IARSCRÍBHINN

Ceanglais maidir le doiciméadacht faoin táirge agus feidhmíocht trealaimh bhraite miotail

Roinn 1: Sainmhínithe

Chun críocha na hIarscríbhinne seo, beidh feidhm ag na sainmhínithe seo a leanas:

(1)

ciallaíonn ‘feiste leighis sho-ionphlandaithe ghníomhach’ (FLSIG) feistí leighis a chumhachtaítear le leictreachas is féidir a ionphlandú, a chaitheamh, nó an dá rud, agus a úsáideann ciorcadra leictreonach go hiondúil, le haghaidh fhaireachán fiseolaíoch an duine nó chun cóir leighis nó teiripe a chur ar fáil, amhail drugaí nó spreagadh leictreach;

(2)	ciallaíonn ‘coincheap na n-oibríochtaí’ (CONOPS) doiciméad ina dtugtar tuairisc ar shaintréithe an trealaimh agus ar an nós imeachta nó na nósanna imeachta chun an trealamh a oibriú i gceart;

(3)

ciallaíonn ‘plána brathadóra’ plána (dromchla déthoiseach) samhailteach a théann trí lár limistéar braiteora an bhrathadóra miotail láimhe nó an gheata miotalbhraite atá comhthreomhar le plána eilimint braite an bhrathadóra miotail láimhe nó le tairseach an gheata miotalbhraite, agus a dhéroinneann an limistéar braiteora ina dhá leath shiméadracha.

(4)

ciallaíonn ‘nós imeachta dífheistithe’ nós imeachta lena rialaítear an cleachtas inar gá na rudaí a iompraíonn daoine leo, lena n-áirítear réada móra amhail sparáin, málaí, málaí droma agus cineálacha eile bagáiste, agus réada beaga araon amhail uaireadóirí, spéaclaí, criosanna agus seodra, a bhaint agus a iniúchadh ar leithligh, mar shampla trí x-ghathanna;

(5)	ciallaíonn ‘brathadóir miotail láimhe (HHMD)’ píosa trealaimh braite miotail iniompartha atá ceaptha a bheith i ngreim láimhe an duine atá á oibriú, in aon lámh amháin go hiondúil;

(6)	ciallaíonn ‘gaireas pléascach seiftithe (IED)’ buama nó gaireas pléasctha comhchosúil a dhéantar nó a úsáidtear ar bhealaí atá éagsúil ón ngáthghníomhaíocht mhíleata;

(7)	ciallaíonn ‘plána tomhais’ plána (dromchla déthoiseach) samhailteach ar a ndéantar an brathadóir miotail láimhe nó an geata miotalbhraite a thástáil, plána atá comhthreomhar le plána an bhrathadóra agus a ndéantar tagairt dó ó phlána an bhrathadóra;

(8)	ciallaíonn ‘ráta rabhaidh núise (NAR)’ an ráta bréagrabhaidh, is é sin, an ráta rabhaidh ar ítimí miotail neafaiseacha a ríomhadh thar an líon daoine a chuaigh trí limistéar braite geata miotalbhraite;

(9)

ciallaíonn ‘ráta tréchuir’ an t-uaslíon daoine agus a n-ítimí ar féidir scagadh a dhéanamh orthu in aghaidh an aonaid ama, uair an chloig go hiondúil, agus an brathadóir fós a bheith in ann rabhadh a thabhairt maidir le haon réad miotail atá den mhéid chuí de réir an chaighdeáin slándála atá leagtha síos;

(10)

ciallaíonn ‘réad tástála’ réad a úsáidtear chun tástáil a dhéanamh ar fheidhmíocht brathadóra miotail láimhe nó geata miotalbhraite, lena n-insamhlaítear na hairíonna leictreamaighnéadacha atá ag gabháil le réad ar díol spéise é a d’fhéadfaí a bheith ina bhagairt slándála, amhail arm nó aon ítim is féidir a úsáid chun gairis slándála a neodrú;

(11)	ciallaíonn ‘caighdeán slándála’ caighdeán lena sainmhínítear an tacar bagairtí slándála is gá a bhrath, agus tá na spriocanna bagartha tagartha ionadaíoch ar an tacar;

(12)	ciallaíonn ‘geata miotalbhraite (WTMD)’ píosa trealaimh braite miotail seasta, atá suite go buan go hiondúil i suíomh ar leith agus atá tógtha i bhfoirm áirse;

(13)	ciallaíonn ‘trasnaíocht mheicniúil’ an éifeacht ar fheidhmíocht trealaimh braite miotail mar thoradh ar struchtúir nó réada miotail cóngaracha atá seasta nó a bhogann;

(14)

ciallaíonn ‘Caighdeán NIJ 0601.02’ Caighdeán 0601.02 na hInstitiúide Náisiúnta Dlí agus Cirt arna fhoilsiú in Walk-Through Metal Detectors for Use in Concealed Weapon and Contraband Detection - NIJ Standard 0601.02 le Nicholas G. Paulter Jr., Roinn Dlí agus Cirt na Stát Aontaithe, Oifig na gClár Dlí agus Cirt, an Institiúid Náisiúnta Dlí agus Cirt, 2003;

(15)

ciallaíonn ‘Caighdeán NIJ 0602.02’ Caighdeán 0602.02 na hInstitiúide Náisiúnta Dlí agus Cirt arna fhoilsiú in Hand-Held Metal Detectors for Use in Concealed Weapon and Contraband Detection - NIJ Standard 0602.02 le Nicholas G. Paulter Jr., Roinn Dlí agus Cirt na Stát Aontaithe, Oifig na gClár Dlí agus Cirt, an Institiúid Náisiúnta Dlí agus Cirt, 2003;

Roinn 2: Doiciméadacht faoin Táirge

Ba cheart don doiciméadacht faoin táirge na ceanglais seo a leanas a chomhlíonadh, ceanglais a bhfuil feidhm acu maidir le brathadóirí miotail láimhe (HHMD) agus geataí miotalbhraite (WTMD) mura sonraítear a mhalairt:

2.1   Toisí fisiceacha an trealaimh bhraite miotail

Ba cheart toise foriomlán an HHMD a shloinneadh mar fhad (F) x leithead (L) x airde (A) i milliméadair (mm).

Ba cheart toise foriomlán phasáiste inmheánach an WTMD agus toise foriomlán seachtrach an WTMD a shloinneadh mar fhad (F) x leithead (L) x airde (A) i milliméadair (mm).

2.2   Meáchan an trealaimh bhraite miotail

Ba cheart meáchan foriomlán an HHMD (lena n-áirítear an ceallra) agus an WTMD a shloinneadh i ngraim (g) agus i gcileagraim (kg) faoi seach.

2.3   Soláthar cumhachta

I gcás inarb infheidhme, ba cheart a áireamh sa tásc ar sholáthar cumhachta faisnéis faoi voltas srutha ailtéarnaigh (VAC), minicíocht (Hz), sruth in aimpéir (A), agus cumhacht i vatanna (W).

Ba cheart an lamháltas a shloinneadh i bpointí céatadáin (%).

2.4   Ceallra

Ba cheart a chur in iúl má áirítear soláthar cumhachta cúltaca (i.e. ceallra) don WTMD. Má áirítear, ba cheart saolré an cheallra a shloinneadh in uaireanta (h).

Ba cheart táscaire leibhéil ísil ceallra a bheith ar an HHMD. Ba cheart saolré an cheallra a shloinneadh in uaireanta (h);

2.5   Rátáil IP

Ba cheart an rátáil Cosanta Iontrála (IP) de réir EN 60529 a thuairisciú.

2.6   Timpeallacht oibriúcháin

Ba cheart an teocht oibriúcháin a shloinneadh i gcéimeanna Celsius (°C).

Ba cheart an teocht stórála a shloinneadh i gcéimeanna Celsius (°C).

Ba cheart an taise a shloinneadh i raon i bpointí céatadáin (neamh-chomhdhlúthúcháin).

Ba cheart faisnéis a sholáthar maidir leis na bearta is gá chun trasnaíocht leictreamaighnéadach dhíobhálach a sheachaint, amhail an fad idir aonaid i méadair (m) atá molta.

2.7   Rabhaí limistéir/suímh (do WTMD)

Ba cheart faisnéis maidir leis an líon limistéar braite agus a suíomh faoi thairseach an WTMD a sholáthar mar chuid den doiciméadacht faoin táirge.

2.8   Ceanglais maidir le marcáil CE

Ba cheart faisnéis a bheith sa doiciméadacht faoin táirge a léiríonn go gcomhlíonann an trealamh braite miotail na ceanglais AE maidir le marcáil CE. Tá sé de fhreagracht ar mhonaróirí a chinneadh cé na rialacha is infheidhme dá dtáirgí féin. Ar na forálacha ábhartha, tá, mar shampla:

(a)	Treoir 2011/65/AE ó Pharlaimint na hEorpa agus ón gComhairle an 8 Meitheamh 2011 maidir le srian ar shubstaintí guaiseacha áirithe a úsáid i dtrealamh leictreach agus leictreonach (1);

(b)	Treoir 2014/53/AE ó Pharlaimint na hEorpa agus ón gComhairle an 16 Aibreán 2014 maidir le comhchuibhiú dhlíthe na mBallstát a bhaineann le trealamh raidió a chur ar fáil ar an margadh agus lena n-aisghairtear Treoir 1999/5/CE (2);

(c)	Treoir 2014/30/AE ó Pharlaimint na hEorpa agus ón gComhairle an 26 Feabhra 2014 maidir le comhchuibhiú dhlíthe na mBallstát a bhaineann le comhoiriúnacht leictreamaighnéadach (3);

(d)	Treoir 2014/35/AE ó Pharlaimint na hEorpa agus ón gComhairle an 26 Feabhra 2014 maidir le comhchuibhiú dhlíthe na mBallstát a bhaineann le trealamh leictreach a chur ar fáil ar an margadh, ar trealamh é a dheartar lena úsáid laistigh de theorainneacha áirithe voltais (4).

2.9   Ceanglais sábháilteachta ghinearálta

Ba cheart faisnéis a bheith sa doiciméadacht faoin táirge a léiríonn go gcomhlíontar na caighdeáin agus na noirm thagartha agus lena n-áirithítear gur féidir an trealamh braite miotail a úsáid go sábháilte, do na daoine a bhfuil scagadh á dhéanamh orthu agus do na daoine atá ag oibriú an trealaimh araon. Áirítear na cinn seo a leanas ar na caighdeáin agus na noirm thagartha sin, sa leagan formheasta is déanaí díobh:

(a)

Caighdeáin le haghaidh feistí leighis so-ionphlandaithe gníomhacha (FLSIG) — EN 50527-1: Nós imeachta chun measúnú a dhéanamh ar nochtadh na n-oibrithe a bhfuil feistí leighis so-ionphlandaithe gníomhacha ar iompar acu do réimsí leictreamaighnéadacha – Cuid 1: Ginearálta — EN 50527-2-x: Nós imeachta chun measúnú a dhéanamh ar nochtadh na n-oibrithe a bhfuil feistí leighis so-ionphlandaithe gníomhacha ar iompar acu do réimsí leictreamaighnéadacha — Cuid 2.1: Measúnú sonrach le haghaidh oibrithe a bhfuil séadairí cairdiacha acu — Cuid 2.2: Measúnú sonrach le haghaidh oibrithe a bhfuil dífhibrileoirí cardaithiontaire (ICDanna) acu — Cuid 2.3: Measúnú sonrach le haghaidh oibrithe a bhfuil néaraspreagthóirí so-ionphlandaithe acu — EN ISO 14708-X: Ionphlanduithe don mháinliacht – Feistí leighis so-ionphlandaithe gníomhacha — Cuid 2: Séadairí cairdiacha — Cuid 3: Néaraspreagthóirí so-ionphlandaithe — Cuid 4: Caidéil insilte sho-ionphlandaithe — Cuid 5: Feistí tacaíochta imshruthaithe — Cuid 6: Ceanglais ar leith maidir le feistí leighis so-ionphlandaithe gníomhacha atá ceaptha chun an taicineamhrithimeacht a chóireáil (lena n-áirítear dífhibrileoirí so-ionphlandaithe) — Cuid 7: Ceanglais ar leith maidir le córais ionphlandaithe cochla agus stoic inchinne fuaime

(b)

Caighdeáin maidir le nochtadh an duine: — EN 50364: Caighdeán táirge maidir le nochtadh an duine do réimsí leictreamaighnéadacha ó fheistí a oibríonn sa raon minicíochta 0 Hz go dtí 300 GHz, a úsáidtear san Fhaireachas Leictreonach Earraí (EAS), sa tSainaithint Radaimhinicíochta (RFID) agus in úsáidí gaolmhara — Moladh 1999/519/CE ón gComhairle an 12 Iúil 1999 maidir leis an teorannú ar nochtadh an phobail i gcoitinne do réimsí leictreamaighnéadacha (0 Hz go dtí 300 GHz) — Treoir 2013/35/AE maidir leis na híoscheanglais sábháilteachta agus sláinte a bhaineann le nochtadh oibrithe do rioscaí a bhaineann le hoibreáin fhisiceacha (réimsí leictreamaighnéadacha);

2.10   Coincheap na n-oibríochtaí

Ba cheart coincheap na n-oibríochtaí (CONOPS) a sholáthar mar chuid den doiciméadacht faoin táirge. Má bhaineann CONOPS difriúla le caighdeáin slándála difriúla, ba cheart an méid sin a chur in iúl go soiléir.

Roinn 3: Ceanglais feidhmíochta maidir le brath miotail

Ba cheart don trealamh braite miotail na ceanglais feidhmíochta maidir le brath miotail seo a leanas a chomhlíonadh:

3.1   Caighdeáin slándála

Ba cheart an trealamh braite miotail a shocrú i ndáil leis na caighdeáin slándála iomchuí as na cúig chaighdeán seo a leanas:

3.1.1   Caighdeán 1 (do WTMD)

Tá an caighdeán seo ceaptha le húsáid i gcás inar gá airm chontúirteacha a bhrath ach ina bhfuil gá le tréchur ard agus rátaí ísle i leith rabhaidh núise. I measc na n-úsáidí tá an t-olliompar agus limistéir mhóra tionóil.

I measc na spriocanna bagartha a bhaineann leis an gcatagóir seo ba cheart na cinn seo a leanas a áireamh: raidhfilí uathoibríocha, meaisínghunnaí agus IEDanna brúbhruthaire, amhail raidhfilí ionsaithe (bíodh piléarlann iontu nó ná bíodh), AK47, Beretta M12, Colt AR-15, feireadh buama píopa (80 x 300) mm, agus IED brúbhruthaire cruach dosmálta agus alúmanaim ceithre lítear, agus réada den mhéid chéanna.

Ba cheart réada tástála lena n-insamhlaítear réada an-mhór ar díol spéise iad a úsáid don chatagóir seo. Níor cheart go mbeadh nósanna imeachta dífheistithe ag teastáil agus d’fhéadfaí cásanna taistil, málaí nó málaí droma a iompar.

3.1.2   Caighdeán 2 (do WTMD)

Na spriocanna bagartha a bhaineann leis an gcatagóir seo, ba cheart gunnaí láimhe meánmhéide (e.g. Glock 17) agus réada den mhéid chéanna a bheith i gceist.

Is réada tástála lena n-insamhlaítear réada an-mhór ar díol spéise iad ba cheart a úsáid don chatagóir seo, lena n-áirítear gunnaí láimhe lánmhéide mar a thugtar tuairisc orthu i roinn 4.6, leibhéal slándála 2, triailphíosa AM7, de chaighdeán na hInstitiúide Náisiúnta um Fhorfheidhmiú Dlí agus Ceartas Cóiriúil (NILECJ) maidir le ‘geata miotalbhraite atá le húsáid chun airm a bhrath,’ (NILECJ-STD-0601.00).

Níor cheart go mbeadh nósanna imeachta dífheistithe ag teastáil agus d’fhéadfaí málaí beaga nó málaí droma a iompar.

3.1.3   Caighdeán 3

Na spriocanna bagartha a bhaineann leis an gcatagóir seo, ba cheart gunnaí láimhe beaga, idir airm thine dhlútha agus airm thine phóca, agus réada den mhéid chéanna a bheith i gceist.

Is réada tástála lena n-insamhlaítear réada meánmhéide ar díol spéise iad ba cheart a úsáid don chatagóir seo, lena n-áirítear gunnaí láimhe a dhéantar as miotal fearómaighnéadach nó neamh-fhearómaighnéadach mar a thugtar tuairisc orthu i roinn 5.1 de Chaighdeán NIJ 0601.02 nó i gCaighdeán NIJ 0602.02. Áirítear macasamhla agus líníochtaí meicniúla i gCaighdeán NIJ 0601.02 agus i gCaighdeán NIJ 0602.02.

Ba cheart nósanna imeachta dífheistithe a bheith ag teastáil. Ba cheart gach ítim miotail a dhífheistiú seachas sparáin, uaireadóirí, criosanna, bróga agus seodra beaga.

3.1.4   Caighdeán 4

Na spriocanna bagartha a bhaineann leis an gcatagóir seo, ba ceart ceana ar faide ná 7.5 cm a lanna agus réada den mhéid chéanna a bheith i gceist.

Is réada tástála lena n-insamhlaítear réada beaga ar díol spéise iad ba cheart a úsáid don chatagóir seo, lena n-áirítear sceana ar faide ná 7.5 cm a lanna a dhéantar as miotal fearómaighnéadach nó neamh-fhearómaighnéadach mar a thugtar tuairisc orthu i roinn 5.2 de Chaighdeán NIJ 0601.02 nó i gCaighdeán NIJ 0602.02. Áirítear macasamhla agus líníochtaí meicniúla i gCaighdeán NIJ 0601.02 agus i gCaighdeán NIJ 0602.02.

Ba cheart nósanna imeachta dífheistithe a bheith ag teastáil. Ba cheart gach ítim miotail a dhífheistiú seachas uaireadóirí beaga, agus criosanna beaga.

3.1.5   Caighdeán 5

Na hítimí bagartha a bhaineann leis an gcatagóir seo, ba cheart gur airm beaga atá iontu agus ba cheart a áireamh leo, mar shampla, sceana cruach dosmálta, eochracha glais lámh, béalmhír scriúire, urchar de chalabra beag agus réada den mhéid chéanna.

Is réada tástála lena n-insamhlaítear réada an-bheag ba cheart a úsáid don chatagóir seo, lena n-áirítear airm bheaga i bhfolach ar dhuine a dhéantar as miotal fearómaighnéadach nó neamh-fhearómaighnéadach mar a thugtar tuairisc air i roinn 5.3 de Chaighdeán NIJ 0601.02 nó i gCaighdeán NIJ 0602.02. Áirítear macasamhla agus líníochtaí meicniúla i gCaighdeán NIJ 0601.02 agus i gCaighdeán NIJ 0602.02.

Ba cheart nósanna imeachta dífheistithe a bheith ag teastáil. Ba cheart gach ítim miotail a dhífheistiú.

3.2   Íogaireacht bhraite

Ba cheart don trealamh braite miotail réada ar díol spéise iad a bhrath a d’fhéadfaí a úsáid chun bagairtí slándála a dhéanamh, réada atá ar iompar ag duine nó i mála a chaitear, a iompraítear, nó a tharraingítear, gan beann ar a dtreoshuíomh, a gconair agus idirthuras, nó a luas gluaiste.

D’fhéadfadh íogaireacht bhraite an trealaimh sin a bheith éagsúil ag brath ar an gcaighdeán a chomhlíonann an trealamh a dtugtar tuairisc air i roinn 3.1 den Iarscríbhinn seo. Le caighdeán 1 éilítear trealamh leis an íogaireacht is lú, ach le caighdeán 5 éilítear trealamh leis an íogaireacht is mó.

3.2.1   Treoshuíomh agus luas gluaiste (do HHMD)

Ba cheart don HHMD an réad tástála a bhrath atá ionadaíoch ar chaighdeán slándála ar leith suite sa phlána tomhais iomchuí nó sna plánaí tomhais iomchuí do gach treoshuíomh a cheadaítear tríd an mbrathadóir a bhogadh ar luas idir 0.05 agus 2.0 m/s, mar a thugtar tuairisc air i gCaighdeán NIJ–0602.02.

3.2.2   Treoshuíomh, conair agus luas gluaiste (do WTMD)

Tugtar tuairisc ar an tacar íosta treoshuíomhanna ortagánacha ba cheart a úsáid chun íogaireacht WTMD a thástáil san fhoilseachán ó ASTM International dar teideal ‘Standard Practice for Performance Evaluation of In-Plant Walk-Through Metal Detectors’ [Gnáthchleachtas chun Measúnú a dhéanamh ar Fheidhmíocht Geataí Miotalbhraite i nGléasra] C1309 – 97 (2021).

Ba cheart don WTMD an réad tástála a bhrath atá ionadaíoch ar chaighdeán slándála ar leith ag suíomhanna conaire áirithe mar a thugtar tuairisc air i gCaighdeán NIJ–0601.02.

Na suíomhanna go léir nach dtéann an réad tástála go hiomlán leis an tairseach brathadóra nó atá ina gcúis le haon chuid den réad tástála airde uasta na limistéar braite a shárú, mar gheall ar a mhéid agus a threoshuíomh, ba cheart na suíomhanna sin a scipeáil.

Ba cheart an gnáthluas coisithe (0.5 m/s – 1.3 m/s) a úsáid mar mheánluas iompair an réada tástála agus tástáil á déanamh air.

3.3   In-atrialltacht

Ba cheart in-atrialltacht bhraite a áirithiú le córas cáilíochta an mhonaróra agus trí aonaid éagsúla trealaimh bhraite miotail a thástáil i bhfo-thacar suíomhanna.

3.4   Idirdhealú miotail (de WTMD)

Ba cheart a cheangal le ceanglais idirdhealaithe miotail do WTMD go dtugann an WTMD rabhadh maidir le réad iomchuí agus ní maidir le réad neamhurchóideach. Ba cheart meastóireacht a dhéanamh ar an idirdhealú trí thástáil a dhéanamh ar an WTMD i bhfíorthimpeallacht ach a mbeidh na feidhmíochtaí braite bailíochtaithe don chaighdeán slándála sonrach. Ba cheart nósanna imeachta dífheistithe iomchuí a bheith ag teastáil de réir an chaighdeáin slándála faoi mheastóireacht. Chun measúnú a dhéanamh ar an idirdhealú, ba cheart an cóimheas rabhadh/idirthurais iomlána ar líon daoine a théann tríd an WTMD a chomhaireamh. Ba cheart ar a laghad míle duine a bheith ag teastáil don suirbhé staidrimh sin.

3.5   Ráta rabhaidh tréchuir agus rabhaidh núise (do WTMD)

Ba cheart gur ísle ná 2 shoicind a bheadh am scagtha an WTMD. Ba cheart an ráta rabhaidh núise a bheith faoi bhun 5 % de réir na nósanna imeachta dífheistithe a dtugtar tuairisc orthu i roinn 3.1 den Iarscríbhinn seo.

3.6   Trasnaíocht mheicniúil

Níor cheart don bhrathadóir rabhadh a thabhairt nuair a dhéantar é a choigeartú chun an réad tástála den mhéid chuí a aimsiú.

3.7   Trasnaíocht ó roinnt réada miotail (do WTDM)

Do WTMD, má tá réada miotail ann seachas na spriocanna bagartha a dtugtar tuairisc orthu sa chaighdeán slándála roghnaithe, níor cheart dó sin cur isteach ar bhrath ítime bagartha agus é ag dul tríd an tairseach.

3.8   Rabhaidh shochloiste agus amhairc

Ba cheart rabhadh sochloiste agus amhairc a bheith ag gabháil leis an trealamh braite miotail. Ba cheart an rabhadh sochloiste a bheith le brath ag raon 1 mhéadar i gcás HHMD agus ag raon 2 mhéadar i gcás WTMD. Ba cheart do tháscaire amhairc a léiriú go bhfuil an HHDM ar obair agus maidir leis an WTMD ba cheart dó neart an chomhartha a bhraitear a léiriú.

---

(1)  IO L 174, 1.7.2011, lch. 88.

(2)  IO L 153, 22.5.2014, lch. 62.

(3)  IO L 96, 29.3.2014, lch. 79.

(4)  IO L 96, 29.3.2014, lch. 357.