IARSCRÍBHINN

Tacaíocht ón Aontas Eorpach chun Éifeachtacht Oibríochtúil OPCW a Fheabhsú — AE 2023

1.   Cúlra

I mí na Nollag 2003, ghlac an tAontas Eorpach Straitéis an Aontais i gcoinne Leathadh Arm Ollscriosta (Straitéis an Aontais), inar aithin sé a mhéid a chuireann airm ollscriosta an tsíocháin agus an tslándáil idirnáisiúnta i mbaol. Leagtar béim i Straitéis an Aontais ar an ról ríthábhachtach atá ag an gCoinbhinsiún maidir le hAirm Cheimiceacha (CWC) agus ag OPCW i ndáil le hairm cheimiceacha a dhíothú ón saol. Cuireann cuspóirí Straitéis an Aontais le cuspóirí CWC. Ó glacadh Straitéis an Aontais, d’fhéach an tAontas agus OPCW chuige go n-oibríonn siad i gcomhar le chéile, lena n-áirítear rannpháirtíocht i sraith Gníomhaíochtaí Comhpháirteacha agus Cinntí ón gComhairle (1).

Tá tacaíocht faighte go chomhsheasmhach ag OPCW ón Aontas maidir le cur chun feidhme a shainordaithe, rud a léiríonn tiomantas leanúnach do chur chun feidhme iomlán CWC, mar ar cuireadh EUR 38.2M de ranníocaíochtaí deonacha ar fáil ó 2004 i leith trí bhuiséad an Chomhbheartais Eachtraigh agus Slándála (‘CBES’). Is díol sásaimh do OPCW tiomantas leanúnach an Aontais tacú le OPCW agus é ag iarraidh sprioc an Choinbhinsiúin a chomhlíonadh — is é sin le rá, airm cheimiceacha a dhíothú ón saol, rud a chuirfidh leis an tsíocháin agus leis an tslándáil idirnáisiúnta. Ina theannta sin, agus na dúshláin atá ag teacht chun cinn á n-aithint dó, is díol sásaimh do OPCW freisin go bhfuil spéis leanúnach ag an Aontas treisiú leis an tacaíocht atá á tabhairt aige d’fhoirne teicniúla OPCW agus cúnamh á chur ar fáil do na Stáit is Páirtithe faoin gCoinbhinsiún, de réir mar is gá, i gcur chun feidhme gníomhach Chaibidlí II agus III de Straitéis an Aontais.

Fágann an timpeallacht dhinimiciúil slándála idirnáisiúnta go bhfuil misean OPCW chomh tábhachtach agus a bhí riamh. Leis an gCúigiú Comhdháil Athbhreithnithe atá ar na bacáin, agus freisin agus sinn ar tí an garsprioc maidir le scriosadh iomlán stoc-chairn arm ceimiceach dearbhaithe a bhaint amach, agus le hoscailt an Lárionaid nua Ceimice agus Teicneolaíochta (CCT), beidh idir dheiseanna agus dúshláin ann do OPCW. Beidh rannpháirtíocht straitéiseach ríthábhachtach más dual don Eagraíocht ról lárnach a bheith aici i gcónaí i ndiaidh an díothaithe. Tá sé léirithe go bhfuil comhpháirtíocht agus tacaíocht trí bhuiséad Chomhbheartas Eachtraí agus Slándála (CBES) an Aontais ríthábhachtach maidir le cuidiú le OPCW a phríomhchuspóirí a chur chun cinn agus a chur chun feidhme, rud a mhéadaíonn an tionchar atá ag gníomhaíochtaí OPCW freisin.

2.   Cuspóir an tionscadail

2.1   Cuspóirí foriomlána an Tionscadail

Is é cuspóir foriomlán an tionscadail a áirithiú go mbeidh sé d'acmhainn ag an Rúnaíocht cuidiú leis na Stáit is Páirtithe an Coinbhinsiún a chur chun feidhme agus an cur chun feidhm sin a fheabhsú. Chuideodh an tacaíocht sin leis an tsíocháin agus leis an tslándáil idirnáisiúnta mar a ndéanfaí sainordú OPCW a chur chun feidhme ar bhealach éifeachtach. Chuideodh sé freisin le cosc a chur ar airm cheimiceacha ó theacht chun cinn an athuair, agus bheadh úsáidí síochánta na ceimice á gcur chun cinn ag an am céanna. Le cur chun feidhme an tionscadail, tabharfar aird chuí ar an éagsúlacht inscne, i gcás inarb infheidhme sna gníomhaíochtaí atá beartaithe.

2.2   Cuspóirí Sonracha

—	Díothú stoc-charn arm ceimiceach agus saoráidí táirgthe arm ceimiceach a fhíorú faoi réir na mbeart fíorúcháin dá bhforáiltear in CWC;

—

Teacht chun cinn arm ceimiceach an athuair a chosc agus an bhagairt a bhaineann le húsáid na n-arm ceimiceach sin a laghdú trí neamhleathadh arm ceimiceach, trí chur i bhfeidhm na mbeart fíorúcháin agus cur chun feidhme dá bhforáiltear sa Choinbhinsiún, rud a fhónann freisin chun muinín a chothú idir na Stáit is Páirtithe;

—	Freagairt éifeachtach inchreidte a thabhairt ar úsáid arm ceimiceach agus ar líomhaintí i leith na húsáide sin;

—	Ullmhacht a áirithiú trí chúnamh agus cosaint a chur ar fáil i gcoinne arm ceimiceach, úsáid na n-arm sin, nó bagairt a n-úsáide i gcomhréir le forálacha Airteagal X de CWC;

—	Úsáidí síochánta na ceimice i dtaca leis an bhforbairt eacnamaíoch agus theicneolaíoch a chur chun cinn trí chomhar idirnáisiúnta i réimse na ngníomhaíochtaí ceimiceacha chun na gcríoch sin nach dtoirmisctear faoi CWC, i gcomhréir le forálacha Airteagal XI CWC;

—	Féachaint leis go mbeifear ag cloí le CWC ar bhonn uilechoiteann; agus

—	Iarrachtaí substainteacha fothaithe acmhainneachta a áirithiú, agus áirithiú gur eagraíocht í a bheidh oiriúnach dá feidhm i gcónaí chun aghaidh a thabhairt ar na dúshláin agus ar na deiseanna a eascraíonn as dul chun cinn san eolaíocht agus sa teicneolaíocht.

2.3   Na torthaí atá beartaithe

Is iad seo a leanas na torthaí atá beartaithe, a rannchuidíonn an Tionscadal leo:

—	Freagairt éifeachtach a thabhairt ar fhorbairtí san eolaíocht agus sa teicneolaíocht chun córas fíorúcháin OPCW a fheabhsú;

—	Teacht chun cinn arm ceimiceach an athuair a chosc agus an bhagairt a bhaineann le húsáid arm ceimiceach a chomhrac/a laghdú;

—	Freagairtí éifeachtacha a thabhairt ar líomhaintí maidir le húsáid arm ceimiceach;

—	Gur mó an acmhainn a bheidh ag na Stát is Páirtithe oibleagáidí Airteagal X a chomhlíonadh;

—	Ceannaireacht dhomhanda agus údarás OPCW a atreisiú maidir le neamhleathadh agus dí-armáil arm ceimiceach; agus

—	Gur mó a bheifear ag cloí le CWC.

3.   Cur síos ar na Gníomhaíochtaí

Gníomhaíochtaí atá bainteach le Toradh 1 – Freagairt éifeachtach a thabhairt ar fhorbairtí san eolaíocht agus sa teicneolaíocht chun córas fíorúcháin OPCW a fheabhsú

Beidh na gníomhaíochtaí sin dírithe ar ghníomhaíochtaí na Rúnaíochta a oibríochtú trí leas a bhaint as Lárionad Ceimice agus Teicneolaíochta (CCT) a bheidh comhtháite agus oiriúnach don fheidhm; ardán a chur ar fáil le haghaidh rannpháirtíocht níos leithne maidir le hacmhainneachtaí agus úsáidí síochánta na ceimice mar shampla, inter alia, nascadh saotharlann, oiliúint saotharlainne, taighde eolaíoch (e.g. modheolaíochtaí saotharlainne fóiréinseacha a fhorbairt); ullmhacht OPCW a fheabhsú chun aghaidh a thabhairt ar dhul chun cinn san eolaíocht agus sa teicneolaíocht lena n-áirítear trí mholtaí tosaíochta ar leith ó Bhord Eolaíoch agus Comhairleach OPCW a chur chun feidhme; agus acmhainneachtaí oibríochtúla OPCW a fheabhsú maidir le hullmhú agus imscaradh misean mar shampla teicneolaíochtaí/trealamh nua a thástáil agus a bhailíochtú, agus oiliúint a chur ar fáil ina leith.

Gníomhaíochtaí atá bainteach le Toradh 2 – Teacht chun cinn arm ceimiceach an athuair a chosc agus an bhagairt a bhaineann le húsáid arm ceimiceach a chomhrac/a laghdú

Beidh na gníomhaíochtaí sin dírithe ar acmhainneachtaí na Stát is Páirtithe agus na ngeallsealbhóirí ábhartha eile a neartú chun freagairt ar an mbagairt ó airm cheimiceacha trí oiliúint thiomnaithe agus ceardlanna a bhaineann, inter alia, le hacmhainneachtaí céadfhreagartha agus le rialú teorann; cur chun feidhme moltaí tosaíochta ar leith ón Meitheal Oscailte um Sceimhlitheoireacht, inter alia, a chumasú, lena n-áirítear trí chleachtaí boird; agus an rannpháirtíocht le tionscal na gceimiceán agus leis an trádáil a leathnú trí shásraí comhordaithe, mar shampla, meithleacha agus coistí IUPAC.

Gníomhaíochtaí atá bainteach le Toradh 3 – Freagairtí éifeachtacha a thabhairt ar líomhaintí maidir le húsáid arm ceimiceach

Beidh na gníomhaíochtaí sin dírithe ar bhearta ábhartha fíorúcháin a neartú agus ar chinntí is infheidhme a chur chun feidhme (inter alia EC-M-33/DEC.1; UNSC-R2118 (2013), C-SS-4/DEC.3, EC-94/DEC.2, agus C-25/DEC.9) i dtaobh aghaidh a thabhairt ar an mbagairt a bhaineann le húsáid arm ceimiceach; chomh maith le cumais a fhorbairt a thuilleadh chun freagairt ar iarrataí na Stát is Páirtithe ar chúnamh a bhaineann le líomhaintí úsáide.

Gníomhaíochtaí atá bainteach le Toradh 4 – Gur mó an acmhainn a bheidh ag na Stát is Páirtithe oibleagáidí Airteagal X a chomhlíonadh

Beidh sé d’aidhm ag na gníomhaíochtaí sin, faoi cheanglais ábhartha Airteagal X maidir le Cúnamh agus Cosaint, cumais freagartha na Stát is Páirtithe a mhéadú; feabhas a chur ar phleanáil cosanta náisiúnta; agus éifeachtaí díspreagtha a threisiú, mar shampla trí thacaíocht a thabhairt d’ullmhúcháin CBRNE le haghaidh mórimeachtaí poiblí.

Gníomhaíochtaí atá bainteach le Toradh 5 – Ceannaireacht dhomhanda agus údarás OPCW a atreisiú maidir le neamhleathadh agus dí-armáil arm ceimiceach

Cuirfidh na gníomhaíochtaí sin feabhas ar ról OPCW maidir le húsáidí síochánta agus údaraithe na ceimice a chur chun cinn i measc lucht féachana éagsúil atá ag dul i líonmhaire a bhuí le huirlisí tiomnaithe ar líne; rannpháirtíocht a mhéadú le geallsealbhóirí seachtracha mar shampla mná, an óige agus feidhmeannaigh; díriú ar phobail faoi leith i gcás iarrachtaí speisialaithe fothaithe acmhainneachta inter alia an tsochaí shibhialta agus eagraíochtaí neamhrialtasacha; agus comhpháirtíocht níos doimhne a fhorbairt agus a chur chun feidhme a thuilleadh idir OPCW agus an tAontas Eorpach.

Gníomhaíochtaí atá bainteach le Toradh 6 – Gur mó a bheifear ag cloí le CWC

Tacóidh na gníomhaíochtaí sin le hiarrachtaí OPCW oibriú i dtreo ballraíocht iomlán a bhaint amach in aon cheann nó i ngach ceann de na ceithre Stát nach Páirtí sa Choinbhinsiún iad. Acmhainneacht agus ullmhúcháin OPCW a áirithiú a thuilleadh trí chásanna a ghiniúint, agus acmhainneachtaí agus uirlisí na Rúnaíochta a fheabhsú chun cur chun feidhme chóras fíorúcháin an Choinbhinsiúin a neartú i gcás aontachas stáit is sealbhóir.

4.   Tairbhithe

Tairbhithe na ngníomhaíochtaí faoi Thoradh 1

Pearsanra agus foirne Rúnaíocht OPCW; agus geallsealbhóirí CWC lena n-áirítear inter alia na Stáit is Páirtithe, Údaráis Náisiúnta, an tSochaí Shibhialta, Aonaid um Chosaint Shibhialta, Ollscoileanna, Saotharlanna Comhpháirtíochta, Eagraíochtaí Idirnáisiúnta agus Idir-rialtasacha, an pobal.

Tairbhithe na ngníomhaíochtaí faoi Thoradh 2

Pearsanra agus foirne Rúnaíocht OPCW; agus geallsealbhóirí CWC lena n-áirítear inter alia na Stáit is Páirtithe, Údaráis Náisiúnta, an Tionscail, Eagraíochtaí Idirnáisiúnta agus Idir-rialtasacha agus an pobal.

Tairbhithe na ngníomhaíochtaí faoi Thoradh 3

Pearsanra agus foirne Rúnaíocht OPCW; agus geallsealbhóirí CWC lena n-áirítear inter alia na Stáit is Páirtithe, Údaráis Náisiúnta, Eagraíochtaí Idirnáisiúnta agus Idir-rialtasacha agus an pobal.

Tairbhithe na ngníomhaíochtaí faoi Thoradh 4

geallsealbhóirí CWC lena n-áirítear inter alia na Stáit is Páirtithe, Údaráis Náisiúnta, Aonaid um Chosaint Shibhialta, agus an pobal.

Tairbhithe na ngníomhaíochtaí faoi Thoradh 5

Pearsanra agus foirne Rúnaíocht OPCW; agus geallsealbhóirí CWC lena n-áirítear inter alia na Stáit is Páirtithe, Údaráis Náisiúnta, an tSochaí Shibhialta, Ollscoileanna, agus an pobal.

Tairbhithe na ngníomhaíochtaí faoi Thoradh 6

Pearsanra agus foirne Rúnaíocht OPCW; agus geallsealbhóirí CWC lena n-áirítear na Stáit is Páirtithe agus na Stáit nach Páirtithe sa Choinbhinsiún iad.

5.   Fad ama

Cuirfear an Ghníomhaíocht chun feidhme le linn tréimhse 36 mhí, cé is moite de Ghníomhaíochtaí faoi Thoradh 3, a chuirfear chun feidhme laistigh de thréimhse 12 mhí.

6.   Eintiteas Cur Chun Feidhme

Is í Rúnaíocht OPCW a dhéanfaidh cur chun feidhme teicniúil na ngníomhaíochtaí thuas atá beartaithe. Is ar OPCW a bheidh an fhreagracht deiridh maidir leis na gníomhaíochtaí sin a bhaineann leis an gCoimisiún a chur chun feidhme.

---

(1)  Cuimsítear iontu Gníomhaíocht Chomhpháirteach 2004/797/CBES (in éag); Gníomhaíocht Chomhpháirteach 2005/913/CBES (in éag); Gníomhaíocht Chomhpháirteach 2007/185/CBES (in éag); Cinneadh 2009/569/CBES (in éag); Gníomhaíocht Chomhpháirteach 2012/166/CBES (in éag); Cinneadh 2015/259 (arna fhadú le Cinneadh 2018/294 agus imithe in éag); Cinneadh 2017/2302 (arna fhadú le Cinneadh 2019/1092, in éag); Cinneadh 2017/2303 (arna fhadú le Cinneadh 2018/1943 agus Cinneadh 2019/2112, in éag); Cinneadh 2019/538 (i bhfeidhm go dtí mí Aibreáin 2023); Cinneadh 2021/1026 (i bhfeidhm go dtí mí Lúnasa 2023), agus Cinneadh 2021/2073 (i bhfeidhm go dtí mí na Nollag 2025).