(1)

Tháinig an Comhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (5) (“an Comhaontú um Tharraingt Siar”) i bhfeidhm an 1 Feabhra 2020. Tháinig deireadh leis an idirthréimhse dá dtagraítear in Airteagal 126 den Chomhaontú um Tharraingt Siar an 31 Nollaig 2020. Le linn na hidirthréimhse, chuir an tAontas agus Ríocht Aontaithe na Breataine Móire agus Thuaisceart Éireann (“an Ríocht Aontaithe”) tús le caibidlíocht fhoirmiúil maidir lena gcaidreamh amach anseo.

(2)

Tar éis dheireadh na hidirthréimhse, is ann do bhacainní ar thrádáil, ar mhalartuithe trasteorann agus ar shaorghluaiseacht daoine, seirbhísí agus caipitil idir an tAontas agus an Ríocht Aontaithe agus iarmhairtí leathana agus leitheadacha ann do ghnólachtaí, go háirithe d’fhiontair bheaga agus mheánmhéide (FBManna), agus dá n-oibrithe, agus freisin do phobail áitiúla, do riaracháin phoiblí agus do shaoránaigh. Ós rud é nach féidir na hiarmhairtí sin a sheachaint, ní mór iad a mhaolú a mhéid is féidir, agus ní mór do pháirtithe leasmhara a áirithiú go bhfuil siad ullmhaithe dóibh.

(3)

Tá an tAontas tiomanta do na hiarmhairtí díobhálacha eacnamaíocha, sóisialta, críochacha agus, i gcás inarb ábhartha, comhshaoil, a bheidh ag tarraingt siar na Ríochta Aontaithe as an Aontas a mhaolú agus do dhlúthpháirtíocht a léiriú leis na Ballstáit uile, lena n-áirítear lena réigiúin agus lena bpobail áitiúla, mar aon le hearnálacha eacnamaíocha, go háirithe na cinn is mó a ndéanann cúinsí eisceachtúla den sórt sin dochar dóibh.

(4)

Tá an tAontas tiomanta freisin do bhainistiú inbhuanaithe iascaigh i gcomhréir le cuspóirí an Chomhbheartais Iascaigh arna bhunú le Rialachán (AE) Uimh. 1380/2013 ó Pharlaimint na hEorpa agus ón gComhairle (6), lena n-áirítear an prionsabal maidir le huastáirgeacht inbhuanaithe a bhaint amach do na stoic uile de réir na comhairle eolaíche is fearr atá ar fáil, chomh maith le deireadh a chur leis an ró-iascaireacht, líon na speiceas saothraithe a athbhunú agus an comhshaol muirí a chosaint, mar a fhoráiltear dóibh freisin le gealltanais idirnáisiúnta.

(5)

Ba cheart Cúlchiste Coigeartaithe Brexit (an “Cúlchiste”) a bhunú d’fhonn tacaíocht a sholáthar chun iarmhairtí díobhálacha tharraingt siar na Ríochta Aontaithe as an Aontas sna Ballstáit agus ar fud réigiún agus earnálacha a chomhrac, go háirithe sna cinn is mó atá buailte ag an tarraingt siar, agus, ar an gcaoi sin, an tionchar diúltach gaolmhar ar an gcomhtháthú eacnamaíoch, sóisialta agus críochach a mhaolú. Ba cheart dó cuid den chaiteachas poiblí breise a thabhóidh agus a íocfaidh údaráis phoiblí sna Ballstáit a chumhdach le haghaidh bearta a ghlactar go sonrach chun na hiarmhairtí sin a mhaolú, nó é a chumhdach ina iomláine. Ba cheart feidhm a bheith ag an tréimhse thagartha, mar a shainmhínítear sa Rialachán seo í, lena gcinntear incháilitheacht an chaiteachais, maidir le híocaíochtaí a dhéanann údaráis phoiblí sna Ballstáit, ar leibhéil náisiúnta, réigiúnach nó áitiúil, lena n-áirítear íocaíochtaí le heintitis phoiblí nó phríobháideacha, le haghaidh bearta a dhéantar. Agus tábhacht earnáil an iascaigh i mBallstáit áirithe á cur san áireamh, is iomchuí cuid de hacmhainní an Chúlchiste a chur ar leataobh chun tacaíocht thiomnaithe a chur ar fáil do phobail chósta áitiúla agus réigiúnacha.

(6)

I gcás ina roghnaíonn na Ballstáit tacú le bearta chun poist a chothabháil agus a chruthú, ba cheart é a bheith d’aidhm acu fostaíocht ardcháilíochta a chur ar fáil.

(7)

Ba cheart cuspóirí an Chúlchiste a shaothrú i gcomhréir leis an gcuspóir maidir le forbairt inbhuanaithe a chur chun cinn mar a leagtar amach in Airteagal 11 den Chonradh ar Fheidhmiú an Aontais Eorpaigh (CFAE), agus ba cheart go gcuirfí san áireamh Spriocanna Forbartha Inbhuanaithe na Náisiún Aontaithe, Comhaontú Pháras a glacadh faoi Chreat-Choinbhinsiún na Náisiún Aontaithe ar an Athrú Aeráide (7) (“Comhaontú Pháras”) a d’fhormheas an tAontas an 5 Deireadh Fómhair 2016 (8), agus an prionsabal “gan dochar suntasach a dhéanamh” de réir bhrí Airteagal 17 de Rialachán (AE) 2020/852 ó Pharlaimint na hEorpa agus ón gComhairle (9), an Comhaontú Glas don Eoraip, an Clár Oibre Digiteach don Eoraip, mar aon le prionsabal na comhpháirtíochta agus na prionsabail a leagtar amach i gColún Eorpach na gCeart Sóisialta, lena n-áirítear a rannchuidiú bunúsach le neamhionannais a dhíothú, agus le comhionannas inscne agus príomhshruthú inscne a chur chun cinn, agus urraim do chearta bunúsacha á áirithiú ag an am céanna.

(8)

Chun críocha iarmhairtí díobhálacha tharraingt siar na Ríochta Aontaithe as an Aontas a chomhrac, ba cheart do na Ballstáit, agus bearta tacaíochta á gceapadh acu agus an ranníocaíocht airgeadais as an gCúlchiste á leithdháileadh acu, tacú le heintitis phríobháideacha agus phoiblí a ndéanann an tarraingt siar dochar dóibh, lena n-áirítear FBManna agus a n-oibrithe, mar aon le daoine féinfhostaithe, ós rud é go bhfuil bacainní anois rompu ó thaobh sreafaí trádála de, mar aon le méadú ar nósanna imeachta riaracháin agus custaim, agus ualach rialála agus airgeadais níos mó, lena n-áirítear cur isteach ar chomhar agus ar mhalartú. Dá bhrí sin, is iomchuí liosta neamh-uileghabhálach a sholáthar de na cineálacha beart is dóichí is mó a ghnóthóidh an cuspóir sin.

(9)

Mar léiriú ar a thábhachtaí atá sé dul i ngleic leis an athrú aeráide i gcomhréir le gealltanais an Aontais Comhaontú Pháras agus Spriocanna Forbartha Inbhuanaithe na Náisiún Aontaithe a chur chun feidhme, tá sé beartaithe leis na cistí agus na cláir de chuid an Aontais rannchuidiú le gníomhaíochtaí ar son na haeráide a phríomhshruthú agus le sprioc fhoriomlán a bhaint amach, arb é sin 30 % de chaiteachas buiséadach an Aontais a bheith ag tacú le cuspóirí aeráide. Meastar freisin go rannchuideoidh an Cúlchiste le cuspóirí aeráide de réir riachtanais agus tosaíochtaí sonracha gach Ballstáit. Ba cheart don Choimisiún measúnú a dhéanamh ar an rannchuidiú aeráide bunaithe ar an bhfaisnéis atá ar fáil sa tuarascáil chríochnaitheach maidir le cur chun feidhme an Chúlchiste.

(10)

Tá sé tábhachtach aon eisceacht ón tacaíocht a chuireann an Cúlchiste ar fáil a shonrú go soiléir. I dteannta na n-eintiteas a bhaineann tairbhe as tarraingt siar na Ríochta Aontaithe as an Aontas a eisiamh, lena n-áirítear na heintitis sin ón earnáil airgeadais, ba cheart an cháin bhreisluacha (CBL) a eisiamh ó thacaíocht arna soláthar leis an gCúlchiste, toisc gur ioncam Ballstáit atá inti, lena bhfritháirítear an costas gaolmhar do bhuiséad an Bhallstáit. I gcomhréir leis an gcur chuige ginearálta i leith beartas comhtháthaithe, ba cheart caiteachas a bhaineann le hathlonnu nó caiteachas atá i gcoinne aon dlí de chuid an Aontais nó aon dlí náisiúnta is infheidhme a eisiamh ó thacaíocht a chuirtear ar fáil leis an gCúlchiste freisin.

(11)

Chun an t-ualach riaracháin a laghdú, ba cheart cúnamh teicniúil a chur chun feidhme do bhainistiú, d’fhaireachán, d’fhaisnéis agus cumarsáid, agus do rialú agus iniúchadh an Chúlchiste trí ráta comhréidh bunaithe ar mhéid an chaiteachais incháilithe a nglacann an Coimisiún leis. Féadfar cúnamh teicniúil a úsáid chun cabhrú le húdaráis áitiúla, réigiúnacha agus náisiúnta an Cúlchiste a chur chun feidhme, trí cúnamh a thabhairt do FBManna, go háirithe, nach bhfuil na hacmhainní ná an t-eolas acu, i ngeall ar a méid, chun an t-ualach méadaithe riaracháin agus na costais mhéadaithe a bhaineann le tarraingt siar na Ríochta Aontaithe as an Aontas a shárú.

(12)

Chun aird a thabhairt ar thionchar na n-iarmhairtí díobhálacha eacnamaíocha, sóisialta, críochacha agus, i gcás inarb ábhartha, comhshaoil, a eascraíonn as tarraingt siar na Ríochta Aontaithe as an Aontas do Bhallstáit agus dá ngeilleagair agus, i gcás inarb infheidhme, ar na bearta a rinne na Ballstáit chun éifeachtaí diúltacha na tarraingthe siar a raibh coinne leo a mhaolú roimh dheireadh na hidirthréimhse, ba cheart don tréimhse tagartha tosú an 1 Eanáir 2020 agus ba cheart í a bheith dírithe ar thréimhse teoranta 4 bliana.

(13)

Ba cheart don Choimisiún measúnú a chur ar fáil do Pharlaimint na hEorpa agus don Chomhairle ina ndéanfar anailís ar thionchar tharraingt siar na Ríochta Aontaithe as an Aontas ar ghnólachtaí agus ar earnálacha eacnamaíocha an Aontais, agus éifeachtaí luaineachtaí airgeadra ar an trádáil á gcur san áireamh.

(14)

Is gá a shonrú maidir leis an mbuiséad a leithdháilfear ar an gCúlchiste, gur cheart don Choimisiún é a chur chun feidhme faoi bhainistíocht atá roinnte leis na Ballstáit de réir bhrí Rialachán (AE, Euratom) 2018/1046 ó Pharlaimint na hEorpa agus ón gComhairle (10) (an “Rialachán Airgeadais”). Is iomchuí, dá bhrí sin, na prionsabail agus na hoibleagáidí sonracha a chinneadh ar cheart do Bhallstáit iad a urramú, go háirithe prionsabail na bainistíochta fónta airgeadais, trédhearcachta agus neamh-idirdhealaithe, agus easpa coinbhleachta leasa.

(15)

Ba cheart do na Ballstáit a áirithiú go n-úsáidfear an Cúlchiste ar bhealach comhordaithe le cistí agus cláir eile de chuid an Aontais, lena n-áirítear trí dhul i gcomhairle leis na húdaráis áitiúla agus réigiúnacha ábhartha, de réir mar is iomchuí.

(16)

Tá feidhm ag na rialacha airgeadais cothrománacha a ghlac Parlaimint na hEorpa agus an Chomhairle ar bhonn Airteagal 322 CFAE maidir leis an Rialachán seo. Leagtar na rialacha sin síos sa Rialachán Airgeadais agus is iad a chinneann, go háirithe, an nós imeachta le haghaidh buiséad an Aontais a bhunú agus a chur chun feidhme agus foráiltear iontu maidir le seiceálacha ar fhreagracht na ngníomhaithe airgeadais. Áirítear leis na rialacha arna nglacadh ar bhonn Airteagal 322 CFAE freisin le córas ginearálta coinníollachta chun buiséad an Aontais a chosaint arna bhunú i Rialachán (AE, Euratom) 2020/2092 ó Pharlaimint na hEorpa agus ón gComhairle (11).

(17)

Ar mhaithe le bainistíocht fhónta airgeadais, ba cheart rialacha sonracha a leagan síos i ndáil le gealltanais bhuiséadacha, íocaíochtaí, tabhairt anonn agus aisghabháil an Chúlchiste. Agus urraim á tabhairt don phrionsabal maidir le buiséad an Aontais a shocrú ar bhonn bliantúil, ba cheart don Rialachán seo, mar gheall ar chineál eisceachtúil agus sonrach an Chúlchiste, foráil a dhéanamh maidir le deiseanna chun cistí nár úsáideadh a thabhairt anonn thar na cistí a leagtar amach sa Rialachán Airgeadais, agus sa chaoi sin, an leas is fearr is féidir a bhaint as acmhainneacht an Chúlchiste chun cur i gcoinne na n-iarmhairtí díobhálacha do na Ballstáit agus dá ngeilleagair, lena n-áirítear ag leibhéil réigiúnacha agus áitiúla, a eascraíonn as tarraingt siar na Ríocht Aontaithe as an Aontas.

(18)

Chun go mbeidh na Ballstáit in ann acmhainní breise a chur in úsáid agus chun na hacmhainní airgeadais is leor chun bearta a chur chun feidhme gan mhoill faoin gCúlchiste a áirithiú, ba cheart méid suntasach de a eisíoc mar réamh-mhaoiniú, i dtrí thráthchuid, in 2021, in 2022 agus in 2023. Leis an mhodheolaíocht leithdháilte le haghaidh acmhainní an Chúlchiste, ba cheart tábhacht an iascaigh i limistéar eacnamaíoch eisiach na Ríochta Aontaithe, tábhacht na trádála leis an Ríocht Aontaithe agus tábhacht na réigiún teorann muirí comharsanachta leis an Ríocht Aontaithe agus a bpobal, bunaithe ar staitisticí oifigiúla iontaofa, a chur san áireamh. I bhfianaise uathúlacht tharraingt siar na Ríochta Aontaithe as an Aontas agus na héiginnteachta maidir le príomhghnéithe an chaidrimh idir an tAontas agus an Ríocht Aontaithe tar éis dheireadh na hidirthréimhse, is deacair tuar a dhéanamh ar na bearta iomchuí a mbeidh ar na Ballstáit iad a ghlacadh go gasta chun éifeachtaí na tarraingthe siar a chomhrac. Dá bhrí sin, is iomchuí solúbthacht a dheonú do na Ballstáit agus cead a thabhairt don Choimisiún, go háirithe, an cinneadh airgeadais a ghlacadh lena gcuirfear an réamh-mhaoiniú ar fáil gan an oibleagáid de bhun Airteagal 110(2) den Rialachán Airgeadais a bheith ann maidir le tuairisc a dhéanamh ar na bearta atá le maoiniú.

(19)

Laistigh de 2 mhí ó dháta theacht i bhfeidhm an Rialacháin seo agus roimh íocadh na chéad tráthchoda den réamh-mhaoiniú, ba cheart do na Ballstáit fógra a thabhairt don Choimisiún maidir le céannacht na gcomhlachtaí arna n-ainmniú agus céannacht an chomhlachta lena n-íocfar an réamh-mhaoiniú, agus ba cheart dóibh a dheimhniú gur dréachtaíodh tuairiscí ar na córais bhainistíochta agus rialaithe don Chúlchiste.

(20)

Chun cóir chomhionann na mBallstát uile a áirithiú, ba cheart sprioc-am aonair amháin a bheith ann do na Ballstáit uile chun iarratais ar ranníocaíocht airgeadais as an gCúlchiste a thíolacadh. Mar gheall ar ghné shonrach an Chúlchiste agus an tréimhse cur chun feidhme a bheith measartha gearr, tá údar maith le tréimhse shaincheaptha thagartha a shocrú, rud a fhágann go mbeadh sé díréireach ceanglas a chur ar na Ballstáit na doiciméid is gá de réir Airteagal 63(5), (6) agus (7) den Rialachán Airgeadais a sholáthar ar bhonn bliantúil. Toisc go maolaítear na rioscaí do bhuiséad an Aontais leis an gceanglas córas daingean bainistithe agus rialaithe le haghaidh an Chúlchiste a úsáid atá i bhfeidhm cheana sna Ballstáit, nó i gcás inarb iomchuí, atá le bunú ag na Ballstáit, tá údar maith le maolú ón oibleagáid ar na Ballstáit maidir leis na doiciméid is gá a thíolacadh i mí Feabhra nó i mí an Mhárta gach bliain. Chun go mbeidh an Coimisiún in ann a sheiceáil an bhfuil an ranníocaíocht airgeadais as an gCúlchiste á húsáid mar is ceart, ba ceart ceangal a bheith ar na Ballstáit, mar chuid den iarratas ar ranníocaíocht airgeadais as an gCúlchiste, tuarascálacha ar chur chun feidhme a sholáthar ina gcuirfear tuilleadh sonraí ar fáil maidir leis na gníomhaíochtaí atá le maoiniú, ina ndéanfar cur síos ar iarmhairtí díobhálacha tharraingt siar na Ríochta Aontaithe as an Aontas ar na gnólachtaí agus ar na hearnálacha eacnamaíocha, agus ina mbeidh gnéithe de na cuntais, achoimre ar na tuarascálacha iniúchóireachta deiridh agus ar na rialuithe a dhéantar, dearbhú bainistithe mar aon le tuairim ó chomhlacht iniúchóireachta neamhspleách arna tarraingt suas i gcomhréir le caighdeáin iniúchóireachta a nglactar leo go hidirnáisiúnta.

(21)

De bhun mhíreanna 22 agus 23 de Chomhaontú Idirinstitiúideach an 13 Aibreán 2016 maidir le Reachtóireacht Níos Fearr (12), ba cheart meastóireacht a dhéanamh ar an gCúlchiste ar bhonn faisnéise arna bailiú i gcomhréir le ceanglais faireacháin shonracha, agus ag an am céanna ró-rialáil agus ualach riaracháin ar údaráis náisiúnta, réigiúnacha agus áitiúla, agus ró-rialáil a sheachaint. Ar na ceanglais sin, ba cheart a áireamh, i gcás inarb iomchuí, táscairí intomhaiste mar bhonn chun meastóireacht a dhéanamh ar éifeachtaí an Chúlchiste ar an talamh.

(22)

Chun cóir chomhionann na mBallstát uile agus comhsheasmhacht i meastóireacht na n-iarratas ar ranníocaíocht airgeadais as an gCúlchiste a áirithiú, ba cheart don Choimisiún measúnú a dhéanamh ar na hiarratais mar phacáiste. Ba cheart dó féachaint go háirithe ar incháilitheacht agus ar chruinneas an chaiteachais arna dhearbhú, ar an nasc díreach idir iarmhairtí díobhálacha tharraingt siar na Ríochta Aontaithe as an Aontas leis na bearta a rinneadh, agus ar na socruithe a chuir an Ballstát lena mbaineann i bhfeidhm chun cistiú dúbailte a sheachaint. Ba cheart don Choimisiún measúnú a dhéanamh ar bhealach comhréireach ar a bhfuil sa tuarascáil cur chun feidhme, agus an caiteachas iomlán a áirítear san iarratas ar ranníocaíocht airgeadais ón gCúlchiste á chur san áireamh. Tar éis don Choimisiún measúnú a dhéanamh ar na hiarratais ar ranníocaíocht airgeadais as an gCúlchiste, ba cheart dó an réamh-mhaoiniú arna íoc a imréiteach, na méideanna nár úsáideadh a aisghabháil, agus cinneadh a dhéanamh maidir le híocaíochtaí suas go dtí teorainneacha an leithdháilte shealadaigh. I bhfianaise mhéid an tsuaite eacnamaíoch a bhfuil coinne leis, ba cheart na méideanna nár úsáideadh ón leithdháileadh sealadach a chur ar fáil do na Ballstáit sin ar mó a méid iomlán glactha ná a leithdháileadh sealadach faoi seach.

(23)

I bhfianaise chineál eisceachtúil agus shonrach an Chúlchiste agus na cuspóirí atá leis, ba cheart go dtabharfadh an Coimisiún cúnamh do na Ballstáit chun cabhrú leo bearta a aithint ar mhaithe le hiarmhairtí díobhálacha tharraingt siar na Ríochta Aontaithe as an Aontas a chomhrac, lena n-áirítear mar a dhéanfar an ceangal díreach idir an caiteachas agus an tarraingt siar a mheas.

(24)

Chun dea-fheidhmiú an bhainistithe chomhroinnte a áirithiú, ba cheart do na Ballstáit córas bainistithe agus rialaithe le haghaidh an Chúlchiste a bhunú. Ba cheart do gach Ballstát comhlacht nó, i gcás go n-éilítear é le creat bunreachtúil an Bhallstáit, na comhlachtaí. a ainmniú a bheidh freagrach as bainistiú an Chúlchiste, agus comhlacht iniúchóireachta neamhspleách ar leithligh a ainmniú, agus fógra a thabhairt don Choimisiún faoi chéannacht an chomhlachta nó na gcomhlachtaí arna n-ainmniú. Ba cheart go mbeadh na Ballstáit in ann úsáid a bhaint as comhlachtaí ainmnithe atá ann cheana, ar an leibhéal críochach iomchuí, agus as córais bainistíochta agus rialaithe atá ann cheana chun críocha an bheartas chomhtháthaithe nó Chiste Dlúthpháirtíochta an Aontais Eorpaigh arna bhunú le Rialachán (CE) Uimh. 2012/2002 ón gComhairle (13) a chur chun feidhme. Is gá na freagrachtaí atá ar na Ballstáit a shonrú agus na ceanglais shonracha atá ar na comhlachtaí arna n-ainmniú a leagan síos.

(25)

Chun feabhas a chur ar chosaint bhuiséad an Aontais, ba cheart don Choimisiún córas faisnéise agus faireacháin atá comhtháite agus idir-inoibritheach a chur ar fáil, lena n-áirítear uirlis mianadóireachta sonraí agus scórála riosca aonair chun rochtain a fháil ar na sonraí ábhartha agus chun anailís a dhéanamh orthu, agus ba cheart don Choimisiún úsáid na huirlise sin a spreagadh d’fhonn go gcuirfí i bhfeidhm í ar bhonn ghinearálta ag na Ballstáit.

(26)

Chun an t-ualach riaracháin a laghdú, féadfaidh na Ballstáit iad siúd a bhaineann tairbhe as ranníocaíocht airgeadais as an gCúlchiste a aisíoc trí bhíthin roghanna costas simplithe amhail rátaí comhréidhe, cnapshuimeanna nó costais aonaid i gcás ina bhfuil siad ina athróga ionadacha iontaofa chuig fíorchostais.

(27)

I gcomhréir leis an Rialachán Airgeadais, le Rialachán (AE, Euratom) Uimh. 883/2013 ó Pharlaimint na hEorpa agus ón gComhairle (14), agus le Rialacháin (CE, Euratom) Uimh. 2988/95 (15), (Euratom, CE) Uimh. 2185/96 (16) agus (AE) 2017/1939 ón gComhairle (17), tá leasanna airgeadais an Aontais le cosaint trí bhearta comhréireacha, lena n-áirítear bearta maidir le neamhrialtachtaí agus calaois a chosc, a bhrath, a cheartú agus a fhiosrú, agus na cistí a cailleadh, a íocadh go mícheart nó a úsáideadh go mícheart a aisghabháil, agus, i gcás inarb iomchuí, pionóis riaracháin a fhorchur. Go háirithe, i gcomhréir le Rialacháin (Euratom, CE) Uimh. 2185/96 agus (AE, Euratom) Uimh. 883/2013, tá an chumhacht ag an Oifig Eorpach Frith-Chalaoise (OLAF) imscrúduithe riaracháin a dhéanamh, lena n-áirítear seiceálacha agus cigireachtaí ar an láthair, d’fhonn a chinneadh ar tharla calaois, éilliú nó aon ghníomhaíocht neamhdhleathach eile a dhéanfadh difear do leasanna airgeadais an Aontais. Tugtar de chumhacht d’Oifig an Ionchúisitheora Phoiblí Eorpaigh (OIPE), i gcomhréir le Rialachán (AE) 2017/1939, i gcás inarb ábhartha, calaois agus cionta coiriúla eile a dhéanann difear do leasanna airgeadais an Aontais, faoi mar a fhoráiltear i dTreoir (AE) 2017/1371 ó Pharlaimint na hEorpa agus ón gComhairle (18), a fhiosrú agus a ionchúiseamh. I gcomhréir leis an Rialachán Airgeadais, tá ar aon duine nó aon eintiteas a fhaigheann cistí ón Aontas comhoibriú go hiomlán i gcosaint leasanna airgeadais an Aontais, agus na cearta agus an rochtain is gá a thabhairt don Choimisiún, do OLAF, don Chúirt Iniúchóirí, agus, maidir leis na Ballstáit sin atá rannpháirteach i gcomhar feabhsaithe de bhun Rialachán (AE) 2017/1939, do OIPE, i gcás inarb ábhartha, agus le háirithiú i gcás aon tríú páirtí a bheidh páirteach i gcur chun feidhme chistí de chuid an Aontais, go gcuirfidh sé cearta coibhéiseacha ar fáil.

(28)

D’fhonn an tionchar diúltach ar ghnólachtaí agus ar earnálacha eacnamaíocha a mhaolú, agus chun scrogaill riaracháin a sheachaint, ba cheart do na Ballstáit agus do na réigiúin a bhfeachtais faisnéise a dhíriú ar fheasacht a mhúscailt maidir le ranníocaíocht an Aontais as an gCúlchiste agus, ós rud é go bhfuil gníomhaíochtaí trédhearcachta, cumarsáide agus infheictheachta bunriachtanach chun gníomhaíocht an Aontais a dhéanamh infheicthe ar an láthair, an pobal a chur ar an eolas dá réir sin.. Ba cheart na gníomhaíochtaí sin a bheith bunaithe ar fhaisnéis chruinn agus nuashonraithe.

(29)

Chun trédhearcacht maidir le húsáid ranníocaíocht an Aontais as an gCúlchiste a fheabhsú, ba cheart don Choimisiún tuarascáil chríochnaitheach a sholáthar do Pharlaimint na hEorpa, don Chomhairle, do Choiste Eacnamaíoch agus Sóisialta na hEorpa agus do Choiste na Réigiún maidir le cur chun feidhme an Chúlchiste.

(30)

Chun coinníollacha aonfhoirmeacha a áirithiú maidir leis na hacmhainní airgeadais atá ar fáil do gach Ballstát a leagan amach, ba cheart cumhachtaí cur chun feidhme a thabhairt don Choimisiún.

(31)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42 de Rialachán (AE) Uimh. 2018/1725 ó Pharlaimint na hEorpa agus ón gComhairle (19) agus thug sé tuairim an 14 Aibreán 2021.

(32)

Ós rud é nach féidir leis na Ballstáit amháin cuspóirí an Rialacháin seo, eadhon comhtháthú eacnamaíoch, sóisialta agus críochach a chothabháil agus uirlis dlúthpháirtíochta a sholáthar do na Ballstáit agus iad ag déileáil le héifeachtaí tharraingt siar na Ríochta Aontaithe as an Aontas a dhéanann difear don Aontas ina iomláine, cé go bhfuil déine éagsúil i gceist i measc réigiún agus earnálacha, a ghnóthú go leordhóthanach, agus de bharr fhairsinge agus éifeachtaí na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(33)

I bhfianaise an ghá sáraitheach atá ann cur i gcoinne, gan mhoill, na n-iarmhairtí dochracha eacnamaíocha, sóisialta, críochacha agus, nuair is iomchuí, comhshaoil, de thoradh ar tharraingt siar na Ríochta Aontaithe as an Aontas sna Ballstáit, lena n-áirítear a réigiúin agus a bpobail áitiúla, agus a n-earnálacha, go háirithe iad sin is mó a ndéanann an tarraingt siar difear dóibh, agus chun an tionchar diúltach gaolmhar ar an gcomhtháthú eacnamaíoch, sóisialta agus críochach a mhaolú, ba cheart don Rialachán seo teacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,