52013PC0639

MEABHRÁN MÍNIÚCHÁIN

1.           COMHTHÉACS AN TOGRA

Faoi chuimsiú na caibidlíochta maidir leis an Rialachán Airgeadais, tháinig Parlaimint na hEorpa, an Chomhairle agus an Coimisiún ar chomhaontú an Rialachán Airgeadais a athbhreithniú chun toradh na caibidlíochta maidir leis an gcreat airgeadais ilbhliantúil do na blianta 2014‑2020 a chur san áireamh.

Dá bhrí sin, bhí an ráiteas comhpháirteach seo a leanas ó Pharlaimint na hEorpa, ón gComhairle agus ón gCoimisiún ag gabháil le glacadh an Rialacháin Airgeadais nua:

"Comhaontaíonn Parlaimint na hEorpa, an Chomhairle agus an Coimisiún go n‑athbhreithneofar an Rialachán Airgeadais chun go n‑áireofar na leasuithe is gá de bharr thoradh na caibidlíochta maidir leis an gcreat airgeadais ilbhliantúil do na blianta 2014‑2020, lena n‑áirítear na saincheisteanna seo a leanas:

- na rialacha tabhairt anonn don Chúlchiste le haghaidh Cúnaimh Éigeandála agus do thionscadail a mhaoinítear faoin tSaoráid um Chónascadh na hEorpa;

- na leithreasaí nár úsáideadh agus iarmhéid an bhuiséid a thabhairt anonn, chomh maith leis an togra gaolmhar go n‑iontrálfar iad sin i gcúlchiste d'íocaíochtaí agus do ghealltanais;

- an fhéidearthacht an Ciste Eorpach Forbraíochta a áireamh i mbuiséad an Aontais;

- na cistí atá mar thoradh ar na comhaontuithe maidir leis an gcomhrac i gcoinne na gáinneála neamhdhleathaí ar tháirgí tobac a láimhseáil."

An 27 Meitheamh 2013, rinneadh comhaontú polaitiúil idir an Pharlaimint, Uachtaránacht na Comhairle agus an Coimisiún maidir le pacáiste an Chreata Airgeadais Ilbhliantúil 2014-2020 (MFF) agus maidir le dréacht‑Rialachán Pharlaimint na hEorpa agus na Comhairle lena mbunaítear an tSaoráid um Chónascadh na hEorpa.

Déanann an togra sin modhnú ar Airteagal 13 den Rialachán Airgeadais chun na rialacha tabhairt anonn don Chúlchiste le haghaidh Cúnaimh Éigeandála agus do thionscadail a mhaoinítear faoin tSaoráid um Chónascadh na hEorpa a áireamh.

Tugadh isteach solúbthachtaí nua le haghaidh leithreasaí faoi chomhair oibleagáidí agus leithreasaí faoi chomhair íocaíochta nár úsáideadh sa dréacht‑Rialachán ón gComhairle ina leagtar síos an creat airgeadais ilbhliantúil do na blianta 2014-2020 (Rialachán CAI). Cuirfear chun feidhme iad trí bhíthin coigeartuithe teicniúla ar an CAI dá bhforáiltear sa dréacht‑Rialachán CAT agus úsáidfear iad faoi chuimsiú an nós imeachta bhuiséadaigh de bhun Airteagal 314 den Chonradh ar Fheidhmiú an Aontais Eorpaigh. Dá bhrí sin, níl tuilleadh modhnuithe ar an Rialachán Airgeadais de dhíth chun críche na solúbthachtaí sin.

Maidir leis an gCiste Eorpach Forbraíochta (CEF) agus faoi mar a luaigh an Chomhairle Eorpach an 8 Feabhra 2013, tá sé beartaithe ag an gCoimisiún a mholadh go mbuiséadófar an CEF ó 2021 amach.

Níor thángthas ar aon chomhaontú eile i gcomhthéacs an chreata airgeadais ilbhliantúil do na blianta 2014-2020 maidir leis na cistí atá mar thoradh ar na comhaontuithe maidir leis an gcomhrac i gcoinne na gáinneála neamhdhleathaí ar tháirgí tobac a láimhseáil. Dá bhrí sin, leanfaidh an Coimisiún de na comhaontuithe a chur chun feidhme agus molfaidh sé, mar a rinne sé sa togra uaidh do chlár Hercule III, na hacmhainní airgeadais a theastaíonn ón AE chun smuigléireacht toitíní agus góchumadh a chomhrac, sa bhreis ar na hiarrachtaí atá á ndéanamh ag na Ballstáit.

2.           TORTHAÍ AN CHOMHAIRLIÚCHÁIN LEIS NA PÁIRTITHE LEASMHARA AGUS MEASÚNUITHE TIONCHAIR

Ní dhearnadh aon chomhairliúchán poiblí ós rud é nach ndéanann an togra seo ach toradh na caibidlíochta maidir leis an gcreat airgeadais bliantúil do na blianta 2014-2020 a chur chun feidhme agus nach bhfuil ach raon feidhme an‑teoranta aige.

3.           EILIMINTÍ DLÍ AN TOGRA

Déantar foráil in Airteagal 9(2) den dréacht‑Rialachán CAI go socrófar méid bliantúil an Chúlchiste le haghaidh Cúnaimh Éigeandála ag EUR 280 milliún (praghsanna 2011) agus go bhféadfar é a úsáid suas go bliain n+1 i gcomhréir leis an Rialachán Airgeadais. Iontrálfar an Cúlchiste mar fhoráil i mbuiséad ginearálta an Aontais. Tarraingeofar as an gcuid den mhéid bliantúil a tháinig ón mbliain roimhe i dtús báire. Rachaidh an chuid sin den mhéid bliantúil ó bhliain n nach n‑úsáidfear i mbliain n+1 i léig.

Tá dhá mhodhnú ar Airteagal 13 den Rialachán Airgeadais de dhíth dá bhrí sin: an Cúlchiste le haghaidh Cúnaimh Éigeandála a chur isteach in Airteagal 13(2) den Rialachán Airgeadais, agus mar eisceacht in Airteagal 13(6), toisc go n‑iontráiltear na leithreasaí comhfhreagracha sa bhuiséad faoi Theideal 40 (cúlchistí) mar fhoráil.

Maidir leis an riail tabhairt anonn do thionscadail a mhaoinítear faoin tSaoráid um Chónascadh na hEorpa, tá sé beartaithe ag an gCoimisiún cheana féin an Rialachán Airgeadais a mhodhnú sa mheabhrán míniúcháin a ghabhann leis an togra le haghaidh Rialacháin ón gComhairle lena leagtar síos an creat airgeadais ilbhliantúil do na blianta 2014‑2020, chun gur féidir na leithreasaí faoi chomhair oibleagáidí go dtí an bhliain n+1 a thabhairt anonn[1]. De bharr chineál na dtionscadal bonneagair sin, i neart cásanna beidh nósanna imeachta casta conarthacha de dhíth.  Faoi na cúinsí sin, d'fhéadfadh caillteanas i leithreasaí bliantúla faoi chomhair oibleagáidí a bheith mar thoradh ar mhoilleanna teoranta féin agus d’fhéadfadh siad an bonn a bhaint d'inmharthanacht na dtionscadal sin agus dá bhrí sin de chinneadh polaitiúil an Aontais a líonraí iompair, fuinnimh agus teileachumarsáide agus a bhonneagar a nuachóiriú.

Sa téacs comhréitigh a comhaontaíodh don tSaoráid um Chónascadh na hEorpa, rinneadh foráil don mhéid seo a leanas in Airteagal 19:

"Leithreasaí nach n‑úsáidtear faoi dheireadh na bliana airgeadais dá n‑iontráiltear iad, tabharfar anonn iad i gcomhréir le Rialachán (AE) Uimh. XXXX/2012 [Rialachán Airgeadais Nua]."

De réir fhriotal an Rialacháin Airgeadais mar atá faoi láthair, ní fhéadfaí leithreasaí faoi chomhair oibleagáidí a thabhairt anonn go n+1, agus dá bhrí sin ní mór an Rialachán Airgeadais a mhodhnú toisc gur maolú ar phrionsabal na bliantúlachta é. Dá réir sin, ní mór Airteagal 13(2) den Rialachán Airgeadais a leasú d'fhonn leithreasaí faoi chomhair oibleagáidí nach n‑úsáidtear faoi dheireadh bliana airgeadais a thabhairt anonn go huathoibríoch go dtí an chéad bhliain airgeadais eile le haghaidh tionscadal a mhaoinítear faoin tSaoráid um Chónascadh na hEorpa.

2013/0313 (COD)

Togra le haghaidh

RIALACHÁIN Ó PHARLAIMINT NA hEORPA AGUS ÓN gCOMHAIRLE

lena leasaítear Rialachán (AE, Euratom) Uimh. 966/2012 maidir leis na rialacha airgeadais is infheidhme maidir le buiséad ginearálta an Aontais agus lena n‑aisghairtear Rialachán (CE, Euratom) Uimh. 1605/2002 ón gComhairle

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 322 de, i gcomhar leis an gConradh ag bunú an Chomhphobail Eorpaigh do Fhuinneamh Adamhach, agus go háirithe Airteagal 106a de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na parlaimintí náisiúnta,

Ag féachaint don tuairim ón gCúirt Iniúchóirí[2],

Ag gníomhú dóibh i gcomhréir leis an ngnáthnós imeachta reachtach[3],

De bharr an méid seo a leanas:

(1)       Glacadh Rialachán (AE, Euratom) Uimh. 966/2012 ó Pharlaimint na hEorpa agus ón gComhairle[4] an 25 Deireadh Fómhair 2012 agus ag gabháil leis bhí ráiteas comhpháirteach ó Pharlaimint na hEorpa, ón gComhairle agus ón gCoimisiún inar cinneadh an Rialachán Airgeadais a athbhreithniú chun toradh na caibidlíochta maidir leis an gcreat airgeadais ilbhliantúil do na blianta 2014-2020 a chur san áireamh.

(2)       Tar éis teacht ar chomhaontú polaitiúil maidir leis an gcreat airgeadais ilbhliantúil do na blianta 2014-2020 agus maidir le bunú na Saoráide um Chónascadh na hEorpa, agus i gcomhréir leis an ráiteas comhpháirteach, is gá Rialachán (AE, Euratom) Uimh. 966/2012 a leasú chun na rialacha tabhairt anonn don Chúlchiste le haghaidh Cúnaimh Éigeandála agus do thionscadail arna maoiniú faoin tSaoráid um Chónascadh na hEorpa a áireamh..

(3)       Maidir leis an gCúlchiste le haghaidh Cúnaimh Éigeandála, tá na leithreasaí a ghabhann leis iontráilte sa Teideal 'Cúlchiste' den bhuiséid. Dá bhrí sin, ní foláir Rialachán (AE, Euratom) Uimh. 966/2012 a leasú chun foráil a dhéanamh maidir leis na leithreasaí a cuireadh i gcúlchiste agus nár úsáideadh i mbliain n a thabhairt anonn go bliain n+1.

(4)       De bharr chineál na dtionscadal a mhaoinítear faoin tSaoráid um Chónascadh na hEorpa, i neart cásanna beidh nósanna imeachta casta conarthacha de dhíth. Faoi na cúinsí sin, d'fhéadfadh caillteanas i leithreasaí bliantúla faoi chomhair oibleagáidí a bheith mar thoradh ar mhoilleanna teoranta féin agus d’fhéadfadh siad an bonn a bhaint d'inmharthanacht na dtionscadal sin agus dá bhrí sin de chinneadh polaitiúil an Aontais a líonraí iompair, fuinnimh agus teileachumarsáide agus a bhonneagar a nuachóiriú. D'fhonn an méid sin a chosc, ba cheart foráil a dhéanamh i Rialachán (AE, Euratom) Uimh. 966/2012 maidir le leithreasaí faoi chomhair oibleagáidí nach n‑úsáidtear faoi dheireadh bliana airgeadais a thabhairt anonn go huathoibríoch go dtí an chéad bhliain airgeadais eile le haghaidh tionscadal a mhaoinítear faoin tSaoráid um Chónascadh na hEorpa,

TAR ÉIS AN RIALACHÁN SEO A GHLACADH:

Airteagal 1 Leasuithe ar Rialachán (AE, Euratom) Uimh. 966/2012

Leasaítear Airteagal 13 de Rialachán (AE, Euratom) Uimh. 966/2012 mar seo a leanas:

(1)          Cuirtear na pointí seo (c) agus (d) le mír 2:

"(c) méideanna a fhreagraíonn do leithreasaí faoi chomhair oibleagáidí don Chúlchiste le haghaidh Cúnaimh Éigeandála.

"(d) méideanna a fhreagraíonn do leithreasaí faoi chomhair oibleagáidí le haghaidh tionscadal a mhaoinítear faoin tSaoráid um Chónascadh na hEorpa".

(2)          Cuirtear an dara fomhír seo a leanas le mír 2:

"Féadfar na méideanna dá dtagraítear i bpointí (c) agus (d) den chéad fhomhír a thabhairt anonn go dtí an chéad bhliain airgeadais eile amháin."

(3)          Cuirtear an méid seo a leanas in ionad mhír 6:

"6. Gan dochar do phointe (c) d'Airteagal 13(2) agus d'Airteagal 14, ní fhéadfar leithreasaí a cuireadh i gcúlchiste agus leithreasaí le haghaidh caiteachais foirne a thabhairt anonn. Chun críche an Airteagail seo, folaíonn caiteachas foirne luach saothair agus liúntais chomhaltaí agus fhoireann na n‑institiúidí a bhfuil feidhm ag na Rialacháin Foirne maidir leo".

Airteagal 2 Teacht i bhfeidhm

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus infheidhme go díreach i ngach Ballstát.

Arna dhéanamh sa Bhruiséil,

Thar ceann Pharlaimint na hEorpa              Thar ceann na Comhairle

An tUachtarán                                               An tUachtarán

[1]               COM(2011) 398 final, pointe 1.2.2

[2]               IO C

[3]               Seasamh ó Pharlaimint na hEorpa an XXXX agus Cinneadh ón gComhairle an XXX.

[4]               Rialachán (AE, Euratom) Uimh. 966/2012 ó Pharlaimint na hEorpa agus ón gComhairle an 25 Deireadh Fómhair 2012 maidir leis na rialacha airgeadais is infheidhme maidir le buiséad ginearálta an Aontais agus lena n‑aisghairtear Rialachán (CE, Euratom) Uimh. 1605/2002 (IO L 298, 26.10.2012, lch. 1).