9.5.2014

GA

Iris Oifigiúil an Aontais Eorpaigh

CA 140/1

---

FÓGRA FOLÚNTAIS ECA/2014/15

Ceann an Aonaid Chumarsáide agus Caidrimh Institiúidigh

(Grúpa feidhme AD, Grád 9-14)

Ard-Stiúrthóireacht na hUachtaránachta

(2014/C 140 A/01)

 

EOLAS FÚINN

Is í Cúirt Iniúchóirí na hEorpa institiúid an Aontais Eorpaigh (AE) a bunaíodh leis an gConradh chun iniúchóireacht a dhéanamh ar airgeadas an AE. Mar iniúchóir seachtrach an AE cabhraíonn sí chun feabhas a chur ar bhainistiú airgeadais an AE agus feidhmíonn sí mar chaomhnóir neamhspleách ar leasanna airgeadais saoránach an Aontais.

Tugann an Chúirt seirbhísí iniúchóireachta lena ndéanann sí measúnú ar bhailiú agus ar chaitheamh cistí an AE. Déanann sí scrúdú ar cé acu an ndearnadh nó nach ndearnadh oibríochtaí airgeadais a thaifeadadh agus a nochtadh go cuí agus ar cuireadh nó nár cuireadh i gcrích iad agus ar bainistíodh nó nár bainistíodh de réir an dlí agus go rialta iad, d’fhonn eacnamaíocht, éifeachtúlacht agus éifeachtacht a chinntiú. Cuireann an Chúirt torthaí a cuid iniúchtaí in iúl i dtuairiscí soiléire oibiachtúla a bhaineann le hábhar. Ina theannta sin tugann sí tuairimí ar shaincheisteanna maidir le bainistiú airgeadais.

Cuireann an Chúirt cuntasacht agus trédhearcacht chun cinn agus cabhraíonn sí le Parlaimint na hEorpa agus leis an gComhairle maoirseacht a dhéanamh ar chur i ngníomh buiséad an AE, go háirithe le linn nós imeachta an scaoilte. Geallann an Chúirt gur eagraíocht éifeachtúil í atá ar thús cadhnaíochta maidir le forbairtí ar iniúchadh agus riarachán poiblí.

Tá ceanncheathrú na Cúirte Iniúchóirí i Lucsamburg.

Is é ról Ard-Stiúrthóireacht na hUachtaránachta ná cabhrú leis an Uachtarán misean ECA a chomhlíonadh. Tá sí freagrach as caidreamh le hard-institiúidí iniúchóireachta eile (“Oifig Chaidrimh”), as obair ECA a chlárú agus monatóireacht a dhéanamh uirthi, as an gcaidreamh le luchtanna leasa institiúideacha ECA, as cumarsáid inmheánach agus sheachtrach agus as prótacal agus cuairteanna chomh maith.

Laistigh d’Ard-Stiúrthóireacht na hUachtaránacht, tá an tAonad Cumarsáide agus Caidrimh Institiúidigh (COS) nua-bhunaithe freagrach as an méid seo a leanas:

—

i gcomhar leis an mBall um Chaidreamh Institiúideach, tá sí freagrach as gnáthbhainistiú an chaidrimh le príomhluchtanna leasa institiúideacha na Cúirte agus as tuilleadh forbartha a dhéanamh air, go háirithe le Parlaimint na hEorpa agus a Coiste um Rialú Buiséid (CONT/COCOBU); agus leis an gComhairle agus a Coiste Buiséadach,

—	cumarsáid sheachtach: suim luchtanna leasa agus na meán a spreagadh sna táirgí agus gníomhaíochtaí is déanaí atá idir lámha ag an institiúid agus a n-aird a dhíriú orthu,

—	cumarsáid inmheánach: an fhoireann a choimeád ar an eolas faoin nuacht is déanaí san institiúid féin agus fúithi,

—	bealaí agus uirlisí cumarsáide seachtracha agus inmheánacha ECA a oibriú ó lá go lá agus tuilleadh forbartha a dhéanamh orthu (m.sh. láithreán gréasáin, meáin shóisialta, preaseisiúintí, faisnéisiú preasa, Iris agus inlíon ECA, agus

—	faisnéis anailíseach a chur ar fáil do phróiseas athbhreithnithe beartais agus riosca ECA chun tacú le pleanáil straitéiseach.

MOLAIMID

Tá cinneadh déanta ag an gCúirt Iniúchóirí tabhairt faoi nós imeachta roghnaithe oscailte chun post Ceann an Aonaid Chumarsáide agus Caidrimh Institiúidigh (grád AD 9-AD 14) in Ard-Stiúrthóireacht na hUachtaránachta a líonadh faoi Airteagal 29(2) Rialachán Foirne Oifigeach an Aontais Eorpaigh (“na Rialacháin Foirne”). Reáchtálfar an nós imeachta roghnaithe seo a dhéantar chun an rogha a bheidh ag an Údarás Ceapacháin a leathnú, i gcomhthráth leis an nós imeachta ceapacháin inmheánach agus idir-institiúideach.

Déanfar an ceapachán ag grád AD 9 go AD 14, ag brath ar fhad na taithí gairmiúla. Íocfar tuarastal míosúil idir EUR 7 427,52 (AD 9) agus EUR 13 771,87 (AD 14). De bhreis ar an mbuntuarastal, atá faoi réir cháin an Aontais agus atá díolmhaithe ó chánacha náisiúnta, d’fhéadfadh go n-íocfar lámhaltais áirithe de réir mar atá leagtha síos sna Rialacháin Foirne.

Faoi údarás Stiúrthóir na hUachtaránachta, beidh ar Cheann an Aonaid Chumarsáide agus Caidrimh Idirnáisiúnta an obair seo a leanas a dhéanamh:

—	obair an aonaid a chlárú, a bhainistiú agus maoirseacht a dhéanamh uirthi,

—	foireann an aonaid a threorú, a bhainistiú agus a spreagadh agus cabhrú leo a ngairmeacha a fhorbairt,

—	ionadaíocht a dhéanamh ar an Stiúrthóir ag leibhéal idir-institiúideach agus sna meáin agus leis an bpobal de réir mar is gá,

—	gnáthghníomhaíochtaí cumarsáide agus caidrimh institiúidigh a bhainistiú go féinrialaitheach,

—	pleanáil a dhéanamh ar acmhainní daonna, airgeadais agus ábhair a bhfuil gá leo agus a chinntiú go mbaintear úsáid astu go héifeachtúil éifeachtach, agus

—	feidhmiú mar oifigeach um údarú trí tharmligean, maidir le línte buiséid atá á mbainistiú ag an aonad.

AN TÉ ATÁ Á LORG AGAINN

Tá an nós imeachta roghnaithe seo oscailte do gach iarrthóir ar féidir leo na coinníollacha seo a leanas a chomhlíonadh ar an dáta deiridh chun iarratais a fháil:

(i)

de réir Airteagal 5 de na Rialacháin Foirne: — oideachas leibhéal ollscoile arna dhearbhú ag dioplóma aitheanta a raibh tréimhse staidéir ceithre bliana nó níos mó ag gabháil leis, nó — oideachas leibhéal ollscoile arna dhearbhú ag dioplóma aitheanta mar aon le taithí ghairmiúil ábhartha dar tréimhse bliain amháin ar a laghad, arb é trí bliana gnáth-fhad an chúrsa staidéir, nó — más cuí chun leasa na seirbhíse, oiliúint ghairme ag leibhéal coibhéiseach;

(ii)	i gcás taithí ghairmiúil, 12 bhliain ar a laghad;

(iii)

taithí ghairmiúil ar chumarsáid (is é sin, straitéisí agus treoracha a fhorbairt, cumarsáid inmheánach agus sheachtrach a chur i ngníomh agus monatóireacht a dhéanamh uirthi, uirlisí cumarsáide a úsáid agus an cumas nuáil a dhéanamh) agus ar chaidreamh institiúideach ag leibhéal an AE, go háirithe le luchtanna leasa ardleibhéil;

(iv)	an cumas gníomhaíochtaí an aonaid agus obair na foirne a phleanáil agus a eagrú de réir cuspóirí an chláir oibre;

(v)	an cumas an fhoireann a bhainistiú, obair a tharmligean, feidhmíocht na foirne a mheasúnú, a bhforbairt ghairmiúil a chinntiú agus iad a spreagadh agus na nósanna imeachta riaracháin a ghabhann leis sin a fheidhmiú;

(vi)	a bheith in ann roinnt foirne atá ag déileáil le tascanna éagsúla a chomhordú agus a threorú ag an am céanna;

(vii)

an cumas cumarsáid a dhéanamh go soiléir agus go críonna, laistigh agus lasmuigh de ECA agus aird a thabhairt ar nádúr íogair cuid mhaith de thascanna an aonaid;

(viii)

ar mhaithe leis an tseirbhís tá gá le heolas fónta ar an mBéarla agus ar an bhFraincis araon. Lena chois sin ba bhuntáiste é eolas maith ar theanga amháin eile den AE ar a laghad a bheith ag an iarrthóir.

BEARTAS EARCAÍOCHTA

COINNÍOLLACHA EARCAÍOCHTA

De réir Airteagal 28 de na Rialacháin Foirne, ní mór d’iarrthóirí:

—	a bheith ina náisiúnaigh de Bhallstát an AE,

—	cearta iomlána saoránachta a bheith acu,

—	oibleagáidí atá orthu de réir na ndlíthe earcaíochta maidir le seirbhís mhíleata a bheith comhlíonta acu,

—	na teistiméireachtaí carachtair cuí a chur ar fáil le haghaidh comhlíonadh a gcuid oibleagáidí.

AN NÓS IMEACHTA ROGHNAITHE

(a)

Chun cabhrú leis an gCúirt cinneadh a dhéanamh, déanfaidh an bord réamhroghnúcháin (“an bord”) na hiarratais a mheasúnú de réir na gcritéar seo a leanas: (i) cáilíochtaí, taithí ghairmiúil, spreagthacht, ilchumas agus cumas anailíse an iarrthóra; (ii) cumas an iarrthóra foireann a bhainistiú agus a threorú; (iii) sainscileanna, de réir mar a éilítear don phost faoi chaibidil.

(b)

Déanfaidh an bord an measúnú ina dhá chéim: (i) measúnófar gach iarrthóir ar bhonn: — a CV i bhformáid Europass, a litir spreagthachta agus a d(h)earbhú foirmiúil, — staidéar cáis a n-iarrfar air/uithi a ullmhú; (ii) na hiarrthóirí ar éirigh leo: — tabharfar cuireadh dóibh dul faoi agallamh, — iarrfar orthu a staidéir cháis a chur i láthair.

Má mheasann an bord go bhfuil gá leis, d’fhéadfadh sé seirbhísí “ionaid mheasúnaithe” a earcú chun cumas na n-iarrthóirí tascanna bainistíochta a chur i gcrích a mheasúnú.

IARRATAIS A CHUR ISTEACH

Ba chóir na hiarratais, agus iad scríofa i mBéarla nó i bhFraincis, a sheoladh chuig an seoladh r-phoist seo a leanas: vacancies@eca.europa.eu

Bíodh an uimhir thagartha atá ar an bhfógra folúntais seo i líne an ábhair. Ní mór na doiciméid seo a leanas a bheith leis na hiarratais:

—	litir spreagthachta thionlacain,

—	curriculum vitae reatha de réir teimpléad an Europass, (breathnaigh ar an suíomh gréasáin http://europass.cedefop.europa.eu). Ní phróiseálfar ach CVanna atá san fhormáid seo,

—	an dearbhú foirmiúil agus é comhlánaithe, dátaithe agus sínithe (ceangailte).

Is é 26 Bealtaine 2014, 5 p.m. an spriocdháta chun iarratais a bheith istigh.

Ba chóir d’iarrthóirí a dtugtar cuireadh dóibh teacht chuig agallamh a thabhairt faoi deara nach gá dóibh ach cóipeanna nó fotachóipeanna doiciméad tacaíochta a bhaineann lena gcuid staidéar, taithí ghairmiúil agus cúraimí reatha a thabhairt leo chuig an agallamh. Ní thabharfar na doiciméid seo ar ais.

COSAINT SONRAÍ

De bhun Airteagal 7(3) de Rialachán (CE) Uimh. 45/2001 ó Pharlaimint na hEorpa agus ón gComhairle an 18 Nollaig 2000 maidir le cosaint daoine i dtaobh próiseáil sonraí pearsanta ag institiúidí agus ag comhlachtaí Comhphobail agus maidir le saorghluaiseacht na sonraí sin (1), “is chun na críocha ar tarchuireadh iad amháin a phróiseálfaidh an faighteoir na sonraí pearsanta.”

---

(1)  IO L 8, 12.1.2001, lch. 1.

---