Dul i ngleic le seachaint cánach corparáidí

PRÍOMHPHOINTÍ

Raon feidhme

Tá feidhm ag an treoir maidir le gach cáiníocóir a bhfuil cáin chuideachta le híoc acu i dtír AE amháin nó níos mó, lena n–áirítear buanfhorais eintiteas i dtír AE amháin nó níos mó a bhfuil cónaí orthu i dtír neamh-AE chun críche cánach.

Dul i ngleic le creimeadh an bhoinn agus aistriú brabúis (BEPS)¹

Leagtar síos leis an treoir rialacha in aghaidh seachaint cánach i gceithre réimse shonracha chun BEPS a chomhrac:

• Rialacha maidir le teorannú úis: i gcás go ndéanann cuideachtaí ilnáisiúnta a mbonn cánacha a chreimeadh go saorga trí íocaíochtaí úis boilscithe a íoc le cuideachtaí cleamhnaithe i ndlínsí ísealchánach. Tá sé mar aidhm leis an treoir cuideachtaí a dhíspreagadh ón gcleachtas sin trí theorainn a chur ar mhéid an úis a bhfuil sé de cheart ag cáiníocóir a asbhaint i dtréimhse chánach. Tá an t–uasmhéad úis in-asbhainte socraithe ag 30 % ar a mhéad de thuilleadh an cháiníocóra roimh ús, roimh cháin, roimh dhímheas (tomhas den mhéid ar úsáideadh luach sócmhainne ag pointe áirithe ama) agus roimh amúchadh (íocaíochtaí a roinnt thar iltréimhsí).
• Rialacha maidir le cánachas scoir: i gcás go ndéanann cáiníocóirí iarracht a ndliteanas cánach a laghdú trína gcónaí cánach agus/nó a shócmhainní a aistriú go dlínse ísealchánach, chun críche pleanáil ionsaitheach cánach amháin. Is é is aidhm le rialacha maidir le cánachas scoir cosc a chur le creimeadh an bhoinn chánach i dtír thionscnaimh AE i gcás go n aistrítear sócmhainn ardluacha gan an úinéireacht a athrú, lasmuigh de dhlínse cánach na tíre sin. Leis an treoir tugtar an rogha do cháiníocóirí íocaíocht na suime cánach a iarchur thar 5 bliana agus í a íoc trí íocaíochtaí céimnithe, ach má dhéantar an t aistriú laistigh de AE amháin.
• Riail ghinearálta frithsheachanta: Is é is aidhm leis an riail seo bearnaí a d’fhéadfadh a bheith i rialacha sonracha frithsheachanta tíre i gcoinne seachaint cánach a chumhdach, agus tugtar an chumhacht d’údaráis gan ligean do cháiníocóirí leas a bhaint as socruithe frithsheachanta cánach. Tá feidhm ag an gclásal ginearálta frithsheachanta maidir le socruithe nach bhfuil dílis a mhéid is nach gcuirtear i bhfeidhm iad ar chúiseanna bailí tráchtála lena léirítear an réaltacht eacnamaíoch.
• Rialacha maidir le corparáid faoi rialú eachtrach (CFC): d’fhonn a ndliteanas cánach foriomlán a laghdú, is féidir le grúpaí brabúis a aistriú chuig fochuideachtaí rialaithe i ndlínsí ísealchánach. Le rialacha CFC déantar ioncam de chuid fochuideachta ísealchánach faoi rialú eachtrach a athshannadh dá máthairchuideachta a íocann cáin níos airde. Mar thoradh air sin, gearrtar cáin ar ioncam na máthairchuideachta ina tír chónaí.

Treoir Leasaitheach (AE) 2017/952

Toisc nár pléadh ach neamhréireanna hibrideacha² i dTreoir (AE) 2016/1164 laistigh de AE, glacadh Treoir nua (AE) 2017/952 lenar síneadh an raon feidhme lena áirithiú go gcumhdaítear neamhréireanna hibrideacha le tíortha neamh-AE. Glacann rialacha na treorach sin áit na rialacha maidir le neamhréireachtaí hibrideacha Threoir AE 2016/1164.

Rialacha maidir le neamhréireachtaí hibrideacha: i gcás go mbaineann cáiníocóirí corparáideacha leas as difríochtaí idir córais náisiúnta chánach chun a ndliteanas foriomlán a laghdú, mar shampla trí asbhaint dhúbailte (i.e. asbhaint ar an dá thaobh den teorainn) nó asbhaint as an ioncam ar thaobh amháin den teorainn gan é a chur san áireamh ar an taobh eile. Chun éifeachtaí na socruithe um neamhréireanna hibrideacha a chur ar ceal, leagtar síos sa treoir rialacha lenar ceart do 1 dlínse nó 2 dhlínse i neamhréir asbhaint íocaíochta as a dtagann toradh dá leithéid a shéanadh.