—

glacadh buiséad an Aontais don bhliain airgeadais 2021 go cinntitheach an 17 Márta 2021 (2);

—

thíolaic an Coimisiún togra, an 24 Márta 2021, ina raibh dréachtbhuiséad leasaitheach Uimh. 2 a ghabhann leis an mbuiséad ginearálta don bhliain airgeadais 2021;

—

i bhfianaise na géarchéime gan fasach agus an ghá le mearfhreagairtí beartais a mhaoiniú ar ghearrfhógra, is iomchuí teacht ar chomhaontú ar bhonn eisceachtúil maidir leis an togra ón gCoimisiún chun rúmáil a chruthú faoin Ionstraim Tacaíochta Éigeandála – dar méid EUR 100 milliún – don tionchar buiséadach a bheadh ag riachtanais a d’fhéadfadh a bheith ag teacht chun cinn de réir mar a fhorbróidh an phaindéim. Níor cheart gurbh fhasach é an modh buiséadach sin agus ba cheart don Choimisiún na leithreasuithe a bhaineann leis an gcúlchiste sin a úsáid chun paindéim COVID-19 a chomhrac agus chuige sin amháin, trí ghníomhaíochtaí a dhéanamh atá incháilithe faoi Rialachán (AE) 2020/521 ón gComhairle an 14 Aibreán 2020 lena ngníomhachtaítear an tacaíocht éigeandála faoi Rialachán (AE) 2016/369, agus lena leasaítear forálacha an rialacháin sin lena gcuirtear ráig COVID-19 san áireamh (3);

—

d’fhonn leithreasuithe leordhóthanacha a chur ar fáil go práinneach faoin Ionstraim Tacaíochta Éigeandála in 2021 agus faoi ranníocaíocht an Aontais leis an Lárionad Eorpach um Ghalair a Chosc agus a Rialú mar fhreagairt ar phaindéim COVID-19, ní mór don Chomhairle an seasamh uaithi maidir le dréachtbhuiséad leasaitheach Uimh. 2 a ghabhann leis an mbuiséad ginearálta do 2021 a ghlacadh gan mhoill. Dá bhrí sin, tá bonn cirt le giorrú a dhéanamh ar an tréimhse ocht seachtaine maidir leis an bhfaisnéis do Pharlaimintí náisiúnta a leagtar síos in Airteagal 4 de Phrótacal Uimh. 1, i gcomhréir le hAirteagal 3(3) de Rialacha Nós Imeachta na Comhairle,