Ráiteas ón gCoimisiún maidir le Rialachán (AE) 2020/560 ó Pharlaimint na hEorpa agus ón gComhairle lena leasaítear Rialacháin (AE) Uimh. 508/2014 agus (AE) Uimh. 1379/2013 maidir le bearta sonracha chun tionchar na ráige de COVID-19 ar an earnáil iascaigh agus dobharshaothraithe a mhaolú

(2020/C 138 I/01)

Is díol sásaimh don Choimisiún é go bhfuil Parlaimint na hEorpa agus an Chomhairle ag glacadh gan mhoill an togra uaidh leis an gCiste Eorpach Muirí agus Iascaigh a mhodhnú chun tionchar na ráige de COVID-19 a mhaolú agus chun cuidiú lenár gcuid iascairí agus lenár gcuid táirgeoirí in earnáil an dobharshaothraithe.

Is mian leis an gCoimisiún a chur i bhfios go láidir go bhfuil rialú ar iascach agus bailiú sonraí eolaíocha ríthábhachtach chun bainistiú inbhuanaithe a dhéanamh ar stoic éisc ar bhonn na comhairle eolaíche is fearr dá bhfuil ar fáil agus ar bhonn an fhorfheidhmithe iontaofa. Níor cheart meath a theacht ar an toradh a bhíonn ar na heilimintí fíor-riachtanacha sin den Chomhbheartas Iascaigh de bharr an laghdaithe ar acmhainní airgeadais.

Is mian leis an gCoimisiún a chur in iúl go láidir go dtugtar leis an togra uaidh, mar aon leis na leasuithe a rinneadh air, aghaidh ar an ngéarchéim uathúil atá ann de thoradh na ráige de COVID-19 agus ar an ngéarghá eisceachtúil le tacaíocht chun dul i ngleic le hiarmhairtí na ráige sin. Níor cheart go ndéanfaí réamhbhreithiúnas mar gheall orthu ar an Rialachán a bheidh ann amach anseo maidir leis an gCiste Eorpach Muirí agus Iascaigh.