AN COIMISIÚN EORPACH

An Bhruiséil,21.8.2020

COM(2020) 427 final

2020/0201(NLE)

Togra le haghaidh

CINNEADH ÓN gCOMHAIRLE

maidir leis an seasamh a ghlacfar thar ceann an Aontais le linn an 66ú seisiún den Choiste um an gCóras Comhchuibhithe san Eagraíocht Dhomhanda Chustaim i ndáil leis an nglacadh atá beartaithe ar Thuairimí maidir le Rangú, cinntí maidir le Rangú, leasuithe ar Nótaí Míniúcháin an Chórais Chomhchuibhithe nó comhairle eile maidir le léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe

MEABHRÁN MÍNIÚCHÁIN

1.Ábhar an togra

Baineann an togra seo leis an gcinneadh a ghlacfar thar ceann an Aontais le linn an 66ú seisiún den Choiste um an gCóras Comhchuibhithe (CCC) den Eagraíocht Dhomhanda Chustaim i mí Mheán Fómhair 2020.

2.Comhthéacs an togra

2.1.An Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí

Is é is aidhm don Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí trádáil idirnáisiúnta, bailiú staitisticí agus déanamh comparáide agus anailíse ar staitisticí a éascú, go háirithe staitisticí a bhaineann le trádáil idirnáisiúnta. Áirítear leis mar Iarscríbhinn Ainmníocht an Chórais Chomhchuibhithe, córas idirnáisiúnta comhchuibhithe lena bhféadfaidh tíortha atá rannpháirteach earraí trádáilte a rangú ar bhonn coiteann chun críoch custaim. Go háirithe, áirítear le hAinmníocht CC tuairisc ar na hearraí, atá leagtha síos mar cheannteidil agus fo-cheannteidil, agus na cóid uimhriúla lena mbaineann, bunaithe ar chóras cóid 6-digit. Déantar athbhreithniú ar Ainmníocht CC gach cúig bliana 1 . Cuireann níos mó ná 190 lucht riaracháin an Ainmníocht sin i bhfeidhm; dá bharr sin, aicmítear níos mó ná 98% d'earraí trádáilte ar domhain dá réir.

Tháinig an Comhaontú i bhfeidhm an 1 Eanáir 1988.

Tá an tAontas Eorpach agus gach Ballstát de ina bpáirtithe sa Chomhaontú. 2 .

2.2.An Eagraíocht Dhomhanda Chustaim (EDC)

An Eagraíocht Dhomhanda Chustaim (EDC), a bunaíodh in 1952 mar an Chomhairle um Chomhar Custaim, is comhlacht idir-rialtasach neamhspleách í arb é is cuspóir léi éifeachtacht agus éifeachtúlacht a fheabhsú d'údaráis Chustaim. Tá 183 údarás custaim ina mball di ar fud an domhain. Is í an Chomhairle í bord rialaithe EDC. Feidhmíonn an tAontas cearta agus oibleagáidí ar nós ballraíocht ad interim san Eagraíocht Dhomhanda Chustaim, go dtí go dtiocfaidh an leasú ar an gCoinbhinsiún lena mbunaítear Comhairle um Chomhar Custaim i bhfeidhm.

Is í Comhairle EDC bord rialaithe EDC, comhairle a bhraitheann ar inniúlacht agus ar scileanna Rúnaíochta agus ar réimse coistí teicniúla agus comhairleacha chun a misean a thabhairt i gcrích.

Is coiste teicniúil í an Coiste um an gCóras Comhchuibhithe (CCC) atá i gceannas ar obair ullmhúcháin a bhaineann le Coinbhinsiún CC. Seo iad príomhchúraimí an Choiste um an gCóras Comhchuibhithe:

·Nótaí Míniúcháin, Tuairimí maidir le Rangú nó comhairle eile a ullmhú mar threoraíocht faoi léirmhíniú an Chórais Chomhchuibhithe, agus feidhmeanna eile den chineál sin a fheidhmiú i ndáil leis an gCóras Comhchuibhithe mar a mheasann Comhairle EDC nó na Páirtithe Conarthacha a bheith riachtanach.

·Moltaí a ullmhú chun aonfhoirmeacht a chinntiú maidir le léirmhíniú agus cur i bhfeidhm théacsanna dlíthiúla an Chórais Chomhchuibhithe, lena n‑áirítear díospóidí faoi rangú a réiteach idir Páirtithe Conarthacha, agus dá bhrí sin, trádáil a éascú;

·Leasuithe ar an gCóras Comhchuibhithe a mholadh chun forbairtí sa teicneolaíocht agus athruithe i ngréasáin trádála a léiriú, chomh maith le riachtanais eile de chuid úsáideoirí an Chórais Chomhchuibhithe;

·Cur i bhfeidhm forleathan an Chórais Chomhchuibhithe a chur chun cinn, agus scrúdú a dhéanamh ar cheisteanna ginearálta agus cúrsaí beartais a bhaineann leis.

Níl ach aon vóta amháin idir an tAontas agus na Ballstáit le chéile sa Choiste um an gCóras Comhchuibhithe. Déantar cinntí sa Choiste CC, a bhaineann le cúrsaí a chumhdaítear leis an gcinneadh réime seo, de réir tromlach simplí.

De bhun Airteagal 8(2) de Choinbhinsiún CC, Nótaí Míniúcháin, Tuairimí maidir le Rangú, comhairle eile faoi léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le léirmhíniú agus cur i bhfeidhm an Chórais Chomhchuibhithe a ullmhaítear le linn seisiún de Choiste CC, meastar iad go léir a bheith faofa ag Comhairle EDC i gcás, nach déanaí ná deireadh an dara mí tar éis na míosa ar dúnadh an seisiún inar glacadh iad lena linn, i gcás nach bhfuil fógra ó aon Pháirtí Conarthach i gCoinbhinsiún CC tugtha d'Ard‑Rúnaí na hEagraíochta Domhanda Custaim go n‑iarann sé cúrsaí den chineál sin a thabhairt faoi bhráid Chomhairle EDC.

2.3.Na gníomhartha atá beartaithe

I gcomhréir le hAirteagal 6(2) de Choinbhinsiún CC, tagann an Coiste um an gCóras Comhchuibhithe le chéile dhá uair sa bhliain de ghnáth. Go hiarbhír, bíonn cruinnithe de Choiste CC ar siúl i mí an Mhárta agus mí Mheán Fómhair.

An cinneadh atá beartaithe, baineann sé leis na gníomhartha seo a leanas, gníomhartha a mheas agus a ghlac an Coiste ar bhonn sealadach, faoi réir formheasa ó Chomhairle EDC trí “nós imeachta an tosta”:

(a)Nótaí Míniúcháin lena dtugtar léirmhíniú ar na nótaí, na ceannteidil agus na fo-cheannteidil in Ainmníocht an Chórais Chomhchuibhithe,

(b)Tuairimí maidir le Rangú, lena léirítear na cinntí a dhéanann an Coiste um an gCóras Comhchuibhithe a mhéid a bhaineann le táirgí sonracha a rangú,

(c)Comhairle agus moltaí eile a bhaineann le hearraí a rangú in Ainmníocht an Chórais Chomhchuibhithe, ar nós cinntí maidir le rangú agus treoir eile atá glactha ag an gCoiste um an gCóras Comhchuibhithe.

I gcomhréir le hAirteagal 34 7.(a)(iii) de Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais 3 , déanfaidh údaráis chustaim na mBallstát a gcinntí maidir le faisnéis taraife cheangailteach (cinntí FTC) a chúlghairm i gcás nach bhfuil siad ag luí a thuilleadh leis an léirmhíniú ar Ainmníocht CC mar thoradh ar chinntí maidir le rangú, tuairimí maidir le rangú nó leasuithe ar na nóta míniúcháin a ghabhann le hAinmníocht CC, le héifeacht ó dháta foilsithe na Teachtaireachta ón gCoimisiún i sraith “C” d'Iris Oifigiúil an Aontais Eorpaigh..

3.An seasamh atá le glacadh thar ceann an Aontais

3.1.Srianta praiticiúla maidir le hullmhú agus glacadh na seasamh ón Aontas

Glacann an Coiste um an gCóras Comhchuibhithe d’EDC le Tuairimí maidir le Rangú, leasuithe ar Nótaí Míniúcháin an Chórais Chomhchuibhithe (NMCC) nó comhairle eile maidir le léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe le linn gach ceann dá dhá chruinniú bhliantúla.

Ó thaobh na praiticiúlachta de, is iondúil nach mbíonn dóthain ama ag an Aontas chun seasamh a ghlacadh faoi Airteagal 218(9) CFAE roimh gach cruinniú CCC. Dá bhrí sin, thíolaic an Coimisiún togra le haghaidh cinneadh réime ón gComhairle maidir leis an seasamh a ghlacfar thar ceann an Aontais san Eagraíocht Dhomhanda Chustaim maidir le cúrsaí CC 4 agus tá an togra ar feitheamh sa Chomhairle faoi láthair.

De dheasca ráigeanna COVID – 19, áfach, tá curtha in iúl ag Rúnaíocht EDC go reáchtálfar an cruinniú i mí Mheán Fómhair 2020 trí phlé i scríbhinn ar líne. D'ainneoin nach bhfuil clár oibre an chruinnithe sin ar fáil go fóill, agus nach bhfuil an eagraíocht agus formáid an phlé ar eolas go fóill, maidir le hítimí a bhí ar chlár oibre an chruinnithe roimhe sin (CCC/65 – Márta 2020), cruinniú a chuir EDC ar ceal de dheasca na paindéime domhanda, táthar ag súil go gcuirfear san áireamh iad i gclár oibre an chruinnithe a bheidh ar siúl i mí Mheán Fómhair.

I bhfianaise líon na n‑ítimí a n‑iarrtar ar CCC cinneadh a dhéanamh ina leith ag an gcruinniú sin, agus na héifeachtaí dlíthiúla ceangailteacha ar dhlí an Aontais atá leo, meastar go bhfuil gá le cinneadh ón gComhairle faoi Airteagal 218(9) CFAE, lena mbunaítear seasamh an Aontais maidir leis na hítimí sin, mar atá ar eolas againn, ítimí a n‑iarrfar ar CCC cinneadh a dhéanamh ina leith (i.e. Nótaí Míniúcháin, tuairimí agus cinntí maidir le rangú, treoir nó comhairle eile maidir le léirmhíniú an Chórais Chomhchuibhithe).

Maidir le hítimí eile a fhéadfar a chur san áireamh níos déanaí i gclár CCC, déileálfar leo ag tráth is faide anonn.

3.2.Cuspóir agus ábhar an togra

Na cinntí faoi chaibidil a ullmhaíonn an Coiste um an gCóras Comhchuibhithe, d'fhéadfadh na cinntí sin tionchar cinniúnach a imirt ar dhlí an Aontais, is é sin, Rialachán (CEE) Uimh. 2658/87 ón gComhairle maidir leis an ainmníocht taraife agus staidrimh agus leis an gComhtharaif Chustaim, agus an Ainmníocht Chomhcheangailte (AC) a ghabhann leis. Úsáidtear cinntí maidir le rangú, tuairimí nó leasuithe maidir le rangú ar na nótaí míniúcháin a ghabhann le hAinmníocht an Chórais Chomhchuibhithe chun tacú leis an rangú dá bhforáiltear i Rialacháin Cur Chun Feidhme an Choimisiúin maidir le rangú earraí in AC, sna nótaí míniúcháin a ghabhann le AC agus sna cinntí maidir le rangú arna n‑eisiúint ag údaráis chustaim na mBallstát. Tá ceanglas ar údaráis chustaim na mBallstát a gcinntí féin maidir le rangú a chúlghairm i gcás nach bhfuil siad ag luí a thuilleadh leis an léirmhíniú in Ainmníocht an Chórais Chomhchuibhithe mar thoradh ar na cinntí sin maidir le rangú, na tuairimí sin maidir le rangú, nó leasuithe ar Nótaí Míniúcháin an Chórais Chomhchuibhithe.

Is iomchuí, dá bhrí sin, go mbunaítear an seasamh a ghlacfar thar ceann an Aontais san Eagraíocht Dhomhanda le Cinneadh ón gComhairle a glacadh faoi Airteagal 218(9) CFAE ar bhonn togra ón gCoimisiún.

Is iad na critéir ghinearálta a shainítear i gCoinbhinsiún CC (na rialacha ginearálta maidir le léirmhíniú an Chórais Comhchuibhithe) agus gnéithe agus saintréithe oibiachtúla na n‑earraí a thug treoir do bhunú seasaimh den chineál sin.

Is é is aidhm don seasamh atá beartaithe seasamh an Aontais a chur in iúl maidir le rangú earraí in Ainmníocht an Chórais Chomhchuibhithe. Is é is aidhm dó freisin seasamh a chur in iúl i ndáil le Tuairimí maidir le Rangú agus Nótaí Míniúcháin CC a ullmhaíonn an Coiste um an gCóras Comhchuibhithe.

Rinneadh an comhairliúchán le saineolaithe teicniúla ó Bhallstáit sa Sainghrúpa Custaim ón 3 go dtí an 5 Márta 2020. Tá conclúidí an tSainghrúpa Custaim i gcomhréir leis na seasaimh a mholtar, seasaimh atá ar fáil san Iarscríbhinn a ghabhann leis an dréacht‑togra le haghaidh Cinneadh ón gComhairle.

An seasamh atá beartaithe ag an Aontas Eorpach, tá sé i gcomhréir le beartas Custaim seanbhunaithe agus le cásdlí Chúirt Bhreithiúnais an Aontais Eorpaigh chun earraí a rangú ag an bpointe allmhairithe de réir a ngnéithe agus a sainghnéithe oibiachtúla.

Tá gá leis an seasamh atá beartaithe le gur féidir leis an Aontas Eorpach seasamh a chur in iúl ag an gcéad chruinniú eile den Choiste um an gCóras Comhchuibhithe.

4.Bunús dlí

4.1.Na prionsabail

In Airteagal 218(9) den Chonradh ar Fheidhmiú an Aontais Eorpaigh (CFAE) déantar foráil maidir le cinntí lena leagtar síos ‘na seasaimh a ghlacfar thar ceann an Aontais i gcomhlacht arna chur ar bun le comhaontú nuair a iarrtar ar an gcomhlacht sin gníomhartha a ghlacadh a bhfuil éifeachtaí dlíthiúla leo, seachas gníomhartha lena bhforlíonfar nó lena leasófar creat institiúideach an chomhaontaithe.’

Áirítear ar na ‘gníomhartha a bhfuil éifeachtaí dlíthiúla leo’ gníomhartha a bhfuil éifeachtaí dlíthiúla leo de bhua rialacha an dlí idirnáisiúnta lena rialaítear an comhlacht atá i gceist. Áirítear air freisin ionstraimí nach bhfuil éifeacht cheangailteach leo faoin dlí idirnáisiúnta, ach ‘a bhféadfadh tionchar cinntitheach a bheith acu ar ábhar na reachtaíochta a ghlacfaidh reachtas an Aontais Eorpaigh’ 5 .

Dá bhrí sin, is é Airteagal 218(9) CFAE bunús dlí nós imeachta an chinnidh atáthar a mholadh lena mbunaítear an seasamh a ghlacfar thar ceann an Aontais san Eagraíocht Dhomhanda Chustaim, maidir le glacadh Nótaí Míniúcháin, Tuairimí maidir le Rangú agus comhairle eile mar threoraíocht le haghaidh léirmhíniú an Chórais Chomhchuibhithe faoin gCoinbhinsiún ar an gCóras Comhchuibhithe.

4.2.Feidhm maidir leis an gcás seo

Is comhlachtaí iad an Coiste um an gCóras Comhchuibhithe agus Comhairle EDC a bunaíodh le comhaontú, is é sin an Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí.

Gníomhartha a bhfuil éifeachtaí dlíthiúla leo atá sna gníomhartha a n‑iarrtar ar an gCoiste um an gCóras Comhchuibhithe iad a ghlacadh. Na gníomhartha atá beartaithe, ar fhormheas a fháil ó Chomhairle EDC, d'fhéadfadh na cinntí sin tionchar cinniúnach a imirt ar a bhfuil i reachtaíocht an Aontais, is é sin: Iarscríbhinn 1 a ghabhann le Rialachán (CEE) Uimh. 2658/87 ón gComhairle maidir leis an ainmníocht taraife agus staidrimh agus leis an gComhtharaif Chustaim. Is amhlaidh atá mar luaitear in Airteagal 34.7.(a)(iii) de Chód Custaim an Aontais 6 go “ndéanfaidh na húdaráis chustaim cinntí FTC 7 a chúlghairm... i gcás nach mbeidh siad ag luí a thuilleadh le léiriú... atá mar thoradh ar... cinntí maidir le rangú, tuairimí nó leasuithe maidir le rangú ar na nótaí míniúcháin a ghabhann le hAinmníocht na Tuairisce Comhchuibhithe Tráchtearra agus an Chórais um Chódú, a ghlac an Eagraíocht a bhunaigh an Coinbhinsiún lena mbunaítear Comhairle Comhair Custaim [an Coiste um an gCóras Chomhchuibhithe];”. Thairis sin, is é an Coiste a ullmhaíonn cinntí den chineál sin (cinntí maidir le rangú, tuairimí nó leasuithe ar na nótaí míniúcháin a ghabhann le hAinmníocht an Chórais Chomhchuibhithe) chun tacú leis an rangú dá bhforáiltear i Rialacháin Cur Chun Feidhme an Choimisiúin maidir le rangú earraí san Ainmníocht Chomhcheangailte (AC), sna nótaí míniúcháin a ghabhann le AC agus sna cinntí maidir le rangú arna n‑eisiúint ag údaráis chustaim na mBallstát. Leis an ngníomh atá beartaithe, ní fhorlíontar creat institiúideach an Chomhaontaithe ná ní leasaítear é.

Dá bhrí sin, is é Airteagal 218(9) CFAE an bunús dlí nós imeachta le haghaidh an chinnidh atá beartaithe.

4.3.Bunús dlí substainteach

4.3.1.Na prionsabail

An bunús dlí substainteach le haghaidh cinneadh faoi Airteagal 218(9) CFAE, braitheann sé go príomha ar chuspóir agus ábhar an ghnímh atá beartaithe agus a bhfuiltear ag glacadh seasamh thar ceann an Aontais ina leith. Má tá dhá aidhm ag an ngníomh atá beartaithe nó má tá dhá chomhpháirt ann agus más féidir ceann de na haidhmeanna nó de na comhpháirteanna sin a shainaithint mar phríomhaidhm nó mar phríomh‑chomhpháirt agus an ceann eile mar aidhm nó comhpháirt theagmhasach, ní mór an cinneadh faoi Airteagal 218(9) CFAE a bhunú ar bhunús dlí substainteach aonair, eadhon an bunús dlí a éilítear de réir na príomhaidhme nó na príomh‑chomhpháirte.

4.3.2.Feidhm maidir leis an gcás seo

Is iad Airteagal 31, Airteagal 43(2) agus Airteagal 207(4) CFAE is bunús dlí substainteach leis an gcinneadh atá beartaithe, mar go mbaineann an príomhchuspóir agus ábhar an ghnímh atá beartaithe leis an gComhtharaif chustaim.

4.4.Conclúid

Is iad Airteagail 31, 43(2) agus 207(4) CFAE, i dteannta Airteagal 218(9) CFAE, ba cheart a bheith mar bhunús dlí le haghaidh an chinnidh atáthar a mholadh.

5.Impleachtaí Buiséadacha

Níl aon impleacht ag an togra do bhuiséad an Aontais Eorpaigh.

6.Foilsiú an ghnímh atá beartaithe

Gan ann dóibh

2020/0201 (NLE)

Togra le haghaidh

CINNEADH ÓN gCOMHAIRLE

maidir leis an seasamh a ghlacfar thar ceann an Aontais le linn an 66ú seisiún den Choiste um an gCóras Comhchuibhithe san Eagraíocht Dhomhanda Chustaim i ndáil leis an nglacadh atá beartaithe ar Thuairimí maidir le Rangú, cinntí maidir le Rangú, leasuithe ar Nótaí Míniúcháin an Chórais Chomhchuibhithe nó comhairle eile maidir le léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 31 agus Airteagal 43(2) agus an chéad fhomhír d'Airteagal 207(4) CFAE de, i gcomhar le hAirteagal 218(9) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)Le Cinneadh 87/369/CEE ón gComhairle 8 d'fhormheas an tAontas an Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus an Prótacal lena ndéantar leasú air 9 (Coinbhinsiún CC), rud a bhunaigh an Coiste um an gCóras Comhchuibhithe (CCC).

(2)De bhun Airteagal 7(1) b) agus c) de Choinbhinsiún CC, tá CCC, inter alia, freagrach as Nótaí Míniúcháin, Tuairimí maidir le Rangú, comhairle eile faoi léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le léirmhíniú agus cur i bhfeidhm an Chórais Chomhchuibhithe a ullmhú.

(3)Táthar ag súil go ndéanfaidh an Coiste um an gCóras Comhchuibhithe den EDC cinneadh i ndáil le Tuairimí maidir le Rangú, cinntí maidir le rangú, leasuithe ar Nótaí Míniúcháin an Chórais Chomhchuibhithe nó comhairle eile maidir le léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe le linn an chruinnithe i mí Mheán Fómhair.

(4)Tá sé tábhachtach a mheabhrú go mbeidh an critéar cinntitheach maidir le rangú earraí, chun críche custaim, á lorg ina ngnéithe agus a sainghnéithe oibiachtúla mar a shainítear i bhfoclaíocht na gceannteideal ábhartha san ainmníocht chustaim agus i nótaí na Roinne agus na Caibidle ábhartha, de réir cásdlí socair Chúirt Bhreithiúnais an Aontais Eorpaigh, ar mhaithe le deimhneacht dhlíthiúil agus fíorú réidh.

(5)I dtaca leis na Tuairimí maidir le Rangú, cinntí maidir le rangú, leasuithe ar Nótaí Míniúcháin an Chórais Chomhchuibhithe nó comhairle eile maidir le léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe, is iomchuí an seasamh a ghlacfar thar ceann an Aontais a bhunú, mar, a luaithe a ghlacfar leo, foilseofar na Tuairimí maidir le Rangú, cinntí áirithe maidir le rangú agus leasuithe ar Nótaí Míniúcháin CC sa Teachtaireacht ón gCoimisiún faoi airteagal 34 mír 7 a) iii) de Rialachán (AE) 952/2013 ó Pharlaimint na hEorpa agus ón gComhairle an 9 Deireadh Fómhair 2013, agus tiocfaidh siad chun bheith infheidhme sna Ballstáit uile. Cuirfear an seasamh in iúl ag an gCoiste um an gCóras Comhchuibhithe.

TAR ÉIS AN CINNEADH SEO A GHLACADH:

Airteagal 1

Leagtar amach san Iarscríbhinn an seasamh a ghlacfar thar ceann an Aontais le linn an 66ú seisiún den Choiste um an gCóras Comhchuibhithe (CCC) den Eagraíocht Dhomhanda Chustaim (EDC) i ndáil le Nótaí Míniúcháin, Tuairimí maidir le Rangú nó comhairle eile faoi léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le léirmhíniú agus cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe.

Airteagal 2

Féadfar teacht ar chomhaontú maidir le mionathruithe ar an seasamh dá dtagraítear in Airteagal 1 gan an Chomhairle cinneadh eile a dhéanamh.

Airteagal 3

Dírítear an Cinneadh seo chuig an gCoimisiún.

Arna dhéanamh sa Bhruiséil,

(1)    Ó cuireadh tús leis in 1988, rinneadh athbhreithniú ar Ainmníocht CC faoi sé. Tháinig na leaganacha sin i bhfeidhm in 1996, 2002, 2007, 2012 agus 2017. Tiocfaidh an séú leagan athbhreithnithe di i bhfeidhm in 2022.

(2)    Cinneadh 87/369 ón gComhairle an 7 Aibreán 1987 maidir leis an gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus an Prótacal lena ndéantar leasú air, a thabhairt i gcrích (IO L 198, 20.7.1987, lch.1).

(3)    IO L 269, 10.10.2013, lch. 1.

(4)    COM(2020)196

(5)    Breithiúnas ó Chúirt Bhreithiúnais an Aontais Eorpaigh an 7 Deireadh Fómhair 2014, An Ghearmáin v an Chomhairle, Cás C-399/12, ECLI:EU:C:2014:2258, míreanna 61 go 64.

(6)    Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais, IO L 269, 10.10.2013, lch. 1.

(7)    Faisnéis taraife cheangailteach: cinntí maidir le rangú ó na húdaráis chustaim nó oibreoirí eacnamaíocha a dhéantar roimh ré, chun deimhneacht dhlíthiúil a chinntiú faoi rangú agus láimhseáil taraife is infheidhme maidir le hearraí faoi réir allmhairithe nó onnmhairithe. 

(8)    Cinneadh 87/369/CEE ón gComhairle an 7 Aibreán 1987 maidir leis an gCoinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí, agus an Prótacal lena ndéantar leasú air, a thabhairt i gcrích ( IO L 198, 20.7.1987, lch. 1 ).

(9)    IO L 198, 20.7.1987, lch. 3

AN COIMISIÚN EORPACH

An Bhruiséil,21.8.2020

COM(2020) 427 final

IARSCRÍBHINN

a ghabhann leis an

Togra le haghaidh Cinneadh ón gComhairle

maidir leis an seasamh a ghlacfar thar ceann an Aontais le linn an 66ú seisiún den Choiste um an gCóras Comhchuibhithe san Eagraíocht Dhomhanda Chustaim i ndáil leis an nglacadh atá beartaithe ar Thuairimí maidir le Rangú, cinntí maidir le Rangú, leasuithe ar Nótaí Míniúcháin an Chórais Chomhchuibhithe nó comhairle eile maidir le léirmhíniú an Chórais Chomhchuibhithe agus moltaí chun aonfhoirmeacht a chinntiú maidir le cur i bhfeidhm an Chórais Chomhchuibhithe faoin gCoinbhinsiún ar an gCóras Comhchuibhithe

IARSCRÍBHINN

IV. TUARASCÁIL ÓN bFOCHOISTE EOLAÍOCH: Doic. NS0456Eb (FE/35 - tuarascáil)

(1)Ábhair le haghaidh cinnidh (doic. NC2708Ea)

(a)Iarscríbhinní A/1 agus C/1 Rangú táirgí nua ANI (Liosta 120). Ba cheart don Aontas 125 rangú (Eagrán CC 2017) agus na trí athrangú iarmhartacha (Eagrán CC 2022) atá á moladh ag an bhFochoiste Eolaíoch a fhormheas.

(b)Iarscríbhinní A/2 agus C/2 – Rangú táirgí nua ANI (Liosta 121). Ba cheart don Aontas 143 rangú (Eagrán CC 2017) agus na 15 athrangú iarmhartach (Eagrán CC 2022) atá á moladh ag an bhFochoiste Eolaíoch a fhormheas.

(c)Iarscríbhinní A/3 agus C/3 – Athrangú féideartha táirgí áirithe ANI a leanann Moladh Airteagal 16 an 23 Meitheamh 2019. Ba cheart don Aontas na hathranguithe iarmhartacha (Eagrán CC 2022) den 143 táirge ANI a fhormheas, táirgí arna gcomhaontú ag an bFochoiste Eolaíoch.

(d)Iarscríbhinní B/1 agus C/6 – Cinntí a rinne an Coiste CC ag a 63ú agus 64ú Seisiún agus Comhairle EDC ag a 133ú/134ú Seisiún, lena ndéantar difear d'obair an Fhochoiste Eolaíoch. Ba cheart don Aontas na hathranguithe "zilucoplan" agus "etryptamine" a chomhaontaigh an Fochoiste Eolaíoch a fhormheas i bhfo-cheannteidil 2933.79 agus 2939.80, faoi seach.

Déanfaidh an tAontas na haicmithe uile atá beartaithe a chomhaontú de bharr go bhfuil siad i gcomhréir leis an mbeartas atá ann faoi láthair san Aontas Eorpach maidir le rangú.

(2)Leasú féideartha ar na Nótaí Míniúcháin a ghabhann le Caibidil 29 i ndáil leis an liosta drugaí támhshuanacha, substaintí síceatrópacha agus réamhtheachtaithe Doic. NC2738Ea

Comhaontóidh an tAontas an togra chun Nótaí Míniúcháin an Chórais Chomhchuibhithe a ghabhann le Caibidil 29 a leasú i gcomhréir leis an gcomhairle ón bhFochoiste Eolaíoch.

V. TUARASCÁIL Ó FHOCHOISTE ATHBHREITHNITHE AN CHÓRAIS CHOMHCHUIBHITHE (Doic. NR1403E)

(1)Ábhair le haghaidh cinnidh (doic. NC2709Ea)

(a)Iarscríbhinní D/6 agus G/11 – Leasú féideartha ar an Nóta Míniúcháin a ghabhann le ceannteideal 85.24 (CC 2022)

(b)Iarscríbhinní D/7 agus G/12 – Leasuithe féideartha ar Nóta Míniúcháin CC 2022 maidir le printéirí 3T

(c)Iarscríbhinní E/14 agus G/19 – Leasú féideartha ar na Nótaí Míniúcháin a ghabhann le ceannteideal 70.19 maidir le snáithíní gloine (CC 2022)

(d)Iarscríbhinní E/1 go E/6, E/8 go E/13, E/15 go E/18, E/20, E/23 agus G/1 go G/6, G/8, G/13 go G/18, G/21, G/22, G/24, G/27 – Leasú féideartha ar na Nótaí Míniúcháin a ghabhann le Ranna I, II, III, IV, V, VI, VII, VIII, IX, X, XI, XII, XIII, XIV, XV, XVI, XVII, XVIII, XX agus XXI.

(e)Iarscríbhinní E/23 agus G/27 – Leasuithe ar na Nótaí Míniúcháin a ghabhann le Caibidil 97 maidir le hairteagail chultúrtha áirithe (CC 2022)

(f)Iarscríbhinní E/24 agus G/28 – Leasuithe ar na Nótaí Míniúcháin (Rialacha Léirmhínithe Ginearálta)

Déanfaidh an tAontas na leasuithe uile atá beartaithe sna doiciméid a chomhaontú de bharr go léirítear iontu an beartas atá ann faoi láthair san Aontas Eorpach maidir le rangú.

(2)Rangú galaitheoirí leictreacha áirithe pearsanta nó in-athluchtaithe in CC 2022 (Iarratas ón Rúnaíocht) Doic. NC2710Eb

Rangódh an tAontas táirge 1 i bhfo-cheannteideal 8543.70 in CC2017 agus i bhfo-cheannteideal 8543.40 in CC2022. Ba cheart táirge 2 a rangú i gceannteideal 24.04 in CC2022 ag úsáid Riail Léirmhínithe Ghinearálta 3(b), bunaithe ar an ngé bhunúsach a thugann an leacht toitín leictreonach.

(3)Rangú bailiúchán áirithe agus earraí bailitheoirí inspéise ó thaobh moneolaíochta de in CC 2022 (Iarratas ón Rúnaíocht) Doic. NC2711Ea

Cuirfidh an tAontas in iúl an gá atá le faisnéis bhreise maidir leis na táirgí chun an rangú a chinneadh.

Ní chomhaontóidh an tAontas leis an togra maidir le Nótaí Míniúcháin an Chórais Chomhchuibhithe a leasú, go bhfaighfear soiléiriú agus treoir maidir leis an gcaoi a dhéantar idirdhealú idir na fo-cheannteidil nua faoi cheannteideal 97.05.

(4)Rangú cartús le haghaidh printéirí 3F in CC 2022 (Iarratas ón Rúnaíocht) Doic. NC2712Ea

Rangódh an tAontas na táirgí i gCaibidil 39 i gcomhréir leis an gcomhábhar, i gcomhréir le EUCJ Cás C-276/00. Tá gá le faisnéis bhreise chun na táirgí ar an leibhéal fo-cheannteidil a rangú. Níor cheart tacú leis an leasú atá beartaithe ar Nótaí Míniúcháin an Chórais Chomhchuibhithe, mar is den chleachtas reatha é nach n-aicmítear cartúis phrintéara mar chodanna de phrintéirí.

(5)Rangú meaisín chun bileoga a lannú i CC 2022 le haghaidh déantúsaíocht bhreisithe doic. NC2744Ea

Rangódh an tAontas an táirge i gceannteideal 84.85 (rogha II).

VI. TUARASCÁIL ÓN MEITHEAL RÉAMH-SHEISIÚNACH Doic. NC2714Ea agus Iarscríbhinní A go T

Faoi réir roinnt moltaí eagarthóireachta, glacfaidh an tAontas an téacs a chuirtear i láthair in Iarscríbhinní A go T leis na ráitis seo a leanas.

(1)Leasú ar Choimre Tuairimí maidir le Rangú chun an cinneadh chun táirge a rangú ar a dtugtar "Milka Oreo Sandwich" i gceannteideal 18.06 (fo-cheannteideal 1806.32) a léiriú

Molfaidh an tAontas go scriosfar liosta na gcomhábhar nach bhfuil riachtanach chun críoch rangaithe.

(2)Leasú ar Choimre Tuairimí maidir le Rangú chun an cinneadh chun dhá chineál cosa tobac ("Cut rolled expanded stem tobacco (CRES)" agus "Expanded tobacco stems (ETS)") i gceannteideal 24.03 (fo-cheannteideal 2403.99)

Éileoidh an tAontas go gcoinneofar an téacs "nach féidir a chaitheamh go díreach" toisc go raibh sé ina chritéar cinntitheach maidir le rangú.

(3)Leasú ar Choimre Tuairimí maidir le Rangú chun an cinneadh maidir le breosla-chealla ocsaíde soladaí (SOFC) a rangú ar a dtugtar "Bloom Energy ES-5700" i gceannteideal 85.01 (fo-cheannteideal 8501.62) a léiriú

Molfaidh an tAontas go n-úsáidfear tuairisc an táirge ó théacs boscáilte an bhundoiciméid oibre
(doc. NC2655E1b).

VII. IARRATAÍ LE hAGHAIDH ATHSCRÚDÚ (ÁBHAR AMHRAIS)

(1)Athscrúdú ar rangú píobán cothabhála cothaithe (Táirgí 1 go 5) (Iarraidh ó na Stáit Aontaithe) Doic. NC2715Ea

Rangódh an tAontas na táirgí i gceannteideal 22.02 mar dheochanna, i gcomhréir le EUCJ cás C-114/80 agus Tuairimí 2202.99/2-4 maidir le Rangú.

(2)Athscrúdú ar rangú gléas ar a dtugtar "Polar M430 GPS uaireadóir reathaíochta le monatóir ráta croí a chaitear ar an rosta" (Iarrataí ó na Stáit Aontaithe agus ón tSeapáin) Doic. NC2716Ea

Rangódh an tAontas an táirge i bhfo-cheannteideal 9102.12. mar uaireadóir rosta, i gcomhréir leis an Nótaí Míniúcháin a ghabhann leis an Ainmníocht Chomhcheangailte le haghaidh ceannteideal 91.02.

(3)Athscrúdú rangú fearas ar a dtugtar "Sterilizer Formaldehyde Formomat PL 349-2" (Iarraidh ón Úcráin) Doic. NC2717Ea

Rangódh an tAontas an táirge i gceannteideal 84.19, mar is ceannteideal sonrach é le haghaidh steirileoirí. Tarlaíonn an t-athrú teochta agus bíonn éifeacht mhór aige ar an bpróiseas steiriliúcháin. Ní chomhlíonann an fearas aon fheidhmeanna meicniúla.

(4)Athscrúdú ar rangú dhá tháirge ar a dtugtar "Gineadóirí RF agus Líonraí Meaitseála RF" (Iarraidh ón gCóiré) Doic. NC2718Ea, NC2745Eb, NC2747Ea

Rangódh an tAontas na táirge i gceannteideal 84.86 de bharr gur meaisíní inaitheanta atá iontu a úsáidtear go heisiach nó go príomha chun gléasanna leathsheoltóirí a mhonarú.

VIII. STAIDÉIR BHREISE

(1)Rangú feithidí inite (Togra ón Rúnaíocht) Doic. NC2719Ea

Tacóidh an tAontas le haistrithe féideartha ón dá cheannteideal 02.10 agus 04.10 maidir le táirge 1. D’fhéadfadh Táirge 2 a aistriú ó cheannteideal 04.10 nó ó Chaibidil 16. D’fhéadfadh Táirge 3 a aistriú ó Chaibidil 16. D’fhéadfadh Táirge 4 a aistriú ó Chaibidil 16 nó ó Chaibidil 21.

(2)Leasú féideartha ar an Nótaí Míniúcháin a ghabhann le ceannteideal 27.11 chun rangú gás peitriliam leachtaithe (GPL) a shoiléiriú (Togra ón Rúnaíocht) Doic. NC2720Ea

Tacóidh an tAontas leis an Nótaí Míniúcháin maidir leis an bhfo-cheannteidil atá beartaithe a ghabhann le fo-cheannteideal 2711.19.

(3)Leasú ar na Nótaí Míniúcháin a ghabhann le Riail 3 (b) chun rangú foirne a shoiléirí Doic. NC2721Ea

Tacóidh an tAontas leis an status quo agus cleachtais rangaithe reatha atá ann faoi láthair a choinneáil.

(4)Leasú féideartha ar an Nóta Míniúcháin a ghabhann le ceannteideal 91.02 Doic. NC2722Ea

B'fhearr leis an Aontas fanacht ar chinneadh cinntitheach maidir leis an uaireadóir "Polar" a rangú (féach pointe VII.2) sula ndéanfar Nótaí Míniúcháin an Chórais Chomhchuibhithe a leasú.

(5)Leasú féideartha ar an Nóta Míniúcháin a ghabhann le ceannteideal 87.03 Doic. NC2723Ea i ndáil le micreafheithiclí hibrideacha Doic. NC2723Ea

Tacóidh an tAontas leis an leasú ar Nótaí Míniúcháin an Chórais Chomhchuibhithe mar go soiléirítear iontu rangú an chineáil nua feithicle.

(6)Rangú feithiclí leath-hibrideacha Doic. NC2724Ea

Rangódh an tAontas an táirge i bhfo-cheannteideal 8703.40, de bharr go bhfuil an mótar leictreach ceaptha chun an fheithicil a threisiú trí thacaíocht a thabhairt d'oibríocht an innill.

(7)Rangú an táirge ar a dtugtar "DIMODAN HP M" (Iarraidh ó Eacuadór) Doic. NC2725Ea

Rangódh an tAontas an táirge i gceannteideal 34.04, mar gur deimhníodh san anailís saotharlainne go raibh saintréith chéiriúil sa táirge.

(8)Leasú féideartha ar an Nóta Míniúcháin a ghabhann le ceannteideal 95.03 (Togra ón Aontas Eorpach) Doic. NC2667Ea, NC2667Ea

Beidh an tAontas solúbtha maidir le barúlacha eagarthóireachta breise a bhaineann leis an togra bunaidh ón Aontas Eorpach.

(9)Leasú féideartha ar an Nóta Míniúcháin a ghabhann le ceannteideal 95.05 (Togra ón Aontas Eorpach) Doic. NC2668Ea, NC2668Ea

Beidh an tAontas solúbtha maidir le barúlacha eagarthóireachta breise a bhaineann leis an togra bunaidh ón Aontas Eorpach.

(10)Rangú blátholaí áirithe a chuirtear ar an margadh lena miondíol (Iarraidh ón gCósta Ríce) Doic. NC2672Ea

Rangódh an tAontas an táirge i gceannteideal 33.01. Bláthola labhandair a bhfuil alcóil aonteirpéine curtha leo atá sa táirge sin agus dá bhrí sin, níl sé dítheirpéinithe agus tá sé clúdaithe ag ceannteideal 33.01. Faightear é trí phróiseas galdriogtha agus ar an gcaoi sin, cloítear le Nótaí Míniúcháin an Chórais Chomhchuibhithe a ghabhann le ceannteideal 33.01.

(11)Rangú dhá shnasaire urláir ar a dtugtar "Galaxy Floor Machine 1500, 1.5 HP, NSS brand' agus 'Galaxy Floor Machine, 1 HP, NSS brand” (Iarraidh ón gCósta Ríce) Doic. NC2673Ea

Rangódh an tAontas na táirgí i gceannteideal 84.79. De bharr a n-airí teicniúla, ní den chineál iad a úsáidtear go coitianta chun críocha tís agus i bhfianaise Nóta 4 (a) a ghabhann le Caibidil 85, ba cheart iad a rangú i gceannteideal 84.79.

(12)Rangú "Self-Propelled Articulated Boom Lift” (Iarraidh ón gCóiré) Doic. NC2674Ea

Rangódh an tAontas an táirge i gceannteideal 84.28 bunaithe ar Rialachán 738/2000 le haghaidh táirge comhionann.

(13)Rangú ullmhóidí bia áirithe (Iarraidh ó na Stáit Aontaithe) Doic. NC2676Ea, NC2742Ea

Iarrfaidh an tAontas faisnéis bhreise i ndáil leis na ceithre tháirge lena mbaineann ar mhaithe le rangú a chinneadh.

Táirge 1: ábhar próitéine. Más an-ard, (os cionn 85 %), d'fhéadfaí ceannteideal 35.04 a mheas. D'fhéadfaí an táirge a rangú i bhfo-cheannteideal 2106.10 i gcomhréir le Tuairim 2106.90/5 maidir le Rangú, bunaithe ar fhaisnéis atá ann faoi láthair.

Táirge 2: rangódh an tAontas é i gceannteideal 22.02 más féidir é a ól go díreach, nó i gceannteideal 21.06 más cheart é a chaolú sula n-ólfar é.

Táirge 3: Rangódh an tAontas é i bhfo-cheannteideal 2101.20, mar sin féin, bheadh faisnéis bhreise faoin gcion caiféine atá ann ina chabhair.

Táirge 4: Tá tuairisc an táirge mearbhlach de dheasca nach bhfuil sé soiléir cén príomhchomhábhar atá ann. Má tá cócó ann, d'fhéadfaí é a rangú i gceannteideal 18.06, nó 19.05 mura bhfuil cócó ann.

(14)Rangú "gearrthóir/mionghearrthóir" (Iarraidh ó Chónaidhm na Rúise) Doic. NC2677Ea

Tabharfaidh an Coimisiún faoi deara go bhfágann an meaisín a bhfuil go leor feidhmeanna aige gur deacair rangú a chinneadh agus go bhféadfaí é a rangú i gceannteideal 84.30 nó 84.32, is féidir é a rangú i gceannteideal 84.32 dá bhrí sin, ag úsáid Riail Léirmhínithe Ghinearálta 3(c).

(15)Rangú aerbhoinn nua áirithe, as rubar, atá ceaptha le haghaidh feithiclí a úsáidtear le hearraí sna hearnálacha tógála, mianadóireachta nó tionsclaíochta a iompar (Iarraidh ó Chónaidhm na Rúise) Doic. NC2678Ea, NC2748Ea

Déanfaidh an tAontas comhairle ó Rúnaíocht EDC a roinnt agus an dá tháirge a rangú i bhfo-cheannteideal 4011.20.

(16)Rangú ullmhóidí áirithe de chineál a úsáidtear i mbeatha ainmhithe (Iarraidh ó Cheanada) Doic. NC2679Ea, NC2743Ea

Rangódh an tAontas an táirge i gceannteideal 23.09, bunaithe ar rialú EUCJ i gcás C-144/15.

(17)Rangú táirge ar a dtugtar "Bosca Rianúcháin Solais" (Iarraidh ón tSeapáin) Doic. NC2681Ea

Rangódh an tAontas an táirge i gceannteideal 94.05, mar go bhfuil feidhm ilúsáide aige agus nach bhfuil aon uirlisí líníochta aige.

(18)Rangú rialaitheoir leictreonach luais ar a dtugtar "KEB COMBIVERT F5” (Iarraidh ón Túinéis) Doic. NC2682Ea

Rangódh an tAontas an táirge i gceannteideal 85.04, mar atá molta ag Rúnaíocht EDC.

(19)Leasú féideartha ar an Nóta Míniúcháin a ghabhann le ceannteideal 27.10 (Togra ón tSeapáin) Doic. NC2641Ea, NC2739Ea

Staonfaidh an tAontas ó pháirt a ghlacadh i bplé toisc nach féidir an tuairim maidir le rangú a n-eascraíonn an leasú sin as a chur i bhfeidhm san Aontas Eorpach de dheasca rialú EUCJ i gcás C-330/13. Bheadh sé níos fearr smaoineamh faoi CC a leasú sa todhchaí agus Nóta 2 a athshocrú chuig Caibidil 27.

(20)Mí-ailíniú féideartha idir an téacs Béarla agus an téacs Fraincise sna Nótaí Míniúcháin a ghabhann le ceannteideal 85.01 Doic. NC2688Ea

Comhaontóidh an tAontas an leasú atá beartaithe chun an téarma "onduleur" a úsáid mar a úsáidtear i gcodanna eile d'Ainmníocht an Chórais Chomhchuibhithe.

IX. CEISTEANNA NUA

(1)Rangú coimeádán bruscair áirithe ar an tsráid (Iarraidh ón Túinéis) Doic. NC2726Ea

Rangódh an tAontas an táirge i gceannteideal 39.26. de bharr méid mór na gcoimeádán, ní le haghaidh úsáid tís. Tugann an tAontas dá aire gur cheart do thuairisc an táirge méid na gcoimeádán i lítir a áireamh.

(2)Rangú ullmhóidí áirithe bia i bhfoirm leachtach (Iarraidh ón Túinéis) Doic. NC2727Ea

Iarrfaidh an tAontas tuilleadh faisnéise maidir le hábhair na dtáirgí (uisce nó sú, substaintí olúla, comhábhair eile i dteannta vitimíní, dáileog).

(3)Rangú dhá tháirge ina bhfuil cannaibidé-ól (CBD) ar a dtugtar "FREYHERR” agus "CANABIGAL" (Iarraidh ón Rúnaíocht) Doic. NC2728Ea

Molfaidh an tAontas an t-ábhar a chur chuig an bhFochoiste Eolaíocht, ag iarraidh faisnéise maidir le (i) an bhfuil dóthain substaintí gníomhacha sna táirgí le go mbeidh éifeacht theiripeach nó phróifiolacsach acu, agus (ii) íosmhéid CBD mar shubstaint ghníomhach in aon táirge le go mbeidh éifeacht theiripeach nó phróifiolacsach aige.

(4)Rangú iasc triomaithe atá cóireáilte le huisce ina dhiaidh sin (iasc triomaithe ath-hiodráitithe) (Iarraidh ón Iorua) Doic. NC2729Ea

D’fhéadfadh an tAontas an táirge i gCaibidil 3 a rangú ach tá gá le tuilleadh faisnéise lena fháil amach an mbaineann blas agus uigeacht an táirge le hiasc triomaithe nó iasc úr.

(5)Rangú gineadóirí áirithe lena mbeirítear gal le haghaidh seomraí gaile (Iarraidh ón Éigipt) Doic. NC2730Ea

Rangódh an tAontas na táirgí i gceannteideal 84.02 mar atá beartaithe ag Rúnaíocht EDC, i gcomhréir leis an téacs ceannteidil agus Nótaí Míniúcháin an Chórais Chomhchuibhithe a ghabhann le ceannteideal 84.02.

(6)Rangú an táirge ar a dtugtar "calóga pónaire soighe" (Iarraidh ó Mhadagascar) Doic. NC2731Ea

Rangódh an tAontas an táirge i gceannteideal 23.04, ar nós an táirge de Thuairim 2304.00/1 maidir le Rangú.

(7)Rangú sorn eatónóil ina bhfuil dóire dúbailte (Iarraidh ón gCéinia) Doic. NC2732Ea

Rangódh an tAontas an táirge i bhfo-cheannteideal 7321.12., de bharr go bhfuil an breosla eatánóil i bhfoirm leachtach ag teocht an tseomra agus tá sé oiriúnach, dá bhrí sin, d’fho-cheannteideal an téacs.

(8)Rangú both idirghníomhach chun glacadh le gearáin (Iarraidh ón Éigipt) Doic. NC2733Ea

Iarrfaidh an tAontas faisnéis bhreise: an bhféadfadh an táirge feidhmiú agus cén chaoi, le gléas USB, nó an féidir é a úsáid trí scáileán tadhaill amháin.

XI. LIOSTA BREISE

(1)Rangú an táirge ar a dtugtar "diasa beaga arbhair" (Iarratas ón Aontas Eorpach) Doic. NC2736Ea

D'iarr an tAontas Tuairim maidir le Rangú.

(2)Rangú foireann gineadóireachta a ritheann ar dhíosal lena mbaineann rátáil dhá fhoinse cumhachta (Iarraidh ó Ghána) Doic. NC2737Ea

Rangódh an tAontas an táirge i bhfo-cheannteideal 8502.13.

(3)Rangú modúl TFT-LCD (Iarraidh ón gCóiré) Doic. NC2740Ea

I gcomhréir le Rialachán (CE) 957/2006 ón gCoimisiún, Rialacháin Cur Chun Feidhme (AE) Uimh. 1201/2011 agus Uimh. 1202/2011 ón gCoimisiún, agus ag féachaint do Nóta 2 (b) a ghabhann le Roinn XVI, rangódh an tAontas an táirge i bhfo-cheannteideal 8529.90.

(4)Scriosadh Tuairimí 8528.69/1 agus 8528.69/2 maidir le Rangú Doic. NC2741Ea

Toisc nach bhfuil na táirgí ar an margadh a thuilleadh, tacóidh an tAontas le scriosadh na dTuairimí sin maidir le Rangú.

(5)Rangú an táirge ar a dtugtar "púdar cócó atá díshaillte go páirteach" (Iarratas ón Aontas Eorpach) Doic. NC2746Ea

D'iarr an tAontas Tuairim maidir le Rangú.