(1)

Le Rialachán (AE) 2021/1232 ó Pharlaimint na hEorpa agus ón gComhairle (3) déantar foráil maidir le córas sealadach a mhéid a bhaineann le húsáid teicneolaíochtaí ag soláthraithe áirithe seirbhísí cumarsáide idirphearsanta atá ar fáil go poiblí chun mí-úsáid ghnéasach leanaí ar líne a chomhrac, go dtí go ndéanfar creat dlíthiúil fadtéarmach lena dtugtar aghaidh ar mhí-úsáid ghnéasach leanaí ar líne a chosc agus a chomhrac (‘an creat dlíthiúil fadtéarmach’) a ullmhú agus a ghlacadh. Tá feidhm ag an Rialachán sin go dtí an 3 Lúnasa 2024.

(2)

An togra le haghaidh Rialachán ó Pharlaimint na hEorpa agus ón gComhairle lena leagtar síos rialacha chun mí-úsáid ghnéasach leanaí a chosc agus a chomhrac, a ghlac an Coimisiún an 11 Bealtaine 2022, is é is aidhm don togra an creat dlíthiúil fadtéarmach sin a sholáthar. Mar sin féin, níor cuireadh tús leis an gcaibidlíocht idirinstitiúideach maidir leis an togra sin go fóill agus tá sé cinnte nach dtabharfar i gcrích í in am chun an creat dlíthiúil fadtéarmach, lena n-áirítear aon leasuithe ar Rialachán (AE) 2021/1232 a d’fhéadfadh a bheith ann, a ghlacadh, a theacht i bhfeidhm agus a chur i bhfeidhm faoin 4 Lúnasa 2024.

(3)

Tá sé tábhachtach go bhféadfar mí-úsáid ghnéasach leanaí ar líne a chomhrac go héifeachtach, i gcomhréir leis na rialacha is infheidhme de dhlí an Aontais, lena n-áirítear na coinníollacha a leagtar amach i Rialachán (AE) 2021/1232, agus gan bhriseadh go dtí go dtabharfar an chaibidlíocht idirinstitiúideach maidir leis an togra le haghaidh creat dlíthiúil fadtéarmach i gcrích agus go dtí go nglacfar é, go dtí go dtiocfaidh sé in bhfeidhm, agus go dtí go gcuirfear i bhfeidhm é. Cuireann na comhreachtóirí in iúl go bhfuil siad tiomanta do theacht ar chomhaontú maidir leis an gcreat dlíthiúil fadtéarmach a luaithe is féidir, agus d’fhonn aon síntí breise ar Rialachán (AE) 2021/1232 a sheachaint amach anseo.

(4)

I bhfianaise na n-imthosca ar leith, ba cheart Rialachán (AE) 2021/1232 a leasú chun síneadh a chur lena thréimhse feidhme ar feadh tréimhse ama atá teoranta go dtí an méid a bhfuil géarghá léi chun an creat dlíthiúil fadtéarmach a ghlacadh agus chun go dtiocfaidh sé i bhfeidhm. Tá sé ríthábhachtach a thabhairt faoi deara gur síneadh eisceachtúil é an síneadh sin agus nár cheart fasach a bhunú leis le haghaidh síntí breise. Ceapadh Rialachán (AE) 2021/1232 ar dtús mar ionstraim idirthréimhseach shealadach a fheidhmíonn mar nasc idir cur chun feidhme Threoir (AE) 2018/1972 ó Pharlaimint na hEorpa agus ón gComhairle (4), lenar tugadh seirbhísí cumarsáide idirphearsanta neamhspleách ar uimhir laistigh de raon feidhme Threoir 2002/58/CE ó Pharlaimint na hEorpa agus ón gComhairle (5) ón 21 Nollaig 2020, agus bunú an chreata dhlíthiúil fhadtéarmaigh. Murab ionann agus a bhfuil na comhreachtóirí ag súil leis, is gá síneadh a chur le cur i bhfeidhm Rialachán (AE) 2021/1232, toisc nach ann do chreat dlíthiúil fadtéarmach comhaontaithe.

(5)

De bhun Rialachán (AE) 2021/1232, chun go mbeidh feidhm ag an maolú sealadach ar fhorálacha áirithe de Threoir 2002/58/CE, ceanglaítear ar sholáthraithe seirbhísí cumarsáide idirphearsanta neamhspleách ar uimhir tuarascáil a fhoilsiú agus a chur faoi bhráid an údaráis mhaoirseachta inniúil agus an Choimisiúin maidir le próiseáil sonraí pearsanta faoin Rialachán sin.

(6)

I bhfianaise na tuarascála ón gCoimisiún ar chur chun feidhme Rialachán (AE) 2021/1232, is gá tuairisciú don Choimisiún ó na Ballstáit agus ó sholáthraithe seirbhísí cumarsáide idirphearsanta neamhspleách ar uimhir araon a fheabhsú. Tá sé tábhachtach a chur i bhfáth freisin gur cheart don Choimisiún tuairisciú ar chur chun feidhme Rialachán (AE) 2021/1232 ar bhealach tráthúil.

(7)

Chun tuairisciú ó sholáthraithe seirbhísí cumarsáide idirphearsanta neamhspleách ar uimhir a éascú, go háirithe chun a áirithiú go bhfuil a dtuarascálacha meaisín-inléite agus so-inrochtana, ba cheart formáid choiteann tuairiscithe a bhunú le haghaidh na dtuarascálacha sin.

(8)

Chun coinníollacha aonfhoirmeacha a áirithiú maidir le hAirteagal 3(1), pointe (g)(vii), de Rialachán (AE) 2021/1232 a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (6).

(9)

I bhfianaise an ghá atá ann deimhneacht dhlíthiúil a áirithiú, ar bhealach tráthúil agus i bhfianaise chineál teoranta na leasuithe dá bhforáiltear sa Rialachán seo, eadhon síneadh a chur le tréimhse chur i bhfeidhm an chórais shealadaigh agus cumhachtaí cur chun feidhme a thabhairt don Choimisiún chun formáid choiteann tuairiscithe a bhunú, is iomchuí a fhoráil gur cheart go dtiocfadh an Rialachán seo i bhfeidhm a luaithe is féidir.

(10)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (7) agus thug an Maoirseoir tuairim an 24 Eanáir 2024.

(11)

Dá bhrí sin, ba cheart Rialachán (AE) 2021/1232 a leasú dá réir sin,

(1)

in Airteagal 3, cuirtear an mhír seo a leanas leis:

(2)

in Airteagal 9, cuirtear an méid seo a leanas in ionad mhír 1:

(3)

cuirtear an t-airteagal seo a leanas isteach:

(4)

in Airteagal 10, cuirtear an méid seo a leanas in ionad an dara mír:

‘Beidh feidhm aige go dtí an 3 Aibreán 2026.’.