An tSeirbhís Eorpach Gníomhaíochta Seachtraí

 

ACHOIMRE AR:

Cinneadh 2010/427/AE — lena mbunaítear eagrúchán agus oibriú na Seirbhíse Eorpaí Gníomhaíochta Seachtraí

CAD IS AIDHM LEIS AN GCINNEADH?

Leagtar amach leis eagrúchán agus oibriú na Seirbhíse Eorpaí Gníomhaíochta Seachtraí (SEGS), a bunaíodh le Conradh Liospóin, chun tacú le hArdionadaí an Aontais do Ghnóthaí Eachtracha agus don Bheartas Slándála (Ardionadaí) lena chúraimí/cúraimí maidir le cur chun feidhme bheartas seachtrach AE.

PRÍOMHPHOINTÍ

An tSeirbhís Eorpach Gníomhaíochta Seachtraí (SEGS)

Tagann an tSeirbhís Eorpach Gníomhaíochta Seachtraí faoi údarás Ardionadaí an Aontais do Ghnóthaí Eachtracha agus don Bheartas Slándála, agus tacaíonn sí leis/léi sna réimsí seo a leanas:

• comhbheartas eachtrach agus slándála (CES) AE a sheoladh, lena n–áirítear an comhbheartas slándála agus cosanta (CBSC);
• Uachtaránacht Chomhairle na hEorpa um Ghnóthaí Eachtracha;
• Leas–Uachtaránacht an Choimisiúin Eorpaigh i réimse an chaidrimh sheachtraigh.

Tugann SEGS faoin méid seo a leanas freisin:

• cuidíonn sé le hArdrúnaíocht na Comhairle, leis an gCoimisiún agus le seirbhísí taidhleoireachta thíortha AE d’fhonn comhsheasmhacht ghníomh seachtrach AE a áirithiú; agus
• tacaíonn sé leis an gCoimisiún chun cláir agus ionstraimí airgeadais a bhaineann le gníomh seachtrach AE a ullmhú agus a chur chun feidhme.

Tá ceanncheathrú SEGS lonnaithe sa Bhrúiséil agus é faoi bhainistiú Ard–Rúnaí, le cabhair ó thriúr Leas–Ard–Rúnaithe, agus ag oibriú faoi údarás na hArdrúnaíochta. Eagraítear riarachán lárnach SEGS i stiúrthóireachtaí a dhéileálann leis an méid seo a leanas:

• limistéir gheografacha gníomhaíochta, ina gcumhdaítear gach tír agus gach réigiún domhanda;
• cearta daonna, saincheisteanna domhanda agus iltaobhacha;
• CBSC agus freagairt ar ghéarchéimeanna.

Toscaireachtaí AE

• Tá na toscaireachtaí AE le tíortha nach tíortha den Aontas Eorpach iad agus le heagraíochtaí idirnáisiúnta éagsúla mar chuid de SEGS freisin. Is é Airteagal 221 den Chonradh ar Fheidhmiú an Aontais Eorpaigh an bonn dlíthiúil faoi na toscaireachtaí sin. Tá gach ceann díobh faoi stiúir Ceannasaí Toscaireachta, faoi stiúir an Ardionadaí agus SEGS, a dhéanann ionadaíocht in AE thar ceann na tíre lena mbaineann. Oibríonn na toscaireachtaí lena chéile agus comhroinneann siad faisnéis le seirbhísí taidhleoireachta thíortha AE.
• Tá Ard–Rúnaí Feidhmeannach na Seirbhíse Eorpaí Gníomhaíochta Seachtraí freagrach as measúnú airgeadais agus riaracháin gach toscaireachta.

Bainistiú Géarchéime

Áirítear na strúchtúir seo a leanas ar na struchtúir CBSC agus freagartha géarchéime:

• An Ard-Stiúrthóireacht um Bainistiú Géarchéime agus um Pleanáil;
• An Cumas Sibhialtach Pleanála agus Seolta;
• Foireann Mhíleata an Aontais Eorpaigh. Tá na Ranna seo a leanas faoi údarás Ard–Stiúrthóir SEGS:
  • An Stiúrthóireacht um Choincheapa agus um Chumas,
  • An Stiúrthóireacht Faisnéise,
  • An Stiúrthóireacht um Oibríochtaí,
  • An Stiúrthóireacht um Lóistíocht,
  • An Stiúrthóireacht um Chórais Chumarsáide agus Faisnéise agus Cibearchosanta;
• Lárionad Anailíse Faisnéise an Aontais Eorpaigh (INTCEN), ar a dtugtaí an Lárionad Staide (SITCEN) roimhe seo.

CÉN UAIR ATÁ TOSACH FEIDHME AN CHINNIDH?

Tá sé i bhfeidhm ón 26 Iúil 2010.

CÚLRA

Chun tuilleadh faisnéise a fháil, féach:

• Maidir leis an tSeirbhís Eorpach Gníomhaíochta Seachtraí (An tSeirbhís Eorpach Gníomhaíochta Seachtraí).

PRÍOMHDHOICIMÉAD

Cinneadh 2010/427/AE ón gComhairle an 26 Iúil 2010 lena mbunaítear eagrúchán agus oibriú na Seirbhíse Eorpaí Gníomhaíochta Seachtraí (IO L 201, 3.8.2010, lgh. 30-40)

DOICIMÉID GHAOLMHARA

Leagan comhdhlúite den Chonradh ar Fheidhmiú an Aontais Eorpaigh — Cuid 5 — Gníomhaíochtaí seachtracha an Aontais — Teideal VI — Caidreamh an Aontais le heagraíochtaí idirnáisiúnta agus tríú tíortha agus toscaireachtaí an Aontais — Airteagal 221 (IO C 202, 7.6.2016, lch. 147)

Cinneadh 2001/80/CBES ón gComhairle an 22 Eanáir 2001 maidir le Foireann Mhíleata an Aontais Eorpaigh a bhunú (IO L 27, 30.1.2001, lgh. 7-11)

Rinneadh leasuithe comhleanúnacha ar Chinneadh 2001/80/CBES a ionchorprú sa téacs bunaidh. Ní de luach ar an leagan comhdhlúite seo ach luach doiciméadach amháin.

Nuashonraithe 10.11.2020