(1)

An Comhaontú Comhlachais idir an tAontas Eorpach agus an Comhphobal Eorpach do Fhuinneamh Adamhach agus a mBallstáit, de pháirt, agus an tSeoirsia, den pháirt eile (“an Comhaontú”), síníodh é an 27 Meitheamh 2014 agus tháinig sé i bhfeidhm an 1 Iúil 2016.

(2)

I mBrollach an Chomhaontaithe aithnítear tiomantas na Seoirsia dá cuid reachtaíochta a chomhfhogasú de réir a chéile do reachtaíocht an Aontais sna hearnálacha ábhartha, i gcomhréir leis an gComhaontú, agus dá cuid reachtaíochta a chur chun feidhme go héifeachtach, rud a rannchuideoidh leis na tairbhithe a bhaineann le comhlachas polaitiúil agus comhtháthú eacnamaíoch níos dlúithe na Seoirsia leis an Aontas a chur ar fáil do shaoránaigh uile na Seoirsia, lena n-áirítear na pobail atá deighilte de bharr coimhlinte.

(3)

I gcomhréir le hAirteagal 147 den Chomhaontú, comhaontaíonn na Páirtithe sa Chomhaontú gur de réir a chéile agus go comhuaineach a bhainfear amach oscailt éifeachtach chómhalartach a margaí faoi seach.

(4)

De bhun Airteagal 146 den Chomhaontú, áiritheoidh an tSeoirsia go ndéanfar a cuid reachtaíochta maidir le soláthar poiblí a chomhfhogasú de réir a chéile do acquis soláthair phoiblí an Aontais, agus gur ina chéimeanna leantacha a dhéanfar comhfhogasú do acquis an Aontais, faoi mar a leagtar amach sa sceideal in Iarscríbhinn XVI-B a ghabhann leis an gComhaontú. I gcomhréir le Cinneadh Uimh. 2/2021 ón gCoiste Comhlachais i ndáil le cumraíocht Trádála an 8 Deireadh Fómhair 2021, tá measúnú dearfach tugtha ag an gCoiste Comhlachais i ndáil le cumraíocht Trádála maidir le Céim 1 a leagtar amach in Iarscríbhinn XVI-B a ghabhann leis an gComhaontú a thabhairt chun críche ag an tSeoirsia

(5)

I gcomhréir le hAirteagal 419(5) den Chomhaontú, ba cheart don Chomhairle Comhlachais, de bhun na gcumhachtaí a thugtar di in Airteagail 406 agus 408 den Chomhaontú, cinneadh a dhéanamh maidir leis an margadh a oscailt a thuilleadh i gcás ina bhforáiltear don mhéid sin i dTeideal IV (Trádáil agus Nithe a bhaineann leis an Trádáil) den Chomhaontú,