(1)

Le Rialachán (AE) 2021/2115 leagtar síos na bunrialacha lena rialaítear pleananna straitéiseacha an chomhbheartais talmhaíochta (CBT), lena n-áirítear rialacha maidir le leasuithe ar Phleananna Straitéiseacha CBT a thíolacadh agus a fhormheas a leagtar amach in Airteagal 119 den Rialachán sin a thíolacadh.

(2)

Ionas gur féidir leis na Ballstáit iarrataí ar leasuithe ar a bPleananna Straitéiseacha CBT a thíolacadh, is gá na nósanna imeachta agus na teorainneacha ama maidir leis na hiarrataí ar leasuithe a thíolacadh a leagan amach.

(3)

Chun gur féidir leis an gCoimisiún measúnú ceart a dhéanamh ar an iarraidh ar leasú ar an bPlean Straitéiseach CBT, ba cheart faisnéis áirithe a bheith san iarraidh, sa bhreis ar an bhfaisnéis a leagtar síos in Airteagal 119(2) de Rialachán (AE) 2021/2115, maidir le gach athrú ar an bPlean Straitéiseach CBT, faisnéis áirithe ina mínítear na cúiseanna atá leis an athrú agus ina mínítear a inneachar agus na héifeachtaí a mheastar a bheidh ann.

(4)

Chun a áirithiú go mbeidh an iarraidh ar leasú ar an bPlean Straitéiseach CBT iomlán agus go ndéanfar í a tharchur i gceart chuig an gCoimisiún, ba cheart do na Ballstáit í a chur isteach tríd an gcóras um malartú sonraí leictreonacha “SFC2021” dá dtagraítear in Airteagal 3 de Rialachán Cur Chun Feidhme (AE) 2021/2289 ón gCoimisiún (2).

(5)

Chun a áirithiú go ndéanfar measúnú cuimsitheach ar an iarraidh ar leasú arna thíolacadh lena formheas ag an gCoimisiún, agus go háirithe ar an bplean airgeadais leasaithe, agus chun an riosca ar earráidí a sheachaint de dheasca leaganacha iolracha den Phlean Straitéiseach CBT a bhfuil measúnú comhthreomhar á dhéanamh orthu, ba cheart don Bhallstát iarraidh amháin ar leasú a chur isteach tríd an gcóras um malartú sonraí leictreonacha “SFC2021” ag aon am amháin. Níor cheart don Bhallstát iarraidh nua ar leasú a thíolacadh go dtí go mbeidh an iarraidh roimhe sin tarraingthe siar aige nó tar éis don Choimisiún fógra a thabhairt don Bhallstát faoina chinneadh maidir leis an iarraidh ar leasú a tíolacadh roimhe sin. Tá gá leis sin go háirithe chun deimhneacht dhlíthiúil a áirithiú do na tairbhithe maidir leis an leagan is infheidhme den Phlean Straitéiseach CBT agus nascadh ceart na n-íocaíochtaí agus leis an bplean airgeadais leasaithe nua is infheidhme.

(6)

Is gá rialacha mionsonraithe a leagan síos maidir le fógraí a thabhairt don Choimisiún faoi na hathruithe a bhaineann le hidirghabhálacha faoi Theideal III, Caibidil IV, de Rialachán (AE) 2021/2115, dá dtagraítear in Airteagal 119(9) den Rialachán sin, agus maidir le fógra a thabhairt don Choimisiún faoi thoradh an mheasúnaithe dá dtagraítear in Airteagal 120 den Rialachán sin.

(7)

Is gá teorainneacha ama a leagan síos maidir le hiarrataí a chur isteach ar leasú ar Phleananna Straitéiseacha CBT a bhaineann le cineálacha idirghabhála in earnálacha áirithe dá dtagraítear in Airteagal 42 de Rialachán (AE) 2021/2115 agus a bhaineann le cineálacha idirghabhála dá dtagraítear i gCaibidil IV den Rialachán sin chun próiseáil thráthúil agus teacht i bhfeidhm na leasuithe ar Phleananna Straitéiseacha CBT a áirithiú roimh dheireadh na tréimhse le haghaidh incháilitheacht an chaiteachais.

(8)

Thairis sin, is gá tréimhse ama a leagan síos chun iarrataí ar leasú ar an bPlean Straitéiseach CBT a bhaineann le haistriú leithdháiltí airgeadais áirithe a thíolacadh, chun teacht i bhfeidhm tráthúil na leithdháiltí airgeadais le haghaidh íocaíochtaí díreacha agus CETFT a áirithiú.

(9)

Chun a áirithiú go ndéanfar próiseáil éifeachtúil ar iarrataí ar leasú ar Phleananna Straitéiseacha CBT, ba cheart do na Ballstáit na hiarrataí ar leasú a ullmhú chun an líon iarrataí ar leasuithe a chuirtear isteach i ngach bliain féilire a laghdú, mar shampla trí roinnt athruithe ar na Pleananna Straitéiseacha CBT a chur le chéile in aon iarraidh amháin ar leasú. Chun deimhneacht dhlíthiúil a áirithiú, cearta feirmeoirí a chosaint agus feidhmiú rianúil éifeachtúil gach idirghabhála a ráthú, ba cheart do na Ballstáit a n-iarrataí ar leasú a chur isteach ionas go mbeidh dóthain ama ann chun go ndéanfaidh an Coimisiún measúnú orthu agus chun go dtiocfaidh siad i bhfeidhm go tráthúil i gcomhréir le hAirteagal 119(8) de Rialachán (AE) 2021/2115.

(10)

Chun solúbthacht a áirithiú do na Ballstáit i gcás éigeandálaí de dheasca tubaistí nádúrtha agus teagmhais thurraingeacha agus bearta éigeandála eile agus chun aghaidh a thabhairt ar chásanna sonracha eile, agus an tráth céanna, chun na hiarrataí ar leasú ar an bPlean Straitéiseach CBT a phróiseáil go héifeachtach tráthúil gan ualach riaracháin míchuí, is gá cásanna eile a shainiú nach bhfuil feidhm ag an líon uasta iarrataí ar leasú a leagtar síos in Airteagal 119(7) de Rialachán (AE) 2021/2115 maidir leo. Ba cheart a áireamh sna cásanna sin athruithe gan choinne ar chreat dlíthiúil an Aontais, oibleagáidí dlíthiúla, agus i gcás inar gá, saoradh uathoibríoch, agus athruithe mar gheall ar bhearta eisceachtúla i gcoinne suaití margaidh, galair ainmhithe agus lotnaidí plandaí, chomh maith le modhnuithe ar ionstraimí airgeadais a oibríonn i dtimpeallacht dhinimiciúil margaidh i gcás ina bhféadfadh sé go mbeadh gá le hathruithe rialta chun iad a chur chun feidhme i gceart.

(11)

Is gá teorainn ama a sholáthar maidir le hiarrataí ar leasú a bhaineann le saoradh uathoibríoch a thíolacadh, chun a áirithiú go gcomhlíonfar na teorainneacha ama a leagtar síos in Airteagal 34 de Rialachán (AE) 2021/2116 ó Pharlaimint na hEorpa agus ón gComhairle (3) agus in Airteagal 24 de Rialachán Cur Chun Feidhme (AE) 2022/128 ón gCoimisiún (4).

(12)

Ag féachaint d’Airteagal 104(1), an dara fomhír, agus Airteagal 106 de Rialachán (AE) 2021/2116 agus ós rud é go leagtar síos leis an Rialachán seo rialacha maidir le teorainneacha ama le haghaidh iarrataí ar leasú ar Phleananna Straitéiseacha CBT agus cásanna eile d’iarrataí ar leasú ar Phleananna Straitéiseacha CBT nach n-áirítear sa líon uasta iarrataí ar leasú ar Phleananna Straitéiseacha CBT, ba cheart feidhm a bheith ag an Rialachán seo amhail ón 1 Eanáir 2023, chun cothrom na Féinne agus deimhneacht dhlíthiúil a áirithiú do na Ballstáit, d’fheirmeoirí agus do na páirtithe leasmhara lena mbaineann,