AN COIMISIÚN EORPACH

An Bhruiséil,4.3.2024

COM(2024) 96 final

2024/0053(NLE)

Togra le haghaidh

CINNEADH ÓN gCOMHAIRLE

maidir le síniú, thar ceann an Aontais Eorpaigh, agus cur i bhfeidhm sealadach an Chomhaontaithe idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 - Aibreán 2028, an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 - Aibreán 2028, an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn

(Téacs atá ábhartha maidir le LEE)

MEABHRÁN MÍNIÚCHÁIN

Leis an gComhaontú maidir leis an Limistéar Eorpach Eacnamaíoch (dá ngairtear ‘Comhaontú LEE’ anseo feasta) ceadaítear don Íoslainn, do Lichtinstéin agus don Iorua (‘Stáit CSTE LEE’) a bheith rannpháirteach go hiomlán sa mhargadh aonair. In éineacht leis sin, ó tháinig an Comhaontú i bhfeidhm in 1994, rannchuidigh na trí thír sin le héagothromaíochtaí eacnamaíocha agus sóisialta a mhaolú sa Limistéar Eorpach Eacnamaíoch i gcomhréir le hAirteagail 115 de Chomhaontú LEE. Ina theannta sin, ranníoc an Iorua trí shásra airgeadais ar leithligh de chuid na hIorua. Chuaigh na sásraí airgeadais is déanaí in éag an 30 Aibreán 2021. 1

I bhfianaise an ghá leanúnaigh chun éagothromaíochtaí eacnamaíocha agus sóisialta laistigh den Limistéar Eorpach Eacnamaíoch a mhaolú, an 20 Bealtaine 2021 thug an Chomhairle údarás don Choimisiún tús a chur le caibidlíochtaí leis an Íoslainn, Lichtinstéin agus an Iorua maidir le comhaontú ar na ranníocaíochtaí airgeadais a bheidh le híoc sa todhchaí ag Stáit CSTE EAA le feabhas a chur ar chomhtháthú eacnamaíoch agus sóisialta sa Limistéar Eorpach Eacnamaíocha. 2 Cuireadh tús le caibidlíochtaí foirmiúla an 16 Meitheamh 2022. I gcomhthráth leis na caibidlíochtaí i ndáil leis na sásraí airgeadais, ach go neamhspleách uatha, cuireadh tús le hathbhreithniú ar phrótacail AE–na hÍoslainne agus AE–na hIorua maidir le trádáil éisc ar bhonn chlásail athbhreithnithe na bprótacal breise a ghabhann le Comhaontuithe Saorthrádála na hÍoslainne agus na hIorua. 3  

Tugadh na caibidlíochtaí i gcrích ar leibhéal na n‑idirbheartaithe ach na hinisealacha á gcur an 30 Samhain 2023 leis an méid a leanas:

·an Comhaontú idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 – Aibreán 2028 (‘Comhaontú LEE ar Shásra Airgeadais’);

·an Comhaontú idir Ríocht na hIorua agus an tAontas Eorpach ar Shásra Airgeadais na hIorua le haghaidh na tréimhse Bealtaine 2021 – Aibreán 2028 (‘Comhaontú na hIorua’);

·an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua (‘Prótacal na hIorua’); agus

·an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn (‘Prótacal na hÍoslainne’).

An togra atá i gceangal, baineann sé le síniú agus cur i bhfeidhm sealadach Chomhaontú LEE ar Shásra Airgeadais, Chomhaontú na hIorua, Phrótacal na hIorua agus Phrótacal na hÍoslainne.

Soláthrófar le Comhaontú LEE ar Shásra Airgeadais agus le Comhaontú na hIorua le chéile ranníocaíocht airgeadais EUR 3,268 billiún ó Stáit CSTE LEE ar chomhtháthú eacnamaíoch agus sóisialta in LEE le haghaidh na tréimhse Bealtaine 2021 – Aibreán 2028. Léirítear leis an toradh na treoracha caibidlíochtaí a d’eisigh an Chomhairle, lenar iarradh a) méadú ar na ranníocaíocht airgeadais ó Stáit CSTE LEE; b) cur i bhfeidhm eochair leithdháilte Chiste Comhtháthaithe an Aontais; c) ailíniú ar fhad na sásraí airgeadais nua le hionstraimí Bheartas Comhtháthaithe an Aontais (2021-2027); d) cuimsiú na gcuspóirí glasa i measc na dtosaíochtaí a dtugtar tacaíocht ina leith; agus e) próisis cur chun feidhme níos éifeachtúla le haghaidh sásraí sa todhchaí.

I gcomhthráth leis sin, rinneadh athbhreithniú freisin ar phrótacail dhéthaobhacha maidir le trádáil éisc leis an Íoslainn agus an Iorua. Deonaítear lamháltais nua le haghaidh na tréimhse Bealtaine 2021 – Aibreán 2028. Bunaítear na lamháltais ar na prótacail roimhe sin le haghaidh na tréimhse 2014-2021 agus tá siad i gcomhréir le méid na ranníocaíochtaí airgeadais. Soláthraítear solúbthacht maidir le cuótaí neamhídithe a thabhairt ar aghaidh ag deireadh na tréimhse sin. Déanfaidh an Iorua athnuachan freisin ar an socrú maidir le hidirthuras éisc le haghaidh shoithí an Aontais a thugann gabhálacha i dtír san Iorua.

Chun go bhféadfar na ranníocaíochtaí airgeadais a chur chun feidhme agus a eisíoc go pras agus na lamháltais taraife a úsáid, tá na Comhaontuithe agus na Prótacail le cur i bhfeidhm go sealadach ó na dátaí a shonraítear ina nAirteagail ar aghaidh, ar feitheamh na nósanna imeachta ábhartha a chur i gcrích maidir leis na Comhaontuithe agus Prótacail sin a dhaingniú nó a thabhairt i gcrích agus a theacht i bhfeidhm.

Bhreithnigh an Coimisiún go bhfuil torthaí na gcaibidlíochtaí sásúil agus molann sé go nglacfadh an Chomhairle an Cinneadh atá i gceangal maidir le síniú agus cur i bhfeidhm sealadach Chomhaontú LEE ar Shásra Airgeadais, Chomhaontú na hIorua, Phrótacal na hIorua agus Phrótacal na hÍoslainne.

Ós rud é gur gnáthchleachtas é agus gnéithe sonracha de chomhaontaithe idirnáisiúnta atá ann cheana a mhodhnú, beartaítear airteagail ábhartha an Chonartha ar Fheidhmiú an Aontais Eorpaigh a úsáid mar bhunús dlí le haghaidh na ndréachtchinntí, is é sin Airteagal 175 CFAE, an tríú mír i ndáil leis na comhaontuithe ar ranníocaíocht airgeadais le comhtháthú eacnamaíoch agus sóisialta agus Airteagal 207 CFAE le haghaidh na bprótacal maidir le trádáil éisc. Thairis sin, ní hamháin go dtagraítear d’Airteagal 218(5) CFAE mar an bunús dlí le haghaidh shíniú na gcomhaontaithe sin, ach úsáidtear é lena gcur i bhfeidhm sealadach freisin.

2024/0053 (NLE)

Togra le haghaidh

CINNEADH ÓN gCOMHAIRLE

maidir le síniú, thar ceann an Aontais Eorpaigh, agus cur i bhfeidhm sealadach an Chomhaontaithe idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 - Aibreán 2028, an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 - Aibreán 2028, an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn

(Téacs atá ábhartha maidir le LEE)

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 175, an tríú fomhír agus 207, i gcomhar le hAirteagal 218(5) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)Tá gá fós ann chun éagothromaíochtaí eacnamaíocha agus sóisialta laistigh den Limistéar Eorpach Eacnamaíoch a mhaolú, agus ba cheart sásra nua le haghaidh ranníocaíochtaí airgeadais Stáit CSTE LEE agus sásra airgeadais nua na hIorua a bhunú dá bhrí sin.

(2)An 20 Bealtaine 2021, thug an Chomhairle údarú don Choimisiún tús a chur le caibidlíochtaí leis an Íoslainn, Prionsacht Lichtinstéin agus Ríocht na hIorua maidir le comhaontú ar ranníocaíochtaí airgeadais Stáit CSTE LEE sa todhchaí le comhtháthú eacnamaíoch agus sóisialta sa Limistéar Eorpach Eacnamaíoch. Rinne an Coimisiún idirbheartaíocht, thar ceann an Aontais Eorpaigh, ar Chomhaontú idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 – Aibreán 2028. Beidh sé sin i bhfoirm Phrótacal 38d a ghabhann le Comhaontú LEE. Rinne an Coimisiún idirbheartaíocht freisin, thar ceann an Aontais Eorpaigh, ar Chomhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 – Aibreán 2028.

(3)Rannchuideofar le Sásra Airgeadais LEE le haghaidh na tréimhse Bealtaine 2021 – Aibreán 2028 agus Sásra Airgeadais na hIorua le haghaidh na tréimhse Bealtaine 2021 – Aibreán 2028 le héagothromaíochtaí eacnamaíocha agus sóisialta sa Limistéar Eorpach Eacnamaíoch a laghdú agus le caidreamh idir Ballstáit CSTE LEE agus na Stáit is tairbhithe a neartú.

(4)Na forálacha speisialta maidir le hallmhairí éisc agus táirgí iascaigh áirithe isteach san Aontas de thionscnamh na hÍoslainne agus na hIorua, a leagtar amach sna Prótacail Bhreise a ghabhann lena gComhaontuithe Saorthrádála faoi seach le Comhphobal Eacnamaíochta na hEorpa 4 , chuaigh na forálacha sin in éag an 30 Aibreán 2021 agus ba cheart iad a athbhreithniú i gcomhréir le hAirteagal 1 de na Prótacail sin. Rinne an Coimisiún idirbheartaíocht áfach ar Phrótacail Bhreise nua a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus leis an gComhaontú idir Comhphobal Eacnamaíochta na hEorpa agus an Íoslainn.

(5)Déantar foráil le gach ceann de na Comhaontuithe agus na Prótacail dá dtagraítear thuas maidir lena gcur i bhfeidhm sealadach sula dtiocfaidh siad i bhfeidhm.

(6)Ba cheart gach ceann de na Comhaontuithe agus na Prótacail a shíniú thar ceann an Aontais Eorpaigh, faoi réir na Comhaontuithe agus na Prótacail sin a thabhairt i gcrích ar dháta níos déanaí, agus iad a chur i bhfeidhm ar bhonn sealadach,

TAR ÉIS AN CINNEADH SEO A GHLACADH:

Airteagal 1

Formheastar síniú an Chomhaontaithe idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 – Aibreán 2028, an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 – Aibreán 2028, an Comhaontú Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus an Comhaontú Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn thar ceann an Aontais, faoi réir na Comhaontuithe agus na Prótacail sin a thabhairt i gcrích.

Cuirtear i gceangal leis an gCinneadh seo téacsanna na gComhaontaithe agus na bPrótacal atá le síniú.

Airteagal 2

Bunóidh Ardrúnaíocht na Comhairle an ionstraim lena dtugtar lánchumhachtaí don duine/do na daoine a thug an t‑idirbheartaí le fios chun na Comhaontaithe agus na Prótacail a shíniú, faoi réir na comhaontuithe agus na prótacail sin a thabhairt i gcrích.

Airteagal 3

Faoi réir a dtabhairt i gcrích ar dháta níos déanaí agus go dtí go dtiocfaidh siad i bhfeidhm, cuirfear an Comhaontú idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 – Aibreán 2028 agus an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 – Aibreán 2028 i bhfeidhm go sealadach, i gcomhréir le hAirteagal 3 agus mír 3 d’Airteagal 10 de na Comhaontuithe, ón gcéad lá den chéad mhí ar aghaidh i ndiaidh thaisceadh an fhógra deiridh chuige sin.

Faoi réir a thabhairt i gcrích ar dháta níos déanaí agus go dtí go dtiocfaidh sé i bhfeidhm, cuirfear an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua i bhfeidhm go sealadach, i gcomhréir leis an tríú mír d’Airteagal 5 den Phrótacal, ón gcéad lá den tríú mí ar aghaidh i ndiaidh thaisceadh an fhógra chuige sin.

Faoi réir a thabhairt i gcrích ar dháta níos déanaí agus go dtí go dtiocfaidh sé i bhfeidhm, cuirfear an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn i bhfeidhm go sealadach, i gcomhréir leis an tríú mír d’Airteagal 4 den Phrótacal, ón gcéad lá den tríú mí ar aghaidh i ndiaidh thaisceadh an fhógra chuige sin.

Airteagal 4

Tiocfaidh an Cinneadh seo i bhfeidhm an ….

Arna dhéanamh sa Bhruiséil,

(1)    IO L 141, 28.5.2016, lgh. 3 agus 11.

(2)    Doiciméad 8365/21 ADD 1 den Chomhairle.

(3)    IO L 141, 28.5.2016, lgh. 18 agus 22.

(4)    IO L 141, 28.5.2016, lgh. 18 agus 22.

AN COIMISIÚN EORPACH

An Bhruiséil,4.3.2024

COM(2024) 96 final

IARSCRÍBHINN

a ghabhann le

Togra le haghaidh

CINNEADH ÓN gCOMHAIRLE

maidir le síniú, thar ceann an Aontais Eorpaigh, agus cur i bhfeidhm sealadach an Chomhaontaithe idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 - Aibreán 2028, an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 - Aibreán 2028, an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn

CEANGALTÁN I

COMHAONTÚ  
IDIR AN tAONTAS EORPACH, AN ÍOSLAINN, 
PRIONSACHT LICHTINSTÉIN AGUS RÍOCHT NA hIORUA 
MAIDIR LE SÁSRA AIRGEADAIS LEE LE hAGHAIDH NA TRÉIMHSE BEALTAINE 2021 – AIBREÁN 2028

TÁ AN tAONTAS EORPACH,

AN ÍOSLAINN,

PRIONSACHT LICHTINSTÉIN,

RÍOCHT NA hIORUA,

DE BHRÍ gur chomhaontaigh na Páirtithe sa Chomhaontú maidir leis an Limistéar Eorpach Eacnamaíoch (‘Comhaontú LEE’) go bhfuil gá le laghdú a dhéanamh ar na héagothromaíochtaí eacnamaíocha agus sóisialta idir na réigiúin d’fhonn neartú leantach agus cothrom an chaidrimh trádála agus eacnamaíoch eatarthu a chur chun cinn,

DE BHRÍ, chun cur leis an gcuspóir sin, gur bhunaigh Stáit CSTE Sásra Airgeadais i gcomhthéacs an Limistéir Eorpaigh Eacnamaíoch,

DE BHRÍ gur leagadh amach i bPrótacal 38a agus san Aguisín a ghabhann le Prótacal 38a a ghabhann le Comhaontú LEE na forálacha lena rialaítear Sásra Airgeadais LEE le haghaidh na tréimhse 2004‑2009,

DE BHRÍ gur leagadh amach i bPrótacal 38b a ghabhann le Comhaontú LEE agus san Aguisín a ghabhann le Prótacal 38b a ghabahnn le Comhaontú LEE na forálacha lena rialaítear Sásra Airgeadais LEE le haghaidh na tréimhse 2009‑2014,

DE BHRÍ gur leagadh amach i bPrótacal 38c a a ghabhann le Comhaontú LEE na forálacha lena rialaítear Sásra Airgeadais LEE le haghaidh na tréimhse 2014‑2021,

DE BHRÍ go bhfuil gá i gcónaí le héagothromaíochtaí eacnamaíocha agus sóisialta laistigh den Limistéar Eorpach Eacnamaíoch a mhaolú, agus gur cheart dá bhrí sin sásra nua le haghaidh ranníocaíochtaí airgeadais Stáit LEE CSTE a bhunú le haghaidh na tréimhse Bealtaine 2021‑Aibreán 2028,

TAR ÉIS CINNEADH A DHÉANAMH AN COMHAONTÚ A LEANAS A THABHAIRT I gCRÍCH:

AIRTEAGAL 1

Cuirfear an méid seo a leanas in ionad théacs Airteagal 117 de Chomhaontú LEE:

‘Leagtar amach i bPrótacal 38, Prótacal 38a, san Aguisín a ghabhann le Prótacal 38a, Prótacal 38b, san Aguisín a ghabhann le Prótacal 38b, Prótacal 38c agus Prótacal 38d na forálacha lena rialaítear na Sásraí Airgeadais.’.

AIRTEAGAL 2

Cuirfear isteach Prótacal 38d nua tar éis Phrótacal 38c a ghabhann le Comhaontú LEE. Foráiltear do théacs Phrótacal 38d san Iarscríbhinn a ghabhann leis an gComhaontú seo.

AIRTEAGAL 3

Déanfaidh na Páirtithe an Comhaontú seo a dhaingniú nó a fhormheas i gcomhréir lena nósanna imeachta féin. Taiscfear na hionstraimí daingniúcháin nó formheasa le hArdrúnaíocht Chomhairle an Aontais Eorpaigh.

Tiocfaidh an Comhaontú i bhfeidhm an chéad lá den dara mí tar éis thaisceadh na hionstraime daingniúcháin nó formheasa deiridh.

Go dtí go gcríochnófar na nósanna imeachta dá dtagraítear i míreanna 1 agus 2, cuirfear an Comhaontú seo i bhfeidhm ar bhonn sealadach ón gcéad lá den chéad mhí tar éis thaisceadh an fhógra deiridh chuige sin.

AIRTEAGAL 4

Dréachtaíodh an Comhaontú seo i scríbhinn bhunaidh amháin sa Bhulgáiris, sa Chróitis, sa tSeicis, sa Danmhairgis, san Ollainnis, sa Bhéarla, san Eastóinis, san Fhionlainnis, sa Fhraincis, sa Ghearmáinis, sa Ghréigis, sa Ghaeilge, san Iodáilis, sa Laitvis, sa Liotuáinis, san Ungáiris, sa Mháltais, sa Pholainnis, sa Phortaingéilis, sa Rómáinis, sa tSlóvaicis, sa tSlóivéinis, sa Spáinnis, sa tSualainnis san Íoslainnis agus san Ioruais, agus na téacsanna i ngach ceann de na teangacha sin den bharántúlacht chéanna, taiscfear é le hArdrúnaíocht Chomhairle an Aontais Eorpaigh agus cuirfidh sí sin cóip dhílis dheimhnithe chuig gach ceann de na Páirtithe sa Chomhaontú seo.

Arna dhéanamh sa Bhruiséil, an ....... ......

Thar ceann an Aontais Eorpaigh

Thar ceann na hÍoslainne

Thar ceann Phrionsacht Lichtinstéin

Thar ceann Ríocht na hIorua

IARSCRÍBHINN

   PRÓTACAL 38d

maidir le Sásra Airgeadais LEE (2021‑2028)

Airteagal 1

(1)Cuspóirí

Rannchuideoidh an Íoslainn, Lichtinstéin agus an Iorua (‘Stáit CSTE’) le héagothromaíochtaí eacnamaíocha agus sóisialta sa Limistéar Eorpach Eacnamaíoch a laghdú agus lena gcaidreamh leis na Stáit is Tairbhithe a neartú, trí ranníocaíochtaí airgeadais laistigh de na tosaíochtaí téamacha a liostaítear in Airteagal 3 1 .

(2)Luachanna coiteanna agus prionsabail choiteanna

Tá Sásra Airgeadais LEE (2021‑2028) bunaithe ar luachanna coiteanna agus ar phrionsabail an mheasa ar dhínit an duine, na saoirse, an daonlathais, an chomhionannais, an smachta reachta agus an mheasa ar chearta an duine lena n‑áirítear na cearta atá ag daoine ar de ghrúpaí mionlaigh iad.

Beidh gach clár agus gníomhaíocht a chistítear le Sásra Airgeadais LEE comhsheasmhach le hurramú na luachanna agus na bprionsabal sin agus ní thabharfar aon tacaíocht leo d’oibríochtaí trína bhféadfaí faillí a dhéanamh ina leith sin. Comhlíonfaidh a gcur chun feidhme na cearta bunúsacha agus na hoibleagáidí bunúsacha atá cumhdaithe in ionstraimí agus caighdeáin ábhartha.

Airteagal 2

Gealltanais

Is é EUR 1 705 mhilliún a bheidh i méid na ranníocaíochta airgeadais dá bhforáiltear in Airteagal 1. Cuirfear ranníocaíocht airgeadais bhreise de EUR 100 milliún ar fáil freisin le haghaidh tionscadail a bhaineann le dúshláin a bhí ann mar thoradh ar an ionradh ar an Úcráin. Cuirfear na ranníocaíochtaí sin ar fáil lena ngealladh i dtráinsí bliantúla de EUR 257,86 milliún le linn na tréimhse ón 1 Bealtaine 2021 go dtí an 30 Aibreán 2028, an dá dháta sin san áireamh.

Is é a bheidh sa mhéid iomlán leithdháiltí tír‑shonracha mar a shonraítear in Airteagal 6 mar aon leis na cistí a shonraítear in Airteagal 7.

Airteagal 3

(1)Tosaíochtaí téamacha

Cuirfear na leithdháiltí tír‑shonracha ar fáil chun na tosaíochtaí téamacha foriomlána seo a leanas a chur chun cinn;

(a)An t‑aistriú glas Eorpach

(b)An daonlathas, an smacht reachta agus cearta an duine

(c)Cuimsiú sóisialta agus athléimneacht

Laistigh de na tosaíochtaí téamacha sin, leagtar amach réimsí cláir san Iarscríbhinn a ghabhann leis an bPrótacal seo. Rachfar i gcomhairle leis na Stáit is Tairbhithe maidir lena bhfuil sna réimsí cláir sin.

(2)Riachtanais na Stát is Tairbhithe

Déanfar na limistéir chláir a roghnú, a dhíriú agus a oiriúnú chun freagairt do na riachtanais éagsúla i ngach Stát is Tairbhí, agus méid an chláir agus méid na ranníocaíochta á gcur san áireamh. Chun na críche sin, leagtar amach in Airteagal 9 mír 5 an nós imeachta atá le leanúint.

Airteagal 4

(1)Meabhráin Tuisceana

Chun comhchruinniú a bhaint amach agus chun cur chun feidhme éifeachtúil a áirithiú, i gcomhréir leis na cuspóirí foriomlána dá dtagraítear in Airteagal 1, agus beartais an Aontais agus moltaí tírshonracha á gcur san áireamh, chomh maith le Comhaontuithe Comhpháirtíochta arna dtabhairt i gcrích idir na Ballstáit agus an Coimisiún Eorpach, déanfaidh Stáit CSTE Meabhrán Tuisceana a chaibidliú le gach Stát is Tairbhí i gcomhréir le hAirteagal 9 mír 5.

(2)Comhairliúcháin leis an gCoimisiún Eorpach

Déanfar comhairliúcháin leis an gCoimisiún Eorpach ar an leibhéal straitéiseach agus reáchtálfar iad le linn na caibidlíochta maidir leis na Meabhráin Tuisceana d’fhonn comhlántacht agus sineirgí le Beartas Comhtháthaithe an Aontais Eorpaigh a chur chun cinn.

Airteagal 5

(1)Cómhaoiniú

Maidir le cláir faoi leithdháiltí tírshonracha a mbeidh an fhreagracht ar na Stáit is Tairbhithe as a gcur chun feidhme, ní rachaidh an ranníocaíocht ó CSTE thar 85 % de chostas an chláir, mura gcinnfidh Stáit CSTE a mhalairt.

(2)Státchabhair

Comhlíonfar na rialacha is infheidhme maidir le státchabhair.

(3)Dliteanas

Tá freagracht Stáit CSTE as na tionscadail teoranta do chistí a chur ar fáil de réir an phlean chomhaontaithe. Dá réir sin, ní ghabhfaidh Stáit CSTE aon dliteanas orthu féin i leith tríú páirtithe.

Airteagal 6

Leithdháiltí tír‑shonracha

Cuirfear na leithdháiltí tír‑shonracha ar fáil do na Stáit is Tairbhithe seo a leanas: An Bhulgáir, an Chróit, an Chipir, Poblacht na Seice, an Eastóin, an Ghréig, an Ungáir, an Laitvia, an Liotuáin, Málta, an Pholainn, an Phortaingéil, an Rómáin, an tSlóvaic agus an tSlóivéin, i gcomhréir leis an dáileadh seo a leanas:

Áirítear ar na méideanna arna gcur i láthair na leithdháiltí tír‑shonracha atá le cur ar fáil do gach Stát is Tairbhí i gcomhréir le hAirteagal 9 mír 5, agus an sciar den chiste don tsochaí shibhialta dá dtagraítear in Airteagal 7 a rachaidh chun tairbhe do gach Stát is Tairbhí.

Airteagal 7

Laistigh de Shásra Airgeadais LEE, cuirfear dhá chiste ar fáil. Cuirfidh siad le cuspóirí Shásra Airgeadais LEE (2021‑2028) a bhaint amach mar a shainmhínítear in Airteagal 1, agus leis na tosaíochtaí téamacha dá dtagraítear in Airteagal 3. Is féidir le Stáit CSTE páirt a ghlacadh mar chomhpháirtithe sna cistí.

Ciste don tsochaí shibhialta

Cuirfear 10 % den mhéid iomlán i leataobh le haghaidh ciste don tsochaí shibhialta. Leagtar amach an eochair leithdháilte do na Stáit is Tairbhithe in Airteagal 6.

Leithdháilfear 5 % den chiste ar thionscnaimh thrasnáisiúnta.

Ciste le haghaidh forbairt acmhainne agus comhar le heagraíochtaí agus institiúidí idirnáisiúnta

Cuirfear 2 % den mhéid iomlán i leataobh le haghaidh ciste forbartha acmhainne agus comhar le heagraíochtaí agus institiúidí idirnáisiúnta, inter alia, Comhairle na hEorpa, ECFE agus Gníomhaireacht an Aontais Eorpaigh um Chearta Bunúsacha (FRA). Cuirfidh an ciste seo na tosaíochtaí téamacha chun cinn sna Stáit is Tairbhithe.

Airteagal 8

(1)Comhordú a dhéanamh le Sásra Airgeadais na hIorua

Déanfar an ranníocaíocht airgeadais dá bhforáiltear sa Phrótacal seo a chomhordú go dlúth leis an ranníocaíocht dhéthaobhach ón Iorua dá bhforáiltear le Sásra Airgeadais na hIorua. Go háirithe, áiritheoidh Stáit CSTE go mbeidh nósanna imeachta agus módúlachtaí an chur chun feidhme mar an gcéanna go bunúsach don dá shásra airgeadais.

(2)Comhordú le beartas comhtháthaithe an Aontais Eorpaigh

Cuirfear aon athrú ábhartha ar bheartas comhtháthaithe an Aontais Eorpaigh san áireamh, de réir mar is iomchuí.

Airteagal 9

Beidh feidhm ag an méid seo a leanas maidir le cur chun feidhme Shásra Airgeadais LEE:

(1)Comhar

Déanfar cuspóirí Shásra Airgeadais LEE dá dtagraítear in Airteagal 1 a shaothrú faoi chuimsiú dlúthchomhar idir na Stáit is Tairbhithe agus Stáit CSTE, agus na luachanna agus na prionsabail á n‑urramú agus na cearta agus na hoibleagáidí dá dtagraítear in Airteagal 1 mír 2 á gcomhlíonadh.

(2)Prionsabail chur chun feidhme

Déanfar an leibhéal is airde trédhearcachta, cuntasachta agus costas‑éifeachtúlachta a chur i bhfeidhm i ngach céim den chur chun feidhme, mar aon le hurraim do phrionsabail an dea‑rialachais, na comhpháirtíochta agus an rialachais il‑leibhéil, don fhorbairt inbhuanaithe, don chomhionannas inscne agus don neamh‑idirdhealú.

(3)Bainistíocht na gcistí

Oibreoidh Stáit CSTE na dá chiste a leagtar amach in Airteagal 7, agus beidh siad freagrach as a gcur chun feidhme, lena n‑áirítear bainistíocht agus rialú a dhéanamh orthu.

(4)Coiste an tSásra Airgeadais

Bunóidh Stáit CSTE coiste le bainistíocht fhoriomlán a dhéanamh ar Shásra Airgeadais LEE. Forálacha breise maidir le Sásra Airgeadais LEE a chur chun feidhme, lena n‑áirítear bearta simpliúcháin arb é is aidhm dóibh éifeachtúlacht agus éifeachtacht a áirithiú i gcur chun feidhme, eiseoidh Stáit CSTE iad tar éis comhairliúcháin leis na Stáit is Tairbhithe, comhairliúcháin a bhféadfaidh an Coimisiún Eorpach cúnamh a thabhairt ina leith. Féachfaidh Stáit CSTE leis na forálacha sin a eisiúint sula síneofar na Meabhráin Tuisceana.

(5)Caibidlíocht ar Mheabhráin Tuisceana

Déanfaidh Stáit CSTE Meabhrán Tuisceana a chaibidliú le gach Stát is Tairbhí i dtaca leis an leithdháileadh tírshonrach faoi seach, agus déanfaidh siad na cistí a eisiamh dá dtagraítear in Airteagal 7 agus i mír 3 den airteagal seo. Leagfar amach sa Mheabhrán Tuisceana na cláir, dáileadh na gcistí idir réimsí cláir, na struchtúir bhainistíochta agus rialaithe agus na coinníollacha is infheidhme.

(6)Cur chun feidhme

(a)Ar bhonn na Meabhrán Tuisceana, cuirfidh na Stáit is Tairbhithe tograí le haghaidh cláir shonracha faoi bhráid Stáit CSTE agus déanfaidh na Stáit sin na tograí a mheas agus a fhormheas agus comhaontuithe deontais a thabhairt i gcrích, lena ngabhfaidh coinníollacha ábhartha, measúnú riosca agus maolaithe, leis na Stáit is Tairbhithe le haghaidh gach cláir.

(b)Is iad na Stáit is Tairbhithe a bheidh freagrach as na cláir chomhaontaithe a chur chun feidhme agus déanfaidh siad foráil maidir le córas iomchuí bainistíochta agus rialaithe chun cur chun feidhme agus bainistíocht fhónta a áirithiú.

(c)Féadfaidh Stáit CSTE rialuithe a dhéanamh de réir a gceanglas inmheánach. Soláthróidh na Stáit is Tairbhithe gach cúnamh, faisnéis agus doiciméadú is gá chuige sin.

(d)Chun a áirithiú go gcomhlíonfar oibleagáidí, féadfaidh Stáit CSTE, tar éis measúnú a dhéanamh, tar éis dóibh éisteacht a thabhairt don Stát is Tairbhí, bearta iomchuí agus comhréireacha a dhéanamh, lena n‑áirítear íocaíochtaí a chur ar fionraí agus cistí a ghnóthú.

(e)Cuirfear comhpháirtíochtaí i bhfeidhm, i gcás inarb iomchuí, in ullmhú, i gcur chun feidhme, i bhfaireachán agus i meastóireacht na ranníocaíochta airgeadais chun rannpháirtíocht leathan a áirithiú. Féadfar a áireamh ar na comhpháirtithe, inter alia, iad siúd ar na leibhéil áitiúla, réigiúnacha agus náisiúnta, chomh maith leis an earnáil phríobháideach, an tsochaí shibhialta agus comhpháirtithe sóisialta sna Stáit is Tairbhithe agus i Stáit CSTE.

(f)Féadfar aon tionscadal faoi na cláir sna Stáit is Tairbhithe a chur chun feidhme i gcomhar idir, inter alia, eintitis atá bunaithe sna Stáit is Tairbhithe agus i Stáit CSTE, i gcomhréir leis na rialacha is infheidhme maidir le soláthar poiblí.

(7)Costais bhainistíochta

Cumhdófar costais bhainistíochta Stáit CSTE leis an méid iomlán dá dtagraítear in Airteagal 2, agus sonrófar iad sna forálacha maidir leis an gcur chun feidhme dá dtagraítear i mír 4 den Airteagal seo. Cumhdófar costais bhainistíochta le haghaidh na gCistí dá dtagraítear in Airteagal 7 leis an méid a leithdháiltear ar na Cistí.

(8)Tuairisciú

Tabharfaidh Stáit CSTE tuairisc ar a rannchuidiú le cuspóirí Shásra Airgeadais LEE.

Airteagal 10

Athbhreithniú

Ag deireadh na tréimhse mar a shainmhínítear in Airteagal 2 agus gan dochar do na cearta agus na hoibleagáidí faoi Chomhaontú LEE, déanfaidh na Páirtithe Conarthacha, i bhfianaise Airteagal 115 de Chomhaontú LEE, athbhreithniú ar an ngá le haghaidh a thabhairt ar éagothromaíochtaí eacnamaíocha agus sóisialta laistigh den Limistéar Eorpach Eacnamaíoch.

IARSCRÍBHINN A GHABHANN LE PRÓTACAL 38d

An t‑aistriú glas

Gnó glas agus nuálaíocht ghlas

Taighde agus nuálaíocht

Oideachas, oiliúint agus fostaíocht don aos óg

Cultúr

Forbairt áitiúil, dea‑rialachas agus cuimsiú

Cuimsiú agus cumhachtú na Romach

An tsláinte phoiblí

Cosc agus ullmhacht maidir le tubaistí

Earnáil an cheartais lena n‑áirítear foréigean baile agus foréigean inscnebhunaithe, rochtain ar cheartas, seirbhísí ceartúcháin, coireacht thromchúiseach agus eagraithe

Tearmann, imirce agus lánpháirtíocht

Comhar institiúideach agus forbairt acmhainne

Bainfidh na stáit is tairbhithe tairbhe freisin as tionscadail a chistítear leis an méid seo a leanas:

Ciste don tsochaí shibhialta

Ciste le haghaidh forbairt acmhainne agus comhar le heagraíochtaí agus institiúidí idirnáisiúnta comhpháirtíochta

Déanfar an comhionannas inscne agus an digiteáil a phríomhshruthú agus beidh siad mar chuid de gach limistéar cláir ábhartha.

(1)    Sa Phrótacal seo, tuigfear tagairtí d’airteagail, mura sonraítear a mhalairt, mar thagairtí d’airteagail sa Phrótacal seo.

AN COIMISIÚN EORPACH

An Bhruiséil,4.3.2024

COM(2024) 96 final

IARSCRÍBHINN

a ghabhann le

Togra le haghaidh

CINNEADH ÓN gCOMHAIRLE

maidir le síniú, thar ceann an Aontais Eorpaigh, agus cur i bhfeidhm sealadach an Chomhaontaithe idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 - Aibreán 2028, an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 - Aibreán 2028, an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn

CEANGALTÁN II

COMHAONTÚ
IDIR RÍOCHT NA hIORUA AGUS AN tAONTAS EORPACH MAIDIR LE SÁSRA AIRGEADAIS NA hIORUA LE hAGHAIDH NA TRÉIMHSE BEALTAINE 2021 – AIBREÁN 2028

Airteagal 1

(1)Cuspóirí

Gabhann Ríocht na hIorua uirthi féin rannchuidiú leis na héagothromaíochtaí eacnamaíocha agus sóisialta sa Limistéar Eorpach Eacnamaíoch a laghdú agus lena caidreamh leis na Stáit is Tairbhithe a neartú trí Shásra Airgeadais na hIorua ar leithligh laistigh de na tosaíochtaí téamacha a liostaítear in Airteagal 3 1 .

(2)Luachanna Coiteanna agus Prionsabail Choiteanna

Tá Sásra Airgeadais na hIorua (2021-2028) bunaithe ar luachanna coiteanna agus ar phrionsabail choiteanna an mheasa ar dhínit an duine, ar an tsaoirse, ar an daonlathas, ar an gcomhionannas, ar an smacht reachta agus an mheasa ar chearta an duine, lena n‑áirítear na cearta atá ag daoine ar de ghrúpaí mionlaigh iad.

Beidh gach clár agus gníomhaíocht a chistítear le Sásra Airgeadais na hIorua comhsheasmhach leis na luachanna agus na prionsabail sin a urramú agus staonfaidh siad ó thacaíocht a thabhairt d’oibríochtaí a d’fhéadfadh nach ndéanfadh siad amhlaidh. Comhlíonfaidh a gcur chun feidhme na cearta bunúsacha agus na hoibleagáidí bunúsacha a chumhdaítear in ionstraimí agus caighdeáin ábhartha.

Airteagal 2

Gealltanais

EUR 1 380 milliún a bheidh i méid na ranníocaíochta airgeadais dá bhforáiltear in Airteagal 1. Cuirfear ranníocaíocht airgeadais bhreise EUR 83 mhilliún ar fáil freisin le haghaidh tionscadail a bhaineann le dúshláin a bhí ann mar thoradh ar an ionradh ar an Úcráin. Cuirfear na ranníocaíochtaí sin ar fáil lena ngealltanas i dtráinsí bliantúla de EUR 209 milliún le linn na tréimhse ón 1 Bealtaine 2021 go dtí an 30 Aibreán 2028, an dá dháta sin san áireamh.

Is é a bheidh sa mhéid iomlán leithdháiltí tírshonracha mar a shonraítear in Airteagal 6 mar aon leis na cistí a shonraítear in Airteagal 7.

Airteagal 3

(1)Tosaíochtaí téamacha

Cuirfear na leithdháiltí tírshonracha ar fáil chun na tosaíochtaí téamacha foriomlána seo a leanas a chur chun cinn;

(a)An t‑aistriú glas Eorpach

(b)An daonlathas, an smacht reachta agus cearta an duine

(c)Cuimsiú sóisialta agus athléimneacht

Laistigh de na tosaíochtaí téamacha sin, leagtar amach réimsí cláir san Iarscríbhinn a ghabhann leis an gComhaontú seo. Rachfar i gcomhairle leis na Stáit is Tairbhithe maidir lena bhfuil sna réimsí cláir sin.

(2)Riachtanais na Stát is Tairbhithe

Déanfar na limistéir chláir a roghnú, a dhíriú agus a oiriúnú chun freagairt do na riachtanais éagsúla i ngach Stát is Tairbhí, agus méid an chláir agus méid na ranníocaíochta á gcur san áireamh. Chun na críche sin, leagtar amach in Airteagal 9 mír 5 an nós imeachta atá le leanúint.

Airteagal 4

(1)Meabhráin Tuisceana

Chun comhchruinniú a bhaint amach agus chun cur chun feidhme éifeachtúil a áirithiú, i gcomhréir leis na cuspóirí foriomlána dá dtagraítear in Airteagal 1, agus beartais an Aontais agus moltaí a bhaineann go sonrach le tír faoi leith á gcur san áireamh, chomh maith le Comhaontú Comhpháirtíochta arna dtabhairt i gcrích idir na Ballstáit agus an Coimisiún Eorpach, déanfaidh Ríocht na hIorua Meabhrán Tuisceana a chaibidliú le gach Stát is Tairbhí i gcomhréir le hAirteagal 9 mír 5.

(2)Comhairliúcháin leis an gCoimisiún Eorpach

Déanfar comhairliúcháin leis an gCoimisiún Eorpach ar an leibhéal straitéiseach agus reáchtálfar iad le linn na caibidlíochta maidir leis na Meabhráin Tuisceana d’fhonn comhlántacht agus sineirgí le Beartas Comhtháthaithe an Aontais Eorpaigh a chur chun cinn.

Airteagal 5

(1)Cómhaoiniú

Maidir le cláir faoi leithdháiltí tírshonracha a mbeidh freagracht cur chun feidhme ar na Stáit is Tairbhithe astu, ní rachaidh an ranníocaíocht ó Ríocht na hIorua thar 85 % de chostas an chláir, mura gcinnfidh Ríocht na hIorua a mhalairt.

(2)Státchabhair

Comhlíonfar na rialacha is infheidhme maidir le státchabhair.

(3)Dliteanas

Tá freagracht Ríocht na hIorua as na tionscadail teoranta do chistí a chur ar fáil de réir an phlean chomhaontaithe. Dá réir sin, ní ghabhfaidh Ríocht na hIorua aon dliteanas uirthi féin i leith tríú páirtithe.

Airteagal 6

Leithdháiltí tírshonracha

Cuirfear na leithdháiltí tírshonracha ar fáil do na Stáit is Tairbhithe seo a leanas: An Bhulgáir, an Chróit, an Chipir, Poblacht na Seice, an Eastóin, an Ungáir, an Laitvia, an Liotuáin, Málta, an Pholainn, an Rómáin, an tSlóvaic agus an tSlóivéin, i gcomhréir leis an dáileadh seo a leanas:

Áirítear ar na méideanna arna gcur i láthair na leithdháiltí tírshonracha atá le cur ar fáil do gach Stát is Tairbhí i gcomhréir le hAirteagal 9 mír 5, agus an sciar den chiste don tsochaí shibhialta dá dtagraítear in Airteagal 7 a rachaidh chun tairbhe do gach Stát is Tairbhí.

Airteagal 7

Laistigh de Shásra Airgeadais na hIorua, cuirfear trí chiste ar fáil. Rannchuideoidh siad le cuspóirí Shásra Airgeadais na hIorua (2021-2028) a bhaint amach mar a shainmhínítear in Airteagal 1, agus leis na tosaíochtaí téamacha dá dtagraítear in Airteagal 3. Is féidir le heintitis Ioruacha páirt a ghlacadh mar chomhpháirtithe sna cistí.

(1)Ciste don tsochaí shibhialta

Cuirfear 10 % den mhéid iomlán i leataobh le haghaidh ciste don tsochaí shibhialta. Leagtar amach an eochair leithdháilte do na Stáit is Tairbhithe in Airteagal 6.

Leithdháilfear 5 % den chiste ar thionscnaimh thrasnáisiúnta.

(2)Ciste le haghaidh forbairt acmhainne agus comhar le heagraíochtaí agus institiúidí idirnáisiúnta

Cuirfear 2 % den mhéid iomlán i leataobh le haghaidh ciste forbartha acmhainne agus comhar le heagraíochtaí agus institiúidí idirnáisiúnta, inter alia, Comhairle na hEorpa, ECFE agus Gníomhaireacht an Aontais Eorpaigh um Chearta Bunúsacha (FRA). Cuirfidh an ciste seo na tosaíochtaí téamacha chun cinn sna Stáit is Tairbhithe.

(3)Ciste le haghaidh idirphlé sóisialta agus obair chuibhiúil

Cuirfear 1 % den mhéid iomlán i leataobh le haghaidh ciste don idirphlé sóisialta agus d’obair chuibhiúil.

Airteagal 8

(1)Comhordú le Sásra Airgeadais LEE

Déanfar an ranníocaíocht airgeadais dá bhforáiltear in Airteagal 1 a chomhordú go dlúth leis an ranníocaíocht ó Stáit CSTE dá bhforáiltear le Sásra Airgeadais LEE. Go háirithe, áiritheoidh Ríocht na hIorua go mbeidh na nósanna imeachta agus na módúlachtaí cur chun feidhme mar an gcéanna, go bunúsach, i gcás an dá shásra airgeadais.

(2)Comhordú le beartas comhtháthaithe an Aontais Eorpaigh

Cuirfear aon athrú ábhartha ar bheartas comhtháthaithe an Aontais Eorpaigh san áireamh, de réir mar is iomchuí.

Airteagal 9

Beidh feidhm ag an méid seo a leanas maidir le cur chun feidhme Shásra Airgeadais na hIorua:

(1)Comhar

Déanfar cuspóirí Shásra Airgeadais na hIorua dá dtagraítear in Airteagal 1 a shaothrú faoi chuimsiú dlúthchomhar idir na Stáit is Tairbhithe agus Ríocht na hIorua, agus na luachanna agus na prionsabail á n‑urramú agus na cearta agus na hoibleagáidí dá dtagraítear in Airteagal 1 mír 2 á gcomhlíonadh.

(2)Prionsabail chur chun feidhme

Déanfar an leibhéal is airde trédhearcachta, cuntasachta agus costas‑éifeachtúlachta a chur i bhfeidhm i ngach céim den chur chun feidhme, mar aon le hurraim do phrionsabail an dea‑rialachais, na comhpháirtíochta agus an rialachais il‑leibhéil, don fhorbairt inbhuanaithe, don chomhionannas inscne agus don neamh‑idirdhealú.

(3)Bainistíocht na gcistí

Oibreoidh Ríocht na hIorua na trí chiste a leagtar amach in Airteagal 7, agus beidh sí freagrach as a gcur chun feidhme, lena n‑áirítear bainistíocht agus rialú a dhéanamh orthu.

(4)Bainistíocht Ríocht na hIorua

Beidh Ríocht na hIorua, nó eintiteas arna cheapadh aici, freagrach as bainistíocht fhoriomlán Shásra Airgeadais na hIorua. Forálacha breise maidir le Sásra Airgeadais na hIorua a chur chun feidhme, lena n‑áirítear bearta simpliúcháin arb é is aidhm dóibh éifeachtúlacht agus éifeachtacht a áirithiú i gcur chun feidhme, eiseoidh Ríocht na hIorua iad tar éis dul i gcomhairle leis na Stáit is Tairbhithe, a bhféadfaidh an Coimisiún Eorpach cúnamh a thabhairt ina leith. Féachfaidh Ríocht na hIorua leis na forálacha sin a eisiúint sula síneofar na Meabhráin Tuisceana.

(5)Caibidlíocht ar Mheabhráin Tuisceana

Déanfaidh Ríocht na hIorua Meabhrán Tuisceana maidir leis an leithdháileadh tírshonrach faoi seach, seachas na cistí dá dtagraítear in Airteagal 7 agus i mír 3 den Airteagal seo, a chaibidliú le gach Stát is Tairbhí. Leagfar amach sa Mheabhrán Tuisceana na cláir, dáileadh na gcistí idir réimsí cláir, na struchtúir bhainistíochta agus rialaithe agus na coinníollacha is infheidhme.

(6)Cur chun feidhme

(a)Ar bhonn na Meabhrán Tuisceana, cuirfidh na Stáit is Tairbhithe tograí le haghaidh cláir shonracha faoi bhráid Ríocht na hIorua agus déanfaidh an Ríocht sin na tograí a mheas agus a fhormheas agus comhaontuithe deontais a thabhairt i gcrích, le coinníollacha ábhartha, le measúnú riosca agus le maolú, leis na Stáit is Tairbhithe le haghaidh gach cláir.

(b)Is iad na Stáit is Tairbhithe a bheidh freagrach as na cláir chomhaontaithe a chur chun feidhme agus déanfaidh siad foráil maidir le córas iomchuí bainistíochta agus rialaithe chun cur chun feidhme agus bainistíocht fhónta a áirithiú.

(c)Féadfaidh Ríocht na hIorua rialuithe a dhéanamh de réir a gceanglas inmheánach. Soláthróidh na Stáit is Tairbhithe gach cúnamh, faisnéis agus doiciméadú is gá chuige sin.

(d)Chun a áirithiú go gcomhlíonfar oibleagáidí, féadfaidh Ríocht na hIorua, tar éis measúnú a dhéanamh, tar éis di éisteacht a thabhairt don Stát is Tairbhí, bearta iomchuí agus comhréireacha a dhéanamh, lena n‑áirítear íocaíochtaí a chur ar fionraí agus cistí a aisghabháil.

(e)Cuirfear comhpháirtíochtaí i bhfeidhm, i gcás inarb iomchuí, in ullmhú, i gcur chun feidhme, i bhfaireachán agus i meastóireacht na ranníocaíochta airgeadais chun rannpháirtíocht leathan a áirithiú. Féadfar a áireamh ar na comhpháirtithe, inter alia, iad siúd ar na leibhéil áitiúla, réigiúnacha agus náisiúnta, chomh maith leis an earnáil phríobháideach, an tsochaí shibhialta agus comhpháirtithe sóisialta sna Stáit is Tairbhithe agus i Ríocht na hIorua.

(f)Féadfar aon tionscadal faoi na cláir sna Stáit is Tairbhithe a chur chun feidhme i gcomhar idir, inter alia, eintitis atá bunaithe sna Stáit is Tairbhithe agus i Ríocht na hIorua, i gcomhréir leis na rialacha is infheidhme maidir le soláthar poiblí.

(7)Costais bhainistíochta

Cumhdófar costais bhainistíochta Ríocht na hIorua leis an méid iomlán dá dtagraítear in Airteagal 2, agus sonrófar iad sna forálacha maidir leis an gcur chun feidhme dá dtagraítear i mír 4 den Airteagal seo. Cumhdófar costais bhainistíochta le haghaidh na gCistí dá dtagraítear in Airteagal 7 leis an méid a leithdháiltear ar na Cistí.

(8)Tuairisciú

Tabharfaidh Ríocht na hIorua tuairisc ar a rannchuidiú le cuspóirí Shásra Airgeadais na hIorua.

Airteagal 10

(1)Déanfaidh na Páirtithe an Comhaontú seo a dhaingniú nó a fhormheas i gcomhréir lena nósanna imeachta féin.  Taiscfear na hionstraimí daingniúcháin nó formheasa le hArdrúnaíocht Chomhairle an Aontais Eorpaigh.

(2)Tiocfaidh an Comhaontú i bhfeidhm an chéad lá den dara mí tar éis thaisceadh na hionstraime daingniúcháin nó formheasa deiridh.

(3)Go dtí go gcríochnófar na nósanna imeachta dá dtagraítear i míreanna 1 agus 2, cuirfear an Comhaontú seo i bhfeidhm ar bhonn sealadach ón gcéad lá den chéad mhí tar éis thaisceadh an fhógra deiridh chuige sin.

Airteagal 11

Dréachtaíodh an Comhaontú seo i scríbhinn bhunaidh amháin sa Bhulgáiris, sa tSeicis, sa Chróitis, sa Danmhairgis, san Ollainnis, sa Bhéarla, san Eastóinis, san Fhionlainnis, sa Fhraincis, sa Ghearmáinis, sa Ghréigis, sa Ghaeilge, san Iodáilis, sa Laitvis, sa Liotuáinis, san Ungáiris, sa Mháltais, sa Pholainnis, sa Phortaingéilis, sa Rómáinis, sa tSlóvaicis, sa tSlóivéinis, sa Spáinnis, sa tSualainnis agus san Ioruais, agus na téacsanna i ngach ceann de na teangacha sin den bharántúlacht chéanna, taiscfear é le hArdrúnaíocht Chomhairle an Aontais Eorpaigh agus cuirfidh sí sin cóip dhílis dheimhnithe chuig gach ceann de na Páirtithe sa Chomhaontú seo.

Arna dhéanamh sa Bhruiséil, an …. [bliain]

Thar ceann an Aontais Eorpaigh

Thar ceann Ríocht na hIorua

IARSCRÍBHINN

An t‑aistriú glas

Gnó glas agus nuálaíocht ghlas

Taighde agus nuálaíocht

Oideachas, oiliúint agus fostaíocht don aos óg

Cultúr

Forbairt áitiúil, dea‑rialachas agus cuimsiú

Cuimsiú agus cumhachtú na Romach

An tsláinte phoiblí

Cosc agus ullmhacht maidir le tubaistí

Earnáil an cheartais lena n‑áirítear foréigean baile agus foréigean inscnebhunaithe, rochtain ar cheartas, seirbhísí ceartúcháin, coireacht thromchúiseach agus eagraithe

Tearmann, imirce agus lánpháirtíocht

Comhar institiúideach agus forbairt acmhainne

Bainfidh na stáit is tairbhithe tairbhe freisin as tionscadail a chistítear leis an méid seo a leanas:

Ciste don tsochaí shibhialta

Ciste le haghaidh forbairt acmhainne agus comhar le heagraíochtaí agus institiúidí idirnáisiúnta comhpháirtíochta

Ciste le haghaidh idirphlé sóisialta agus obair chuibhiúil

Déanfar an comhionannas inscne agus an digiteáil a phríomhshruthú agus beidh siad mar chuid de gach limistéar cláir ábhartha.

(1)    Sa Chomhaontú seo, tuigfear tagairtí d’airteagail, mura sonraítear a mhalairt, mar thagairtí d’airteagail sa Chomhaontú seo.

AN COIMISIÚN EORPACH

An Bhruiséil,4.3.2024

COM(2024) 96 final

IARSCRÍBHINN

a ghabhann le

Togra le haghaidh

CINNEADH ÓN gCOMHAIRLE

maidir le síniú, thar ceann an Aontais Eorpaigh, agus cur i bhfeidhm sealadach an Chomhaontaithe idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 - Aibreán 2028, an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 - Aibreán 2028, an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn

CEANGALTÁN III

PRÓTACAL BREISE A GHABHANN LEIS AN gCOMHAONTÚ IDIR COMHPHOBAL EACNAMAÍOCHTA NA hEORPA AGUS POBLACHT NA hÍOSLAINNE

TÁ AN tAONTAS EORPACH

agus

AN ÍOSLAINN

AG FÉACHAINT don Chomhaontú idir Comhphobal Eacnamaíochta na hEorpa agus Poblacht na hÍoslainne a síníodh an 22 Iúil 1972, agus do na socruithe atá ann cheana le haghaidh trádáil in iasc agus i dtáirgí iascaigh idir an Íoslainn agus an Comhphobal,

AG FÉACHAINT don Phrótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn maidir le forálacha speisialta is infheidhme le haghaidh na tréimhse 2014‑2021 maidir le hallmhairí éisc agus táirgí iascaigh áirithe isteach san Aontas, agus go háirithe d’Airteagal 1 den Phrótacal sin,

TAR ÉIS A CHINNEADH AN PRÓTACAL SEO A THABHAIRT I gCRÍCH:

AIRTEAGAL 1

1.Leagtar síos sa Phrótacal seo agus san Iarscríbhinn a ghabhann leis na forálacha speisialta is infheidhme maidir le hallmhairí éisc agus táirgí iascaigh áirithe de thionscnamh na hÍoslainne isteach san Aontas Eorpach. Leagtar amach na taraif‑chuótaí bliantúla saor ó dhleacht san Iarscríbhinn a ghabhann leis an bPrótacal seo. Beidh feidhm ag na taraif‑chuótaí sin ón lá a bheidh éifeacht le cur i bhfeidhm sealadach an Phrótacail seo, de réir na nósanna imeachta a leagtar síos i mír 3 d’Airteagal 4, go dtí an 30 Aibreán 2028.

2.Ag deireadh na tréimhse sin, déanfaidh na Páirtithe Conarthacha measúnú ar an ngá a bheadh ann na forálacha speisialta dá dtagraítear i mír 1 a choinneáil ar bun, agus, más gá, déanfaidh siad athbhreithniú ar leibhéal na gcuótaí agus na leasanna ábhartha uile á gcur san áireamh an tráth céanna.

AIRTEAGAL 2

1.Cuirfear tús leis na taraif‑chuótaí an lá a bheidh éifeacht le cur i bhfeidhm sealadach an Phrótacail seo, de réir na nósanna imeachta a leagtar síos i mír 3 d’Airteagal 4.

2.Leagtar amach méideanna na dtaraif‑chuótaí san Iarscríbhinn a ghabhann leis an bPrótacal seo. Beidh an chéad taraif‑chuóta ar fáil ó dháta chur i bhfeidhm sealadach an Phrótacail seo go dtí an 30 Aibreán 2024. Ón 1 Bealtaine 2024 ar aghaidh, leithdháilfear taraif‑chuótaí ina dhiaidh sin go bliantúil ón 1 Bealtaine go dtí an 30 Aibreán go dtí deireadh na tréimhse dá dtagraítear in Airteagal 1 den Phrótacal seo.

3.Maidir le méideanna na dtaraif‑chuótaí lena gcumhdaítear an tréimhse ón 1 Bealtaine 2021 go dtí go gcuirfear an Prótacal seo i bhfeidhm go sealadach, déanfar iad a leithdháileadh go comhréireach agus a chur ar fáil don chuid eile den tréimhse dá dtagraítear in Airteagal 1 den Phrótacal seo.

4.I gcás nach n‑ídeofar na taraif‑chuótaí dá dtagraítear in Airteagal 1 le linn na tréimhse dá dtagraítear in Airteagal 1, agus i gcás nach gcuirfear i bhfeidhm go sealadach prótacal ina dhiaidh sin lena mbunaítear taraif‑chuótaí saor ó dhleacht le haghaidh na dtáirgí céanna, féadfar allmhairí ón Íoslainn a dhéanamh le haghaidh an mhéid cuótaí comhiomlánaithe atá fágtha de na taraif‑chuótaí sin suas le 2 bhliain tar éis dheireadh na tréimhse dá dtagraítear in Airteagal 1, ach ní féidir sin a dhéanamh ar feadh tréimhse níos faide ná tréimhse cur i bhfeidhm sealadach prótacail ina dhiaidh sin lena mbunaítear taraif‑chuótaí saor ó dhleacht i gcás na dtáirgí céanna.

Airteagal 3

Is iad na rialacha tionscnaimh is infheidhme maidir leis na taraif‑chuótaí a liostaítear san Iarscríbhinn a ghabhann leis an bPrótacal seo na rialacha a leagtar amach i bPrótacal 3 a ghabhann leis an gComhaontú idir Comhphobal Eacnamaíochta na hEorpa agus an Íoslainn a síníodh an 22 Iúil 1972.

AIRTEAGAL 4

1.Déanfaidh na Páirtithe an Prótacal seo a dhaingniú nó a fhormheas i gcomhréir lena nósanna imeachta féin. Taiscfear na hionstraimí daingniúcháin nó formheasa le hArdrúnaíocht Chomhairle an Aontais Eorpaigh.

2.Tiocfaidh an Comhaontú i bhfeidhm an chéad lá den dara mí tar éis thaisceadh na hionstraime daingniúcháin nó formheasa deiridh.

3.Go dtí go gcríochnófar na nósanna imeachta dá dtagraítear i míreanna 1 agus 2, cuirfear an Prótacal seo i bhfeidhm ar bhonn sealadach ón gcéad lá den tríú mí tar éis thaisceadh an fhógra deiridh chuige sin.

AIRTEAGAL 5

Dréachtaíodh an Comhaontú seo i scríbhinn bhunaidh amháin sa Bhulgáiris, sa Chróitis, sa tSeicis, sa Danmhairgis, san Ollainnis, sa Bhéarla, san Eastóinis, san Fhionlainnis, sa Fhraincis, sa Ghearmáinis, sa Ghréigis, san Ungáiris, san Iodáilis, sa Ghaeilge, sa Laitvis, sa Liotuáinis, sa Mháltais, sa Pholainnis, sa Phortaingéilis, sa Rómáinis, sa tSlóvaicis, sa tSlóivéinis, sa Spáinnis, sa tSualainnis agus san Íoslainnis, agus na téacsanna i ngach ceann de na teangacha sin den bharántúlacht chéanna, taiscfear é le hArdrúnaíocht Chomhairle an Aontais Eorpaigh agus cuirfidh sí sin cóip dhílis dheimhnithe chuig gach ceann de na Páirtithe.

Arna dhéanamh sa Bhruiséil, an.... 2024.

Thar ceann an Aontais Eorpaigh

Thar ceann Phoblacht na hÍoslainne

Iarscríbhinn

FORÁLACHA SPEISIALTA DÁ dTAGRAÍTEAR IN AIRTEAGAL 1 DEN PHRÓTACAL

De bhreis ar na taraif‑chuótaí buana saor ó dhleacht atá ann cheana, osclóidh an tAontas Eorpach na taraif‑chuótaí bliantúla saor ó dhleacht seo a leanas le haghaidh táirgí de thionscnamh na hÍoslainne:

(1)    Cuirfear cainníochtaí leis i gcomhréir le hAirteagal 2 mír 3 den Phrótacal seo.

(2)    Ní dheonófar tairbhe an taraife‑chuóta d’earraí arna ndearbhú lena scaoileadh i saorchúrsaíocht le linn na tréimhse ón 15 Feabhra go dtí an 15 Meitheamh.

AN COIMISIÚN EORPACH

An Bhruiséil,4.3.2024

COM(2024) 96 final

IARSCRÍBHINN

a ghabhann le

Togra le haghaidh

CINNEADH ÓN gCOMHAIRLE

maidir le síniú, thar ceann an Aontais Eorpaigh, agus cur i bhfeidhm sealadach an Chomhaontaithe idir an tAontas Eorpach, an Íoslainn, Prionsacht Lichtinstéin agus Ríocht na hIorua maidir le Sásra Airgeadais LEE le haghaidh na tréimhse Bealtaine 2021 - Aibreán 2028, an Comhaontú idir Ríocht na hIorua agus an tAontas Eorpach maidir le Sásra Airgeadais na hIorua le haghaidh na tréimhse Bealtaine 2021 - Aibreán 2028, an Prótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua agus an Prótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn

CEANGALTÁN IV

PRÓTACAL BREISE A GHABHANN LEIS AN gCOMHAONTÚ IDIR COMHPHOBAL EACNAMAÍOCHTA NA hEORPA AGUS RÍOCHT NA hIORUA

TÁ AN tAONTAS EORPACH

agus

RÍOCHT NA hIORUA

AG FÉACHAINT don Chomhaontú idir Comhphobal Eacnamaíochta na hEorpa agus Ríocht na hIorua a síníodh an 14 Bealtaine 1973, dá ngairtear an ‘Comhaontú’ anseo feasta, agus do na socruithe atá ann le haghaidh trádála in iasc agus i dtáirgí iascaigh idir an Iorua agus an Comhphobal,

Ag FÉACHAINT don Phrótacal Breise a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua maidir le forálacha speisialta is infheidhme le haghaidh na tréimhse 2014-2021 maidir le hallmhairiú éisc agus táirgí iascaigh áirithe isteach san Aontas, agus go háirithe Airteagal 1 de,

TAR ÉIS A CHINNEADH AN PRÓTACAL SEO A THABHAIRT I gCRÍCH:

AIRTEAGAL 1

(1)Leagtar síos sa Phrótacal seo agus san Iarscríbhinn a ghabhann leis na forálacha speisialta is infheidhme maidir le hallmhairiú éisc agus táirgí iascaigh áirithe de thionscnamh na hIorua isteach san Aontas Eorpach.

(2)Leagtar amach na taraif‑chuótaí bliantúla saor ó dhleacht san Iarscríbhinn a ghabhann leis an bPrótacal seo. Cumhdóidh na cuótaí sin an tréimhse ón 1 Bealtaine 2021 go dtí an 30 Aibreán 2028. Déanfar athbhreithniú ar leibhéil na gcuótaí faoi dheireadh na tréimhse agus na leasanna ábhartha uile á gcur san áireamh.

AIRTEAGAL 2

(1)Cuirfear tús leis na taraif‑chuótaí an lá a bheidh éifeacht le cur i bhfeidhm sealadach an Phrótacail seo, de réir na nósanna imeachta a leagtar síos i mír 3 d’Airteagal 5.

(2)Beidh an chéad taraif‑chuóta ar fáil ó dháta chur i bhfeidhm sealadach an Phrótacail seo go dtí an 30 Aibreán 2024. Ón 1 Bealtaine 2024 ar aghaidh, leithdháilfear taraif‑chuótaí ina dhiaidh sin go bliantúil ón 1 Bealtaine go dtí an 30 Aibreán go dtí deireadh na tréimhse dá dtagraítear in Airteagal 1 den Phrótacal seo.

(3)Maidir le méideanna na dtaraif‑chuótaí lena gcumhdaítear an tréimhse ón 1 Bealtaine 2021 go dtí go gcuirfear an Prótacal seo i bhfeidhm go sealadach, déanfar iad a leithdháileadh go comhréireach agus a chur ar fáil don chuid eile den tréimhse dá dtagraítear in Airteagal 1 den Phrótacal seo.

(4)I gcás nach n‑ídeofar na taraif‑chuótaí dá dtagraítear in Airteagal 1 le linn na tréimhse dá dtagraítear in Airteagal 1, agus i gcás nach gcuirfear i bhfeidhm go sealadach prótacal ina dhiaidh sin lena leagtar síos taraif‑chuótaí saor ó dhleacht le haghaidh na dtáirgí céanna, féadfar allmhairí ón Iorua a dhéanamh le haghaidh an mhéid cuótaí comhiomlánaithe atá fágtha de na taraif‑chuótaí sin go ceann suas le 2 bhliain tar éis dheireadh na tréimhse dá dtagraítear in Airteagal 1, ach ní féidir é a dhéanamh níos faide ná cur i bhfeidhm sealadach prótacail ina dhiaidh sin lena leagtar síos taraif‑chuótaí saor ó dhleacht i gcás na dtáirgí céanna.

Airteagal 3

(1)Déanfaidh an Iorua na bearta is gá chun a áirithiú go leanfar den socrú lena gceadaítear saor‑idirthuras éisc agus táirgí iascaigh a thugtar i dtír san Iorua ó shoithí a bhfuil bratach Ballstáit den Aontas Eorpach ar foluain acu.

(2)Beidh feidhm ag an socrú ar feadh suas le 2 bhliain tar éis dheireadh na tréimhse dá dtagraítear in Airteagal 1, ach ní bheidh sé níos faide ná cur i bhfeidhm sealadach prótacail ina dhiaidh sin.

Airteagal 4

Is iad na rialacha tionscnaimh is infheidhme maidir leis na taraif‑chuótaí atá liostaithe san Iarscríbhinn a ghabhann leis an bPrótacal seo na rialacha a leagtar amach i bPrótacal 3 a ghabhann leis an gComhaontú idir Comhphobal Eacnamaíochta na hEorpa agus Ríocht na hIorua a síníodh an 14 Bealtaine 1973.

AIRTEAGAL 5

(1)Déanfaidh na Páirtithe an Prótacal seo a dhaingniú nó a fhormheas i gcomhréir lena nósanna imeachta féin. Taiscfear na hionstraimí daingniúcháin nó formheasa le hArdrúnaíocht Chomhairle an Aontais Eorpaigh.

(2)Tiocfaidh sé i bhfeidhm ar an gcéad lá den dara mí tar éis an ionstraim daingniúcháin nó formheasa deiridh a thaisceadh.

(3)Go dtí go gcríochnófar na nósanna imeachta dá dtagraítear i míreanna 1 agus 2 den Airteagal seo, cuirfear an Prótacal seo i bhfeidhm ar bhonn sealadach ón gcéad lá den tríú mí tar éis thaisceadh an fhógra dheireanaigh chuige sin.

AIRTEAGAL 6

Dréachtaíodh an Prótacal seo i scríbhinn bhunaidh amháin sa Bhulgáiris, sa Chróitis, sa tSeicis, sa Danmhairgis, san Ollainnis, san Eastóinis, san Fhionlainnis, sa Fhraincis, sa Ghearmáinis, sa Ghréigis, san Ungáiris, san Iodáilis, sa Ghaeilge, sa Laitvis, sa Liotuáinis, sa Mháltais, sa Pholainnis, sa Phortaingéilis, sa Rómáinis, sa tSlóvaicis, sa tSlóivéinis, sa Spáinnis, sa tSualainnis agus san Ioruais, agus na téacsanna i ngach ceann de na teangacha sin den bharántúlacht chéanna, taiscfear é le hArdrúnaíocht Chomhairle an Aontais Eorpaigh agus cuirfidh sí cóip dhílis dheimhnithe chuig gach ceann de na Páirtithe.

Arna dhéanamh sa Bhruiséil, an.... 2024.

Thar ceann an Aontais Eorpaigh

Thar ceann Ríocht na hIorua

Iarscríbhinn

FORÁLACHA SPEISIALTA DÁ dTAGRAÍTEAR IN AIRTEAGAL 1 DEN PHRÓTACAL

De bhreis ar na taraif‑chuótaí buana saor ó dhleacht atá ann cheana, osclóidh an tAontas Eorpach na taraif‑chuótaí bliantúla saor ó dhleacht seo a leanas le haghaidh táirgí de thionscnamh na hIorua:

(1)    Cuirfear cainníochtaí leis i gcomhréir le hAirteagal 2 mír 3 den Phrótacal seo.

(2)    Ní dheonófar tairbhe an taraife‑chuóta d’earraí arna ndearbhú lena scaoileadh i saorchúrsaíocht le linn na tréimhse ón 15 Feabhra go dtí an 15 Meitheamh.