Comhaontú idir AE agus an tSín maidir le tásca geografacha a chosaint

 

ACHOIMRE AR:

Comhaontú idir AE agus an tSín i dtaca le comhar i leith na dtásc geografach agus a gcosaint

Cinneadh (AE) 2020/1832 lena dtugtar i gcrích an Comhaontú idir AE agus an tSín i dtaca le comhar i leith na dtásc geografach agus a gcosaint

Cinneadh (AE) 2020/1111 lena sínítear an comhaontú idir AE agus an tSín i dtaca le comhar i leith na dtásc geografach agus a gcosaint

CAD IS AIDHM LEIS AN GCOMHAONTÚ AGUS LEIS NA CINNTÍ?

• Féachtar leis an gcomhaontú ardleibhéal cosanta a áirithiú le haghaidh thásca geografacha AE atá liostaithe ina iarscríbhinní in AE agus sa tSín, agus an comhar ar cheisteanna a bhaineann le tásca geografacha idir an tAontas Eorpach agus an tSín a neartú.
• Le Cinneadh (AE) 2020/1111 sínítear an comhaontú agus le Cinneadh (AE) 2020/1832 tugtar an comhaontú i gcrích thar ceann an Aontais Eorpaigh.

PRÍOMHPHOINTÍ

Tásca geografacha

• Comhartha ar leith is ea tásc geografach a úsáidtear chun táirge a shainaithint a mbaineann a cháilíocht, a cháil nó tréithe eile den sórt sin lena thionscnamh geografach.
• Tá tásca geografacha ina gcuid de scéimeanna um cháilíocht AE atá leagtha amach i Rialacháin (AE) Uimh. 1151/2012 (féach an achoimre), Rialachán (AE) Uimh. 1308/2013 (féach an achoimre) agus Rialachán (AE) Uimh. 2019/787 (féach an achoimre).

Raon feidhme

• Tá feidhm ag an gcomhaontú seo maidir le haithint agus cosaint tásc geografach le haghaidh táirgí a thionscnaíonn ó chríocha an dá pháirtí agus atá liostaithe in Iarscríbhinní III, IV, V agus VI a ghabhann leis an gcomhaontú.
• Aontaíonn an dá pháirtí go leathnóidh siad raon feidhme an chomhaontaithe chun tásca geografacha breise a chur ann.

Tásca geografacha bunaithe

• Leagtar amach sa chomhaontú na gnéithe atá riachtanach chun tásca geografacha a chosaint, lena n-áirítear próisis agus seiceálacha riaracháin, agus nós imeachta freasúra chun úsáideoirí ainmneacha roimhe sin a chosaint.
• Tá sonraíochtaí teicniúla leagtha amach in Iarscríbhinn II.
• Aontaíonn gach páirtí go gcosnóidh siad tásca geografacha an pháirtí eile. Tá na tásca geografacha faoi seach leagtha amach in Iarscríbhinní III, IV, V agus VI a ghabhann leis an gcomhaontú.

Cosaint

Déantar na tásca geografacha atá liostaithe sna hiarscríbhinní a ghabhann leis an gcomhaontú a chosaint ar an méid seo a leanas:

• focail nó léiriú ar bith lena léirítear nó lena dtugtar le fios go dtagann an táirge as áit éigin eile seachas a fhíor-áit tionscnaimh;
• úsáid ar bith chun táirge inchomparáide a shainaithint nach dtagann as an áit atá léirithe leis an tásc geografach lena mbaineann, fiú má bhíonn fíorthionscnamh na n-earraí léirithe nó má bhíonn an t-ainm faoi chosaint aistrithe, tras-scríofa, traslitrithe nó má tá léirithe ag gabháil leis amhail “cineál”, “sórt”, “stíl”, “aithris” nó rud éigin cosúil leis sin;
• úsáid ar bith chun táirge inchomparáide a shainaithint nach gcomhlíonann sonraíocht táirge an ainm faoi chosaint.

Cearta

Féadfar ainm faoi chosaint a úsáid ar tháirge dlisteanach ar bith a chomhlíonann sonraíocht theicniúil an táisc gheografaigh agus dlíthe an pháirtí lena mbaineann.

Trádmharcanna

Aontaíonn an dá pháirtí go gcuirfidh siad trádmharc ar neamhní nó go ndiúltóidh siad do thrádmharc i gcás go sáraíonn an trádmharc sin na rialacha lena gcosnaítear na tásca geografacha, más rud é go ndearnadh iarratas chun an tásc geografach a chlárú sula ndearnadh an t-iarratas ar thrádmharc.

Cur chun feidhme

Déanann Comhchoiste, ina bhfuil ionadaithe ón dá pháirtí, maoirseacht ar chur chun feidhme agus ar fheidhmiú an chomhaontaithe.

Comhar

Aontaíonn na páirtithe go n-oibreoidh siad i gcomhar chun tacú le cur chun feidhme na ngealltanas agus na n-oibleagáidí a rinneadh sa chomhaontú.

DÁTA THEACHT I BHFEIDHM

Tháinig sé i bhfeidhm ar an 1 Márta 2021.

CÚLRA

Le haghaidh tuilleadh faisnéise, féach:

• Lipéid um cháilíocht (An Coimisiún Eorpach)
• Tásca geografacha (An Coimisiún Eorpach)
• Trádáil — an tSín (An Coimisiún Eorpach).

PRÍOMHDHOICIMÉID

Comhaontú idir an tAontas Eorpach agus Rialtas Dhaon-Phoblacht na Síne i dtaca le comhar i leith na dtásc geografach agus a gcosaint (IO L 408 I, 4.12.2020, lgh. 3-43)

Rinneadh leasuithe comhleanúnacha ar an gcomhaontú a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Cinneadh (AE) 2020/1832 ón gComhairle an 23 Samhain 2020 maidir le tabhairt i gcrích an Chomhaontaithe idir an tAontas Eorpach agus Rialtas Dhaon-Phoblacht na Síne maidir le comhar i dtaca le tásca geografacha agus a gcosaint (IO L 408 I, 4.12.2020, lgh. 1-2)

Cinneadh (AE) 2020/1111 ón gComhairle an 20 Iúil 2020 maidir le síniú, thar ceann an Aontais, an Chomhaontaithe idir an tAontas Eorpach agus Rialtas Dhaon-Phoblacht na Síne i dtaca le comhar i leith na dtásc geografach agus a gcosaint (IO L 244, 29.7.2020, lch. 8)

DOICIMÉID GHAOLMHARA

Fógra maidir le teacht i bhfeidhm an Chomhaontaithe idir an tAontas Eorpach agus Rialtas Dhaon-Phoblacht na Síne i dtaca le comhar i leith na dtásc geografach agus a gcosaint (IO L 45, 9.2.2021, lch. 1)

Rialachán (AE) 2019/787 ó Pharlaimint na hEorpa agus ón gComhairle an 17 Aibreán 2019 maidir le sainmhíniú, tuairisc, cur i láthair agus lipéadú deochanna biotáilleacha, úsáid ainmneacha deochanna biotáilleacha i gcur i láthair agus lipéadú earraí bia eile, cosaint tásc geografach le haghaidh deochanna biotáilleacha, úsáid alcóil eitile agus driogáití de thionscnamh talmhaíochta i ndeochanna alcólacha, agus lena n-aisghairtear Rialachán (CE) Uimh. 110/2008 (IO L 130, 17.5.2019, lgh. 1-54)

Féach an leagan comhdhlúite.

Rialachán (AE) Uimh. 1308/2013 ó Pharlaimint na hEorpa agus ón gComhairle an 17 Nollaig 2013 lena mbunaítear comheagraíocht na margaí i dtáirgí talmhaíochta agus lena n-aisghairtear Rialacháin (CEE) Uimh. 922/72, (CEE) Uimh. 234/79, (CE) Uimh. 1037/2001 agus (CE) Uimh. 1234/2007 ón gComhairle (IO L 347, 20.12.2013, lgh. 671-854)

Féach an leagan comhdhlúite.

Rialachán (AE) Uimh. 1151/2012 ó Pharlaimint na hEorpa agus ón gComhairle an 21 Samhain 2012 maidir le scéimeanna cáilíochta do tháirgí talmhaíochta agus do bhia-earraí (IO L 343, 14.12.2012, lgh. 1-29)

Féach an leagan comhdhlúite.

Nuashonraithe 05.05.2021