—

ag féachaint d’Airteagal 3 den Chonradh ar an Aontas Eorpach,

—

ag féachaint d’Airteagail 153 agus 168 den Chonradh ar Fheidhmiú an Aontais Eorpaigh (CFAE),

—

ag féachaint d’Airteagal 3 de Chairt Shóisialta na hEorpa de Chomhairle na hEorpa,

—

ag féachaint d’Airteagal 3 de Chairt um Chearta Bunúsacha an Aontais Eorpaigh,

—

ag féachaint do choinbhinsiúin agus moltaí na hEagraíochta Idirnáisiúnta Saothair (EIS) i réimse na sláinte agus na sábháilteachta ag an obair,

—

ag féachaint do Spriocanna Forbartha Inbhuanaithe (SDGanna) na Náisiún Aontaithe do 2030, go háirithe sprioc 8.8 dar teideal “Cearta saothair a chosaint agus timpeallachtaí oibre sábháilte a chur chun cinn”,

—

ag féachaint do Choinbhinsiún na Náisiún Aontaithe ar Chearta Daoine faoi Mhíchumas (UNCRPD) a bhfuil AE agus a Bhallstáit uile mar pháirtithe ann,

—

ag féachaint don tuarascáil ó Phainéal Idir-Rialtasach na Náisiún Aontaithe ar an Athrú Aeráide (IPCC) dar teideal AR6 Climate Change 2021: the Physical Science Basis [AR6 Athrú Aeráide 2021: Bunús na hEolaíochta Fisiciúla],

—

ag féachaint do Chreat Eorpach na hEagraíochta Domhanda Sláinte (EDS) um Ghníomhaíocht ar Mheabhairshláinte 2021-2025 (1),

—

ag féachaint do Threoir 2000/78/CE ón gComhairle an 27 Samhain 2000 lena mbunaítear creat ginearálta le haghaidh na córa comhionainne san fhostaíocht agus sa tslí bheatha (2),

—

ag féachaint do theachtaireacht ón gCoimisiún an 3 Feabhra 2021 dar teideal Europe’s Beating Cancer Plan [Plean na hEorpa chun Ailse a Chloí] (COM(2021)0044),

—

ag féachaint do theachtaireacht ón gCoimisiún an 28 Meitheamh 2021 dar teideal “Creat Straitéiseach AE maidir leis an tSláinte agus an tSábháilteacht ag an Obair, 2021-2027 – Sábháilteacht agus sláinte cheirde i saol oibre atá ag athrú” (COM(2021)0323),

—

ag féachaint don tuairim ó Phainéal Saineolaithe an Choimisiúin an 23 Meitheamh 2021 ar bhealaí éifeachtacha chun infheistiú sa tsláinte dar teideal Supporting mental health of health workforce and other essential workers [Ag tacú le meabhairshláinte an lucht saothair sláinte agus oibrithe riachtanacha eile],

—

ag féachaint do Cholún Eorpach na gCeart Sóisialta, go háirithe prionsabail 5 go 10 de, a d’fhógair an Pharlaimint, an Chomhairle agus an Coimisiún (an Colún) go comhpháirteach an 17 Samhain 2017,

—

ag féachaint do phlean gníomhaíochta an Choimisiúin maidir le Colún Eorpach na gCeart Sóisialta, an 4 Márta 2021,

—

ag féachaint do Dhearbhú Porto ón gComhairle Eorpach an 8 Bealtaine 2021,

—

ag féachaint do na Conclúidí ón gComhairle i mí Dheireadh Fómhair 2019 maidir le “Geilleagar na Folláine”, agus béim á leagan ar a thábhachtaí atá sé an mheabhairshláinte a chur chun cinn san ionad oibre,

—

ag féachaint don tuairim ó Choiste Eacnamaíoch agus Sóisialta na hEorpa an 20 Deireadh Fómhair 2021 dar teideal “Sláinte agus Sábháilteacht ag an Obair – Creat Straitéiseach AE (2021-2027)”,

—

ag féachaint do chreat gníomhaíochta AE um ghníomhaíocht ar mheabhairshláinte agus folláine, a glacadh ag an gcomhdháil dheireanach um Ghníomhaíocht Chomhpháirteach ar Mheabhairshláinte agus Folláine an 21-22 Eanáir 2016 (3),

—

ag féachaint do straitéis AE maidir le cearta daoine faoi mhíchumas 2021-2030,

—

ag féachaint don chéad tuarascáil chomhpháirteach maidir le cur chun feidhme Chreat-Chomhaontú Chomhpháirtithe Sóisialta na hEorpa maidir leis an Digitiú (2021),

—

ag féachaint do threoirlínte na Gníomhaireachta Eorpaí um Shábháilteacht agus Sláinte ag an Obair (EU-OSHA) an 24 Aibreán 2020 dar teideal “COVID-19: ar ais chuig an ionad oibre – ionaid oibre a chur in oiriúint agus oibrithe a chosaint”,

—

ag féachaint do thuarascáil EU-OSHA an 22 Deireadh Fómhair 2021 dar teideal Telework and health risks in the context of the covidovid-19 pandemic: evidence from the field and policy implications [Teilea-obair agus rioscaí sláinte i gcomhthéacs phaindéim COVID-19: fianaise allamuigh agus impleachtaí beartais].

—

ag féachaint don rún uaithi an 11 Meán Fómhair 2018 maidir le conairí d’oibrithe atá ag téarnamh ó ghortú agus ó thinneas a athimeascadh i bhfostaíocht d’ardchaighdeán (4),

—

ag féachaint do rún uaithi an 19 Meitheamh 2020 maidir le cosaint Eorpach d’oibrithe trasteorann agus séasúracha i gcomhthéacs ghéarchéim COVID-19 (5),

—

ag féachaint do rún uaithi an 17 Nollaig 2020 maidir le hEoraip shóisialta láidir don Aistriú Cóir (6),

—

ag féachaint do rún uaithi an 21 Eanáir 2021 ina bhfuil moltaí don Choimisiún maidir leis an gceart chun dícheangail (7),

—

ag féachaint do rún uaithi an 16 Meán Fómhair 2021 maidir le dálaí oibre cothroma, cearta agus cosaint shóisialta d’oibrithe ardáin – cineálacha nua fostaíochta atá nasctha leis an bhforbairt dhigiteach (8),

—

ag féachaint dá rún an 20 Deireadh Fómhair 2021 maille le moltaí don Choimisiún maidir le hoibrithe a chosaint ar aispeist (9),

—

ag féachaint d’Airteagal 54 dá Rialacha Nós Imeachta,

—

ag féachaint don tuarascáil ón gCoiste um Fhostaíocht agus um Ghnóthaí Sóisialta (A9-0023/2022),

A.

de bhrí gur gá ardleibhéal cosanta le haghaidh sláinte an duine a áirithiú i sainiú agus i gcur chun feidhme bheartais agus ghníomhaíochtaí uile an Aontais;

B.

de bhrí, de réir Bhunreacht EDS, gur “staid iomlán fhisiceach, intinne agus folláine sóisialta í an tsláinte agus ní hé amháin galar nó breoiteacht a bheith in easnamh” (10);

C.

de bhrí, de réir EDS, gur “staid folláine í an tsláinte mheabhrach ina réadaíonn daoine a gcumas féin agus inar féidir leo dul i ngleic le gnáthstruis an tsaoil, oibriú go táirgiúil agus rannchuidiú lena bpobal” (11);

D.

de bhrí go raibh níos mó ná 3 300 tionóisc mharfach agus 3.1 milliún tionóisc neamh-mharfach in AE-27 in 2018; de bhrí go bhfaigheann níos mó ná 200 000 oibrí bás gach bliain de dheasca tinnis a bhaineann leis an obair (12); de bhrí nach n-áirítear leis na sonraí sin gach tionóisc a tharla de bharr obair neamhdhearbhaithe, rud a fhágann gur sochreidte glacadh leis go bhfuil an fíorlíon i bhfad níos airde an staidreamh oifigiúil (13); de bhrí, de réir an Fhorais Eorpaigh chun Dálaí Maireachtála agus Oibre a Fheabhsú (Eurofound), go raibh 20 % de na poist san Eoraip “ar dhroch-cháilíocht” agus gur chuir siad sláinte fhisiciúil nó mheabhrach oibrithe i mbaol méadaithe; de bhrí gur nochtadh 14 % de na hoibrithe do leibhéal ard rioscaí síceasóisialta (14); de bhrí go gcreideann 23 % d’oibrithe na hEorpa go mbíonn a sábháilteacht nó a sláinte i mbaol mar gheall ar a n-obair; de bhrí go bhfuarthas sa Suirbhé Eorpach ar Dhálaí Oibre (EWCS) in 2015 gur “poist thábhachtacha” a bhí in 21 % de na poist san Eoraip (15); de bhrí gur cuireadh obair allamuigh EWCS siar in 2020 mar gheall ar an ráig de phaindéim COVID-19 ach gur athsheoladh í i mí Iúil 2021 d’fhonn í a fhoilsiú faoi dheireadh 2022;

E.

de bhrí go bhfuil an baol a bhaineann le gortuithe ag an obair níos mó ná trí huaire níos airde i gcás oibrithe atá ag obair ina bpost le breis agus ceithre seachtaine anuas ná iad siúd a atá ag obair ina bpost le breis agus bliain anuas (16);

F.

de bhrí nach ionann treochtaí anuas i líon na dtionóiscí agus na mbásanna san áit oibre i ngach tír;

G.

de bhrí go bhfuil sé mar aidhm ag Plean Sáraithe Ailse na hEorpa an t-ualach ailse ar othair, a dteaghlaigh agus córais sláinte a laghdú; de bhrí go bhfuil an ailse ina príomhchúis le básanna a bhaineann leis an obair, agus í ina siocair le 52 % de na básanna uile a bhaineann leis an obair in AE; de bhrí gur siocair iad carcanaiginí le tuairim is 100 000 bás ailse ceirde san ionad oibre gach bliain (17); de bhrí go bhfuil idir 50 agus 70 substaint nó grúpa substaintí sainaitheanta ag gníomhaireachtaí éagsúla, ag geallsealbhóirí éagsúla agus ag an EDS i liostaí tosaíochta de charcanaiginí, só-ghineacha agus substaintí atá tocsaineach maidir le síolrú agus a bhfuil teorainnluachanna ceangailteacha ag teastáil ina leith; de bhrí gur féidir oibrithe a nochtadh do mhanglam substaintí san áit oibre, rud a fhéadann rioscaí sláinte a mhéadú, a fhéadann a bheith ina chúis le héifeachtaí díobhálacha, ar a gcórais atáirgthe lena n-áirítear torthúlacht lagaithe nó neamhthorthúlacht, agus a fhéadann tionchar diúltach a imirt ar fhorbairt féatais agus ar lachtadh;

H.

de bhrí gur siocair é nochtadh d’aispeist le bás tuairim is 88 000 duine san Eoraip gach bliain, gurb é is cúis le 55-75 % d’ailsí na scamhóg arna dteacht ar dhaoine ag an obair, agus de bhrí gurb í aispeist an phríomhchúis le hailse na scamhóg, agus í ina siocair le 45 % de na cásanna (18); de bhrí go meastar go leanfaidh na rátaí básmhaireachta ón nochtadh sin de bheith ag méadú amach sna 2020idí agus sna 2030í (19); de bhrí cé go bhfuil cosc ar aispeist in AE ó 2005 i leith, is minic a bhíonn ann di i bhfoirgnimh riaracháin, i scoileanna, i dtithíocht, i mbonneagar, i saoráidí iompair phoiblí agus i líonraí soláthair uisce; de bhrí go bhfuil baint ag aispeist le 80 % d’ailsí ceirde a aithnítear sna Ballstáit;

I.

de bhrí go bhfuil fachtóirí amhail radaíocht, strus, eagrú na hoibre agus dálaí oibre go léir nasctha le hailse a bhaineann leis an obair; de bhrí go bhfuil cásanna ailse chraicinn, atá ar cheann de na galair cheirde is leithne, ag dul i méid mar gheall ar thosca éagsúla amhail an t-athrú aeráide, agus nach n-aithnítear mar ghalair cheirde ach cion an-bheag de shiadaí craicinn atá bainteach leis an obair; de bhrí go bhfuil baol suntasach ann d’oibrithe allamuigh, go háirithe iad siúd atá ag obair in earnálacha na talmhaíochta, na foraoiseachta, na tógála agus na turasóireachta, ailse chraicinn nach meileanóma í (NMSC) a fhorbairt mar gheall ar leibhéil ardaithe nochta do radaíocht ultraivialait (UVR); de bhrí go mbíonn ar oibrithe san earnáil cúraim sláinte agus éigeandála, a bhfuil ról bunúsach acu maidir le hullmhacht agus freagairt i gcás éigeandála, amhail comhraiceoirí dóiteáin agus altraí, dul i ngleic le neamhchosaintí comhchosúla chomh maith le strus breise mar gheall ar ualach oibre méadaithe a d’fhéadfadh cur le rioscaí síceasóisialta; de bhrí nach bhfuil cur chuige comhchoiteann Eorpach ann go fóill maidir le nochtadh do UVR a chosc (20); de bhrí go bhfuil easpa sonraí iontaofa agus inchomparáide ar leibhéal an Aontais faoi láthair maidir le nochtadh san ionad oibre d’fhachtóirí riosca ailse (21); de bhrí gur féidir 2 % d’ualach ailse AE a chur i leith radaíocht ianúcháin agus gurb é nochtadh don radón laistigh agus a táirgí meatha an dara cúis is mó le hailse scamhóg san Eoraip (22) (23);

J.

de bhrí go raibh éifeachtaí díobhálacha ag an athrú aeráide cheana féin ar shláinte an duine, ar an tsábháilteacht ag an obair agus ar dhálaí oibre agus go mbeidh amach anseo; de bhrí, de réir na tuarascála is déanaí ó IPCC, go mbeidh tionchar níos mó ag athruithe suntasacha ar phatrúin aimsire, amhail teasthonnta agus báisteach throm, ar dhálaí oibre; de bhrí gur measa na rioscaí a bhaineann le béim teasa, díhiodráitiú, tuirse, easpa airde agus castachtaí galar ainsealach, mar gheall ar nochtadh méadaithe do theochtaí arda san ionad oibre; de bhrí go bhfuil tionchar ag an athrú aeráide ar ghalair a bhaineann leis an obair agus atá nasctha le hoibreáin bhitheolaíocha, ós rud é gur féidir le teochtaí atá ag dul i méid, mar shampla, difear a dhéanamh do dháileadh geografach veicteoirí oibreán bitheolaíoch (sceartáin, muiscítí), rud a éascaíonn leathadh galar atá nua do réigiún; de bhrí go bhfuil sé riachtanach cleachtais oibre a chur in oiriúint chun éifeachtaí an athraithe aeráide a chur san áireamh (24);

K.

de bhrí go gcuireann timpeallacht oibre shíceasóisialta mhaith le folláine intinne agus fhisiciúil oibrithe; de bhrí gur féidir le rioscaí síceasóisialta eascairt as drochdhearadh, drocheagrú agus drochbhainistíocht oibre, chomh maith le droch-chomhthéacs sóisialta oibre, agus gur féidir torthaí diúltacha síceolaíocha, fisiciúla agus sóisialta, amhail strus, imní, cloíteacht agus dúlagar, a bhaineann leis an dara grúpa is mó d’fhadhbanna sláinte féintuairiscithe a bhaineann leis an obair, a bheith mar thoradh orthu (25); de bhrí gur féidir le strus a bhaineann leis an obair cur go suntasach leis an riosca go ndéanfar neamhoird mhatánchnámharlaigh (MSDanna), galar croí, galair uath-imdhíonacha nó galair athlastacha réamatacha/ainsealacha a spreagadh nó a ghéarú (26); de bhrí, de réir Eurofound agus EU-OSHA, go bhfuil 25 % d’oibrithe san Eoraip faoi strus iomarcach a bhaineann leis an obair; de bhrí go ndeir 51 % d’oibrithe AE gur coitianta an strus ina n-ionad oibre agus go bhfuil beagnach 80 % de bhainisteoirí buartha faoin strus a bhaineann leis an obair (27), a léiríonn gur cúis bhuartha iad rioscaí síceasóisialta do thromlach cuideachtaí (28); de bhrí gur strus a bhaineann leis an obair is cúis le breis agus leath de na laethanta oibre a chailltear in AE (29); de bhrí go bhfuil difríocht shuntasach ann i mBallstáit éagsúla maidir le cuir chuige i leith rioscaí síceasóisialta agus reachtaíocht a bhaineann leo; de bhrí gur féidir tionchar dearfach a imirt ar mheabhairshláinte agus ar fholláine dhaonra na hEorpa trí aird a thabhairt ar straitéisí a chuirtear chun feidhme san áit oibre; de bhrí, ach cosc a chur ar fhadhbanna meabhairshláinte agus an mheabhairshláinte a chur chun cinn, go rannchuideofaí le laghdú a dhéanamh ar iompar ar rioscaí sláinte gaolmhara amhail úsáid alcóil, drugaí agus tobac, neamhghníomhaíocht choirp agus drochaiste bia; de bhrí go bhfuil baint dhíreach ag leibhéil fheabhsaithe folláine síceolaíche agus fisiciúla le feidhmíocht níos fearr san áit oibre;

L.

de bhrí gur féidir ról tábhachtach a bheith ag áiteanna oibre sa tsláinte phoiblí, ag brath ar a n-acmhainní lóistíochta, trí stíleanna maireachtála sláintiúla a chur chun cinn, trí chleachtadh spórt agus gníomhaíochtaí coirp a spreagadh agus trí gach gné den tsláinte a chur chun cinn ar bhonn níos leithne i measc fostaithe;

M.

de bhrí go bhfuil ról bunúsach ag feasacht maidir leis an tsláinte i dtaobh tionchar bagairtí sláinte a chosc agus a mhaolú, agus cur le tuiscint níos fearr an phobail ar fhrithbhearta agus ar mheasúnú riosca na mbagairtí sláinte éagsúla.

N.

de bhrí gur léir ó phaindéim COVID-19 gur gá sábháilteacht agus cosaint oibrithe a áirithiú, lena n-áirítear a meabhairshláinte; de bhrí gur leag an phaindéim béim ar an tábhacht a bhaineann le hinfheistíocht a dhéanamh sa tsláinte phoiblí; de bhrí gur tháinig mórbhorradh faoin teilea-obair de bharr phaindéim COVID-19, agus beagnach leath de na fostaithe uile in AE ag obair ón mbaile ar a laghad cuid dá n-am oibre (30) le linn na dianghlasála, agus freagrachtaí méadaithe cúraim á nglacadh acu orthu féin ag an am céanna; de bhrí go bhfuil sé cruthaithe go bhfuil tionchar láidir ag an gcianobair ar eagrú an ama oibre toisc go méadaíonn sí an tsolúbthacht mar aon le soghluaisteacht leanúnach na n-oibrithe (31), rud a mbíonn coimhlint oibre is saoil mar thoradh air go minic; de bhrí go meastar go mbeidh glacadh na teilea-oibre fós níos airde ná mar a bhí sé roimh ghéarchéim COVID-19 nó go dtiocfaidh méadú breise air fiú (32); de bhrí go raibh an chianobair mar a bheadh maolán ann le linn na géarchéime agus gur caomhnaíodh poist a d’fhéadfadh a bheith caillte murach í (33); de bhrí go gcuireann an teilea-obair an tsaoirse ar fáil d’oibrithe a n-uaireanta oibre agus a sceidil a chur in oiriúint chun freastal ar a riachtanais phearsanta agus teaghlaigh féin (34); de bhrí go dtugann roinnt staidéar le fios go bhfuil feabhas suntasach tagtha ar dhearcthaí ar an gcianobair ó thús na paindéime, rud fhágann go bhfuil fabhar ginearálaithe ann do shocruithe oibre hibrideacha (35);

O.

de bhrí go bhfuil níos mó ná dhá oiread seans ann go n-oibreoidh daoine a bhíonn ag obair go rialta ón mbaile níos mó ná 48 uair an chloig in aghaidh na seachtaine agus go bhfuil baol ann go nglacfaidh siad sos go ceann tréimhse is giorra ná 11 uair an chloig idir laethanta oibre; de bhrí go dtuairiscíonn nach mór 30 % de theilea-oibrithe go mbíonn siad ag obair le linn a gcuid ama shaoir gach lá nó roinnt babhtaí sa tseachtain, i gcomparáid le níos lú ná 5 % de na hoibrithe atá “lonnaithe in oifigí” agus gur mó seans go n-oibríonn siad uaireanta mírialta chomh maith; de bhrí gurb iad rioscaí síceasóisialta na rioscaí sláinte is forleithne a bhaineann leis an teilea-obair (36); de bhrí go bhfuil leitheadúlacht níos airde d’fhadhbanna fisiciúla, amhail MSDanna, i dtaca le hiompar neamhaistreach, drochdhálaí eirgeanamaíocha, uaireanta fada oibre agus strus a bhaineann leis an obair, mar thoradh ar leitheadúlacht níos airde de theilea-obair;

P.

de bhrí gur féidir tionchar a bheith ag margadh saothair atá ag athrú ar shláinte agus ar shábháilteacht ag an obair agus ar dhálaí oibre trí fhorbairtí déimeagrafacha, teicneolaíochtaí nua amhail nanaiteicneolaíochtaí agus intleacht shaorga a thabhairt isteach, mar aon le glúnta d’uirlisí nó innealra atá ann cheana, substaintí agus táirgí ceimiceacha nua a bheith ann agus cineálacha nua post; de bhrí go bhfuil níos mó oibrithe ag dul isteach in obair ardáin, obair neamhthraidisiúnta nó fostaíocht neamhthipiciúil;

Q.

de bhrí gur nocht géarchéim COVID-19 leochaileacht oibrithe neamhchaighdeánacha, lena n-áirítear iad siúd a oibríonn trí shaothar digiteach nó trí ardáin agus oibrithe féinfhostaithe; de bhrí gur rídhócha go leanfaidh an sciar d’obair ardáin sa mhargadh saothair de bheith ag fás; de bhrí go n-eisiatar oibrithe féinfhostaithe ó raon feidhme an chreata straitéisigh don tsláinte agus don tsábháilteacht ag an obair, ós rud é nach bhfuil siad cumhdaithe faoi reachtaíocht AE um shláinte agus sábháilteacht ceirde; de bhrí gur féidir le hoibrithe ardáin a bheith thíos le rioscaí breise sláinte agus sábháilteachta nach bhfuil teoranta do shláinte fhisiciúil ach ar féidir leo dochar a dhéanamh don tsláinte shíceasóisialta freisin mar thoradh ar uaireanta oibre dothuartha, déine na hoibre, timpeallachtaí iomaíocha, ró-ualach faisnéise agus leithlisiú; de bhrí go bhfuil dúshláin nua ag baint le bainistiú algartamach ó thaobh thodhchaí na hoibre de, ar dúshláin iad a d’fhéadfadh brú iomarcach luais agus éifeachtúlachta a chruthú d’oibrithe; de bhrí gur féidir leis an stíl bhainistíochta sin sábháilteacht oibrithe ardáin san earnáil iompair agus seachadta ar bhóithre a chur i mbaol, go háirithe rothaithe agus iad ina n-úsáideoirí soghonta bóithre, chomh maith le sábháilteacht úsáideoirí eile bóithre a chur i mbaol; de bhrí gur féidir le hoibrithe ardáin mná, go háirithe tiománaithe mná agus mná a chuireann seirbhísí glantacháin agus cúraim ar fáil in áiteanna cónaithe príobháideacha, a bheith ina n-íospartaigh gnéaschiaptha agus foréigin agus go bhféadfaidís staonadh ó tharluithe den sórt sin a thuairisciú mar gheall ar easpa uirlisí tuairiscithe nó easpa teagmhála le bainisteoir daonna, nó toisc eagla a bheith orthu go bhfaighidh siad drochrátálacha agus go gcaillfidh siad obair amach anseo; de bhrí go ndéantar ganntuairisciú ar chiapadh gnéasach agus ar an bhforéigean in obair ardáin (37);

R.

de bhrí gur léirigh paindéim COVID-19 gur féidir le háiteanna oibre a bheith ina lárionaid mhóra chun tógálacht a leathadh; de bhrí go ndearnadh a fhorbhásaí agus atá dálaí oibre agus maireachtála oibrithe séasúracha san Eoraip, go háirithe in earnáil na talmhaíochta, a dhoiciméadú go maith cheana féin roimh ghéarchéim COVID 19 (38); de bhrí gur léirigh tuairiscí scáfara ar sháruithe ar chearta oibrithe trasteorann agus séasúracha ó thaobh dálaí oibre agus maireachtála de gur tháinig meath bhreise ar a staid le linn na paindéime; de bhrí gur minic a bhíonn oibrithe atá ar sannadh gearrthéarmach ina gcónaí i gcóiríocht ghrúpa, inar deacair scaradh sóisialta a chur i bhfeidhm agus ina gcuirtear leis an riosca go mbeadh ionfhabhtú orthu; de bhrí gur tharla ráigeanna móra d’ionfhabhtuithe COVID-19 i dtionscail amhail an tioscal próiseála bia; de bhrí go ndéanann cineálacha fostaíochta forbhásaí amhail obair eatramhach, féinfhostaíocht bhréagach nó obair i slabhraí fochonraitheoireachta oibrithe a eisiamh go rialta ó sheirbhísí agus oiliúint sábháilteachta agus sláinte ag an obair; de bhrí gurb é cuspóir an Údaráis Eorpaigh Saothair (ELA) soghluaisteacht chothrom an lucht saothair a áirithiú trí chúnamh a thabhairt do na Ballstáit agus don Choimisiún maidir le dlí an Aontais a bhaineann le soghluaisteacht lucht saothair a chur i bhfeidhm agus a fhorfheidhmiú go héifeachtach agus maidir le comhordú córas slándála sóisialta laistigh de AE, lena n-áirítear tuairisciú ar mhírialtachtaí amhrasta amhail sáruithe ar dhálaí oibre agus rialacha sláinte agus sábháilteachta, má fhoghlaimíonn siad faoi neamhrialtachtaí den sórt sin agus a gcúraimí á gcomhlíonadh acu;

S.

de bhrí gur féidir torthaí dearfacha a bheith ann maidir le feabhas a chur ar shláinte fostaithe agus deiseanna nua fostaíochta nó saorálaíochta a chur ar fáil mar thoradh ar ghníomhaíochtaí a bhaineann le cosc, ardú feasachta agus folláine agus ar chur chun cinn cultúr sláinte agus sábháilteachta ag an obair;

T.

de bhrí go bhfuil ról tábhachtach ag cigireachtaí saothair i gcur chun feidhme beartas sláinte agus sábháilteachta ag an obair ar an leibhéal réigiúnach agus áitiúil; de bhrí go moltar le moladh EIS go mbeadh cigire saothair amháin ann in aghaidh gach 10 000 oibrí chun cigireachtaí éifeachtacha agus tráthúla a dhéanamh atá ceaptha chun deireadh a chur le gach cineál mí-úsáide; de bhrí, de réir taighde EU-OSHA, go ndearbhaíonn 88 % d’fhostóirí gurb é comhlíonadh na reachtaíochta an phríomhchúis a ndéanann siad sláinte agus sábháilteacht ag an obair a bhainistiú (39);

U.

de bhrí gur chuir paindéim COVID-19 éilimh urghnácha ar oibrithe cúraim sláinte; de bhrí gur bhain tionchar diúltach síceolaíoch le timpeallacht oibre éilitheach agus le heagla maidir le sábháilteacht phearsanta agus teaghlaigh; de bhrí go bhfuil leibhéil níos airde struis, imní agus dúlagair ann i measc gairmithe cúraim sláinte i gcomparáid le gairmithe in earnálacha eile (40); de bhrí nach mór don Aontas Eorpach foghlaim ó ghéarchéim COVID-19 agus córas éifeachtach a chur ar bun chun comhordú a dhéanamh ar an bhfreagairt d’aon chineál bagartha don tsláinte phoiblí amach anseo, lena n-áirítear cosc, ullmhacht agus pleanáil freagartha ag an obair;

V.

de bhrí gur chaith paindéim COVID-19 solas ar éagothromaíochtaí inscne agus gur chuir sí leo; de bhrí gur mná iad formhór na n-oibrithe bunriachtanacha túslíne sna hearnálacha sláinte, sóisialta, oideachais agus cúraim; de bhrí, le linn an bhuaic den phaindéim, go raibh uaireanta fada oibre roimh na n-oibrithe mná sin agus gur thuairiscigh siad go raibh deacrachtaí acu an saol oibre agus príobháideach a thabhairt le chéile; de bhrí, cé go meastar iad a bheith bunriachtanach, go bhfuil na gairmeacha sin fós ar chuid de na poist is lú luach agus is lú pá in AE; de bhrí go bhfuil mná, go háirithe, tar éis a bheith i mbaol mór ghéarchéim COVID-19 agus gur measa an tionchar a bhí ag an ngéarchéim orthu mar gheall ar an titim eacnamaíoch agus shóisialta a d’eascair aisti (41);

W.

de bhrí go bhfuil sé tábhachtach gné na hinscne a chur i bhfeidhm maidir le sláinte agus sábháilteacht ag an obair mar gur féidir go nochtfaí oibrithe níos mó do chineálacha éagsúla substaintí nó rioscaí nó go mbeidís níos leochailí ina leith ag brath ar a n-inscne; de bhrí gur cheart dul i ngleic le gnéithe inscne i gcomhthéacs an chirt chun dícheangail;

X.

de bhrí go bhfuil tábhacht ar leith ag baint le dul i ngleic le nochtadh do shubstaintí guaiseacha agus le fachtóirí eile riosca san áit oibre maidir le haghaidh a thabhairt ar neamhionannais sláinte, toisc gur féidir le catagóirí áirithe oibrithe atá i measc na ndaoine is leochailí a bheith thíos le nochtadh méadaithe d’fhactóirí riosca den sórt sin; de bhrí go bhfuil daoine faoi mhíchumas, daoine óga agus daoine scothaosta an-leochaileach i gcomhthéacs ghéarchéim COVID-19; de bhrí gur dócha go mbeidh siad ag fulaingt go díréireach agus go mbeidh riachtanais tacaíochta ar leith acu nach mór a chur san áireamh i straitéis maidir le sláinte agus sábháilteacht ag an obair agus freagairt á tabhairt ar an bpaindéim; de bhrí gur féidir le daoine atá faoi mhíchumas nó a bhfuil galair ainsealacha orthu, nó iad siúd atá ag téarnamh ó ghortú nó ó bhreoiteacht, tacaíocht aonair agus oiriúnú na háite oibre a iarraidh más mian leo páirt a ghlacadh sa mhargadh saothair; de bhrí go léiríonn taighde go bhfuil baol mór ann go bhforbródh na grúpaí sin fadhbanna meabhairshláinte; de bhrí gur féidir a bheith mar thoradh ar easpa soláthair do choigeartuithe san ionad oibre agus do chóiríocht réasúnta, lena n-áirítear nósanna imeachta aslonnaithe éigeandála, go háirithe d’oibrithe faoi mhíchumas, go mbeadh strus fisiceach, meabhrach agus síceolaíochta ann a d’fhéadfadh sláinte agus sábháilteacht na n-oibrithe sin a chur i mbaol, go háirithe nuair nár baineadh amach rochtain iomlán ar uirlisí digiteacha a bhaineann leis an obair do dhaoine faoi mhíchumas go fóill;

Y.

de bhrí go luaitear i gCoinbhinsiún na Náisiún Aontaithe ar Chearta Daoine atá faoi Mhíchumas, a tháinig i bhfeidhm in AE in 2011, go “nglacfaidh Stáit is Páirtithe bearta éifeachtacha agus iomchuí, lena n-áirítear trí thacaíocht piaraí, chun a chur ar chumas daoine faoi mhíchumas an neamhspleáchas is mó is féidir, cumas iomlán fisiceach, meabhrach, sóisialta agus gairme, agus cuimsiú agus rannpháirtíocht iomlán i ngach gné den saol a bhaint amach agus a chothabháil”, agus “go n-aithnítear an ceart atá ag daoine atá faoi mhíchumas obair a dhéanamh ar bhonn comhionann le daoine eile, lena n-áirítear an ceart chun an deis a fháil slí bheatha a shaothrú trí obair a roghnaítear go hoscailte nó a nglactar go hoscailte léi i margadh saothair agus i dtimpeallacht oibre atá oscailte, cuimsitheach agus inrochtana do dhaoine atá faoi mhíchumas”;

Z.

de bhrí go bhfuil saoránaigh AE, de réir Eurofound (42), neamhchothrom ina gcumas filleadh ar an obair le linn nó tar éis gortú nó tinnis; de bhrí nár thuairiscigh ach duine amháin as triúr oibrithe in AE a bhfuil a gcuid gníomhaíochtaí laethúla teoranta go mór nó beagán teoranta ag galar ainsealach gur cuireadh a n-áit oibre in oiriúint chun freastal ar a gcuid fadhbanna sláinte; de bhrí gur thug Eurofound le fios freisin go bhfuil níos mó seans ann go mbeidh galar ainsealach agus srianta taithí ina ngníomhaíochtaí laethúla ar oibrithe a bhfuil leibhéal íseal oideachais bainte amach acu agus acu siúd atá i ngairmeacha ar bheagán oiliúna ach gur lú an seans freisin go mbainfidh siad tairbhe as cóiríocht san áit oibre;

AA.

de bhrí go bhfuil méadú suntasach tagtha le blianta beaga anuas ar an eolas eolaíoch maidir leis an nochtadh do ghuaiseacha éagsúla; de bhrí gur cheart liosta AE de ghalair cheirde a thabhairt cothrom le dáta dá bhrí sin; de bhrí go moltar i Moladh 2003/670/CE ón gCoimisiún an 19 Meán Fómhair 2003 maidir leis an Sceideal Eorpach um Ghalair Cheirde (43) go ndéanfadh na Ballstáit, a luaithe is féidir, rialacháin nó forálacha riaracháin maidir le galair cheirde le haghaidh cúitimh a thabhairt isteach ina ndlíthe náisiúnta; de bhrí gur cheart do na Ballstáit a ráthú ina ndlíthe náisiúnta go bhfuil an ceart ag gach oibrí cúiteamh a fháil i leith galar ceirde má tá tinneas air nó uirthi ar féidir a chruthú gur de bhunús agus de chineál ceirde atá sé. de bhrí go bhféadfadh idirdhealú i leith roinnt oibrithe in AE, a bhfuil leibhéil níos airde nó níos ísle ina dtíortha maidir le haitheantas do ghalair cheirde, a bheith mar thoradh ar an easpa comhchuibhithe atá ann faoi láthair maidir le haitheantas a thabhairt do ghalair cheirde;

AB.

de bhrí go bhféadfadh ardchaighdeáin sláinte agus sábháilteachta ceirde, cothromaíocht oibre is saoil, timpeallacht oibre atá oiriúnach ó thaobh aoise de, níos lú éilimh chainníochtúla agus neamhspleáchas ama oibre daoine scothaosta a chumasú agus a spreagadh chun fanacht go deonach i margadh an tsaothair; de bhrí gur gá aird shonrach a thabhairt ar riachtanais oibrithe atá i bpoist atá an-deacair go fisiciúil nó go síceolaíoch;

AC.

de bhrí gur san áit oibre agus le linn tiomána a bhaineann leis an obair a tharlaíonn tuairteanna bóthair mótarfheithiclí a bhaineann leis an obair, agus go mbaineann siad le feithicil chuideachta den chuid is mó; de bhrí go ndéantar tionóiscí agus básanna ar na bóithre a bhaineann leis an obair a thuairisciú ar bhealach difriúil i measc na mBallstát, rud a fhágann gur deacair staidreamh maidir le tuairteanna a bhaineann leis an obair a chur i gcomparáid lena chéile; de bhrí go meastar go gcuimsíonn tuairteanna a bhaineann leis an obair idir aon cheathrú agus aon trian de na básanna a bhaineann leis an obair; de bhrí nach ann do shainmhíniú caighdeánaithe AE ar bhás ar na bóithre a bhaineann leis an obair; de bhrí go bhfuil roinnt spriocanna uile-Eorpacha ann chun básmhaireacht ó thuairteanna bóthair a laghdú, ach nach mbaineann aon cheann acu go díreach le tionóiscí bóthair a bhaineann leis an obair;

AD.

de bhrí go bhfuil rioscaí traidisiúnta don tsláinte, amhail ualaí troma a láimhseáil de láimh, torann, iompar coirp míchompordach ag an obair agus gluaiseachtaí láimhe agus géige atriallacha, fós ina mbagairt do go leor oibrithe agus gur tugadh chun suntais gur amhlaidh atá sa chúigiú suirbhé ar dhálaí oibre de chuid Eurofound (44); de bhrí go n-áirítear creathadh, meáchan trom a chrochadh, obair le trealamh scáileán taispeána, innealra a úsáid agus trealamh trom i measc na bhfactóirí riosca maidir le galair réamatacha agus mhatánchnámharlaigh (RMDanna) san áit oibre; de bhrí gurb iad RMDanna is cúis leis an gcaillteanas táirgiúlachta is airde as measc na bhfadhbanna ceirde uile (45);

AE.

de bhrí gurb é galar cardashoithíoch agus riospráide a bhaineann leis an obair an dara rud is mó a chuireann le básanna a bhaineann leis an obair; de bhrí go bhfuil baint dhíreach ag éilimh arda shíceolaíocha, brú post, uaireanta fada oibre, neamhoird mheabhracha, neamhshláine post agus neamhghníomhaíocht choirp leo (46);

AF.

de bhrí nach mór sláinte agus sábháilteacht ag an obair a mheas mar dhualgas eiticiúil agus sóisialta chomh maith le dianriachtanas reachtúil a bheidh le comhlíonadh ag fiontraithe;

1.

2.

3.

4.

5.

6.

7.

8.

9.

10.

11.

12.

13.

14.

15.

16.

17.

18.

19.

20.

21.

22.

23.

24.

25.

26.

27.

28.

29.

30.

31.

32.

33.

34.

35.

36.

37.

38.