Bunaítear leis an rialachán an Institiúid Eorpach um Nuálaíocht agus Teicneolaíocht (EIT), a cruthaíodh in 2008. Glactar go foirmiúil leis an gcinneadh Clár Oibre Straitéiseach um Nuálaíocht EIT don tréimhse ó 2021 go 2027.

Leagtar síos leo an clár oibre do EIT ó 2021 go 2027 agus tá sé mar aidhm leo gnéithe de na Pobail Eolais agus Nuálaíochta (PENanna) a fheabhsú, lena n–áirítear:

a samhail um maoiniú
a n–oscailteacht agus a dtrédhearcacht
a gcomhtháthú in éiceachórais nuálaíochta áitiúla.

PRÍOMHPHOINTÍ

Misean EIT

Leagtar amach leis an rialachán tosaíochtaí agus riachtanais airgeadais EIT do 2021-2027 i gClár Oibre Straitéiseach um Nuálaíocht de réir Fhís Eorpach — an Clár Réime um Thaighde agus um Nuálaíocht a bunaíodh le Rialachán (AE) 2021/695 (féach an achoimre).

Is é misean EIT cur le fás eacnamaíoch inbhuanaithe agus iomaíochas trí fheabhas a chur ar chumas an Aontais Eorpaigh (AE) agus Bhallstáit AE a bheith nuálach agus dul i ngleic leis na dúshláin mhóra atá os comhair na sochaí. Is í príomhghné EIT an triantán eolais (oideachas, taighde agus nuálaíocht) a chomhtháthú.

Is iad seo a leanas príomhghnéithe an Chláir Oibre Straitéisigh um Nuálaíocht arna chomhaontú:

ní foláir go mbeidh PENanna níos oscailte, níos cuimsithí agus níos trédhearcaí;
raon feidhme na tacaíochta do chumas fiontraíochta agus nuálaíochta san ardoideachas a fheabhsú;
an incháilitheacht agus an buiséad le haghaidh gníomhaíochtaí faoin Scéim Nuálaíochta Réigiúnach (RIS) a leathnú chuig tíortha a bhfuil scóir mheasartha acu i leith na nuálaíochta;
samhail shimplithe um maoiniú bunaithe ar fheidhmíocht do PENanna;
córas faireacháin agus measúnaithe leanúnach do PENanna, lena n–áirítear faireachán níos dlúithe a dhéanamh ar a n–oscailteacht;
gaol EIT le PENanna a shoiléiriú i ndiaidh dheireadh thréimhse an chreat-chomhaontaithe comhpháirtíochta;
seoladh PENanna nua
- in earnálacha an chultúir agus na cruthaitheacha in 2022 nó 2023
- i dtionscail; earnálacha uisce, mara agus muirí; agus éiceachórais in 2026.

Tá EIT deartha chun a cuid gníomhaíochtaí a dhéanamh go neamhspleách ar údaráis náisiúnta agus ar bhrúnna seachtracha.

Ról agus freagrachtaí PENanna

Déanann PENanna an méid seo a leanas ar a laghad:

gníomhaíochtaí agus infheistíochtaí nuálaíochta lena n–áirítear cruthú gnólachtaí nuathionscanta nuálacha agus forbairt gnólachtaí nuálacha a dhéanann ardoideachas agus taighde a chomhtháthú go hiomlán a éascú;
taighde bunaithe ar nuálaíocht i réimsí ina bhfuil príomhleas eacnamaíoch, comhshaoil agus sochaíoch agus leas á bhaint as taighde AE agus taighde náisiúnta;
gníomhaíochtaí oideachais agus oiliúna, go háirithe ar leibhéal máistreachta agus dochtúireachta, agus cúrsaí oiliúna gairmiúla, i réimsí ina bhféadfaí riachtanais shocheacnamaíocha agus shochéiceolaíocha Eorpacha a bhaint amach;
gníomhaíochtaí for–rochtana agus scaipeadh dea–chleachtas sa nuálaíocht agus fócas ar chomhar a fhorbairt idir ardoideachas, taighde agus gnó, lena n–áirítear na hearnálacha seirbhíse agus airgeadais, agus, nuair is ábhartha, eagraíochtaí poiblí agus tríú earnáil;
Gníomhaíochtaí RIS i dtíortha a bhfuil scóir mheasartha acu i leith na nuálaíochta, a bheidh comhtháite go hiomlán i straitéis ilbhliantúil PENanna chun acmhainn nuálaíochta a neartú agus éiceachórais nuálaíochta inbhuanaithe a fhorbairt;
cistí a shlógadh ó fhoinsí poiblí agus príobháideacha, ag féachaint go sonrach le cion méadaitheach a ardú ó fhoinsí príobháideacha agus ó ioncam arna ghiniúint lena gcuid gníomhaíochtaí féin;
faisnéis ar éileamh maidir le haschuir agus torthaí taighde agus nuálaíochta, agus cearta maoine intleachtúla gaolmhara.

Buiséad EIT

Ranníocann AE EUR 2 726 000 000 ó chistí Fhís Eorpach ag praghsanna 2021, agus EUR 210 000 000 breise ag praghsanna 2018, don tréimhse 2021-2027. Féadfaidh EIT maoiniú breise a fháil ó chláir eile AE.

Faireachán agus meastóireacht EIT

Déanann an Coimisiún Eorpach meastóireacht ar fheidhmíocht EIT agus na PENanna le cúnamh ó shaineolaithe seachtracha neamhspleácha agus tuairimí na bpáirtithe leasmhara á gcur san áireamh.

CÉN UAIR ATÁ TOSACH FEIDHME AN RIALACHÁIN?

Tá feidhm ag Rialachán (AE) 2021/819 ón 28 Bealtaine 2021 seachas roinnt airteagal atá i bhfeidhm ón 1 Eanáir 2021. Le Rialachán (AE) 2021/819, athbhreithníodh Rialachán (CE) Uimh. 294/2008 agus na leasuithe a rinneadh air ina dhiaidh sin agus cuireadh in ionad an Rialacháin agus na leasuithe sin é.

Tá feidhm le Cinneadh (AE) 2021/820 ón 1 Eanáir 2021.

CÚLRA

Féach chomh maith:

Nuálaíocht a áirithiú (EIT)
Straitéis EIT 2021-2027 (EIT)
Fís Eorpach (An Coimisiún Eorpach).

PRÍOMHDHOICIMÉID

Rialachán (AE) 2021/819 ó Pharlaimint na hEorpa agus ón gComhairle an 20 Bealtaine 2021 maidir leis an Institiúid Eorpach um Nuálaíocht agus Teicneolaíocht (athmhúnlú) (IO L 189, 28.5.2021, lgh. 61-90)

Cinneadh (AE) 2021/820 ó Pharlaimint na hEorpa agus ón gComhairle an 20 Bealtaine 2021 maidir le Clár Oibre Straitéiseach um Nuálaíocht na hInstitiúide Eorpaí um Nuálaíocht agus Teicneolaíocht (EIT) 2021-2027: Borradh a chur faoi Thallann Nuálaíochta agus faoi Chumas Nuálaíochta na hEorpa agus lena n-aisghairtear Cinneadh Uimh. 1312/2013/AE (IO L 189, 28.5.2021, lgh. 91-118)

DOICIMÉID GHAOLMHARA

Rialachán (AE) 2021/695 ó Pharlaimint na hEorpa agus ón gComhairle an 28 Aibreán 2021 lena mbunaítear Fís Eorpach — an Clár Réime um Thaighde agus um Nuálaíocht, lena leagtar síos a rialacha maidir le rannpháirtíocht agus scaipeadh, agus lena n–aisghairtear Rialacháin (AE) Uimh.1290/2013 agus (AE) Uimh. 1291/2013 (IO L 170, 12.5.2021, lgh. 1-68)

Nuashonraithe 19.07.2021

Top

All