(1)

De réir Airteagal 16(4) den Chonradh ar an Aontas Eorpach (CAE), amhail ón 1 Samhain 2014, tá tromlach cáilithe de chomhaltaí na Comhairle le sainiú inter alia ar bhonn dhaonra na mBallstát.

(2)

Tugann Comhairle na nGnóthaí Eacnamaíocha agus Airgeadais sainordú go rialta don Choiste um Beartas Eacnamaíoch chun measúnú a dhéanamh ar inbhuanaitheacht fhadtéarmach agus ar cháilíocht an airgeadais phoiblí ar bhonn réamh-mheastachán daonra a chuireann Eurostat ar fáil.

(3)

I gcomhréir le Rialachán (CE) Uimh. 1059/2003 ó Pharlaimint na hEorpa agus ón gComhairle (2), ba cheart gurbh é aicmiú NUTS a d’úsáidfí i dtaca le staidreamh uile na mBallstát a tharchuirtear chuig an gCoimisiún agus a mhiondealaítear de réir aonad críochach. Dá réir sin, d’fhonn staidreamh réigiúnach inchomparáide a bhunú, ba cheart na haonaid chríochacha a shainiú i gcomhréir le haicmiú NUTS.

(4)

I gcomhréir leis an dara mír d’Airteagal 175 den Chonradh ar Fheidhmiú an Aontais Eorpaigh (CFAE), cuirfidh an Coimisiún tuarascáil faoi bhráid Pharlaimint na hEorpa, na Comhairle, an Choiste Eacnamaíoch agus Shóisialta agus Choiste na Réigiún gach trí bliana ar an dul chun cinn atá déanta maidir leis an gcomhtháthú eacnamaíoch, sóisialta agus críochach a ghnóthú. Tá sonraí réigiúnacha bliantúla ar leibhéal réigiúnach NUTS 3 riachtanach chun na tuarascálacha sin a ullmhú agus chun faireachán rialta a dhéanamh ar athruithe déimeagrafacha agus ar dhúshláin dhéimeagrafacha a d’fhéadfadh a bheith ann amach anseo i réigiúin an Aontais, lena n-áirítear cineálacha éagsúla réigiún amhail réigiúin teorann, réigiúin chathrach, réigiúin tuaithe agus réigiúin shléibhteacha agus oileánacha, tá gá le sonraí réigiúnacha bliantúla ar leibhéal réigiúnach NUTS 3. Ós rud é go mbíonn difríochtaí móra réigiúnacha le sonrú in aosú an daonra, ceanglaítear ar Eurostat réamh-mheastacháin réigiúnacha a ullmhú ar bhonn rialta chun an cur síos déimeagrafach ar réigiúin NUTS 2 san Aontas a chomhlánú.

(5)

I gcomhréir le hAirteagal 159 CFAE, tá tuarascáil le tarraingt suas ag an gCoimisiún gach bliain ar an dul chun cinn i ngnóthú chuspóirí Airteagal 151 CFAE lena n-áirítear an staid dhéimeagrafach san Aontas.

(6)

Ina Theachtaireacht an 20 Deireadh Fómhair 2009 dar teideal “Dlúthpháirtíocht i gcúrsaí sláinte: éagothroime sláinte a laghdú san AE”, thacaigh an Coimisiún le sonraí a fhorbairt tuilleadh agus le sonraí a bhailiú tuilleadh, agus le táscairí sláinte a fhorbairt tuilleadh, de réir aoise, gnéis, stádais shocheacnamaíoch agus toisí geografacha.

(7)

Is é is cuspóir do Straitéis an Aontais um Fhorbraíocht Inbhuanaithe, arna seoladh ag an gComhairle Eorpach in Gothenburg in 2001 agus arna hathnuachan i Meitheamh 2006, feabhas leanúnach a chur ar cháilíocht beatha na glúine seo agus na nglún atá le teacht. I dtuarascáil faireacháin an Choimisiúin (Eurostat), a fhoilsítear gach dhá bhliain, tugtar cur síos oibiachtúil staidrimh ar an dul chun cinn atá déanta, bunaithe ar shraith táscairí Aontais maidir le forbairt inbhuanaithe.

(8)

Tá staidreamh déimeagrafach bliantúil ríthábhachtach chun staidéar a dhéanamh ar raon leathan beartas agus iad a shainiú, go háirithe ó thaobh saincheisteanna sóisialta agus eacnamaíocha, ar an leibhéal náisiúnta agus réigiúnach. Ainmneoir tábhachtach, i gcás raoin leathan táscairí beartas, is ea staidreamh Eorpach maidir leis an daonra.

(9)

Soláthraíonn cuspóir straitéiseach H.3 de Chaibidil IV de Chlár Oibre Gníomhaíochta Bhéising (1995) creat tagartha maidir le giniúint agus scaipeadh sonraí agus faisnéise atá imdhealaithe ó thaobh na hinscne de le haghaidh cúiseanna pleanála agus meastóireachta beartais.

(10)

Cuid shár-riachtanach den mheastachán ar an daonra iomlán a dhéantar faoi chuimsiú Chóras Eorpach na gCuntas is ea staidreamh déimeagrafach. Is tábhachtach sonraí a nuashonrú agus a athbhreithniú nuair a bhíonn staidreamh á bhunú ar an leibhéal Eorpach.

(11)

Chun cáilíocht na sonraí a chuireann na Ballstáit ar fáil, ó thaobh inchomparáideachta de go háirithe, a áirithiú, agus chun forbhreathnú iontaofa a tharraingt suas ar leibhéal an Aontais, ba cheart na sonraí a úsáidtear a bheith bunaithe ar na coincheapa céanna, agus ba cheart iad a bheith ag tagairt don dáta tagartha céanna nó don tréimhse thagartha chéanna.

(12)

Le Rialachán (CE) Uimh. 223/2009 ó Pharlaimint na hEorpa agus ón gComhairle (3), soláthraítear creat tagartha maidir le staidreamh déimeagrafach Eorpach. Ceanglaítear leis, go háirithe, comhlíonadh na bprionsabal maidir le neamhspleáchas gairmiúil, neamhchlaontacht, oibiachtúlacht, iontaofacht, rúndacht staidrimh agus éifeachtacht costais.

(13)

Ba cheart an fhaisnéis maidir le déimeagrafaíocht a bheith comhsheasmhach leis an bhfaisnéis ábhartha arna bailiú de bhun Rialachán (CE) Uimh. 862/2007 ó Pharlaimint na hEorpa agus ón gComhairle (4) agus Rialachán (CE) Uimh. 763/2008 ó Pharlaimint na hEorpa agus ón gComhairle (5). Chuige sin, ba cheart modhanna meastacháin staidrimh a bhfuil bonn eolaíoch fúthu agus atá dea-dhoiciméadaithe a mheasúnú, agus ba cheart a n-úsáid a spreagadh.

(14)

Agus staidreamh Eorpach á fhorbairt, á chur ar fáil agus á scaipeadh acu, ba cheart do na húdaráis staidrimh náisiúnta agus Eorpacha, agus, i gcás inarb infheidhme, údaráis náisiúnta agus réigiúnacha ábhartha eile, aird a thabhairt ar na prionsabail a leagtar amach i gCód Cleachtais an Staidrimh Eorpaigh, mar a athbhreithníodh agus a nuashonraíodh é ag an gCoiste um an gCóras Staidrimh Eorpach an 28 Meán Fómhair 2011.

(15)

Ráthaítear leis an Rialachán seo an ceart go n-urramófar an saol príobháideach agus saol an teaghlaigh agus go ndéanfar sonraí pearsanta a chosaint, de réir mar a leagtar amach in Airteagal 7 agus in Airteagal 8 den Chairt um Chearta Bunúsacha an Aontais Eorpaigh.

(16)

Tá feidhm ag Treoir 95/46/CE ó Pharlaimint na hEorpa agus ón gComhairle (6) agus ag Rialachán (CE) Uimh. 45/2001 ó Pharlaimint na hEorpa agus ón gComhairle (7) maidir le sonraí pearsanta a phróiseáil i gcomhthéacs an Rialacháin seo.

(17)

Ós rud é nach féidir leis na Ballstáit cuspóir an Rialacháin seo, eadhon creat coiteann dlí a bhunú chun staidreamh déimeagrafach Eorpach sna Ballstáit a chur ar fáil go córasach, a ghnóthú go leordhóthanach ach gur féidir, de bharr fhairsinge agus éifeachtaí na gníomhaíochta, é a ghnóthú níos fearr ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta, a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(18)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (8),