IARSCRÍBHINN

Gabhann an Iarscríbhinn seo leis an Moladh ón gCoimisiún maidir le maoiniú a éascú don aistriú chuig geilleagar inbhuanaithe (1). Comhlánaíonn sí na moltaí le breithnithe agus léaráidí níos mionsonraithe chun tacú le húsáid dheonach uirlisí ó chreat an Aontais um airgeadas inbhuanaithe le haghaidh maoiniú um aistriú. Léirítear inti roghanna agus moltaí éagsúla do ghnóthais agus d’institiúidí airgeadais chun spriocanna um aistriú a leagan síos, riachtanais agus tionscadail i ndáil le maoiniú um aistriú a chur in iúl agus a shainaithint chomh maith le maoiniú um aistriú a thiomsú nó a sholáthar.

Clár ábhar

1.

An gaol idir maoiniú glas agus maoiniú um aistriú

35

2.

Breithnithe maidir le conas a d’fhéadfaí cineálacha éagsúla tionchar, rioscaí agus deiseanna a bhaineann le gnóthas a léiriú i spriocanna aonair um aistriú

35

3.

Forbhreathnú ar uirlisí airgeadais inbhuanaithe chun riachtanais i ndáil le maoiniú um aistriú a chur in iúl agus a chinneadh

38

4.

Modheolaíochtaí thagarmharcanna aeráide an Aontais

38

5.

Tacsanomaíocht an Aontais

39

5.1.

Cad chuige is féidir Tacsanomaíocht an Aontais a úsáid

39

5.2.

An Tacsanomaíocht mar uirlis um aistriú

40

5.3.

Roghanna maidir leis an Tacsanomaíocht a úsáid chun riachtanais i ndáil le maoiniú um aistriú a shonrú

40

6.

Ionstraimí maoiniúcháin chun maoiniú um aistriú a thiomsú

42

7.

An úsáid a bhaineann idirghabhálaithe airgeadais agus infheisteoirí as uirlisí airgeadais inbhuanaithe an Aontais Eorpaigh

43

1.   An gaol idir maoiniú glas agus maoiniú um aistriú

Is éard atá i gceist le hairgeadas inbhuanaithe nithe atá neamhdhíobhálach don chomhshaol cheana féin mar aon le nithe atá á n-aistriú chuig na leibhéil feidhmíochta sin le himeacht ama a mhaoiniú.

Léirítear i bhFíor 1 thíos an chaoi a mbaineann maoiniú um aistriú le maoiniú ginearálta agus le maoiniú glas, agus an chaoi a bhféadfadh na cineálacha éagsúla maoinithe sin forbairt sa ghearrthéarma, sa mheántéarma agus san fhadtéarma.

Is féidir maoiniú ginearálta, nach bhfuil aon chuspóir inbhuanaitheachta ag baint leis, a idirdhealú ó mhaoiniú glas agus ó mhaoiniú um aistriú. Faoi láthair, d’fhéadfadh gníomhaíochtaí ardtionchair agus gníomhaíochtaí ísealtionchair a bheith i gceist le maoiniú ginearálta den sórt sin. Le himeacht ama, de réir mar a aistreoidh an geilleagar, beidh ar ghníomhaíochtaí ardtionchair aistriú chun go mbeidh siad ina ngníomhaíochtaí ísealtionchair.

Maidir le maoiniú um aistriú, is é is aidhm dó an t-aistriú sin a mhaoiniú. D’fhéadfadh maoiniú úsáide fáltas agus maoiniú ilchuspóireach (corparáideach) araon a bheith i gceist leis sin. Sa ghearrthéarma, is minic nach mbeidh de thoradh ar mhaoiniú um aistriú go ndéanfar feabhsuithe a chomhlíonfadh spriocanna feidhmíochta glasa. San fhadtéarma, áfach, ní mór maoiniú um aistriú a ailíniú le cuspóirí aeráide agus comhshaoil an Aontais agus, dá bhrí sin, measfar é a bheith glas nó a bheith ina mhaoiniú ísealtionchair.

2.   Breithnithe maidir le conas a d’fhéadfaí cineálacha éagsúla tionchar, rioscaí agus deiseanna a bhaineann le gnóthas a léiriú i spriocanna aonair um aistriú

Baineann an roinn seo le pointí 3 agus 4 den Mholadh ón gCoimisiún.

Is féidir le gnóthais a riachtanais i ndáil le maoiniú um aistriú a mheas i bhfianaise a dtionchar, rioscaí agus deiseanna inbhuanaitheachta. Is féidir iad sin a shainaithint trí mheasúnú ábharthachta de réir chur chuige na hábharthachta dúbailte.

Mar chuid den mheasúnú sin, d’fhéadfadh gnóthais úsáid a bhaint as anailís ar chásanna a bhaineann leis an aeráid agus leis an gcomhshaol, chun bonn eolais a chur faoi shainaithint agus measúnú rioscaí um aistriú agus deiseanna fisiceacha um aistriú thar thréimhsí gearrthéarmacha, meántéarmacha agus fadtéarmacha. Ar bhonn thoradh an mheasúnaithe ábharthachta sin (2), d’fhéadfadh gnóthais spriocanna um aistriú a leagan síos agus riachtanais agus gealltanais i ndáil le maoiniú um aistriú a chinneadh, i gcás inarb ábhartha.

Tugtar forbhreathnú i bhFíor 2 ar na huirlisí is féidir a úsáid chun breithniú a dhéanamh ar conas riachtanais i ndáil le maoiniú um aistriú a shainiú i gcás tionchair ábhartha, agus ar conas riachtanais mhaoiniúcháin a shainiú chun aghaidh a thabhairt ar thionchair ísle nó iarmharacha.

Agus a n-aistriú á bpleanáil ag gnóthais agus riachtanais i ndáil le maoiniú um aistriú á sainiú acu, moltar dóibh a bhreithniú an leagfaidís síos spriocanna um aistriú bunaithe ar chonairí ábhartha um aistriú atá comhoiriúnach don aistriú, agus cineál na dtionchar á gcur san áireamh mar aon le tosca eile amhail déine, scála, raon feidhme agus doréititheacht na dtionchar sin. Is féidir le gnóthais leas a bhaint as caighdeáin agus treoraíocht atá ar fáil faoi Threoir (AE) 2022/2464 agus as a cur chun feidhme chun na críche sin (an Treoir maidir le Tuairisciú Inbhuanaitheachta Corparáideach, ‘TTIC’).

Moltar do ghnóthais na breithnithe seo a leanas a dhéanamh maidir le conas a d’fhéadfaí tionchair, rioscaí agus deiseanna éagsúla a léiriú i spriocanna um aistriú agus i riachtanais ghaolmhara i dtaca le maoiniú um aistriú.

Tábla 1.

Breithnithe ginearálta maidir le spriocanna aeráide agus comhshaoil a leagan síos i gcás tionchair ábhartha

1) Déan breithniú ar chreataí tagartha inchreidte chun bonn eolais a chur faoin modheolaíocht a úsáidfear le haghaidh an phróisis sin, lena n-áirítear: — Anailís eolaíochtbhunaithe ar chásanna agus conairí earnálacha 1,5 °C ar an leibhéal domhanda, ar leibhéal an Aontais nó ar an leibhéal náisiúnta gan aon sárú nó lena mbaineann sárú teoranta, ar conairí iad a thagraíonn don Phainéal Idir-Rialtasach ar an Athrú Aeráide, don Ghníomhaireacht Idirnáisiúnta Fuinnimh nó do thionscnaimh phríobháideacha eile atá inchreidte agus eolaíochtbhunaithe. Déan breithniú ar chásanna a léiríonn comhthéacs sonrach an ghnóthais i dtéarmaí suíomh geografach agus gníomhaíochtaí eacnamaíocha. — Creat rialála an Aontais um airgeadas inbhuanaithe, lena n-áirítear an Rialachán maidir le Tacsanomaíocht agus an mhodheolaíocht le haghaidh thagarmharcanna aeráide an Aontais (féach ranna 3 go 5 den Iarscríbhinn seo). — Pleananna Gníomhaíochta Straitéiseacha comhshaoil an Aontais um an nGeilleagar Ciorclach (3), um an mBithéagsúlacht (4) agus um Truailliú Nialasach (5). — ‘EU Transition Pathways’ (6) (‘Conairí um Aistriú an Aontais Eorpaigh’], foilseachán de chuid an Choimisiúin ina bhfuil cur chuige cáilíochtúil, a cheadú i dtaca le gnéithe a bhaineann leis an aeráid, mar chuid den mheastóireacht ar na dúshláin a bhaineann leis an aistriú agus ar na teicneolaíochtaí is fearr atá ar fáil in earnáil ábhartha. 2) Déan breithniú ar spriocanna um aistriú a leagan síos a bheadh faoi cheangal ama, a bheadh eolaíochtbhunaithe agus a bheadh inghníomhaithe, chun a n-inchreidteacht a áirithiú. 3) Déan breithniú ar mhiondealú na spriocanna sin ar leibhéal na gníomhaíochta agus ar leibhéal an táirge, agus na príomhluamháin ar leibhéal na gníomhaíochta a shainaithint, lena n-áirítear acmhainní airgeadais, chun oibríochtú na spriocanna sin a áirithiú. 4) I gcás inarb ábhartha, maidir le pointe 3), breithnigh arbh inmholta na luamháin dícharbónaithe ionchasacha a shonrú maille leis an rannchuidiú cainníochtúil foriomlán a thabharfaidís chun na spriocanna laghdaithe astaíochtaí GCT a bhaint amach, maille leis na príomhghníomhaíochtaí atá beartaithe, lena n-áirítear athruithe ar phunann táirgí agus seirbhíse an ghnóthais agus glacadh teicneolaíochtaí nua ag an ngnóthas sin 5) Déan breithniú ar mhéadrachtaí a dtomhaisfí cur chun feidhme na spriocanna um aistriú ina leith agus a ndéanfaí faireachán orthu ina leith – éifeachtacht na ngníomhaíochtaí, an dul chun cinn thar am, agus rannpháirtíocht na ngeallsealbhóirí, cuir i gcás. 6) Breithnigh arbh inmholta a shonrú conas a chuirfear na spriocanna um aistriú san áireamh sa phróiseas pleanála gnó, sa phróiseas pleanála airgeadais agus sa chreat bainistíochta riosca. 7) Déan breithniú ar shláine chomhshaoil fhoriomlán na spriocanna um aistriú, gan comhbhabhtáil a dhéanamh idir sprioc agus sprioc eile, agus breithnigh arbh inmholta úsáid a bhaint as an bprionsabal ‘gan dochar suntasach a dhéanamh’, i gcomhréir leis an Rialachán maidir le Tacsanomaíocht chun na críche sin. Déan breithniú freisin ar choimircí íosta a urramú maidir le cearta an duine agus cearta saothair. 8) Déan breithniú ar bhearta a dhéanamh chun trédhearcacht na spriocanna agus an bonn ar ar leagadh síos iad a áirithiú, chun spreagadh a thabhairt d’infheisteoirí agus d’idirghabhálaithe breithniú a dhéanamh orthu sin agus maoiniú um aistriú á sholáthar acu. Mar shampla, breithnigh arbh inmholta na spriocanna a chur in iúl mar chuid de phlean inchreidte um aistriú, chun inchreidteacht a mhéadú maidir lena mbaint amach, rud a léiríonn na spleáchais sheachtracha (7) ar fud shuíomhanna oibríochta an ghnóthais. 9) Breithnigh arbh inmholta a áirithiú go mbeadh próiseas láidir rialachais i bhfeidhm chun tacú le cur chun feidhme na spriocanna um aistriú agus le formhaoirseacht a dhéanamh orthu, lena n-áirítear: a) Formheas na spriocanna um aistriú ag comhlachtaí riaracháin, bainistíochta agus maoirseachta an ghnóthais. b) Rialuithe maithe inmheánacha a bhunú lena n-áirítear róil agus freagrachtaí a leithdháileadh go soiléir maidir le formhaoirseacht a dhéanamh ar na gníomhaíochtaí gaolmhara a thacaíonn le cur chun feidhme na spriocanna sin um aistriú, agus maidir lena gcur chun feidhme. c) Tuairisciú tráthrialta chuig na comhlachtaí bainistíochta maidir le cur chun feidhme na spriocanna um aistriú. 10) Breithnigh, i gcás inarb ábhartha, arbh inmholta úsáid a bhaint as fíorú agus dearbhú tríú páirtí chun breis inchreidteachta a sholáthar maidir leis na spriocanna um aistriú agus maidir leis an bpróiseas bainteach i ndáil le spriocanna a leagan síos agus le hobair leantach.

Tábla 2.

Breithnithe maidir le spriocanna simplí feabhsúcháin i gcás tionchair neamhábhartha

1) I gcás gnóthais, a bhfuil tionchair ísle ag baint lena bpríomhghníomhaíocht eacnamaíoch, b’fhéidir go bhféadfaí aon tionchair iarmharacha a bheadh ann a laghdú, mar shampla i bhfeidhmeanna tacaíochta an ghnóthais sin (e.g. éifeachtúlacht fuinnimh foirgneamh oifige, astaíochtaí iompair nó soghluaisteachta, fuinneamh in-athnuaite a cheannach, an soláthar bia a ghlasú, etc.). 2) I gcás inarb ábhartha, déan breithniú ar an méid seo a leanas: a) spriocanna simplí feabhsúcháin chun infheistíocht a dhéanamh in éifeachtúlacht fuinnimh foirgneamh, rud a laghdódh go mór astaíochtaí ó úsáid leictreachais nó téimh, agus infheistíochtaí comhchosúla, go háirithe trí ghníomhaíochtaí a chumhdaítear le Gníomhartha Tarmligthe arna nglacadh faoi Rialachán (AE) 2020/852 (an Rialachán maidir le Tacsanomaíocht) a chumasú; b) beartas soláthair atá dírithe ar bhreithnithe inbhuanaitheachta.

3.   Forbhreathnú ar uirlisí airgeadais inbhuanaithe chun riachtanais i ndáil le maoiniú um aistriú a chur in iúl agus a chinneadh

Uirlisí airgeadais inbhuanaithe, go háirithe an Tacsanomaíocht, nó tagarmharcanna aeráide an Aontais chomh maith le pleananna inchreidte um aistriú, is féidir iad a úsáid chun tacú le spriocanna um aistriú a shainiú agus riachtanais shonracha i ndáil le maoiniú um aistriú a chur in iúl ar leibhéal an ghnóthais agus ar leibhéal na ngníomhaíochtaí eacnamaíocha. Is féidir maoiniú um aistriú a thiomsú ansin trí bhannaí glasa nó bannaí atá nasctha leis an inbhuanaitheacht, iasachtaí, maoiniú cothromais nó iasachtú speisialaithe.

Tugtar forbhreathnú i bhFíor 3 thíos ar na huirlisí is féidir a úsáid chun maoiniú um aistriú a chur in iúl agus a thiomsú.

4.   Modheolaíochtaí thagarmharcanna aeráide an Aontais

Baineann an roinn seo le pointe 5 den Mholadh ón gCoimisiún.

I gcás nach ann do chonairí ná treochláir eolaíochtbhunaithe earnáilsonracha, d’fhéadfadh gnóthais breithniú a dhéanamh ar mhodheolaíochtaí thagarmharcanna aeráide an Aontais agus iad sin a úsáid ar bhealach lena n-áiritheofaí go mbeidís ailínithe le cás 1,5 °C na Gníomhaireachta Idirnáisiúnta Fuinnimh nó an Phainéil Idir-Rialtasaigh ar an Athrú Aeráide.

I gcás inarb ann do chásanna agus do chonairí eolaíochtbhunaithe earnáilsonracha, d’fhéadfadh gnóthais breithniú a dhéanamh ar cé acu b’fhéidir nó nárbh fhéidir leo íoschaighdeáin thagarmharcanna aeráide an Aontais a chomhlíonadh trí úsáid a bhaint as na cásanna agus na conairí sin.

Eisiúintí margaí caipitil de chuid gnóthas a chomhlíonann íoschaighdeáin na modheolaíochtaí tagarmharcanna aeráide, agus a léiríonn é sin (mar shampla trí phlean inchreidte um aistriú ina ndéantar breithniú ar chaighdeáin agus ar threoraíocht atá ar fáil faoi Threoir (AE) 2022/2464 agus ar a cur chun feidhme), is mó an seans go n-áireofar iad i bpunanna a chloíonn le tagarmharcanna aeráide an Aontais.

Íoschaighdeáin i ndáil le tagarmharcanna aeráide

Tá tagarmharcanna aeráide an Aontais bunaithe ar shraith critéar arb é is aidhm dóibh conair um aistriú a áirithiú le haghaidh punanna atá comhoiriúnach don aistriú chuig geilleagar inbhuanaithe (8). Éilíonn na híoschaighdeáin i ndáil le sprioc dícharbónaithe agus conair na dtagarmharcanna aeráide laghdú bliantúil 7 % ar dhéine GCT nó ar an dearbhsprioc laghdaithe astaíochtaí GCT (9).

I gcás gach bliana nach mbaintear amach na spriocanna, ba cheart na spriocanna a cailleadh a chúiteamh, trí na spriocanna sa chonair dhícharbónaithe a mhéadú don bhliain dár gcionn.

I gcás inar féidir, breithnigh arbh inmholta meánastaíochtaí níos ísle a léiriú i gcomparáid le piaraí agus arbh inmholta tosca sonracha eisiaimh a sheachaint a liostaítear in Airteagail 9 go 12 de Rialachán Tarmligthe (AE) 2020/1818 ón gCoimisiún an 17 Iúil 2020.

Gnóthais a shocraíonn agus a fhoilsíonn spriocanna laghdaithe astaíochtaí GCT a ró-ualú

Is féidir ualú níos mó a thabhairt d’eisiúintí margaí caipitil gnóthas i dtagarmharc a leanann tagarmharcanna aeráide an Aontais, más féidir leis an ngnóthas eisiúna a léiriú go bhfuil spriocanna laghdaithe astaíochtaí GCT socraithe agus foilsithe aige, i gcás ina gcomhlíontar na coinníollacha seo a leanas:

a)	foilsíonn eisitheoir na gcomhurrús a astaíochtaí GCT Scóip 1, Scóip 2 agus Scóip 3 go comhsheasmhach agus go cruinn;

b)	tá laghdú déanta ag eisitheoir na gcomhurrús ar a dhéine GCT nó, i gcás inarb infheidhme, ar a dhearbhastaíochtaí GCT, lena n-áirítear astaíochtaí GCT Scóip 1, Scóip 2 agus Scóip 3, is é sin laghdú 7 % ar an meán in aghaidh na bliana ar a laghad ar feadh 3 bliana as a chéile ar a laghad.

5.   Tacsanomaíocht an Aontais

Baineann an roinn seo le pointe 6 den Mholadh ón gCoimisiún.

5.1.   Cad chuige is féidir Tacsanomaíocht an Aontais a úsáid

Is féidir le gnóthais an Tacsanomaíocht a úsáid mar uirlis mhaoiniúcháin um aistriú, chun aistriú a ngníomhaíochtaí eacnamaíocha a phleanáil agus chun na hinfheistíochtaí um aistriú is gá a chur in áirithe. Dá réir sin, is féidir í a úsáid chun infheistíochtaí inbhuanaithe a aicmiú, feidhmíocht aeráide nó chomhshaoil reatha nó feidhmíocht aeráide nó chomhshaoil bheartaithe a thomhas, spriocanna a leagan síos agus a chur in iúl, lena n-áirítear spriocanna atá nasctha leis an Tacsanomaíocht a chur in iúl i bpleananna um aistriú.

5.2.   An Tacsanomaíocht mar uirlis um aistriú

Trí ghníomhaíochtaí eacnamaíocha atá inbhuanaithe ó thaobh an chomhshaoil de a shainiú, seachas gnóthais, cuireann an Tacsanomaíocht ar a gcumas do ghnóthais an t-aistriú a dhéanamh trína sciar de ghníomhaíochtaí atá inbhuanaithe ó thaobh an chomhshaoil de a mhéadú de réir a chéile.

Léirítear i bhFíor 5 conas is féidir le gnóthas a chuid gníomhaíochtaí a aistriú de réir a chéile, gníomhaíochtaí a dhéantar i monarchana sa chás seo, agus infheistíocht a dhéanamh ina n-uasghráduithe chun sciar na ngníomhaíochtaí glasa a mhéadú amach anseo. Féadfaidh pleananna um aistriú bunaithe ar ghníomhaíochtaí a bheith ina bpríomhchuid de straitéis um aistriú ar leibhéal an eintitis.

5.3.   Roghanna maidir leis an Tacsanomaíocht a úsáid chun riachtanais i ndáil le maoiniú um aistriú a shonrú

Is féidir le gnóthais an Tacsanomaíocht a úsáid chun a riachtanais i ndáil le maoiniú um aistriú a shainiú ar leibhéal na gníomhaíochta.

Ní dhéantar aon fhorordú leis an Tacsanomaíocht maidir leis an amlíne faoinar cheart do ghnóthas a ghníomhaíochtaí a ailíniú le haon cheann dá chritéir. Ina ionad sin, fágann sé solúbthacht do ghníomhaithe margaidh úsáid a bhaint as amchláir a gconairí eolaíochtbhunaithe féin um aistriú. Is féidir le gnóthais tagairt a dhéanamh do chritéir thacsanomaíochta ina spriocanna aeráide agus comhshaoil agus i gcás ina bhfuil na spriocanna sin ailínithe leis an aistriú, agus ina bhfuil a mbaint amach inchreidte, is féidir leo maoiniú um aistriú a thiomsú dá gcur chun feidhme.

Léirítear i bhFíor 6 conas is féidir an Tacsanomaíocht a úsáid chun na críche sin, ós rud é go soláthraítear leis roghanna is féidir a bhreithniú san ord ar leith, agus indéantacht na roghanna níos uaillmhianaí á gcur san áireamh ar dtús.

1)   Gníomhaíochtaí eacnamaíocha a mhaoiniú atá ailínithe leis an Tacsanomaíocht cheana féin

I gcás ina bhfuil gníomhaíocht eacnamaíoch ailínithe cheana féin leis an Tacsanomaíocht, d’fhéadfadh gnóthais breithniú a dhéanamh ar aon riachtanas maoiniúchán atá ann faoi láthair agus a bheidh ann amach anseo chun ailíniú le Tacsanomaíocht a choinneáil ar bun sa todhchaí freisin.

2)   Infheistíochtaí atá ailínithe leis an Tacsanomaíocht

I gcás ina bhfuil gníomhaíocht eacnamaíoch incháilithe don Tacsanomaíocht ach nach bhfuil sí ailínithe go fóill léi, d’fhéadfadh gnóthais a bhreithniú arbh inmholta í a ailíniú le critéir scagtha theicniúla na Tacsanomaíochta laistigh de 5 bliana (nó go heisceachtúil, laistigh de 10 mbliana) (10). Sonraigh an infheistíocht um aistriú is gá chun na spriocanna sin a bhaint amach i bplean caiteachais chaipitiúil. Meastar gur infheistíocht atá ailínithe leis an Tacsanomaíocht é caiteachas caipitiúil den sórt sin.

3)   Infheistíocht atá ailínithe leis an Tacsanomaíocht thar thráthchlár níos faide

I gcás nach féidir ailíniú leis an Tacsanomaíocht a bhaint amach laistigh de 5 bliana (nó go heisceachtúil, laistigh de 10 mbliana), is féidir breithniú a dhéanamh ar shócmhainn nó gníomhaíocht eacnamaíoch a ailíniú le critéir feidhmíochta ghaolmhara na Tacsanomaíochta thar thréimhse níos faide atá fós comhoiriúnach don aistriú. Maidir le hinfheistíochtaí um aistriú nach mbainfidh ailíniú leis an Tacsanomaíocht amach ach thar thréimhse níos faide ná na 5 bliana (nó go heisceachtúil, na 10 mbliana) a aithnítear faoi Rialachán Tarmligthe (AE) 2021/2178, ba cheart plean um aistriú a bhaineann go sonrach le gníomhaíocht a bheith ag gabháil leo, ar plean é atá comhoiriúnach don aistriú, agus lena dtugtar údar cuí leis an tréimhse níos faide chun na spriocanna a bhaint amach (11) agus lena léirítear an chaoi a mbainfear ailíniú le Tacsanomaíocht amach ag céim ina dhiaidh sin.

Maidir le gnéithe comhshaoil, d’fhéadfaí na spriocanna a ailíniú le cuspóirí agus spriocanna beartais comhshaoil idirnáisiúnta agus de chuid an Aontais lena n-áirítear iad siúd a bhaineann le cosaint agus athbhunú inbhuanaithe acmhainní uisce agus muirí, an geilleagar ciorclach, cosc agus rialú ar thruailliú, agus cosaint agus athbhunú na bithéagsúlachta agus éiceachóras.

4)   Infheistíochtaí um aistriú thar thairseacha na gcritéar ‘gan dochar suntasach a dhéanamh’ i ndáil le maolú ar an athrú aeráide mar chéad chéim

Maidir le gnóthais a bhfuil gníomhaíochtaí á ndéanamh acu faoi láthair nach gcomhlíonann critéir ‘gan dochar suntasach a dhéanamh’ na Tacsanomaíochta, i gcás nach féidir infheistíochtaí a dhéanamh faoi láthair chun na critéir maidir le rannchuidiú substaintiúil a chomhlíonadh laistigh de 5 bliana (nó go heisceachtúil, laistigh de 10 mbliana), d’fhéadfaidís a bhreithniú arbh inmholta feidhmíocht chomhshaoil na ngníomhaíochtaí sin a fheabhsú thar leibhéil feidhmíochta arna sainiú ag na critéir ‘gan dochar suntasach a dhéanamh’ laistigh de thráthchlár atá gearr go leor chun a bheith comhoiriúnach don aistriú. (12) Maidir le hinfheistíochtaí um aistriú den sórt sin lena gcuirtear feabhas ar fheidhmíocht thar na critéir ‘gan dochar suntasach a dhéanamh’ den Tacsanomaíocht mar chéad chéim san aistriú, d’fhéadfadh gnóthais a bhreithniú arbh inmholta plean um aistriú a bhaineann go sonrach le gníomhaíocht a chur leo siúd, ar plean é atá comhoiriúnach don aistriú, agus lena dtugtar údar cuí leis an gcúis a bhfuil gá leis an gcéim eatramhach sin agus lena léirítear an chaoi a mbainfear ailíniú leis an Tacsanomaíocht amach ag céim ina dhiaidh sin.

D’fhéadfaí a léiriú leis an bplean (i) conas a aistreofar an ghníomhaíocht le feabhsú feidhmíochta fóinteach go leibhéal atá thar leibhéal na gcritéar ‘gan dochar suntasach a dhéanamh’ agus i dtreo leibhéal na gcritéar maidir le rannchuidiú substaintiúil, agus (ii) conas a áiritheofar, le feabhsú leanúnach ar fheidhmíocht aeráide nó chomhshaoil, nach ndéanfar dochar suntasach sa todhchaí, de réir mar a théann an geilleagar níos gaire don aeráidneodracht, agus conas a athróidh leibhéil lamháltais maidir le díobháil a mheastar a bheith suntasach le himeacht ama.

5)   Infheistíochtaí arna sonrú ar mhodhanna eile i bplean um aistriú bunaithe ar ghníomhaíocht

I gcás gníomhaíochtaí eacnamaíocha ardtionchair nach gcumhdaítear go fóill le Gníomhartha Tarmligthe maidir le Tacsanomaíocht, agus i gcás nach bhfuil aon rogha mhalartach ísealtionchair ann a chumhdaítear leis an Rialachán maidir le Tacsanomaíocht, d’fhéadfadh gnóthais breithniú a dhéanamh ar mhodhanna eile a úsáid amhail conairí eolaíochtbhunaithe chun spriocanna agus riachtanais mhaoiniúcháin a shonrú.

6)   Infheistíochtaí chun gníomhaíochtaí a bhfuil tionchar íseal acu ar an gcomhshaol a aistriú

Maidir le gníomhaíochtaí eacnamaíocha ísealtionchair, nach gcumhdaítear leis an Tacsanomaíocht dá bhrí sin, d’fhéadfadh gnóthais a bhreithniú arbh inmholta critéir ábhartha Thacsanomaíochta a úsáid chun aghaidh a thabhairt ar thionchair iarmharacha e.g. trí infheistíochtaí in éifeachtúlacht fuinnimh foirgneamh, soghluaisteacht íseal-astaíochtaí, teicneolaíochtaí cumasúcháin, etc.

6.   Ionstraimí maoiniúcháin chun maoiniú um aistriú a thiomsú

Baineann an roinn seo le pointe 8 den Mholadh ón gCoimisiún.

Is féidir le gnóthais a bhreithniú arbh inmholta ceann amháin de na hionstraimí maoiniúcháin a bhaineann le haistriú, nó meascán de roinnt ionstraimí maoiniúcháin, a úsáid chun maoiniú um aistriú a thiomsú, cuir i gcás cineálacha sonracha iasachtaí nó eisiúintí margaidh caipitil a bhfuil gnéithe sonracha acu. I dTábla 3 thíos, tá roinnt léaráidí chun na críche sin.

Tábla 3

Samplaí d’ionstraimí maoiniúcháin ar an margadh iasachtaí nó ar an margadh caipitil chun maoiniú um aistriú a thiomsú

Iasachtaí glasa agus iasachtaí eile atá nasctha leis an inbhuanaitheacht	1) Maoinigh tionscadail nó infheistíochtaí trí iasacht ag a bhfuil cuspóir tiomnaithe um aistriú (iasacht úsáide fáltas), cuir i gcás iasachtaí chun sócmhainní a uasghrádú nó infheistíochtaí nua a dhéanamh lena gcumasófar táirgeadh ísealcharbóin nó feidhmíocht chomhshaoil atá feabhsaithe go mór. Mar shampla: — iasachtaí chun tionscadail um aistriú a mhaoiniú lena ngabhann plean inchreidte um aistriú bunaithe ar ghníomhaíocht nó tionscadail atá ina gcuid de phlean inchreidte um aistriú ar leibhéal an eintitis (13); — iasachtaí chun gníomhaíochtaí eacnamaíocha atá incháilithe faoin Tacsanomaíocht a mhaoiniú agus ailíniú leis an Tacsanomaíocht a bhaint amach thar thréimhse ama 5 bliana (nó go heisceachtúil, thar 10 mbliana); — spriocanna inchreidte eolaíochtbhunaithe, i gcás ina bhfuil siad comhréireach, a bhfuil faisnéis lena n-áirithítear sláine, trédhearcacht agus cuntasacht mar thaca leo; — iasachtaí chun infheistíochtaí um aistriú eile a mhaoiniú i ngníomhaíochtaí dá dtagraítear faoi phointe 2.2. den Mholadh seo. — sainigh táscairí láidre feidhmíochta comhshaoil chun infheistíochtaí corparáideacha a áirítear i bplean um aistriú a mhaoiniú. 2) Lorg iasacht ilchuspóireach (chorparáideach) atá nasctha le feabhsuithe ar fheidhmíocht inbhuanaitheachta fhoriomlán i gcomhréir leis an aistriú mar a shainítear faoi phointe 2.1. Mar shampla: — iasachtaí a bhfuil príomhspriocanna feidhmíochta acu chun infheistíochtaí um aistriú atá i gcomhréir le conairí eolaíochtbhunaithe um aistriú a mhaoiniú; — iasachtaí a bhfuil príomhspriocanna feidhmíochta acu chun infheistíochtaí um aistriú a mhaoiniú atá bunaithe ar sciar foriomlán an ailínithe leis an Tacsanomaíocht atá le baint amach; — iasachtaí chun infheistíochtaí um aistriú a mhaoiniú atá bunaithe ar phlean inchreidte um aistriú ag a bhfuil príomhspriocanna feidhmíochta.
Bannaí glasa agus bannaí eile atá nasctha leis an inbhuanaitheacht	1) Breithnigh arbh inmholta bannaí a eisiúint le haghaidh críoch shonrach um aistriú tríd an úsáid fáltas a léiriú. Mar shampla, banna a eisiúint i gcomhréir leis an Rialachán maidir le bannaí glasa Eorpacha chun infheistíochtaí um aistriú a mhaoiniú i ngníomhaíochtaí eacnamaíocha atá incháilithe faoin Tacsanomaíocht agus i ngníomhaíochtaí a bhaineann ailíniú leis an Tacsanomaíocht amach laistigh de 5 bliana (nó go heisceachtúil, laistigh de 10 mbliana). 2) Breithnigh arbh inmholta banna a eisiúint a bheadh nasctha le sprioc feidhmíochta um aistriú de chuid an ghnóthais (e.g., banna atá nasctha leis an inbhuanaitheacht) trí úsáid a bhaint as an Tacsanomaíocht, as pleananna inchreidte um aistriú ar leibhéal an eintitis (14) agus ar leibhéal na gníomhaíochta, nó as spriocanna inchreidte eolaíochtbhunaithe i gcás ina bhfuil siad comhréireach, agus: — sainigh príomhspriocanna feidhmíochta chun infheistíochtaí corparáideacha ábhartha a áirítear i bplean um aistriú a mhaoiniú; — iarrtar ar ghnóthais a gceanglais inbhuanaitheachta a nascadh faoi bhanna atá nasctha leis an inbhuanaitheacht, le sprioc Tacsanomaíochta nó le sprioc a bhaineann le tagarmharc aeráide an Aontais; — is féidir a áireamh leis sin maoiniú infheistíochtaí um aistriú arna sainiú trí spriocanna bunaithe ar an Tacsanomaíocht. 3) Breithnigh arbh inmholta úsáid a bhaint as an teimpléad nochta dheonaigh faoin Rialachán maidir le Bannaí Glasa Eorpacha chun faisnéis chaighdeánaithe a sholáthar d’infheisteoirí agus d’idirghabhálaithe airgeadais le haghaidh eisiúintí bannaí nach gcloíonn leis an gcaighdeán Eorpach maidir le bannaí glasa;
Maoiniú cothromais	I gcás ina bhfuil eisiúintí cothromais ina n-ionstraim mhaoiniúcháin leordhóthanach, breithnigh arbh inmholta critéir um aistriú a bheadh comhchosúil leo siúd a luaitear thuas a úsáid chun príomhspriocanna feidhmíochta inbhuanaitheachta a shonrú.
Maoiniú speisialaithe	Déan breithniú ar mhaoiniú speisialaithe amhail léasú, réitigh mhaoiniúcháin struchtúrtha, maoiniú tionscadal agus ionstraimí maoiniúcháin chumaiscthe trí úsáid a bhaint as critéir um aistriú atá comhchosúil leo siúd a luaitear thuas chun príomhspriocanna feidhmíochta inbhuanaitheachta a shonrú.

7.   An úsáid a bhaineann idirghabhálaithe airgeadais agus infheisteoirí as uirlisí airgeadais inbhuanaithe an Aontais Eorpaigh

Baineann an roinn seo le pointe 9 den Mholadh ón gCoimisiún.

D’fhéadfadh idirghabhálaithe airgeadais agus infheisteoirí atá toilteanach maoiniú um aistriú a sholáthar chun tacú le haistriú an fhíorgheilleagair úsáid a bhaint as uirlisí airgeadais inbhuanaithe chun spriocanna punainne a leagan síos agus tionscadail nó gnóthas a shainaithint chun an t-aistriú a mhaoiniú. I dTábla 4 thíos, tá léaráidí breise chuige sin.

Tábla 4

conas uirlisí airgeadais inbhuanaithe a úsáid chun spriocanna punainne a leagan síos agus tionscadail nó gnóthais a shainaithint chun an t-aistriú a mhaoiniú

Breithnigh arbh inmholta modheolaíochtaí dícharbónaithe thagarmharcanna aeráide an Aontais a úsáid chun spriocanna um aistriú punann a leagan síos agus cuideachtaí ábhartha a shainaithint:	Modheolaíochtaí dícharbónaithe thagarmharcanna aeráide an Aontais a úsáid chun spriocanna dícharbónaithe a leagan síos: Breithnigh arbh inmholta úsáid a bhaint as tagarmharcanna aeráide an Aontais chun straitéisí dícharbónaithe a shaothrú agus infheistíocht a dhéanamh i bpunann gnóthas a bhfuil spriocanna aeráide éagsúla agus riachtanais éagsúla acu i ndáil le maoiniú um aistriú. Cruthaigh táirgí airgeadais lena n-athchruthaítear modheolaíochtaí na dtagarmharcanna thuas (15); Moltar do riarthóirí tagarmharcanna breithniú a dhéanamh ar chuideachtaí ró-ualaithe bunaithe ar na spriocanna dícharbónaithe arna leagan síos ag cuideachtaí; Breithnigh arbh inmholta úsáid a bhaint as modheolaíochtaí na dtagarmharcanna chun measúnú córasach a dhéanamh ar ionstraimí maoiniúcháin agus ar phunanna, agus conairí punainne i dtreo na haeráidneodrachta a cheapadh le híoschaighdeáin maidir le dícharbónú bliain ar bhliain. Modheolaíochtaí thagarmharcanna aeráide an Aontais a úsáid chun gnóthais a shainaithint le haghaidh iasachtaithe nó infheistíochta: Breithnigh arbh inmholta úsáid a bhaint as tagarmharcanna aeráide an Aontais nó as tagarmharcanna CSR eolaíochtbhunaithe eile chun cuideachtaí a aistríonn ar bhealach atá comhoiriúnach don aistriú chuig geilleagar inbhuanaithe a shainaithint; Breithnigh arbh inmholta úsáid a bhaint as tagarmharcanna lena gcuirtear ar a gcumas do riarthóirí gnóthais ag a bhfuil conair agus plean eolaíochtbhunaithe um aistriú a ró-ualú; Féadfaidh idirghabhálaithe airgeadais agus infheisteoirí úsáid a bhaint as critéir eisiaimh ó mhodheolaíochtaí thagarmharcanna aeráide an Aontais, i gcás inarb iomchuí, chun gníomhaíochtaí eacnamaíocha nó modhanna táirgthe atá díobhálach don chomhshaol nó don tsochaí, agus gníomhaíochtaí a dhéanann dochar suntasach ar shlí eile d’aon chuspóirí aeráide nó comhshaoil, a eisiamh.
Breithnigh arbh inmholta an Tacsanomaíocht a úsáid chun spriocanna ar leibhéal punainne a leagan síos agus gnóthais ábhartha a shainaithint:	Critéir Thacsanomaíochta a úsáid chun spriocanna punainne aeráide agus comhshaoil a leagan síos: Breithnigh arbh inmholta úsáid a bhaint as na critéir Thacsanomaíochta agus na nochtaí Tacsanomaíochta chun spriocanna a leagan síos agus dul chun cinn a rianú le himeacht ama ar leibhéal na punainne agus, i gcás úinéirí sócmhainní, le haghaidh leithdháileadh foriomlán sócmhainní. Breithnigh arbh inmholta úsáid a bhaint as na nochtaí Tacsanomaíochta chun cion na n-infheistíochtaí atá incháilithe faoin Tacsanomaíocht, cion na n-infheistíochtaí atá ailínithe leis an Tacsanomaíocht, agus dul chun cinn i dtreo ailíniú le critéir Thacsanomaíochta a rianú. Faoi réir infhaighteacht sonraí, Breithnigh arbh inmholta úsáid a bhaint as an gcóimheas sócmhainní glasa agus as an gcóimheas infheistíochtaí glasa bunaithe ar an tacsanomaíocht chun spriocanna earnáilsonracha a leagan síos ar leibhéal na punainne a d’fhéadfadh meán na punainne a chóineasú le linn an aistrithe. Mar shampla, féadfaidh bainc an cóimheas sócmhainní glasa agus dearbhastaíochtaí carbóin i bpunanna ábhartha nó meánéifeachtúlacht fuinnimh punainne morgáiste a úsáid chun spriocanna laghdaithe astaíochtaí nó sprioc éifeachtúlachta fuinnimh agus garspriocanna idir eatarthu a fhorbairt. Breithnigh arbh inmholta úsáid a bhaint as cion na n-ioncam beartaithe, an chaiteachais chaipitiúil nó an chaiteachais oibríochtúil a bhaineann le gnóthais a aistriú, a bheidh ailínithe leis an Tacsanomaíocht laistigh de 5 bliana (nó go heisceachtúil, laistigh de 10 mbliana) (ach nach gcomhlíonann coinníollacha Rialachán Tarmligthe (AE) 2021/2178 le bheith aitheanta láithreach mar chaiteachas caipitiúil atá ailínithe leis an Tacsanomaíocht) mar chóimheas sócmhainní glasa sa todhchaí nó mar chóimheas sócmhainní glasa beartaithe, i gcás ina bhfuil plean inchreidte um aistriú mar thaca leo. D’fhéadfaí méadrachtaí comhchosúla a cheapadh freisin le haghaidh gníomhaíochtaí nach bhfuil incháilithe don Tacsanomaíocht agus a chumhdaítear le plean inchreidte um aistriú. Na nochtaí Tacsanomaíochta a úsáid chun gnóthais a shainaithint le haghaidh iasachtaithe nó infheistíochta: Breithnigh arbh inmholta úsáid a bhaint as na nochtaí Tacsanomaíochta a dhéanann gnóthais maidir le hioncam, caiteachas caipitiúil agus, i gcás inarb ábhartha, caiteachas oibriúcháin atá incháilithe don tacsanomaíocht agus atá ailínithe leis an tacsanomaíocht chun sonraí corparáideacha eile a chomhlánú chun tionscadail um aistriú a shainaithint I gcás tionscadail atá incháilithe don Tacsanomaíocht, breithnigh arbh inmholta úsáid a bhaint as nochtaí éigeantacha – agus, i gcás ina bhfuil fáil orthu, nochtaí deonacha – a bhaineann leis an Tacsanomaíocht, i nochtaí corparáideacha nó i bpleananna um aistriú ar leibhéal an eintitis nó a bhaineann go sonrach le gníomhaíocht, chun tionscadail a shainaithint a bhfuil cuspóirí maidir le maoiniú um aistriú acu lena leagtar síos spriocanna a bhaineann leis an méid seo a leanas: — ailíniú leis an Tacsanomaíocht, arb é is aidhm dó na critéir Thacsanomaíochta a chomhlíonadh céim ar chéim nó thar thréimhse shainithe; — gnéithe de chritéir thacsanomaíochta, amhail an prionsabal ‘gan dochar suntasach a dhéanamh’, lena n-áirithítear feabhsuithe suntasacha feidhmíochta; — seiceáil an bhfuil pleananna um aistriú a bhaineann go sonrach le gníomhaíocht i bhfeidhm, chun a áirithiú go mbeidh spriocanna na dtionscadal sin ailínithe leis an aistriú chuig geilleagar inbhuanaithe; — i gcás gníomhaíochtaí eacnamaíocha nach gcumhdaítear leis na gníomhartha tarmligthe a glacadh faoin Rialachán maidir le Tacsanomaíocht, bain úsáid as na prionsabail a leagtar amach in Airteagal 10(2) den Rialachán maidir le Tacsanomaíocht mar threoir i ndáil le coinníollacha íosta chun breithniú a dhéanamh ar ghníomhaíocht le haghaidh maoiniú um aistriú.
Breithnigh arbh inmholta nochtaí corparáideacha a úsáid faoin Treoir maidir le Tuairisciú Inbhuanaitheachta Corparáideach chun gnóthais a bhfuil cuspóirí agus riachtanais shonracha ach um an aistriú a roghnú:	Breithnigh arbh inmholta úsáid a bhaint as méadrachtaí coiteanna i bpleananna um aistriú, ar leibhéal an eintitis agus ar leibhéal na gníomhaíochta araon chun riachtanais i ndáil le maoiniú um aistriú in earnálacha áirithe a shainaithint go córasach, bunaithe ar na méadrachtaí airgeadais agus ar na pleananna infheistíochta a thuairiscíonn corparáidí, mar shampla: — Spriocanna laghdaithe astaíochtaí GCT, le haghaidh astaíochtaí Scóip 1, Scóip 2, agus a mhéid is féidir, astaíochtaí ábhartha Scóip 3; — Ailíniú leis an Tacsanomaíocht agus pleananna chun ailíniú le haghaidh gníomhaíochtaí in earnálacha ardtionchair; — Caiteachas caipitiúil chun céimeanna an aistrithe a mhaoiniú faoi threoir na bpríomh-mhéadrachtaí inbhuanaitheachta a úsáidtear (e.g. caiteachas caipitiúil bunaithe ar thacsanomaíocht); — Inchreidteacht na spriocanna um aistriú bunaithe ar na gníomhaíochtaí agus na luamháin atá sé beartaithe ag gnóthais a úsáid chun na spriocanna a bhaint amach, agus ar a spleáchas ar thosca seachtracha agus ar (16) chostais ionchasacha an aistrithe; — Rioscaí aistrithe agus conas is féidir le spriocanna féideartha um aistriú na rioscaí sin a laghdú le himeacht ama; — Neamhchosaint ar dheiseanna airgeadais a bhaineann leis an aeráid (e.g. mar % den phunann fhoriomlán/gníomhaíocht frithgheallta) — Astaíochtaí maoinithe reatha agus beartaithe ar fud earnálacha, limistéar geografach agus tráthchlár; — Méadrachtaí ailínithe punainne (e.g. meándéine ualaithe carbóin, ardú teochta intuigthe, astaíochtaí maoinithe i gcoibhneas le tagarmharc eolaíochtbhunaithe a úsáidtear go coitianta). Breithnigh arbh inmholta úsáid a bhaint as nochtaí maidir le pleananna um aistriú chun gnóthais shonracha nó tionscadail shonracha a shainaithint ag a bhfuil spriocanna soiléire dícharbónaithe a oibríonn faoi láthair le hastaíochtaí arda ach a bhfuil pleananna inchreidte um aistriú acu chun iad sin a laghdú le himeacht ama, rud a fhágfaidh gur féidir an phunann a dhícharbónú ar an luas céanna leis an ngnóthas infheistíochta. Breithnigh arbh inmholta úsáid a bhaint as na caighdeáin agus an treoraíocht faoi Threoir (AE) 2022/2464 agus a cur chun feidhme (TTIC), i gcás ina mbeadh a leithéidí ar fáil, chun breithniú a dhéanamh ar fheidhmíocht aeráide agus chomhshaoil gnóthais, ar a thúsphointe agus ar a chonair aistrithe aonair, chun nochtaí maidir le spriocanna um aistriú, pleananna um aistriú agus sonraí tuairiscithe airgeadais a chomhlánú.
Breithnigh arbh inmholta úsáid a bhaint as nochtaí agus réamheolairí a ghabhann le heisiúint bannaí glasa, bannaí um aistriú nó bannaí atá nasctha leis an inbhuanaitheacht, nó le heisiúint cothromas:	Breithnigh arbh inmholta úsáid a bhaint as faisnéis a sholáthraíonn eisitheoirí bannaí glasa, bannaí atá nasctha leis an inbhuanaitheacht nó bannaí eile lena mbaineann gnéithe den mhaoiniú um aistriú chun infheistíochtaí, a bhfuil sláine comhshaoil agus an leibhéal uaillmhéine atá á lorg ag infheisteoir ag baint leo, a roghnú. Breithnigh arbh inmholta úsáid a bhaint as an leibhéal ard trédhearcachta a sholáthraítear leis an Rialachán maidir le Bannaí Glasa Eorpacha chun tionscadail a roghnú le haghaidh maoiniú um aistriú i gcás ina n-áirithítear an tsláine comhshaoil leis an Tacsanomaíocht. Leis an trédhearcacht fheabhsaithe maidir leis an úsáid fáltas, méadaítear inchreidteacht agus iontaofacht na n-infheistíochtaí sin, go háirithe má tá siad nasctha le tairseacha nó spriocanna inbhuanaitheachta arna leagan síos ag an ngnóthas agus má nochtar iad ina nochtaí corparáideacha. Breithnigh arbh inmholta úsáid a bhaint as an leibhéal ard trédhearcachta a sholáthraíonn eisitheoirí a úsáideann na teimpléid nochta dheonaigh le haghaidh eisitheoirí a úsáideann caighdeáin eile seachas na caighdeáin a sholáthraítear leis an Rialachán maidir le bannaí glasa Eorpacha chun tionscadail a roghnú le haghaidh maoiniú um aistriú atá ailínithe leis an aistriú chuig geilleagar inbhuanaithe. Breithnigh arbh inmholta a bhaint as faisnéis maidir le cuspóirí aistrithe nó riachtanais i dtaca le maoiniú um aistriú a áirítear i réamheolairí le haghaidh eisiúintí a dhéanann gnóthais atá i mbun aistriú chun measúnú a dhéanamh ar rioscaí inbhuanaitheachta agus ar ghnéithe d’eisiúint in éineacht le rioscaí airgeadais agus tairbhí airgeadais eile a bhaineann leis an tionscadal (17).

---

(1)  Moladh ón gCoimisiún maidir le maoiniú a éascú le haghaidh an aistrithe chuig geilleagar inbhuanaithe (C(2023) 3844).

(2)  Ábhar atá ábhartha ó thaobh tionchair de is ea ábhar inbhuanaitheachta i gcás ina bhfuil baint aige le tionchair ábhartha iarbhír nó ionchasach an ghnóthais, bíodh siad sin dearfach nó diúltach, ar dhaoine nó ar an gcomhshaol thar thréimhsí gearrthéarmacha, meántéarmacha agus fadtéarmacha. Ábhar inbhuanaitheachta atá ábhartha ó thaobh tionchair de, áirítear leis sin tionchair arb é an gnóthas is cúis leo nó a raibh baint aige leo agus tionchair atá nasctha go díreach le hoibríochtaí, táirgí agus seirbhísí an ghnóthais trína chaidrimh ghnó. D’fhéadfadh ábhar inbhuanaitheachta a bheith ábhartha freisin ó thaobh airgeadais de, mar shampla má thagann an riosca inbhuanaitheachta chun cinn trí shócmhainní tréigthe.

(3)  Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún maidir le Plean Gníomhaíochta nua um an nGeilleagar Ciorclach: Le haghaidh Eoraip níos glaine agus níos iomaíche. COM/2020/98 final.

(4)  Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún dar teideal EU Biodiversity Strategy for 2030 - Bringing nature back into our lives [Straitéis Bhithéagsúlachta an Aontais do 2030 - An dúlra a thabhairt ar ais inár saol]. COM/2020/380 final.

(5)  Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún dar teideal ‘ Pathway to a Healthy Planet for All EU Action Plan: Towards Zero Pollution for Air, Water and Soil ’ (‘Conair i dtreo Pláinéad Sláintiúil do Chách - Plean Gníomhaíochta AE: I dtreo Uisce, Aer agus Ithir Saor ó Thruailliú’]. COM/2021/400 final.

(6)  Tá ‘EU Transition Pathways’ (‘Conairí um Aistriú an Aontais Eorpaigh’], foilseachán de chuid an Choimisiúin, le fáil ag: https://single-market-economy.ec.europa.eu/industry/transition-pathways_en

(7)  Spleáchas an ghnóthais ar thosca seachtracha ó limistéar geografach go chéile, i dtaca le plean an ghnóthais um aistriú, ar leibhéal an eintitis, a bhaint amach e.g. na beartais b’fhéidir a bheadh ann amach anseo, ullmhacht teicneolaíochta, inghlacthacht shóisialta, infhaighteacht acmhainní agus tionchair fhisiceacha aeráide ar fud shuíomhanna oibríochta an ghnóthais.

(8)  Rialachán Tarmligthe (AE) 2020/1818 ón gCoimisiún an 17 Iúil 2020 lena bhforlíontar Rialachán (AE) 2016/1011 ó Pharlaimint na hEorpa agus ón gComhairle a mhéid a bhaineann le híoschaighdeáin i ndáil le Tagarmharcanna Aistrithe Aeráide AE agus Tagarmharcanna AE atá ailínithe le Comhaontú Pháras, Airteagail 6-12.

(9)  Leagtar amach na híoscheanglais in Airteagail 7 go 9 de Rialachán Tarmligthe (AE) 2020/1818 ón gCoimisiún an 17 Iúil 2020.

(10)  De réir an Ghnímh Tharmligthe maidir le Nochtaí Tacsanomaíochta, ní fhéadfaidh an tréimhse chun ailíniú leis an Tacsanomaíocht a bhaint amach a bheith níos faide ná 5 bliana ach amháin i gcás ina bhfuil údar oibiachtúil le tréimhse níos faide de bharr gnéithe sonracha den ghníomhaíocht eacnamaíoch agus den uasghrádú lena mbaineann, le huasmhéid 10 mbliana.

(11)  Ní mheastar go bhfuil an caiteachas caipitiúil gaolmhar ailínithe leis an Tacsanomaíocht, ach is féidir leis a bheith ina chéim fhiúntach ar chonair an aistrithe i dtreo leibhéil feidhmíochta inbhuanaitheachta níos airde.

(12)  Ní mheastar go bhfuil an caiteachas caipitiúil gaolmhar ailínithe leis an Tacsanomaíocht, ach is féidir leis a bheith ina chéim fhiúntach ar chonair an aistrithe i dtreo leibhéil feidhmíochta inbhuanaitheachta níos airde.

(13)  De réir Threoir (AE) 2022/2464 agus a cur chun feidhme (An Treoir maidir le Tuairisciú Inbhuanaitheachta Corparáideach).

(14)  De réir Threoir (AE) 2022/2464 agus a cur chun feidhme (An Treoir maidir le Tuairisciú Inbhuanaitheachta Corparáideach).

(15)  Éilíonn na tagarmharcanna ceanglas bunlíne dícharbónaithe 30 % le haghaidh Thagarmharcanna Aistrithe Aeráide an Aontais agus 50 % le haghaidh Thagarmharcanna an Aontais atá ailínithe le Comhaontú Pháras, ceanglas dícharbónaithe 7 % bliain ar bhliain, cuimsiú astaíochtaí Scóip 3, srianta leithdháilte cothromais chun a áirithiú go gcomhfhreagraíonn ionadaíocht na dtionscal d’ionadaíocht an mháthair-thagarmhairc (laofacht tionscail a sheachaint);

(16)  E.g. beartas a d’fhéadfadh a bheith ann amach anseo, ullmhacht teicneolaíochta, inghlacthacht shóisialta, infhaighteacht acmhainní agus tionchair fhisiceacha aeráide ar fud na suíomhanna ina n-oibríonn sé.

(17)  An togra le haghaidh Rialachán ó Pharlaimint na hEorpa agus ón gComhairle lena leasaítear Rialachán (AE) 2017/1129, Rialachán (AE) Uimh. 596/2014 agus Rialachán (AE) Uimh. 600/2014 chun margaí caipitil poiblí san Aontas a dhéanamh níos tarraingtí do chuideachtaí agus chun rochtain ar chaipiteal a éascú d’fhiontair bheaga agus mheánmhéide, (COM/2022/762 final), tá sé ina rannchuidiú leis an trédhearcacht trína cheangal go n-áireofar faisnéis inbhuanaitheachta i réamheolairí le haghaidh eisiúintí a ndéantar maímh inbhuanaitheachta ina leith.