(1)

De ghnáth, táirgí mórmhargaidh nó táirgí iniompartha nó iad araon atá i ngairis ghearr-raoin ar féidir iad a thabhairt agus a úsáid thar theorainneacha. Le difríochtaí i gcoinníollacha rochtana speictrim, féadfar cosc a chur ar a saorghluaiseacht, a gcostais táirgthe a mhéadú agus rioscaí a chruthú maidir le trasnaíocht dhíobhálach le feidhmchláir raidió dhifriúla agus le seirbhísí raidió eile de bharr úsáid neamhúdaraithe. Le Cinneadh 2006/771/CE ón gCoimisiún (2), comhchuibhíodh na coinníollacha teicniúla maidir le speictream a úsáid le haghaidh réimse leathan gaireas gearr-raoin atá, dá thoradh sin, faoi réir córas rialála an-éadrom agus nach bhfuil faoi réir ag níos mó ná údarú ginearálta faoin dlí náisiúnta.

(2)

Le Cinneadh Cur Chun Feidhme (AE) 2018/1538 ón gCoimisiún (3), comhchuibhíodh na coinníollacha teicniúla maidir le bandaí minicíochta 874-876 agus 915-921 MHz a úsáid ag réitigh ardteicneolaíocha sainaitheanta radaimhinicíochta (“RFID”) mar aon le feidhmeanna “Idirlíon na Rudaí Nithiúla” atá bunaithe ar ghairis líonraithe ghearr-raoin i líonraí sonraí a úsáid. Sna bandaí minicíochta sin, tá an timpeallacht um chomhroinnt difriúil i gcomparáid leis an gceann is infheidhme faoi Chinneadh 2006/771/CE agus, dá bhrí sin, tá gá le córas rialála sonrach.

(3)

Cé nach bhfuil bandaí minicíochta 873-874,4 MHz agus 918-919,4 MHz comhchuibhithe le haghaidh an chórais dhomhanda do chumarsáid mhóibíleach le haghaidh iarnród (“GSM-R”) a úsáid le dlí an Aontais nó le Cinneadh ón gCoiste Cumarsáide Eorpach (“ECC”), féadfar na bandaí minicíochta sin a úsáid chun na críche sin ar bhonn náisiúnta faoi réir cinneadh náisiúnta i gcomhréir le Rialacháin Raidió an Aontais Teileachumarsáide Idirnáisiúnta. Dá bhrí sin, i gcás nár leor coinníollacha teicniúla comhchuibhithe chun úsáid na mbandaí sin a chosaint i gcomhair GSM le haghaidh iarnród a leathnú go náisiúnta (“E-GSM-R”), is féidir leis na Ballstáit lena mbaineann úsáid gaireas gearr-raoin a chur faoi réir ceanglais bhreise gan tionchar a imirt ar na coinníollacha teicniúla comhchuibhithe maidir le rochtain ar an speictream le haghaidh gairis ghearr-raoin laistigh de na bandaí. Le srianta den sórt sin, i gcás ina bhfuil gá leo i mBallstát ar leith, ba cheart a áirithiú go mbeidh comhordú ann idir úsáideoirí speictrim chun an chomhroinnt gheografach a chumasú idir E-GSM-R ar láimh amháin agus gairis RFID agus gairis líonraithe ghearr-raoin ar an láimh eile.

(4)

Maidir le húsáid chomhchuibhithe bhandaí minicíochta péireáilte 874,4-880,0 MHz agus 919,4-925,0 MHz le haghaidh raidió móibíleach iarnróid, ar bandaí minicíochta iad atá cóngarach d’fhobhandaí 874-874,4 MHz agus 917,4-919,4 MHz a chomhchuibhítear le haghaidh gairis ghearr-raoin leis an gCinneadh seo, tá an úsáid sin faoi réir Chinneadh Cur Chun Feidhme (AE) 2021/1730 ón gCoimisiún (4). An chómhaireachtáil idir gairis ghearr-raoin i mbandaí minicíochta 874-874,4 MHz agus 917,4-919,4 MHz agus raidió móibíleach iarnróid i mbandaí minicíochta cóngaracha 874,4-880,0 MHz agus 919,4-925,0 MHz, rinneadh measúnú uirthi i dTuarascáil 74 Chomhdháil Eorpach na Riarachán Poist agus Teileachumarsáide (“CEPT”).

(5)

I gcomhréir le hAirteagal 1(4) de Chinneadh Uimh. 676/2002/CE, coinníonn na Ballstáit an ceart chun a speictream raidió a eagrú agus a úsáid chun críoch oird phoiblí agus slándála poiblí agus le haghaidh cosanta, agus tá sé de shaoirse acu, sa chomhthéacs sin, úsáid bhandaí minicíochta 874-876 agus 915-921 MHz agus úsáid bandaí cóngaracha atá ann cheana agus a bheidh ann amach anseo a chosaint chun críoch míleata agus chun críoch slándála poiblí agus oird phoiblí eile agus, san am céanna, an aidhm á saothrú maidir leis na croíbhandaí comhchuibhithe íosta a chur ar fáil le haghaidh gairis líonraithe ghearr-raoin i gcomhréir leis na coinníollacha teicniúla a shainítear sa Chinneadh seo agus i gcomhréir le prionsabail ghinearálta dhlí an Aontais go háirithe.

(6)

Chun forbairtí teicneolaíocha agus margaidh i réimse na ngaireas gearr-raoin a chur san áireamh, eisíodh sainordú buan i mí Iúil 2006 do CEPT de bhun Airteagal 4(2) de Chinneadh Uimh. 676/2002/CE, chun an Iarscríbhinn a ghabhann le Cinneadh 2006/771/CE a thabhairt cothrom le dáta. Maidir leis an obair a rinneadh ar bhonn an tsainordaithe bhuain (an seachtú timthriall nuashonraithe), ba í sin an bunús freisin maidir le Cinneadh Cur Chun Feidhme (AE) 2018/1538 lenar cuireadh ar fáil speictream breise le haghaidh gairis ghearr-raoin laistigh de bhandaí minicíochta 874-876 agus 915-921 MHz.

(7)

An 16 Iúil 2019, d’eisigh an Coimisiún a threoirlitir maidir le hochtú timthriall nuashonraithe Chinneadh 2006/771/CE. Mar fhreagairt ar an sainordú buan agus i gcomhréir leis an treoraíocht sin, chuir CEPT a Thuarascáil 77 faoi bhráid an Choimisiúin an 5 Márta 2021 ina bhfuil roinnt tograí chun Cinneadh Cur Chun Feidhme (AE) 2018/1538 a leasú. Áirítear leo sin leasú a dhéanamh ar shainmhínithe i ndáil le gairis ghearr-raoin, chun débhríocht a sheachaint agus comhsheasmhacht le Cinneadh 2006/771/CE a áirithiú. Moltar leo freisin athmheasúnú a dhéanamh ar roinnt paraiméadair theicniúla maidir le catagóirí gaireas gearr-raoin a chumhdaítear le Cinneadh Cur Chun Feidhme (AE) 2018/1538. Is é Tuarascáil 77 CEPT an bunús teicniúil don Chinneadh seo.

(8)

Na gairis ghearr-raoin a oibríonn laistigh de na coinníollacha a leagtar amach sa Chinneadh seo, ba cheart dóibh Treoir 2014/53/AE ó Pharlaimint na hEorpa agus ón gComhairle (5) a chomhlíonadh freisin.

(9)

Ba cheart, dá bhrí sin, Cinneadh Cur Chun Feidhme (AE) 2018/1538 a leasú.

(10)

Tá na bearta dá bhforáiltear sa Chinneadh seo i gcomhréir le tuairim an Choiste um an Speictream Raidió,