Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62022TN0354

Cás T-354/22: Caingean arna tabhairt an 9 Meitheamh 2022 – Bindl v an Coimisiún

IO C 294, 1.8.2022, p. 39–41 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

1.8.2022   

GA

Iris Oifigiúil an Aontais Eorpaigh

C 294/39

Caingean arna tabhairt an 9 Meitheamh 2022 – Bindl v an Coimisiún

(Cás T-354/22)

(2022/C 294/56)

Teanga an cháis: an Ghearmáinis

Páirtithe

Iarratasóir: Thomas Bindl (München, an Ghearmáin) (ionadaí: T. Herbrich, Dlíodóir)

Cosantóir: an Coimisiún Eorpach

An t-ordú atá á lorg

Iarrann an t-iarratasóir ar an gCúirt Ghinearálta:

—

a dhearbhú go bhfuil an tarchur de shonraí pearsanta an iarratasóra a thionscain an cosantóir, de shárú ar Chaibidil V de Rialachán (AE) 2018/1725, chuig faighteoirí atá bunaithe i dtríú Stáit nach bhfuil leibhéal cosanta leormhaith ann, tráth a bhreathnaigh sé ar an suíomh Gréasáin “https://futureu.europa.eu” an 20 Márta 2022 agus an 8 Meitheamh 2022, agus le linn dó clárú don ócáid “GoGreen” an 30 Márta 2022, neamhbhailí;

—

a dhearbhú gur mhainnigh an cosantóir, go neamhdhleathach, freagairt ar iarraidh an iarratasóra an 1 Aibreán 2022 ar rochtain maidir lena shonraí pearsanta a bheith á bpróiseáil ag an gcosantóir agus i dtaca leis na bearta cosanta leordhóthanacha de bhun Airteagal 48 de Rialachán (AE) 2018/1725 i ndáil le tarchur na sonraí chuig faighteoirí atá bunaithe i dtríú Stáit;

—

a ordú don chosantóir damáiste ar luach EUR 1 200,00a chúiteamh, móide ús ar dhá phointe céatadáin os cionn an ráta úis arna shocrú ag an mBanc Ceannais Eorpach dá phríomhoibríochtaí athmhaoiniúcháin, ó lá fhógartha an bhreithiúnais, a bhain don iarratasóir mar gheall ar chur i bhfeidhm mícheart Rialachán (AE) 2018/1725;

—

a ordu don chosantóir costais na n-imeachtaí a íoc.

Saincheisteanna dlí agus príomhargóintí

Mar thaca leis an gcaingean, maíonn an t-iarratasóir cúig shaincheist dlí.

1.

An chéad saincheist dlí: cur i bhfeidhm mícheart na chéad abairte d’Airteagal 46 agus Airteagal 48(1) agus (2)(b) de Rialachán (AE) 2018/1725 (1)

—

Rinne an cosantóir sonraí pearsanta an iarratasóra a tharchur chuig faighteoirí atá bunaithe i Stáit Aontaithe Mheiriceá le linn dó a bheith ag breathnú ar an suíomh Gréasáin “https://futureu.europa.eu”. Is tríú Stát é Stáit Aontaithe Mheiriceá nach bhfuil cinneadh leordhóthanachta glactha ag an gCoimisiún ina leith.

—

In éagmais bearta cosanta breise teicniúla agus eagraíochtúla, ní ráthaíocht chuí go dtabharfar cosaint leordhóthanach i Stáit Aontaithe Mheiriceá é sonraí pearsanta an iarratasóra a tharchur chuig faighteoirí atá bunaithe i Stáit Aontaithe Mheiriceá ar bhonn clásail chonarthacha ghinearálta i gcomhréir le hAirteagal 48(2)(b) de Rialachán (AE) 2018/1725.

2.

An dara saincheist dlí: sárú ar chearta bunúsacha an iarratasóra de bhun Airteagail 7 agus 8 den Chairt um Chearta Bunúsacha (an Chairt)

—

Níl na srianta ar chearta bunúsacha an iarratasóra de bhun Airteagail 7 agus 8 den Chairt atá ann de bharr gur féidir le húdaráis na Stát Aontaithe, de bhun dhlí na Stát Aontaithe, na sonraí a tarchuireadh ón Aontas Eorpach chuig Stáit Aontaithe Mheiriceá a rochtain agus a úsáid, rialaithe ar bhealach atá ag teacht le riachtanais a bheadh coibhéiseach leis na riachtanais faoi dhlí an Aontais de réir an dara habairt d’Airteagal 52(1) den Chairt.

—

Ní thugtar le 50 U.S. Code § 1881a (Section 7022 FISA) ná le Executive Order 12333 na féidearthachtaí ná na cearta do shaoránaigh an Aontais chun iad féin a chosaint i gcoinne rochtain ar a sonraí pearsanta ná na cearta a eascraíonn ó Rialachán (AE) 2018/1725 a fheidhmiú go héifeachtach.

—

Is coinníoll é an ceart rochtana atá ag an iarratasóir de bhun Airteagal 17(1) agus (2) de Rialachán (AE) 2018/1725 chun cearta bunúsacha an iarratasóra de bhun Airteagail 7 agus 8(1) den Chairt a fheidhmiú. De bharr gur mhainnigh ar an gcosantóir ó thaobh na hiarrata ar rochtain, baineann sé an fhéidearthacht den iarratasóir a chearta bunúsacha cosanta a fheidhmiú. Níl údar cuí leis an sárú ar na cearta bunúsacha de bhun Airteagail 7 agus 8(1) den Chairt a bhaineann le mainneachtain an chosantóra.

3.

An tríú saincheist dlí: sárú ar chearta bunúsacha an iarratasóra de bhun Airteagal 47 den Chairt

—

Ní fhoráiltear le dlí Stát Aontaithe Mheiriceá d’aon fhéidearthacht le haghaidh cosaint bhreithiúnach i gcoinne údaráis slándála agus sheirbhísí faisnéise na Stát Aontaithe teacht ar shonraí pearsanta shaoránaigh an Aontais.

—

Maidir le cláir faireacháin údaráis slándála agus sheirbhísí faisnéise na Stát Aontaithe – mar shampla, PRISM agus UPSTREAM – atá bunaithe ar 50 U.S. Code § 1881a (Section 702 FISA) agus ar Executive Order 12333 araon, ní thugtar do na hábhair sonraí le Presidential Policy Directive 28 ná Executive Order 12333 cearta a d’fhéadfadh siad a fheidhmiú os comhair na gcúirteanna i dtaca le húdaráis na Stát Aontaithe.

4.

An ceathrú saincheist dlí: cur i bhfeidhm mícheart Airteagal 17(1) agus (2) de Rialachán (AE) 2018/1725 agus Airteagal 14(3) agus (4) de Rialachán (AE) 2018/1725

—

Mhainnigh an cosantóir go neamhdhleathach a chur ar fáil don iarratasóir, i ndiaidh a iarrata ar rochtain an 1 Aibreán 2022, an fhaisnéis dá dtagraítear in Airteagal 17(1) agus (2) de Rialachán (AE) 2018/1725, go háirithe na bearta cosanta de bhun Airteagal 48 de Rialachán (AE) 2018/1725, laistigh de theorainn ama míosa de bhun na chéad abairte d’Airteagal 14(3) de Rialachán 2018/1725.

—

Mhainnigh an cosantóir go neamhdhleathach, de bhun an dara habairt d’Airteagal 14(3) de Rialachán (AE) 2018/1725, na cúiseanna a chur in iúl maidir le haon fhadú ar an tréimhse chun an fhaisnéis a chur in iúl don iarratasóir, nó, de bhun Airteagal 14(3) agus (4) de Rialachán (AE) 2018/1725, na cúiseanna maidir le diúltú don iarraidh ar rochtain agus na leigheasanna dlí breithiúnacha agus seachbhreithiúnacha a chur in iúl dó laistigh d’aon mhí tar éis an iarraidh ar rochtain a thaisceadh.

5.

An cúigiú saincheist dlí: damáiste neamhábhartha a dhéanamh

De bharr gur diúltaíodh d’iarraidh an iarratasóra ar rochtain agus gur tarchuireadh a shonraí pearsanta ar bhealach neamhrialaithe chuig faighteoirí atá bunaithe i Stáit Aontaithe Mheiriceá agus i ngeall ar an gcontúirt lena mbaineann i dtaca le faireachán neamhdhleathach ar mhalartuithe ar an idirlíon, bhain damáiste neamhábhartha EUR 1 200 don iarratasóir.

(1)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO 2018 L 295, lch. 39)

Top