(1)

Mar a fógraíodh sa Teachtaireacht ón gCoimisiún dar teideal Todhchaí Dhigiteach na hEorpa a mhúnlú an 19 Feabhra 2020, tá réitigh dhigiteacha ríthábhachtach chun cuidiú leis an Eoraip a bealach féin a shaothrú i dtreo claochlú digiteach a théann chun tairbhe do shaoránaigh agus do ghnóthais i gcomhréir le luachanna an Aontais. Chuige sin, is fíor-riachtanach an méid seo a leanas: go dtairbheoidh daoine den teicneolaíocht; go n-áiritheofar margadh aonair gan teorainneacha inar féidir le gnóthais de gach méid dul san iomaíocht ar bhonn cothrom; agus go saothrófar luachanna daonlathacha, urraim do chearta bunúsacha agus geilleagar atá inbhuanaithe, aeráidneodrach agus tíosach ar acmhainní. Sa chomhthéacs sin, is acmhainn phoiblí ríthábhachtach é speictream raidió a mbaintear níos mó agus níos mó úsáide as le haghaidh réimse leathan seirbhísí tráchtála agus poiblí.

(2)

Saothraítear an beartas speictrim raidió san Aontas agus cuirtear chun feidhme é ar bhealach a gcomhlíontar an tsaoirse chun tuairimí a nochtadh agus ar bhealach a gcuirtear leis an tsaoirse sin, lena n-áirítear an tsaoirse tuairimíochta agus an tsaoirse faisnéis agus smaointe a fháil agus a scaipeadh, gan beann ar theorainneacha, mar aon le saoirse agus iolrachas na meán, i gcomhréir le luachanna an Aontais faoi Airteagal 2 den Chonradh ar an Aontas Eorpach. Go deimhin, is gá rochtain a bheith ag roinnt oibreoirí ar an margadh chun an t-iolrachas agus an tsaoráil faisnéise a áirithiú.

(3)

Le Cinneadh 2009/766/CE ón gCoimisiún (3) comhchuibhítear na coinníollacha teicniúla maidir leis an speictream raidió a úsáid i mbandaí minicíochta 880-915 MHz agus 925-960 MHz (“banda minicíochta 900 MHz”) agus i mbandaí minicíochta 1 710-1 785 MHz agus 1 805-1 880 MHz (“banda minicíochta 1 800 MHz”) le haghaidh córais trastíre atá in ann seirbhísí cumarsáide leictreonaí a sholáthar san Aontas, lena n-áirítear seirbhísí leathanbhanda gan sreang. Leis sin, áirithítear comhlíontacht le hAirteagal 1(1) de Threoir 87/372/CEE ón gComhairle (4) a mhéid a bhaineann le cómhaireachtáil córas trastíre atá in ann seirbhísí cumarsáide leictreonaí a sholáthar le córais GSM i mbanda minicíochta 900 MHz.

(4)

Le hAirteagal 6(3) de Chinneadh Uimh. 243/2012/AE ó Pharlaimint na hEorpa agus ón gComhairle (5), ceanglaítear ar na Ballstáit cuidiú le soláthraithe seirbhísí cumarsáide leictreonaí a líonraí a nuashonrú go tráthrialta chuig an teicneolaíocht is déanaí agus is éifeachtúla, chun a ndíbhinní speictrim féin a chruthú i gcomhréir le prionsabail na neodrachta ó thaobh na teicneolaíochta agus na seirbhíse de. Dá bhrí sin, maidir le bandaí minicíochta 900 MHz agus 1 800 MHz a bhfuil blocmhéideanna móra 5 MHz ar a laghad acu, ba cheart úsáid na mbandaí minicíochta sin i dtacaíocht le córais trastíre leathanbhanda gan sreang den chéad ghlúin eile (5G) a éascú de bhun chuspóirí chreat rialála an Aontais agus i gcomhréir le dlí an Aontais.

(5)

Leagtar amach sa Teachtaireacht ón gCoimisiún dar teideal “Nascacht le haghaidh Margadh Aonair Digiteach Iomaíoch – I dtreo Sochaí Eorpach Ghigighiotáin” (6) cuspóirí nascachta nua le haghaidh an Aontais a thugtar cothrom le dáta leis an Teachtaireacht ón gCoimisiún dar teideal “Compás Digiteach 2030: an modh Eorpach don Deacáid Dhigiteach” (7). Bainfear na cuspóirí sin amach trí imscaradh forleathan líonraí fíor-ardacmhainne agus cur in úsáid líonraí fíor-ardacmhainne. Leis an Teachtaireacht ón gCoimisiún dar teideal “5G don Eoraip: Plean Gníomhaíochta” (8), sainaithnítear gníomhaíochtaí comhordaithe ar leibhéal an Aontais, lena n-áirítear sainaithint agus comhchuibhiú an speictrim le haghaidh 5G ar bhonn thuairim an Ghrúpa um Beartas Speictrim Raidió (RSPG), chun cumhdach 5G gan bhriseadh i ngach limistéar uirbeach agus ar gach mórbhealach iompair trastíre a áirithiú faoi 2025.

(6)

Ina dhá thuairim an 16 Samhain 2016 (9) agus an 30 Eanáir 2019 (10) maidir le treochlár straitéiseach speictrim i dtreo 5G don Eoraip, shainaithin RSPG an gá lena áirithiú go mbeidh na coinníollacha teicniúla agus rialála maidir leis na bandaí uile a comhchuibhíodh cheana le haghaidh líonraí móibíleacha in oiriúint lena n-úsáid le haghaidh 5G, lena n-áirítear bandaí minicíochta 900 MHz agus 1 800 MHz, atá in úsáid faoi láthair san Aontas go príomha le haghaidh an dara glúin (GSM), an tríú glúin (UMTS) agus an ceathrú glúin (LTE) de chórais mhóibíleacha.

(7)

An 14 Iúil 2017, i gcomhréir le hAirteagal 4(2) den Chinneadh maidir le Speictream Raidió, thug an Coimisiún sainordú do Chomhdháil Eorpach na Riarachán Poist agus Teileachumarsáide (CEPT) athbhreithniú a dhéanamh ar na coinníollacha teicniúla comhchuibhithe maidir le bandaí minicíochta 900 MHz agus 1 800 MHz a úsáid le haghaidh seirbhísí trastíre leathanbhanda gan sreang agus seirbhísí cumarsáide leictreonaí agus é mar chuspóir aige sin go bhféadfar Idirlíon na Rudaí Nithiúla (IoT) iad a úsáid.

(8)

Mar fhreagairt ar an sainordú sin, an 13 Márta 2018 ghlac CEPT Tuarascáil 66 CEPT, lena sainaithnítear teicneolaíochtaí IoT gan sreang i ndáil le córais chumarsáide leathanbhanda mhóibíligh (i.e. ceallach) agus coinníollacha teicniúla comhchuibhithe maidir lena n-úsáid i mbandaí minicíochta 900 MHz agus 1 800 MHz. Is éard atá sna teicneolaíochtaí IoT Cumhdach Leathnaithe GSM IoT (EC-GSM-IoT), Cumarsáid Meaisín le Meaisín LTE (LTE-MTC), Cumarsáid Meaisín le Meaisín fhorbartha LTE (LTE-eMTC), agus IoT Caolbhanda (NB-IoT). Is é conclúid Thuarascáil 66 CEPT freisin go bhfuil EC-GSM-IoT ina dhlúthchuid den chóras GSM faoi Threoir 87/372/CEE. Dá bhrí sin, comhlíonann EC-GSM-IoT na coinníollacha teicniúla is infheidhme maidir le córas GSM gan aon ghá leis na coinníollacha sin a leasú.

(9)

An 12 Iúil 2018 thug an Coimisiún sainordú faoi Airteagal 4(2) den Chinneadh maidir le Speictream Raidió do CEPT athbhreithniú a dhéanamh ar na coinníollacha teicniúla comhchuibhithe maidir le bandaí minicíochta comhchuibhithe AE áirithe, lena n-áirítear bandaí minicíochta 900 MHz agus 1 800 MHz, agus forbairt a dhéanamh ar na coinníollacha teicniúla comhchuibhithe is lú srian atá oiriúnach do chórais trastíre leathanbhanda gan sreang den chéad ghlúin eile (5G).

(10)

Mar fhreagairt ar an sainordú sin, an 5 Iúil 2019 ghlac CEPT Tuarascáil 72 CEPT (Tuarascáil A) arb é a conclúid go leanfaidh córais GSM agus córais trastíre caolbhanda lena n-áirítear córais cheallacha IoT de bheith i bhfeidhm ó thaobh tráchtála de laistigh de bhanda minicíochta 900 MHz go ceann i bhfad. Sonraítear sa tuarascáil sin an gá le deighilt minicíochta 200 kHz, i gcás ina bhfuil córais GSM agus córais trastíre caolbhanda i bhfeidhm i mbandaí minicíochta 900 MHz agus 1 800 MHz, lena n-áirítear córais cheallacha IoT. Thairis sin, cuirtear faisnéis ar fáil sa Tuarascáil sin faoina indéanta a bheadh sé bandaí minicíochta 900 MHz agus 1 800 MHz a úsáid le haghaidh 5G, lena n-áirítear aon teorainn le Treoir GSM maidir le banda 900 MHz.

(11)

Mar fhreagairt ar an sainordú sin, an 2 Iúil 2021 ghlac CEPT Tuarascáil 80 CEPT (Tuarascáil B), ina moltar plean comhchuibhithe um bandaí agus na coinníollacha teicniúla comhchuibhithe is lú srian maidir le cómhaireachtáil córas trastíre caolbhanda agus córas trastíre leathanbhanda, córais atá in ann seirbhísí cumarsáide leictreonaí a sholáthar agus úsáid á baint as bandaí minicíochta 900 MHz agus 1 800 MHz, bunaithe ar choincheap an mhaisc BEM. Tá na coinníollacha sin fíor-riachtanach chun neodracht na teicneolaíochta a áirithiú i mbandaí minicíochta 900 MHz agus 1 800 MHz.

(12)

Sainítear i dTuarascáil 80 CEPT masc BEM amháin le haghaidh córais trastíre caolbhanda agus córais trastíre leathanbhanda a úsáideann córais aeróige neamhghníomhacha, agus masc BEM eile le haghaidh córais trastíre leathanbhanda a úsáideann córais aeróige ghníomhacha. Ní chumhdaítear GSM agus EC-GSM-IoT leis na maisc BEM sin agus tá tagairtí do chaighdeáin ETSI ina saintréithe teicniúla díobh. Ar an mbonn sin, i dTuarascáil 80 CEPT cuirtear na coinníollacha teicniúla is lú srian ar fáil maidir le cómhaireachtáil córas trastíre caolbhanda difriúil agus córas trastíre leathanbhanda difriúil (11), córais atá in ann seirbhísí cumarsáide leictreonaí a sholáthar laistigh de bhandaí minicíochta 900 MHz agus 1 800 MHz. Cuirtear ar fáil ann freisin na coinníollacha maidir leis cómhaireachtáil na gcóras sin leis an gcóras GSM laistigh de bhanda minicíochta 900 MHz, de bhun Threoir 87/372/CEE ón gComhairle.

(13)

Leis na maisc BEM, cumhdaítear córais trastíre caolbhanda a bhfuil bandaleithead cainéil 200 kHz acu, ach gan GSM agus EC-GSM-IoT a áireamh. Cumhdaítear leo freisin córais trastíre leathanbhanda a bhfuil bandaleithead cainéil níos mó ná 200 kHz acu. Tá gá leis an difreáil idir córais trastíre caolbhanda agus córais trastíre leathanbhanda chun deighilt minicíochta a chur chun feidhme i gcásanna áirithe ar an leibhéal náisiúnta. I ndáil leis sin, leagtar amach i dTuarascáil 80 CEPT deighilt minicíochta idir ciumhaiseanna cainéil ainmniúla córas trastíre caolbhanda agus leathanbhanda atá cóngarach dá chéile agus atá in ann seirbhísí cumarsáide leictreonaí a sholáthar mar aon le deighilt minicíochta idir ciumhaiseanna cainéil ainmniúla córas trastíre caolbhanda difriúil atá cóngarach dá chéile agus atá in ann seirbhísí cumarsáide leictreonaí a sholáthar agus GSM agus EC-GSM-IoT freisin. Ba cheart cur chun feidhme an scartha minicíochta a bhainistiú ar an leibhéal náisiúnta. D’fhéadfaí cuir chuige dhifriúla a chur chun feidhme de réir ciumhaiseanna speictrim córas trastíre atá cóngarach dá chéile agus de réir beartas náisiúnta ábhartha. Áirítear i dTuarascáil 80 CEPT bosca uirlisí chun deighilt minicíochta a chur chun feidhme.

(14)

Cuirtear ar fáil i dTuarascáil 80 CEPT na coinníollacha teicniúla is lú srian maidir le cómhaireachtáil córas trastíre caolbhanda agus córas trastíre leathanbhanda, córais atá in ann seirbhísí cumarsáide leictreonaí a sholáthar, le córais i mbandaí minicíochta atá cóngarach dá chéile, go háirithe córais um Raidió Móibíleach Iarnróid (córais RMR). I ndáil leis sin, féadfar deighilt minicíochta 200 kHz a chur i bhfeidhm i gcásanna áirithe idir ciumhaiseanna cainéil ainmniúla córais trastíre atá in ann seirbhísí cumarsáide leictreonaí a sholáthar agus córas RMR, atá cóngarach dó ó thaobh minicíochta de. Maidir le cómhaireachtáil córas GSM agus córas RMR, ba cheart í sin a bhainistiú ar an leibhéal náisiúnta i gcomhréir leis an gcreat rialála atá ann cheana.

(15)

Is iad na coinníollacha teicniúla comhchuibhithe a leagtar amach i dTuarascáil 80 CEPT an bunús teicniúil maidir leis an gCinneadh seo. Ba cheart iad a chur in ionad choinníollacha teicniúla comhchuibhithe Chinneadh 2009/766/CE, coinníollacha atá bunaithe ar thagairtí do chaighdeáin ETSI agus, san am céanna, comhoiriúnacht a áirithiú idir na coinníollacha sin agus na coinníollacha leasaithe. Leis sin, ba cheart deimhneacht dhlíthiúil agus cóineasú teicniúil a chur chun cinn ar fud an Aontais i dtacaíocht le barainneacht scála trealaimh agus seirbhísí idir-inoibritheacha sa mhargadh aonair.

(16)

Maidir le cearta úsáide speictrim i mbandaí minicíochta 900 MHz agus 1 800 MHz, atá faoi réir Chinneadh 2009/766/CE, bíonn siad éagsúil ar fud na mBallstát i dtéarmaí blocmhéideanna sannta, socruithe minicíochta nó fhaid na gceart sin. Dá bhrí sin, mar gheall ar chásanna náisiúnta difriúla agus cuspóirí beartais difriúla atá ann cheana, tá gá le solúbthacht a choinneáil le haghaidh chur chun feidhme náisiúnta na gcoinníollacha teicniúla comhchuibhithe de bhun an Chinnidh seo. Ba cheart teorainn ama a chur leis an tsolúbthacht náisiúnta i gcomhréir le hAirteagal 53 de Threoir (AE) 2018/1972 ó Pharlaimint na hEorpa agus ón gComhairle (12), chun gur féidir cearta úsáide speictrim atá ann cheana a aistriú go comhordaithe chuig na coinníollacha teicniúla comhchuibhithe sin. Aon chearta úsáide speictrim nua nó faidréiseacha a dheonaítear tar éis an Cinneadh seo a ghlacadh, ba cheart na coinníollacha teicniúla comhchuibhithe a chomhlíonadh leo. Chothófaí leis sin éiceachóras trealaimh agus seirbhísí ar fud an Aontais agus spreagfaí 5G a imscaradh sa dá bhanda minicíochta, agus d’áiritheofaí go leanfar de sheirbhísí GSM a sholáthar i gcomhréir le Treoir GSM.

(17)

Ba cheart an Cinneadh seo a chur in ionad Chinneadh 2009/766/CE ón gCoimisiún. Ar mhaith le soiléireacht dhlíthiúil, ba cheart Cinneadh 2009/766/CE ón gCoimisiún a aisghairm. Maidir leis an Iarscríbhinn a ghabhann leis agus a fhorálacha ábhartha lena gceadaítear speictream i mbandaí minicíochta 900 MHz agus 1 800 MHz a úsáid le haghaidh córais eile nach liostaítear san Iarscríbhinn, ba cheart iad sin a bheith infheidhme ar feadh idirthréimhse.

(18)

D’fhéadfadh sé go mbeidh gá le comhaontuithe comhordaithe trasteorann i measc na mBallstát agus idir na Ballstáit agus tíortha nach Ballstáit den Aontas iad chun trasnaíocht dhíobhálach a sheachaint agus chun éifeachtúlacht speictrim agus neamhbhloghadh in úsáid speictrim a fheabhsú, i gcomhréir le hAirteagal 28 de Threoir (AE) 2018/1972.

(19)

Maidir leis an gcoincheap bandaí minicíochta 900 MHz agus 1 800 MHz a ainmniú agus a chur ar fáil, i gcomhthéacs an Chinnidh seo tagraíonn sé sin do na céimeanna seo a leanas: (i) creat dlíthiúil náisiúnta maidir le leithdháileadh minicíochta a oiriúnú chun úsáid na mbandaí seo atá beartaithe faoi na coinníollacha teicniúla comhchuibhithe a leagtar amach sa Chinneadh seo a áireamh, (ii) na bearta uile is gá a thionscnamh chun cómhaireachtáil a áirithiú leis an úsáid atá ann cheana sa bhanda seo a mhéid is gá, (iii) na bearta is iomchuí a thionscnamh, agus próiseas comhairliúcháin le páirtithe leasmhara a sheoladh i gcás inarb iomchuí mar thacaíocht leis sin, chun úsáid na mbandaí seo a cheadú i gcomhréir leis an gcreat dlíthiúil is infheidhme ar leibhéal an Aontais, lena n-áirítear coinníollacha teicniúla comhchuibhithe an Chinnidh seo.

(20)

Tá na bearta dá bhforáiltear sa Chinneadh seo i gcomhréir le tuairim an Choiste um an Speictream Raidió,

(a)

Ciallaíonn “córas GSM” líonra cumarsáide leictreonaí mar a shonraítear le caighdeáin ETSI, go háirithe EN 301 502, EN 301 511, agus EN 301 908-18, lena n-áirítear freisin Cumhdach Leathnaithe GSM IoT (EC-GSM-IoT);

(b)

Ciallaíonn “banda 900 MHz” banda 880-915 MHz agus banda 925-960 MHz;

(c)

Ciallaíonn “banda 1 800 MHz” banda 1 710-1 785 MHz agus banda 1 805-1 880 MHz.