(1)

An 18 Eanáir 2012, ghlac an Chomhairle Cinneadh 2013/255/CBES (1) agus Rialachán (AE) Uimh. 36/2012 (2) a bhaineann le bearta sriantacha i bhfianaise na staide sa tSiria, de bhun conclúidí ón gComhairle a ghlacadh inar cháin an Chomhairle an foréigean agus na hollsáruithe córasacha a dhéantar go forleathan agus go leanúnach ar chearta an duine sa tSiria.

(2)

I bhfianaise na staide sa tSiria atá ag dul in olcas agus na sáruithe córasacha a dhéantar go forleathan ar chearta an duine agus ar an dlí daonnúil idirnáisiúnta, lena n-áirítear airm cheimiceacha a úsáid in aghaidh an phobail shibhialta, lean an Chomhairle d’ainmneacha a chur le liostaí na ndaoine agus na n-eintiteas atá faoi réir bhearta sriantacha an Aontais.

(3)

Mar gheall ar an gcrith talún tragóideach an 6 Feabhra 2023, ghéaraigh ar na dálaí uafásacha agus mhéadaigh fulaingt mhuintir na Siria.

(4)

Sna conclúidí uaithi an 9 Feabhra 2023, d’athdhearbhaigh an Chomhairle Eorpach go bhfuil an tAontas réidh le tuilleadh cúnaimh a chur ar fáil chun an fhulaingt a mhaolú sna réigiúin uile atá buailte. D’iarr sí ar chách rochtain dhaonnúil a áirithiú ar íospartaigh an chreatha talún sa tSiria gan beann ar an áit a bhfuil siad agus d’iarr sí ar an bpobal daonnúil, faoi choimirce na Náisiún Aontaithe, a áirithiú go gcuirfear cabhair ar fáil go tapa.

(5)

Bearta sriantacha an Aontais, lena n-áirítear na bearta sin a glacadh i bhfianaise na staide sa tSiria, níl siad ceaptha a bheith ina gconstaic ná ina mbac ar sholáthar na cabhrach daonnúla do dhaoine atá i ngátar. Níl srian ar an trádáil i bhformhór na n-earnálacha idir an tAontas agus an tSiria — lena n-áirítear in earnálacha an bhia agus na gcógas — mar gheall ar na bearta sriantacha a ghlac an Chomhairle i bhfianaise na staide sa tSiria. Thairis sin, a mhéid a bhaineann le bearta aonair, tá eisceachtaí i bhfeidhm chun go bhféadfar cistí agus acmhainní eacnamaíocha a chur ar fáil do dhaoine agus eintitis ainmnithe, i gcás ina bhfuil gá leis na cistí nó na hacmhainní eacnamaíocha sin chun fóirithint dhaonnúil a chur ar fáil sa tSiria nó chun cúnamh a thabhairt don phobal sibhialta sa tSiria, agus chun na gcríoch sin amháin. I gcásanna áirithe, is gá réamhúdarú a fháil ón údarás inniúil náisiúnta ábhartha.

(6)

Chun freagairt don phráinn a bhaineann leis an ngéarchéim dhaonnúil sa tSiria, atá níos measa anois de dheasca an chreatha talún, agus d’fhonn seachadadh pras na cabhrach a éascú, is iomchuí díolúine a thabhairt isteach maidir le reo na n-acmhainní de chuid daoine nádúrtha nó dlítheanacha ainmnithe agus eintiteas ainmnithe, agus maidir le srianta ar chistí agus acmhainní eacnamaíocha a chur ar fáil do dhaoine nádúrtha nó dlítheanacha ainmnithe agus d’eintitis ainmnithe, ar mhaithe le heagraíochtaí idirnáisiúnta agus catagóirí sainithe áirithe gníomhaithe a bhfuil baint acu le gníomhaíochtaí daonnúla, agus é sin ar feadh tréimhse tosaigh 6 mhí.

(7)

Tagann na leasuithe a áirítear sa Rialachán seo faoi raon feidhme an Chonartha agus, dá bhrí sin, tá gá le gníomhaíocht rialála ar leibhéal an Aontais chun iad a chur chun feidhme, go háirithe d’fhonn a áirithiú go gcuirfear i bhfeidhm iad go haonfhoirmeach i ngach Ballstát.

(8)

Ba cheart, dá bhrí sin, Rialachán (AE) Uimh. 36/2012 a leasú dá réir,