Leis an bhfoilseachán seo, tugtar an ceart chun cur i gcoinne an iarratais de bhun Airteagal 98 de Rialachán (AE) Uimh. 1308/2013 ó Pharlaimint na hEorpa agus ón gComhairle (1) laistigh de 3 mhí ó dháta an fhoilseacháin seo.

DOICIMÉAD AONAIR

‘Rosalejo’

PDO-ES-02880

Dáta cur i bhfeidhm: 9 Nollaig 2022

1.   Ainm(neacha)

Rosalejo

2.   Cineál táisc gheografaigh

ATFC – Ainmniúchán Tionscnaimh faoi Chosaint

3.   Catagóirí na dtáirgí fíniúna

1.

Fíon

4.   Tuairisc ar an bhfíon nó ar na fíonta

Fíonta dearga

TUAIRISC THÉACSÚIL GHAIRID

Ard-déine datha, dath an rúibín. Dea-bholaithe an-dian de thorthaí dearga agus dea-bholaithe spíosracha agus tóstáilte ó na bairillí freisin. Tá dea-struchtúr agus marthanacht ag na fíonta, lena ngabhann aigéadacht chothrom agus carachtar úr óg.

*	Ní mór an neart alcóil iomlán uasta de réir toirte a bheith laistigh de na teorainneacha dlíthiúla a leagtar síos i reachtaíocht ábhartha an Aontais.

Saintréithe anailíseacha ginearálta
Neart alcóil iomlán uasta (mar % den toirt)
Neart alcóil iarbhír íosta (mar % den toirt)	12,00
Aigéadacht iomlán íosta	4,5 gram in aghaidh an lítir, arna léiriú mar aigéad tartarach
Uasmhéid aigéadachta luainí (mar mhilleachoibhéisí in aghaidh an lítir)	16,7
Dé-ocsaíd sulfair iomlán uasta (ina milleagraim in aghaidh an lítir)	150

5.   Cleachtais fíonóireachta

5.1.   Cleachtais fhíoneolaíocha shonracha

1.   An modh saothraithe

Cuirtear na fíonghoirt ar fhánaí a bhfuil a n-aghaidh ó thuaidh/ó theas, agus baintear leas as cleachtais éagsúla um bainistíocht ghlas, amhail taobh-bhuinneáin nó meatháin a bhaint agus triopaill a thanú.

2.   Cleachtas fíoneolaíoch sonrach

Déantar nósanna imeachta éagsúla san fhíonlann, amhail na fíonchaora a fhuarú i bhfuar-stóras chomh luath is a shroicheann siad an t-áitreabh, triopaill a roghnú sula mbaintear an gas, codanna glasa agus fíonchaora glasa a bhaint tar éis go mbaintear an gas, agus coipeadh alcólach teochtrialaithe.

Is í an uastáirgeacht 68 lítear fíona dheirg in aghaidh 100 kg d’fhíonchaora.

Ní mór coipeadh alcólach a dhéanamh ag teocht rialaithe.

Is í an íostréimhse um thabhairt chun cineáil i mbairillí dara 6 mhí.

Ní mór go bhfágfaí an fíon sa bhuidéal ar feadh 1 mhí ar a laghad sula gcuirfí ar an margadh é.

5.2.   Uastáirgeacht

1.   Cineál Syrah

6 000 cileagram fíonchaor in aghaidh an heicteáir

40,80 heictilítear in aghaidh an heicteáir

2.   Cineálacha Tempranillo agus Garnacha

8 000 cileagram fíonchaor in aghaidh an heicteáir

54,4 heictilítear in aghaidh an heicteáir

6.   Limistéar geografach críochaithe

Tá limistéar críochaithe ATFC ‘Rosalejo’ suite i mbardais Anchuras (Ciudad Real) agus Sevilleja de la Jara (Toledo). Seo a leanas na dáileachtaí lena mbaineann, a thagraíonn don chóras aitheantais le haghaidh dáileachtaí talún de chuid na Spáinne (sistema de información geográfica de parcelas agrícolas, SIGPAC) agus don Chlárlann Talún:

—

I mbardas Anchuras: — polagán 5, dáileachtaí: 319, 333 ; — polagán 7, dáileachtaí: 1 go 4, 70, 71, 73, 78, 87, 98, 99, 100, 108, 109, 111, 135 go 138, 140 go 146, 155 go 157, 1077, 1082, 1083, 60001 ; — polagán 9, dáileachtaí: 29 go 32, 34, 44, 46, 47, 49, 50, 51, 54 ; — polagán 21, dáileachtaí: 181, 238, 244, 245 ; — polagán 22, dáileachtaí: 5 go 13, 15 go 62, 79, 81 go 86, 93, 97, 105, 1074 go 1076, 1078 ; — polagán 23: dáileacht 56.

—	I mbardas Sevilleja de la Jara: — polagán 13, dáileachtaí: 1, 3 ; — polagán 14, dáileachtaí: 52 go 55.

San iomlán, cumhdaíonn sé achar de thart ar 1 338,70 ha.

7.   Cineál/cineálacha fíniúna

Garnacha Tinta

Syrah

Tempranillo

8.   Tuairisc ar an nasc (na naisc)

8.1.   Mionsonraí an limistéir gheografaigh (tosca nádúrtha agus daonna)

Tosca nádúrtha

Ithreacha:

Tá eastát Rosalejo suite sa sliabhraon Sierra de Sevilleja, atá ina chuid de Montes de Toledo.

Níor tharla oighriú in Montes de Toledo sa ré Cheathartha, agus mar sin níl a gcuid fánaí chomh géar le córais eile de chuid an ardchláir Ibéaraigh, amhail an Lárchóras. Tá siad déanta suas de shraith de shléibhte agus loig thiar thuaidh (NW) agus thoir theas.

Is iad is saintréithe do shléibhte Toledo pedrizas nó canchales, a chruthaítear trí chreimeadh grianchloichíte, trí shíonchaitheamh seaca taobh leis an bhfána. Is iad sin cairn mhóra de bhloic cheartingearacha grianchloichíte gan aon fhásra. Gné eile atá ina saintréith den tírdhreach iad na rañas, ar machairí clochacha iad a shíneann ó bhun na sléibhte.

Níl raña Rosalejo creimthe ag aibhneacha ná oighearshruthanna, agus mar gheall air sin tá ceann de na hithreacha (bith-screamha) is sine san Eoraip ann, ós rud é gur cruthaíodh an ithir sin sa ré Phléicéineach (tréimhse an-tirim agus an-fhuar), 5 mhilliún bliain ó sin ar charraigeacha silice agus eibhir atá níos sine ná 350 milliún bliain.

Tá clochacht de 50 % ag a chiseal dromchla, rud a thugann draenáil mhaith dó. Tá sé déanta suas de ghaineamh silice, scláta thar a bheith síonchaite, agus púróga grianchloichíte thar a bheith iarnaí, de mhéideanna éagsúla. Faightear pisilítí iarainn leathsféarúla freisin os cionn 2 mm ina dtrastomhas. Mar gheall ar an ardtiúchan amhiarainn, tá imir oráiste/scothdhearg ar an ngrianchloichít, rud a thugann dath dearg don ithir dromchla freisin, agus tá dath scothbhuí ar chiseal níos doimhne na hithreach.

Seo a leanas a saintréithe ceimiceacha:

—	ithir le pH aigéadach faoi bhun 6, le leibhéil neamhshuntasacha de charbónáit chailciam, aolchloch ghníomhach agus leibhéal an-íseal de sháithiú boinn;

—	leibhéil ísle de chailciam, mhaignéisiam agus photaisiam;

—	leibhéil arda de shileacan, d’iarann, d’alúmanam agus de mhangainéis;

—	cion íseal riandúl: bairiam, rubaidiam agus strointiam;

—	cion ard tearc-chréanna: ceiriam, lantanam, tóiriam, itriam agus neoidimiam.

Tá a chuid saintréithe fisiceacha bunaithe ar aicmí uigeacha créúla agus ar láithreacht pisilítí, le tiúchan níos airde de chré ag leibhéal níos doimhne. Ag leibhéal níos doimhne aistríonn na créanna ó thon scothdhearg go ton a bhfuil dath níos buí air. Is é is cúis leis an tsaintréith sin a gcion iarainn, atá níos ocsaídithe (scothdhearg) sna cisil níos éadoimhne agus a bhfuil dath níos buí air (cion iarainn laghdaithe) ag leibhéal níos doimhne.

An aeráid:

Tá Rosalejo suite ag bun Sierra de Sevilleja ar an taobh thiar theas (SW) den chóras sléibhtiúil sin. Is í an chéad bhacainn shléibhtiúil lena mbuaileann na limistéir brú ísil a bhogann isteach ón Atlantach tar éis dul trí dheisceart na Portaingéile agus Extremadura.

Mar gheall ar thosca amhail tionchar an Atlantaigh, an airde 650 méadar, agus an staid ag bun an taoibh thiar-theas (SW) de Sierra de Sevilleja, (a bhfuil 1 279 méadar ina bhuaic is airde, Cumbre Alta - ag 1 279) bíonn an aeráid níos measartha sa gheimhreadh agus sa samhradh araon agus bíonn athrú suntasach ar an teocht idir an oíche agus an lá. Bíonn tionchar aige sin ar na próisis um shaothrú fíniúnacha agus dá bhrí sin ar shaintréithe na bhfíonchaor a tháirgtear.

Is é meánráta na báistí sa limistéar 650 lítear in aghaidh na bliana, agus titeann an chuid is mó di san fhómhar agus san earrach. Le linn mhíonna an tsamhraidh, is beag nach dtiteann báisteach ar bith, ach amháin má tharlaíonn stoirm. Tarlaíonn an méid ard báistí le linn thréimhsí an fhómhair agus an earraigh mar thoradh ar threoshuíomh thiar thuaidh (NW) go thoir theas (SE) shléibhte Toledo, agus níos sonraí Sierra de Sevilleja.

Bíonn tionchar freisin ag gaire Rosalejo do thaiscumar Cijara ar a aeráid. Tá an taiscumar sin ar cheann de na taiscumair is mó sa Spáinn i ndáil lena thoilleadh (1 505 heictiméadar chiúbacha) agus a achar dromchla (6 556 heicteár). Tá an dobharlach mór sin 2,9 km ó ATFC ‘Rosalejo’. Bíonn an-tionchar aige ar theochtaí, sa mhéid is go mbíonn siad níos fuaire sa gheimhreadh sa níos teo sa samhradh dá bharr.

Tosca daonna

Cuirtear na fíonghoirt ar fhána a bhfuil a aghaidh ó thuaidh/ó theas, leis an bhfásra is fearr. Baintear leas as cleachtais éagsúla um bainistíocht ghlas amhail meatháin a bhaint agus triopaill a thanú, chun na fíonchaora is fearr a fháil.

Áirítear leis an obair a dhéantar san fhíonlann chun na fíonta is fearr a fháil nósanna imeachta éagsúla, amhail na fíonchaora a fhuarú i bhfuar-stóras chomh luath is a shroicheann siad an t-áitreabh, triopaill a roghnú sula mbaintear an gas, codanna glasa agus fíonchaora glasa a bhaint tar éis go mbaintear an gas, agus coipeadh alcólach teochtrialaithe.

8.2.   Faisnéis maidir le cáilíocht nó saintréithe an fhíona atá ann de bharr an chomhshaoil gheografaigh go bunúsach nó go heisiach

Is saintréithe de na fíonta iad a n-aigéadacht iomlán nádúrtha den scoth agus a pH measartha íseal. Is amhlaidh sin mar gheall ar an tiúchan íseal potaisiam agus cailciam a fhaightear sna fíonta sin. Tugann an aigéadacht seo carachtar úr óg do na fíonta, cé go dtagann siad ó dhomhanleithead sách tuaisceartach le haeráid the.

Mar gheall ar an aigéadacht mhaith sin tá na fíonta cothrom sa bhéal.

Saintréith eile dár gcuid fíonta é an méid maith datha, agus go háirithe a n-imir dhearg-rúibíneach, nach n-athraíonn mórán i gcaitheamh na mblianta. Is é is cúis leis an tsaintréith sin an feiniméan atá luaite cheana thuas, is é sin an aigéadacht mhaith agus an pH íseal, a chiallaíonn go dtagann an fíon chun cineáil go mall le feabhsúchán orgánaileipteach mall.

8.3.   Nasc cúisíoch idir saintréithe an limistéir gheografaigh agus cáilíocht an fhíona

Mar gheall ar shaintréithe uathúla an chomhdhéanamh ithreach, i.e. ithreacha aigéadacha nach bhfuil mórán caitian amhail cailciam agus potaisiam iontu, tá aigéadacht nádúrtha iomlán na bhfíonta an-difriúil le haigéadacht fíonta eile ón réigiún céanna. Is féidir an úire sin a bhrath go soiléir nuair a bhlaistear den fhíon. Tá blasanna de thorthaí dearga sa dea-bholadh. Níl sé te sa bhéal, ach a mhalairt, le húire a fhaightear de ghnáth ag domhanleithid eile i bhfad níos faide ó thuaidh.

Gné choiteann eile atá le feiceáil go soiléir dúinn é a dhath, ina bhfuil déine ard, agus tonúlacht i bhfad níos grinne ná mar is gnách. Ní théann an ton dearg-rúibíneach sin i laghad i gcaitheamh na mblianta. Cruthaíonn pH íseal na hithreach, agus pH íseal na bhfíonta dá bharr, an tsaintréith sin.

Bíonn éifeacht ag pH íseal na bhfíonta ní hamháin ar an dath, ach ar acmhainneacht na bhfíonta maidir lena dtabhairt chun cineáil freisin. Is léir sin ó bhlas na bhfíonta agus óna mbrath tainneach comhtháite fiú nuair a thugtar chun cineáil iad.

Níl mórán dúl mianrach amhail potaisiam, cailciam, sóidiam agus maignéisiam in ithreacha Rosalejo. Léiríonn anailís ar na duilleoga ónár bhfíonghort tiúchan íseal na gcomhdhúile sin. Dá réir sin, ní fhéadann na haigéid orgánacha, amhail an t-aigéad tartarach saor, a dhíorthaítear ó na fíonchaora salainn a chruthú le potaisiam i bhfoirm déthartráite potaisiam ná cailciam i bhfoirm tartráit chailciam atá neodrach, agus an toradh air sin é fíonta le haigéadacht nádúrtha iomlán agus le pH sách íseal. Mar gheall air sin tagann an fíon chun cineáil go mall agus tugtar feabhsúchán orgánaileipteach soiléir dó.

Is saintréith de fhíonta ATFC ‘Rosalejo’ a dtiúchan maith polaifeanól agus tainniní. Is é is cúis leis an tsaintréith sin táirgeacht íseal an fhíonghoirt in aghaidh an heicteáir agus próiseas na buainte lámha, na stórála fuaire agus an mhaothú roimh choipeadh.

8.4.   Réasúnaíocht le coinníollacha iarratasóra shingil

Tá saintréithe ag an limistéar geografach críochaithe atá an-difriúil leo siúd i limistéir chomharsanacha, mar a léirítear ag staidéar ag Ardscoil Theicniúil na n-Innealtóirí Talmhaíochta in Ollscoil Castile-La Mancha ar an aonad críche a chruthódh ainmniúchán tionscnaimh féideartha ‘Rosalejo’.

Léiríonn an staidéar sin, murab ionann is na hithreacha sna limistéir chomharsanacha, gur tháinig na hithreacha ar mhachaire Rosalejo ó ábhair Phailéasócha na n-ithreacha de chuid na sean-tírghnéithe raña agus rañizo. Cruthaíonn an toisc sin, i dteannta le topagrafaíocht atá cothrom den chuid is mó agus flúirse an chré, coinníollacha gléirthe, a mbaineann le próisis ocsaídiúcháin agus dí-ocsaídiúcháin, a mbíonn éifeacht bhunúsach acu ar dhinimic Fe3+ agus Fe2+. Tagtar ar an gconclúid sa staidéar go bhfuil críochú limistéar geografach ‘Rosalejo’ bunaithe ar láithreacht machaire críochaí nó nach mór críochach ina bhfuil na raña agus na rañizo suite, agus go bhfuil ithreacha ag an limistéar seo a bhfuil roinnt saintréithe uathúla forbartha acu. Áirítear leo siúd aigéadacht shuntasach, uigeachtaí créúla nó gainmheacha cré, ardacmhainní malartaithe caitiain, agus láithreacht coincréitithe ocsai-hiodrocsaídí iarainn (pisilítí), agus saintréithe eile nach iad.

Maidir leis na fíonta, cé go bhfuil an limistéar críochaithe san áireamh laistigh de theorainneacha TGFC ‘Castilla’ tá saintréithe difriúil go leor ag na fíonta ‘Rosalejo’.

PARAIMÉADAR	AN TGFC ‘CASTILLA’	ROSALEJO
Neart alcóil iarbhír íosta	10% de réir toirte	12 % de réir toirte
Aigéadacht iomlán íosta	4 g/l	4,5 g/l
Déine íosta datha	---	8 (a.u.)
IPT íosta	---	50
Uastáirgeacht (kg/ha)	16 000	6 000 go 8 000
Uastáirgeacht (hl/ha)	112	40,80 go 54,40

Féadann fíonta leis an TGFC ‘Castilla’ a bheith géar, leathghéar, leath-mhilis nó milis. Tá fíonta go léir Rosalejo géar, le cion iomlán uasta siúcra 3 g/l, (glúcós + fruchtós). Idirdhealaíonn sé sin iad ó na fíonta géara leis an TGFC ‘Castilla’, ina mbíonn cion iomlán uasta siúcra 4 g/l (glúcós + fruchtós). Tá fíonta go léir Rosalejo dearg agus bíonn déine íosta ard datha acu 8 n-aonad ionsúiteachta (a.u.) Idirdhealaíonn sé sin iad ó fhíonta leis an TGFC ‘Castilla’, a fhéadann a bheith bán, rosé nó dearg. Níl déine íosta datha socraithe i gceist le haghaidh fíonta dearga leis an TGFC ‘Castilla’, agus mar sin féadann déine datha faoi bhun 8 a.u. a bheith acu. Anuas air sin, féadann fíonta leis an TGFC ‘Castilla’ a bheith ina bhfíonta péarla, ina bhfíonta súilíneacha ar ardchaighdeán, ina bhfíonta milseoige nó ina bhfíonta a bhuaintear go déanach, agus mar sin tá siad an-difriúil le fíonta Rosalejo. Níl teorainn íosta shocraithe ag fíonta leis an TGFC ‘Castilla’ faoin innéacs feanólach foriomlán (IPT) ach oiread, ionas go bhféadann siad a bheith faoi bhun na teorann de 50 atá socraithe le haghaidh fhíonta ‘Rosalejo’.

Tá an t-iarratas ar ATFC ‘Rosalejo’ á dhéanamh ag iarratasóir aonair ós rud é go gcomhlíontar na coinníollacha le haghaidh maolaithe arna bhunú in Airteagal 95 de Rialachán (AE) Uimh. 1308/2013. Is éard atá sa duine atá i gceist an t-aon táirgeoir sa limistéar geografach críochaithe. Níl ach aon saothraí fíniúna amháin (arb é an déantóir fíona é freisin) laistigh den limistéar críochaithe dá dtugtar tuairisc i roinn 4. Níl aon saothróir fíona ná déantóirí fíona eile, mar sin níl aon fhéidearthacht go mbeadh rannpháirtithe eile páirteach sa tionscadal faoi láthair. Féadfaidh táirgeoirí eile an t-ainm cláraithe a úsáid amach anseo, áfach, má bhunaíonn siad iad féin sa i limistéar críochaithe geografach, ar choinníoll go gcomhlíonann siad na coinníollacha a leagtar amach sa tsonraíocht táirge.

9.   Coinníollacha breise fíor-riachtanacha (pacáistiú, lipéadú, ceanglais eile)

Creat dlíthiúil:

Sa reachtaíocht náisiúnta

An cineál coinníll bhreise:

Pacáistiú laistigh den limistéar geografach críochaithe

Tuairisc ar an gcoinníoll:

Déanfar na fíonta a bhuidéalú sna fíonlanna atá suite sa limistéar táirgthe mar go ndéantar an dara céim den fhíon a thabhairt chun cineáil i mbuidéil. Tarlaíonn próiseas laghdaithe sa tréimhse seo, rud a fheabhsaíonn cáilíocht na bhfíonta agus a chomhlánaíonn a mblas. Bíonn siad réidh le caitheamh nuair a bhíonn na saintréithe orgánaileipteacha iontu a leagtar amach sna sonraíochtaí le haghaidh gach cineáil fíona.

Nasc chuig an tsonraíocht táirge

http://pagina.jccm.es/agricul/paginas/comercial-industrial/consejos_new/pliegos/Pliego_de_Condiciones_Rosalejo_20230829.pdf

---

(1)   IO L 347, 20.12.2013, lch. 671.