rannchuidiú gníomhach agus éifeachtúil ón Aontas a chur ar fáil do ghníomhaíochtaí agus do thionscnaimh as a dtiocfaidh socrú críochnaitheach ar an gcoinbhleacht idir Iosrael agus an Phalaistín bunaithe ar an réiteach arb é dhá stát i gcomhréir le paraiméadair an Aontais agus le rúin ábhartha ó UNSCR, lena n-áirítear Rún 2334 (2016) ó UNSCR, agus tograí a chur ar aghaidh maidir le gníomhaíocht an Aontais i ndáil leis an méid seo;

dlúth-theagmháil a éascú agus a choinneáil leis na páirtithe uile sa phróiseas síochána, leis na gníomhaithe polaitiúla ábhartha, le tíortha eile an réigiúin, le comhaltaí an Cheathairéid agus le tíortha ábhartha eile, chomh maith leis na Náisiúin Aontaithe agus le heagraíochtaí idirnáisiúnta ábhartha eile, amhail Léig na Stát Arabach, chun obair leo chun an próiseas síochána a neartú;

leas a bhaint as an tírdhreach athraitheach réigiúnach sa Mheánoirthear agus go háirithe as normalú an chaidrimh idir Iosrael agus roinnt de na tíortha Arabacha, chun an próiseas síochána a chur chun cinn a thuilleadh agus cur leis an gcobhsaíocht réigiúnach ar an gcaoi sin;

aird ar leith a thabhairt ar na tosca a dhéanann difear do ghné réigiúnach an phróisis síochána, don idirphlé le comhpháirtithe Arabacha, agus do chur chun feidhme an Tionscnaimh Síochána Arabaigh;

obair mar is iomchuí chun creat féideartha nua caibidlíochta a chur chun cinn agus rannchuidiú leis, i gcomhairle leis na príomh-gheallsealbhóirí uile agus leis na Ballstáit;

tacú go gníomhach le caibidlíocht síochána idir na páirtithe agus rannchuidiú leo, lena n-áirítear trí thograí a chur ar aghaidh thar ceann an Aontais agus i gcomhréir lena bheartas seanbhunaithe comhdhlúite i gcomhthéacs na caibidlíochta sin;

a áirithiú go leanfaidh an tAontas de bheith i láthair i bhfóraim ábhartha idirnáisiúnta;

rannchuidiú le bainistiú agus cosc géarchéime, lena n-áirítear i ndáil le Gaza;

rannchuidiú, i gcás ina n-iarrtar sin, le cur chun feidhme comhaontuithe idirnáisiúnta ar tháinig na páirtithe orthu agus dul i mbun idirphlé leo ar bhealach taidhleoireach i gcás nach gcomhlíontar téarmaí na gcomhaontuithe sin;

rannchuidiú le hiarrachtaí polaitiúla chun athrú bunúsach a bhaint amach as a n-eascróidh réiteach inbhuanaithe do Stráice Gaza atá ina dlúthchuid de Stát Palaistíneach a bheidh ann amach anseo agus ba cheart aghaidh a thabhairt air sa chaibidlíocht;

idirphlé cuiditheach a dhéanamh le sínitheoirí comhaontuithe faoi chuimsiú an phróisis síochána chun comhlíonadh noirm bhunúsacha an daonlathais a chur chun cinn, lena n-áirítear urraim don dlí daonnúil idirnáisiúnta, do chearta an duine agus don smacht reachta;

moltaí a dhéanamh maidir le hidirghabháil an Aontais sa phróiseas síochána agus maidir leis an mbealach is fearr chun tionscnaimh an Aontais agus iarrachtaí leanúnacha an Aontais a bhaineann leis an bpróiseas síochána a shaothrú, amhail rannchuidiú an Aontais le hathchóirithe Palaistíneacha agus lena n-áirítear gnéithe polaitiúla de thionscadail ábhartha forbartha an Aontais;

tabhairt ar na páirtithe staonadh ó ghníomhaíochtaí aontaobhacha a chuireann inmharthanacht an réitigh arb é dhá Stát i mbaol, go háirithe in Iarúsailéim agus i Limistéar C den Bhruach Thiar faoi Fhorghabháil;

tuarascáil a thabhairt go rialta, mar Thoscaire chuig an gCeathairéad, maidir le dul chun cinn agus forbairt sa chaibidlíocht, agus ar ghníomhaíochtaí an Cheathairéid, agus rannchuidiú le hullmhú chruinnithe na dToscairí Ceathairéid ar bhonn sheasaimh an Aontais agus trí chomhordú le comhaltaí eile an Cheathairéid;

rannchuidiú le cur chun feidhme bheartas an Aontais um chearta an duine i gcomhar le ISAE um Chearta an Duine, lena n-áirítear Treoirlínte an Aontais maidir le cearta an duine, go háirithe Treoirlínte an Aontais maidir le Leanaí agus Coinbhleacht Armtha chomh maith leis an bhforéigean in aghaidh na mban agus na gcailíní agus gach cineál idirdhealaithe ina n-aghaidh a chomhrac, agus beartas an Aontais maidir le Rún 1325 (2000) ó UNSCR maidir le Mná, an tSíocháin agus an tSlándáil, lena n-áirítear trí fhaireachán agus trí thuairisciú a dhéanamh ar fhorbairtí chomh maith le moltaí a cheapadh ina leith sin;

cur le tuiscint agus infheictheacht níos fearr ar ról an Aontais i measc ceannairí tuairimíochta sa réigiún.

idirphlé a dhéanamh, mar is gá, le hionadaithe na sochaí sibhialta, lena n-áirítear mná agus daoine óga, mar aon leo siúd a bhfuil baint acu le bearta chun muinín a chothú idir na páirtithe.