Scátháin a iarfheistiú ar fheithiclí earraí troma

 

ACHOIMRE AR:

Treoir 2007/38/CE maidir le scátháin a iarfheistiú ar fheithiclí earraí troma atá cláraithe in AE

CAD IS AIDHM LEIS AN TREOIR?

Leagtar amach leis an treoir na rialacha maidir le scátháin cúl-amhairc a iarfheistiú ar fheithiclí tráchtála a dearadh chun earraí a bhfuil a meáchan níos mó ná 3.5 tonna a iompar agus a cláraíodh i ndiaidh an 1 Eanáir 2000.

Is éard atá i gceist leis sin go príomha feabhas a chur ar shábháilteacht d’úsáideoirí bóithre eile amhail coisithe, rothaithe agus gluaisrothaithe, a bhíonn neamhchosanta go háirithe ar dhainséir a thagann as an gcaochspota cliathánach atá ar leoraithe ar thaobh an phaisinéara.

PRÍOMHPHOINTÍ

Ón 6 Lúnasa 2007 agus tráth nach déanaí ná an 31 Márta 2009, ní mór na feithiclí earraí uile in AE a dearadh chun níos mó ná 3.5 tona a iompar (catagóir N₂ agus N₃) a iarfheistiú ar thaobh an phaisinéara le scátháin aicmiú IV (leathanuilleach) agus aicme V (dlúthghaireacht).

Beart sealadach is ea an treoir a bhaineann le feithiclí a cláraíodh i ndiaidh an 1 Eanáir 2000 agus atá dírithe ar fheabhas a chur ar an raon radhairc indírigh le haghaidh feithiclí nach bhfuil cumhdaithe faoi na rialacha nua d’fheithiclí i Rialachán (CE) Uimh. 661/2009.

Níl feidhm dhíreach leis an treoir, ach ceanglaítear léi ar rialtais náisiúnta reachtaíocht a rith lena ndéantar na scátháin éigeantach.

Eisceachtaí

• Meastar go bhfuil an reachtaíocht á comhlíonadh cheana ag feithiclí atá feistithe cheana ar thaobh an phaisinéara le scátháin lena gcumhdaítear 95 % ar a laghad de raon radhairc scáthán aicme IV, ar leibhéal na talún, agus 85 % ar a laghad ar raon radhairc scáthán aicme V.
• Féadfar feithiclí nach féidir, ar chúiseanna eacnamaíocha nó teicniúla, iad a fheistiú le scátháin a chomhlíonann na ceanglais sin a fheistiú le scátháin bhreise nó le feistí eile le haghaidh radharc indíreach, amhail ceamaraí, ar an gcoinníoll go gcomhlíonann na feistí sin na ceanglais le chéile.
• Ní chumhdaítear feithiclí atá deartha chun níos lú ná 7.5 tona a iompar agus i gcás nach féidir scáthán aicme V níos mó nach 2 m ón talamh a fheistiú, nuair atá an fheithicil faoi bhun an ualaigh uasta, agus i gcás nach mbeifí ábalta í a fheiceáil go hiomlán ón suíomh tiomána.
• Tá feithiclí atá cumhdaithe faoi bhearta náisiúnta lena mbaineann íoscheanglais chomhchosúla agus a tháinig i bhfeidhm roimh an dáta ar corpraíodh an reachtaíocht reatha sa dlí náisiúnta díolmhaithe.

Ní mór do thíortha AE liosta réiteach teicniúil a chur in iúl don Choimisiún Eorpach, agus cuireann an Coimisiún Eorpach an fhaisnéis ar fáil don phobal ansin. Tá an fhreagracht ar an gCoimisiún, trí na coistí ábhartha, a áirithiú go ndéanfar an trealamh a shuiteáil agus a thástáil chun comhlíonadh agus ródacmhainneacht a fhíorú.

CÉN UAIR ATÁ TOSACH FEIDHME NA TREORACH?

Tá feidhm léi ón 3 Lúnasa 2007. B’éigean dlí a dhéanamh di i dtíortha AE faoin 6 Lúnasa 2008.

CÚLRA

Le haghaidh breis faisnéise, féach:

• “Scátháin cúl-radhairc” (An Coimisiún Eorpach).

PRÍOMHDHOICIMÉAD

Treoir 2007/38/CE ó Pharlaimint na hEorpa agus ón gComhairle an 11 Iúil 2007 maidir le scátháin a iarfheistiú ar fheithiclí earraí troma atá cláraithe sa Chomhphobal (IO L 184, 14.7.2007, lgh. 25-28)

DOICIMÉID GHAOLMHARA

Treoir 2014/45/AE ó Pharlaimint na hEorpa agus ón gComhairle an 3 Aibreán 2014 maidir le tástálacha tréimhsiúla ródacmhainneachta a dhéanamh ar mhótarfheithiclí agus ar a leantóirí agus lena n–aisghairtear Treoir 2009/40/CE (IO L 127, 29.4.2014, lch. 51-128)

Rialachán (CE) Uimh. 661/2009 ó Pharlaimint na hEorpa agus ón gComhairle an 13 Iúil 2009 maidir leis na ceanglais i gcomhair cineálcheadaithe le haghaidh sábháilteacht ghinearálta mótarfheithiclí, a leantóirí agus a gcóras, a gcomhpháirteanna agus a n–aonad teicniúil ar leithligh atá beartaithe dóibh (OJ L 200, 31.7.2009, lgh. 1-24)

Rinneadh leasuithe comhleanúnacha ar Rialachán (CE) Uimh. 661/2009 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Nuashonraithe 19.02.2018