Leathadh galar ainmhithe amhail galar saicíneach na muc a chosc

 

ACHOIMRE AR:

Treoir 92/119/CEE— lena dtugtar isteach bearta ginearálta chun galair áirithe ainmhithe a rialú agus bearta sonracha i ndáil le galar saicíneach na muc

CAD IS AIDHM LEIS AN TREOIR?

Féachtar inti le cosc a chur ar leathadh galar ainmhithe agus brabúsacht feirmeoireacht beostoic a chaomhnú trí bhearta a shainiú chun ainmhithe a chosaint ar ghalair áirithe.

PRÍOMHPHOINTÍ

Fógra

Ní mór do thíortha AE fógra a thabhairt don údarás inniúil atá freagrach as seiceálacha tréidliachta a dhéanamh ar na cásanna uile galar arna gcumhdach faoin treoir seo gan mhoill.

Galair ainmhithe

Ordaítear sa treoir bearta is infheidhme i gcás ráige den ghalar gormtheanga, de ghalar saicíneach na muc, den fhiabhras Afracach muc nó de cheann ar bith de na galair seo a leanas:

• plá na mbó;
• peste des petits ruminants;
• galar fuilreatha eipeasótach fianna;
• bolgach caorach agus bolgach gabhar;
• stómaitíteas saicíneach;
• galar an chraicinn chnapánaigh; agus
• Heipitíteas eansótach.

Diagnóis

• Má tá amhras ann go bhfuil ainmhithe ionfhabhtaithe le ceann de na galair thuas, ní mór don tréidlia oifigiúil láithreacht an ghalair sin ag an ngabháltas a fhíorú. Chun na críocha sin, ní mór dó nó di bearta imscrúdaitheacha a chur i bhfeidhm agus áirítear leis sin samplaí a ghlacadh do shaotharlanna.
• Ní mór an gabháltas lena mbaineann, chomh maith le gabháltais ar bith eile a bhféadfadh foinse an ghalair bheith iontu, a chur faoi fhaireachas oifigiúil. Ní mór don údarás inniúil a ordú go ndéanfaí líon beart, lena n-áirítear áireamh agus leithlisiú chatagóirí uile ainmhithe na speiceas atá soghabhálach i leith an ghalair.
• Ní mór do shaotharlanna náisiúnta, arna n-ainmniú ag tíortha AE do gach galar, an próiseas diagnóiseach agus úsáid imoibrithe na saotharlann a chomhordú. Tá na saotharlanna sin le hoibriú i gcomhar le saotharlanna tagartha AE.

Dearbhú

A luaithe is a dhearbhaítear láithreacht an ghalair ag an ngabháltas, ní mór don údarás inniúil na bearta a chur i bhfeidhm a bhaineann le:

• marú ainmhithe na speiceas atá soghabhálach i leith an ghalair;
• cóireáil na n-ábhar a d’fhéadfadh bheith éillithe;
• glanadh na bhfoirgneamh a úsáidtear do chóiríocht ainmhithe;
• ainmhithe fiáine a d’fhéadfadh bheith ionfhabhtaithe.

Féadfar eisceachtaí a thabhairt d’aonaid táirgthe shláintiúil.

Ina theannta sin, ní mór don údarás inniúil crios cosanta 3 km ar a laghad agus crios faireachais 10 km ar a laghad a bhunú thart ar an ngabháltas ionfhabhtaithe, sa chás go bhfuil bearta sonracha le cur i bhfeidhm ar na hainmhithe agus ar na gabháltais ar feadh tréimhse a bheidh chomh fada le tréimhse goir an ghalair ar a laghad. Ní mór na bearta a dhéanfar a chur in iúl do na daoine atá ina gcónaí sna criosanna sin.

Cosc

• Féadfaidh an Coimisiún Eorpach a chinneadh gur cheart na bearta coisctheacha a chomhlánú le vacsaíniú, cé gur eisceacht é sin fós. Sa chás sin, ní mór na hainmhithe vacsaínithe a shonrú le marc infheicthe agus ní fhéadfaidh siad an limistéar vacsaínithe a fhágáil.
• Tá plean náisiúnta teagmhasach leagtha amach, do thíortha AE ar fad, maidir leis na bearta atá le déanadh i gcás ráige de cheann de na galair arna gcumhdach faoin treoir seo. Tá na pleananna sin faofa ag an gCoimisiún agus féadfar iad a leasú i bhfianaise cúinsí.

Nós imeachta coiste

Cuidíonn an Buanchoiste um Plandaí, Ainmhithe, Bia agus Beatha leis an gCoimisiún.

CÉN UAIR ATÁ TOSACH FEIDHME NA TREORACH?

Tá sé i bhfeidhm ón 8 Eanáir 1993. Bhí sé le corprú ag tíortha AE sa dlí náisiúnta faoin 1 Deireadh Fómhair 1993.

Déanfar é a aisghairm le Rialachán (AE) 2016/429 agus cuirfear ina ionad é ón 21 Aibreán 2021.

PRÍOMHDHOICIMÉAD

Treoir 92/119/CEE ón gComhairle an 17 Nollaig 1992lena dtugtar isteach bearta ginearálta Comhphobail chun galair áirithe ainmhithe a rialú agus bearta sonracha i ndáil le galar saicíneach na muc (IO L 62, 15.3.1993, lgh. 69–85)

Rinneadh leasuithe comhleanúnacha ar Threoir 92/119/CEE a chorprú isteach sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Treoir 2002/60/CE ón gComhairle an 27 Meitheamh 2002 lena leagtar síos forálacha sonracha chun fiabhras Afracach na muc a rialú agus lena leasaítear Treoir 92/119/CEE maidir le galar Teschen agus fiabhras Afracach na muc (IO L 192, 20.7.2002, lgh. 27–46)

Féach an leagan comhdhlúite

Treoir 2000/75/CE ón gComhairle an 20 Samhain 2000 lena leagtar síos forálacha sonracha maidir le galar gormtheanga a rialú agus a dhíothú (IO L 327, 22.12.2000, lgh. 74–83)

Féach an leagan comhdhlúite

Cinneadh 2000/428/CE ón gCoimisiún an 4 Iúil 2000 lena mbunaítear nósanna imeachta diagnóiseacha, modhanna samplála agus critéir chun measúnú a dhéanamh ar thoradh na dtástálacha saotharlainne maidir le dearbhú agus diagnóis dhifreálach ghalar saicíneach na muc (curtha in iúl faoi uimhir dhoiciméid C(2000) 1805) (IO L 167, 7.7.2000, lgh. 22–32)

Nuashonraithe 26.10.2016