Tá sé mar aidhm leis an rún na dúshláin agus na bealaí a shainaithint inar féidir ról an oideachais agus na hoiliúna a fheabhsú chun téarnamh geilleagrach inbhuanaithe a bhaint amach agus chun éagothroime a laghdú in AE.

PRÍOMHPHOINTÍ

Dúshláin

Tugtar ar aird sa rún go bhfuil roinnt dúshlán in AE faoi láthair, lena n-áirítear an ghéarchéim eacnamaíoch agus airgeadais atá fós ag dul ar aghaidh, géarchéim teifeach thar cuimse, dífhostaíocht ard i measc na n-óg agus radacú agus sceimhlitheoireacht mhéadaithe.

Sa chomhthéacs sin, tá ról bunúsach ag an oideachas agus oiliúint ní amháin ó thaobh rathúnas eacnamaíoch a chur chun cinn ach freisin ó thaobh cuimsiú, ómós don éagsúlacht, saoránacht ghníomhach agus bunluachanna AE a chur chun cinn.

Scileanna, inniúlachtaí agus eolas le haghaidh dul chun cinn eacnamaíoch agus sóisialta

D’fhonn téarnamh geilleagrach inbhuanaithe a bhaint amach le breis post agus poist níos fearr, éagothroime a laghdú agus cuimsiú, saoránacht agus comhtháthú sóisialta a chur chun cinn, tá athchóirithe tábhachtacha i gcórais oideachais agus oiliúna AE riachtanach. Ina measc sin tá siad seo a leanas:

dul i gcion ar an bpobal is mó atá faoi mhíbhuntáiste ón taobh oideachais agus sóisialta chun cur ar chumas gach duine óig dul chun cinn a dhéanamh ina gcuid oideachais agus a gcumas iomlán a fhorbairt is cuma cén cúlra as a dtagann siad agus a gcuimsiú, a scileanna sóisialta agus a smaointeoireacht chriticiúil a chur chun cinn;
infheistíocht imleor san oideachas a chinntiú ar gach leibhéal d’fhonn bearnaí i scileanna a shainaithint agus dul i ngleic leo agus a tionchar fuascailte a fheabhsú, ag baint leas iomlán as uirlisí airgeadais ar leibhéal AE;
feabhas a chur ar oideachas agus oiliúint tosaigh agus leantach do mhúinteoirí;
piarfhoghlaim agus comhroinnt dea-chleachtais a spreagadh;
monatóireacht ar dhul chun cinn i dtreo chuspóirí agus thosaíochtaí ET 2020 atá comhaontaithe i gcoiteann.

Gníomhartha

Chun na cuspóirí thuas a bhaint amach, spreagtar an Coimisiún Eorpach, chun na nithe seo a leanas a dhéanamh:

leanúint de chur chun cinn ghnóthú na spriocanna socheacnamaíoch agus sibhialta in oideachas agus oiliúint trí chlár oibre Erasmus+ 2017 agus ionstraimí airgeadais eile AE;
an tábhacht atá le hoideachas agus oiliúint i dtionscnaimh AE tar éis 2020 maidir le fás, poist agus inbhuanaitheacht a athdheimhniú;
an clár nua scileanna don Eoraip a mholadh agus a chur chun feidhme;
tacú le tíortha AE chun saoránacht ghníomhach agus luachanna bunúsacha a chur chun cinn mar ghníomh leantach do Dhearbhú Pháras, mar aon le Comhairle na hEorpa.

Maoiniú AE

D’fhonn gníomhaíochtaí den sórt sin a mhaoiniú, cuirfear Cistí Struchtúracha agus Infheistíochta AE, Ráthaíocht d’Aos Óg na hEorpa, Ciste AE um Infheistíocht Straitéiseach agus an Clár Erasmus+ i ngníomh.

CÚLRA

Chun tuilleadh faisnéise a fháil, féach:

Tairseach óige an Choimisiúin Eorpaigh;
an tuarascáil maidir le hAos Óg AE 2015;
Tuarascáil Chomhpháirteach 2015 maidir le cur chun feidhme chreat straitéiseach ET 2020 maidir le comhar in oideachas agus oiliúint.

PRÍOMHDHOICIMÉAD

Rún ón gComhairle agus ó Ionadaithe Rialtais na mBallstát, ag teacht le chéile laistigh den Chomhairle, an 24 Feabhra 2016 maidir le forbairt shocheacnamaíoch agus cuimsitheacht a chur chun cinn in AE trí oideachas: rannchuidiú an oideachais agus na hoiliúna don Seimeastar Eorpach 2016 (IO C 105, 19.3.2016, lgh.1-4)

Nuashonraithe 25.07.2016

Top