Deiseanna iascaireachta in uiscí AE agus in uiscí neamh–AE (2021)

 

ACHOIMRE AR:

Rialachán (AE) 2021/92 lena socraítear le haghaidh 2021 na deiseanna iascaireachta le haghaidh stoic éisc áirithe agus grúpaí stoc éisc áirithe, is infheidhme in uiscí an Aontais agus, do shoithí iascaireachta de chuid an Aontais, in uiscí áirithe nach uiscí de chuid an Aontais iad

CAD IS AIDHM LEIS AN RIALACHÁN?

• Socraítear leis le haghaidh 2021 na deiseanna iascaireachta le haghaidh stoic éisc áirithe agus grúpaí stoc éisc áirithe, is infheidhme in uiscí an Aontais Eorpaigh (AE) agus, do shoithí iascaireachta AE, in uiscí áirithe nach uiscí AE iad.
• Liostaítear ann na sainmhínithe agus na limistéir iascaireachta a bhfuil feidhm maidir leo chun críocha an rialacháin.

PRÍOMHPHOINTÍ

Áirítear iad seo a leanas ar na deiseanna iascaireachta a chumhdaítear sa rialachán:

• teorainneacha gabhálacha le haghaidh na bliana 2021 agus, i gcás go sonraítear sa rialachán é, le haghaidh na bliana 2022;
• teorainneacha iarrachta iascaireachta le haghaidh na bliana 2021, seachas na teorainneacha iarrachta iascaireachta atá leagtha amach in Iarscríbhinn II a ghabhann leis an rialachán, a bheidh i bhfeidhm ón 1 Feabhra 2021 go dtí an 31 Eanáir 2022;
• deiseanna iascaireachta le haghaidh na tréimhse ón 1 Nollaig 2020 go dtí an 30 Samhain 2021 le haghaidh stoic áirithe i limistéar coinbhinsiúin an Choimisiúin um Chaomhnú Beo–Acmhainní Muirí Antartacha.

Raon feidhme

Tá feidhm ag an rialachán maidir le:

• Soithí iascaireachta atá cláraithe in AE agus soithí nach soithí de chuid AE iad a bhíonn i mbun iascaireachta in uiscí AE;
• iascaigh áineasa*, i gcás go dtagraítear dóibh go sainráite sa rialachán; agus
• iascaigh thráchtála ón gcladach.

Le taobh na ndeiseanna iascaireachta a leagann AE síos go neamhspleách, clúdaítear sa rialachán freisin deiseanna iascaireachta a bhíonn mar thoradh ar chomhaontuithe iltaobhacha nó déthaobhacha iascaigh, is iad sin:

• stoic chomhroinnte atá le comhbhainistiú leis an Iorua sa Mhuir Thuaidh agus in Skagerrak, leis an Ríocht Aontaithe sa Mhuir Thuaidh agus in uiscí an iarthuaiscirt, nó cinn a bhaineann le comhairliúcháin Stáit Chósta an Choimisiúin um Iascach an Atlantaigh Thoir Thuaidh;
• deiseanna iascaireachta mar thoradh ar chomhaontuithe a dhéantar i gcomhthéacs Eagraíochtaí Réigiúnacha Bainistithe Iascaigh.

Deiseanna iascaireachta do shoithí AE in uiscí AE

Gabhálacha iomlána incheadaithe

I gcomhréir le hAirteagal 43 den Chonradh ar Fheidhmiú an Aontais Eorpaigh, tá an Chomhairle freagrach as gabhálacha iomlána incheadaithe (TACanna) a shocrú.

• Leagtar amach sna TACanna uasmhéid na n–iasc de speicis dhifriúla is féidir a ghabháil le linn na bliana.
• Leanann na teorainneacha atá leagtha síos an prionsabal a bhaineann le saothrú inbhuanaithe na stoc éagsúil i gcomhréir leis an uastáirgeacht inbhuanaithe*. Glacadh pleananna bainistíochta ilbhliantúla do réigiúin iascaigh AE lena n–áirítear spriocanna i gcomhair bainistíocht stoc éisc.
• Roinntear an TAC do gach speiceas ar leithligh ina chuótaí — cionta den TAC a shanntar do AE, do Bhallstáit AE nó do thíortha nach tíortha AE iad.

Gabhálacha iomlána incheadaithe sealadacha le haghaidh stoic éisc chomhroinnte

• Maidir leis na stoic iascaireachta sin a roinntear le tíortha áirithe nach tíortha AE iad, socraítear le Rialachán (AE) 2021/92 TACanna sealadacha, go dtí go gcuirfear comhairliúcháin leis an Iorua agus an Ríocht Aontaithe i gcrích.
• Chuir AE agus an Iorua comhairliúcháin dhéthaobhacha i gcrích maidir leis na stoic chomhroinnte sa Mhuir Thuaidh, in Skagerrak, agus malartuithe cuótaí i mí an Mhárta 2021. Chuir an Iorua agus AE comhaontú tríthaobhach i gcrích leis an Ríocht Aontaithe chomh maith ina gclúdaítear líon teoranta TACanna sa Mhuir Thuaidh, in Skagerrak agus in Iarthar na hAlban.
• Chun na comhaontuithe sin a chur san áireamh agus a áirithiú go leanfar le gníomhaíochtaí iascaireachta inbhuanaithe go dtí go mbeidh comhairliúcháin idir AE agus an Ríocht Aontaithe curtha i gcrích, déantar Rialachán (AE) 2021/92 a leasú le Rialachán (AE) 2021/703. I gcomhréir leis an gcomhaontú trádála agus comhair idir AE agus an Ríocht Aontaithe (Airteagal 499), síntear leis an rialachán leasaitheach sin TACanna sealadacha AE chun cinnteacht dhlíthiúil a chruthú d’oibreoirí AE go dtí go gcuirfear na comhairliúcháin sin i gcrích.

Oibleagáid maidir le gabhálacha a thabhairt i dtír

Ón 1 Eanáir 2019, ceanglaíodh ar chabhlaigh iascaireachta uile AE cloí leis an oibleagáid maidir le gabhálacha a thabhairt i dtír, rud a chuir deireadh leis an gcleachtas maidir le haischur iasc. Maidir leis an rialachán:

• leagtar síos ann nach mór gach gabháil de speicis tráchtála rialáilte a thugtar ar bord (lena n–áirítear foghabháil*) a thabhairt i dtír agus a chomhaireamh i gcoinne cuótaí faoi seach gach Ballstáit; agus
• tugtar isteach leis linn le haghaidh malartuithe cuótaí do na Ballstáit siúd nach bhfuil cuóta ar bith acu lena bhfoghabhálacha dosheachanta a chlúdach.

Bearta feabhais

Liostaítear sa rialachán na bearta atá nasctha go feidhmiúil le deiseanna iascaireachta agus atá le cur i bhfeidhm i limistéir éagsúla iascaireachta, agus tá bearta feabhais le glacadh lena áirithiú go gcuirfear an stoc ar ais go tapa go dtí leibhéil os cionn an leibhéil a bhféadfaí an toradh inbhuanaithe is mó a tháirgeadh aige.

Speicis thoirmiscthe

Liostaítear sa rialachán na limistéir iascaireachta ina dtoirmisctear soithí iascaireachta bheith ag iascaireacht speicis áirithe, speicis áirithe a choinneáil ar bord, a thrasloingiú* nó a thabhairt i dtír.

Údaruithe iascaireachta do shoithí AE in uiscí neamh–AE

• Tá an líon uasta údaruithe iascaireachta le haghaidh soithí iascaireachta atá cláraithe in AE in uiscí neamh–AE leagtha amach in Iarscríbhinn V, Cuid A, a ghabhann leis an rialachán.
• Féadfaidh na Ballstáit cuótaí a aistriú eatarthu féin, ach ní mór aistriú iomchuí údaruithe iascaireachta a bheith le haistriú ar bith agus fógra a thabhairt don Choimisiún ina leith.

Deiseanna iascaireachta le haghaidh shoithí AE in uiscí arna mbainistiú ag eagraíochtaí réigiúnacha bainistíochta iascaigh

Déantar an chuid sin de Rialachán (AE) 2021/92 a mhiondealú de réir na limistéar iascaireachta réigiúnach a chlúdaítear ina gcoinbhinsiúin faoi seach.

Maidir le gach limistéar, leagtar síos sa rialachán:

• teorainneacha ar bith ar chumas iascaireachta soithí a d’fhéadfadh a bheith ann;
• an cineál gníomhaíochtaí iascaireachta is féidir a dhéanamh;
• na cineálacha líonta is féidir a úsáid agus na cineálacha baoithe a theastaíonn;
• toirmisc ar bheith ag iascaireacht speicis faoi leith.

Deiseanna iascaireachta do shoithí tíre nach tír AE í in uiscí AE

• Féadfar soithí faoi bhratach na hIorua nó soithí atá cláraithe in Oileáin Fharó agus soithí faoi bhratach na Ríochta Aontaithe atá cláraithe sa Ríocht Aontaithe agus atá ceadúnaithe ag údarás iascaigh sa Ríocht Aontaithe a údarú chun bheith ag iascaireacht in uiscí AE laistigh de na TACanna atá leagtha amach in Iarscríbhinn I a ghabhann leis an rialachán seo, agus tá siad faoi réir na gcoinníollacha dá bhforáiltear sa rialachán seo agus i Rialachán (AE) 2017/2403 maidir le bainistiú inbhuanaithe a dhéanamh ar chabhlaigh iascaireachta sheachtracha (féach an achoimre).
• Tá soithí faoi bhratach Veiniséala faoi réir na gcoinníollacha atá leagtha síos i Rialacháin (AE) 2021/92 agus (AE) 2017/2403.
• Liostaítear i Rialachán (AE) 2021/92 chomh maith speicis nach gceadaítear do shoithí nach bhfuil cláraithe in AE, aon uair a fhaightear iad in uiscí AE, iascaireacht a dhéanamh orthu, iad choinneáil ar bord, iad a thrasloingiú nó a thabhairt i dtír.

Iarscríbhinní

Tá naoi n–iarscríbhinn leis an rialachán.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 1 Eanáir 2021.

CÚLRA

Ní mór teorainn a chur le gabháil na stoc éisc le rialacháin AE maidir le deiseanna iascaireachta go dtí leibhéil nach mór a bheith ag teacht le cuspóirí foriomlána an chomhbheartais iascaigh. Le Rialachán (AE) Uimh. 1380/2013 maidir leis an gcomhbheartas iascaigh (féach an achoimre), leagtar amach na cuspóirí i gcomhair na dtograí bliantúla maidir le teorainneacha gabhála agus iarrachta iascaireachta lena áirithiú go mbeidh iascaigh AE inbhuanaithe ón taobh éiceolaíoch, eacnamaíoch agus sóisialta.

Le haghaidh tuilleadh faisnéise, féach:

• Glacann an Chomhairle Talmhaíochta agus Iascaigh deiseanna iascaireachta 2021 don Atlantach Thoir Thuaidh agus do stoic dhomhainfharraige — preasráiteas (An Coimisiún Eorpach)
• Iascaigh inbhuanaithe (An Coimisiún Eorpach).

PRÍOMHTHÉARMAÍ

PRÍOMHDHOICIMÉAD

Rialachán (AE) 2021/92 ón gComhairle an 28 Eanáir 2021 lena socraítear le haghaidh 2021 na deiseanna iascaireachta le haghaidh stoic éisc áirithe agus grúpaí stoc éisc, is infheidhme in uiscí an Aontais agus, i gcás soithí iascaireachta de chuid an Aontais, in uiscí áirithe nach uiscí de chuid an Aontais iad (IO L 31, 29.1.2021, lgh. 31-192)

Rinneadh leasuithe comhleanúnacha ar Rialachán (AE) 2021/92 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Comhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (IO L 149, 30.4.2021, lgh. 10-2539)

Rialachán (AE) 2021/406 ón gComhairle an 5 Márta 2021 lena leasaítear Rialacháin (AE) 2021/91 agus (AE) 2021/92 maidir le deiseanna iascaireachta sealadacha áirithe le haghaidh 2021 in uiscí an Aontais agus in uiscí nach uiscí de chuid an Aontais iad (IO L 81, 9.3.2021, lgh. 1-14)

Rialachán (AE) 2019/1241 ó Pharlaimint na hEorpa agus ón gComhairle an 20 Meitheamh 2019 maidir le hacmhainní iascaigh a chaomhnú agus éiceachórais mhuirí a chosaint trí bhearta teicniúla, lena leasaítear Rialacháin (CE) Uimh. 1967/2006 agus (CE) Uimh. 1224/2009 ón gComhairle agus Rialacháin (AE) Uimh. 1380/2013, (AE) 2016/1139, (AE) 2018/973, (AE) 2019/472 agus (AE) 2019/1022 ó Pharlaimint na hEorpa agus ón gComhairle, agus lena n–aisghairtear Rialacháin (CE) Uimh. 894/97, (CE) Uimh. 850/98, (CE) Uimh. 2549/2000, (CE) Uimh. 254/2002, (CE) Uimh. 812/2004 agus (CE) Uimh. 2187/2005 ón gComhairle (IO L 198, 25.7.2019, lgh. 105-201)

Féach an leagan comhdhlúite.

Rialachán (AE) 2017/2403 ó Pharlaimint na hEorpa agus ón gComhairle an 12 Nollaig 2017 maidir le bainistiú inbhuanaithe a dhéanamh ar chabhlaigh iascaireachta sheachtracha, agus lena n–aisghairtear Rialachán (CE) Uimh. 1006/2008 ón gComhairle (IO L 347, 28.12.2017, lgh. 81-104)

Rialachán (AE) Uimh. 1380/2013 ó Pharlaimint na hEorpa agus ón gComhairle an 11 Nollaig 2013 maidir leis an gComhbheartas Iascaigh, lena leasaítear Rialachán (CE) Uimh. 1954/2003 ón gComhairle agus Rialachán (CE) Uimh. 1224/2009 ón gComhairle agus lena n–aisghairtear Rialachán (CE) Uimh. 2371/2002 ón gComhairle agus Rialachán (CE) Uimh. 639/2004 ón gComhairle agus Cinneadh 2004/585/CE ón gComhairle (IO L 354, 28.12.2013, lgh. 22-61)

Féach an leagan comhdhlúite.

Rialachán (CE) Uimh. 1224/2009 ón gComhairle an 20 Samhain 2009 lena mbunaítear córas rialaithe Comhphobail chun comhlíonadh rialacha an chomhbheartais iascaigh a áirithiú, lena leasaítear Rialacháin (CE) Uimh. 847/96, (CE) Uimh. 2371/2002, (CE) Uimh. 811/2004, (CE) Uimh. 768/2005, (CE) Uimh. 2115/2005, (CE) Uimh. 2166/2005, (CE) Uimh. 388/2006, (CE) Uimh. 509/2007, (CE) Uimh. 676/2007, (CE) Uimh. 1098/2007, (CE) Uimh. 1300/2008 agus (CE) Uimh. 1342/2008 agus lena n–aisghairtear Rialacháin (CEE) Uimh. 2847/93, (CE) Uimh. 1627/94 agus (CE) Uimh. 1966/2006 (IO L 343, 22.12.2009, lgh. 1-50)

Féach an leagan comhdhlúite.

Nuashonraithe 03.06.2021