12003TN07/07

7. CÁNACHAS

1. 31977 L 0388: Séú Treoir 77/388/CEE ón gComhairle an 17 Bealtaine 1977 maidir le comhfhogasú dhlíthe na mBallstát a bhaineann le cánacha láimhdeachais — Comhchóras cánach breisluacha: aonbhonn measúnachta (IO L 145, 13.6.1977, lch. 1), mar atá arna leasú go deireanach le:

- 32002 L 0038: Treoir 2002/38/CE ón gComhairle an 7.5.2002 (IO L 128, 15.5.2002, lch. 41).

De mhaolú ar Airteagal 12(3) féadfaidh an Chipir díolúine a choimeád ar bun, le haisíoc na cánach a íocadh sa chéim roimhe sin, maidir le soláthar cógas agus earraí bia mar bhia don duine, amach ó uachtar reoite, reoiteoga, iógart reoite, reoiteog uisce agus táirgí dá samhail agus táirgí blasta bia (brioscáin/cipíní prátaí, smailceacha agus táirgí dá samhail arna bpacáistiú mar bhia don duine gan ullmhúchán breise) go dtí an 31 Nollaig 2007.

De mhaolú ar Airteagal 12(3)(a) de Threoir 77/388/CEE, féadfaidh an Chipir ráta laghdaithe cánach breisluacha nach lú ná 5% a choimeád ar bun maidir le soláthar seirbhísí bialainne go dtí an 31 Nollaig 2007 nó go deireadh na hidirthréimhse dá dtagraítear in Airteagal 28 de Threoir 77/388/CEE, cibé acu is túisce.

Gan dochar don nós imeachta atá leagtha amach in Airteagal 27 de Threoir 77/388/CEE, féadfaidh an Chipir leanúint de nós imeachta simplithe a chur i bhfeidhm ar cháin bhreisluacha chun scéim chuntasaíochta airgid a chur i bhfeidhm agus ar luach soláthair idir daoine atá bainteach lena chéile go ceann bliana tar éis dháta an aontachais.

D'fhonn Airteagal 28(3)(b) de Threoir 77/388/CEE a chur i bhfeidhm, féadfaidh an Chipir soláthar talaimh foirgníochta dá dtagraítear i bpointe 16 d'Iarscríbhinn F den Treoir a dhíolmhú ó cháin bhreisluacha go dtí an 31 Nollaig 2007.

Ní bheidh aon éifeacht ag díolúine den sórt sin ar acmhainní dílse nach mór an bonn measúnachta dóibh a athbhunú i gcomhréir le Rialachán (CEE, CEFA) Uimh. 1553/89 ón gComhairle maidir leis na socruithe comhionanna críochnaitheacha chun acmhainní dílse a fhabhraíonn ó cháin bhreisluacha a bhailiú [2].

D'fhonn Airteagal 28(3)(b) de Threoir 77/388/CEE a chur i bhfeidhm, féadfaidh an Chipir díolúine ó cháin bhreisluacha a choimeád ar bun freisin maidir le hiompar idirnáisiúnta paisinéirí dá dtagraítear i bpointe 17 d'Iarscríbhinn F den Treoir go dtí go gcomhalltar an coinníoll atá leagtha amach in Airteagal 28(4) den Treoir nó fad a chuireann aon cheann de na Ballstáit láithreacha an díolúine chéanna i bhfeidhm, cibé acu is túisce.

2. 31992 L 0081: Treoir 92/81/CEE ón gComhairle an 19 Deireadh Fómhair 1992 maidir le struchtúir na ndleachtanna máil ar olaí mianracha a chomhchuibhiú (IO L 316, 31.10.1992, lch. 12), mar atá arna leasú go deireanach le:

- 31994 L 0074: Treoir 94/74/CE ón gComhairle an 22.12.1994 (IO L 365, 31.12.1994, lch. 46).

Gan dochar do chinneadh foirmiúil atá le glacadh de réir an nós imeachta atá leagtha amach in Airteagal 8(4) de Threoir 92/81/CEE, féadfaidh an Chipir díolúine ó dhleachtanna máil a chur i bhfeidhm ar olaí mianracha go ceann bliana tar éis dháta an aontachais.

Gan dochar do chinneadh foirmiúil atá le glacadh de réir an nós imeachta atá leagtha amach in Airteagal 8(4) de Threoir 92/81/CEE, féadfaidh an Chipir díolúine ó dhleachtanna máil breise a chur i bhfeidhm freisin ar gach cineál breosla arna úsáid le haghaidh iompair logánta paisinéirí go ceann bliana tar éis dháta an aontachais.

[2] IO L 155, 7.6.1989, p. 9. Rialachán mar atá arna leasú go deireanach le Rialachán (CE, CEFA) Uimh. 1026/1999 (IO L 126, 20.5.1999, lch. 1).

--------------------------------------------------