Europass — ag tacú le foghlaim agus obair san Eoraip

 

ACHOIMRE AR:

Cinneadh (AE) 2018/646 maidir le creat coiteann le haghaidh soláthar seirbhísí níos fearr do scileanna agus do cháilíochtaí (Europass)

CAD IS AIDHM LEIS AN GCINNEADH?

Nuashonraítear leis seirbhís Europass chun cabhrú le daoine a gcuid scileanna, cáilíochtaí agus taithí a chur in iúl trí theimpléid chaighdeánaithe a úsáid. Is é is aidhm leis freastal ar riachtanais athraitheacha na ndaoine seo a leanas:

• úsáideoirí aonair, amhail foghlaimeoirí, cuardaitheoirí poist, fostóirí, oibrithe agus oibrithe deonacha;
• páirtithe leasmhara ábhartha, amhail soláthraithe oideachais, oiliúna agus oibre don aos óg, soláthraithe treorach, fostóirí, seirbhísí fostaíochta poiblí, ceardchumainn, eagraíochtaí óige agus lucht déanta beartas.

Tá Europass bunaithe ar uirlisí gréasánbhunaithe agus ar fhaisnéis ábhartha atá ar fáil. Tá a úsáid ar bhonn iomlán saorálach.

Aisghairtear Cinneadh Uimh. 2241/2004/CE leis.

PRÍOMHPHOINTÍ

Úsáideann Europass ardán ar líne chun an méid a leanas a sholáthar:

• uirlisí gréasánbhunaithe chun
  • doiciméadú agus cur síos a dhéanamh ar fhaisnéis phearsanta i bhformáidí éagsúla, lena n–áirítear teimpléid CV;
  • doiciméadú agus cur síos a dhéanamh ar scileanna* agus cáilíochtaí a bhaintear amach ón obair nó ón oideachas;
  • measúnú agus féinmheasúnú a dhéanamh ar scileanna;
  • rochtain a fháil ar Fhorlíonadh Europass* teimpléid;
• eolas faoi agus naisc chuig
  • deiseanna foghlama;
  • cáilíochtaí agus a gcreataí agus a gcórais;
  • deiseanna chun foghlaim neamhfhoirmiúil agus neamhfhoirmeálta a bhailíochtú;
  • cleachtais aitheantais fhrithpháirtigh i dtíortha éagsúla;
  • treoir foghlama agus gairme dóibh siúd atá ag féachaint le dul thar lear;
  • acmhainní a bhaineann le gníomhaíochtaí agus gníomhaireachtaí ábhartha ar leibhéal AE;
  • scileanna agus cáilíochtaí a bheadh úsáideach do náisiúnach neamh-AE a atá ag teacht chuig an Aontas Eorpach, nó a chónaíonn san Aontas Eorpach.

Maidir leis an ardán ar líne agus na huirlisí agus an t–ábhar gréasánbhunaithe:

• tá siad so-úsáidte, slán, saor in aisce agus inrochtana do dhaoine faoi mhíchumas;
• tá cead ag údaráis náisiúnta agus ag páirtithe leasmhara eile athúsáid a bhaint astu;
• is féidir le húsáideoirí sonraí a stóráil iontu, amhail próifíl phearsanta;
• tá siad ar fáil i dteangacha oifigiúla uile an Aontais Eorpaigh;
• tacaíonn siad le seirbhísí chun doiciméid dhigiteacha a fhíordheimhniú.

Maidir le forlíontaí Europass:

• eisíonn údaráis náisiúnta iad ag baint úsáid as an teimpléad ábhartha;
• forbraíonn agus nuashonraíonn an Coimisiún Eorpach iad i ndlúthchomhar le rialtais náisiúnta, páirtithe leasmhara, Comhairle na hEorpa agus Eagraíocht Oideachais, Eolaíochta agus Chultúir na Náisiún Aontaithe (UNESCO);
• eisítear iad saor in aisce, go leictreonach más féidir, sa teanga náisiúnta (nó i dteanga Eorpach eile más féidir);
• ní ghabhann siad in ionad, bundioplóma nó bunteastais, agus ní aithnítear bundioplóma nó bunteastas go foirmiúil leo.

Déanann an Coimisiún:

• an t–ardán ar líne a bhainistiú;
• rannpháirtíocht ghníomhach na n–údarás náisiúnta agus na bpáirtithe leasmhara i gcur chun feidhme agus i bhforbairt an chórais a áirithiú;
• soláthar le haghaidh malartú dea-chleachtais;
• a áirithiú go bhfuil cur chun cinn, treoir agus faisnéis éifeachtach agus leordhóthanach ar fáil d’úsáideoirí agus do pháirtithe leasmhara ar fud an Aontais Eorpaigh;
• ní mór dó tuarascáil mheastóireachta a chur faoi bhráid Pharlaimint na hEorpa agus na Comhairle faoin 23 Bealtaine 2023 agus gach 5 bliana ina dhiaidh sin.

Tá údaráis náisiúnta thíortha AE freagrach as an gcóras a chur chun feidhme agus as an tacaíocht agus an infheictheacht is gá a sholáthar ina leith, lena n–áirítear naisc le láithreáin ghréasáin náisiúnta ábhartha.

Maidir leis an gcóras Europass:

• tugtar urramú leis do reachtaíocht AE maidir le cosaint sonraí pearsanta, go háirithe Rialachán (AE) 2016/679 maidir le cosaint sonraí pearsanta agus Rialachán (AE) 2018/1725 maidir le cosaint daoine aonair i ndáil le próiseáil sonraí pearsanta ag institiúidí, comhlachtaí, oifigí agus gníomhaireachtaí an Aontais Eorpaigh;
• tá sé oscailte do thíortha Eorpacha eile;
• faigheann sé cómhaoiniú ó AE.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 22 Bealtaine 2018.

CÚLRA

Ar an 10 Meitheamh 2016, d’eisigh an Coimisiún teachtaireacht “Clár Oibre na Scileanna Nua don Eoraip”. Ceapadh é sin chun scileanna a dhéanamh níos infheicthe agus níos inchomparáide chun cabhrú le daoine roghanna gairme níos fearr a dhéanamh.

Ba é ceann de na 10 dtogra a bhain leis an bunchreat Europass a glacadh in 2004 (Cinneadh Uimh. 2241/2004/CE) a nuashonrú. Cuimsítear leis sin sraith de 5 theimpléad chun cabhrú le daoine a gcuid scileanna agus cáilíochtaí a shainaithint chun CVanna agus punanna a chur i dtoll a chéile.

Tá sé mar aidhm ag Europass bheith inrochtana ag gach úsáideoir féideartha, lena n–áirítear daoine nach bhfuil oideachas maith orthu, daoine scothaosta, daoine atá dífhostaithe go fadtéarmach agus daoine faoi mhíchumas, chomh maith le daoine ardoilte agus daoine a bhfuil léann digiteach orthu.

Ó 2005 i leith, rinneadh os cionn 93 milliún teimpléad doiciméid a íoslódáil agus cruthaíodh os cionn 60 milliún CV Europass ar líne.

Le haghaidh breis faisnéise, féach:

• Europass (An Coimisiún Eorpach).

PRÍOMHTHÉARMAÍ

PRÍOMHDHOICIMÉAD

Cinneadh (AE) Uimh. 2018/646 ó Pharlaimint na hEorpa agus ón gComhairle an 18 Aibreán 2018 maidir le creat coiteann le haghaidh soláthar seirbhísí níos fearr do scileanna agus do cháilíochtaí (Europass) agus lena n–aisghairtear Cinneadh Uimh. 2241/2004/CE (IO L 112, 2.5.2018, lgh. 42-50)

DOICIMÉAD GAOLMHAR

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún — Clár Oibre Nua Scileanna don Eoraip: Ag obair le chéile chun caipiteal daonna, infhostaitheacht agus iomaíochas a neartú (COM(2016) 381 final, 10.6.2016)

Nuashonraithe 28.06.2019