúnta Faisnéise (Acht NIS) nach mór d’aon rochtain ar fhaisnéis cumarsáide nó suímh an dlí a chomhlíonadh agus tá mí-úsáid cumhachta agus sáruithe ar an dlí faoi réir smachtbhannaí coiriúla. (194).

(147)

Ar an tríú dul síos, tá próiseáil sonraí pearsanta ag údaráis phoiblí, lena n-áirítear chun críocha fhorfheidhmiú an dlí agus slándála náisiúnta, faoi réir rialacha cosanta sonraí faoi PIPA (195). Mar phrionsabal ginearálta, éilítear in Airteagal 5(1) de PIPA ar údaráis phoiblí beartais a fhorbairt chun “drochúsáid agus mí-úsáid a bhaintear as faisnéis phearsanta, faireachas agus tóir neamhscoite a dhéanamh, etc. agus chun dínit daoine daonna agus an príobháideachas aonair a fheabhsú.” Ina theannta sin, ní mór d’aon rialaitheoir sonraí pearsanta a phróiseáil ar bhealach ina n-íoslaghdaítear an fhéidearthacht go sárófaí príobháideachas an ábhair sonraí (Airteagal 3(6) de PIPA).

(148)

Tá feidhm ag ceanglais uile PIPA, mar a thugtar tuairisc mionsonraithe orthu i roinn 2, maidir le próiseáil sonraí pearsanta chun críocha fhorfheidhmiú an dlí. Áirítear leis sin na príomhphrionsabail (amhail dlíthiúlacht agus cothroime, teorannú de réir cuspóra, cruinneas, íoslaghdú sonraí, teorannú stórála, slándáil agus trédhearcacht), ceanglais (cuir i gcás, maidir le fógra a thabhairt faoi shárú sonraí agus sonraí íogaire) agus cearta (chun rochtana, ceartúcháin, scriosta nó fionraí).

(149)

Cé go bhfuil próiseáil sonraí pearsanta chun críocha slándála náisiúnta faoi réir sraith d’fhorálacha atá níos teoranta faoi PIPA, tá feidhm ag na príomhphrionsabail, chomh maith leis na rialacha maidir le formhaoirseacht, forfheidhmiú agus sásamh (196). Go sonrach, leagtar síos in Airteagail 3 agus 4 de PIPA na prionsabail ghinearálta maidir le cosaint sonraí (dlíthiúlacht agus cothroime, teorannú de réir cuspóra, cruinneas, íoslaghdú sonraí, slándáil agus trédhearcacht) agus cearta an duine aonair (an ceart bheith curtha ar an eolas, an ceart rochtana, agus na cearta ceartúcháin, scriosta agus fionraí) (197). Le hAirteagal 4(5) de PIPA foráiltear thairis sin go bhfuil an ceart ag daoine aonair chun sásaimh iomchuí a fháil maidir le haon damáiste a d’eascródh as próiseáil a bhfaisnéise pearsanta trí nós imeachta pras agus cothrom. Comhlíonann oibleagáidí níos sonraí chun sonraí pearsanta a phróiseáil an t-íosmhéid is gá chun an chríoch bheartaithe a bhaint amach amháin agus ar feadh na tréimhse is íosta is féidir, na bearta is gá a chur i bhfeidhm chun bainistíocht shábháilte sonraí agus próiseáil iomchuí a áirithiú (amhail cosaintí teicniúla, bainistíochta agus fisiceacha) chomh maith le bearta chun casaoidí (gearáin) aonair a láimhseáil go hiomchuí (198). Ar deireadh, tá feidhm ag prionsabail ghinearálta dlíthiúlachta, riachtanais agus comhréireachta ó Bhunreacht na Cóiré (féach aithris (145)) freisin maidir le próiseáil sonraí pearsanta chun críocha slándála náisiúnta.

(150)

Féadfaidh daoine aonair na teorainneacha agus na coimircí ginearálta sin a agairt os comhair comhlachtaí formhaoirseachta (e.g. PIPC agus/nó an Coimisiún Náisiúnta um Chearta an Duine, féach aithrisí (177) – (178)) agus cúirteanna (féach aithrisí (179) – (183)) chun sásamh a fháil.

(151)

Forchuireann dlí na Cóiré roinnt teorainneacha ar rochtain agus ar úsáid sonraí pearsanta chun críocha fhorfheidhmiú an dlí choiriúil, agus foráiltear leis sásraí formhaoirseachta agus sásaimh atá i gcomhréir leis na ceanglais dá dtagraítear in aithrisí (141) go (143) den Chinneadh seo. Déantar measúnú mionsonraithe sna ranna a leanas ar na coinníollacha faoinar féidir rochtain den sórt sin tarlú agus ar na coimircí is infheidhme maidir le húsáid na gcumhachtaí sin.

(152)

Féadfaidh údaráis na Cóiré sonraí pearsanta próiseáilte ag rialaitheoirí na Cóiré a d’aistreofaí ón Aontas faoin gCinneadh seo (199) a bhailiú chun críocha fhorfheidhmiú an dlí chóiriúil i gcomhthéacs cuardaigh nó urghabhála (ar bhonn CPA), trí rochtain a fháil ar fhaisnéis cumarsáide (ar bhonn CPPA), nó trí shonraí síntiúsóirí a fháil trí iarratais ar nochtadh saorálach (ar bhonn an Achta um Ghnó Teileachumarsáide, TBA) (200).

(153)

Foráiltear le CPA nach bhféadfaidh cuardach nó urghabháil tarlú ach amháin má tá drochamhras ann go ndearnadh duine coir, gur gá é le haghaidh an imscrúdaithe agus go bhfuil nasc suite idir an t-imscrúdú agus an duine atá le cuardach nó an t-airteagal atá le himscrúdú nó le hurghabháil (201). Thairis sin, ní fhéadfar cuardach ná urghabháil (mar aon bheart éigeantach) a cheadú/a dhéanamh a mhéid is íosta is gá (202). Má bhaineann cuardach le diosca ríomhaire nó meán stórála sonraí eile, i bprionsabal ní dhéanfaí ach na sonraí is gá (agus iad cóipeáilte nó priontáilte amach) a urghabháil seachas an meán iomlán (203). Ní féidir an meán sin a urghabháil ach i gcás ina meastar é a bheith dodhéanta go substaintiúil na sonraí a phriontáil amach nó a chóipeáil ar leithligh, nó i gcás ina meastar nach praiticiúil é go substaintiúil cuspóir an chuardaigh a bhaint amach ar aon bhealach eile (204). Dá bhrí sin, le CPA leagtar síos rialacha soiléire agus beachta maidir le raon feidhme agus cur i bhfeidhm na mbeart sin, sa chaoi sin ag áirithiú go mbeidh cur isteach ar chearta daoine aonair i gcás cuardaigh nó urghabhála teoranta don mhéid is gá le haghaidh imscrúdú coiriúil sonrach agus go bhfuil sé comhréireach leis an gcuspóir beartaithe.

(154)

I dtéarmaí coimircí nós imeachta de, éilítear le CPA go bhfaightear barántas ó chúirt chun cuardach nó urghabháil a dhéanamh (205). Ní cheadaítear cuardach nó urghabháil gan bharántas ach i gcásanna eisceachtúla, eadhon in imthosca éigeandála (206), in loco tráth a ghabhtar nó a choinnítear amhrastach coiriúil (207), nó i gcás ina bhfuil airteagal caite nó a sholáthraíonn amhrastach coiriúil nó tríú páirtí (a mhéid a bhaineann le sonraí pearsanta, ag an duine lena mbaineann é/í féin) airteagal go saorálach (208). Tá cuardaigh agus urghabhálacha neamhdhleathacha faoi réir smachtbhannaí coiriúla (209) agus meastar aon fhianaise a fhaightear de shárú ar CPA a bheith neamh-inghlactha (210). Ar deireadh, ní mór na daoine aonair lena mbaineann a chur ar an eolas i gcónaí maidir le cuardach nó urghabháil (lena n-áirítear urghabháil a sonraí) gan mhoill (211), rud a éascóidh dá réir sin feidhmiú ceart substainteach an duine aonair agus feidhmiú an chirt chun sásamh a fháil (féach go háirithe an fhéidearthacht chun dúshlán a thabhairt d’fheidhmiú barántais urghabhála, féach aithris (180)).

(155)

Ar bhonn CPPA, féadfaidh údaráis fhorfheidhmiú an dlí choiriúil de chuid na Cóiré dhá chineál bheart a dhéanamh (212): ar thaobh amháin, “sonraí deimhnithe cumarsáide” a bhailiú (213), áirítear leis sin dáta na teileachumarsáide, am tosaithe agus am críochnaithe, an líon glaonna amach agus ag teacht isteach chomh maith le huimhir síntiúsóra an pháirtí eile, an mhinicíocht úsáide, comhaid loga maidir le húsáid na seirbhísí teileachumarsáide agus faisnéis suímh (cuir i gcás, ó thúir tarchuir i gcás ina bhfaightear comharthaí); agus, ar an taobh eile, “bearta a chuireann srianta ar chumarsáid”, a chumhdaíonn idir inneachar an phoist traidisiúnta a bhailiú agus idircheapadh díreach ar inneachar teileachumarsáide (214).

(156)

Ní féidir rochtain a fháil ar shonraí deimhnithe cumarsáide ach i gcás inar gá leis chun imscrúdú coiriúil a dhéanamh nó chun pionós a fhorghníomhú (215), ar bhonn barántais atá eisithe ag cúirt (216). Chuige sin, éilítear le CPPA go soláthraítear faisnéis mhionsonraithe san iarratas ar bharántas (e.g. na cúiseanna leis an iarratas a dhéanamh, an gaol leis an sprioc/síntiúsóir agus na sonraí is gá) agus sa bharántas féin (e.g. faisnéis ar chuspóir, sprioc agus raon feidhme an bhirt) (217). Ní féidir bailiú gan bharántas a dhéanamh ach i gcás ina bhfuil sé dodhéanta cead a fháil ó chúirt mar gheall ar fhorais práinne, agus i gcás mar sin ní mór barántas a fháil agus a chur in iúl don soláthraí teileachumarsáide díreach tar éis na sonraí a phróiseáil (218). Má dhiúltaíonn an chúirt cead a thabhairt ina dhiaidh sin, ní mór an fhaisnéis bailithe a scriosadh (219).

(157)

I dtéarmaí coimircí breise maidir le sonraí deimhnithe cumarsáide a bhailiú, forchuireann CPPA ceanglais shonracha a bhaineann le taifid a choinneáil agus le trédhearcacht (220). Go háirithe, ní mór d’údaráis fhorfheidhmiú an dlí choiriúil (221) agus soláthraithe teileachumarsáide (222) taifid a choinneáil ar iarrataí agus nochtaí a rinneadh. Anuas air sin, ní mór d’fhorfheidhmiú an dlí choiriúil i bprionsabal fógra a thabhairt do dhaoine aonair gur bailíodh a sonraí deimhnithe cumarsáide (223). Ní fhéadfar fógra den sórt sin a iarchur ach in imthosca eisceachtúla, ar bhonn údarú ó stiúrthóir ar oifig dhúiche ionchúisitheora phoiblí inniúil (224). Ní féidir údarú den sórt sin a sholáthar ach nuair is dócha go dtarlóidh ceann díobh seo a leanas mar gheall ar fhógra a thabhairt (1) chuirfí slándáil náisiúnta, slándáil agus ord poiblí i mbaol, (2) bheadh sé ina chúis le bás nó gortú coirp, (3) chuirfí cosc ar imeachtaí breithiúnacha cothroma (cuir i gcás, d’fhéadfadh sé a bheith ina chúis le scriosadh fianaise nó finnéithe a bhagairt), nó (4) d’fhéadfadh sé an t-amhrastach, an t-íospartach nó daoine eile a bhaineann leis an gcás a chhlúmhilleadh nó a bpríobháideachas a shárú. Sna cásanna sin, ní mór fógra a sholáthar laistigh de 30 lá tráth nach bhfuil an foras (na forais) le haghaidh an iarchurtha ann a thuilleadh (225). Tráth a fhaightear an fógra, tá an ceart ag daoine aonair chun faisnéis a fháil faoi na cúiseanna le bailiú a sonraí (226).

(158)

Tá feidhm ag rialacha níos doichte maidir le bearta a chuireann srianta le cumarsáid, nach féidir iad a úsáid ach amháin i gcás ina bhfuil cúis shubstaintiúil le bheith in amhras go bhfuil coireanna áirithe a liostaítear go sonrach in CPPA beartaithe, nó go bhfuil siad ag tarlú, nó gur tharla siad (227). Thairis sin, ní féidir bearta a chuireann srianta le cumarsáid a dhéanamh ach mar rogha dheireanach agus i gcás a bhfuil sé deachair coir a chosc, coirpeach a ghabháil, nó fianaise a bhailiú ar aon bhealach eile (228). Ní mór éirigh as a n-úsáid láithreach bonn tráth nach bhfuil gá leo a thuilleadh, le háirithiú go bhfuil an sárú ar phríobháideacht cumarsáide a theoranta agus is féidir (229). Ní ghlactar faisnéis a fuarthas go neamhdhleathach trí bhíthin bearta a chuireann srianta le cumarsáid mar fhianaise in imeachtaí breithiúnacha ná araíonachta (230).

(159)

I dtéarmaí coimircí nós imeachta de, éilítear le CPPA go bhfaightear barántas ó chúirt chun bearta a chuireann srianta le cumarsáid a dhéanamh (231). Arís, éilítear le CPPA go bhfuil faisnéis mhionsonraithe san iarratas ar bharántas agus sa bharántas féin (232), lena n-áirítear faisnéis ar an údar leis an iarraidh, chomh maithe leis an gcumarsáid atá le bailiú (nach mór gur cumarsáid an amhrastaigh atá faoi imscrúdú iad) (233). Ní féidir bearta den sórt sin a dhéanamh gan bharántas ach i gcás a bhfuil garbhagairt maidir le coireacht eagraithe ann nó i gcás ina bhfuil coireacht eile a d’fhéadfadh a bheith ina cúis le bás nó gortú tromchúiseach ar tí tarlú, agus go bhfuil éigeandáil ann faoina bhfuil sé dodhéanta dul tríd an ngnáthnós imeachta (234). Mar sin féin, sa chás sin ní mór iarratas ar bharántas a chomhdú láithreach i ndiaidh an beart a dhéanamh (235). Ní féidir bearta a chuireann srianta le cumarsáid a dhéanamh ach ar feadh tréimhse uasta de 2 mhí (236) agus féadfar síneadh a chur leo le formheas na cúirte má leantar de na coinníollacha chun na bearta a dhéanamh a chomhlíonadh (237). Ní fhéadfaidh an tréimhse sínithe a bheith níos faide ná 1 bhliain amháin ar an iomlán, nó 3 bliana ar an iomlán i gcás coireanna tromchúiseacha (amhail coireanna a bhaineann le héirí amach, ionsaí eachtrach, slándáil náisiúnta) (238).

(160)

Mar is amhlaidh an cás maidir le sonraí deimhnithe cumarsáide a bhailiú, éilítear le CPPA ar sholáthraithe teileachumarsáide (239) agus ar údaráis fhorfheidhmithe dlí (240) taifid a choinneáil ar fheidhmiú na mbeart a chuireann srianta le cumarsáid, agus déantar foráil leis maidir le fógra a thabhairt don duine aonair lena mbaineann, rud a d’fhéadfaí a iarchur go heisceachtúil, i gcás inar gá, ar fhorais thábhachtacha ar mhaithe le leas an phobail (241).

(161)

Ar deireadh, tá neamhchomhlíonadh roinnt de na srianta agus na coimircí de CPPA (lena n-áirítear, cuir i gcás, na hoibleagáidí maidir le barántas a fháil, taifid a choinneáil agus fógra a thabhairt don duine aonair), maidir le bailiú sonraí deimhnithe cumarsáide agus le húsáid beart a chuireann srianta le cumarsáid faoi réir smachtbhannaí coiriúla (242).

(162)

Tá cumhachtaí údaráis forfheidhmithe dlí chóiriúil chun sonraí cumarsáide a bhailiú ar bhonn CPPA (idir inneachar na cumarsáide agus sonraí deimhnithe cumarsáide) teoranta dá bhrí sin ag rialacha soiléire agus beachta, agus tá siad faoi réir roinnt coimircí. Ráthaítear leis na smachtbhannaí sin formhaoirseacht ar fheidhmiú beart den sórt sin, ex ante (trí fhormheas breithiúnas a fháil roimh ré) agus ex post (trí thaifid a choimeád agus ceanglais tuairiscithe), agus éascaíonn siad rochtain daoine aonair ar réitigh éifeachtacha (trí áirithiú go bhfuil siad ar an eolas faoi bhailiú a sonraí).

(163)

Anuas ar bheith ag brath ar na bearta éigeantacha ar a dtugtar tuairisc in aithrisí (153) - (162), féadfaidh údaráis forfheidhmithe dlí na Cóiré iarraidh ar sholáthraithe teileachumarsáide ar son “sonraí cumarsáide” ar bhonn saorálach, chun tacú le triail nó imscrúdú coiriúil nó le pionós a ghearradh (Airteagal 83(3) de TBA). Níl an fhéidearthacht sin ann ach maidir le tacair sonraí theoranta, i.e. ainm, cláruimhir cónaithe, seoladh agus uimhir theileafóin úsáideoirí, na dátaí a chláraigh úsáideoirí nó a chuirfidh siad deireadh lena síntiús chomh maith le cód aitheantais úsáideoirí (ciallaíonn sé sin cóid a úsáidtear chun úsáideoir dlisteanach córas ríomhaire nó líonraí cumarsáide a aithint) (243). Ós rud é nach meastar mar “úsáideoirí” ach daoine aonair a dhéanann conradh díreach le haghaidh seirbhísí le soláthraí teileachumarsáide de chuid na Cóiré. (244), ní thiocfadh daoine aonair as an Aontas ar aistríodh a gcuid sonraí chuig Poblacht na Cóiré faoi réim na catagóire sin (245).

(164)

Tá feidhm ag srianta éagsúla maidir le nochtaí saorálacha den sórt sin, maidir le feidhmiú cumhachtaí ag an údarás forfheidhmithe dlí agus an fhreagairt ón oibreoir teileachumarsáide araon. Mar cheanglas ginearálta, ní mór do ghníomhaireachtaí forfheidhmithe dlí gníomhú i gcomhréir leis na prionsabail bhunreachtúla a bhaineann le riachtanas agus comhréireacht (Airteagail 12(1) agus 37(2) den Bhunreacht), lena n-áirítear i gcásanna ina n-iarrann siad faisnéis ar bhonn saorálach. Anuas air sin, ní mór dóibh PIPA a chomhlíonadh, go háirithe tríd an íosmhéid sonraí pearsanta a bhailiú, a oiread is gá chun cuspóir dlisteanach a bhaint amach, ar bhealach chun an tionchar ar phríobháideachas daoine aonair a íoslaghdú (amhail Airteagal 3(1), (6) de PIPA). Go sonrach, ní mór iarrataí chun sonraí cumarsáide a fháil ar bhonn TBA a dhéanamh i scríbhinn agus ní mór na cúiseanna leis an iarraidh, an nasc leis an úsáideoir ábhartha agus raon feidhme na sonraí ar ar iarradh a lua ann (246).

(165)

Ní éilítear ar sholáthraithe teileachumarsáide iarrataí den sórt sin a chomhlíonadh agus ní fhéadfaidh siad é sin a dhéanamh ach i gcomhréir le PIPA. Ciallaíonn sé sin, go háirithe, nach mór dóibh cothromaíocht a fháil idir na leasanna éagsúla atá i gceist agus nach bhféadfaidh siad na sonraí a sholáthar dá sárófaí leasanna an duine aonair nó tríú páirtí leis an soláthar sin (247). Is é sin a bheadh i gceist, mar shampla, má tá sé soiléir gur bhain an t-údarás iarrthach mí-úsáid as a údarás (248). Ní mór d’oibreoirí teileachumarsáide taifid a choinneáil ar nochtaí faoi TBA agus tuairisciú don Aire Eolaíocht agus FTC faoi dhó in aghaidh na bliana (249).

(166)

Anuas air sin, i gcomhréir le Roinn 3 d’Fhógra Uimh. 2021-5 (Iarscríbhinn I), i bprionsabal tá ar sholáthraithe teileachumarsáide fógra a thabhairt don duine aonair lena mbaineann i gcás ina ngéilleann sé le hiarraidh go saorálach (250). Cumasóidh sé sin, dá réir sin, an duine aonair lena c(h)earta a fheidhmiú, agus i gcás ina nochtar a s(h)onraí go neamhdhleathach, sásamh a fháil, in aghaidh an rialaitheora (mar shampla, ar son na sonraí a nochtadh de shárú ar PIPA, nó ar son freagairt ar iarraidh ar léir go raibh sé díréireach) nó in aghaidh an údaráis forfheidhmithe dlí (mar shampla, ar son gníomhú thar na teorainneacha dó sin a bhfuil gá leis agus atá comhréireach nó mar gheall nár urramaíodh ceanglais nós imeachta a ghabhann le TBA).

(167)

Tá próiseáil sonraí pearsanta a bhailíonn údaráis forfheidhmithe dlí chóiriúil faoi réir gach ceanglais de PIPA, lena n-áirítear a mhéid a bhaineann le teorannú cuspóra (Airteagal 3(1)-(2) de PIPA), dlíthiúlacht úsáide agus soláthar do thríú páirtithe (Airteagail 15, 17 agus 18 de PIPA), aistrithe idirnáisiúnta (Airteagail 17 agus 18 de PIPA, i dteannta le Roinn 2 d’Fhógra 2021-5) (251), comhréireacht/íoslaghdú sonraí (Airteagal 3(1), (6) de PIPA) agus teorannú stórála (Airteagal 21 de PIPA) (252).

(168)

Maidir le hinneachar na cumarsáide a fhaightear trí bhearta a chuireann srianta le cumarsáid a fheidhmiú, teorannaíonn CPPA úsáid fhéideartha na cumarsáide sin go sonrach le coireanna tromchúiseacha a imscrúdú, a ionchúiseamh nó a chosc (253); imeachtaí araíonachta le haghaidh nag coireanna céanna; éilimh ó pháirtí leis an gcumarsáid ar son damáistí nó i gcás ina gceadaítear sin go sonrach le dlíthe eile (254). Thairis sin, ní féidir inneachar teileachumarsáide bailithe a tarchuireadh ar an idirlíon a choinneáil ach le cead ón gcúirt a d’fhormheas na bearta a chuireann srianta le cumarsáid (255), d’fhonn é a úsáid chun coireanna tromchúiseacha a imscrúdú, a ionchúiseamh nó a chosc (256). Níos ginearálta, cuireann CPPA toirmeasc ar fhaisnéis rúnda a fuarthas ó bhearta a chuireann srianta le cumarsáid a nochtadh, agus le faisnéis den sórt sin a úsáid chun damáiste a dhéanamh do cháil na ndaoine sin a bhí faoi réir na mbeart sin (257).

(169)

Sa Chóiré, déanann comhlachtaí éagsúla maoirseacht ar ghníomhaíochtaí údaráis forfheidhmithe dlí choiriúil (258).

(170)

Ar an gcéad dul síos, tá na póilíní faoi réir formhaoirseacht inmheánach ag Ard-Chigire (259), a thugann faoi dhlíthiúlacht a rialú, lena n-áirítear a mhéid a bhaineann le sáruithe féideartha ar chearta an duine. Bunaíodh an tArd-Chigire chun an tAcht um Iniúchtaí san Earnáil Phoiblí a chur chun feidhme, gníomh lena spreagtar comhlachtaí féin-iniúchóireachta a chruthú agus lena leagtar síos ceanglais shonracha maidir lena gcomhdhéanamh agus lena gcúraimí. Go háirithe, éilítear leis an Acht go gceaptar ceannaire comhlachta féin-iniúchóireachta ó lasmuigh den údarás ábhartha (amhail iarbhreithiúna, ollúna) ar feadh tréimhse 2 bhliain go 5 bliana (260), agus ní bheifear in ann iad a chur as oifig ach ar chúiseanna a bhfuil údar leo (cuir i gcás, mura mbeidh ar a gcumas a ndualgais a chomhlíonadh mar gheall ar chúiseanna sláinte, nó má bhíonn siad faoi réir gníomhaíocht araíonachta) (261) agus go rathaítear go bhfuil a oiread neamhspleáchais agus is féidir ag an gcomhlacht sin (262). Beifear faoi réir fíneálacha riaracháin má chuirtear bacainn ar fhéin-iniúchóireacht (263). Déantar tuarascálacha iniúchóireachta (a d’fhéadfadh moltaí, iarrataí ar ghníomhaíocht araíonachta, agus iarrataí ar chúiteamh nó ceartúchán a bheith mar chuid díobh) a chur in iúl do cheannaire an údaráis phoiblí ábhartha, don Bhord um Iniúchadh agus Cigireacht (BAI) (264) agus, go ginearálta, déantar iad a phoibliú (265). Ní mór fógra a thabhairt do BAI maidir le torthaí na tuarascála cur chun feidhme freisin (266) (féach aithris (173) maidir le ról formhaoirseachta agus cumhachtaí BAI).

(171)

Ar an dara dul síos, déanann PIPC maoirseacht ar chomhlíontacht phróiseáil sonraí na n-údarás forfheidhmithe dlí chóiriúil le PIPA agus le dlíthe eile a chosnaíonn príobháideachas daoine aonair, lena n-áirítear na dlíthe a rialaíonn bailiú fianaise (leictreonaí) chun críocha fhorfheidhmiú an dlí chóiriúil, mar a thugtar tuairisc orthu i roinn 3.2.1 (267). Go háirithe, ós rud é go síneann PIPC le dlíthiúlacht agus cothroime bailithe agus próiseála sonraí (Airteagal 3(1) de PIPA), a dhéanfar a shárú má fhaightear rochtain ar shonraí pearsanta agus má úsáidtear iad de shárú ar na dlíthe sin (268), féadfaidh PIPA imscrúdú a dhéanamh agus comhlíontacht na srianta agus na gcoimircí ar a dtugtar tuairisc i roinn 3.2.1 a fhorfheidhmiú freisin (269). Agus an ról maoirseachta sin á fheidhmiú aige, féadfaidh PIPC úsáid a bhaint as a chumhachtaí imscrúdúcháin agus feabhais uile, mar a thugtar tuairisc orthu i roinn 2.4.2. Fiú roimh an athchóiriú a rinneadh ar PIPA le déanaí (i.e. ina ról maoirseachta roimhe sin don earnáil phoiblí), rinne PIPC neart gníomhaíochtaí formhaoirseachta ar phróiseáil sonraí pearsanta ag údaráis forfheidhmithe dlí choiriúil, e.g. i gcomhthéacs amhrastaigh a cheistiú (Cás Uimh. 2013-16, an 26 Lúnasa 2013), maidir le fógra a thabhairt do dhaoine aonair faoi fhíneálacha riaracháin a ghearradh (Cás Uimh. 2015-02-04, an 26 Eanáir 2015), sonraí a roinnt le húdaráis eile (Cás Uimh. 2018-15-146, an 9 Iúil 2018, Cás Uimh. 2018-25-308, an 10 Nollaig 2018; Cás Uimh. 2019-02-015, an 29 Eanáir 2019), bailiú méarlorg nó grianghraf (Cás Uimh. 2019-17-273, an 9 Meán Fómhair 2019), úsáid drón (Cás Uimh. 2020-01-004, an 13 Eanáir 2020). Sna cásanna sin, rinne PIPC imscrúdú ar chomhlíontacht neart forálacha de PIPA (e.g. dlíthiúlacht na próiseála, prionsabail maidir le teorannú cuspóra agus íoslaghdú sonraí) ach ar fhorálacha ábhartha dhlíthe eile amhail an tAcht um Nós Imeachta Cóiriúil, agus, i gcás inar gá d’eisigh sé moltaí chun an phróiseáil a athrú le bheith i gcomhréir leis na ceanglais maidir le cosaint sonraí.

(172)

Ar an tríú dul síos, déanann an Coimisiún Náisiúnta um Chearta an Duine (CHRC) (270) formhaoirseacht neamhspleách, Coimisiún ar féidir leis imscrúdú a dhéanamh ar sháruithe ar chearta chun príobháideachais agus chun príobháideachas comhfhreagrais mar chuid dá shainordú ginearálta chun cearta bunúsacha d’Airteagail 10-22 den Bhunreacht a chosaint. Tá 11 Choimisinéir ar NHRC nach mór dóibh cáilíochtaí sonracha a chomhlíonadh (271) agus atá ceaptha ag an Uachtarán i gcomhréir leis na nósanna imeachta a leagtar síos sa dlí. Go háirithe, ceaptar ceathrar coimisinéirí arna n-ainmniú ag an Tionól Náisiúnta, ceathrar coimisinéirí arna n-ainmniú ag an Uachtarán agus triúr coimisinéirí arna n-ainmniú ag Príomh-Bhreitheamh na Cúirte Uachtaraí (272). Ceapann an tUachtarán an Cathaoirleach as measc na gCoimisinéirí agus ní mór dó a bheith deimhnithe ag an Tionól Náisiúnta (273). Ceaptar Coimisinéirí (lena n-áirítear an Cathaoirleach) ar feadh téarma 3 bliana is féidir a athnuachan agus ní fhéadfar iad a dhífhostú ach i gcás ina ngearrfar téarma príosúnachta orthu nó i gcás nach mbeidh ar a gcumas a ndualgais a chomhlíonadh a thuilleadh de dheasca laige mheabhrach nó fhisiciúil ar feadh i bhfad (agus, sa chás sin, ní mór do dhá thrian de na Coimisinéirí aontú leis an dífhostú) (274). Mar chuid d’imscrúdú, féadfaidh NHRC a iarraidh go gcuirfear ábhair ábhartha faoina bhráid, cigireachtaí a dhéanamh agus toghairm a chur ar dhaoine aonair fianaise a thabhairt (275). I dtéarmaí cumhachtaí feabhais, féadfaidh NHRC moltaí (poiblí) a eisiúint chun feabhas a chur ar bhearta nó ar chleachtais shonracha, nó chun iad a cheartú, agus ní mór d’údaráis phoiblí freagairt ar na moltaí sin le plean cur chun feidhme beartaithe (276). Má mhainníonn an t-údarás lena mbaineann na moltaí a chur chun feidhme, ní mór dó an Coimisiún a chur ar an eolas faoin méid sin (277), agus féadfaidh an Coimisiún an mhainneachtain sin a nochtadh don Tionól Náisiúnta, ar a sheal, agus/nó í a phoibliú. De réir an uiríll oifigiúil ó rialtas na Cóiré, (roinn 2.3.5 d’Iarscríbhinn II), comhlíonann údaráis na Cóiré moltaí NGRC i gcoitinne agus tá spreagadh láidir acu amhlaidh a dhéanamh toisc go ndearnadh measúnú ar chur chun feidhme na moltaí sin mar chuid de mheastóireacht ghinearálta, leanúnach faoi údarás Oifig an Phríomh-Aire. Léirítear le figiúirí bliantúla maidir lena chuid gníomhaíochtaí go bhfuil formhaoirseacht ghníomhach á déanamh ag NHRC ar ghníomhaíochtaí na n-údarás forfheidhmithe dlí choiriúil, ar bhonn achainíocha nó trí bhíthin imscrúduithe ex officio (278).

(173)

Ar an gceathrú dul síos, is é BAI a dhéanann formhaoirseacht ghinearálta ar dhlíthiúlacht ghníomhaíochtaí na n-údarás poiblí, agus déanann BAI scrúdú ar ioncam agus ar chaiteachas an Stáit, ach freisin, ar bhonn níos ginearálta, déanann sé formhaoirseacht ar chomhlíonadh a ndualgas ag údaráis phoiblí d’fhonn feabhas a chur ar oibriú an riaracháin phoiblí (279). Tá BAI bunaithe go foirmiúil faoi Uachtarán Phoblacht na Cóiré, ach tá stádas neamhspleách aige fós i leith a chuid dualgas (280). Ina theannta sin, deonaítear neamhspleáchas iomlán dó i leith na baill foirne aige a cheapadh, a dhífhostú agus a eagrú, agus i leith a bhuiséad a thiomsú (281). Tá BAI comhdhéanta de Chathaoirleach (arna cheapadh ag an Uachtarán, le toiliú an Tionóil Náisiúnta) (282) agus de sheisear coimisinéirí (arna gceapadh ag an Uachtarán ar mholadh an Chathaoirligh) (283), agus ní mór dóibh cáilíochtaí sonracha a leagtar síos le dlí a chomhlíonadh (284) agus ní fhéadfar iad a dhífhostú ach i gcás táinsimh, pianbhreith príosúnachta á cur orthu nó i gcás nach mbeidh ar a gcumas a ndualgais a fheidhmiú de dheasca laige mheabhrach nó fhisiciúil fhadtéarmach (285). Déanann BAI iniúchadh ginearálta ar bhonn bliantúil ach féadfaidh sé iniúchtaí sonracha a dhéanamh freisin ar nithe is údar spéise ar leith iad. Agus iniúchadh nó cigireacht á dhéanamh nó á déanamh ag BAI, féadfaidh sé a iarraidh go gcuirfear doiciméid faoina bhráid agus go dtiocfaidh daoine aonair ina láthair (286). Féadfaidh BAI moltaí a eisiúint, gníomhaíochtaí araíonachta a iarraidh nó gearán coiriúil a chomhdú (287).

(174)

Ar deireadh, déanann an Tionól Náisiúnta formhaoirseacht pharlaiminteach ar údaráis phoiblí trí imscrúduithe agus trí chigireachtaí (288) ar a gcuid gníomhaíochtaí (289). Féadfaidh an Tionól iarraidh go nochtfar doiciméid, iallach a chur ar fhinnéithe teacht ina láthair (290), bearta ceartaitheacha a mholadh (má thagann sé ar an gconclúid gur tharla gníomhaíochtaí neamhdhleathacha nó míchuí) (291) agus torthaí na gconclúidí aige a chur ar fáil go poiblí (292). I gcás ina n-iarrfaidh an Tionól Náisiúnta go ndéanfar bearta ceartaitheacha – a bhféadfar a áireamh leo, mar shampla, cúiteamh a dhámhachtain, gníomhaíocht araíonachta a dhéanamh nó feabhas a chur ar nósanna imeachta inmheánacha – ceanglaítear ar an údarás poiblí lena mbaineann gníomhú gan mhoill agus tuairisciú maidir leis an toradh don Tionól Náisiúnta (293).

(175)

Cuirtear bealaí éagsúla (breithiúnacha) ar fáil le córas na Cóiré chun sásamh a fháil, lena n-áirítear cúiteamh as damáistí.

(176)

Ar dtús, le PIPA tugtar ceart rochtana, ceartúcháin, scriosta nó fionraí do dhaoine aonair i leith faisnéis phearsanta arna próiseáil chun críocha fhorfheidhmiú an dlí choiriúil (294).

(177)

Ar an dara dul síos, is féidir le daoine aonair úsáid a bhaint as na sásraí éagsúla sásaimh atá le fáil faoi PIPA más rud é gur phróiseáil údarás forfheidhmithe dlí choiriúil a gcuid sonraí de shárú ar PIPA nó de shárú ar na teorannuithe agus ar na coimircí lena rialaítear bailiú sonraí pearsanta i ndlíthe eile (i.e. CPA nó CPPA, féach aithris (171)). Go háirithe, féadfaidh daoine aonair gearán a thaisceadh le PIPC (lena n-áirítear tríd an Lárionad do Ghlaonna Príobháideachais atá á oibriú ag Gníomhaireacht na Cóiré um an Idirlíon agus Slándáil (295)) nó leis an gCoiste um Idirghabháil Díospóidí maidir le Faisnéis Phearsanta (296). Níl na féidearthachtaí sásaimh sin faoi réir ceanglas breise maidir le hinghlacthacht. Ar bhonn an Achta um Dhlíthíocht Riaracháin, féadfaidh daoine aonair, ina theannta sin, achomharc a dhéanamh in aghaidh chinntí nó easpa gníomhaíochta ag PIPC nó dúshlán a thabhairt dóibh (féach aithris (132)).

(178)

Ar an tríú dul síos, féadfaidh aon duine aonair (297) gearán a thaisceadh le NHRC a bhaineann le sárú ar an gceart chun príobháideachais agus cosanta sonraí ag údarás forfheidhmithe dlí choiriúil den Chóiré. Féadfaidh NHRC a mholadh go gceartófar nó go gcuirfear feabhas ar aon reacht, institiúid, beartas nó cleachtas ábhartha (298), nó go gcuirfear réitigh chun feidhme amhail idirghabháil (299), scor den sárú ar chearta an duine, cúiteamh as damáistí agus bearta chun atarlú an tsáraithe céanna nó sáruithe comhchosúla a chosc (300). De réir an uiríll oifigiúil ó rialtas na Cóiré (roinn 2.4.2 d’Iarscríbhinn II), féadfar scriosadh sonraí pearsanta a bailíodh go neamhdhleathach a áireamh leis sin. Cé nach bhfuil sé de chumhacht ag NHRC cinntí ceangailteacha a eisiúint, tá bealach níos neamhfhoirmiúla le fáil uaidh chun sásamh a fháil, atá ar chostas íseal agus inrochtana go héasca, go háirithe toisc, mar a mhínítear in Iarscríbhinn II, roinn 2.4.2, nach gceanglaíonn sé go léireofar gortú iarbhír chun go ndéanfar imscrúdú ar ghearán (301). Áirithítear leis sin gur féidir imscrúdú a dhéanamh ar ghearáin ó dhaoine aonair a bhaineann le bailiú na sonraí dá gcuid, fiú mura bhfuil duine aonair in ann a léiriú gur bailíodh a c(h)uid sonraí iarbhír (e.g. toisc nár tugadh fógra don duine aonair fós). Léirítear le tuarascálacha bliantúla maidir le gníomhaíochtaí NHRC go bhfuil daoine aonair ag baint úsáide as an mbealach sin sa chleachtas freisin chun dúshlán a thabhairt do ghníomhaíochtaí na n-údarás forfheidhmithe dlí choiriúil, lena n-áirítear i leith sonraí pearsanta a láimhseáil (302). Mura mbeidh duine aonair sásta le toradh nós imeachta os comhair NHRC, féadfaidh sé nó sí dúshlán a thabhairt do chinntí NHRC (amhail cinneadh gan leanúint d’imscrúdú ar ghearán (303)) agus dá mholtaí os comhair chúirteanna na Cóiré faoin Acht um Dhlíthíocht Riaracháin (féach aithris (181)) (304). Thairis sin, is féidir le nós imeachta os comhair NHRC rochtain ar chúirteanna a éascú a thuilleadh, toisc go bhféadfadh duine aonair tuilleadh sásaimh a lorg in aghaidh an údaráis phoiblí a phróiseáil na sonraí dá c(h)uid go neamhdhleathach ar bhonn thorthaí NHRC, i gcomhréir leis na nósanna imeachta ar a dtugtar tuairisc in aithrisí (181)-(183).

(179)

Ar deireadh, tá réitigh bhreithiúnacha éagsúla ar fáil, lena gceadaítear do dhaoine aonair na teorannuithe agus na coimircí ar a dtugtar tuairisc i roinn 3.2.1 a ghairm chun sásamh a fháil (305).

(180)

I leith urghabhálacha (lena n-áirítear urghabhálacha sonraí), déanann CPA foráil maidir leis an bhféidearthacht agóid a dhéanamh in aghaidh fhorfheidhmiú barántais nó dúshlán a thabhairt dó trí “gar-ghearáin”, lena dtugtar caoi do dhaoine aonair, trí achainí a dhéanamh ar an gcúirt inniúil á iarraidh go gcuirfí diúscairt ar ceal nó go n-athrófaí diúscairt arna déanamh ag ionchúisitheoir nó ag póilín (306).

(181)

Ar bhonn níos ginearálta, féadfaidh daoine aonair dúshlán a thabhairt do ghníomhaíochtaí (307) nó do neamhghníomhaíochtaí (308) ag údaráis phoiblí (lena n-áirítear údaráis forfheidhmithe dlí choiriúil) faoin Acht um Dhlíthíocht Riaracháin (309). Meastar gur “diúscairt indúshláin” atá i ngníomhaíocht riaracháin más rud é go bhfuil tionchar díreach aige ar chearta agus ar dhualgais shibhialta (310), rud is amhlaidh, mar atá deimhnithe ag rialtas na Cóiré (roinn 2.4.3 d’Iarscríbhinn II) i dtaca le bearta chun sonraí pearsanta a bhailiú, bíodh sin go díreach (mar shampla trí chumarsáid a idircheapadh), trí iarrataí ceangailteacha maidir le nochtadh (mar shampla, do sholáthraí seirbhíse) nó iarrataí ar chomhar saorálach. Chun go mbeidh gearán faoin Acht um Dhlíthíocht Riaracháin inghlactha, ní mór leas dlíthiúil a bheith ag an duine aonair san éileamh a shaothrú (311). De réir chásdlí na Cúirte Uachtaraí, léirmhínítear “leas dlíthiúil” mar “leas a bhfuil cosaint dlí aige”, i.e. sainleas díreach atá cosanta le dlíthe agus le rialacháin ar a bhfuil diúscairtí riaracháin bunaithe (i.e. rud a chiallaíonn nach leasanna ginearálta, indíreacha agus teibí an phobail iad) (312). Tá leas dlíthiúil ag daoine aonair i gcás aon sáraithe ar na teorannuithe agus ar na coimircí a bhfuil feidhm acu maidir le bailiú na sonraí pearsanta dá gcuid chun críoch fhorfheidhmiú an dlí chóiriúil (faoi dhlíthe sonracha nó PIPA). Ar bhonn an Achta um Dhlíthíocht Riaracháin, féadfaidh cúirt cinneadh a dhéanamh diúscairt neamhdhleathach a chúlghairm nó a athrú, toradh a eisiúint lena suitear go bhfuil neamhniú ann (i.e. toradh lena suitear nach bhfuil éifeacht dhlíthiúil ag an diúscairt nó nach ann di sa dlíchóras) nó toradh a eisiúint lena suitear gur neamhdhleathach í neamhghníomhaíocht (313). Tá breithiúnas críochnaitheach faoin Acht um Dhlíthíocht Riaracháin ceangailteach ar na páirtithe (314).

(182)

I dteannta dúshlán a thabhairt do ghníomhaíocht an rialtais trí dhlíthíocht riaracháin, féadfaidh daoine aonair gearán bunreachtúil a chomhdú leis an gCúirt Bhunreachtúil freisin, maidir le haon sárú ar a gcearta bunúsacha de dheasca feidhmiú nó neamhfheidhmiú cumhachta rialtais (seachas breithiúnais na gcúirteanna) (315). Má tá réitigh eile le fáil, ní mór iad sin a ídiú ar dtús. De réir chásdlí na Cúirte Bunreachtúla, féadfaidh daoine nach náisiúnaigh iad gearán bunreachtúil a chomhdú a mhéid a aithnítear a gcearta bunúsacha faoi Bhunreacht na Cóiré (féach na mínithe i roinn 1.1) (316). Féadfaidh an Chúirt Bhunreachtúil a shuí gur neamhbhailí é an feidhmiú cumhachta rialtais ba shiocair leis an sárú nó a dheimhniú gur míbhunreachtúil é neamhghníomhaíocht áirithe. (317). Sa chás sin, ceanglaítear ar an údarás ábhartha bearta a dhéanamh chun cinneadh na Cúirte a chomhlíonadh.

(183)

Thairis sin, féadfaidh daoine aonair cúiteamh as damáistí a fháil os comhair chúirteanna na Cóiré. Áirítear leis sin ar dtús báire an fhéidearthacht chun cúiteamh a éileamh as sáruithe PIPA atá déanta ag údaráis forfheidhmithe dlí choiriúil, i gcomhréir le hAirteagal 39 (féach freisin aithris (135)). Ar bhonn níos ginearálta, féadfaidh daoine aonair iarratas a dhéanamh ar chúiteamh as damáistí a rinne oifigigh phoiblí de shárú ar an dlí le linn dóibh a ndualgais oifigiúla a fheidhmiú, ar bhonn an Achta um Chúiteamh Stáit (féach freisin aithris (135)) (318).

(184)

Leis na sásraí ar a dtugtar tuairisc in aithrisí (176) - (183) tugtar réitigh éifeachtacha riaracháin agus bhreithiúnacha d’ábhair sonraí, á chur ar a gcumas dóibh go háirithe a gcearta a fhorfheidhmiú, lena n-áirítear an ceart chun go mbeidh rochtain acu ar a sonraí pearsanta, nó chun ceartú nó léirscriosadh sonraí den sórt sin a bhaint amach.

(185)

I ndlí Phoblacht na Cóiré tá roinnt teorannuithe agus coimircí i leith rochtain agus úsáid sonraí pearsanta chun críocha slándála náisiúnta, agus soláthraítear sásraí formhaoirseachta agus sásaimh leis atá i gcomhréir leis na ceanglais dá dtagraítear in aithrisí (141) go (143) den Chinneadh seo. Déantar measúnú mionsonraithe sna ranna a leanas ar na coinníollacha faoinar féidir le rochtain den sórt sin tarlú agus ar na coimircí is infheidhme maidir le húsáid na gcumhachtaí sin.

(186)

I bPoblacht na Cóiré, féadfar sonraí pearsanta a rochtain chun críocha slándála náisiúnta ar bhonn CPPA, TBA agus ar bhonn an Achta um Chomhrac in aghaidh na Sceimhlitheoireachta ar mhaithe le Cosaint Saoránach agus Slándáil Phoiblí (An tAcht Frithsceimhlitheoireachta) (319). Is é An tSeirbhís Náisiúnta Faisnéise (NIS) an príomhúdarás (320) ag a bhfuil inniúlachtaí i réimse na slándála náisiúnta (321). Ní mó do bhailiú agus d’úsáid sonraí pearsanta ag NIS ceanglais dhlíthiúla ábhartha a chomhlíonadh (lena n-áirítear PIPA agus CPPA) (322) agus treoirlínte ginearálta arna n-ullmhú ag an Uachtarán agus a ndéanann an Tionól Náisiúnta athbhreithniú orthu (323). Mar phrionsabal ginearálta, ní mór do NIS fanacht neodrach i dtaobh na polaitíochta de agus saoirse agus cearta daoine aonair a chosaint. (324) Ina theannta sin, ní fhéadfaidh baill foirne NIS iallach a chur ar aon institiúid, eagraíocht nó duine aonair aon rud a dhéanamh nach bhfuil oibleagáid orthu a dhéanamh, ná bac a chur ar fheidhmiú a c(huid) ceart ag aon duine, trí mhí-úsáid a bhaint as a n-údarás oifigiúil (325).

(187)

Ar bhonn CPPA, féadfaidh údaráis phoiblí na Cóiré (326) sonraí deimhnithe cumarsáide a bhailiú (i.e. dáta na teileachumarsáide, am tosaithe agus am críochnaithe, an líon glaonna amach agus ag teacht isteach chomh maith le huimhir síntiúsóra an pháirtí eile, an mhinicíocht úsáide, comhaid loga maidir le húsáid na seirbhísí teileachumarsáide agus faisnéis suímh, féach aithris (155)) agus inneachar na cumarsáide (trí bhearta a chuireann srianta le cumarsáid, féach aithris (155)) chun críocha slándála náisiúnta (mar a chinntear le sainordú NIS, féach fonóta 322 níos luaithe). Baineann na cumhachtaí sin le dhá chineál faisnéise: (1) cumarsáid inar náisiúnaigh den Chóiré iad páirtí amháin nó an bheirt pháirtí inti (327); agus (2) cumarsáid ag tíortha atá naimhdeach le Poblacht na Cóiré, b) gníomhaireachtaí eachtracha, grúpaí nó náisiúnaigh a bhfuil amhras ina leith go mbíonn siad i mbun gníomhaíochtaí in aghaidh na Cóiré (328), nó c) baill de ghrúpaí atá ag oibriú laistigh de Leithinis na Cóiré ach atá lasmuigh de cheannasacht Phoblacht na Cóiré go héifeachtach agus dá scáthghrúpaí a bhfuil a mbunáit i dtíortha eachtracha (329). Maidir le cumarsáid daoine aonair den Aontas a aistrítear ón Aontas chuig Poblacht na Cóiré ar bhonn an Chinnidh sin, ní féidir an chumarsáid sin a bhailiú dá bhrí sin ach amháin faoi CPPA chun críocha slándála náisiúnta (faoi réir na gcoinníollacha a leagtar amach in aithris (188) - (192)) más rud é gur cumarsáid í atá idir duine aonair den Aontas agus náisiúnach den Chóiré, nó, má bhaineann an chumarsáid le cumarsáid atá idir náisiúnaigh nach náisiúnaigh den Chóiré iad, agus eatarthu siúd amháin, tagann an chumarsáid sin faoi réim ceann amháin de na trí chatagóir a luaitear 2a), b) agus c).

(188)

Sa dá staid sin, ní fhéadfar sonraí deimhnithe cumarsáide a bhailiú ach amháin chun bagairtí don tslándáil náisiúnta a chosc (330) agus ní fhéadfar bearta a chuireann srianta le cumarsáid a dhéanamh ach amháin i gcás ina mbeidh an tslándáil náisiúnta i gcontúirt mhór agus go bhfuil gá le bailiú na sonraí sin chun an chontúirt sin a chosc (331). Ina theannta sin, ní fhéadfar inneachar cumarsáide a rochtain ach mar rogha dheireanach agus ní mór iarrachtaí a dhéanamh chun an sárú ar phríobháideachas na cumarsáide a íoslaghdú (332), á áirithiú leis sin go mbeidh sé comhréireach i gcónaí le cuspóir na slándála náisiúnta atá á shaothrú. Ní fhéadfar leanúint de bhailiú inneachair cumarsáide ná sonraí deimhnithe cumarsáide araon ach ar feadh uastréimhse 4 mhí agus, má ghnóthaítear an cuspóir a saothraíodh níos luaithe, ní mór éirí as an mbailiúchán láithreach (333). Más rud é go gcomhlíontar na coinníollacha ábhartha fós, féadfar síneadh a chur leis an tréimhse, le cead roimh ré ó chúirt (le haghaidh na mbeart ar a dtugtar tuairisc in aithris (189)) nó ón Uachtarán (le haghaidh na mbeart ar a dtugtar tuairisc in aithris (190)) (334), ar feadh 4 mhí ar a mhéad.

(189)

Tá feidhm ag na coimircí céanna ó thaobh nósanna imeachta de maidir le sonraí deimhnithe cumarsáide agus inneachar cumarsáide araon a bhailiú (335). Go háirithe, i gcás inar náisiúnach den Chóiré duine amháin ar a laghad de na daoine atá páirteach sa chumarsáid, ní mór don ghníomhaireacht faisnéise iarraidh i scríbhinn a chur faoi bhráid Oifig an Ard-Ionchúisitheora, nach mór di sin faoi seach iarratas a dhéanamh ar bharántas ó Ard-Bhreitheamh sinsearach den Ard-Chúirt (336). Liostaítear le CPPA an fhaisnéis nach mór a sholáthar san iarraidh chuig an Ionchúisitheoir, san iarratas ar an mbarántas agus sa bharántas féin, lena n-áirítear, go háirithe, an bonn cirt atá leis an iarraidh agus na príomhfhorais amhrais, ábhair tacaíochta, mar aon le faisnéis maidir le cuspóir, sprioc (i.e. an duine/na daoine ar a ndírítear), raon feidhme agus fad an bhirt atá beartaithe (337). Ní fhéadfar bailiú gan bharántas a dhéanamh ach amháin i gcás inarb ann do ghníomhaíocht comhcheilge ar bagairt don tslándáil náisiúnta í agus inarb ann d’éigeandáil lena bhfágtar nach féidir déanamh de réir na nósanna imeachta réamhluaite (338). Mar sin féin, sa chás sin freisin, ní mór iarratas ar bharántas a chomhdú láithreach i ndiaidh an beart a dhéanamh (339). Le CPPA dá bhrí sin, sainmhínítear go soiléir raon agus coinníollacha na gcineálacha sin de bhailiú, agus cuirtear faoi réir coimircí sonracha iad (nósanna imeachta) (lena n-áirítear formheas breithiúnach roimh ré), lena n-áirithítear go mbeidh úsáid na mbeart sin teoranta don mhéid is gá agus atá comhréireach. Thairis sin, fágann an ceanglas chun faisnéis mhionsonraithe a sholáthar san iarratas ar bharántas agus sa bharántas féin, go gcuirtear as an áireamh fhéidearthacht na rochtana neamh-idirdhealaithí.

(190)

Le haghaidh na cumarsáide idir náisiúnaigh nach náisiúnaigh den Chóiré iad ar cumarsáid í a thagann faoi réim ceann amháin de na trí chatagóir shonracha a liostaítear in aithris (187), ní mór iarratas a chomhdú le Stiúrthóir NIS, nach mór dó, tar éis athbhreithniú a dhéanamh ar a iomchuí atá na bearta atá beartaithe, formheas scríofa roimh ré a iarraidh ó Uachtarán Phoblacht na Cóiré (340). Ní mór an fhaisnéis mhionsonraithe chéanna a áireamh san iarratas a ullmhóidh an ghníomhaireacht faisnéise agus a bheidh in iarratas ar bharántas cúirte (féach aithris (189)), go háirithe an bonn cirt atá leis an iarraidh agus na príomhfhorais amhrais, ábhair tacaíochta agus faisnéis maidir le cuspóir, an duine/na daoine ar a ndírítear, raon feidhme agus fad na mbeart atá á mbeartú (341). I gcásanna éigeandála (342), ní mór formheas roimh ré a fháil ón Aire faoina bhfuil an ghníomhaireacht faisnéise ábhartha, cé nach mór don ghníomhaireacht faisnéise iarratas a dhéanamh ar fhormheas an Uachtaráin láithreach tar éis do na bearta éigeandála a bheith déanta (343). Freisin i leith bhailiú na cumarsáide idir náisiúnaigh nach náisiúnaigh den Chóiré iad agus eatarthu siúd amháin, teorannaíonn CPPA úsáid na mbeart sin don mhéid is gá agus atá comhréireach dá bhrí sin, trí na catagóirí teoranta daoine aonair, a fhéadfaidh a bheith faoi réir bearta den sórt sin, a imscríobh go soiléir agus trí chritéir mhionsonraithe a leagan síos a mbeidh ar ghníomhaireachtaí faisnéise iad a léiriú chun bonn cirt a thabhairt le hiarratas ar fhaisnéis a bhailiú. Thairis sin, cuirtear féidearthacht na rochtana neamh-idirdhealaithí as an áireamh arís leis sin. Cé nach ann d’aon fhormheas neamhspleách roimh ré maidir le bearta den sórt sin, áirithítear formhaoirseacht neamhspleách ex post le, go háirithe, PIPC agus NHRC (féach mar shampla aithrisí (199) - (200)).

(191)

Thairis sin forchuirtear le CPPA roinnt coimircí breise lena rannchuidítear le formhaoirseacht ex post agus lena ndéantar rochtain daoine aonair ar réitigh éifeachtacha a éascú. Ar dtús, i leith aon chineál bailithe chun críocha slándála náisiúnta, déantar foráil le CPPA maidir le ceanglais éagsúla a bhaineann le taifid a choimeád agus le tuairisciú. Go háirithe, agus comhar á iarraidh ar oibreoirí príobháideacha, ní mór do ghníomhaireachtaí faisnéise an barántas cúirte/cead uachtaráin nó cóip den chlúdach ar ráiteas cinsireachta éigeandála a sholáthar dóibh, agus ní mór don eintiteas ar ar cuireadh iallach é sin a choimeád ina gcuid comhad (344). I gcás ina gcuirfear iallach ar oibreoirí príobháideacha dul i gcomhar, ní mór don údarás poiblí iarrthach agus don oibreoir ábhartha araon taifid a choimeád maidir le cuspóir agus críoch na mbeart, mar aon le dáta a bhforfheidhmithe (345). Ina theannta sin, ní mór do ghníomhaireachtaí faisnéise tuarascáil maidir leis an bhfaisnéis a bhailigh siad agus le toradh na gníomhaíochta faireachais a chur faoi bhráid Stiúrthóir NIS (346).

(192)

Ar an dara dul síos, ní mór daoine aonair a chur ar an eolas faoi bhailiú na sonraí dá gcuid (sonraí deimhnithe cumarsáide nó inneachar cumarsáide) chun críocha slándála náisiúnta más rud é go mbaineann na sonraí le cumarsáid inar náisiúnach den Chóiré duine amháin de na páirtithe ar a laghad (347). Ní mór an fógra sin a sholáthar i scríbhinn laistigh de 30 lá ón dáta ar ar cuireadh críoch leis an mbailiú (lena n-áirítear i gcás ina bhfuarthas na sonraí i gcomhréir leis an nós imeachta éigeandála) agus ní fhéadfar an fógra sin a iarchur ach amháin más rud é go gcuirfeadh sé an tslándáil náisiúnta i gcontúirt nó go ndéanfadh sé díobháil do shaol agus do shábháilteacht fhisiciúil daoine, agus fad a dhéanfadh sé amhlaidh (348). Gan beann ar fhógra den sórt sin, féadfaidh daoine aonair sásamh a fháil trí bhealaí éagsúla, mar a mhínítear ar bhealach níos mionsonraithe i roinn 3.3.4.

(193)

Déantar foráil leis an Acht Frithsceimhlitheoireachta go bhféadfaidh NIS sonraí a bhailiú ar amhrastaigh sceimhlitheoireachta (349) i gcomhréir leis na teorannuithe agus leis na coimircí a leagtar síos i ndlíthe eile (350). Go háirithe, féadfaidh NIS sonraí cumarsáide a fháil (ar bhonn CPPA) agus faisnéis phearsanta eile (trí iarraidh ar nochtadh saorálach) (351). I leith faisnéis chumarsáide a bhailiú (i.e. inneachar cumarsáide nó sonraí deimhnithe cumarsáide), tá feidhm ag na teorannuithe agus ag na coimircí ar a dtugtar tuairisc i roinn 3.3.1.1, lena n-áirítear an ceanglas chun barántas a bheidh formheasta ag cúirt a fháil. A mhéid a bhaineann le hiarrataí maidir le nochtadh saorálach cineálacha eile sonraí pearsanta ó amhrastaigh sceimhlitheoireachta, ní mór do NIS na ceanglais faoin mBunreacht agus faoi PIPA a chomhlíonadh maidir le riachtanas agus le comhréireacht (féach aithris (164)) (352). Féadfaidh rialaitheoirí a fhaigheann iarrataí den sórt sin iad a chomhlíonadh ar bhonn saorálach faoi na coinníollacha a leagtar amach in PIPA (mar shampla i gcomhréir le prionsabal an íoslaghdaithe sonraí agus tríd an tionchar ar phríobháideachas an duine aonair a theorannú) (353). Sa chás sin, ní mór dóibh an ceanglas a chomhlíonadh freisin a bhaineann le fógra a thabhairt don duine aonair bunaithe ar Fhógra Uimh. 2021-5 (féach aithris (166)).

(194)

Ar bhonn TBA, féadfaidh oibreoirí gnó teileachumarsáide sonraí síntiúsóirí a nochtadh go saorálach (féach aithris (163)) ar iarraidh a fháil ó ghníomhaireacht faisnéise a bheartaíonn an fhaisnéis sin a bhailiú chun bagairt don tslándáil náisiúnta a chosc (354). Maidir le hiarrataí den sórt sin ó NIS, tá feidhm ag na teorannuithe céanna (ag leanúint ón mBunreacht, PIPA agus TBA) agus atá i réimse fhorfheidhmiú an dlí chóiriúil, mar a leagtar amach in aithris (164) (355). Ní cheanglaítear ar sholáthraithe teileachumarsáide iarrataí den sórt sin a chomhlíonadh agus ní féidir leo amhlaidh a dhéanamh ach amháin faoi na coinníollacha a leagtar amach in PIPA (go háirithe i gcomhréir leis an bprionsabal íoslaghdaithe sonraí agus tríd an tionchar ar phríobháideachas an duine aonair a theorannú, féach freisin aithris (193)). Tá feidhm ag na ceanglais chéanna i leith taifid a choimeád agus fógra a thabhairt don duine aonair lena mbaineann agus atá i réimse fhorfheidhmiú an dlí chóiriúil (féach aithris (165) agus (166)).

(195)

Tá próiseáil sonraí pearsanta a bhailíonn údaráis na Cóiré chun críoch slándála náisiúnta faoi réir na bprionsabal maidir le teorannú de réir cuspóra (Airteagal 3(1)-(2) de PIPA), dlíthiúlacht agus cothroime na próiseála (Airteagal 3(1) de PIPA), comhréireacht/íoslaghdú sonraí (Airteagail 3(1), (6) agus 58 de PIPA), cruinneas (Airteagal 3(3) de PIPA), trédhearcacht (Airteagal 3(5) de PIPA), slándáil (Airteagal 58(4) de PIPA) agus teorannú stórála (Airteagal 58(4) de PIPA) (356). Ní féidir nochtadh féideartha sonraí pearsanta do thríú páirtithe (lena n-áirítear tríú tíortha) tarlú ach amháin i gcomhréir leis na prionsabail sin (go háirithe teorannú de réir cuspóra agus íoslaghdú na sonraí), tar éis do mheasúnú a bheith déanta ar chomhlíonadh phrionsabail an riachtanais agus na comhréireachta (Airteagal 37(2) den Bhunreacht) agus an tionchar ar chearta na ndaoine aonair lena mbaineann á chur san áireamh (Airteagal 3(6) de PIPA).

(196)

Maidir le hinneachar na cumarsáide agus na sonraí deimhnithe cumarsáide, cuireann an CPPA srian breise le húsáid na sonraí sin d’imeachtaí breithiúnacha, ina mbraitheann páirtí a ghabhann leis an gcumarsáid orthu i gcaingean chun cúiteamh a ghnóthú; nó d’úsáidí ceadaithe de réir dlíthe eile (357).

(197)

Déanann comhlachtaí difriúla maoirseacht ar ghníomhaíochtaí údaráis slándála na Cóiré (358).

(198)

Ar dtús, foráiltear san Acht Frithsceimhlitheoireachta maidir le sásraí maoirseachta sonracha le haghaidh gníomhaíochtaí frithsceimhlitheoireachta, lena n-áirítear bailiú sonraí faoi amhrastaigh sceimhlitheoireachta. Go sonrach, ar leibhéal an fheidhmeannaigh, is é an Coimisiún Frithsceimhlitheoireachta a fhormhaoirsíonn na gníomhaíochtaí frithsceimhlitheoireachta (359), nach foláir do Stiúrthóir an NIS tuairisciú dó i leith imscrúduithe agus rianú na n-amhrastach sceimhlitheoireachta chun faisnéis a bhailiú faoi ábhair is gá do ghníomhaíochtaí frithsceimhlitheoireachta (360). Ina theannta sin, is é Oifigeach Cosanta Chearta an Duine (HRPO) a fhormhaoirsíonn go sonrach comhlíontacht na ngníomhaíochtaí frithsceimhlitheoireachta le cearta bunúsacha (361). Is é Cathaoirleacht an Choimisiúin Frithsceimhlitheoireachta a cheapann an HPRO as measc daoine aonair a shásaíonn cáilíochtaí sonracha a liostaítear san Fhoraithne um Fhorfheidhmiú an Achta Frithsceimhlitheoireachta (362) go ceann téarma 2 bhliain (in-athnuaite), agus ní féidir é nó í a bhaint as oifig ach amháin ar fhorais atá sonrach agus teoranta, agus ar chúis mhaith (363). Agus a fheidhm nó a feidhm formhaoirseachta á fheidhmiú nó á feidhmiú aige nó aici, féadfaidh an HPRO moltaí ginearálta a eisiúint chun feabhas a chur le cearta an duine a chosaint (364) moltaí sonracha a eisiúint le haghaidh bearta ceartaitheacha má shuitear gurb ann do shárú ar chearta an duine (365). Éilítear ar údaráis phoiblí an HPRO a chur ar an eolas faoi na bearta leantacha a cuireadh i gcrích dá mholtaí nó dá moltaí (366).

(199)

Ar an dara dul síos, formhaoirsíonn an PIPC comhlíontacht na n-údarás slándála náisiúnta le rialacha um chosaint sonraí, lena lena n-áirítear idir na forálacha PIPA is infheidhme (féach aithris (149)) agus na teorannuithe agus na coimircí arb fheidhme iad ar bhailiú sonraí pearsanta faoi dhlíthe eile (an CPPA, an tAcht Frithsceimhlitheoireachta agus an TBA, féach freisin aithris (171)) (367). Agus an ról maoirseachta sin á fheidhmiú aige, féadfaidh PIPC úsáid a bhaint as a chumhachtaí imscrúdúcháin agus feabhais uile, mar a thugtar tuairisc orthu i roinn 2.4.2.

(200)

Ar an tríú dul síos, tá gníomhaíochtaí na n-údarás slándála náisiúnta faoi réir mhaoirseacht neamhspleách an NHRC, i gcomhréir leis na nósanna imeachta a thuairiscítear in aithris (172) (368).

(201)

Ar an gceathrú dul síos, síneann feidhm formhaoirseachta an BAI chuig údaráis slándála náisiúnta, cé go bhféadann an NIS diúltú, in imthosca eisceachtúla, faisnéis nó ábhair áirithe a chur ar fáil, i.e. nuair is rúin stáit atá iontu, agus go mbeadh tionchar tromchúiseach ann don tslándáil náisiúnta dá gcuirfí an pobal ar an eolas fúthu (369).

(202)

Ar deireadh, is é an Tionól Náisiúnta (trí Shainchoiste Faisnéise) a dhéanann formhaoirseacht pharlaiminteach ar ghníomhaíochtaí an NIS (370). Bunaítear ról formhaoirseachta sonrach leis an CPPA don Tionól Náisiúnta i dtaca le húsáid bearta a chuireann srianta le cumarsáid chun chun críocha slándála náisiúnta (371). Go háirithe, féadann an Tionól Náisiúnta cigireachtaí ar an láthair a dhéanamh ar threalamh cúléisteachta agus féadann sé a cheangal ar an NIS agus ar na hoibreoirí teileachumarsáide a bhfuil inneachar na cumarsáide nochta acu araon tuairisciú faoi sin. Féadann an Tionól Náisiúnta a fheidhmeanna formhaoirseachta ginearálta a dhéanamh freisin (i gcomhréir leis na nósanna imeachta a thuairiscítear in aithris (174)). Ceanglaítear leis an Acht NIS ar Stiúrthóir an NIS freagairt gan mhoill nuair a iarrann an Coiste Faisnéise tuairisc faoi ábhar sonrach (372), le rialacha sonracha le haghaidh faisnéis áirithe a mbaineann íogaireacht ghéar léi. Go praiticiúil, ní féidir le Stiúrthóir an NIS a dhiúltú freagairt nó fianaise a thabhairt os comhair an Choiste ach amháin in imthosca eisceachtúla, i.e. má bhaineann an iarraidh le rúin stáit maidir le saincheisteanna míleata, taidhleoireachta nó i ndáil leis an gCóiré Thuaidh a mbeadh tionchar tromchúiseach ann do “chinniúint náisiúnta” na tíre dá gcuirfí an pobal ar an eolas fúthu (373). Sa chás sin, féadann an Coiste Faisnéise míniú ón bPríomh-Aire a iarraidh agus, mura gcuirtear aon mhíniú ar fáil laistigh de 7 lá, ní féidir diúltú don fhreagairt ná don fhianaise.

(203)

I réimse na slándála náisiúnta freisin, cuireann an córas Cóiréach bealaí difriúla (breithiúnacha) ar fáil le sásamh a fháil, lena n-áirítear cúiteamh as damáistí. Tugtar leigheasanna riaracháin agus breithiúnacha éifeachtacha d’ábhair sonraí leis na sásraí sin, a chuireann ar a gcumas dóibh go háirithe a gcuid ceart a fhorfheidhmiú, lena n-áirítear an ceart chun rochtain a dhéanamh ar a gcuid sonraí pearsanta, nó chun ceartú nó léirscriosadh na sonraí sin a fháil.

(204)

Ar an gcéad dul síos, de bhun Airteagail 3(5) agus 4(1), (3) agus (4) PIPA, is féidir le daoine aonair a gcearta rochtana, ceartaithe, scriosta agus fionraíochta a fheidhmiú vis-à-vis údaráis slándála náisiúnta. Soiléirítear a thuilleadh i roinn 6 d’Fhógra Uimh. 2021-5 (Iarscríbhinn I a ghabhann leis an gCinneadh seo) an chaoi a bhfuil feidhm ag na cearta sin i gcomhthéacs na próiseála sonraí chun críocha slándála náisiúnta. Go háirithe, ní féidir le húdarás slándála náisiúnta srian a chur le feidhmiú an chirt ná diúltú don fheidhmiú sin ach amháin a mhéid is gá agus a fhad is gá agus go comhréireach chun cuspóir tábhachtach leas an phobail a chosaint (mar shampla a mhéid, agus a fhad a chuirfeadh deonú an chirt sin imscrúdú leanúnach i mbaol nó a bhagródh sé don tslándáil náisiúnta), nó i gcás ina bhféadfadh deonú an chirt a bheith ina chúis le damáiste do bheatha nó do chorp trí páirtí. Dá bhrí sin, má ghairtear srian mar sin, éilítear cothromaíocht a bhaint amach idir cearta agus leasanna an duine aonair in aghaidh an leasa phoiblí ábhartha, agus ní fhéadfaidh sé difear a dhéanamh ar chaoi ar bith d’éirim an chirt (Airteagal 37(2) den Bhunreacht). I gcás ina ndiúltófar an iarraidh nó ina teorainn srian léi, ní mór fógra a thabhairt don duine aonair faoi na cúiseanna leis gan mhoill.

(205)

Ar an dara dul síos, tá ceart ag daoine aonair sásamh a fháil faoi PIPA má phróiseáil údarás slándála náisiúnta a gcuid sonraí de shárú ar PIPA nó ar na srianta agus coimircí i ndlíthe eile lena rialaítear bailiú sonraí pearsanta (go háirithe an CPPA, féach aithris (171)) (374). Is féidir an ceart sin a fheidhmiú trí ghearán chuig an PIPC (lena n-áirítear trí mheán an Lárionaid Glaonna um Príobháideachas arna oibriú ag Gníomhaireacht Idirlín agus Slándála na Cóiré) (375). Thairis sin, chun éascú do rochtain níos éasca ar shásamh in aghaidh údaráis slándála náisiúnta na Cóiré, is féidir le daoine aonair ón Aontas gearán a chuir isteach chuig an PIPC trína n-údarás náisiúnta um chosaint sonraí (376). Sa chás sin, tabharfaidh an PIPC fógra don duine aonair tríd an údarás náisiúnta um chosaint sonraí nuair a bheidh an t-imscrúdú tugtha i gcrích (lena n-áirítear, de réir mar is infheidhme, faisnéis faoi na bearta ceartaitheacha a fhorchuirtear). Ar bhonn an Achta um Dhlíthíocht Riaracháin, féadfaidh daoine aonair, ina theannta sin, achomharc a dhéanamh in aghaidh chinntí nó easpa gníomhaíochta ag PIPC nó dúshlán a thabhairt dóibh (féach aithris (132)).

(206)

Ar an tríú dul síos, is féidir le daoine gearán a chur faoi bhráid an HRPO maidir leis an sárú dá gceart ar phríobháideachas/chosaint sonraí i gcomhthéacs na ngníomhaíochtaí frithsceimhlitheoireachta (i.e. de bhun an Achta Frithsceimhlitheoireachta) (377), ar féidir leis nó léi gníomhaíocht cheartaitheach a mholadh. Óir nach ann d’aon cheanglas inghlacthachta os comhair an HRPO, láimhseálfar gearán fiú féin nach féidir leis an duine aonair lena mbaineann a léiriú go ndearnadh díobháil dó nó di go hiarbhír (mar shampla mar gheall ar bhailiú neamhdhleathach líomhnaithe a cuid sonraí nó a chuid sonraí ag údarás slándála náisiúnta) (378). Ní mór don údarás ábhartha an HRPO a chur ar an eolas faoi aon bheart a glacadh lena mholtaí nó lena moltaí a chur chun feidhme.

(207)

Ar an gceathrú dul síos, is féidir le daoine aonair gearán a chur faoi bhráid an NHRC maidir le bailiú a gcuid sonraí ag údaráis slándála náisiúnta agus sásamh a fháil i gcomhréir leis an nós imeachta a dtugtar tuairisc orthu in aithris (178) (379).

(208)

Ar deireadh, tá leigheasanna breithiúnacha difriúla ar fáil (380), a ligeann do dhaoine aonair na srianta agus na coimircí a dtugtar tuairisc orthu i roinn 3.3.1 a ghairm le sásamh a fháil. Go háirithe, is féidir le daoine aonair agóid a thabhairt in aghaidh dhlíthiúlacht na ngníomhaíochtaí ag údaráis slándála náisiúnta ar bhonn an Achta um Dhlíthíocht Riaracháin (i gcomhréir leis an nós imeachta ar a dtugtar tuairisc in aithris (181) an Achta um an gCúirt Bhunreachtúil (féach aithris (182)). Ina theannta sin, féadfaidh siad cúiteamh a fháil as damáistí ar bhonn an Acht um Chúiteamh Stáit (ar a dtugtar tuairisc mhionsonraithe in aithris (183)).

(209)

Measann an Coimisiún go n-áirithíonn Poblacht na Cóiré – le PIPA, na sainrialacha is infheidhme maidir le hearnálacha áirithe (mar a rinneadh anailís orthu i Roinn 2) agus na coimircí breise a thugtar i bhFógra Uimh. 2021-5 (Iarscríbhinn I) – go n-áirithíonn sí leibhéal cosanta do na sonraí pearsanta arna n-aistriú ón Aontas Eorpach arb ionann go bunúsach é agus an leibhéal a ráthaítear le Rialachán (AE) 2016/679.

(210)

Thairis sin, measann an Coimisiún ar an iomlán, go gcuireann sásraí formhaoirseachta agus bealaí sásaimh i ndlí na Cóiré ar chumas do rialaitheoirí sa Chóiré sáruithe ar na rialacha cosanta sonraí a shainaithint agus aghaidh a thabhairt orthu ar bhealach praiticiúil agus leigheasanna dlí a thairiscint don ábhar sonraí le rochtain a dhéanamh ar a chuid sonraí pearsanta nó a cuid sonraí pearsanta, agus le ceartú nó léirscriosadh na sonraí sin a fháil ar deireadh thiar.

(211)

Ar deireadh, ar bhonn na faisnéise atá ar fáil faoi dhlíchóras na Cóiré, lena n-áirítear na huiríll, na forchinntithe agus na gealltanais ó rialtas na Cóiré a fhaightear in Iarscríbhinn II, measann an Coimisiún i gcás aon bhac ar chearta bunúsacha daoine aonair ar mhaithe le leas an phobail, go háirithe forfheidhmiú an dlí choiriúil agus cuspóirí slándála náisiúnta, ag údaráis phoiblí na Cóiré; a n-aistrítear sonraí pearsanta na ndaoine aonair sin ón Aontas Eorpach chuig Poblacht na Cóiré; go mbeidh an bac sin teoranta don mhéid a bhfuil gá leis go docht chun an cuspóir dlisteanach lena mbaineann a ghnóthú, agus gurb ann do chosaint dhlíthiúil éifeachtach in aghaidh na mbac sin.

(212)

Dá bhrí sin, i bhfianaise na gcinntí ón gCinneadh seo, ba cheart go gcinnfí go n-áirithíonn Poblacht na Cóiré leibhéal cosanta leormhaith de réir bhrí Airteagal 45 de Rialachán (AE) 2016/679, arna léirmhíniú i bhfianaise Chairt um Chearta Bunúsacha an Aontais Eorpaigh, le haghaidh sonraí pearsanta arna n-aistriú ón Aontas Eorpach chuig Poblacht na Cóiré chuig rialaitheoirí sonraí faisnéise pearsanta i bPoblacht na Cóiré faoi réir PIPA, cé is moite d’eagraíochtaí reiligiúnacha a mhéid a phróiseálann siad sonraí pearsanta ar mhaithe lena ngníomhaíochtaí misinéireachta; páirtithe polaitiúla a mhéid a phróiseálann siad sonraí pearsanta i gcomhthéacs ainmniú iarrthóirí agus rialaitheoirí atá faoi réir formhaoirseachta ag an gCoimisiún um Sheirbhísí Airgeadais le haghaidh faisnéis chreidmheasa phearsanta a phróiseáil de bhun an Achta um Fhaisnéise Chreidmheasa, a mhéid a phróiseálann siad an fhaisnéis sin.

(213)

Ceanglaítear ar Bhallstáit agus ar a gcuid orgán na bearta is gá a ghlacadh chun gníomhartha Institiúidí an Aontais a chomhlíonadh, de bharr go dtoimhdítear na gníomhartha sin a bheith dleathach agus go mbaineann iarmhairtí dlíthiúla leo dá réir nó go dtí go dtarraingítear siar iad, go neamhnítear i gcaingean le haghaidh neamhniú iad, nó go ndearbhaítear iad a bheith neamhbhailí tar éis tarchur le haghaidh breithiúnas tosaigh nó pléadáil neamhdhleathachta.

(214)

Dá dheasca sin, is ceangailteach ar gach orgán na mBallstát Airteagal a ndírítear orthu é cinneadh leordhóthanachta ón gCoimisiún a glacadh de bhun Airteagal 45(3) de Rialachán (AE) 2016/679, lena n-áirítear ar a n-údaráis mhaoirseacha neamhspleácha. Go háirithe, féadfaidh aistrithe ó rialaitheoir nó próiseálaí san Aontas Eorpach chuig rialaitheoirí i bPoblacht na Cóiré tarlú gan gá a bheith le haon údarú breise a fháil.

(215)

Ba cheart go gcuimhneofaí, de bhun Airteagal 58(5) de Rialachán (AE) 2016/679 agus mar a mhínigh an Chúirt Bhreithiúnais i mbreithiúnasSchrems (381), i gcás ina gceistíonn údarás náisiúnta um chosaint sonraí, lena n-áirítear ar fáil gearáin dó, comhoiriúnacht chinneadh leordhóthanachta ón gCoimisiún le cearta bunúsacha an duine aonair ar phríobháideachas agus cosaint sonraí, ní mór leigheas dlí a chur ar fáil sa dlí náisiúnta di chun na hagóidí sin a thabhairt os comhair cúirt náisiúnta, a d’fhéadfaí a cheangal uirthi tarchur a dhéanamh le haghaidh réamhbhreithiúnais chuig an gCúirt Bhreithiúnais (382).

(216)

I gcomhréir le cásdlí na Cúirte Breithiúnais, (383) agus mar a aithnítear in Airteagal 45(4) de Rialachán (AE) 2016/679, ba cheart don Choimisiún faireachán a dhéanamh go leanúnach ar fhorbairtí ábhartha sa tríú tír tar éis glacadh an chinnidh leordhóthanachta d’fhonn measúnú a dhéanamh cé acu a áirithíonn an tír go fóill nó nach n-áirithíonn leibhéal cosanta arb ionann go bunúsach é. Bíonn seiceáil mar sin de dhíth, in aon chás, nuair a fhaigheann an Coimisiún faisnéis óna dtagann amhras a bhfuil bunús maith leis ina leith sin.

(217)

Dá bhrí sin, ba cheart don Choimisiún ar bhonn leanúnach faireachán a dhéanamh ar an gcás i bPoblacht na Cóiré maidir leis an gcreat dlíthiúil agus an cleachtas iarbhír chun sonraí pearsanta a phróiseáil arna mheasúnú sa Chinneadh seo, lena n-áirítear comhlíontacht údaráis na Cóiré leis na huiríll, forchinntithe agus gealltanais atá in Iarscríbhinn II a ghabhann leis. Chun an próiseas sin a éascú, tugtar cuireadh d’údaráis na Cóiré eolas a chur ar an gCoimisiún go pras faoi fhorbairtí a bhaineann le hábhar an Chinnidh, maidir le próiseáil sonraí pearsanta ag oibreoirí gnólachta agus údaráis phoiblí, chomh maith leis na srianta agus coimircí is infheidhme maidir le rochtain ar shonraí pearsanta ag údaráis phoiblí.

(218)

Thairis sin, le cur ar chumas an Choimisiúin a fheidhm faireacháin a dhéanamh ar bhealach éifeachtach, ba cheart go gcuirfeadh na Ballstáit an Coimisiún ar an eolas faoi aon ghníomhaíocht ábhartha a ghlacann na húdaráis náisiúnta um chosaint sonraí, go háirithe fiosruithe nó gearáin ó ábhair sonraí AE maidir le haistriú sonraí pearsanta ón Aontas Eorpach chuig rialaitheoirí sonraí i bPoblacht na Cóiré. Ba cheart an Coimisiún a chur ar an eolas freisin faoi aon táscaire nach n-áirithítear an leibhéal cosanta riachtanach le gníomhaíochtaí údaráis phoiblí na Cóiré le freagracht as cosc, imscrúdú, brath nó ionchúiseamh na gcionta coiriúla, nó as an tslándáil náisiúnta, lena n-áirítear aon chomhlacht formhaoirseachta.

(219)

Agus Airteagal 45(3) de Rialachán (AE) 2016/679 (384) á chur i bhfeidhm, agus i bhfianaise an fhíorais go bhféadfadh athrú teacht ar leibhéal na cosanta a thugtar faoi dhlíchóras na Cóiré, ba cheart don Choimisiún, tar éis an Cinneadh seo a ghlacadh, athbhreithniú tréimhsiúil a dhéanamh cé acu atá bunús fíorasach agus dlíthiúil fós leis na cinntí maidir le leordhóthanacht an leibhéil cosanta arna áirithiú ag Poblacht na Cóiré nó nach bhfuil.

(220)

Chun na críche sin, ba cheart an Cinneadh seo a chur faoi réir chéad athbhreithniú laistigh de 3 bliana tar éis a theachta i bhfeidhm. Tar éis an chéad athbhreithnithe sin, agus ag brath ar a thoradh, déanfaidh an Coimisiún cinneadh i ndlúthchomhairle leis an gCoiste arna bhunú faoi Airteagal 93(1) de Rialachán (AE) 2016/679 ar cheart an timthriall 3 bliana a choiméad. In aon chás, ba cheart go dtarlódh na hathbhreithniithe ina dhiaidh sin uair amháin ar a laghad gach 4 bliana (385). Ba cheart go gcumhdófaí gach gné d’fheidhmiú an Chinnidh seo leis an athbhreithniú, agus go háirithecur i bhfeidhm na gcoimircí breise atá in Iarscríbhinn I a ghabhann leis an gCinneadh seo, le haird faoi leith á díriú ar na cosaintí a thugtar i gcás aistrithe ar aghaidh; forbairtí ábhartha sa chásdlí; na rialacha maidir le faisnéis faoi ainm bréige a phróiseáil chun críocha an staidrimh, an taighde eolaíochta agus cartlannaithe ar mhaithe le leas an phobail, chomh maith le cur i bhfeidhm na n-eisceachtaí faoi Airteagal 28(7) PIPA; éifeachtacht fheidhmiú chearta an duine aonair, lena n-áirítear roimh an PIPC a athchóiríodh le déanaí, agus cur i bhfeidhm eisceachtaí na gcearta sin; cur i bhfeidhm na ndíolúintí páirteacha faoi PIPA; chomh maith leis na srianta agus coimircí maidir le rochtain ag an rialtas (mar a leagtar amach in Iarscríbhinn II a ghabhann leis an gCinneadh seo), lena n-áirítear comhar PIPC le húdaráis chosanta sonraí an Aontais faoi ghearáin ó dhaoine aonair. Ba cheart go gcumhdófaí leis freisin éifeachtacht na formhaoirseachta agus an fhorfheidhmithe, maidir le PIPA agus i réimse fhorfheidhmiú an dlí choiriúil agus na slándála náisiúnta (go háirithe ag an PIPC agus an NHRC).

(221)

Leis an athbhreithniú a dhéanamh, ba cheart don Choimisiún bualadh leis an PIPC, faoi thionlacan i gcás inarb iomchuí údaráis eile na Cóiré ar a bhfuil freagracht as rochtain ag an rialtas, lena n-áirítear comhlachtaí formhaoirseachta ábhartha. Ba cheart go mbeadh an rannpháirtíocht sa chruinniú sin ar oscailt d’ionadaithe chomhaltaí an Bhoird Eorpaigh um Chosaint Sonraí. Faoi chuimsiú an athbhreithnithe, ba cheart don Choimisiún iarraidh ar an PIPC faisnéis chuimsitheach maidir le gach gné is ábhartha don chinneadh leordhóthanachta, lena n-áirítear maidir leis na srianta agus coimircí a bhaineann le rochtain ag an rialtas (386). Ba cheart don Choimisiún mínithe a lorg freisin maidir le haon fhaisnéis ábhartha don Chinneadh sin atá faighte aige, lena n-áirítear tuairiscí poiblí le húdaráis na Cóiré agus le páirtithe leasmhara eile sa Chóiré, leis an mBord Eorpach um Chosaint Sonraí, le húdaráis aonair maidir le cosaint sonraí, le grúpaí na sochaí shibhialta, le tuairiscí sna meáin, agus le haon fhoinse faisnéise atá ar fáil.

(222)

Ar bhonn an athbhreithnithe, ba cheart don Choimisiún tuarascáil phoiblí a ullmhú lena cur faoi bhráid Pharlaimint na hEorpa agus na Comhairle.

(223)

I gcás ina nochtar leis an bhfaisnéis atá ar fáil, go háirithe an fhaisnéis mar thoradh ar an bhfaireachán ar an gCinneadh seo nó arna cur ar fáil ag údaráis na Cóiré nó na mBallstát, nach bhféadann an leibhéal cosanta arna thabhairt ag Poblacht na Cóiré a bheith leordhóthanach a thuilleadh, ba cheart don Choimisiún an méid sin a chur ar an eolas d’údaráis inniúla na Cóiré agus a iarraidh go nglactar bearta iomchuí laistigh de thráthchlár réasúnach.

(224)

Más rud é, ar dhul in éag an tráthchláir shonraithe sin, go mainníonn údaráis inniúla na Cóiré na bearta sin a dhéanamh nó má theipeann orthu a léiriú go sásúil ar bhealach eile go bhfuil an Cinneadh seo bunaithe go fóill ar leibhéal cosanta leormhaith, tionscnóidh an Coimisiún an nós imeachta dá dtagraítear in Airteagal 93(2) de Rialachán (AE) 2016/679 d’fhonn an Cinneadh seo a chur ar fionraí nó a aisghairm go páirteach nó go hiomlán.

(225)

Mar mhalairt rogha, tionscnóidh an Coimisiún an nós imeachta sin d’fhonn an Cinneadh a leasú, go háirithe trí aistrithe sonraí a chur faoi réir coinníollacha breise nó gan srian a chur le raon feidhme an chinnidh leordhóthanachta ach amháin do na haistrithe sonraí amháin dá bhfuil leibhéal cosanta leordhóthanach fós á áirithiú.

(226)

Go háirithe, ba cheart don Choimisiún an nós imeachta a thionscnamh d’fhionraí nó aisghairm i gcás táscanach gcomhlíonann oibreoirí gnólachta leis na coimircí breise a fhaightear in Iarscríbhinn I a fhaigheann sonraí pearsanta faoin gCinneadh seo agus/nó nach bhfuiltear á bhforfheidhmiú ar bhealach éifeachtach, nó go mainníonn údaráis na Cóiré na huiríll, forchinntithe agus gealltanais atá in Iarscríbhinn II a ghabhann leis an gCinneadh seo a chomhlíonadh.

(227)

Ba cheart don Choimisiún freisin machnamh faoin nós imeachta a thionscnamh óna dtiocfaidh leasú, fionraí nó aisghairm an Chinnidh seo, más rud é, i gcomhthéacs an athbhreithnithe nó ar bhealach eile, go mainníonn údaráis na Cóiré an fhaisnéis nó na soiléirithe a chur ar fáil is gá chun an leibhéal cosanta a thugtar do shonraí pearsanta arna n-aistriú ón Aontas Eorpach chuig Poblacht na Cóiré a mheasúnú, nó maidir le comhlíontacht leis an gCinneadh seo. I dtaca leis an méid sin, ba cheart don Choimisiún a mhéid is féidir an fhaisnéis ábhartha a fháil ó fhoinsí eile a thabhairt san áireamh.

(228)

Ar mhórfhorais phráinne a bhfuil údar cuí leo, bainfidh an Coimisiún leas as an bhféidearthacht, i gcomhréir leis an nós imeachta dá dtagraítear in Airteagal 93(3) de Rialachán (AE) 2016/679, gníomhartha cur chun feidhme arb infheidhme go láithreach iad a ghlacadh lena bhfionraítear, lena n-aisghairtear nó lena leasaítear an Cinneadh.

(229)

D’fhoilsigh An Bord Eorpach um Chosaint Sonraí a thuairim (387), a tugadh san áireamh agus an Cinneadh seo á ullmhú.

(230)

Tá na bearta dá bhforáiltear sa Chinneadh seo i gcomhréir leis an tuairim ón gCoiste a bhunaítear faoi Airteagal 93(1) de Rialachán (AE) 2016/679.