Agóidí idir infheisteoirí coigríche agus rialtais an Aontais Eorpaigh

Déantar soiléiriú sa rialachán ar an bhfreagracht airgeadais idir an tAontas Eorpach (AE) agus a bhalltíortha nuair a thugann infheisteoir as tír nach bhfuil in AE éileamh maidir le sárú ar chomhaontú idirnáisiúnta a bhfuil AE mar pháirtí ann.

GNÍOMH

Rialachán (AE) Uimh. 912/2014 an 23 Iúil 2014 ó Pharlaimint na hEorpa agus ón gComhairle lena mbunaítear creat chun bainistiú a dhéanamh ar an bhfreagracht airgeadais a bhaineann le binsí fiosruithe um réiteach díospóidí idir infheisteoir-agus-stát lena mbunaítear comhaontuithe idirnáisiúnta a bhfuil an tAontas Eorpach mar pháirtí ann

ACHOIMRE

Déantar soiléiriú sa rialachán ar an bhfreagracht airgeadais idir an tAontas Eorpach (AE) agus a bhalltíortha nuair a thugann infheisteoir as tír nach bhfuil in AE éileamh maidir le sárú ar chomhaontú idirnáisiúnta a bhfuil AE mar pháirtí ann.

CAD A DHÉANANN AN RIALACHÁN SEO?

Faoi Chonradh Liospóin, bhí infheistíocht dhíreach ón gcoigríche mar chuid de bheartas trádála AE a bhfuil inniúlacht eisiach ag AE ina leith. Ciallaíonn sé sin go ndéanann an Coimisiún Eorpach caibidlíocht thar ceann thíthe an AE maidir leis an ngné infheistíochta de chomhaontuithe trádála a chuirtear i gcrích le tíortha nach bhfuil in AE. D’fhéadfaí córas um réiteach díospóidí idir infheisteoir-stát (ISDS) a chur san áireamh sna comhaontuithe seo. Is beart cosanta é sin a thugann an ceart d’infheisteoirí ó thíortha lena mbaineann nach bhfuil in AE caingean dlí a thionscnamh i gcoinne tíre AE ina bhfuil airgead infheistithe aige. Baineann na héilimh le sárú líomhnaithe ar na comhaontuithe idirnáisiúnta.

Cinntear sna rialacha nua cibé arb é AE, arna ionadú ag an gCoimisiún, nó na rialtais Eorpacha a chaithfidh na costais airgeadais a íoc, lena n-áirítear cúiteamh, de bharr na ndíospóidí.

EOCHAIRPHOINTÍ

Critéir lena ndéantar soiléiriú maidir le comhroinnt freagracht airgeadais

• 1.

  Is é AE a sheasann na costais airgeadais nuair a bhaineann an t-éileamh a thugann infheisteoir le beart a ghlacann institiúid, comhlacht nó gníomhaireacht AE.

• 2.

  Is é an tír AE lena mbaineann a sheasann na costais airgeadais nuair a bhaineann an t-éileamh a thugann infheisteoir le beart atá glactha aige.

• 3.

  Más tír AE a ghlacann beart, ach é ina cheangal de réir dhlí AE, is é AE atá freagrach ó thaobh airgid de.

Nós Imeachta

Comhar agus comhairliúcháin: ní mór don Choimisiún agus don tír AE lena mbaineann díospóid comhar a dhéanamh, comhairliúchán a dhéanamh agus faisnéis a chomhroinnt. Tá foráil sa rialachán freisin le haghaidh rialacha iompair nuair a thugann AE agus an tír AE lena mbaineann faoi imeachtaí eadrána (imeachtaí chun an díospóid a réiteach).

Easaontú maidir leis an bhfreagracht airgeadais: i gcás gurb é AE an freagróir sa díospóid, agus go measann an Coimisiún go bhfuil an tír AE lena mbaineann freagrach i ndáiríre as na costais a éiríonn de bharr na headrána, ansin ní mór dóibh teacht ar chomhaontú lena chéile.

Mura n-aontaíonn an tír AE leis sin, is féidir leis an gCoimisiún ansin cinneadh a ghlacadh a chuireann iallach ar an tír atá i gceist an tsuim a íocadh a aisíoc.

CÉN UAIR A BHEIDH FEIDHM LEIS AN RIALACHÁN?

Beidh feidhm leis an rialachán ón 17 Meán Fómhair 2014.

Tá tuilleadh eolais ar fáil ó shuíomh Gréasáin Ard-Stiúrthóireacht Trádála an Choimisiúin Eorpaigh.

Nuashonraithe 03.12.2014