Foilsiú an doiciméid aonair leasaithe tar éis faomhadh mionleasaithe de bhun Airteagal 53(2), an dara fomhír, de Rialachán (AE) Uimh. 1151/2012

(2022/C 89/06)

D’fhaomh an Coimisiún Eorpach an mionleasú sin i gcomhréir le hAirteagal 6(2), an tríú fomhír, de Rialachán Tarmligthe (AE) Uimh. 664/2014 (1)

Is féidir teacht ar an iarratas maidir leis an mionleasú sin sa bhunachar sonraí Ambrosia, bunachar de chuid an Choimisiúin

DOICIMÉAD AONAIR

‘MARRONE DI COMBAI’

Uimh. AE: PGI-IT-0565-AM01 – 6.7.2021

STFC ( ) TGFC (X)

1.   Ainm

‘Marrone di Combai’

2.   Ballstát nó tríú tír

An Iodáil

3.   Tuairisc ar an táirge talmhaíochta nó ar an mbia-earra

3.1.   Cineál táirge

Aicme 1.6 – Torthaí, glasraí agus gránaigh, iad úr nó próiseáilte

3.2.   Tuairisc ar an táirge lena mbaineann an t-ainm in (1)

Éicitíopa castáin is ea ‘Marrone di Combai’ a d’fhorbair i dtimpeallacht thipiciúil bhunchnoic Treviso na nAlp.

Is iad seo a leanas saintréithe moirfeolaíocha agus tráchtála na gcastán tráth a chuirtear ar an margadh iad lena dtomhailt:

Cruth éileapsóideach orthu, agus na cinn arna leacú. Imchruth rialta, dlúthchlúmhach ar an híleam mar aon le patrún réaltach an-sofheicthe. Dathanna ó dhonnfhionn go ciardhonn ar an bpeireacarp, ach gan é riamh murtallach. Stríoca follasacha ar an bpeireacarp féin agus é sa chaoi gur furasta é a scileadh den eipispeirm. An eipispeirm, rud a bhíonn donnfhionn, cumhdaíonn sí an chuid inite, agus í sáite go héadomhain sa chuid inite i gcorráit, rud a fhágann gur furasta í a scaradh ón mbia le linn an scafa. Toirt aonair a bhíonn san eithne agus bíonn eitrí ar a dromchla – agus ní bhíonn i ngach cnó de ghnáth ach aon eithne amháin, agus is annamh a bhíonn sí seipteamach. Uigeacht phlúrach sa bhia, agus dath scothbhán air. Nuair a chócaráiltear é, éiríonn sé briosc agus blasta.

Nuair a chuirtear ar an margadh iad, ní mór na cnónna a bheith i riocht barrmhaith i dtaca leis an bhfíteashláintíocht de agus ní mór iad a bheith ag comhlíonadh na gceanglas seo a leanas:

An aicme ‘Extra’:

—	cnónna móra;

—	50-80 cnó in aghaidh an chileagraim;

—	gan níos mó ná 4 % díobh, de réir meáchain, a bheith ina gcnónna a ndearna feithidí damáiste dá n-ioncharp;

—	gan níos mó ná 3 % díobh, de réir meáchain, a bheith ina gcnónna a ndearnadh damáiste dá bpeireacarp.

Aicme I:

—	81-105 cnó in aghaidh an chileagraim;

—	gan níos mó ná 6 % díobh, de réir meáchain, a bheith ina gcnónna a ndearna feithidí damáiste dá n-ioncharp;

—	gan níos mó ná 5 % díobh, de réir meáchain, a bheith ina gcnónna a ndearnadh damáiste dá bpeireacarp.

Ceanglais maidir leis an táirge más le haghaidh próiseála agus lena aghaidh sin amháin atá sé beartaithe é a úsáid:

—	106-130 cnó in aghaidh an chileagraim;

—	gan níos mó ná 6 % díobh, de réir meáchain, a bheith ina gcnónna a ndearna feithidí damáiste dá n-ioncharp;

—	gan níos mó ná 5 % díobh, de réir meáchain, a bheith ina gcnónna a ndearnadh damáiste dá bpeireacarp.

3.3.   Beatha (maidir le táirgí de thionscnamh ainmhíoch amháin) agus amhábhair (maidir le táirgí próiseáilte amháin)

—

3.4.   Céimeanna sonracha sa táirgeadh nach mór a thabhairt sa limistéar geografach sainithe

Chun go bhféadfar ráthaíocht a thabhairt maidir le tionscnamh agus rialú an táirge, ní mór na céimeanna táirgthe a thabhairt sa limistéar táirgthe dá dtagraítear faoi phointe 4

3.5.   Sainrialacha maidir le slisniú, grátáil, agus pacáistiú, etc. an táirge dá dtagraíonn an t-ainm cláraithe

An próiseas maothaithe curatura a gcuirtear an táirge tríd, is féidir é a dhéanamh lasmuigh den limistéar geografach a dtugtar tuairisc air faoi phointe 4, ach ní mór é a dhéanamh laistigh de 24 uair an chloig ó am bainte na gcnónna ionas nach ndéanfar difear do cháilíocht an táirge.

Mura ndéantar sin, ní mór an táirge a choimeád go ceann 3 lá ar a mhéad, ag teocht idir 0.5 °C agus 2 °C agus ag leibhéal bogthaise idir 95 % agus 98 %, agus an próiseas curatura a dhéanamh dá éis sin.

Is éard atá in curatura próiseas ina gcuirtear na castáin ar maos in uisce ag teocht an tseomra ar feadh tréimhse idir 5 agus 7 lá, agus ina n-athraítear an t-uisce leath bealaigh tríd an bpróiseas. De rogha eile air sin, is féidir na castáin a chur ar maos in uisce ag teocht idir 45 °C agus 48 °C go ceann 45 nóiméad, agus sa chás sin ní mór iad a chur láithreach faoi uisce fuar nó go bhfuaraí siad go hiomlán. Dá éis sin, triomaítear na castáin le meaisín triomaithe aeir the agus le gaothráin. De rogha eile air sin, leagtar amach iad ar laitís adhmaid agus suaitear iad gach lá nó go dtriomaíonn siad go hiomlán.

Is sna cineálacha seo a leanas pacáistithe a chuirtear an táirge uile ar fáil lena thomhailt: málaí siúite, ó 1 kg go 25 kg; málaí eangaí plaisteacha, ó 1 kg go 25 kg; agus bascaeid nó boscaí gráid bia déanta as adhmad nó as plaisteach, ó 1 kg go 25 kg.

Cnónna ar le haghaidh próiseála iad go heisiach, is i gcliathbhoscaí táirge gráid bia (uasmhéid 400 kg) a phacáistítear iad.

Ní mór inneachar gach pacáiste a bheith aonfhoirmeach.

Ceanglaítear na pacáistí le fáiscín miotail agus le fáiscire meicniúil, nó trína bhfuáil le snáithe níolóin agus le meaisín fuála, nó dúntar iad trína gceangal faoi shreangán ar a gcuirtear séala luaidhe. Déantar an séalú ar chaoi go ngreamaítear an lipéad gona lógó ar an bpacáiste. Déantar na bascaeid, na boscaí agus na cliathbhoscaí a chlúdach trí cheallafán nó eangach a chuachadh thart orthu agus déantar an clúdach sin a fheistiú le sreangán ar a gcuirtear séala luaidhe agus lógó breá feiceálach.

3.6.   Sainrialacha maidir le lipéadú an táirge dá dtagraíonn an t-ainm cláraithe

Fíoróidh an comhlacht rialaithe go bhfuil, mar shainaitheantas ar an táirge, lipéad ar a bhfuil lógó leis na focail ‘Marrone di Combai’, agus na focail sin i bhfad níos mó ná aon fhoclaíocht eile. Féadfar an fhaisnéis seo a leanas a chur ar an lipéad nó ar na coimeádáin: ainm agus branda an táirgeora nó an ghnólachta pacáistíochta; an glanmheáchan san áit tionscnaimh agus an chatagóir; faisnéis maidir le cothaitheacht agus réim bhia; bliain an táirgthe; treoracha maidir le stóráil cheart agus úsáid cheart an táirge. Is éard atá sa lógó ná léiriú stílithe ina bhfuil castán faoi thimpeallú stílithe de chrotal castáin donnfhionn, agus é sin frámaithe i gcearnóg chiardhonn (donnfhionn – Pantone 465U, ciardhonn – Pantone 4625U). Féadfaidh an lógó an toise seo a leanas a bheith ann: 65 mm x 102 mm; 33 mm x 51 mm; 17 mm x 25 mm; 8 mm x 12 mm.

4.   Sainmhíniú achomair ar an limistéar geografach

Cuimsíonn limistéar táirgthe geografach ‘Marrone di Combai’ críocha na mbardas seo a leanas i gcúige Treviso: Cison di Valmarino, Cordignano, Follina, Fregona, Miane, Revine Lago, Sarmede, Segusino, Tarzo, Valdobbiadene agus Vittorio Veneto.

5.   Nasc leis an limistéar geografach

Is ar bhunchnoic na nAlp atá an limistéar a dtugtar tuairisc air i bpointe 4.

An chríoch ina dtáirgtear ‘Marrone di Combai’ – críoch atá sléibhtiúil, den chuid is mó (bunchnoc Alpach) – is é mar a foirmíodh í, ó thaobh na geolaíochta de, as coimpléasc de charraigeacha cailcreacha/breochloiche le moirfeolaíocht an charst agus as coimpléasc de chnoic arb é is saintréith dóibh altáin dhoimhne, fánaí géara agus an iliomad próiseas díghrádaithe ithreach de thoradh an ithir a bheith os cionn carraigeacha crua, frithsheasmhacha. Is mór an tábhacht atá leis an gcineál sin oragrafaíochta ó thaobh na haeráide de: de thoradh dháileadh geografach an tslabhra de bhunchnoic Alpacha agus na ‘líne cnoc’, tá siad ina mbacainn roimh an ngaoth anoir, ach tugann siad bealach glan isteach d’fheachtaí aduaidh, agus dá réir sin is ísle an raon teochta ansin ná ar na machairí. An fhrasaíocht mhór, frasaíocht ar de réir patrún báistí cónochta a thagann sí, sin agus an dearbhdhíth ceo, rud a bhíonn i ngach ceantar eile i nGleann na Pó agus an Veneto, cuidíonn an méid sin na saintréithe atá aici a thabhairt don timpeallacht, agus is dá bharr atá sí chomh hoiriúnach sin do tháirgeadh TGFC ‘Marrone di Combai’.

Taispeánadh trí anailísí céadfacha inar úsáideadh tástálacha painéil go bhfuil comhchoibhneas deimhneach idir saintréithe an bhia, a bhoige go háirithe, agus an sult a bhaintear as ithe na gcastán. Chomh maith leis na fachtóirí a imríonn tionchar ar an mbraistint thadhlach, tá dea-bholadh speisialta astu a mbaintear an-sásamh as de bharr shainiúlacht na mothuithe tréana a spreagann sé nuair a itear an táirge, mothuithe a thagann de cháilíochtaí spíosracha, bláthacha, luibheacha na gcastán. Na luachanna cainníochtúla arna sloinneadh le tuairisceoirí a sainíodh go sonrach le haghaidh na hanailíse céadfaí, taispeánann siad leibhéil arda déine maidir le dea-bholadh, marthanacht an dea-bholaidh, milseacht agus, de chodarsnacht leis sin, leibhéil an-ísle de na hairíonna atá i gcomhchoibhneas diúltach leis an sult iomlán a bhaintear as an gcnó, a bhaineann le cnapthacht agus le seirbhe. Sainiúlacht an dea-bholaidh atá as ‘Marrone di Combai’, baineann sí le saintréithe na hithreach sa limistéar ina saothraítear iad agus is léiriú í ar an dlúthghaol atá idir an planda, an ithir agus timpeallacht an tsaothraithe.

An t-iarratas ar chlárú TGFC ‘Marrone di Combai’, tá sé bunaithe ar shaintréithe sainiúla an táirge agus, freisin, rud is fíorthábhachtach, ar cháil agus ar theist an táirge.

Tá deimhniú le fáil in an-chuid tagairtí stairiúla, cuid acu chomh fada siar leis an 12ú haois, gurbh ann do chastáin i limistéar ‘Marrone di Combai’ agus gur bhain saintréithe cáilíochta ar leith leo. Léiríonn siad sin, i dtaca le tréithriú an táirge, go bhfuil tábhacht le fachtóirí comhshaoil agus daonna araon, ó tá ról bunúsach riamh anall ag an gcastán i gcothú áitreabhaigh na gcnoc sin. Go deimhin, i gceann de na tagairtí stairiúla, ceann dar dáta 18 Meán Fómhair 1665, cuirtear i dtábhacht na fachtóirí sóisialta agus rannpháirtíochta a bhaineann le fómhar na gcastán: bhí an pobal uile, lena n-áirítear na mná agus na páistí, bhí siad páirteach sa ghníomhaíocht sin, agus rinneadh í a rialú trí scaireanna a shannadh de réir chomhdhéanamh an teaghlaigh.

Níos faide anall sa stair, scaip clú agus cáil ‘Marrone di Combai’ ón Veneto a fhad le tomhaltóirí i ngach cearn den Iodáil, a bhuí cuid mhaith le féilte agus aontaí tuaithe amhail ‘Festa dei Marroni di Combai’, féile a bhfuil an-tábhacht léi, go háitiúil agus go náisiúnta, ó 1945 i leith.

Tá dlúthnasc idir nádúr sainiúil an táirge agus an timpeallacht gheografach ina dtáirgtear é. De bharr shaintréithe geolaíocha an limistéir táirgthe, agus go háirithe de bharr na gcarraigeacha cailcreacha/breochloiche atá ann agus moirfeolaíocht charst na gcarraigeacha sin, maille le fánaí géara na gcríoch sléibhtiúil, tá silstean an-mhaith sa talamh saothraithe agus dá réir sin ní chruinníonn aon uisce marbh ann. Tugann sin cuid mhaith boige agus milseachta don bhia, maille le déine dea-bholaidh, marthanacht dea-bholaidh agus easpa cnapthachta agus seirbhe.

Thairis sin, bacainn sin na gcnoc in aghaidh na ngaoth anoir, sin agus na feachtaí aduaidh, fachtóirí a íslíonn an raon teochta i gcomparáid leis na machairí agus a fhágann nach mbíonn aon cheo ann, imríonn siad sin tionchar ar shláinte agus ar fhorbairt na bplandaí, rud a fhágann gur féidir táirge sláintiúil ardcháilíochta a fháil.

Tagairt d’fhoilsiú na sonraíochta táirge

(Airteagal 6(1), an dara fomhír, den Rialachán)

Sheol an Aireacht an nós imeachta agóide náisiúnta le foilsiú an leasaithe bheartaithe ar TGFC ‘Marrone di Combai’ in Iris Oifigiúil Phoblacht na hIodáile Uimh. 72 an 24 Márta 2021.

Tá fáil ar théacs iomlán na sonraíochta táirge ar an suíomh gréasáin seo a leanas:

http://www.politicheagricole.it/flex/cm/pages/ServeBLOB.php/L/IT/IDPagina/3335

Nó, tá fáil air freisin, de rogha air sin:

ar leathanach baile na hAireachta Talmhaíochta, Bia agus Beartais Foraoiseachta (www.politicheagricole.it) ach cliceáil ar ‘Qualità’ (ar an taobh deas ag barr an scáileáin), agus ansin ar ‘Prodotti DOP IGP STG’ (ar an taobh clé den scáileán) agus, ar deireadh, ar ‘Disciplinari di Produzione all’esame dell’UE’.

---

(1)  IO L 179, 19.6.2014, lch. 17.