(1)

Trí nascacht 5G a chur leis an nascacht ar hárthaí, cuirtear feabhas ar sheirbhísí cumarsáide do dhaoine le linn dóibh a bheith ag taisteal, agus úsáid á baint as an teicneolaíocht is déanaí atá ar fáil agus úsáid éifeachtúil an speictrim á háirithiú. Cuidíonn sé sin leis na cuspóirí a leagtar amach i bPlean Gníomhaíochta 5G a bhaint amach chomh maith le straitéis an Choimisiúin maidir le nascacht mar a leagtar amach sa Teachtaireacht uaidh Connectivity for a Competitive Digital Single Market — towards a European Gigabit Society [Nascacht le haghaidh Margadh Aonair Digiteach Iomaíoch — I dTreo Sochaí Ghigighiotáin Eorpach] (2) agus a nuashonraíodh lena Theachtaireacht ‘Compás Digiteach 2030: an modh Eorpach don Deacáid Dhigiteach’ (3) agus le Cinneadh (AE) 2022/2481 ó Pharlaimint na hEorpa agus ón gComhairle (4).

(2)

Le Cinneadh 2010/166/AE (5) ón gCoimisiún comhchuibhítear na coinníollacha teicniúla maidir leis an speictream raidió a úsáid sa bhanda minicíochta 900 MHz (na bandaí minicíochta 880-915 MHz agus 925-960 MHz), an banda minicíochta 1 800 MHz (na bandaí minicíochta 1 710-1 785 MHz agus 1 805-1 880 MHz), an banda minicíochta péireáilte trastíre 2 GHz (na bandaí 1 920-1 980 MHz agus 2 110-2 170 MHz), agus an banda minicíochta péireáilte 2.6 GHz (na bandaí minicíochta 2 500-2 570 MHz and 2 620-2 690 MHz). D’fhág sé go bhféadfaí seirbhísí cumarsáide móibílí a oibriú ar bord soithí (seirbhísí MCV) san Aontas le teicneolaíochtaí éagsúla agus leagadh amach na coinníollacha teicniúla comhchuibhithe is infheidhme.

(3)

Le Cinneadh 2010/166/AE, iarradh ar na Ballstáit leanúint d’úsáid bandaí minicíochta ag córais a sholáthraíonn seirbhísí MCV ina bhfarraigí teorann a choimeád faoi bhreithniú, go háirithe maidir le hábharthacht leanúnach na gcoinníollacha uile a leagtar amach sa Chinneadh sin agus maidir le cásanna de thrasnaíocht dhíobhálach. Ina theannta sin, ceanglaíodh ar na Ballstáit tuarascáil a chur faoi bhráid an Choimisiúin maidir lena dtorthaí, agus ceanglaíodh ar an gCoimisiún, i gcás inarb iomchuí, Cinneadh 2010/166/AE a athbhreithniú.

(4)

An 16 Lúnasa 2022 thug an Coimisiún sainordú do Chomhdháil Eorpach na Riarachán Poist agus Teileachumarsáide (CEPT), de bhun Airteagal 4(2) de Chinneadh 676/2002/CE, staidéar a dhéanamh ar choinníollacha teicniúla comhchuibhithe agus iad a fhorbairt agus é mar aidhm leis sin teicneolaíocht 5G a chur san áireamh chun cur chun feidhme ardseirbhísí MCV san Aontas a éascú.

(5)

Mar fhreagairt ar an sainordú sin, ghlac CEPT Tuarascáil 83 an 10 Márta 2023. Soláthraítear leis sin coinníollacha teicniúla comhchuibhithe maidir le Córais Aeróige Neamhghníomhach (CANG) Raidió Nua 5G (RN 5G) ar bord soithí sa bhanda minicíochta 1 800 MHz agus sa bhanda minicíochta péireáilte 2,6 GHz.

(6)

De réir na tuarascála, d’fhéadfaí coinníollacha teicniúla agus rialála comhchosúla a bhfuil feidhm acu maidir le córais Éabhlóid Fhadtéarmach MCV (LTE) a chur i bhfeidhm freisin maidir le córais CANG Raidió Nua 5G le haghaidh CMBS chun líonraí móibíleacha talamhbhunaithe LTE agus RN 5G CANG araon a chosaint.

(7)

Tá na coinníollacha teicniúla comhchuibhithe a mholtar sa tuarascáil ina mbunús teicniúil leis an gCinneadh seo le haghaidh RN 5G CANG ar bord soithí sa bhanda minicíochta 1 800 MHz agus sa bhanda minicíochta péireáilte 2,6 GHz. Ba cheart na coinníollacha teicniúla comhchuibhithe i gCinneadh 2010/166/AE a leasú dá réir, agus cur chuige atá neodrach ó thaobh na teicneolaíochta agus na seirbhíse de á shaothrú mar a leagtar amach i dTreoir (AE) 2018/1972 ó Pharlaimint na hEorpa agus ón gComhairle (6).

(8)

Ar mhaithe le comhsheasmhacht agus soiléireacht dhlíthiúil agus i gcomhréir leis na prionsabail maidir le Rialáil Níos Fearr, ba cheart Cinneadh 2010/166/AE, lena n-áirítear tagairtí do Chinneadh (AE) 2011/251 (7) ón gCoimisiún arna aisghairm le Cinneadh 2022/173/AE (8) ón gCoimisiún, a aisghairm agus an Cinneadh seo a chur ina ionad.

(9)

Ar mhaithe leis an tsoiléireacht dhlíthiúil, ba cheart na dátaí cur chun feidhme a leagtar síos le Cinneadh 2010/166/AE a choimeád. Ar an gcaoi chéanna sin, ba cheart feidhm leanúnach a bheith ag Moladh 2010/167/AE (9) ón gCoimisiún maidir leis an gCinneadh seo, toisc go n-aisghairtear Cinneadh 2010/166/AE leis an gCinneadh seo agus go gcuirtear an Cinneadh seo in ionad Chinneadh 2010/166/AE.

(10)

Ní fhéadfaí a mheas go bhforchuireann an Cinneadh seo oibleagáidí ar Bhallstáit nach bhfuil farraigí teorann acu. Tá an méid sin gan dochar d’údarú sheirbhísí MCV, atá lasmuigh de raon feidhme an Chinnidh seo, ach a d’fhéadfadh a cheangal ar na Ballstáit gníomhaíocht a dhéanamh i gcomhréir le dlí an Aontais maidir le soithí dá náisiúntacht.

(11)

Ba cheart sonraíochtaí teicniúla MCV leanúint de bheith faoi bhreithniú chun a áirithiú go gcoimeádann siad suas leis an dul chun cinn teicneolaíoch agus le forbairtí sa mhargadh.

(12)

Tá na bearta dá bhforáiltear sa Chinneadh seo i gcomhréir le tuairim an Choiste um an Speictream Raidió,

(1)

ciallaíonn ‘seirbhísí cumarsáide móibílí ar bord soithí’ (seirbhísí MCV) seirbhísí cumarsáide leictreonaí, mar a shainmhínítear in Airteagal 2, pointe (4), de Threoir (AE) 2018/1972, arna soláthar ag gnóthas chun é a chur ar a gcumas do dhaoine ar bord soithigh cumarsáid a dhéanamh trí líonraí cumarsáide poiblí trí chóras atá faoi réir Airteagal 3 gan naisc dhíreacha a bhunú le líonraí móibíleacha talamhbhunaithe;

(2)

ciallaíonn ‘an banda minicíochta 900 MHz’ an banda minicíochta 880-915 MHz le haghaidh uasnaisc (tarchur ag an teirminéal, glacadh ag an stáisiún bunáite) agus an banda minicíochta 925-960 MHz le haghaidh íosnaisc (tarchur ag an stáisiún bunáite, glacadh ag an teirminéal);

(3)

ciallaíonn ‘an banda minicíochta 1 800 MHz’ an banda minicíochta 1 710-1 785 MHz le haghaidh uasnaisc (tarchur ag an teirminéal, glacadh ag an stáisiún bunáite) agus banda minicíochta 1 805-1 880 MHz le haghaidh íosnaisc (tarchur ag an stáisiún bunáite, glacadh ag an teirminéal);

(4)

ciallaíonn ‘an banda minicíochta péireáilte trastíre 2 GHz’ an banda minicíochta 1 920-1 980 MHz le haghaidh uasnaisc (tarchur ag an teirminéal, glacadh ag an stáisiún bunáite) agus an banda minicíochta 2 110-2 170 MHz le haghaidh íosnaisc (tarchur ag an stáisiún bunáite, glacadh ag an teirminéal);

(5)

ciallaíonn ‘an banda minicíochta péireáilte 2,6 GHz’ an banda minicíochta 2 500-2 570 MHz le haghaidh uasnaisc (tarchur ag an teirminéal, glacadh ag an stáisiún bunáite) agus an banda minicíochta 2 620-2 690 MHz le haghaidh íosnaisc (tarchur ag an stáisiún bunáite, glacadh ag an teirminéal);

(6)

ciallaíonn ‘bunús neamhthrasnaíochta agus neamhchosanta’ nach bhféadfaidh seirbhísí MCV cur isteach díobhálach a dhéanamh ar aon seirbhís radachumarsáide eile ná nach féidir le seirbhísí MCV cosaint a éileamh ar thrasnaíocht dhíobhálach de thionscnamh seirbhís radachumarsáide eile;

(7)

tuigfear ‘farraige theorann’ mar a shainmhínítear é i gCoinbhinsiún na Náisiún Aontaithe maidir le Dlí na Farraige;

(8)

ciallaíonn ‘stáisiún bunáite trasghlacadóra soithigh’ (soitheach-BS) mionchill shoghluaiste atá ar shoitheach agus a thacaíonn le córais móibílí i gcomhréir leis an Iarscríbhinn a ghabhann leis an gCinneadh seo.